Alternatibak dio hauteskundeak aurreratzeak ateak zabaltzen dizkiola Legebiltzar demokratikoari eta benetako aldaketa sozialari

Alternatibak gaur azaldu duenez, Euskal Autonomia Erkidegoko hauteskundeak aurreratzeak “ateak zabaltzen dizkio Legebiltzar demokratikoari eta herri honetako ezkerreko indarren bat egitearekin etorriko den benetako aldaketa sozialari”.

Alternatibako bozeramaile Oskar Matutek, gogorarazi du, hauteskunde deialdia aurreratuko ez zuela  hainbestetan errepikatu ondoren, Patxi Lópezek azaldu egin beharko duela zergatik aldatu duen iritzia: “Hiritarrek informazio argi eta gardena eskatzen diote klase politikoari eta ez datuak ezkutatzea eta opakutasuna”.

Matuteren ustez, hauteskunde aurrerapen honekin, “Lópezek ezkutatu egin nahi ditu PPrekin elkar hartutako agintaldian aplikatu dituen politika neoliberalak eta egin dituen murrizketa sozialak. Baina Euskal Herrian urteak daramatzagu politika neoliberalak jasaten, egungo gainbehera ekonomikora eraman gaituzten eta porrot egin duten gobernuen eskutik”.

Horregatik, Alternatibako bozeramaileak argi esan du: “Bada garaia krisitik ateratzeko ezkerreko eredu baten aldeko apustua egitekoa, sistema kapitalistak eraman gaituen prekarietate egoera eta eskubide sozialen murrizketen aurrean dugun aukera bakarra delako”. Matuteren hitzetan, hauteskundeak aurreratzeak “ateak zabaltzen dizkio Legebiltzar benetan demokratikoa sortzeari, indar politiko guztiak ordezkatuta izango dituen Legebiltzarrari, eta baita herri honetako ezkerreko indarren bat egitearekin etorriko den benetako aldaketa sozialari”.

PPren gobernuak muturrerainoko jolas makabroa egin du, estatuko legalitateak berak dioenari bizkar emanez

Euskal Herria Bilduk prentsaurrekoa eskaini du gaur goizean Iosu Uribetxeberria preso gaixoaren berehalako askatasuna eskatzeko. Aralar-eko Josu Murgia, EA-ko Elena Gartzia, Alternatibako Oskar Matute eta Ezker Abertzaleko Maribi Ugarteburu agertu dira prentsa aurrean. Hona hemen prentsaurrekoan esandakoa:

Lehenik eta behin, Josu Uribetxebarriaren berehalako askatasuna berriro exijitu behar dugu. Bere egoera ezin da okerragoa izan. Ez dago inongo aitzakiarik ez askatzeko. Beste kasu batzuetan demostratua geratu da nola justiziaren mekanismoak berehala aktibatzen diren, baina kasu honetan, urgentea denean, ez. Justizia eta legea ez du berdin aplikatzen Estatu Espainolak kasu guztietan eta hori agerian dago.

Estatu espainolaren agintariak burokraziaren atzean gordetzen ari dira. Baina ez dute inor engainatzen, bere espetxe politika ankerrak eragin du Iosuren egoera larria. Espainiar Gobernua da azkeneko asteetan gertatzen ari denaren errudun bakarra.

Iosu Uribetxebarria, dagoen egoeran egonik, minbizi terminalaz gaixo eta 10 egunez gose greban, ordu bat ere gehiago ezin dute preso atxiki. Larrialdi humanitario baten aurrean gaude.

Iosu Uribetxebarria presoaren inguruan gertatu dena sekula ere gertatu behar ez zenaren kronika da. Sekula gehiago gaixorik den preso batekin gertatu behar ez dena. PPren gobernuak modurik krudelenean eta ulertezinenean muturrerainoko jolas makabroa egin du pertsona baten bizitzarekin, estatuko legalitateak berak dioenari bizkarra emanez. Talionen legea, mendekuaren legea, bihurtu dute estatuaren politikaren ardatz euskal preso politikoekiko, eta Iosu Uribetxebarriarekin gertatutakoa horren muturreko adibidea izan da.

Ezin da ahaztu duela 7 urte jada diagnostikatu ziotela minbizia lehenbiziko aldiz Uribetxebarriari, eta harrez gero modu irregularrean mantendu dutela preso, gaixotasun larriei buruz espetxe legediak berak dioena aintzat hartu gabe. Abuztuaren 1ean metastasia diagnostikatu izanak larritasuna maila gorenera eraman zuen, gaixotasunaren atzeraezintasuna eta hilzori egoera begi bistan utziz. Eta hala ere, beste 17 egun luze igaro dira, kasuaren larritasunak eskatzen zuen berehalako erantzun humanitarioari muzin eginda. Espainiako estatuak heriotzaren korridorean mantendu du Iosu, zuzenbide estatu batek izan beharko lukeen jokabidearen kontrakoa aplikatuz.

Sekula ere ailegatu behar ez zuen egoera horretan, Iosu bera gose greban sartu izanak larritasuna areagotu du. Osasunerako eta duintasunerako edozein gaixok daukan eskubidea erreklamatu du Iosuk, ez gehiago eta ez gutxiago.

Jendearen erantzuna eta mobilizazioa, zoritxarrez, funtsezkoak izan dira. Bestela Josuren kasua, beste askotan gertatzen den bezala, oharkabean pasatuko zen. Azken aste eta egunotan preso politikoen aldetik eta herritarren aldetik egon den elkartasun eta salaketa uholdea eredugarria izan dela deritzogu: modu baketsuan kalera atera da giza eskubideen errespetu mezua, Iosu eta gaixo diren beste 13 preso politikoak berehala aska ditzatela eskatuz.

Zoritxarrez, mobilizazio eta ekimen horiek guztiak egin ez balira, gaiak daukan larritasunaren kontzientzia nekez hedatuko zen egin den bezala, Euskal Herrian zein nazioartean. Zoritxarrez, herritarren mobilizaziorik gabe, behin eta berriro ikusten dugu PPren gobernua bakearen kontrako norabidean tematua dagoela, eta euskal preso politikoen eskubideen etengabeko urraketa darabilela, baita gaixo larrien kasuan ere.

Beste 13 euskal preso politiko gaixotasun larriekin daudela ezin dugu ahaztu. Salbuespenezko neurri anti-humanitarioa da pertsona horiek preso mantentzea. Espainiako gobernuak berehala aska ditzan etengabe jarraitu behar dugu eragile sozial eta politikoak eta herritarrak elkarrekin mobilizatzen, giza eskubide guztiak euskal herritar guztientzako bete daitezen. Ez dugu beste horrelako kasurik nahi.

Uribetxeberriaren inguruan pasa den abuztuaren 1etik hona gertatutako guztiaren baitan, aipagarria da EHBilduren ustez Euskal Herriko beste eragile politikoek jokatutako papera. PPk berriro ere erakutsi du bakearen kontrako abanderatua dela; sufrimenduaren apologia eta mendekuaren diskurtsoa astindu du. Jarrera hori, salagarria izateaz gain demokraziaren eta eskubideen ikuspegitik, gero eta ulertezinagoa da, bai Euskal Herrian, bai nazioartean.

Aipagarria eta txalogarria deritzogu PSFko Ipar Euskal Herriko bi diputatuek, Alaux eta Capdeviellek gaiarekiko lehen unetik erakutsitako engaiamendua, mobilizazio herritarrean parte hartuz eta barne ministroarekiko gestioak egingo dituztela aginduz.

Ordea, faltan bota dugu antzeko jarrera humanoa eta maila politikoa PSErengan eta EAJrengan.

Siglen gainetik, herri honetako kultura politiko guztiak izan beharko ginateke gai funtsezko gaietan oinarrizko akordioetara iritsi eta horien alde lan egiteko. Eta pertsona guztien oinarrizko eskubideen errespetua gai ardatza da, noski. Euskal Herrian bizi dugun egoera berriak politika konpromisoz eta maiuskulekin egitea eskatzen digu, fribolitateak alde batera utzita.

EHBilduk bat egiten du Herrira mugimenduak biharko egin duen urgentziazko deialdiarekin. Bihar 12:30ean Euskalduna jauregi aurrean batzeko deia egiten diegu giza eskubideen alde dagoen Euskal Herritar orori «Giza eskubide guztiak, euskal presoak Euskal Herrira» lelopean. Ordurako, Iosu Uribetxeberria Arrasaten edo harako bidean egon beharko luke. Hala bedi. Horrela bada, arnasa sakon hartuta eta indarberriturik eskatuko dugu beste 13 preso gaixo larrien berehalako askatasuna. Baita euskal preso politikoen zigor luzapena eta sakabanaketa bukatzea ere.

Ondare publikoa operazio espekulatiboetan erabiltzea salatu du EH Bilduk, Euskaltel dela eta

Euskal Herria Bilduk atzo Eusko Legebiltzarrean PNV, PP eta PSEren babesarekin hartutako erabakia salatzen du, baimena ematen zaiolako Eusko Jaurlaritzari telekomunikazio sare publikoa Euskalteli saltzeko. Orain arte, eta telekomunikazio sarea jaio zenetik, Euskaltelek alokairuan erabiltzen zuen. Erabaki hau sektore publikoaren deuseztapenean beste urrats bat da baina oraingo honetan are larriagoa da gardentasun eza nabaria delako eta operazio berari espekulazio kiratsa dariolako.

Berriro ere, alderdi eskuindarrek beraien liskarrak ahaztu eta sektore publikoaren pribatizazio politikak aurrera ateratzeko bat egiten dute, eta PSE-k politika horiei ez die aurre egiten, okerrago oraindik, laguntzaile bihurtzen da.

Lehen fase batean, Eusko Jaurlaritzak orain Euskaltelek alokairuan erabiltzen duen telekomunikazio sare publikoa salduko dio Euskalteli. Salmenta honen helburua Eusko Jaurlaritzak dirua lortzeko saldu nahi dituen akzio publikoak erakargarriagoak bihurtzea da. Euskaltelek aldiz, akziotan ordainduko dio Eusko Jaurlaritzari eta ez dirutan.

Bigarren fase batean salmenta egingo da, ziur asko Kutxabank-eko akzioekin batera. Eusko Jaurlaritzak %5 azpitik utzi nahi du bere partizipazioa Euskaltelen eta Kutxabank-ek, orain akzio gehien duen enpresak, %50aren azpitik. Operazio honekin Kutxabank-ek bere balantzetik kendu nahi ditu Euskaltelen emaitzak eta Euskaltelek Orangeri ordaindu behar dion 222 milioi euroko isuna ordaintzeko eman zion kreditua.

Azken finean, ondare publikoa enpresa pribatuen eskuetan jartzeko diseinaturiko operazio baten aurrean gaude, gardentasunik gabe egindakoa, espekulazio kiratsa dariona eta, azken finean, sektore publikoaren deuseztapenean urrats berri bat suposatzen duena. Mozkinak aterako dituzten bakarrak Euskalteleko akziodunak, Kutxabank-eko akziodunak eta Euskaltel-eko akzioen ustezko erosleak dira. Bitartean, euskal gizarteak bere zergekin lortutako ondare publikoaren desagerpena eta Eusko Jaurlaritzak Sektore estrategikotatik inbertsioak kentzen dituela ikusiko du, egun Euskaltelen kudeaketa txarra oraindik txarragoa eginez.

Soberanía alimentaria y las PAC / Elikadura subiranotasuna eta NPB

A lo largo de los últimos días hemos podido leer declaraciones de Antonio Basagoiti en las que señalaba que EH Bildu pretendía que “nos matemos y comamos los vascos unos a otros por su independencia” por haber presentado un grupo de trabajo en pro de la soberanía alimentaria, o el ultimo artículo de opinión de Iñaki Ezkerra en el que indicaba que la propuesta de soberanía alimentaria de EH Bildu haría que “Al vasco se le distinguiría antropológicamente porque le saldrían los pimientos de Gernika por las orejas, el txakoli gorri de Bakio y las alubias de Tolosa”. Para poder contextualizar, y así poder entender, ese discurso se nos ocurren dos posibles razones; crear opinión partiendo de la falta de conocimiento o partiendo de la falta de rigor, falacias y prejuicios. Para ellos (y para el que quiera), va dirigido este video explicativo.

Antonio Basagoitik eta beste hainbatek asteotan botatako astakerien ostean, EhBilduk Elikadura Subiranotasunaren aldeko lan taldea martxan jarri izanaren harira; argigarria izan daiteke elikadura subiranotasuntaz ari garenean zertaz ari garen argitzea. Bide honek horretarako aukera bikaina ematen du oso modu errazean (gazteleraz baino ez dago).

Alternatibak elkartasuna adierazi dio SAT sindikatuari eta bere militanteen aurkako jazarpenari uzteko exijitu dio Madrilgo gobernuari

Alternatibako bozeramaile Asier Vegak bere alderdiaren elkartasuna adierazi nahi izan dio gaur Andaluziako Langileen Sindikatuari (SAT), “egunotan Alderdi Popularraren jazarpena pairatzen ari dena, atxilotze aginduak eta salaketa mehatxuak direla medio” merkatal gune handietan eginiko ekintzaren ostean, zeinetan langileek ezinbesteko elikagaiak eraman zituzten beharrizan handienak dituztenen artean banatzeko.

Vegak gogorarazi eta sindikatuko ordezkariek baieztatu dutenez, “gizartea esnarazi eta matxinadarako deia izan da ekintza, herriaren kontrako erasoak eta murrizketak gero eta jasanezinagoak diren unean”. Hala, Andaluzian SATeko militanteak atxilotzen ari diren egun berean AEBetako justizia departamentuak finantzen krisiaren sustatzaile handienetako bat Goldman Sachs enpresaren agintarien aurka egiteko funtsik ez duela iragarri izana ironikoa bezain adierazgarria dela uste du.

Alternatibatik SATeko militanteen atxiloketak gelditzeko exijitu du, “aberatsenak babesten dituen gobernu baten menpekotasunari bakarrik erantzuten diotelako, herritar xumeen egoera larria arintzeko ezer egiten ez duen bitartean”. Alderdi ezkertiarreko ordezkariak, halaber, Mercadona bezalako elikadura sektoreko supermerkatu kateek zaborrera botatzen duten elikagai kopuru handiaz ohartarazi du, gero eta pertsona gehiago pobrezian bizi direnean. Errealitate gordin honek ere “zilegi egiten du ezinbesteko elikagaiak desjabetzea beharrezkoak dituztenei helarazteko, Andaluzian egin bezala”.

Vegak nabarmendu du, gainera, Juan Roig Mercadonako presidentea ez dela bereziki eredugarria, adibide batzuk aipatzearren: “Lan erreforma are gogorrago baten alde egin du; Greenpeacek 2011ko 40 enpresarik txarrenen artean sailkatu du Mercadona, bere hornitzaileak aukeratzean Marokoren sahararren gaineko zapalketa sustatzen duelako; horrez gain, bere supermerkatuetan lan egiten duten emakumeei makillatzera behartzen ditu”.

Ildo beretik, bozeramaileak “krisia sortu eta harekin espekulatzen eta aberasten ari direnen logikari erantzuteko beharra azpimarratu du, gero eta baliabide zein eskubide gutxiago dituzten pertsonen lepotik egiten dutelako”. Horrexegatik, herritarrak pobreziara zigortzen dituzten politikak iraultzeko indarrak batzeko deia berretsi die Alternatibak mugimendu sozial, sindikal zein politikoei, “ezinbestekoak ditugu borrokarako bide berriak asmatu eta jorratu, esku ikusezina zein honek mugiarazten dituen hariak maskaragabetzeko”.

Gobernu espainiarraren espetxe politika Iosu hiltzen ari da

Gaurkoan EH Bilduk euskal preso politikoen senitartekoen elkartearekin, Etxerat-ekin, izaniko bileraren ondotik larritasun ahotsa altxatu nahi du eta Iosu Uribetxeberria preso arrasatearrak bizi duen egoera irmoki salatu nahi du.

Iosu Uribetxeberriaren osasun egoera larriak ez du atzerabueltarik eta senitartekoek adierazi bezala Iosu hil egingo da. Hain gordin adierazi digute senitartekoek zein den Iosu-ren egoera eta hortaz EH Bildu-tik lanean jarraituko dugula adierazi diegu Iosu-ren eskubideak onartu daitezen. Egungo espainiar legediaren arabera dagoeneko 2007tik etxean behar luke eta askatasunean, baina askatasun eskaera ukatua izan zen eta erabaki horrek Iosu-ren hiltze akta suposatu zuen.

Euskal preso politiko askoren bizia arrisku larrian dago eta gero eta denbora eta aukera gutxiago dute espainiar espetxeetatik bizirik ateratzeko. Iosuren osasun egoera asko gaiztotu da, ekidin bazitekeen ere. Legearen arabera, Iosu kalean behar luke 2007tik, baina eskari hori ukatua izan zen.

Mendekuzko eta salbuespenezko espetxe politika hau deuseztatzeko garaia da, Iosu eta gainontzeko euskal preso politikoak hiltzen ari delako. Iosu-ren osasun egoera larriaren oinarrian espetxe politika anker hau baino ez dago. Espetxe politika honen ondorioz, Iosu-k ez du jaso behar bezalako laguntza medikurik bere gaixotasun larria sendatu ahal izateko. Biriketako minbizia iragarri ziotenetik ez du behar besteko laguntza medikurik jaso eta horrek hilzorian jarri du. Gobernu espainiarrak aplikatzen duen espetxe politika honek ez du preso gaixoen asistentzia medikurik bermatzen eta horren ondorioz euskal preso politikoen kopuru altuak gaixotasunak pairatzen ditu. Behar bezalako laguntza medikua jaso izanak Iosu-ren bizia bermatu ahal izango luke.

Iosuren egoerak, espainiar gobernuak, euskal preso politikoekin aplikatzen duen mendekuzko eta salbuezpeneko espetxe politikaren adierazlea da. Espainiar gobernuak, PSOEren laguntzaz, gure herrian ireki den irtenbide prozesua baldintzatu nahi du, prozesuaren oinarriak Aieteko Agirian jasota daude, baina prozesu honek euskal jendarte gehiengoaren bultzada du.

Espetxe politika honen helburu nagusia euskal presoen eskubideak deuseztatzea da. Euskal Preso Politikoen Kolektiboa ahuldu, horretarako mendekuzko eta salbuezpeneko politika aplikatuz, era berean, konponbide prozesua, euskal jendartearen gehiagoak bultzatzen duena hondoratzeko.

Egungo medekuzko eta salbuespenezko espetxe politika honen helburua, egungo espainiar legedia bera errespetatzen ez duena eta Giza Eskubideen Europar Epaitegiaren aginduei muzin egiten diena, Euskal Preso Politikoen Kolektiboaren eskubideak murriztea eta pertsona gisa suntsitzea da, era berean, euskal jendartearen gehiengoak babesten eta bultzatzen duen konponbide prozesua zapuzteko.

Dei bat luzatzen diegu gainontzeko alderdi eta arduradun politikoei erantzukizunez joka dezaten eta berehalakoan Iosu-ren askatasuna eska dezaten beste 13 presoena bezalaxe.

Josu askatu! Hamalauak herrira! Hau da gobernu espainiarrari luzatzen diogun esijentzia. Ondorioz, espainiar gobernuari Josu Uribetxeberria berehalakoan aske utz dezaten esijitzen diogu, gaixo dauden gainontzeko 13 presoak bezalaxe.

2012ko Abuztua

Alternatibak elkartasuna adierazi dio SAT sindikatuari eta bere militanteen aurkako jazarpenari uzteko exijitu dio Madrilgo gobernuari

lternatibatik SATeko militanteen atxiloketak gelditzeko exijitu du, “aberatsenak babesten dituen gobernu baten menpekotasunari bakarrik erantzuten diotelako, herritar xumeen egoera larria arintzeko ezer egiten ez duen bitartean”. Alderdi ezkertiarreko ordezkariak, halaber, Mercadona bezalako elikadura sektoreko supermerkatu kateek zaborrera botatzen duten elikagai kopuru handiaz ohartarazi du, gero eta pertsona gehiago pobrezian bizi direnean.

http://alternatiba.net/idazlanak/1845/alternatibak-elkartasuna-adierazi-dio-sat-sindikatuari-eta-bere-militanteen-aurkako-j

Elikadura subiranotasuna eta NPB (Bideoa)

Antonio Basagoitik eta beste hainbatek asteotan botatako astakerien ostean, EhBilduk Elikadura Subiranotasunaren aldeko lan taldea martxan jarri izanaren harira; argigarria izan daiteke elikadura subiranotasuntaz ari garenean zertaz ari garen argitzea. Bide honek horretarako aukera bikaina ematen du oso modu errazean (gazteleraz baino ez dago).

http://alternatiba.net/idazlanak/1846/soberan%C3%AD-alimentaria-y-las-pac-elikadura-subiranotasuna-eta-npb

Alternatibak kopagoaren bidegabekeria salatu du eta Lakuari eskubide sozialak propagandatik haratago babesteko galdegin dio

Alternatibatik bidegabea deritzote herritarren gehiengoari botikak ordainarazi eta gizarteko sektorerik ahulenetako bati osasun estaldura kentzeari. Gainera, ezkerreko bozeramaileak azpimarratu duenez, “ustez, 33 milioi euro aurrezteko besterik ez du balio, Espainiako Aurrekontu Orokorrek aurten AHTeko lanetarako aurreikusitakoaren hamarren bat beraz”. Kopuru horri, halaber, “sistema berria ezarri eta kudeatzeak dakarren gastua kendu beharko zaio”. Gogorarazi du, bestetik, EAE, Nafarroarekin batera, Espainiako Erresuman industria farmazeutikoarekiko zor gutxien duen erkidego autonomoa dela.

http://alternatiba.net/idazlanak/1840/alternatibak-kopagoaren-bidegabekeria-salatu-du-eta-lakuari-eskubide-sozialak-propaga

Ez dugu sakrifiziorik onartzen

Espainiako Erresumako Presidente Mariano Raxoik lepora zuzendutako labankada eman die herritarrei, murrizketa, BEZaren igoera eta kotizazio sozialen beherakada – langileen soldataren zati bat jaitsita- deitu arren. Erasoa justifikatzeko, Aznarren ondorengoak “sakrifizioa onartu eta zerbaiti uko egiteko” unea heldu dela ziurtatu zuen, bestela, “sakrifizioak alboratu eta guztiari uko egin” beharko litzaiokeelako. Banka ahalguztiduna odol eske ari da, eta ez du inongo aingerurik bidaliko Abrahamen eskua geldiarazteko. Herria da bere kateak eskatu beharko dituena, sakrifizioak orain onartzeak guztiari uko egitea ekarriko baitu.

http://alternatiba.net/idazlanak/1838/ez-dugu-sakrifiziorik-onartzen

PPk, EAJk eta PSEk Kutxabank lehenbailehen pribatizatu nahi dutela salatu du EH Bilduk

PNVk PPrekin bat eginik, aurrezki kutxak banketxe pribatu bihurtzeko asmoa salatu behar dugu eta gizarte ekintzaren edo kapital publikoaren inolako arrastorik ez uztea. Euskal kutxak fundazio bihurtzeak bere sorrerako helburua alboratzea suposatuko du, gizarte ekintzaren desagerpena ekarriko du eta pribatizazioaren bideari ateak irekiko dizkio. Horretarako egin dute ituna PPk eta EAJk administrazio kontseiluan botere osoa eskuratzeko, beren eredu eta apustua Kutxabank-en etorkizuna esku pribatuetan uztea delako, eta horretan PSEk babesa adierazi die.

http://alternatiba.net/idazlanak/1837/ppk-eajk-eta-psek-kutxabank-lehenbailehen-pribatizatu-nahi-dutela-salatu-du-eh-bilduk

Alternatibak kopagoaren bidegabekeria salatu du eta Lakuari eskubide sozialak propagandatik haratago babesteko galdegin dio

Alternatibako bozeramaile Amaia Agirresarobek ordainketa partekatuaren inposizioa salatu du gaur, Auzitegi Konstituzionalak Lopez Gobernuak onartutako “arau elektoralista” bertan behera utzi ondoren. Agirresarobek gogorarazi du “kopagoa pertsonen eskubideen eta duintasunaren kontrako hamaikagarren kolpea dela, izendapenetik hasita ere iruzur handia izateaz gain; izan ere, aurretik ere herritarrek ordaintzen zituztelako botikak, klase popularrak gero eta gehiago zamatzen eta gehien dutenentzat hain mesedegarria den fiskalitatearen bidez”. Horregatik, “ordainketa partekatua baino, berrordainketa” deitu beharraz ohartarazi du.

Alternatibatik bidegabea deritzote herritarren gehiengoari botikak ordainarazi eta gizarteko sektorerik ahulenetako bati osasun estaldura kentzeari. Gainera, ezkerreko bozeramaileak azpimarratu duenez, “ustez, 33 milioi euro aurrezteko besterik ez du balio, Espainiako Aurrekontu Orokorrek aurten AHTeko lanetarako aurreikusitakoaren hamarren bat beraz”. Kopuru horri, halaber, “sistema berria ezarri eta kudeatzeak dakarren gastua kendu beharko zaio”. Gogorarazi du, bestetik, EAE, Nafarroarekin batera, Espainiako Erresuman industria farmazeutikoarekiko zor gutxien duen erkidego autonomoa dela.

Berrordainketarekin Bengoak zein Lopezek egunotan erabilitako aitzakia eta azpijokoen harira, azkenik, Agirresarobek “intsumisio formako propaganda astintzea” leporatu dio Eusko Jaurlaritzari, “inongo esku-hartzerik gabe murrizketa propioak egin dituztenean, hezkuntzan, laguntza sozialetan eta, baita ere, osasungintzan”. Horrexegatik, lehendakariari galdegin dio “eskubide sozialak bere eskumenetatik eta propagandatik haratago babesteko”. Ildo horretarik, bestelako euskal erakundeek zerga politikaren inguruan erakutsitako jarrera ere kritikatu du, zamarik handiena langileen esku jartzen jarraitu dutelako, gehien irabazten dutenei zergak barkatuta: “Ikaragarria da gogoratzea superabita zegoenean enpresa eta aberestasun handienei zergak jaisteko baliatzen zutela, orain, baliabide publikoak falta diren garairako, askoz egoera okerragoan utzi gaituztela”.

Ez dugu sakrifiziorik onartzen

Asier Vega eta Amaia Agirresarobe – Alternatiba

Biblian jasotzen denez, Abrahamek bere seme Isaac sakrifikatzeko asmoa zuen, hari esan gabe Jaungoikoari eskaintzera zihoan sakrifizioa semea bera zela. Agindu jainkotiarra betetzeko prest zegoenean, aingerua agertu zitzaion, esanez: “Ez egin minik mutikoari, dagoeneko badakit Jainkoaren beldur zarela, ez baitiozu ezetzik izan zure seme bakarra niri emateari”. Tamalez, testu biblikoak asteotako egunkarietako azalekin antzekotasun gehiegi ditu.

Espainiako Erresumako Presidente Mariano Raxoik lepora zuzendutako labankada eman die herritarrei, murrizketa, BEZaren igoera eta kotizazio sozialen beherakada – langileen soldataren zati bat jaitsita- deitu arren. Erasoa justifikatzeko, Aznarren ondorengoak “sakrifizioa onartu eta zerbaiti uko egiteko” unea heldu dela ziurtatu zuen, bestela, “sakrifizioak alboratu eta guztiari uko egin” beharko litzaiokeelako. Banka ahalguztiduna odol eske ari da, eta ez du inongo aingerurik bidaliko Abrahamen eskua geldiarazteko. Herria da bere kateak eskatu beharko dituena, sakrifizioak orain onartzeak guztiari uko egitea ekarriko baitu.

Raxoik esan zuen Espainiari eman beharreko laguntzak inposatutako baldintzarik ez zuela izango. MoU deritzona (Ulermenerako memoranduma) ikusi ostean, PPko buruzagiak banan-banan jarraitu dituen eskakizun guztiak jasotzen direla egiazta daiteke; gezurretan ari ziren beraz, zigor bikoitzarekin gainera. Laguntza ez da Espainiarentzat, Alemaniako banku eta zordun diren banka pribatuko gainerakoentzat baizik. Gainera, ezarritako baldintza zorrotzek, gutxien dutenek are okerrago egon daitezela besterik ez dute eragingo, Espainiako Erresuma beste erreskate baten atarian jarrita zorra ordaintzerik ez duenean. Europako Banku Zentralaren, Europako Batzordearen eta Europako Banku Agintaritzaren eskutik etorriko da inposatutako baldintza guztiak zintzo betetzen diren ikuskatzea.

Greziaren finantzak kontrolatzen dituen troikak ez-bezala, zor pribatuaren zama arintzea proposatu berri duten NDFako ortodoxoak Europako Banku Agintaritzarekin ordezkatu dituzte, finantza sisteman egonkortasuna eta gardentasuna sustatzeko helburua omen duena baina Londresko City ilunean egoitza duena.

BEZaren igoera benetako labankada da, herritar guztiek modu berean ordaindu beharko dutelako haien gaitasun ekonomikoa edozein izanda ere. Nekazaritzan eta abeltzaintzan erabilitako lehengaiak, esaterako, %8tik %21era igoko dira. Montorok, tartean, errugabeek bekatariengatik ordaindu beharko dutela onartu du (BEZarekin iruzurrean ari direnak eta amnistia fiskala darabiltenak, edota Erresumako hiriburuko hamaikagarren saio olinpikoa babestearen truke kenkariak baliatuko dituztenak). Kotizazio sozialen beherapena ere dakar erasoak, pentsio sistema publikoari kalte egin eta langabezia saria seigarren hilabetetik aurrera murriztuta, existitzen ez den enpleguaren bilaketa sustatzeko aitzakiapean. Murrizketek 65.000 milioi euro aurreztea dute helburu, baina ahaztu egiten dute sozialki zein ingurumenari begira sostengaezinak diren obretan zein ejertzito, monarkia edo senatua bezalako eremuetan murriztea. Jaitsi egin dute, halaber, funtzionarioen soldata (parte bat bankari oparituta) eta aniztasuna zein kontrol politikoa ere kaltetuko dute, zinegotzien %30 murriztuta.

Pentsa zitekeen dagoeneko guztien kontra egin dutela baina, tamalez, seguru gaude murrizketak ez direla horretara mugatuko: pentsioak jaistea eta erretiro adinaren atzeratzea bizkortzea laster izango ditugu mahai gainean.

Maastrichteko Ituna, Lisboakoa eta ukiezina zirudien konstituzioaren erreforma defizit publikoari muga jartzeko. Guzti horiekin, urratsez urrats, Espainiako Erresumak politika ekonomikoa egiteko berezkoak zituen lanabesei uko egin die. MoU memorandumak Espainiako finantza sistemak bete beharreko 37 baldintza zehazten ditu; are gehiago, jaso gabeko edozein neurri hartzeko asmorik izango balu, gobernuak jagoleei ohartarazi beharko lieke. Burujabetza laga dutela erakusten dute Margallo ministroaren hitzek, “subiranotasun nazionalaz hitz egitea ergelkeria” zela esan zuenean, “partekatutako subiranotasunen munduan bizi garelako”.

Memorandumak, halaber, aurrezki kutxak bankuen gainean duten jabetza %50aren azpitik mugatzera behartzen ditu. Espainiak horretarako beharra ezarriko du legez, eta, hori gertatzen denean, euskal kutxek Kutxabank kontrolatzeari utziko diote eta gizarte ekintza galtzetik urrats txiki batera egongo gara. Horrela, agerian gelditu da Gipuzkoako erakunde sortzaileen pribatizazioa saihesteko asmoz negoziatutako mugak ez direla nahikoak izan, are mingarriagoa dena banka publikoa inoiz baino beharrezkoa denean.

Konponbidea, berriz ere, hartu izan diren neurrien kontrako norabidean doa. Zergatik bultzatu zituen Europak fusio berriak, aurretik zabaldutako kezka finantza erakundeen tamaina zenean eta, ziotenez, erortzen uzteko handiegiak zirenean? Banka pribatua erreskatatu aurretik aztertu beharko litzateke zergatik herritarren lepotik ordaindu behar den. Ackermannen banka alemaniarrak zor hori erosi zuenean, ez omen zekien ezinezkoa izango zela bueltatzea? Ikuskaritza egin beharra dugu, zorraren zein parte den zilegi erabakitzeko eta, horren arabera, zer ordaindu eta zer ez.

Etortzeke dauden politikek eta esku-hartzeek mozkinak eta finantza errenta jartzen duten beste ezeren gainetik. Austeritatea, eskubide murrizketak, pribatizazioak; guztiak dira gizarte desjabetze eta harraparitza politikak. Konponbidea errenta zein aberastasunaren eskutik etorriko da, eskubide sozialak indartzetik. Ez dugu sakrifiziorik  onartuko, ez jainkoaren ezta bankaren izenean ere ez.

PPk, EAJk eta PSEk Kutxabank lehenbailehen pribatizatu nahi dutela salatu du EH Bilduk

Datorren ostegunean egingo diren euskal kutxen asambladak direla eta, ehbilduk gaurko egunez PP, PNV eta PSEk Kutxabak berehala pribatizatzeko asmoaz ohartarazi nahi dugu euskal jendarte osoa.

Ehbildutik euskal sistema finantzarioaren egoeraren larritasuna azpimarratu nahi dugu, eta neurri handi batean euskal eta espainiar eskuinak, Urkulluren PNV eta Rajoy-ren PPk adosturiko eta PSEk babesturiko Kutxen Legea dago larritasun horren oinarrian.

PNV eta PP alderdiek Kutxabank-en boterea banatzeko adostasuna lortu dute, Bildu alboratuz, eta horrela Kutxabank-en kontrol organoetan euskal jendartearen aniztasuna ezabatu dute. Euskal Kutxen Legeak udalak diskriminatzen ditu, batzarren osaketan ordezkaritza murriztuz eta instituzio publikoek batzarretan duten ordezkaritza ere %50etik %40ra jaitsiz.

Eta hau ez da integrazio kontratuan Bildurekin adostu zutena. Gogoratu beharra dago, halaber, Aralarrek kontra bozkatu zuela. Akordio horretan zera adostu zen, hiru euskal kutxen batzarrei zegokiela kapital pribatuari sarrera emateko erabakia. Orain, ordea, Espainiako Bankuaren erregulazioak, Luis de Guindos ministroaren eta PPren helburuek eta Kutxen Euskal Legeak eta ostegunean bozketara eramango diren estatutuek, euskal aurrezki kutxak pribatizatzeko asmoak indartzen dituzte.

Are gehiago, Europar Batasunak estatu espainiarrari laguntza finantzieroak jasotzeko kaleratutako “memorandum” batean zera jasotzen du, aurrezki kutxen eta bankuen banaketa dekretua ezarri behar duela azarorako, beraz, argi esan dezakegu, azaroan Kutxabank erabat pribatua izango dela. Zentzu honetan ulertzen dira azken boladan, kutxak fundazioak bilakatzeko emaniko urratsak.

PNVk PPrekin bat eginik, aurrezki kutxak banketxe pribatu bihurtzeko asmoa salatu behar dugu eta gizarte ekintzaren edo kapital publikoaren inolako arrastorik ez uztea. Euskal kutxak fundazio bihurtzeak bere sorrerako helburua alboratzea suposatuko du, gizarte ekintzaren desagerpena ekarriko du eta pribatizazioaren bideari ateak irekiko dizkio. Horretarako egin dute ituna PPk eta EAJk administrazio kontseiluan botere osoa eskuratzeko, beren eredu eta apustua Kutxabank-en etorkizuna esku pribatuetan uztea delako, eta horretan PSEk babesa adierazi die.

Ezin dugu onartu Kutxabank-en pribatizazioa. Herritarren zerbitzura egongo den eta planifikazio sozial eta ekonomikoa izango duen banka publikoa behar dugu, eta hori da gure aldarrikapena. Sistema finantzario publiko, garden eta demokratikoa behar dugu, gure herriko ehun industrial eta sozialaren beharretara egokituko dena. Krisi sistemikoa gainditzen lagunduko gaituen sistema finantzario publikoa defendatzen dugu.

Azken finean, honakoa aldarrikatzen du Euskal Herria Bilduk: bere funtzio soziala definituko duen entitate publikoa, banka komertzialaren rola gaindituz irizpide ekologiko eta sozialetan oinarrituko den inbertsio produktiboa erraztuko duen inbertsio banka bihurtuaz. Espekulazio finantzarioaren aldeko apustua egingo ez duena, inbertsio militarra eta megaproiektuei errefusatuko dituena. Funtzio sozial konkretuei eutsiko dien kutxa behar dugu: zaintza ekonomiaren lehentasunei prestamu eta inbertsio egokiak egingo dizkiona, kalitatezko enpleguaren sorrera bultzatuko duena eta aldaketa klimatikoaren aurka borrokatuko duena, elikadura burujabetza eta sektore zaurgarrienen kontsumoa babestuko duena. Azken finean, justizia soziala lehenetsiko duena eta demokrazia parte-hartzaile eta gardentasunaren printzipioengatik zuzenduko dena.

X