Alterkaria, gure aldizkariaren hamazazpigarren zenbakiaren azalean elkarrizketa sakon bat daramagu Jonathan Martinez ikerlariarekin “memoriaren detektibea, hemeroteka ibiltaria eta letra, ideia zein ametsen biltzaile aditua”, artikuluan deskribatzen zaion bezala. Bere lehen liburua argitaratu berri duela jo dugu harengana: La historia oficial (Txalaparta, 2022).
Ohi bezala, Alternatibako kideen azkenaldiko analisi eta iritzi artikuluetako batzuk ere jaso ditugu, hala nola Josu Estarrona, Alba Fatuarte, David Mangado, Sandra Llano, Joxe Iriarte ‘Bikila’ edo Maria del Riorenak. Azken honi 2023ko hauteskundeetarako EH Bilduren Bilboko alkategai izendatu zutenetik egin dioten lehen elkarrizketa ere ageri da Alterkaria honetan.
Nabarmendu beharreko azken atal gisa, aldizkarian borroka sozialetako erraldoi baten memoria ekarri dugu gogora, Mariano Gomezena, milaka lagunek mila borroketan bidaide izan zutena. Ahalik eta modurik onenean omenduko dugu, intsumisioaren aldeko borrokaren 25. urteurrenaren harira idatzi zuen artikulu bat gogoratuz, mugimendu horren aitzindaria izan baitzen.
Eduki horiek eta beste batzuek osatzen dituzte gure paperezko aldizkariaren 36 orrialdeak. Online kontsulta ditzakezue, zenbaki hau zein aurreko guztiak, labur.eus/alterkaria helbidean, eta, edozein zalantza argitzeko, jarri harremanetan gurekin prentsa@alternatiba.net helbidean.
