Alba Fatuarte Alternatibako kidearen esku hartzea Bilboko plenoan.
Dakizuenez, EH Bilduren lan lerroetako bat, udal ordezkari politikoen pribilejioekin amaitzea izan da urte hauetan guztietan. Ildo horretan, ezabatu beharreko pribilejio horietako bat, udal karguen artean kultur ekitaldietarako sarrera banaketarena izan da. Batetik, bai zezenketetarako zein operarako abonuak erosteko diru partidak ezabatzea proposatu dugu hasieratik; baina gaurko Udalbatzan proposatzen duguna pausu bat haratago doa. Kasu honetan, Udalak doan jasotzen dituen kultur ekitaldietarako sarrerak herritarren artean zozketatzea proposatu dugu; batez ere ez dadila nahastu ordezkaritza instituzionala, zinegotzi eta bestelako karguen doako aisialdiarekin. Proposamena ez da aurrera atera EAJ, PSOE eta PP batu direlako euren pribilejioei eusteko.
Esan dezakegu gaur udalbatzar honetara ekartzen dugun proposamena gogoeta eta hausnarketa prozesu baten ondorioa dela. Izan ere, EH Bilduko Udal taldeak berak, orain arte mota hauetako sarrerei uko egin badie ere, uda honetaz geroztik, tokiko komunikabideetara bideratzea erabaki du, eurek era gardenean herritarren artean zozketatu ditzaten; baina guk nahiko genuke egoera hau aldi baterako izatea, eta Udaletik auzi honi erantzun integral bat ematea.
