Alternatibak dio epaiak agerian utzi duela Espainiako estatuak presoen giza eskubideak sistematikoki urratzen dituela

Estrasburgoko Giza Eskubideen Auzitegiaren epaiak euskal gizartearen gehiengoak irrikaz espero zuen erabakia baieztatzen du, eta aldi berean, giza eskubideen defentsa indartzera dator, presoen eskubideak ere. Estatu espainiarreko gobernuak urte gehiegiz euskal preso politikoenganako mendeku politika jarri du praktikan eta espainiar gobernuaren ekintzaren parte izan den errealitate triste horri buelta ematea beharrezkoa da.

Orain Espainiako Gobernua da Giza Eskubideen Europako Auzitegiaren erabakia bete beharko duena Parot Doktrinaren inguruan, izan ere, aurretik emandako epaia berretsi du Madrilek aurkeztutako helegitea atzera bota ostean; bada garaia, beraz, espetxe politika garai berrietara egokitzeko eta, batez ere, giza eskubideekiko errespetu guztiarekin aurrera egiteko. Euskal gizartearentzat, eta Espainiako estatuan bere burua demokratatzat jotzen duenaren edozeinentzat, ulertezina baita euskal presoekiko zigorren gogortasuna eta krudelkeria, aldi berean, Galindo eta GAL auzian inplikatutako guztiak lau urteko espetxealdia bete gabe ere kalean egotea.

Horixe da askok ahoak betetzeko darabilten “zoru etikoa” delakoa, Giza Eskubideen Europako Auzitegiak harriz harri desegin diena, Estatu espainiarreko Gobernuak euskal presoen giza eskubideen urraketa sistematikoa erabiltzen duela berretsi egin baitu.