Gaur Madrilgo Kongresuan iruzur berri bat gauzatu da. Gaur, erregimenaren alderdiek, frankismoaren erreformaren fruitua izan zen Estatu eredua beste hainbat urtez luzatzea erabaki dute. Frankoren oinordekoaren abdikazioa aitzaki hartuta estatu eredua beste 40 urtez luzatzeko operazio kosmetiko hutsa egin dute. Gaurko bozketarekin, PPk eta PSOEk, herri honen ukazioan eta herritarron eskubideen bortxaketan oinarritzen den estatu ereduari argi berdea eman diote.
Horren aurrean, benetako haustura demokratikoaren alde lanean jarraituko dugu, hau da, demokraziaren alde, erabakitze eskubidearen alde eta herritarron eskubideen alde. Beraz, espainiar inposaketaren aurrean borrokan jarraituko dugu.
EH Bilduk herritar librez osaturiko euskal errepublika askea eraikitzearen alde egiten du eta dei egiten diogu euskal jendarteari kalera atera dadila aldarrikapen hau lau haizetara zabaltzera.
Hori dela eta, EH Bilduk datorren ekainaren 19rako Hego Euskal Herriko lau hiriburutan mobilizazioak deitzen ditu. Mobilizazio hauen leloa “Herrien eskubideen alde. Geurea euskal errepublika askea!” izango da. Mobilizazio hauek irekiak dira, hau da, Hego Euskal Herriko hiriburuetan egingo diren mobilizazio hauek monarkiaren aurrean eta inposaketaren aurrean gure herriaren aldarrikapen demokratikoen aldeko bozgoragailua izan behar dute, demokrazia, herri eta herritarren erabakitze eskubidearen alde. Herritar eta eragile guztiak deitzen ditugu ekainaren 19an aldarrikapen eta plazak konpartitzera.
Mobilizazioak arratsaldeko 20:00etan izango dira, Donostiako Konstituzio enparantzan, Gasteizeko Andra Mari Zurian, Iruñeko Vianako Printzearen plazan eta 19:00etan Bilboko Arriagan. Mobilizazio bakoitzean mosaiko bat osatuko da bertan zango diren herritarrekin. Musika eta ikuskizunak izango dira hiriburu guztietan eta pintxo-pote errepublikar batekin amaituko dira.