Hamabostero bezala, Euskal Herria Bilduren aldizkari digitala kaleratu dugu, PDF formatuan deskargatu edo sarean ikusteko. Lurralde bakoitzean koalizioak egiten duen lanaren berri eta, zenbaki honetan, Hegoaldeko lau herrialdeetarako beharrezkoa dugun erreforma fiskalaren aldarria, herritar guztien bizitza duina bermatu ahal izateko ezinbestekoa. Zure posta elektronikoan zuzenean jasotzeko, egizu harpidetza.
Martxoaren 8a dator eta, data honi begira, Euskal Herria Bilduren aldizkari digitala monografiko bihurtu dugu, “Emakumeok: Hitza eta erabakia” izenburupean, besteak beste, Yolanda Jubetori ekonomia feministaren inguruan eginiko elkarrizketa eta Irantzu Varelaren artikulua mikro matxismoen inguruan. Ohi bezala, aldizkaria PDF formatuan deskargatu edo sarean ikusteko aukera dago. Zure posta elektronikoan zuzenean jasotzeko, egizu harpidetza.
Euskal Herri independetea, feminista izango da, edo ez da izango. Gora borroka feminista!
Hamabostero bezala, Euskal Herria Bilduren aldizkari digitala kaleratu dugu, PDF formatuan deskargatu edo sarean ikusteko. Lurralde bakoitzean koalizioak egiten duen lanaren berri eta, zenbaki honetan, azalean Kutxabankek inguruan azaleratu diren balizko iruzurren gaia, kutxen kontrol publikoa eta sozialaren aldarria inoiz baino beharrezkoa eginda. Zure posta elektronikoan zuzenean jasotzeko, egizu harpidetza.
Voltairek idatzi omen zuen Euskal Herria dela Pirinioen bi aldeetan abesten eta dantzatzen duen Herria. Azken asteetan ez dugu abesteko eta dantzatzeko arrazoi gehiegi izan, espainiar Estatuak berriro ere bere alderik ilunena agertu zigulako. Hala eta guztiz ere, esan nahi dugu gure Herriak, zailtasun guztien gainetik eta sasi guztien azpitik, abesten, dantzatzen eta jarduera politikoan alternatibak eraikitzen jarraitzen duela.
Gaur EH Baik eta EH Bilduk, Herri zaharraren bi zuhaitz-adaska gazteok, proposamena dakargu plazara. Gaurkoan arnas luzeko proposamena dakargu, burujabetza osoa eta justizia soziala jasoko dituen Euskal Estatua eraikitzeko ibilbide-orria, hain zuzen ere.
Euskal herritarren esku utzi nahi dugu proposamen hau, beraiek baitira bere hartzaile nagusiak. Honakoa ez da abertzaleentzako proposamena, ezta gurekin bat egiten duten ezkerreko soberanistentzat ere. Gure proposamena da Euskal Herri osoko herritarrentzat. Zuei, euskal herritar guztioi, erabakitzeko eskubidea oinarri duen prozesu eratzailea gurekin batera eraikitzera gonbidatu nahi zaituztegu.
Europa osoan zehar mamu bat dabil: ez da komunismoa, duela 100 urte bezala, aldaketa politikoa baizik. Hala ere, neoliberalismoa oso urduri jarri da. Badago aukera baino gehiago Europako hegoaldean alternatiba anti-neoliberal bat gobernura iristeko eta merkatu bihozgabeak dardarka hasi dira. Horregatik gaur, hauteskunde egunaren bezperan, zorte onena opa diegu. Greziako borrokalari guztiei eta bereziki Greziako fronte zabala den Syrizako lagunei besarkada handi bana bidaltzen diegu Euskal Herriko plaza honetatik. Justizia sozialaren bidean egiten duten nazio burujabetzaren defentsan, erabat identifikatuta sentitzen gara. Bihar Greziatik kanpo ere denok gara Syriza. Aupa Syriza!
Aldaketa politikoaren mamua Europa osoan zehar badabil ere, ez dakigu espainiar eta frantziar Estatuetara iritsiko ote den. Momentuz espainiar eta frantziar estatuek ez gaituzte nazio gisa aitortzen, ezta aitortuko ere. Ez dituzte gure eskubideak errespetatzen eta ukatzen jarraitzeko asmo guztia daukate. Gainera, bi Estatuen bidez Euskal Herrian inposatzen dituzte politika neoliberalak, euskal herritarrei gero eta eskubide gehiago murrizten dizkieten politikak. Eta ez dirudi horretan gauzak epe laburrean aldatuko direnik.
Hala ere, batzuk espainiar Estatuan ere gauzak aldatuko direla diote. Aldaketak etor daitezke, baliteke gurea ez den Konstituzioan ere aldaketaren bat egitea, baina aldaketak aldaketa, kontu bat argi eta garbi daukagu: ez da gobernuen kontua, baizik eta Estatu auzia. Espainiar Estatuak inork ez digu gure etorkizun politiko, ekonomiko eta soziala erabakitzeko eskubidea emango, guk geuk eskuratu beharko dugu. Nola? Euskal Bidea eginez, erabakien bidea urratuz.
Euskal Bidea da eraldaketa eta autoeraketa prozesua. Ez da protesta edo eskakizun hutsa. Euskal Bidea da euskal herritarren erabakiekin urratsez urrats Euskal Herri berria, Europan Estatu berria, eraikitzeko prozesua. Ondorioz, erabakitzeko eskubidea ez da helmuga, bidea bera baizik.
Gaur egun oraindik Euskal Herrian, eta duela astebete berriro pairatu izan genuen, espainiar Estatuak bere alderik ilunenetakoa erakutsi zuen eskubide zibil eta politikoek mehatxupean jarraitzen dutela gogorarazteko. Oinarrizko askatasun zibil eta politikoek –biltzeko eskubidea, jarduera politiko eta sozialerako eskubidea, besteak beste- arriskuan segitzen dute. Espainiar Estatuak urteetan sortutako amaraun juridiko-legalak Herri hau itotzen du. Oinarrizko eskubide eta askatasun guztiak bermatuko dituen eredu juridiko propioa behar dugu. Bitartean, euskal herritar guztientzat eskubide zibil eta politiko guztiak jasoko dituen Hitzarmen berria adostu nahi dugu.
“Eskubide guztiak herritar guztientzat” Hitzarmena euskal eragile politiko eta sozial guztiei proposatu nahi diegu. Konpromiso zehatzak hartuz, eragile horiek dauden gune eta esparruetan eskubide horiek bermatzeko asmoz. Noski, horietako bat izan behar du gune eta esparru guztietan Erabakitzeko eskubidearen aldeko gehiengoak eratzea.
Horrela Euskal Herriko instituzioetan Erabakitzeko eskubidearen alde eratuko ditugun gehiengoek Euskal Estatua eraikitzeko prozesua etengabe bultzatuko dute.
Neoliberalismoak herritarren eskubideak murrizten ditu, espainiar eta frantziar Estatuek Euskal Herriaren nazio eskubideak ukatzen jarraitzen dute. Bataren eta besteen aurrean EH Baik eta EH Bilduk demokraziaren aldeko apustu erradikala egiten dugu. Eta demokraziari izen-abizenak jartzen dizkiogu: erabakitzeko eskubidea. Hori da Euskal Estatua sortzea helburu, abian jarri nahi dugun prozesu eratzailearen oinarria. Prozesu honek euskal herritar guztiak beraien etorkizunaren jabe egingo ditu eta prozesu honek euskal herritar guztiak orainaldiaren protagonista egiten ditu.
Euskal herritar gisa bizitzeko eta euskal herritar gisa nola bizi nahi dugun hautatzeko erabakitzeko eskubidea behar dugu. Dena erabaki nahi dugulako, dena hemen, Euskal Herrian, erabaki nahi dugulako.
Queremos el derecho a decidir, porque queremos decidirlo todo. Y todo lo queremos decidir aquí, en Euskal Herria. No solo queremos decidir para poder vivir como ciudadanos y ciudadanas de nuestro País. Queremos el derecho a decidir para elegir cómo queremos vivir, para que nadie decida por nosotras políticas de desigualdad social. Queremos el derecho a decidir para acabar con el sometimiento de la mayoría a costa de los privilegios de unos pocos. Queremos el derecho a decidir para elegir y construir justicia social para todos y, sobre todo, para todas.
Ez dago aitzakiarik. Euskal herritarren belaunaldi askok une honekin amets egin du. Ametsetan besterik ez dute ikusi. Gu, aldiz, bizitzen ari gara. Gure momentua da. Burujabetza osoa eta justizia soziala jasoko dituen Euskal Estatua sortzea gure esku dago.
Horretarako euskal jendarteak, euskal herritar bakoitzak, prozesu honen protagonista bilakatu behar du. Prozesu hau garrantzitsuegia da alderdi politikoen eta erakundeen baitan sortzen diren indar harremanen esku uzteko. Abagune honek guztiok behar gaitu. Batzuk herri mugimenduan taupada emanez, beste batzuk erakundeetan bultzatuz, baina guztiok batera elkarri autonomia errespetatuz, herri botere dinamiko eta sortzaile bakarra osatzen.
Noski, gaur egun dauzkagun erakundeak eta sortu behar direnak, beraien tresna eta baliabide guztiak, gure etorkizun politiko, ekonomiko, sozial eta kulturala gaurdanik erabakitzen hasteko baliatu behar ditugu. Euskal Herrian erabakitzeko eskubidea ez baita egun miragarri batean gauzatuko, ez baita bozketa bakarra Euskal Herri osoan aldi berean izango. Urratsez urrats egin beharreko bidea izango da.
Garai batean autodeterminazio eskubideari ekiteko aldez aurretik lurraldetasunaren afera konpondu behar genuela genion. Orain, ordea, diogu erabakitzeko eskubidea lurraldetasunaren afera konpontzeko ere baliatu behar dugula. Nola? Euskal Herriko eremu juridiko-administratibo bakoitzeko herritarrei hitza eta erabakia emanez.
Prozesu eratzaileak Euskal Herriko egoera juridiko-administratibo desberdinak abiapuntu hartzen ditu. Horregatik hiru prozesu barnebilduko dituen prozesu bateratzaileaz ari gara. Hiru abiapuntu desberdin, hiru erritmo eta abiadura berezitu, etapa eta prozedura propioak, kontsulta eta galdera desberdinak, baina helburu bakarra: euskal herritar guzti-guztiak Euskal Herriaren etorkizun politikoaren jabe egitea.
Abiadura eta molde desberdinetan bada ere, Euskal Herria gaur egun banatuta dagoen hiru eremu juridiko-administratibotan hiru urrats egitea ezinbestekoa da: autoafirmazioa, autoeraketa eta autodeterminazioa. Aldarrikatu, eraiki, erabaki.
Guk , Lapurdi, Behe Nafarroan eta Zuberoan, guk Nafarroa Garaian, guk Araba, Bizkaia eta Gipuzkoan, gure buruari eta bakarrik gure buruari, Euskal Herriaren etorkizuna, gure etorkizuna, erabakitzeko gaitasuna ematea honezkero erabaki dugu. Horri autoafirmazioa deritzogu, ezinbesteko abiapuntua Euskal Estatua helburu duen prozesua abian jartzeko.
Autoeraketa da guk gure buruari, gehiengo sozial berriak sortuz eta akordio politiko berriak eginez, errealitatea eraldatzeko ematen diogun gaitasuna. Gauzak horrela, menpekotasunaren mesedetan sortutako erakundeak eta gainontzeko baliabide guztiak euskal lurraldeen arteko harreman berriak sortzeko erabili nahi ditugu. Hiru eremu juridiko-administratibotako euskal herritarrok elkarrekin bizi izateak ere herri borondatean oinarritutako erabakia izan behar duelako. Bide horretan eremu juridiko-politiko desberdinetako erakundeen arteko elkarlana ere sare berriak eta sendoagoak josteko orratza izango dugu. Autoeraketaren bidez, lurralde batasunaren bidean euskal lurraldeen arteko lotune demokratiko berriak sortuko ditugu, euskal subjektua osatu arte.
Barne eta kanpo autodeterminazioa nahi ditugu. Barne mailakoa, euskal lurraldeen arteko harremana erabakitzeko izango da. Kanpo mailakoa, espainiar eta frantziar Estatuekiko harremana erabakitzekoa da. Araba, Bizkaia, Gipuzkoa eta Nafarroa Garaiaren kasuan, Espainiar estatuarekiko harremana erabaki aurretik Autonomi- Erkidegoko eta Foru Komunitateko herritarrek euren arteko harremana erabakitzea lehenesten dugu, beti ere herritarren borondatea errespetatuz, Hego Euskal Herri mailako lurralde batasunaren bila. Lapurdi, Behe Nafarroa eta Zuberoaren kasuan, instituzionalizazio prozesuaren bidez autoafirmazioa eta autoeraketa burutzea nahi dugu, ondoren bertako herritarrek frantziar Estatuarekiko eta gainontzeko euskal lurraldeekiko harremana erabaki dezaten.
Ez dugu proposamen hau hauteskundeen emaitzen mesedetan egiten, baina argi eta garbi daukagu Erabakitzeko eskubidearen aldeko indar politikoen hauteskunde emaitza onek bidea bizkorrago egiten lagundu behar dutela, konpromiso sendoetan oinarritzen badira, noski.
Gaur egun Hego Euskal Herriko bi eremu juridiko-administratiboetan prozesu eratzailea errazteko eta azkartzeko erronka zehatzak ditugu:
-Nafarroa Garaian aldaketa politikorako aukera paregabea daukagu. Nafar guztien askatasuna mugatu eta gutxi batzuen pribilegioak ahalbidetu dituen erregimena bertan behera uzteko alternatiba eraikitzeaz ari gara. Nafarroa bakarrik nafarrek nahi dutena izan dadin.
-Araba, Bizkaia eta Gipuzkoako Autonomi- Erkidegoak estatus politiko berria behar du. Estatus politiko berri horren oinarria arabar, bizkaitar eta gipzuzkoarren erabakitzeko eskubidea izango da. Muga bakarra, beraz, herri borondatea.
Euskal Herria nazioa izatea errealitate ukaezina da, badaukagu hizkuntza, badaukagu kultura, lurraldea…Baina bakarrik Estatu bilakatuko gara herri borondatearen arabera. Halaber, ez dago bere ibilera herri borondatean oinarritzen duen Herria geldituko duenik.
EH Bai eta EH Bilduk euskal jendarteak eragiten dioten auzi guztiei buruz erabakitzea nahi dugu. Euskal jendartea erabakien bidean gero eta urrats gehiago egitea nahi dugu, herritar bakoitza etorkizunaren jabe eta orainaldiaren protagonista bilakatuz. Euskal Harria badabil, beraz, ez kezkatu, goroldiorik ez.
Lehen aipatu dut eta ez naiz inoiz nekatuko. Euskal herritar belaunaldi askok gu bizitzen ari garen momentuarekin amets egin dute. Haietatik askok dena eman zuen, askatasunari dena eman behar zaiolako, gu orain abagune honetan egoteko. Gu hemen gaude, gure bizitza da. Ez da txikira jokatzeko momentua. Nork bere onena, eta guztiok Herri gisa neurria emateko unea da. Beste batzuk ametsetan ikusi zutena biziko dugu. Goazen haien ametsa borobiltzera, askatasun osoa eta justizia sozial guztia nahi ditugun euskal herritarrak gara.. Hankak lurrean, burua hodeietan, goazen ametsak errealitate egitera. Animo eta aurrera, Euskal Herria dugu irabazteko!
http://alternatiba.net/old-files/euskal-bidea-eu.pdf
EH Bilduren Bizkaiko hauteskunde programaren prestaketa lanak dinamizatuko duten pertsonak jendaurrean aurkeztu nahi ditugu. Nire ondoan dauden gizon-emakumeak izango dira gure programaren oinarriak jartzeaz gainera, Bizkaiko herritarren eta eragileen ekarpenak eta iritziak bideratuko dituztenak. Lantalde honen egitekoa izango da Bizkaian aldaketa ahalik eta azkarren gauzatzeko gizartean dagoen ilusioa, ezagutza eta ideia zaparrada jasotzea eta bideratzea.
Gure programa ez da bulego ilunetan egingo. Gure programa herritar eta eragileekin partekatuko dugu. Herritarren eta eragileen iritziak eta ekarpenak funtsezkoak izango dira gure programaren edukietan.
Herritarren interesak defendatu nahi baditugu, lehendabizi haien iritziak, beharrak eta ideiak zeintzuk diren lehen eskutik entzun behar ditugu. Hori da gure eredua; hori da gure estiloa. Bizkaitar guztientzat eta bizkaitar guztien interesak defendatzeko gaude politikan. Instituzioak gutxi batzuen interesen mesedetan jartzeko gehiegi irauten ari den garai ilun horri amaiera jartzen hasi behar gara berandu baino lehen. Bizkaiak eta bizkaitarrek behar dute eta merezi dute.
Datorren astean hasita, Bizkaiko eragile sozial, ekonomiko eta kulturalekin gure hausnarketak tartekatu eta haien iritziak entzuteko asmoa du talde honek. Puntuz puntu eraiki nahi dugu Bizkaia barria, eragile zein norbanakoen ekarpenak ezinbestekoak izango ditugu. Datorren astetik hasita eta hurrengo hilabeteetan konpromisoak hartzera goaz.
Bermeon jaioa orain 56 urte. Arrantzale eta kontserberetako langile familikoa, Arrasaten “Matrizegintza – injekzioa eta trokelgintza” (Plastikoak) ikasi eta Fagor Garagarza eta Alecoop koperatibetan lan egin ostean arrantzale ibili zen urtetan atunontzietan, engrasadore eta makinista lanetan. Tartean Bermeo eta Pasaiako nautika eskoletan itsasontziko mekanikaria eta hotz teknikari ikasketak burutu zituen.
1985ean itsasoa utzi eta GIB/Hiesa zeukala eta urte biko bizia eman zioten, ikasketekin jarraitu eta Hiesaren kontrako dinamika eta eragile ezberdinen baitan buru belarri aritu da 1986. urtetik aurrrera, Bizkaiko Hiesaren aurkako herritar batzordean, BEDAEn, 1988an Txo-Hiesa sortzen lagundu zuen eta 1992an T-4. Hitzaldiak eman izan ditu eta iritzi artikuluak idatzi ere.
2000. urtetik aurrera Gernikako Lanbide ekimenak zentroan dago lanean eta LABeko delegatua izan da lau urtez. 2011Ko udal hauteskundeetan Bermeoko Bilduko zerrendetan aurkeztu zen eta Bermeoko alkateorde izan da ordutik. Udaletxean besteak beste Gizarte Ongizateko Udal Patronatuko lehendakari, Antolakuntza eta Euskerako zinegotzi arduraduna eta Langileria eta Partehartze Batzordeetako kidea ere bada.
Donostian jaioa, 60 urte. Matematika eta Estatistika Doktorea, UPV/EHUko irakaslea Zientzia eta Teknologia Fakultatean. Ikasle garaian, Frankoren aurkako borrokan hasita, arlo ezberdinetako borrokalaria. Mugimendu feministan, Bizkaiko Emakumeen Asanbladako kidea izanda; sindikalgintzan, STEE-EILASeko kidea eta delegatua UPV/EHUn. Bilboko zinegotzia Euskal Herritarrok-ekin (1999 – 2003).
Batzarkidea izan ez arren, Bizkaiko Batzar Nagusietako lan hurbiletik jarraitu du azken bi legegintzaldietan (ANV eta Bildurekin), Ogasun eta Gizarte Ekintza lan-taldeen partaidea izan baita.
Mungian jaioa 1980. urtean. Ingurumen-Kimikako Goi-Mailako Teknikaria eta Uraren Kudeaketa Integralean espezializatua.
EH Bildu taldeko batzarkidea Bizkaiko Batzar Nagusietan 2011 urtetik, non bozeramaile ordea izateaz aparte; Ingurumena, Nekazaritza, Sustapen ekonomikoa eta Ogasuneko batzordeetako kidea da. Alternatiba alderdiaren Bizkaiko bozeramailea ere bada eta alderdi bereko Ekologia eta Elikadura Burujabetza mahaiko dinamizatzailea.
1975an jaioa Elorrion, betidanik Atxondon bizitzen. Zuzenbide Lizentziatura Donostian, Trenton (Italia) eta Coimbran (Portugal) egin bitartean Ikasle Abertzaleak-eko militante izandakoa.
Hainbat sektoretan lan eskarmentuduna: ostalaritzan (EHn eta Galesen), industriako behargin moduan, banka-zuzenbideko teknikari lez (EHn eta Italian), arlo komertzialean eta Lan-Zuzenbidean abokatu moduan aritua LAB sindikatuan 2007 urtera arte. 2007-2011 Legegintzaldian Atxondoko alkate EAE-ANVren eskutik.
Ezkonduta eta hiru seme-alabaren aita. Azkeneko urteetan Elorrioko Txintxirri ikastolako artezkaritza kontseiluko kide eta, militante moduan, Fracking EZ eta AHT Gelditu taldeetan lanean.
1972 urtean jaioa eta Arrigorriagako herritarra. Soziologian lizentziatua eta etorkinak eta hezkuntzan gradu-ondoa. Urteetan Jendarte Hezitzaile lanak burutu ditu Astialdi Eskola eta?Gobernuz Kanpoko Erakundeetan. Arrigorriagan 1999-2003 zinegotzia izan zen, 18/98 makroepaiketan epaitu zuten eta egun EH Bilduko Politika Feministako arduraduna da.
1975ean Bilbon jaioa. Lanbidez mekaniko, lan ugari egin ditu Gasteizen, Tuteran eta Bizkaibusen. Musika zalea eta Ekhi Txanpona eta Hika Ateneo bezalako proiektuetan parte-hartzailea.
2007tik Bizkaibuseko LAB ordezkaria. 2011tik Bizkaiko Batzarkidea, lanean, batez ere, mugikortasun eta azpiegitura alorrean, Bizkaian zein Euskal Herrian.
1976ean Galdakaon jaioa, Arte Ederretan lizentziatu eta espezialitatea diseinu grafikoan egin zuen. Arlo bereko masterra ere dauka eta argazkilaritzan aditua ez ezik, errealizazio eta edizio prozesuak ere menperatzen ditu.
Diseinu grafikoaren munduan ibili da lanean eta eskarmentu handia dauka komunikazio eta kultura alorrean. Lanean aritu bitartean, Galdakaoko udalean zinegotzi ibili da hainbat legegintzaldiz, gaur egun EH Bilduren zinegotzi izanik. Egun, 2013tik Udalbiltzan Nazio Gobernuko kidea ere bada.
Urduñan 1975an jaio. Baserritarra eta Nafarroako Unibertsitate Publikoan, Nekazaritza Ingeniaritza ikasketak egindakoa (1994-1999). Ikasketak amaitu zituenetik baserria agroekologiaren bidetik bideratzen eta bere nekazaritza proiektu pertsonala aurrera eramatearekin batera, EHNE sindikatuan izan du militantzia.
Hasiera batean EHNE konfederazioan proiektu ezberdinak aurrera eramaten, eta 2004tik 2010ra EHNE bizkaiko lehendakari moduan sektorea dinamizatzen, aliantzak eraikitzen eta sektoreko proiektu estrategikoak bultzatzen exekutiba-kideekin batera, nekasarea, lankidetzarako proiektuak, baserritarren erakundeen arteko elkartrukeak, formakuntza….
Arlo lokalean urduñako abeltzainen elkarteko zuzendaritzan ibilitakoa da eta bertan urduñako herri garapeneko proiektuan parte hartze aktiboa izan du, elikadura burujabetzaren bidea Urduñako transizioa pausuz pausu eraikitzen.
31 urteko otxandioarra. Telekomunikazioetan doktorea. Tokiko garapen esperientzietan aritua.
Aurkeztutako taldean Luis Maria Salgado Alternatibako kidea ere badago, politika sozialen lan taldeko dinamizatzaile lanetan, hain zuzen ere.
EH Bilduk gaur aurkeztu du programaren ildoak lantzen ari den pertsonen lan taldea. “Araba eraldatzea, Araba berria lortzea, sekulako erronka da. Horregatik, hilabeteak daramagu lanean eta maila handiko taldea dugu. Arabako lehen indarra izateko aukerak ditugu eta Araba berria burutzeko prest gaude”, adierazi du ahaldun nagusia izateko hautagaia den Kike Fernandez de Pinedo.
Gaur goizean Arabako lehentasunezko arloak dinamizatzen dauden pertsonek lan saioa burutu dute, idei nagusiak komunean jartzeko. Fernandez de Pinedok azaldu duen bezala, sozio-ekonomiak izango du garrantzia nabaria, gizartean kezka nagusia izanda, EH Bildurena ere badelako, eta ereduari buelta emateko oinarrizkoa delako. Aldi berean, fiskalitatea, politika soziala eta euskara Araba berriaren oinarriak ere izango dira. Bestalde ere, ingurumena, lurralde antolamendua, lehen sektorea eta toki erakundeen lan taldeetako arduradunak ere bildu dira, hauen komuneko lana izango baita herrialde iraultzeko bermea.
EH Bilduren indar garrantzitsuena bere proiektua osatzen duten lagunak direla nabarmendu dute gaur. “Jende asko dugu inguruan bere ekarpena egiteko gogoekin. Orain gure lan guzti hori Araba berria diseinatzera bideratuko dugu, jakinda ere, sortutako sare oso horrek Araba berria gauzatzen lan egingo duela”, iragarri du Fernandez de Pinedok.
Gaur agertutako dinamizatzaile bakoitzak lan talde osoa osatu du bere inguruan, arlo bakoitza sakonean eta ikuspegi anitzekin lantzeko. Hurrengo asteetan hainbat dinamika burutuko dira gaiez gai eta kuadrilaz kuadrila.
Gaur agertu diren lagunak hurrengoak ekarpena egiten ari dira lan taldeetan:
Alternatibaren ordezkari eta EHBilduren parlamentari Oskar Matuteren partehartzea osoko bilkuran EAEko 2014. urteko Aurrekontu Orokorren eztabaida eta ebazpenaren harira. Matutek PNVren aurrekontuen aurrean bere kezka plazaratu du, gizarteak bizi duen egoera larriari erantzun beharrean, murrizketetan oinarritutako aurrekontuak onartu dituelako EHBilduren proposamenari kasu egin gabe.
Alternatibako bozeramaile eta EHBilduren parlamentari Oskar Matute eta bere koalizioko kide Maribi Ugartebururen partehartzea, hurrengo urtarrilaren 10eko euskal presoen herriratzearen aldeko mobilizaziora deitzeko.
Urgentea da presoen Euskal Herriratzea. Egungo egoeraren arduradun eta errudun nagusia Madrilgo gobernua da: presoekin giza eskubide urraketa nabarmena, sistematizatua eta, gainera, hauspo edo asmo politikoa daukana egiten ari da.
Madrilen asmoa presoen aurkako dinamikan soka tenkatzen jarraitzea da: bakearen etsaiek, PP buru dutela, bake prozesua kartzeletan korapilatu eta kolapsatu nahi dute, etengabean baldintza berriak asmatuz.
Madril ez da mugituko; guk mugiarazten behar dugu.Marraztutako egoera honen aurrean presio politikoan sakontzeko gai garela erakutsi behar dugu, presoen Euskal Herriratzearen aldeko urrats berriak eta sakonak eginez.
Izan ere, bakeak eta soluziobideak presoen Euskal Herriratzea eskatzen du, hori da herri honen gehiengoaren aldarria eta gehiengo horren eskutik aurrera egiteko moduan asmatu behar dugu. Iritsi da horretarako ordua.
Norabide honetan kokatzen dugu euskal presoen kolektiboa hartzen ari den erabakiak, soluziobideetan aurrera egiteko funtsezkoak iruditzen zaizkigunak.
Eta Norabide honetan ere kokatzen dugu urtarrilaren 10eko mobilizazioa: Bakearen etsaiei urrats berriekin erantzun behar zaie, eta ziur gaude urtarrileko 10eko urrats historikoa izango dela.
Euskal Herria Bildu koalizioak erantzukizun osoz jokatuko du, orain arte bezala, sufrimendu oro desagerrarazi behar duelako herri honetatik, giza eskubideen urraketa ororekin amaitzea ezinbestekoa delako herri gisa aurrera egiteko. Koalizioak bere eskutan dagoen guztia egingo du hau honela izan dadin.
Gutxi batzuen interesen zerbitzurako 2015-eko aurrekontuak onartu dira Bizkaian egunotan. EAJren kudeaketa ereduaren isla dira aurrekontu hoiek eta kudeatzen dituzten instituzioen jaun eta jabe sentitzen direnen eredu hori bertan behera uztea du helburu EH Bilduk.
Bizkaiak bizi duen egoera azken hamarkadetako txarrena izanik ere, aurrekontuek murrizketak mantendu, sektore publikoaren desegitea areagotu eta desberdintasun sozialak biderkatuko dituzte. Lau lehentasunei heltzea proposatu zuen EH Bilduk; gizarte politiken indartzea; enplegu sustapenerako plan estrategikoa; politika fiskal justua eta parte hartzerako eta gardentasunerako neurriak.
Aldundiak ez die lehentasun horiei erantzun. Aldiz, aurtengo aurrekontu eztabaidan EAJk, PSEk eta PPk ikuskizun lotsagarria eman dute.
http://alternatiba.net/old-files/bizkaia2015-eu-1.png
http://alternatiba.net/old-files/bizkaia2015-eu-2.png
http://alternatiba.net/old-files/bizkaia2015-eu-3.png
Hamabostero bezala, Euskal Herria Bilduren aldizkari digitala kaleratu dugu, PDF formatuan deskargatu edo sarean ikusteko. Lurralde bakoitzean koalizioak egiten duen lanaren berri eta, asteon, azalean euskal presoen aldeko elkartasuna, beste urte batez, egutegian jartzen duena urtarrileko presoen eskubideen aldeko manifestazioarekin. Zure posta elektronikoan zuzenean jasotzeko, egizu harpidetza.
Alternatiba | Ezkerra eraldatzearen erronka
