Alternatibaren Batzar Nazionala Bilbon bildu da gaur. Jorratu beharrekoen artean, Alternatibak bere Koordinakunde Nazionala berritzeko prozesua osatu du, eguneroko erabakiak bere gain hartzen dituen organo exekutiboarena, datozen 3 urteetan bere eginkizunak beteko dituena. Halaber, bozeramaile nazionalak izendatu ditu.
Koordinatzaile Nazional berria honako hauek osatuko dute: Josu Estarrona (EH Bilduren Gasteizko legebiltzarkidea), David Mangado (Alternatibaren Nafarroako koordinatzailea), Monika Plazaola (EH Bilduren Feminismo idazkari ohia), Maria del Rio (EH Bilduren Bilboko alkategaia 2023rako), Claudia Venceslao (EH Bilduren Arabako batzarkidea) eta Alba Fatuarte (EH Bildu Bilboko zinegotzia). Azken honek 2023ko ekainean hartuko du kargua, aurreko zuzendaritzako kide Sandra Llano (Alternatibaren koordinatzailea Bizkaian) ordezkatzeko.
Exekutibako zikloa ixten dutenen artean, Oskar Matute dago, Idazkaritza Teknikoko eta alderdiko beste kargu batzuetako kideek bezala, organoari lotuta jarraituko duena. Era berean, Joxe Iriarte ‘Bikila’ ezkerreko buruzagi historikoak, 1969az geroztik hainbat erakundeetako (ETA, ETA VI, LKI, Zutik, Gorripidea edo Alternatiba, besteak beste) zuzendaritzetan parte hartu ondoren, Koordinakundea utziko du. Zorionez, militante gisa jarraituko du eremu eta borroka desberdinetan.
Erakundeko bozeramaile nazionalak, bestalde, Josu Estarrona eta Alba Fatuarte izango dira aurrerantzean, Oskar Matuterekin batera. Maria del Riok zeregin hori utzi eta bere hautagaitzan buru-belarri murgilduko da, EH Bilduren Bilboko oinarriek ekainean berretsi baitzuten.
Energia-kanpaina
Alternatibako Batzarrak egoera politikoari heldu dio ere, eta krisi ekologiko-energetikoa izan du ardatzetako bat, herritar askok pobreziaren atalaseak zeharkatzea eragin dezaketen energiaren garestitzetik eratorritako ondorio guztiak kontuan hartuta, are gehiago, hipoteka-kuoten igoera izugarria espero denean. Zentzu honetan, alderdiak kanpaina bat jarri du martxan, Alternatibak Piztu, oligopolio energetikoaren onura izugarriak salatzen dituena eta funtsezko sektore honetan esku-hartze publikoa aldarrikatzen duena.
Asanbladak, halaber, euskal herritarren etengabeko mobilizazioaren beharra berretsi du, gogoeta hori Euskal Herria Bilduk gaurko Bilboko kaleetan deitu duen manifestazioarekin lotuta. Manifestazio horrek milaka subiranista ezkertiarrez beteko ditu kaleak, klase popularren eskubide sozial eta politikoen aurkako eraso etengabeen aurrean harresia osatzeko.
