Alternatiba Bizkaiko bozeramaile Asier Vegak ostiral honetan Basauriko kaleetan Cata enpresari Edesaren lantegia berriro ireki eta lanari ekin diezaiola exijituko dion mobilizazioarekin bat egitera deitu du. Fagorren erorialdiaren ondorioz lantegi honek pairatutako itxiera geroztik, bertako langileek “guztiz bideragarria dela” defendatu dute behin eta berriro. Zentzu horretan, guztiz beharrezkoa da produkzioa martxan jartzeko Catak baliatu dituen datu zehatzak mahai gainean jartzea.
Vegak, esleipendunaren eskaintzak Basauriko Edesa berriro martxan jartzeko konpromisoa barne hartzen zuela azpimarratu du, hala nola, lanpostu kopuru zehatz baten mantentzea. Horrela, “Catari bere konpromisoak betetzeko exijitzearen ardura hiru instituzio eskudunen eskuetan dagoela” baieztatu du eta aldi berean, “eragile politiko zein sindikal guztien eskuetan Edesako langileriarekin batera haien etorkizunaren alde borroka egitea ere”.
Azkenik, alderdi ezkertiarretik bat egin dute larunbateko deialdiarekin eta azpimarratu nahi izan dituzte Edesaren behin betiko itxierak edota bere produkzioa kanpora eramateak ekarriko lituzketen ondorio larriak “ez bakarrik Basauriri; eskualdeari, eta baita, Bizkaiko lurralde osoari ere, egun langabezi tasa larria pairatzen duena”.
EH Bilduk Arabako Biltzar Nagusietako beste taldeei eskerreko ikuspuntutik osoko zuzenketa egitea gonbidapena egin die. “Arabako Foru Aldundiari aurrekontu hauek itzuli behar dizkiogu enplegua ez dutelako sortzen, zerbitzu sozial gehiago eta hobeagoak ez dituztelako bermatzen eta Araba ez dutelako defendatzen ingurumeneko arrisku eta Madrilgo asmo kaltegarrien aurrean”, esan dute Gorka Ortiz de Guinea EHBilduko legebiltzarkideak eta Luis Salgado legebiktzarkide eta Alternatibako kideak gaur egin duten prentsa agerraldian.
Zentzu horretan, EH Bilduk aurrekontuen egitasmoak Arabako interesei ez diela erantzuten esan du. “beste urteetako aurrekontuen berrargitalpena dira, Arabako Biltzar Nagusietara beste urteotan heldu diren aurrekontuak moztu eta kopiatu egin dituzte. Beraz, zergatik dugu eskuartean berriro berrargitalpen bat?” galdetu dio bere buruari EH Bilduk.
Koalizioaren ustez, EAJ izango da berriz Javier de Andresen foru gobernuari salbamendu-jaka botako diona. “Gure ustez, EAJ eta PPren arteko ituna berriz sinatuko de. Orain arteko esperientziak azken hiru urteotako aurrekontuek ez dutela balio izan egun Araba pairatzen ari den egoeratik atera ahal izateko agerian utzi du.
“Arabak ez du merezi hori beste urte bat. Arabako Alderdi Popularra ez da ezberdina. Cospedal, Gallardon, Esperanza Aguirre eta Monagoren alderdi popularra da. Hemengo alderdi popularrak ere b kutxa bat du, berak ere pribatizatzen du, berak ere lehengo klasean bidaiatzen du eta gutxi balitz, arrazista, populista eta xenofoboa da. PPren inguruan osasun kordoi bat ezarri behar genuela esan genuen eta berresten dugu. Horregatik beste indar politikoei osoko zuzenketa sinatzeko deia egiten diegu”, laburbildu du EH Bilduk.
Bizkaia fracking gabeko lurralde izendatzeko proposamena aurkeztu du gaur EH Bilduk Batzar Nagusien osoko bilkuran Asier Vega koalizioko batzarkide eta Alternatibako kidearen eskutik.
Bizkaia fracking gabeko lurralde izendatzeko proposamena aurkeztu du gaur EH Bilduk Batzar Nagusien osoko bilkuran. Asier Vega koalizioko batzarkideak defendatu duenez, gas ez arruntaren ustiapenerako egun dauden teknikek “ondorio larri eta atzeraezinak” sortzen dituzte osasunean eta ingurugiroan, “beste herrialde batzuetako esperientziek adierazten duten moduan”. Lur-azpiko zein lur-azaleko uren kutsadura, uraren gehiegizko ustiaketa, airearen kutsadura, negutegi-efektua sorrarazten duten gasen isurketa handia, eragin negatiboa biodibertsitatean, lur-eremuen okupazio altuegia edo aktibitate sismikoa areagotzeko arriskua aipatu ditu Vegak. Gainera, frackinga egungo eredu energetikoa aldatzeko eta energia berriztagarrien garapenerako oztopo dela azpimarratu du Vegak.
EAJ eta PP Bizkaia fracking gabeko lurralde izendatzearen kontra agertu dira eta PSE abstenitu egin da. Vegak hiru alderdien diskurtsoak kontraesankorrak direla adierazi du. Bai, EAJ, PSEk nahiz PPk frackinga debekatzeari buruzko jarrera aldatu dute herrialdearen arabera. Hain zuzen, gaur EH Bilduk aurkeztu duen proposamena Gipuzkoako Batzar Nagusietan onartu zena da baina Bizkaian ez du babesik jaso. Vegaren ustez, hiru alderdiek frackingari ateak ireki nahi dizkiotela ezkutatzeko erabiltzen dituzte diskurtso nahasiak. “Frackingari bai edo ez esateko garaia da. Esplorazioa baimentzea frackingari bidea irekitzea da. EH Bildun argi daukagu: frackingaren kontra gaude dituen arriskuengatik”.
Zentzu horretan, Eusko Jaurlaritzak datorren urteko aurrekontuetarako prospekzioetarako 22 milioi euroko partida gorde izana salatu du Vegak. “Hori bai, 2017 urterako, behin hauteskundeak pasata. Ez al dago behar inportanteagorik 22 milioi euro horien inbertsiorako?”
Gizartean frackingaren kontra dagoen jarrera geroz eta zabalagoa aipatu du Vegak. “Herri Ekimen Legegile bat abian jarri da frakinga debekatzeko asmoarekin eta herritarren artean jasotako 103.589 sinaduretatik, ia %40, Bizkaian jaso dira”. Era berean, hainbat udalek frackinaren kontrako ekimenak onartu dituztela ekarri du gogora EH Bilduk. Baita, EAJ edo PSEk gobernatzen dituzten herrietan ere. Ermua, Bermeo, Mungia, Zalla, Karrantza, Etxebarri eta Barakaldo, besteak beste.
Lurrazpiko gasaren ustiapenerako zein aukera dauden aztertzearen alde agertu dira gainontzeko hiru alderdiak eta ustiapenari buruzko eztabaida desberdindu dute. Vegaren hitzetan ordea, “ustiapenaz lasai eztabaidatzen ari garen bitartean, Eusko Jaurlaritzak diru partida gorde du, froga sismikoak egiten ari dira hainbat herritan, energia enpresek haien planekin aurrera jarraitzen dute. Beraz, babestu gaitezen lehenik frackingarengandik eta eztabaidatuko dugu ondoren” gaineratu du.
Alternatibaren mahai Internazionalistatik, Diana Urreak salatu du bihar Habanan hastekoak ziren Kolonbiako presidente Juan Manuel Santos eta FARC-EP gerrillen arteko bake negoziaketen haustura.
Kontaktuen etenaldia Santosen gobernuak jakinarazi du Choco departamentuan armadaren jeneral baten bahiketa gertatu ostean, antza denez, buruzagi militarrak hautatutako bidearen gainean egindako ohartarazpenak kontutan hartu ez zituelako. Gogoraraztea, bestetik, joan den astean ELNko negoziatzaile bat ere desagertu dela.
Edozein kasutan, Alternatibatik alde bien arteko elkarrizketei berrekin eta helburuetan sakontzeko dei egiten diegu, Kolonbiako herriak aspaldi duen gogoari bidea irekitzeko, alegia, bake iraunkorra lortzea, mina nagusi izan den garai luzeari amaiera emateko. Hala, Urreak Kolonbiako gobernuaren eta FARC-EPren arteko erasoen etenaldia eskatu du, Habanako mahaira buelta daitezela eta bakea lortzeko aukera paregabe hau galarazi ez dezatela.
TTIP itunaren eta Juncker auziaren inguruan Josu Juaristi EH Bilduren europarlamentariak eta Oskar Matute Gasteizko legebiltzarkide eta Alternatibako bozeramaileak prentsaurrekoa eskaini dute gaur goizean Bilbon.
>>TTIP
TTIP akronimoa Transatlantic Trade and Investment Partnership izen ingelesetik dator eta euskaraz Europa eta Amerikako Estatu Batuen arteko Merkataritza eta Inbertsiorako Hitzarmena da.
Garrantzitsua da hasieratik, denek onartzen duten gauza bat azpimarratzea: Hitzarmen honen helburua ez da merkataritzaren alorrean izan diren bestelako hitzarmenen parekoa. Hau da, ez da merkantzien inportazio edo esportaziorako akordioa.
Akordio honen helburua, “Merkatuak bateratzeko” gaur egun bi aldeetan egon daitezkeen “egoera” eta “arautze” ezberdinekin amaitzea baizik. Helburua, estatu baten legedia eta honen Gobernuen erabakiek ez ditzatela inolaz ere multinazionalak eta hauen interesak kaltetu. Ingurugiroa, Osasungintza publikoa edo langileen eskubideak babesten dituzten legediak desagerraraziz. Modu berean herrien subiranotasunarekin bukatzea eta berauen instituzioek herritarrentzako zerbitzu publikoak eta eskubideak bermatzeko duten gaitasun legegilea ere desagerraraziko lituzke.
Hori guztia gainera sekretupean adosten ari direlarik. Sekretismo horren aurrean EH Bilduk kanpaina abiatu du, hainbat hitzaldi antolatuz eta gida bat argitaratuz.
>> Abenduaren 9a
Gai hauetaz aritzeko abenduaren 9an Bruselan “Hiritarron merkataritza agenda baten alde” izenburuko konferentzia burutuko da, konferentzian Oskar Matutek EH Bilduren izenean hartuko du parte hizlari gisa. Euskal Herriko mugimendu sozial eta sindikalak konferentzian parte hartzeko gonbitea jaso dute.
Akordio honen aurka eta jendarte eredu justuago baten alde lanean daudenen elkargune izatea da konferentzia honen helburua, Multinazional handiek gobernuek baino botere handiagoa izango ez duten jendarte baten alde daudenen elkargunea.
>>Juncker eta eredua
Akordio hau, egungo eredu ekonomikoaren adierazlerik argienetarikoa da, hiritarren kontra eta enpresa handien alde legeak aldatzea. Europar Batzordeko lehendakariak eman digu adibiderik argiena.
Bere hitzetan, Batzordeko lehendakariak ez zuen jakin Luxenburgoko Finantza ministroa zelarik, estatuak 300dik gora multinazionalekin EBko beste estatuetan zergak ez ordaintzeko mekanismoa adostu zuela. Esan dugu, eta berriro diogu, gaizkilerik handienak ez daude Lanbideko ilaran, gorbata daramate eta gure subiranotasunaren desagerpena adosten ari dira.
>> Euskal Herrian zer?
EH Bilduren ustez TTIParen kontrako borroka beste borroka batzuekin lotu beharra daukagu, Frackingaren kontrako borrokarekin, langileriaren eskubideen eta beste jendarte eredu baten aldeko borrokarekin. TTIPek murrizketen eredua, askoren miseria, gutxi batzuen aberastasuna ziurtatzeko erabiltzen duen eredua ordezkatzen du.
EH Bilduk akordio honen eta ordezkatzen duen ereduaren kontra borrokatzeko prest dauden guztiekin jarduteko prestutasun osoa dauka.
Pasa den urriaren 27an eta 28 an, Alternatibak Gorripidearen babesarekin antolatutako hitzaldi sortari jarraipena eman genion Iruñean eta Gasteizen. Europa eta Estatu Batuen arteko Merkataritza eta Inbertsiorako Itun Transatlantikoaren testuingurua eta bere ondorio larriak sakonki aztertu zituzten partehartzeak. “TTIP: Transnazionalen inbasioa geldiaraz dezagun” lemapean, bigarren buelta honetan beste behin ere ikerlari sozial eta Ecologistas en Accion-eko kide Tom Kucharz eta ATTAC-eko kide eta ekonomista Jose Ramon Mariño izan ziren gurekin. Haiekin batera, ELA sindikatuko Laura González de Txabarri, LAC sindikatuko Mikel Saralegi eta EHUko ekonomia irakasle Juan Hernándezen partehartzeak ere entzuteko aukera izan genuen.
Euskal Herria Bilduren Gasteizko gainerako legebiltzarkideek bezala, Alternatibako kide Oskar Matutek eta Diana Urreak Usansolo herritarren erabakitzeko eskubidearen aldeko mezua zabaldu zute sare sozialen bitartez. Hona hemen bien hitzak:
Eztabaida politikoa antolatu zuten atzo Hamaika Telebistak eta Berriak Kataluniako galdeketaren emaitzaren inguruan. Ordezkari politikoen txandan gure kide Ayem Oskoz aritu zen hizlari Euskal Herria Bildu koalizioaren izenean. ?#?9N2014?
Beharrezkoa da Kataluniako gizartea zoriontzea. Igandean erabakitzeko eskubidearen ariketa praktikoa egin zuten, Rajoyren Gobernuak, Estatuak ezarritako oztopo guztien gainetik.
Kataluniako gizarteak hitz egin du eta bere etorkizunerako nahi duen estatus politikoa adierazi. Espainiar demokrazia eskasaren testuinguruan balio politiko handia dauka erabakiak eta, batez ere, Kataluniako herriaren zilegitasuna du.
Prozesu honen aurrean Kataluniako gizarteak jarrera eredugarria izan du eta Madrilgo Gobernuak demokrazia mailan dituen gabeziak erakutsi ditu. Ez du maila eman, ez du gaitasunik erakutsi, mehatxua izan da bere erantzun bakarra. Betoa ezarri nahi izan du, baina ez du lortu kataluniarrak isiltzea.
Alderdi espainiarrek berriz, krispazioaren mamua atera dute berriro ere. Gehiengoak dituen eskubideak lortzear dagoenean ikustean immobilismoa eta ukazioa da erantzun bakarra.
Baina Kataluniak utzi dituen lezioez aparte, Euskal Herriak ere bideari ekin behar diola uste du EH Bilduk. Eta hori egiteko bi baldintza behar dira: gizartearen babesa eta eragile politiko, sozial eta sindikal gehienen adostasuna. Hau da, bere buruaren jabe izan nahi duen gizartea eta maila ematen duen ordezkari politikoak. Euskal gizarteari ahotsa emateko helburuarekin akordioak, konpromisoak eta konplizitateak lantzeko ordua da.
Prozesu demokratiko eta konstituziogilea egiteko gure proposamena plazaratuko dugu. Prozesuak ahalik eta babes handiena lortu behar du eta aldebakarrekoa izan behar da. Argi dago Madril eta Parisek ez dutela nazio bezala ditugun eskubideak aitortzeko asmorik. Eta egoera horretan, bere eskubide osoen jabea den subjektu bezala aitortuak ez garenean, ez dago burujabetza partekatuarentzako lekurik, ez berdinen arteko hitzarmenak lortzeko aukerarik.
Euskal Bidearen ordua da, eta EH Bildu bide hori gainontzeko eragile politiko, sozial eta sindikalekin egiteko prest dago. Izan ere, Euskal Herriak Madrilen erantzunaren zain egon gabe egingo du bere bidea, Kataluniak egin duen bezala. Estatu espainiarrak demokraziaren arauak bete nahi baditu, ondo, etab estela gizartea gainetik pasako da, igandean gertatu bezala.
Hamabostero bezala, Euskal Herria Bilduren aldizkari digitala kaleratu dugu, PDF formatuan deskargatuedo sarean ikusteko. Lurralde bakoitzean koalizioak egiten duen lanaren berri eta, asteon, Kataluniako erabakitzeko eskubidearen inguruko irakurketa jasotzen duena. Aldizkari zure posta elektronikoaren bidez zuzenean jasotzeko, egizu harpidetza.
