Gure Alternatibako kide eta EH Bildu Arabako batzarkide Claudia Venceslaok Arabako Batzar Nagusietan aurkeztutako mozioa, Etxeko Laguntza-Zerbitzua optimizatzeko, indartzeko eta handitzeko eskatuz Aldundiari. Mozio honen bitartez, EH Bildu-k Etxeko Laguntza Zerbitzua indartzeko neurri erreal eta konkretuen alde egiten du, langileek egiten duten zaintza-lana ikusaraziz eta persona nagusien zein desgaitasunen bat duten pertsonen arreta lehen lerroan jarriz.
EH Bildu-k Foru Erakundean erregistratu du mozioa, historikoki Aldundiak programa hori kudeatu duelako eta gaur egun egoitzetako gradu altuenak kudeatzeaz arduratzen delako. “Pandemiak mahai gainean jarri du zaintza lanak hobetzea lehentasuna izan behar dela Foru Gobernuarentzat”, adierazi du Claudia Venceslao batzarkideak mozioa erregistratzeko orduan.
Ibilbide historikoa eginez, Venceslaok gogorarazi du 80ko hamarkadan Etxez-Etxeko Laguntza Zerbitzua sortu zela Araban, egoitza batera joan nahi ez zuten pertsonei mendekotasun premiei erantzuteko jaio zen programa aitzindari eta iraultzailea. 2008an 4.103 etxetan eskaintzen zen zerbitzu hori, baina, azken datuen arabera, 2018an 2.376 etxetan ematen da. 10 urtean, nabarmen murriztu da zerbitzu hori, eta 65 urtetik gorako pertsonen gorakada nabarmena izan da. Hala eta guztiz ere, gogorarazi behar da etxez etxeko laguntza-zerbitzuak, adinekoak zaintzeaz gain, desgaitasun eta mendekotasun oso handiak dituzten pertsonak ere artatzen dituela. “Egoitza-zentroetan sartzea atzeratu nahi badugu eta adinekoak eta desgaitasuna duten pertsonak beren etxeetan artatu nahi baditugu, ezinbestekoa da zerbitzu hori hobetzea”.
“Hasiera haietatik, langileen profesionaltasun handia baino ez da geratzen. Pribatizazioan eta prekarizazioan urteak eman ondoren, egungo etxez-etxeko laguntza-zerbitzua murriztuta eta zaurituta dago. Lan-baldintza prekarioak, arreta-orduen jaitsiera irmoa, zaintza-funtzio ezinezkoak, azken batean, etxez etxeko laguntza-zerbitzua gaur egun, ez da gure lurraldean hainbat urtez martxan egon den programa hori”, kritikatu du batzarkideak.
Zerbitzu hori udal-eskumeneko zerbitzu gisa definitzen da Zerbitzu eta Prestazio Sozialen Zorroari buruzko Dekretuan. “Etxez Etxeko Laguntza Zerbitzua Arabako Udalek kudeatu behar dute, besterik gabe: funtsezkoa da Aldundiak Zorroari buruzko Dekretua bere gain hartzea eta zerbitzu horrek gure lurraldean pairatzen duen ezohiko eskumen-egoera konpontzea”, gaineratu du.
