Oskar Matute “EAJ, PSE eta PPk ateak ireki dizkiote transnazionalek Europako botere politikoa eskuratzeari”
EAJ, PSE eta PPk ez dute oztopatu nahi izan Europako eta Estatu Batuetako agintariek egiten diharduten merkataritza askeko ituna. EH Bilduk aukera eman die Legebiltzarreko osoko bilkuran, amerikako transnazionalek kapitalismoaren izenean inpunitatez Europan sartzea gaitzesteko. Aldiz, jeltzale, sozialista eta popularrek nahiago izan dute “zuhurtziaren” izenean sinadura hori ez oztopatzea. Itunak ahalbidetuko du “enpleguan, ingurumenean, osasun publikoan eta elikadura segurtasunean ondorio suntsitzaileak” izatea, salatu du Oskar Matute legebiltzarkideak.
Koalizioak beste bide batetik jotzeko proposamen politikoa egin du Legebiltzarrean, hain zuzen, “Europako herrien burujabetza erreskatatzeko eta herritarrak enpoderatzeko bidean”. Hiru alderdiek guztiz kontrakoa egin dute, “kapitalismoaren izenean krisi sozioekonomikoan sartu gintuen Europara itzultzea, bidea irekiz transnazional eta lobbiek Europako botere politikoa eskuratzea, euren intereserako erabiltzeko”. “Estatu Batuen interes geoestrategikoen eta bere morrontzara dagoen Europa nahi duzue”, esan die Matutek, eta “hala ere, gai izango zarete kanpainan Europa demokratikoagoa eta sozialagoa nahi duzuela aldarrikatzeko”.
Asier Vega: “Espainiako Gobernutik jasotzen dituen diru laguntza berezirik gabe, Zabalgarbik 18 milioi euroko defizita izango luke”
Asier Vega Alternatibako kide eta Bizkaiko EHBilduko batzarkideak agerraldia egin du gaur goizean Zabalgarbiren inguruan. Errauskailuak hondakin toxikoak sortzen dituela salatu du eta azpiegituraren errendimendu energetiko baxuaren ondorioz, Europako legedia urratzeko arriskuaz ohartarazi du.
EH Bilduk Zabalgarbi errauskailuaren jardueraren inguruko hainbat alderdi argitzeko exijitu du Bizkaiko Batzar Nagusietan izan den Ingurumen batzordean. Koalizioak Iosu Madariaga Ingurumen diputatu eta Zabalgarbiko presidente denari eskatu dizkio azalpenak, Ekologistak Martxanek eta EHUko hainbat irakasle adituk errauskailuari buruz osatu duten txosten baten informazioaren harira.
Asier Vega EH Bilduko batzarkideak hiru ardatzen inguruko argibideak eskatu ditu: errauste prozesuan atmosferara isuritako gaiei buruzkoak, erraustearen ondorioz sortzen diren gai toxikoei buruzkoak eta eraginkortasun energetikoari eta bideragarritasun ekonomikoari buruzko azalpenak.
Isuriak
Atmosferara jaurtitako isuriei dagokienez, 2012an gai kutsakorren gehienezko isurketa mailak lau aldiz gainditu zirela onartu zuen Lakuak. Koalizioko ordezkariak nabarmendu duenez, Eusko Jaurlaritzak errauskailuaren jarduera behin eteteko agindua eman zuen arren, gainontzeko hiru alditan ez zen halako neurririk hartu.
Horrez gain, Vegak gogorarazi du Ingurumen Baimen Bateratuaren arabera, “karbono monoxidoaren gehienezko isuriak ezin izango dira edozein kasutan gainditu eta Zabalgarbik bi alditan gainditu zuen karbono monoxidoaren isuri muga. Bi aldietan ez zen errauskailuaren jarduna eten”.
EH Bilduk gai toxikoen isuriak aipatu ditu. 2012an merkurio isuria 1,5 kg-ko kopurura iritsi zen eta datu horrekin kezkatuta, Vegak diputatuari galdetu dio ea urtean 150mg/m3-ko isuri jarraituaren muga gainditu den. Madariaga diputatuak ez du Vegaren galdera erantzun.
Bestalde, dioxina eta furano neurketen datuek islatzen dutenez, 2012an Zabalgarbiren hurbileko hainbat puntutan lau aldiz gainditu zen gida-balioa (23 femtogramo/m3). “Osasunerako kaltegarria al da dioxina eta furanoak airera isurtzea? Ados egongo gara dioxina eta furanoak gizakiaren jardueraren ondorioz sortzen diren gairik toxikoenak direla baieztatzen badut” gaineratu du Vegak.
EH Bilduk ziurtatu duenez, hainbat ikerketa zientifikok frogatzen dute hondakinen errausketak gai arriskutsuak sortzen dituela eta osasunerako kaltegarriak diren gai toxikoak askatzen dituela. Madrilgo Carlos III unibertsitateko ikerketa baten aipua egin du Vegak. Ikerketa horren arabera, errauskailuen edo gai toxikoen tratamendurako azpiegituren ondoan bizitzeak minbizi arriskua handitzen du bataz bestekotik gora.
Hondakinak
EH Bilduk adierazi du Zabalgarbik gai arriskutsu bihurtzen dituela hasiera batean arriskutsu ez direnak, errauste prozesuaren bidez.
2012 eta 2013 urteetako hainbat zepa laginek ez dute lixibatu frogan baldintza nahikorik bete, arriskutsu ez diren hondakinen isurtegietan uzteko. Analisiek adierazi dute kobre eta karbono organiko disolbatu maila altuegiak zituztela. Ondorioz, hondakin arriskutsuen trataera jaso behar dute. “Dirudienez, ordea, zepak Larrabetzu, Lemoa eta Zallako zabortegi arruntetara eraman dira”.
Vegak azalpenak eskatu dizkio Aldundiari kontrol gabeziarengatik eta zepen kudeaketak eragin ditzakeen osasun kalte eta kutsadurarengatik.
Energia eraginkortasuna
Ekologistak Martxanen txostenak aditzera eman du Zabalgarbi errauskailua ez litzatekeela energia balorizaziorako azpiegitura izendatu behar, hondakinen ezabaketarako azpiegitura baizik.Elkarteak R1 faktorean (energia eraginkortasuna neurtzeko indizean) oinarritzen du baieztapena.
Zabalgarbiren kalkuluen arabera, R1 faktorearen balioa 0,63koa izan zen 2012an. Hau da, energia balorizaziorako planta gisa izendatzeko gutxienekoa baino 0,3 puntu gehiago. Aldiz, Ekologistak Martxanen txostenak metodologia akatsak atzeman ditu eta egiazko balioa 0,59koa dela ziurtatu du. Hala balitz, Zabalgarbi hondakinen ezabaketarako planta izendatu beharko litzateke. Eusko Jaurlaritzak R1 faktorearen neurketa errebisatu du elkarte ekologistaren eskariz eta 0,61eko balioa eman dio Zabalgarbiren energia eraginkortasunari. Vegak emaitza horren azalpena eskatu du baina Madariagak ez du azalpenik eskaini.
“Zabalgarbik 0,60eko balioa baino gutxiago lortuko balu, ezingo lituzke tratatu gabeko hiri hondakinak erre eta hondakinen kudeaketarako hierarkian isurtegien lehentasun maila berbera izango luke” argitu du koalizioko batzarkideak. Aldaketa horrek Europako legedia urratzea ekarriko luke.
Azkenik, Vegak Zabalgarbiren bideragarritasun ekonomikoa izan du hizpide. “Espainiako Gobernutik jasotzen dituen diru laguntza berezirik gabe, Zabalgarbik 18 milioi euroko defizita izango luke”. Vegaren ustez, laguntza horiek ezabatzeko aukeraren aurrean, gasaren garestitzearen aurrean eta Europako legedian aurreikusten diren aldaketak kontuan hartuta, Zabalgarbiren bideragarritasun ekonomikoa kolokan dago.
Europako hauteskundeetarako EHBilduren programa
Hemen Europako Hauteskundeen EHBilduren programa, herritarren 400 ekarpen baino gehiagorekin osatu dena.
EH Bilduk dio Imazen kargua Repsolen EAJk botere finantzariei eginiko mesedeen ordaina dela
Josu Jon Imaz Repsoleko Kontseilari Delegatu izendatu berri dutela eta, honakoak adierazi nahi ditu Euskal Herria Bildu koalizioak: Josu Jon Imazena “Ate birakariak” izeneko fenomeno etika gabearen adibide aparta da eta erabat salagarria.
Josu Jon Imazek ardura hauen guztien (Petronor ere gogoratu behar da) atzean EAJren eredu ekonomikoaren itzala ikusten du Euskal Herria Bilduk. EAJ alderdiak oso interes zehatzak defendatzen ari da urteotan: merkatu finantzari eta multinazionalen interesak, botere ekonomikoaren interesak, hain zuzen.
Josu Jon Imazen karguak horren adibide baino ez dira, botere ekonomiko horren interesak defendatzeagatik jasotako sariak eta eskainitako postuak. Soilik horrela uler daiteke Arantxa Tapia kontseilaria Imazen bilakaeraz harro agertu izana, “ardura honetan nire aurretik egondakoa kargu horretan egotea harro izateko modukoa da” esan baitzuen. Zer eskatzen ari da berarentzat trataera berdina etorkizunean ere? “Ate birakariak” biraka segitzea, alegia.
Euskal Herria Bilduk horrelako jarrerak zorrotz kritikatzeko beharra ikusten du, egun bizi dugun egoeran herritarrak iraintzea dela iruditzen zaigulako: langabezia eta pobrezia egoera lazgarrienean gaudenean, botere ekonomikoaren sarien dantzan ikustea zein eta Euskal Autonomia Elkartean gobernatzen duen alderdia.
Imaz eta Urkulluren arteko lotura ezagutza pertsonaletik harago doa: gertutasun politikoa ere erabatekoa da. Urkulluren gobernuak Imazek indarrean jarritako eredu politiko-ekonomiko berberari erantzuten dio eta botere ekonomikoaren, Troikaren erabakien eta Madrilek hartutako erabaki guztien jarraipen hutsa egitera mugatu da. Jarraipen horren ondorioz, agerian geratzen ari da Urkulluren gobernuak ez duela gaitasunik emergentziazko egoera hau kudeatzeko eta soluzioak mahai gainean jartzeko.
Euskal Herria Bilduk bukatzeko bi ondorio azpimarratu nahi ditu: Josu Jon Imaz Urkulluren ifrentzua da eta, beraz, EAJren eredu politiko-ekonomikoaren adibidea. Eredu politiko-ekonomiko honek botere ekonomikoa babestu eta herritarren interesak baztertzen ditu praktikan eta hori egiten da Sabin Etxeako bulego politikotik eta bulego politikoa uzten denean multinazionalen bulegoetatik, kasu honetan Repsol eta Petronorren bulegoetatik.