Alternatibaren Mahai Internazionalistaren adierazpena, Morian (Lesbos, Grezia) 13.000 pertsona baino gehiago bizi ziren errefuxiatuen eremuan sute lazgarria gertatu eta astebetera:
Sute hau ez da kasualitatearen ondorioa izan. Iheslari-eremuetako suteak maiz gertatzen dira bata bestearen atzetik, eta horien guztien jatorria azpiegituren egoera kaskarrean dago, bai eta eremuetako arriskuen kudeaketan eta eremu horietan gehiegizko populazioan ere.
Nahiz eta askok iheslariei egotzi higiene-falta, erakundeen erantzukizuna da horretarako behar diren baliabide ekonomiko eta logistikoak eskaintzea.
Eremuko talde bat erruduntzat jotzen saiatu dira, koronabirusaren susmoagatik konfinatuta baitzeuden. Baina argi utzi behar da koronabirusa ez dela aitzakia nahikoa ezer gutxi dutenei geratzen zaien duintasuna kentzeko. Izan ere, eremua itxita egon zen, martxoaz geroztik bertan bizi zirenen mugimenduak mugatuta.
Testuinguru horretan, eta urte hasieratik, indarkeriak eta xenofobiak gora egin dute Lesbosen. Sarritan gertatu dira eskuin muturreko kontzentrazioak kanpalekuan eta tokiko erakundeek, konponbideak bilatu beharrean, egoera hori okertzea sustatu dute.
Tokiko eta nazioarteko erakundeek egiten duten kudeaketa negargarria da: 14.000 pertsona inguru etxebizitzarik gabe uzten ditugu (kalkuluen arabera), gero zapaldu egiten ditugu eta, azkenik, errefuxiatuentzat eremu berri bat eraikitzen dugu.
Horregatik guztiagatik, honako hau adierazten dugu:
- Eraiki beharreko kanpamentu berriak itxita eta hesituta egotea onartezina da.
- Beharrezkoa da EBko maila desberdinetako gobernuek errefuxiatuak beren lurraldeetara lekualdatzeko aukera eskaintzea, berme guztiekin.
- Irtenbidea ez da pertsonak ezkutatzea eta pilatzea eta prekarietatera kondenatzea, integrazio- eta elkartasun-sareak ahalbidetzea baizik, gorrotoaren diskurtsoarekin eta arrazakeriarekin eta xenofobiarekin bat egitearekin amaituz.
