Alternatibaren Mahai Internazionalistatik maiatzaren 3an Venezuelaren burujabetasunaren aurka egindako erasoa salatu nahi dugu. Erasoak, Kolonbia eta Estatu Batuen laguntzarekin, berriro ere, Nicolas Maduroren gobernu zilegia bertan behera uzteko helburua zuen.
Gogoratu beharra dago, pandemia egoeran, Estatu Batuetako gobernuak Venezuelaren kontrako santzioak gogortu dituela, narkoterrorismoaren aitzakia merkea erabiliz eta “trantsizio” proposamen esku hartzaileak proposatuz.
Badira asteak salatzen ari garela Hego Komandoaren presentzia eta itsas ontzien zein tropen mobilizazioa Venezuelako mugetatik gertu.
Beste behin argi geratu da, herritarren bizi baldintzak aldatzeko ahaleginetan ari diren prozesu eraldatzaileak eta demokratikoak, mehatxu direla botere faktiko handientzat; batez ere, natur baliabide handiak dituzten lurraldeetan, euren burujabetasuna une oro mehatxatua delarik.
Hau guztia dela eta, Estatu Batuak zein bere aliatuak burutzen ari diren santzio ekonomiko eta politikoak bertan behera uztea exijitzen dugu.
