Etiketa: Berria

Etxarte: “Udalari eskatzen diogu emakumeen jabetzea sustatuko duten berdintasun politika eraldatzaileak martxan jartzeko”

Eraso sexisten gorakadaren aurrean, Alternatibako kide eta Bilboko EH Bilduren zinegotzi Ana Etxartek EAJri exijitu dio jabetzea bultzatzeko zein emakumeak zaurgarritasunari aurre egiteko baliabideez hornitzeko, bereziki emakume gazteak.

Martxoaren 8aren harira eta azken egunotan izandako eraso sexistak direla eta, EH Bilduren udal taldeak Udalari eskatu dio berdintasunaren alde bere diskurtsoarekin koherentea izatea eta benetan konpromisoa har dezala bortizkeria matxistaren kontrako borrokan.

Emakumeek indarkeria matxista pairatzen jarraitzen dutela salatu ondoren, Ana Etxarte zinegotzia erabat kezkatuta agertu da horri aurre egiteko Udala erakusten ari den iniziatiba eza dela eta.

Etxartek azpimarratu du Bilbon indarkeria sexista gutxitu beharrean handituz doala. Datuak argiak dira: 2014an izandako askatasun sexualen kontrako delituek %5,4 gora egin dute Bilbon. “Eta hori datu ofizialak baino ez dira, errealitatea askoz larriagoa izango da, guztiok baitakigu salatzen diren erasoak benetan gertatzen direnen parte bat baino ez direla”.

EH Bilduko zinegotziak gogoratu du 2015a eraso sexista berri batekin hasi dela, aurreko egunean 20 urteko gazteak pairatutakoa, hain zuzen. “Adierazgarria da oso aipatutako erasoa, Martxoak 8, emakumeon nazioarteko Eguna ospatzen dugun astean bertan gertatu izana”.

“Beste behin ere, Udalari eskatzen diogu emakumeen jabetzea sustatuko duten berdintasun politika eraldatzaileak martxan jartzeko. Gai honekiko Udalak eman ohi dituen erantzun sinple eta partzialak ez dira baliogarriak indarkeria sexistari aurre egiteko, emakumeen jabetzean oinarrituriko bestelako erantzun integralak jarri behar dira martxan”, azpimarratu du Etxartek.

Indarkeria sexistari aurre egiteko iniziatibak zein baliabide nahikoak eskatu ditu EH Bilduren zinegotziak. “Honetaz gain, beharrezkotzat jo du portaera sexisten aurkako prebentzioa gazteekin lantzea eta eguneroko eraso sexista txikien kontrako jarrera tinkoa erakustea”.

EH Bilduk Berdintasun Sailari eskatu dio intentzio oneko adierazpenetatik baino haratago joatea eta, erakunde feministekin batera, indarkeria sexistari aurre egiteko kanpaina bat abian jartzea, jabetzetik abiatuta.

“Indarkeria sexistaren aurkako kanpainak iraunkorrak izan behar dira. Ezin dira soilik Aste Nagusian izan, are gutxiago beldurrean oinarritutakoak. Unea da Udalak beldurrean oinarrituriko diskurtso paternalista eta biktimista alde batera uzteko. Iaz ateratako esku-orriak ezin dira berriro horrela argitaratu. Erasoak saihesteko estrategiak jabekuntzan oinarritu behar dira eta sexualitate aktiborako eskubidea aitortu behar dute”, adierazi du Etxartek.

Bukatzeko EH Bilduk bat egin du biharko Emakumeen Bizkaiko Koordinakundeak arratsaldeko 7etarako Arriaga Plazan azken erasoa salatzeko deitutako kontzentrazioarekin eta deia luzatu dio jendarteari bertan parte hartzeko.

EH Bildu Bilbo

Berriak

Asier Vega Gernikako arbolaren landatzean “Ez dago egun eta toki hoberik frankismoak gizateriaren aurka egindako krimenak epaitzea eskatzeko”

Gernikako arbolak sinbolizatzen dituen bizkaitar zein euskal herritarron askatasun eta eskubideak ez dira behar bezala islatu arbolaren landaketa ekitaldian EH Bilduren iritziz. Bizkaiko Batzar Nagusiek izaera instituzional hutsa eman diote ekitaldiari eta beste behin ere, herritarrak ez dira kontuan hartu.

EH Bilduk bere aldetik, Gernikako bonbardaketako sarraskia gogoan, Euskal Herriaren aurkako eraso faxista krudelari aurre eginez, Euskal Herriaren askatasun eta eskubideen alde bizitza eman zutenen memoria aldarrikatu nahi izan du arbola berriaren landaketan. Hori dela eta, frankismoaren biktima izandako herritarrak gonbidatu ditu arbolaren ekitaldira. Haien artean izan dira Argiñe Arregi, Candido Arregi Jagi-Jagi taldeko fundatzaileetako izan zenaren alaba eta Julen Kaltzada, Doroteo Calzadaren semea, EAJko zinegotzia zena Busturin eta 1937an fusilatua izan zena. Calzadaren kasua ikertzen aritu da Maria Servini de Cubria epailea, frankismoaren krimenen kontra Argentinan abian den kereilaren baitan.

Hain justu, frankismoaren krimenen kontrako kereilari babesa adierazi diote gaur Bizkaiko Batzar Nagusiek, EAJ, PSE eta EH Bilduren aldeko bozekin. PPk kontra bozkatu du. Koalizioak eztabaidarako aurkeztu duen ekimenak, gobernu espainiarrari dei egiten dio halaber, Servini de Cubria epaileak aurkeztu dituen estradizio eskaerak onartzera, gizateriaren kontrako erantzuleak epaituak izan daitezen eta Bizkaian oraindik mantentzen diren sinbolo frankistak erretiratzeko eskatzen du.

Asier Vega EH Bilduko batzarkideak adierazi duenez, “ez dago egun eta toki hoberik frankismoak gizateriaren aurka egindako krimenak epaitzea eskatzeko”. Vegak gogorarazi du Gasteizen Espainiako poliziak bost langile tiroz hil zituela 39 urte beteko direla bihar. Horrez gain, Gernikako arbola berria landatuko den egunean, frankismoko arduradunen zigorgabetasunaren amaiera eskatzearen egokitasuna azpimarratu du.

Vegak nabarmendu du trantsizio garaian adostu zen Amnistia Legea dela frankismoaren erregimenak gizateriaren kontra burutu zituen krimenak epaitzeko oztoporik nagusiena. “Nazio Batuen Erakundeak berak dio lege hori indargabetu beharra dagoela. Argentinan eta Txilen legea aldatu zuten diktadura garaiko krimenak epaitu egin ahal izateko. Egin dezala gauza bera estatu espainiarrak ere”.

Era berean, Vegak gogorarazi duenez, NBEk frankismo garaian desagerrarazi ziren hamarnaka milaka pertsonen kasuak ezin direla preskribaezinak direla azpimarratzen du, pertsonen desagerraraztea delitu jarraitua baita, haren agerpenera arte irauten duena, eta beraz, jazarri beharrekoa.

ehbildu.eus webgunean irakurri.

Berriak

Asier Vega: “Bizkaiak birziklatze tasa handitzeko duen oztoporik handiena Zabalgarbi da”

Bizkaiko Foru Aldundiak herrialdeko hondakin kudeaketari dagozkion 2014ko zenbait datu egin ditu publiko gaur prentsa agerraldian. Iosu Madariaga Ingurumen diputatuak eman dituen datuen arabera, Bizkaian 609.000 tona hondakin sortu ziren iaz eta horietatik 267.000 tona birziklatu ziren.

Hau da, %44. Aldundiaren datuak, ordea, interesatuak dira. Izan ere, birziklatutako hondakin gisa zenbatzen ditu Zabalgarbik sortutako zepak eta metalak (46.572 tona), nahiz eta hondakin horiek zabortegian amaitzen duten. Hala, zepak hondakin birziklatu gisa kontatu gabe, Bizkaiak hondakinen %35,5 besterik ez du birziklatzen. Gainera, 2014an sortu ziren hiri hondakinen %38,7 Zabalgarbin erraustera bideratu ziren.

Asier Vega Alternatibako kide eta EH Bilduko batzarkidearen ustez, “Bizkaiko Aldundiak datu interesatuak eskaini ditu Bizkaian dugun hondakin sistema ahula ezkutatu nahian”. Vegaren ustez, 2014ko datuek agerian uzten dute Bizkaiko hondakin eredua erabat jasangaitza dela, Zabalgarbiren menpekoa baita guztiz. “Bizkaiak birziklatze tasa handitzeko duen oztoporik handiena Zabalgarbi da. Birziklatze tasak handitzeko ezinbestekoa da gaikako hondakin bilketa indartzea baina Bizkaian hori lortuko bagenu, Zalbargabik porrot egingo luke. Ekonomikoki jasangaitza izango litzateke. Zabalgarbik sailkatu gabeko zaborra behar du bizirauteko”.

EH Bilduk hainbatetan azpimarratu du hondakinen kudeaketan aurrerapausoak emateko hondakin organikoen bilketa berezituan dagoela gakoa. “Bizkaian hondakinen %40 biltzen da gaika sailkatu gabe. Kopuru horretatik zatirik handiena hondakin organikoari dagokio. Hala ere, Aldundiak 2016rako hondakin organikoen %4 soilik konpostatzea ezarri du helburu gisa eta datuetan oso urrun dago oraindik” azaldu du Vegak. “Gainera, Bizkaiko hirigune handienetan ez da hondakin organikoa bereizita biltzeko sistemarik eraginkorrik ezarri”.

Organikoa sailkatuta jasotzeko Foru Aldundiaren ekimen falta Zabalgarbiren menpekotasun egoerarekin lotzen du EH Bilduk. “Bizkaiko Aldundiak bere oztoporik handiena den azpiegitura sortu du. Zabalgarbiren gatibu da eta badaki birziklatze tasak handituz gero, errauskailua itxi egin beharko duela. Bizkaian beste eredu batera jauzi egiteko beharra begi bistakoa da. Errauskailuaren eredua baztertu eta egiazko birziklatzea bultzatzeko garaia da. Horretarako, ezinbestekoa da gaikako bilketa bultzatu eta organikoaren birziklatzea areagotzeko neurriak hartzea, batez ere, biztanleria gehien biltzen den hiriguneetan”.

Joan den urtean, Zabalgarbik jaso zuen hondakin kopuruaren hiru launrden (%77,6), gaika sailkatu gabe bildutako hondakinak izan ziren.

Berriak

Matute: “Bidea badugu eta helmuga ere bai: askatasuna, gehiengoaren eskubideak nagusi izango dituen herria eraikitzea”

Egunotan ikusi dugu, berriz ere, espainiar estatuak Euskal Herriarentzat alternatibarik ez duela. Euskal Bidea da alternatiba bakarra  eta horregatik diogu “bidea badagoela”. Belaunaldiz belaunaldi herritar ibiltariok eginiko bidea. Bidea dugu eta helmuga ere bai: askatasuna, gehiengoaren eskubideak eta interesak nagusi izango dituen herria eraikitzea, pribilegiodunen aurrean. Herritarren burujabetza nahi dugu, dena aldatzeko, urtebetean birritan Troikari harrera egin dioten politikari morroien aurrean.

Horregatik martxoaren 7an bi bidai egingo ditugu: bata, auzo eta herrietatik BECera autobusez egin behar dena; eta bestea bertan egingo duguna, sorpresaz beteriko ekitaldian. BEC plaza handi bat bihurtuko dugu, herritarren plaza, eta bertan hainbat gertakari izango da. Zalantzarik gabe, bertaratuko diren 10.000 pertsonak izango dira protagonistak.

https://fbcdn-sphotos-b-a.akamaihd.net/hphotos-ak-xfp1/t31.0-8/10931166_1049798278370821_3388214060653040505_o.jpg

https://fbcdn-sphotos-h-a.akamaihd.net/hphotos-ak-xpf1/t31.0-8/11021502_1049798251704157_741981054479911329_o.jpg

https://scontent-mad.xx.fbcdn.net/hphotos-xpa1/t31.0-8/s2048x2048/11001599_1049798355037480_9111768875805717182_o.jpg

https://fbcdn-sphotos-h-a.akamaihd.net/hphotos-ak-xpf1/t31.0-8/10985012_1049798408370808_8706965205497864132_o.jpg

https://fbcdn-sphotos-b-a.akamaihd.net/hphotos-ak-xpf1/t31.0-8/11004547_1049798391704143_8496899238448865127_o.jpg

https://scontent-mad.xx.fbcdn.net/hphotos-xap1/t31.0-8/11001672_1049798425037473_7304501544422397550_o.jpg

https://fbcdn-sphotos-d-a.akamaihd.net/hphotos-ak-xpf1/t31.0-8/10994926_1049798471704135_2650905681392339526_o.jpg

Berriak

EHBilduren 19. aldizkaria: Sakeoarekin amaitzeko, Kutxabank publikoa eta soziala

Hamabostero bezala, Euskal Herria Bilduren aldizkari digitala kaleratu dugu, PDF formatuan deskargatu edo sarean ikusteko. Lurralde bakoitzean koalizioak egiten duen lanaren berri eta, zenbaki honetan, azalean Kutxabankek inguruan azaleratu diren balizko iruzurren gaia, kutxen kontrol publikoa eta sozialaren aldarria inoiz baino beharrezkoa eginda. Zure posta elektronikoan zuzenean jasotzeko, egizu harpidetza.

 

Berriak

“Xahuketarik ez!” aldarrikatu dugu AHTren aldeko jardunaldietan

Elkarretaratzea egin genuen atzo Bilbon, Euskalduna Jauregiaren aurrean, AHTaren alde egiten ari diren jardunaldiak direla eta. Aitziber Ibaibarriagak adierazpen hauek egin ditu bertan:

Herritarren poltsikoetatik ordaintzen ari da azpiegitura erraldoi hau, kalte sozial, ekonomiko eta ekologiko izugarriak sortzen ari dena.

AHTren defendatzaileek azpiegitura honen ustezko onurez jarduten dute. Guk, Euskalduna barruan diren agintariek ezkutatzen dutena salatu nahi dugu:

  • Hezkuntzan, osasungintzan, politika sozialetan sekulako murrizketak egiten ari diren bitartean diru publikoaren milioika milioi bideratzen ari direla obra honetarako.
  • Etorkizuneko inolako plangintzarik gabe egiten ari dela: ez mantenu kosteen inguruan, ez loturen inguruan, ez erabilpenen inguruan.
  • Eta azkenik, AHTren eraikuntzan PNV, PP zein PSOEk jartzen duten interes handiak obra bera ere susmopean jartzera garamatza: Azken urteotako obra zein proiektu publiko handiekin pasa bezala ( Hiriko, Bidegi, Karrantzako Minda…), lan hauek diru publiko kopuru izugarriak alderdi hauen inguruko enpresa sareak aberasteko erabiliko direnaren inguruko kezka adierazi nahi dugu.

Guzti horregatik, AHTren lanak geldiarazteko moratoria eta honen inguruko eztabaida sozial erreal bat burutzea exijitzen dugu.

Kontzentrazio honen leloak dioen moduan, mezu argi bat luzatu nahi diogu euskal jendarteari bai eta Euskalduna Jauregian bildu diren agintariei: AHT inondik inora ez. Xahuketarik ez.
 


 

Berriak

Ander Rodriguez: “Gipuzkoan ez da murrizketarik Diputazioak bere poltsikotik jartzen duelako dirua besteen politika antisozialen ondorioak nabari ez daitezen”

Gizarte Politika eta ongizate kolektiboa foru hauteskundeetarako programako ardatz nagusi gisa kokatu ditu gaur EH Bilduk eta argi utzi du “Xabier Olano Aldundian izanda, Gipuzkoa gizarte murrizketarik gabeko Lurraldea izaten jarraituko” duela.

EH Bilduk hogeita hamar pertsonatik gora bildu dituen lan saio bat egin du sektore desberdinetako gizarte eragileekin –lankidetza, gizarteratzea, adin txikikoak, adinekoak, mendekotasuna duten pertsonak eta desgaitasuna dutenak-, Intxaurrondoko Kultur Etxean. Honen helburua Gizarte Politika alorreko hauteskunde programa modu partehartzailean egitea izan da.

Ander Rodríguez Alternatibatiko kide eta Gizarte Politikako diputatuak EH Bilduren lehentasun gisa nabarmendu ditu pobreziaren kontrako kanpaina, mendekotasun eta desgaitasuna duten pertsonei arreta eta gizarte zerbitzuetako langileen lan baldintzak hobetzea. Gainera, Lurraldeko gizarte zerbitzuetan “murrizketarik gabeko” politika mantentzen jarraitzeko konpromisoa hartu du Rodríguezek, alegia, Gipuzkoako Foru Aldundian legealdi honetan egiten ari den bezala jarraitzekoa.

Gizarte Politikako diputatuak azpimarratu duenez, “Gipuzkoak Espainiako Erreinuko gizarte zerbitzu sistema aurreratuena du, Diputazioak aplikatutako politikari esker, izan ere, gizarte babesa eta gastua handitu baititu eta, krisi garaian egin du, gipuzkoar ahulenak babesteko. Mendekotasuna, desgaitasuna, diru sarrera baxuak edo gizarteratze beharrak dituzten pertsonek badakite Gipuzkoan ez dela murrizketarik aplikatzen Diputazioak bere poltsikotik jartzen duelako dirua beste Administrazioen politika antisozialen ondorioak nabaritu ez daitezen, esaterako, Eusko Jaurlaritzak RGIarekin egindakoa edo Mendekotasun Legean Espainiako Gobernuak egindako murrizketak”.

“Espainiako Gobernuak Mendekotasun Legean murrizketa bortitza egin arren, Gipuzkoak, diru laguntza guztiak mantentzeaz gain, zabaldu egin ditu eta zabaltzen jarraitzeko asmoa du”, gogoratu du Rodríguezek. Konkretuki, Diputaziok diru laguntzak jasotzeko eskubidea uztailaren 1etik aurrera zabaldu egingo duela esan du. Orduan sartuko baitira sisteman I Graduko 1. Mailan baloratutako mendeko pertsonak, alegia, gradu arinena duenak, eta hilero 180 eta 300 euro bitarteko laguntzarako eskubidea izango dute.

EHBilduk Gipuzkoan pobreziari aurre egiteko eta baliabide gutxien dituzten pertsonei existentzia bermatuko dien errenta minimoa emateko duen apustu sendoa ere azpimarratu du.

Era berean, diputatuak gogoratu du EH Bilduk Gipuzkoako egoitza eta eguneko zentroetako langileen lan baldintzak duintzeko egiten duen apustu irmoa gogoratu du, eta baita gizarte zerbitzu publiko eta kalitatezko sarearen defentsa.

Gaur egindako lanketa kolektiboko saioa EH Bildu hauteskunde programa osatzeko egiten ari den partaidetza prozesuaren barruan kokatzen da. Orain arte sei lan saio egin dira eta ehunka hiritar eta sektore anitzetako hogeinaka agentek hartu dute parte. Prozesu honek aurrera jarraituko du hurrengo asteotan eta foru hauteskundeetarako behin betiko programaren aurkezpenarekin amaituko da, martxoan.

EHBilgu Gipuzkoa

Berriak

Bikila «Kalea berpiztu behar dugu erakundeetara ezkerra eramateko»

Gurutze Izagirre kazetariak Bikilari eginiko elkarrizketa BERRIA egunkarian.

Joxe Iriarte Bikila-k (Oiartzun, Gipuzkoa, 1945) 70 urte bete berriak ditu, eta, elkarrizketa bukatu orduko, kartelak jartzera joan da, Isilarazteko Legearen aurka egingo duten protestara deitzeko. ETAren sorreran ibilia izanik, 1972an utzi zuen; ETA VI. biltzarrean parte hartu eta LKI sortu zuten gero. LKI eta EMKren bat egitetik Zutik sortu zuten geroago. 2011n desegin zen, eta Gorripidea sortu zuten. Militantzia eta gogoeta politikoa etengabea izan da Bikilaren bizitzan. «Aktibismo politikoa» sumatzen du faltan.

Zergatik erabaki du Gorripideak Alternatibaren bidez EH Bildun sartzea?
Zutik desegin zenean, bertako sektore batekoek politikan jarraitzeko gogoa genuen, eta Gorripidea sortu genuen. Baina garbi genuen behin-behinekoa zela. Gaur egungo egoera larria da, eta taldetxo batetik baino indar handiagoa egin behar da, eta jendeak indarrak metatzea nahi du. Gurekin adostasun gehiena Alternatibak zuela uste dugulako batu gara. Alternatibakoak gara, beraz; eta, bidenabar, EH Bildukoak.

Zein ekarpen egiteko asmotan?
Denok gara erabakitzeko eskubidearen aldekoak, feministak, antikapitalistak… baina horiek interpretatzeko moduak daude. Independentziaren alde gaude, baina gure ibilbidea internazionalismoarekin lotuago dago. Harremanak izan ditugu historikoki Italiako, Kataluniako eta beste hainbat lekutako mugimenduekin, eta horrek eman digu gauzak ikusteko beste modu bat.

Ezkerreko sentsibilitateen arteko bat egite bat lortu da, baina bidean indar batzuk ere galdu dira, edo galduta daude. Eskuinari ez zaio halako zatiketarik gertatzen, ezta?
Eskuinak morala erabiltzen du jendea batzeko. Baina interes materialak daude, azken finean, eta kapitalaren alde estatu bat kudeatzeak asko batzen du. Ezkerrean, garrantzi handiagoa dute etikak, pribilegioen aurkako borrokak eta printzipioek. Gauza horien ondorioz, zatiketak maiz izan dira.

Indarrak batzen asmatzen ari al da orain?
Egun uste dut egoera oso larria dela alde guztietatik. Sistema kapitalista oso larri dago. Beharrezkoa da, mugimendu indartsu bat sortzeaz gain, aldaketa instituzionalak eragitea. Urteetan ezkerrean izan ditugu mugimendu oso inportanteak, baina ez gara iritsi erakundeak kudeatzera. Kaleko eskaerak galdu egin dituzte erakundeek, eta biak lotu behar dira. Hori da aldea ezkerraren eta eskuinaren artean. Guk aldaketa nahi badugu, kalearen indarra behar dugu; bestela, ez dago gobernurik aldaketa lortuko duenik. Hori Grezian ikusiko dugu orain. Gobernuak ez badu herria bere alde mobilizatua, itoko dute.

Ezkerra erakundeetan apenas egon dela diozu. Legez kanporatzeak ezin ahaztu, baina azken urteetan EAJ-PSE-UPN izan dira Hegoaldeko erakundeen buru, PPren laguntzarekin, jaso dituzten bozengatik. Uste duzu aldaketarako oinarririk badela?
Krisi sistemikoaz gain, 1978ko Espainiako erregimena ere krisian dago. Hori oso garrantzitsua da nazio ikuspegitik. Lehenengo aldiz agertzen da III. errepublika; gure aldetik, I. Errepublikaren eskaera agertu da. Trantsiziotik datorren erregimen hori kraskatzen ari da, eta hori kudeatu duen bipartidismoa ere bai. PSOE edo PP berdin izan da. Badaude diferentziak, hori itsuak ere ikusten du, baina benetako aldaketa eragiteko, diferentziarik ez da izan. Euskal Herrian antzera gertatzen ari da. Nafarroan, UPN eta PSNren nagusitasuna gain behera doa; sortu da beste indar berri bat: Podemos. Eta EH Bildu asko indartu da. Uneotan bigarren indarra da. Testuinguru horretan, posible da Nafarroan gobernu berri bat. Bultza dezake Nafarroan aldaketa, eta baita erabakitzeko eskubidearen mugimendua indartu ere, eta, gero, Nafarroa eta EAEren arteko harremanak indartu.

Hauteskundeetan islatuko da?
Bai. Jendea ustelkeriarekin nazkatuta dago. Horren atzean ez dago ideologia jakinik. Jendea ikusten ari dena da krisi gorrienean batzuk gizentzen ari direla.

Aldaketa espero duzu, beraz.
Baikor moderatua naiz. Baina, batez ere, faltan sumatzen dut azken hilabeteetan Euskal Herriko mugimendu soziala apal eta ezkutu samarrean dabilela.

Nori buruz ari zara?
Sindikatuez eta mugimendu sozialez. AHTarena erdi baztertuta dabil, nahiz eta batzuk modu estimagarrian lanean ari diren. Sindikatuak ere ea orain gutun sozialaren harira beste aliantzaren bat egiten duten. Faltan sumatzen dut mugimendu sozialen berpiztea. Hori da beharko genukeen osagarria ezkerra kokatzeko erakundeen buruetan. Kalea berpiztu behar dugu ezkerra erakundeetara eramateko.

Zer dela-eta desmobilizatu da jendea? Politikarekiko nekeak izan dezake eraginik?
Uste dut jendea ez dela hainbeste urrutiratu alderdi politikoetatik. Batez ere abertzaleen aldetik, EAJ eta EH Bildu inguruko jendea fidela dela esango nuke. Baina atxikimendu horren barruan egon beharko lukeen aktibismoak behera egin du.

Belaunaldi gazteek agian beste modu batera ulertzen dute aktibismoa?
Badago belaunaldi aldaketarekin gauzak egiteko beste modu bat. Uste dut M-15etik, suminduen mugimendu hartatik, politikan aritzeko grina piztu egin dela, eta gazte sektore bat ia politikan sartu da. EH Bilduk asmatu beharko luke belaunaldi gazteen modu berriak atzematen eta eragiten.

Erabakitzeko eskubidearen aldeko dinamika zer iruditzen zaizu?
Herri guztia bildu behar da ideia baten inguruan: demokrazia. Eta, ildo horretan, Gure Esku Dago tresna eraginkorra da. Jendeari ematen zaionean tresna mugitzeko, mugitu egiten da. Baina horren osagarri bat behar genuke. Gutun soziala aktibatzea inportantea da. Euskal Bidea baldin bada konstituzio berri baten eragilea, konstituzio horrek gutun sozial bat behar du.

Gatazkaren konponbidearen gaia nola ikusten duzu?
Espainiari ia geratzen zaion gai bakarra botoak lortzeko hemengo kontua da, eta, gainera, mendekuaren sentimendua dago. Euskal gizarteak segitu behar du irtenbide bat exijitzen. Espainian indar harreman diferenteak egotea oso interesgarria izan daiteke bestelako egoera bat lortzeko. Eta, bitartean, EAJk estrategia bat du, eta EH Bilduk bestea.

Oinarri batzuetan akordioak beharko lituzketela uste duzu?
EAJrekin gauza batzuetan adostasuna lortu beharko litzatekeela uste dut. Erabakitzeko eskubidearen inguruan, bistan da. Baina beste gauza batzuetan ez da posible, eta, gainera, aurka egon behar dugu. Nire ustez, kasta horretan sartzen da EAJ: interes ekonomikoa defendatzen du.

Hauteskunde zerrendetan egongo zarete?
Gehienak mugimendu sozialetan gaude. Gu herriko saltsa guztietan sartuta gaude, eta horrek denbora asko kentzen du. Erakundeetan sartuz gero, kaletik ateratzen gara. Uste dut kalea indartu behar dela, hor dago gakoa. Baina kasu jakin batzuetan eskatuz gero, egon gaitezke, bai.

Berriak

Matute: “PNVren lagun espekulatzaileek, Cabieces Kutxabanken bezala, berea nahi dute, eta bakarrik lortuko dute PNV-PP-PSEk irabaziz gero”

Badakite berriz ere galduko dutela Gipuzkoan, herritarrek bizkarra ematen dietelako. Baina beren lagunek, botere finantzariek eta espekulatzaileek, Cabiecesek Kutxabanken bezala, berea jaso beharra dute. Eta bakarrik lortuko dute PNV, PP eta PSE tripartitoak boterea lortuz gero Gipuzkoan. Horregatik diote Errauskailua eraikiko dutela, edota aberatsei aplikatzen zaien zerga kenduko dutela.

PNV, PP edo PSE. Berdin dio siglen ordena. Ez bakarrik ia gauza guztietan ados daudelako. Arazoa da, asteotan ikusi dugunez, batzuek proposatu, beste batzuek eskua jarri eta, azkenean, beren burua herri honetako jabe gisa ikusten dutenek dirua banatzen dute adiskideka pozik egoteko. Eta noski, irregulartasun berri bat azaltzen den bakoitzean, hemen inork ez du inputatua ezagutzen. Karguan jarri zuten beraiek ere ez.

Berriak

Asier Vega “Herritarrei hitza emateko garaia da, Euskal Herriaren etorkizuna erabakitzko aukera izan dezaten”

Alternatibako kide eta EHBilduren Bizkaiko batzarkide Asier Vegak euskal jendarte osoari gonbidapena luzatu dio, hurrengo martxoaren 7an EHBildu eta EHBairekin batera Euskal Bidearen alde BECa betetzera gerturatzeko. 

Pasa den urtarrilaren 24an EH Bilduk eta Euskal Herria Baik helburu zehatz eta oinarrizkoa duen proposamen politikoa aurkeztu genuen: euskal jendartea eta herritarrak izan behar dira Euskal Herriaren etorkizuna erabakitzen duten bakarrak. Proposamen honek pausoka bidea abiatu nahi du, erabakiz erabaki, Euskal Herriaren erabakitzeko eskubidea egi bihurtu arte. 

Jendeari hitza emateko garaia da; gizartea jabetzeko garaia da, Euskal Herriko emakume-gizonek nahi duten hori erabakitzeko aukera izan dezaten; herri honek behar dituen politika ekonomiko eta sozial motak erabaki ahal izateko; justizia soziala oinarritzat izango duen eredu bat eraikitzeko aukera emango digun politika fiskala eraiki ahal izateko. Bakarrik horrela lortuko dugulako gizartearen beharren eta lehentasunen neurrira egindako osasun, hezkuntza eta babes sozialerako sistema publikoa bermatzea. 

Gizartea protagonista izango duen bidea abiaraztea, eraikitzea eta igarotzea proposatzen dugu; Euskal Herritik eta Euskal Herriaren neurrira diseinatutako bidea; erabakitzeko eskubidea diskurtso soila izatetik urrun, lehentasun bat dela pentsatzen dutenekin partekatzeko bidea. Eskubidea, eta hortaz, eztabaida eta erabakia bera ere herritarrena da.

Ez dago aitzakiarik; ordezkorik ez du balio; eztabaida ezin da gela baten barruan sartu; ezin dugu gure etorkizuna Madril edo Parisen eskuetan utzi. Abiatzeko eta martxan jartzeko ordua da.

Erabakitzeko eskubidea ez da abertzalei dagokien kontu bat… demokraziari, justizia sozialari, eredu politiko eta sozialaren aldaketari dagokion kontua baizik; eredu propioa eraikitzeko erabiliko duguna. Asko dugu egiteko, baina guztia irabazteko ere.

Euskal Bideari ekiteko ordua da, herri honetara demokrazia ekartzeko garaia, Espainia eta Frantziari agur esateko, gure herriaren borondatearen kontra doazen inposaketa eta ukazioekin hausteko.

Euskal Herria esparru guztietatik eraikitzeko ordua da, lurralde bakoitzetik, erabakitzeko eskubidearen defentsaren oinarri bilakatu beha diren erakundeetatik.Horregatik garrantzitsua da bidea behetik eraikitzea, borondate, konplizitate eta konpromisoetan bat eginik.

Martxoaren 7an BEC beteko dugu, 10.000 lagun bilduko ditugu, 10.000 erabaki, 10.000 konpromiso erabakitzeko eskubidearen alde, datozen hilabeteetan herriz herri eta auzoz auzo  biderkatuko direnak.

BECen lehenengo 10.000 pausoa emango ditugu euskal bidean aurrera egiteko, Euskal Herria bere etorkizunaren jabe eta protagonista izan arte amaierarik izango ez duen bidea ibiltzeko

Urratsez urrats, erabakiz erabaki, eta inori baimena eskatu gabe, Euskal Herria martxan jartzera goaz.

Berriak

Alternatiba | Ezkerra eraldatzearen erronka

X