Etiketa: Berria

Cegasako langileak ez dituela defendatu leporatu dio EH Bilduk Arabako Foru Aldundiari

Cegasako langileak ez dituela defendatu leporatu dio EH Bilduk Arabako Foru Aldundiari. Izan ere, irekita du Cegasak Lan Erregulazio Espediente bat eta segur aski 250 langile kalean geratuko dira. Baina Arabako Foru Aldundia prozesu honetako partaidea da Konkurtso Administratzailea baita eta lan hori azpikontratatu zuen. Baina Lan Ikuskaritzak egindako txosten baten arabera, fede txarrez aritu da eta iluntasunez betatako prozesua burutu du.

Hau dena ikusita, izendatutako Konkurtso Administratzailea aldatzea eta epaitegietan lan erregulazio espedienteari buruzko epaia eman aurretik berriz kontsultetarako epea zabaltzea eskatu dio EH Bilduk Arabako Foru Ahaldun Nagusiari. “Arabako Foru Aldundiak bere egin beharrak alde batera utzi ditu eta Araban enplegua defendatzeko interesik ez du adierazi. Bestela, Lan Ikuskaritzak egindako txostena ezagutu bezain pronto LEE bertan behera uzteko eskaera egingo lioke enpresari edo ordezko bat bilatuko luke”, azpimarratu du Luis Salgadok, Alternatibako kide eta Arabako Biltzar Nagusietako EH Bilduko biltzarkideak.

Hau guztia argitzeko asmoz, Arabako Ahaldun Nagusiari zuzendutako interpelazioa aurkeztu du EH Bilduk. Segur aski, urrian egingo den lehen kontrol osoko bilkuran jorratuko da. Bertan, Lan Ikuskaritzaren txostenaren berri ote zuen jakin nahi du EH Bilduk. Era berean, Aldundiak izendatutako Konkurtso administratzailerekin izan duen bileraren bat argitu nahi du EH Bilduk.

EH Bildu Araba

Berriak

Diana Urrea: “Ezinbestekoa da errefuxiatuen aferari Euskal Herritik ere berehala hitzetatik ekintzetara pasatzea”

Euren jaioterrietan pairatzen dituzten gerrak, goseteak, pobrezia… atzean uzteko ihesean Europara iristen saiatzen diren pertsonen egoera dramatikoa da aspaldiko partez, eta EH Bilduk hala salatu du behin baino gehiagotan. Egunotan, ordea, Europa osoa lotsatu beharko lukeen tragedia hori neurri eta muga guztiak gainditzen ari da eta ezinbestekoa da Europar Batasunera iritsitako errefuxiatuei asilo ematea, Nazioarteko Zuzenbide Humanitarioak agindu bezala.

Hori dela eta, EH Bilduk legez besteko proposamena aurkeztu du gaur Legebiltzarrean Jaurlaritzak Araba, Bizkaia eta Gipuzkoa pertsona errefuxiatuen aterpe-lurralde izendatu ditzala eta pertsona horiei arreta egokia eskaintzeko behar diren baliabide guztiak bideratu ditzala eskatzeko. Milaka lagunen bizitza jokoan dago eta, ondorioz, EH Bilduk presazko tratamendua eman nahi dio bere proposamenari; horretarako, Erregelamenduak ematen dion aukera baliatuz, Osoko Bilkura deitzeko ere galdegin du, ekimen hori 15 egun igaro aurretik eztabaidatu ahal izateko.

Afrika eta Asiatik ihesean ateratzen diren etorkinen asilo eskubidea azpimarratu du EH Bilduk, bai eta pertsona horien jaioterrietan bizi den egoeran Europar Batasunak duen ardura ere. Hori dela eta, asilo eta babes politika berria eskatu dio Europar Batasunari, “betiere gisa eskubideen errespetua oinarri hartuko duena”, zehaztu du Diana Urrea Alternatibako kide eta EH Bilduko legebiltzarkideak.

Urreak azaldu duenez, “ezinbestekoa da errefuxiatuen aferari Euskal Herritik ere berehala ekimena hartzea eta hitzetatik ekintzetara pasatzea”. Horren haritik, EH Bilduren proposamenak eskari zehatzak egiten dizkio Jaurlaritzari, lehenik eta behin, “Euskal Autonomia Erkidegoa errefuxiatuen aterpe-lurralde izendatu dezala eta horretarako behar diren baliabide guztiak bideratu ditzala, pertsonen asilo eta aterpe emate alorrean lan egiten duten erakundeekin elkarlanean”.

Halaber, ahalik eta arinen erakunde horiekin eta alkateekin batera EAEk jaso dezakeen errefuxiatu kopurua zehaztu dezala eskatu dio EH Bilduk Lakuari, horren ostean espainiar Gobernuari kopuru hori jakinarazteko. Eta azkenik, euskal herritar askok eskainitako laguntza bideratzeko, zerbitzu bat sortzea proposatu du, laguntza guztiak koordinatzeko.

EH Bildu

Berriak

Alternatibak Guatemalako herria zoriondu du Perez Molina genozidak kargua utzi izanagatik

Otto Perez Molina presidente ohia, irmo jokatu behar zuena, burua eta bihotza erabili, ez zenuen baina irmotasunik azaldu iruzurrarekin amaitzeko. Are gehiago, iruzurraren jaun eta jabe egin zara, Horregatik, Zigorgabetasunaren Kontrako Guatemalako Batzordeak (CIGIC), Estatuko fiskaltzak eta Guatemalako Diputatuen Kongresuak hala ikusi dute eta, horregatik, aduenetako zergetan iruzur masiboan parte hartzeagatik zu inputatzeko zantzuak daudela erabaki dute.

Baina hein handi batean, Guatemalako herrian izan da, etengabeko mobilizazioaren bitartez eta borrokaren bidez, usteldutako instituzioak horretara bultzatu duena. Ez dute beste aukerarik izan eta orain arte Guatemalako presidentea izandakoa atxilotzeko agindua eman dute.

Berri honek poztu egiten gaitu, eta Guatemalako herria zoriondu nahi dugu, bere borrokarengatik, eta garaipen partzial hau ospatzen dugu, militar kaibil honen kargugabetzeagatik, bihotzik gabeko genozida eta lapurra delako Perez Molina.

Bestetik, ziurgabetasuneko egunak dira hauek Guatemalako ezkerrarentzat, izan ere, irailaren 6an hauteskundean egin behar zituzten. Mobilizazioetan aritzen direnen zati handi batek bozak atzeratu beharra ikusten dute, berme demokratiko nahikorik ez delakoan, horregatik, egitekotan, abstentzio arduratsua eskatuko dute. Ezkerraren beste talde batek, aldiz, parte-hartzeko beharra ikusten du, eskura dezaketen ordezkaritza gal ez dadila.

Emaitza edozein izanda ere, Alternatibatik herri honetako herritarren kemena nabarmendu nahi dugu eta arretaz jarraituko dugu beren etorkizuna.

Berriak

Luis Salgado: “Arabako gizarte politikek errotiko aldaketa behar dute, erabiltzaileei kalitatezko zerbitzuak bermatzeko”

“SAD berreskuratzea lehentasunetarikoa da eta horretarako urgentziazko neurriak hartu behar dira, besteak beste, honakook: erabiltzaileei eskainitako zerbitzu orduak handitzea, egungo koordainketa itogarria murriztea eta benetako esfortzua egitea eskainitako zerbitzuak eta prestazioak (SAD, PEAP, PECEF, Eguneko Zentroak…) koordinatzeko”, adierazi du Luis Salgado Alternatibako kide eta EH Bilduko biltzarkiak.

Halaber, EH Bilduk ez du onartuko Gizarte Zerbitzuak enplegu publikoaren suntsiketan eta etengabeko pribatizazio katean oinarritzea; hori dela-eta, Foru Gobernu berriari eskatzen dio zerbitzuak kanporatzea eten dezala, hainbat zerbitzu (egoitzetako sukaldaritza edota garbitegi zerbitzuak, esaterako) berreskura ditzala eta EPE bat abiaraz dezala 2007tik gabeziak dituen Lanpostu Zerrenda finkatzearren.

Salgadoren ustez, legealdi honetako erronka nagusienetariko bat da koordinazio soziosanitarioko eredu eraginkorra lantzea eta sendotzea, kontua ez baita bakarrik Osakidetzaren finantzazioa lortzea GOFEk kudeatzen dituen haren zerbitzuetarako, baizik-eta benetako koordinazioa eskuratu behar dela erabiltzaileak maiz inoren eremuan eta eskumenei buruzko eztabaiden ondorioz dagozkien zerbitzuak jasotzeke uzten dituzten konpartimentu estankoak ekidin eta desagerrarazteko. Ildo horretatik, urgentea da konponbidea ematea buru desgaitasuna pairatzen duten gatazka errepikatuei; izan ere, pertsona horiek patologia bat ez ezik, Osakidetzaren leihatiletatik Foru Aldundiarenetara eramaten gaituen “frontoiaren sindromea” ere jasaten dute, inork ardurarik bere gain hartzen ez baitu.

Salgadok esandakoaren arabera, “halaber, Gizarte Zerbitzuen Foru Diputatu berriari eskatuko diogu Zerbitzuari Lotutako Prestazio Ekonomikoaren (PEVS gaztelaniaz) erabilera mugagabea murriztu dezala, aurreko legealdian berau erabili baita egoitza plaza berrien sorrera ekidin eta sektore pribatua finantzatzeko, legeak xedatutakoa etengabean urratuz eta iruzurrezko erabilera burutuz”.

Ildo beretik, EH Bilduk deritzo premiazkoa ere badela Foru Aldundiak Lagundu Gabeko Adingabe Atzerritarrentzat (MENAS gaztelaniaz) erabiltzen duen CIE eredua konpontzea. “EH Bildun uste dugu sistema osoa berraztertzeko unea dela praktikan adin txikiko horien banantzearen alde egiten duen eredu hori ekiditeko. Harrera Zentro horiek desagerrarazteko eta gainontzeko adin txikikoentzat dagoeneko dauden ibilbideetan eraginkortasunez sarrarazteko urratsak egin behar dira”, azaldu du EH Bilduko biltzarkideak.

Azkenik, Luis Salgadok INDESArentzat, bazterkerian erortzeko arriskuan dauden taldeentzat eta Gizartegintzako langileentzat konponbideak eskatzeko konpromisoa bere gain hartu du. “Azken finean, Foru Diputatuari helaraziko diogu EH Bilduk elkarrizketa eta akordiorako borondatea, beti ere elkarrizketa horrek balio badu herrialdeko Gizarte Zerbitzuen etorkizuna hobetu, defendatu eta ziurtatzeko” amaitu du.

EH Bildu Araba

Berriak

Espainiak eta Europak asilo eskubidea eta giza eskubideak urratzen dituzte, eta arriskuan jarri dute milaka pertsonen bizitza

Bigarren mundo gerratik hona izan den pertsonen joan-etorri masiboa handiena gertatzen ari da Europan. Milaka pertsona dira gerratik, heriotzatik eta miseriatik ihes egiten ari direnak. Era horretara, ACNURen arabera pertsona horien %80k asiloa eskatzeko baldintzak betetzen dituzte, gatazka egoeran dauden Iraken, Sirian edo Afganistanen dutelako jatorria.

Ceuta eta Melillan eta Gurugu menduan pertsona migranteek bizi dituzten baldintzak salatu zituen bere egunean EH Bilduk, eta Jon Iñarritu Kongresuko ordezkaria bertaratu zen hara lehen eskutik ezagutzeko zer gertatzen ari zen; gauza bera egin zuen Josu Juaristi europarlamentariak joan den ekainean, Lampedusara egindako bidaian.

EH Bilduren iritziz, kasu hauetan eta aurtengo udan Europako Batasuna izaten ari den jarreraez da inolaz ere onargarria. Asilo politika bateratua ez daukala erakusteaz gainera, Batasuneko agintari politiko batzuen aldetik jarrera xenofoboak eta arrazistak bultzatzeko joera nabarmendu da.

Mariano Rajoyren gobernuaren jarrerada Europako instituzioek duten jarrera ankerraren beste adibide bat. Izan ere, Espainiako estatuak 2.000 pertsona inguru har ditzakeela esan du, estatu horrek 40 milioi biztanletik gora dituenean.

EH Bilduk uste du Europako Batasunak eta bere barnean dauden estatuek eta horiek erantzun bat eman behar dietela heriotzatik eta ihesetik ihes egiten ari diren eta beren etorkizuna bakean oinarritu nahi duten milaka eta milaka pertsona horiei. Giza eskubideak babestea eta betetzea ez da exijentzia horren oinarri bakarra. Ez baitugu ahaztu behar Europaren eta bere kideen nazioarteko politikak eragin zuzena daukala pertsona horien jatorrizko herrien egoeran; Europak eta bere aliatuek pertsonen eskubideei baino garrantzia handiagoa eman diote arlo edo interes ekonomikoei eta geopolitikoei.

Gaur egun, Mugagabeko Medikuak bezalako gobernuz kanpoko erakundeak dira Europak egiten ez duen lana egiten dutenak. Jaso diren asilo eskaerak oso txikiak dira horren atzean dagoen arazoaren tamainarekin alderatzen badugu edota Europak daukan maila ekonomiaren neurria eta biztanle kopurua kontuan hartzen bada.

Arazo humanitarioen aurrean konponbide polizialak jartzeari uzteko exijitzen die EH Bilduk Europako Batasunari eta Espainiako estatuari; era berean, giza eskubideen aitortzan eta errespetuan daukaten jarrera zekena alboratzeko eskatzen die.

Horrez gain, Euskal Herriko erakundeei, parlamentuetan hasi eta udaletaraino, drama honen aurrean jarrera aktiboa izateko eskatzen diegu, pertsona migratzaile, exiliatu edo errefuxiatuentzako gune ireki bezala izendatuz. Zentzu horretan, hainbat ekimen aurkeztuko ditugu hurrengo egunetan.

Pertsona bat bera ere ez da ilegala

Berriak

Alternatibak salatu du PPren konstituzionalaren erreformak herrien borondatea bahitzeko helburua duela

Ayem Oskoz Alternatibaren Koordinakunde Nazionaleko kideak Alderdi Popularrak gaur iragarritako berehalako erreforma aztertu nahi izan du, Espainiako Erresumako Auzitegi Konstituzionalari bere ebazpenak betetzen ez dituenari zigorrak ezartzeko eskumena eman nahi diona; “noiz eta Kataluniako hauteskunde erabakigarrien atarian gaudela”. Ebazpen horiek, gogorarazi du Oskozek, “kutsu politikoa dute beti, berriro ere, frankismoak ezarritako Espainiako nazioaren batasun sakrosaindua gordetzeko helburuarekin eta, beraz, herrien borondatea bahitzea bilatzen dute”.

Alderdi ezkertiarretik salatu dutenez, “eskubide urraketa eta murrizketak nagusi diren kiribilean” urrats berriak egiten jarraitzen du Mariano Rajoy-ren gobernuak, honelako “kirtenkeriak” mahai gainean jarrita. Erreforma honen bidez, “Madrilek kartzela zein isunen mehatxuekin Katalunian hautestontziek ekintza demokratiko baten bidez esan dezaketena geldiarazi nahi du, kontra egiten dioten erkidegoen instituzioak bertan behera utzita ere”.

Oskozek, azkenik, “deitoragarritzat” jo du Merkelen argazkia Espainiako presidenteari bere “independentismoaren aurkako gurutzadan” laguntza eskaintzen. Izan ere, laguntza horrek “ordaina izango du, PPk Alemaniako finantza botere neoliberalen aginduen aurrean ageri ohi duen menpekotasunari eustea alegia”.

Berriak

Guztien eskubide guztien alde, preso gaixoen aldeko manifestazioan izango gara

Urtero bezala Espainiar Estatuko gobernuak EAEn duen delegatuak Euskal Herriko festetan jarri du begirada, herritarrek hartutako erabaki eta antolatutako ekitaldiak erasotuz. Biktimen duintasuna aitzakia hartuta, Urkijok proiektu baten inposizioa eta Euskal Herriak behin eta berriz ukatu dion protagonismo politikoa lortu nahi du.

Ez da biktimen duintasuna bermatzen batzuk alde batera utzita; guztien onarpen eta aitortzak bakarrik egiten dio justizia biktimen duintasunari, eta ondorioz gobernuko delegatuaren jarrera sektario eta mendekariak biktimen duintasuna zuzenean erasotzen du, are gehiago biktimei egin daitekeen eraso bortitzena hauen mina alderdikeria eta helburu elektoralekin erabiltzea da.

Espainiar Estatuko gobernuaren delegatuak, gobernuak berak egiten duen bezala, Euskal Herriko gizartea hain konprometituta dagoen adiskidetze eta elkarbizitza prozesuari trabak jarri baino ez du egiten eta horretarako edozein aukera baliatzen du. Bere jarrera zital eta mendekariak interes elektorala zekenak baina ez ditu atzean, porrot egin duen Estatu eredu zaharkitu baten inposizioa azken finean.

Estatuko gobernuaren mendeku gosearen adibide garbiena kartzela politikan dago, presoei, bereziki gaixoei, oinarrizko eskubideak ukatuz. Asko gara Euskal Herrian herritar guztien eskubideak errespetatzea eskatzen dugunok, bereziki gaixotasun bat pairatzen duten presoena, eta uda garaian ere ez dugu alde batera uzten. Horregatik, bihar, abuztuak 28, Bilboko Plaza eliptikoan egingo den manifestaldian izango gara, gaixorik dauden preso guztien kaleratzea eskatzeko.

EH Bilduk garbi du protesta eta manifestazioa oinarrizko eskubide zibilak direla eta ezin direla PPk dituen interesen arabera urratu eta, gaur egun, Urkijo eta epaile batzuk ilegalizazio, debeku eta eskubideen urraketekin hori bermatzen dute.

Euskal Herriko gizarteak adiskidetzea nahi du, bazterketarik gabe biktima guztien onarpena eta erreparazioa nahi ditu. Pertsona guztien giza eskubideen errespetua eskatzen du, baita preso daudenena ere, eta ez Partidu Popularrak egin nahi duen bezala, alde bakarreko memoria faltsu bat inposatu herri honetako errealitate ezberdinak ahaztuz. Euskal Herriak ez du Madrilen esku sartzerik nahi, eta ez du behar kazike lanak egingo dituen gobernu delegaturik. Horregatik eta beharrezkoa ez delako, zaharkitua dagoelako eta inposatua delako, gobernuko delegatuaren figura desagertzea eskatzen dugu. Madrilgo gobernuari eta indar politiko guztiei dei egiten diegu, bazterketa eta inposiziorik gabe, bake prozesu, adiskidetze, normalizazio eta elkarbizitzarekin konpromisoa har dezaten.

EHBildu

Berriak

Eraso eta hilketa matxistei erantzutera deitzen ditugu

Bihar 12:00etan Abusun izango da Leire Rodriguezen hilketa salatzeko lehen elkarretaratzea, Bilboko Udalak eta Arrigorriagakoak deituta.

Azken orduetan jakin denez, bikotekide ohiak hil zuen Leire Rodriguez Arrigorriagako emakumea, autoarekin harrapatuta. Ez zen beraz, auto istripu bat izan, baizik indarkeria matxista kasu bat. Hala, ezeren aurretik, elkartasun eta babes osoa adierazi nahi diogu Leire Rodriguezen senide eta hurkoei.

Halaber, salatzen dugu hilketa matxista oro emakumeok bizi dugun desoreka eta menpekotasun estrukturalaren ondorio direla, maiz instituzio askotako politika publikoetan hauspo eta aterpe aurkitzen duen sistema patriarkalaren ondorio, hain zuzen.

Horrenbestez, instituzioei eta zehazki Bilboko Udalari beste behin galdegiten diegu emakumeak ahalduntzeko eta maila guztietan haien posizioa indartzeko berdintasun politika eraldatzaileak abian jartzeko. Indarkeria matxistaren aurka, ez dira zilegi arazoaren muinari heltzen ez dioten erantzun epel eta zatikatuak, orain artean Bilboko Udalak emanikoak bezalakoak. Behar-beharrezkoak dira politika ausartez lagunduriko erantzun irmo eta zabalak, emakumeen ahalduntzean oinarriturikoak.

Hala, herritarrei dei egiten diegu eraso eta hilketa matxisten aurrean erantzutera, eta Leire Rodriguezen hilketa matxista salatzeko mugimendu feministak zein eragile desberdinek datozen orduetan deituko dituzten mobilizazioetan parte hartzera.

Elkartasuna eta salaketa dira erasotzaileak estutzeko eta indarkeria matxista gelditzeko tresna eraginkorrenetarikoak.

EH Bildu

https://pbs.twimg.com/media/CM1qwPHWsAAbBOU.jpg

Berriak

Ez ezetz da! Indarkeriarik gabeko jai guneak eta bizitzak nahi ditugu

EH Bilduren agerraldia atzo Donostian, Alternatibako militanteen presentziarekin Gipuzkoako batzarkidea den Jon Albizu haien artean, koalizioaren konpromisua eraso sexisten kontra eta beren jarrera politikoa azpimarratzeko azken asteotan eman diren eraso sexisten aurrean.

Udara hasieran Gozo Goza Jaiak kanpaina aurkeztu genuenean Barañaingo jaietako eraso sexista azkena izan behar zuela aipatu genuen. Horrez geroztik, ugariak izan dira jai ezberdinetan izandako erasoak; Baionan, Gasteizen, Azpeitian, Getxon…

Desagertzetik urrun geure jendartean errotuta dagoen biolentzia matxista honek, aurpegi ugari ditu, tartean eraso fisiko eta sexualak, baina ekonomikoak eta hitzezkoak ere badaudelarik.

Horregatik diogu biolentzia matxistari aurre egiteko, bizitzaren esparru orotan berdintasunezko harremanak oinarri izango dituen jendartearen eraldaketa ezinbestekoa dela.

Eta zentzu honetan diogu, biolentzia ez litzatekeela gauzatu ahalko, baldin eta onartzen eta posible egiten duen jendarteratze mekanismoak egongo ez balira; hainbatetan biolentzia kontziente edo inkontzienteki arrazoitutzat, beharrezkotzat edo saihets ezinezkotzat jotzen baita. Eta honela, erlijioak, hizkuntzak, komunikabideak, familiak eta hezkuntzak biolentzia egonkortu dadin, jendarteratze mekanismoen eragile bilakatzen dira.

Horregatik, emakumeok biolentzia matxistarik gabeko bizitza libreak bizi ahal izateko, burutu beharreko lan eta estrategiek ondorengo urratsetan behar dute izan oinarri:

  • Biolentzia matxistari aurre egiteko garaian, emakume eta gizonen arteko bazterkeria estrukturalaren kontrako lanketa hartu oinarri.
  • Biolentzia modu anitz eta ugariak bistaratu, biolentzia horiek gauzatzen diren espazio ugariak agerian uztearekin batera.
  • Baztertzaileak diren adierazpen eta gauzapen kulturalei aurre egin, eta biolentzia matxistaren eragiletzat jo halakotzat hartuak ez baina badiren fenomeno sozio-kultural eta sinbolikoak, hauen bitartez ematen baita gehienetan biolentzia matxistaren legitimazioa.
  • Agerian utzi, prebentzio lana egin eta emango bada aurre egin, beste biolentzia matxista moduei, transfobia, lesbofobia edo homofobiaren modukoei.
  • Biolentzia matxistaren aurrean gizonek duten protagonismoa eta jarrera hartzeak aztertzera bultzatu: erasoa zer den eta zer ez den identifikatzeko dituzten arazoak, emakumezkoekin eraikitzen dituzten harremanak, balizko jardunbide matxisten aurreko beraien jarrera, edo eraso matxista baten aurrean har lezaketen jarrera pasiboa erasoa babestu ez arren.
  • Prebentzioa ezinbesteko elementutzat hartu, berdintasuna oinarri izango duten harremanak sortu eta eraikitzeko garaian, hezkuntza formal eta ez formalean eragin beharko dugularik.

Honengatik guztiagatik, honako konpromisoa hartzen du bere eguneroko jardun politiko, sozial eta instituzionalean EH Bilduk:

  • Berdintasun esparruko politikekiko konpromisoa mantendu eta egonkortu, berdintasun politikak garatzeko behar diren baliabide ekonomiko eta humanoak indartuz.
  • Ekintza eta jarrera matxisten aurrean, prebentzio eta salaketarako eragile aktibo izan.
  • Abian jarri, hedatu edo indartu, emakumeen parte hartze ekitatiboa ahalbideratzen dituzten jai edo jardun sinbolikoak, bai eta gainerako espazio sozio-kulturalak ere.
  • Emakumeen enpoderamendua bultzatzen duten gune komunak sortu edota indartu, behar adina baliabiderekin eta sare lana sustatuz, enpoderamendu eskolak edo emakumeen etxeen modukoak.

Ez ezetz da eta indarkeriarik gabeko jai guneak eta bizitzak nahi ditugu!!!!

EH Bildu

Berriak

“Kulturari eta politikari aterik ez itxi!” biharko Donostiako maniFESTAzioan parte-hartzera deitzen du EH Bilduk

Bihar Donostian egingo den “Kulturari eta politikari aterik ez itxi!” lelopeko maniFESTAzioan parte-hartzeko deialdia luzatzen du EH Bilduk.

35/02 auziko sententziak hainbat lagun zigortu eta 107 herriko taberna eta elkarteren itxiera eta konfiskazioa agindu du. Biharko mobilizazioan, epaia salatu eta herriko taberna eta elkarte kulturalek libre behar dutela aldarrikatuko da.

EH Bilduk bat egiten du era berean manifestazioaren deitzaleek aurkezturiko “Eskubide zibil eta politikoen aldeko donostiarron adierazpena” delakoaren edukiekin. Adierazpen hau Donostiako udalbatzara eraman zuen EH Bilduk.

EH Bilduren iritziz, eskubide urraketa larria izateaz gain, gatazka politikoaren konponbiderako Euskal Herrian emaniko urratsen aurkakoa ere bada sententzia, gatazka egoera betikotzea nahi dutenen neurrira idatzirikoa.

EH Bildu

http://www.komiteinternazionalistak.org/images/stories/berriak15/herri.png

Berriak

Alternatiba | Ezkerra eraldatzearen erronka

X