Alternatibak Gipuzkoako zahar egoitzetako langileen kanpalekua bisitatu du haien borrokarekin bat egiteko

Alternatibako bozeramaile nazional Oskar Matute eta Amaia Agirresarobek, alderdiaren Gipuzkoako hainbat kargurekin batera (lurraldeko koordinatzaile Xabier Soto, Begoña Vesga eta Enrique Martinez batzarkideak eta Jon Albizu Donostiako zinegotzia), Gipuzkoako hirugarren adinekoen egoitza eta eguneko zentroetako langileen Donostiako Boulevardeko kanpaldian izan dira, atzotik greba mugagabean dauden beharginen borrokaren berri izan eta beren elkartasuna adierazteko.

Sektoreko enpresetako askok ez dute onartu Gipuzkoako Foru Aldundiko Politika Sozialeko departamentuak eginiko proposamena, beharginen lan baldintzak babesten dituena azken lan erreformak hitzarmen kolektiboetan uztailetik aurrera izango dituen ondorioetatik, horretarako beharrezkoa den dirua mahai gainean jarrita. Matutek langileen adorea nabarmendu du, “haien eskubideen aldeko borrokan ari direlako dena kontra izan arren; patronalak beren lan baldintzak are gehiago okertzeko helburua duela eta sistema neoliberalak emakumeak etxeetara buelta daitezela nahi duela, ordainik eta aitormenik gabeko lanak egitera, beharrezkoak izan arren”.

Gainera, azpimarratu du bereziki garrantzitsua dela borroka hau, izan ere, “lehenengo aldiz gobernu batek erakutsi egin du enpresaburuen eta finantza botereen aginduetara aritzea ez den beste zer edo zer egin daitekeela, langileen eskubideen alde egiteko, hain zuzen ere”; hala esan du Aldundiaren eta, bereziki, Politika Sozialeko Diputatu eta Alternatibako kide Ander Rodriguezen harira. Zerbitzu publikoa eta ezinbestekoa eskaintzen duten 4.800 langileko sektoreko beharginen duintasuna bermatu nahi izateagatik eraman du Adegi patronalak Diputazioa auzitara, kalte-ordainak eskatuta gainera bere irudiari eginiko kalteengatik.