Etiketa: Berria

Alternatibak Gdem Izik-eko ekintzaile saharauien kontrako zigorrak salatzeko Bilbon egingo den manifestazioan parte hartzera deitu du

Alternatibako Mahai Internazionalistako bozeramaile Gonzalo Fernandezek bihar Bilbon egingo den manifestazioan parte hartzera deitu du Marokok Gdem Izik kanpamenduko ekintzaileei ezarritako epai gogorrak salatzeko. Bizkaiko saharar diasporak eta Euskadiko ordezkaritza sahararrak antolatu dute elkarretaratzea. “Gdem Izik-eko preso politikoei ezarritako zigorrak arbuiatzen ditugu oinarrizko berme legal eta judizialak betetzen ez dituztelako, EHUko irakasle Juan Soroeta bezalako nazioarteko behatzaileek aitortu duten bezalaxe; zilegitasun osoz bere herriaren autodeterminazio eskubidea eskatzen duen saharar herriaren kontrako epaiketa politikoa da beraz”. 

Alderdi ezkertiarreko bozeramaileak hauxe azpimarratu du: “zigor bidegabea izan da, frogatu eta argitu gabeko gertakizunen testuinguruan eman delako”. 2010eko azaroan makina bat saharar emakume zein gizon jarrera baketsu batean kontzentratu ziren Gdem Izik-en (Marokok okupatutako saharar lurraldea) kanpamentu bat osatuz “Mendebaldeko Saharan indarrean dagoen beldur-sistema salatzeko asmoz eta horren ondorioz, marokoar poliziak gogor zapaldu zituen, hainbat heriotza eragin zituena, ikertu ere egin ez den bi sahararren heriotza adibidez”. Egoera horretan, “bereizi gabe eta ausazko” atxilotu asko egon ziren ekintzan parte hartu zutenen artean, erailketa horiek atxilotuei leporatuz.

Alternatibatik Marokoko gobernuari gertakariak guztiz argitzeko exijitu diote, baita ere “Mendebaldeko Saharan praktikatzen den giza eskubideen urraketa sistematikoarekin bukatzea eta herri sahararren autodeterminazio eskubideen aitorpena egitea”. Halaber, Espainiako Erresumaren gobernuari exijitu diote “dagokion ardura historikoa onartzeko eta arlo internazional guztietan autodeterminazio eskubide horren babesa defendatzeko. Azkenik, Europako Batasunaren gainean eragiteko eskatzen diogu saharar baliabide naturalen lapurreta dakarren Morokorekiko hitzarmen komertzial zein ekonomiko ororekin apurtzeko”.

Alternatibako militanteek, Mahai Internazionalistako bozeramailearekin batera, bihar osteguna 18:30tan egingo den manifestazioan parte hartuko dute Arriagako plazatik Rekalde Zumarkaleko 27. zenbakira abiatuko dena, Marokoko kontsuletxearen aurrean.

https://fbcdn-sphotos-c-a.akamaihd.net/hphotos-ak-ash3/860835_608563472494306_2108268137_o.jpg

https://fbcdn-sphotos-g-a.akamaihd.net/hphotos-ak-prn1/823390_608563779160942_514128061_o.jpg

https://fbcdn-sphotos-b-a.akamaihd.net/hphotos-ak-frc1/823595_608563739160946_174063720_o.jpg

https://fbcdn-sphotos-h-a.akamaihd.net/hphotos-ak-prn1/859922_608564065827580_325180598_o.jpg

https://fbcdn-sphotos-e-a.akamaihd.net/hphotos-ak-ash3/164479_608564095827577_2064970258_n.jpg

Berriak

Alternatibak PPri exijitu dio euskararen kontrako inoizko eraso larrienetako bat burutu izanagatik barkamenak eskatzeko, Egunkaria itxi eta hamar urtera

Alternatibako bozeramaile Oskar Matutek deitoratu egin du bihar Jose Maria Aznarren Gobernuaren aginduz Euskaldunon Egunkaria itxi zutenetik hamar urte beteko direnean Alderdi Popularretik inolako barkamen eskaerarik egin ez izana “euskararen kontra inoiz eginiko eraso larrienetako bat burutu izanagatik”, euskaraz argitaratzen zen kazeta bakarraren indarkeriaren bidezko itxiera eta bertako hainbat langileren atxilotzea ekarri zuena, horietako batzuek, gainera, torturak ere pairatu behar izan zituztela.

Eta guzti hau, gaineratu du Matutek, “garai hartako Barne Saileko ministro Angel Acebesek eginiko salaketa faltsuak babesteko inolako frogarik gabe, sarekadaren bidez euskal herritarren eskubideak, askatasunak eta kultura babesten ari zirela esatera heldu zela”. Horrexegatik uste du zilegi dela azalpenak eskatzea, are gehiago, “besteei barkamen eske ia egunero ari zaien alderdiaz ari garela, haiek eskubide zibilak, politikoak, sozialak eta gizatiarrak ere urratzen dituztenean egunetik egunera, Martxelo Otamendik eginiko tortura salaketak aztertu ez izanagatik Europak Espainiari jarritako zigorrak erakutsi zuenez”.

Alderdi ezkertiarreko bozeramaileak gogorarazi duenez, aurretik ere adierazpen askatasunaren eta herritarren informazio eskubidearen aurkako eraso larriak izan ziren Euskal Herrian, Egin edo Ardi Beltza argitalpenen itxierak kasu, “horiei Egunkariaren kontra eginikoa gehitu zitzaion, gizartearen haserrea eragin zuena eta, horrek, kalera atera eta langileak babestera eraman zituen, herri honetan ordura arteko manifestaziorik jendetsuenetakoak egin zirela”.

Alternatibatik nabarmendu dutenez, erantzuna kaleetatik haratago heldu zen: “Alde batetik, Egunkariako langileek periodiko bat egin eta hurrengo egunean kioskoetara eramatea lortu zuten, Egunero, baina horrez gain, bere dirua eskaini zuten milaka lagunen laguntzarekin eta hilabete gutxiren buruan, beste egunkari bat martxan jarri zuten, Berria; nekez ikus daiteke halakorik beste herri eta testuinguru batean”. Azkenik, Matutek Egunkaria Libre! plataformak bihar Andoainen, Martin Ugalde kultur Parkean, 12:00etan egingo duen elkarretaratzean parte hartzera deitu du.

Berriak

Alternatibak positibotzat jo du ETAk eragindako kaltea zein gatazka gainditzeko protagonismoa herritarrena dela aitortu izana

Alternatibako bozeramaile Oskar Matutek oso baikor hartu ditu ETA erakundeak, Parisen epaitegietan gaur goizean hitz egin duen Garikoitz Aspiazuren bitartez, egin duen adierazpena, zeinetan “gatazkarekin zerikusirik ez duten pertsonei eginiko kaltea ez ezik, gatazka gainditzeko bidean protagonismoa Euskal Herriko eragile eta herritarrei dagokiela aitortu” duelako.

Alderdi ezkertiarreko bozeramaileak gogorarazi duenez, 2011ko urrian eman zuen ETAk borroka armatua betirako lagatzeko asmoaren berri eta, ordudanik, “ETAk bake prozesuarekiko konpromisoa askotan berretsi izan du, Madril eta Parisko Gobernuek ez bezala, Aieteko Adierazpenetik espreski eskatu arren, eta oinarri demokratiko oinarrizkoenak ere ez dituzte bete mendekuan oinarritzen duten espetxe politikan”. Ildo honetatik, azpimarratu egin du ETAk gaurkoan adierazitako borondatea “inolako tranparik gabekoa dela eta euskal herritarren nahiari erantzuten diola”.

Azkenik, Alternatibako bozeramaileak alde guztiek aurrera egin dezatela beharrezkotzat jo du, Aieteko adierazpena bere eginda, besteak beste, “herri honetako eragile politiko eta sozial gehienek sinatu eta milaka eta milaka lagun ezezagunen bultzada” izan duena. Oztopoak oztopo, Matutek berriz ere esan du “inoiz baino aukera handiagoak direla indarkeriarik gabeko gizartea lortzeko, bakea nagusi izango duen herria eraikitzeko”.

Berriak

EHBilduk etxegabetzeen aurka bihar egingo diren elkarretaratzeekin bat egitera deitu du

Euskal Herria Bilduk bere atxikimendua adierazi nahi die bihar, larunbata, Hegoaldeko lau hiriburuetan eragile sozial desberdinek deituta etxe desjabetzeen aurka egingo diren protesta ekintzei. Etxegabetzeen aferan bereziki lazgarria izan den aste baten amaieran egingo dira elkarretaratzeak, berriz ere ikusi izan dugulako zer nolako babesgabetasun egoera bizi duten egunero beren etxea galtzeko arriskuan dauden pertsonek, inolako gupidarik ez duten finantza sistemaren esku baina, era berean, gutxi batzuk aberasten jarraitzea ahalbidetzen duten gobernu konplizeen erruz, jendeari bere buruaz beste egitera eramaten dituzten bidegabekeriak legez babesten dituztelako.

EHBilduk etxegabetzeen egoera jasanezinari aurre egiteko proposamenak eraman ditu Iruñea zein Gasteizko legebiltzarretara, politikoen ardura delako honi aurre egin eta finantza erakundeen jarduerari mugak jartzea. Proposamenen bidez, hipotekaren exekuzioak berehala bertan behera uztea eta prozesu hauen baitan dauden etxebizitzen kudeaketa publikoa eskatzen dugu, hala, hipoteka ordaindu ezinean daudenek alokairu soziala ordainduko lukete eta mailegua ordaintzeko aukera dutenean, ordaintzen jarraitzeko aukera izango luke, orain arte ordaindutakoa edota etxea galdu gabe beraz. Pertsona guztiek etxebizitza duina izateko duten eskubidea bermatze aldera proposatutako soluzioak dira beraz.

Azkenik, salaketa berezia egin nahi dugu Araba, Bizkai eta Gipuzkoako herritarren diruarekin sortutako finantza erakunde publiko batek, Kutxabankek, desjabetze prozesuekin aurrera jarraitzen duelako, zuzenean edota bere menpe dauden bestelako erakundeen bitartez.

Berriak

EH Bilduk elkarlana eskatu die Nafarroako eta EAEko gobernuei, “herri moduan, Euskal Herriaren arazoei irtenbidea emateko”

EH Bilduren Iruñeko eta Gasteizko legebiltzarkideek prentsaurrekoa eman dute gaur Nafarroako hiriburuan. Alde batetik, bi ganberatako ordezkarien arteko harremana sendotzeko konpromisoa hartu dute; bestetik, Barcina eta Urkulluri eskaera zehatza egin diete: “Euskal Herriko gizarteak dituen arazoei irtenbidea emateko harreman instituzionala sendotzea eskatzen diegu.

EAEko ordezkari moduan Laura Mintegi, Juanjo Agirrezabala, Rebeka Ubera eta Diana Urrea izan dira prentsaurrekoan; euren alboan, Nafarroako parlamentuko ordezkari diren Bakartxo Ruiz, Mayorga Ramirez eta Asun Fernandez de Garaialde izan dira. Alor zehatzetara hedatu dute bi gobernuko buruei egindako elkarlanerako eskaria: zerga-politika, kultura, normalizazio politikoa, ETBren seinalea, etabar.

Agerraldian irakurritako oharra:

EH Bildun parte hartzen ari garen Gasteizko eta Iruñeko parlamentariok euskal jendarteak erronka handiak eta urgenteak dituela azpimarratu nahi dugu. Erronka gehienak herri bezala jorratu behar eta irtenbideak bilatu behar ditugu, oraingo banaketa administratiboa gaindituz.

Eusko Jaurlaritzaren eta Nafarroako Gobernuaren arteko harremana hutsala bada ere, egoera hau gainditzeko urratsak ematen hasi behar dute gobernu hauen arduradunek. Ezin dira geratu bakoitza bere zilborrari begira, herri honen arazoei irtenbidea bilatu nahi izanez gero.

Gai asko eta asko elkarlanaren bidez jorratu behar direla uste dugu. Gure aldetik, EH Bildu osatzen dugun parlamentariok gure arteko elkarlana areagotzeko konpromisoa sendoa da eta gaurko prentsaurreko eta hemen bertan aurkeztuko ditugun ekimen parlamentarioak horren frogak dira.

Izan ere, egoera ekonomiko larri honetan EAEren eta Nafarroaren arteko harreman instituzionalik ez izatea arduragabekeria da. Bi administrazioen arteko harremana ziurtatu behar da, egoeraren irakurketa komuna egin eta irtenbideak bilatu ahal izateko. Bietan konpartitzen dugun ekonomiaren arazo estrukturala ikusita, beste politika ekonomikoa egiteko aukerak aztertu behar; esate baterako, politika fiskala justuagoa egiteko aukera.

Gatazka gainditu eta normalizazio politikoa lortzeko bidean ere bi gobernuren arteko elkarlanaren garrantzia begi-bistakoa da. Euskal Herrian gatazka behin-betiko gainditzeko eta normalizazio politikoa lortzeko aukeraz beteriko agertoki berria ireki da. Bi Gobernuek aztertu beharko lukete zein den egungo egoera eta bera gainditzeko eman beharreko urratsak definitu. Arduraz aritu behar da eta ulergaitza da bi gobernuren arteko komunikazio eza.

Kultura arloan ere elkarlana beharrezkoa da. Esate baterako, oraindik ere ETB Nafarroan ikusteko zailtasunak ez dira ulertzen. Bi Gobernuek errua elkarri leporatu beharrean, irtenbideak bilatu beharko lituzkete, euskarazko telebista ikusi ahal izateko. ETB ikusteko saiakerak zigortu nahi izatearen aurrean, bi gobernuek arduraz jokatu beharko lukete, akordioak lortu eta gauzatuz.

Beraz, arlo kulturalean, ekonomikoan, politikoan eta sozialean ditugun loturak ikusita, Nafarroako Gobernuaren eta EAEko Gobernuaren arteko agenda bateratua beharrezkoa da. Halaber, lankidetza esparruak ere sortu behar dira, jendarteak dituen erronkei aurre egin ahal izateko. Horregatik bi gobernuri hainbat galdera egin dizkiegu.

Argi ikusten dugu bi Gobernuek hitzarmen berriak egin behar dutela haien arteko bitartekoak ahalbidetzeko. Esate baterako, bi gobernuek egoera politikoa aztertzeko, eta gatazka gainditzeko eta normalizazio politikoa lortzeko, goi mailako bilera egin beharko lukete.

Egoera sozial eta ekonomiko larri honi aurre egiteko ekimen bateratuak abian jartzeko ere agenda adostu beharko lukete.

Edota hizkuntza politika aztertu eta garatzeko goi mailako bilera ere.

Halaber, bi Gobernuek sinatutako eta une honetan bertan behera geratu diren hitzarmenak berrezartzeko edota horiei jarraipena egiteko bitartekoak abian jartzeko asmorik al duten ere galdetu dugu.

Eta bukatzeko, beste bi galdera egin ditugu ea nolako edo zenbatekoa den orain arte sinatuta zeuden hitzarmenen garapen maila eta zein diren hitzarmen horien gaineko jarraipena egiteko organoak edo mekanismoak.

Berriak

Alternatibak Ibermaticako langileen mobilizazioa txalotu du patronalaren xantai isilari erantzuten diolako

Alternatiba Gipuzkoako koordinatzaile Xabier Sotok milaka langileek egunero haien lanpostuetan pairatzen duten egoera larria salatu du, enpresetako zuzendaritzek erabiltzen duten etengabeko presioa jasanez haien lan baldintzak zein soldatak murriztea onartzeko: “Onartutako lan erreforma desberdinak babestuta, geroz eta enpresa gehiago dira isiltasuna edo negoziazio eza erabiltzen dutenak langileak babesgabetasun eta desinformazio egoeretara eramateko”. Hau dela eta, Sotok elkarrizketa bideak eraikitzera premiatu ditu enpresak, hala nola “langileen ahotsa entzun eta jaso dezaten, guztiek onartzeko moduko irtenbidera ailegatzeko, eta batez ere, kaleratzeak ekiditeko”.

Alderdi ezkertiarreko bozeramaileak Ibermaticaren kasu zehatza aipatu du, Kutxaren zerbitzu informatikoaz arduratzen den enpresa, bere zuzendaritzak aurretik aipatutako taktika “sasi mafiosoak” erabili eta 238 kaleratze proposatu dituena “gero isilik egoteko, langileak informaziorik gabe utziz, kanpoko iturrietatik jasotzen duten informazioa salbu”. Sotok langileriak egindako mobilizazio eta protesta desberdinak babestu ditu eta bereziki, aipatu nahi izan du pasa den otsailaren 12an hasi zuten lau eguneko greba “enpresaren partetik jasotzen duten babesgabetasuna eta gardentasun falta salatzeko asmoarekin”.

Egoera lazgarri honen aurrean, Alternatiba Gipuzkoatik langileek pairatzen duten “benetako xantaia isila” salatu dute, “zehaztu gabeko mehatxuak mahai gainean daudelako, langileen ia %50 kaleratzea ere”. Sotok esan duenez, Kutxabanken fusioa dago gatazka honen sorburua, izan ere, Bizkaiko IDE enpresak egingo du aurrerantzean arriskuan dauden Ibermaticako beharginek egiten zuten lana. Ildo beretik, Sotok egungo sisteman gailentzen den logikoa kapitalistari leporatu dio martxoan gertatuko dena, “kapitalismoak diruarentzako mugimendu askatasuna ematen du, eta honek langileak diruaren atzetik joan eta beraien bizimoduak aldatzera behartzen ditu, hain lan baldintzak eta duintasuna kontuan hartu gabe”.

Gehiegikeria haiekin amaitzeko, Alternatibako bozeramaileak Kutxabank zein Eusko Jaurlaritzako agintariei exijitu die lan gatazka honi konponbideak bilatzeko lanean murgildu daitezela, elkarrizketa bideratuz eta alde guztien arteko akordioak lortzeko asmoz. Era berea, Alternatibak eragile sozial zein herritarrei dei egin die, “egoera zailetan dauden enpresetako langileen aldeko elkartasuna adierazi, enpresaburuen erasoak salatu eta langileen eskubideen alde antolatzen diren mobilizazioekin bat egin dezatela”.

Irudia: CGT

Berriak

Herri Irratiko Koldo Campok Oskar Matute elkarrizketatu du

Alternatibaren Bizkaiko bozeramailea Oskar Matutek baloratu du Herri Irratiko “Egunon Bizkaia” irratsaioan Laura Mintegik eta Urkulluk izandako azken bilera, legealdiaren hasieratik bidea markatu duen desadostasunaz jositako bileratzat kalifikatu duena. Matutek azpimarratu du EHBildu osasunean, hezkuntzan, politika sozialetan eta lan eskubideetan murrizketarik egiteko prest ez dagoela, eta herritarrak kaltetzen dituen borroka guztiekin bat egingo dutela esan du, desjabetze prozesuak barne.

EHBilduko parlamentarioak berriki Diputatuen Kongresuan aurkeztutako herri ekimen legegilea gogoratu du eta organoari boterearen aurrean mantso izatea eta herritarrekin bihozgabe izatea leporatu dio, eta argi ikusi zen Hipotekak Kaltetutakoen Plataformako kideak kongresutik bota eta kanpoan poliziak atxiki. Alderdi ezkertiarreko bozeramaileak EHBilduk kanpaina aurkeztutako desjabetze prozesuen proposamena gogoratu du, pisuarekin zorra kentzea ez ezik, etxebizitza duina izateko oinarrizko eskubidea defendatzen duena.

Egoera hau dela eta, Matutek PNV eskubide sozialekin bukatu nahi duten ekintzak bertan behera uztera premiatu du. Aldi berean, herritarrei guztiz jasanezina zaien merkatuen onurak eta espekulazio interesak asetzen dituen errealitatearekin akabatzea eskatu dio.

Berriak

Alternatibak salatu du bankuek eta menpeko gobernuek babestutako terrorismo finantzarioaren enegarren biktima

Alternatibako Bizkaiko bozeramaile Asier Vegak gogor kritikatu du “terrorismo finantzarioaren biktima berria” dirudien heriotza, Bizkaiko desjabetzen kontrako plataformak adierazi duenez, desjabetze prozesuan murgilduta zegoen Basauriko bizilagun batek astelehen goizaldean bere buruaz beste egitea erabaki ondoren: “berriro ere, exekuzio hipotekadunak gupidarik gabeko entitateen eskuetan dauden tresna direla agerian geratu da, muturreko egoera batean daudenak erabateko hondamenera eramateko inolako zalantzarik ez dutenak”. 

Alderdi ezkertiarreko bozeramaileak desjabetze prozesuan daudenen etsipen egoera onartezintzat jo du eta horregatik, finantza erakunde zein gobernuei erantzukizuna exijitu die kaleratzeek eragindako eta geroz eta ohikoagoak diren suizidioen aurrean. Hau dela eta, Vegak gogorarazi du ia hilero norbaitek bere buruaz beste egiten duela etxegabetze baten aurrean. Alternatibatik gogora ekarri dituzte “bai Amaia Egaña, Manuel Reguera, Kutxabankek muturreko egoerara eramandako Kordobako bizilaguna eta bai Basaurin bere burua hil duen gizona ere bankaren bihozgabetasunaren biktima izan direla, irabaziak pertsonen gainetik jarri izanaren ondorio eta botere finantzarioaren menpeko gobernuek babestutako legeekin.

Vegak azpimarratu du gertaera hau Espainiako Kongresuan gaur bozkatuko duten desjabetzen kontrako Herri Ekimen Legegilearekin (HEL) batera eman dela, Hipotekak Kaltetutakoen Plataformak (PAH) aurkeztutako ia milioi bat eta erdi sinadurek bermatutako ekimena, hain zuzen. PPk ekimena bertan behera utziko duela iragarri ostean, eta proposamena Gorteetan eztabaidatua izatearen alde egin ez duen bakarra izanik, Alternatibak deitoratu du “PPk pertsonen neurrira egindako legea bultzatu beharrean, bankuen neurrira egindako legearen atzean babesten dela” eta salatu du ere “Espainiako eskuinak tauromakiarekiko zaletasunaren alde konstituzioan jasotzen den etxe duinaren eskubidearen alde baino gehiago egiteko prest dagoela”.

Honen aurrean, Vegak Herri Ekimen Legegilea kongresuan eztabaidatzeko beharra babestu du eta, aldi berean, Alternatiba kide duen EHBildu koalizioak Gasteizko Legebiltzarrean aurkeztutako etxegabetzeen aurkako proposamenak babestu ditu; ekimen biek “bizitza duinerako eskubidea bermatu eta finantza erakundeen gehiegikeriak mugatzea” bilatzen dutela nabarmenduta. Azkenik, mobilizazioekin jarraitu beharra dagoela ohartarazi du, eta horren harira gaur Bilbon eta Basaurin egingo diren elkarretaratzeetan zein datorren larunbatean, hilak 16, Hego Euskal Herriko lau hiriburuetan Kutxabankeko egoitzen aurrean egingo diren elkarretaratzeetan parte hartzera deitu du.

Berriak

Ekuadorren, Bizitza Duina helburu

Gonzalo Fernandez Ortiz de Zarate – Alternatibako Mahai Internazionalista

Argitaratutako inkesta gehienen arabera, datorren otsailaren 17an, Ekuadorko herritarrek Rafael Correa lehendakari aukeratuko dute berriz ere, bigarren itzuli baten beharrik gabe. Hala, galdeketaren emaitzak egiaztatuz gero -eta zalantzetan egon daitezkeenen botoak sorpresarik eman ezean-, Correak eta Movimiento País-ek (Herri Mugimenduak) beste 4 urte izango dituzte bizitza duinaren sozialismoa delakoaren aldeko apustuan aurrera egiteko. Lehen urratsa, egun berean aukeratuko den Asanblada Nazionalean presentzia handia lortzea izango da.

Arrakasta honen arrazoiak askotarikoak dira, baina hiru nabarmenduko ditugu: Lehena eskumak hautagai-zerrenda bateratua aurkezteko ezintasuna izan da. Horrela, bai hautagai kontserbadore bakoitzaren atzean dauden enpresari eta oligarkia taldeen interesak desberdinak direlako -Asanblada berrian oposizio modura agertu nahi dutenak-, edo bai eskumak bere presidentzia hautua agortu duelako, bere etorkizuneko proiekzioa sortzeko hautagai desberdinak planteatzen dituelarik, atzeraka doan eskumako botoa sei aukera desberdinetan banatu da. Bigarren arrazoia da, ezkerraren barruan inork ez duela Movimiento País-i itzal egiteko gaitasunik. Hala, Alberto Acosta, ezkerreko beste hautagaia, Coordinadora de Unidad Plurinacional (Nazio Anitzeko Batasunaren Koordinakundea) delakoaren burua, boto-asmoaren %2-4ra heltzen da soilik, Correaren %55-60aren aurrean. Hirugarrenez eta azkenik, herritarrek -eta batez ere Ekuadorko sektore gutxietsienak- hobekuntza nabarmenak ikusi dituzte euren bizimoduan Correak planteatutako herri iraultza martxan jarri zenetik, eta babes honek eragina dauka hauteskundeetan. 

Behar bada azken arrazoi honek azaltzen du besteek baino hobeto galdeketaren emaitza.  Hemen ere, zergati asko aipatu daitezke. Lehenik eta behin, gobernuak herri osoan eragina izango duten politika publikoak sustatzeko ahalegina agerikoa dela esan behar da. Zentzu honetan, pobrezia eta desberdintasunen indizeetan jaitsiera nabarmena gertatu da. Hala, estatua eraldaketarako agente izatera itzuli da, borondate indartsuago bati eta gidaritzarako zein banatzeko gaitasun handiago bati esker. Bigarrenez, etengabeko gobernu aldaketa bortitzetara ohituta dagoen estatu bati egonkortasun instituzional azpimarragarri bat eskaini zaio; zuzeneko demokrazian oinarritutako formulak eskainiz, justiziaren erreforma edota zezenketak bezalako gai garrantzitsuetan -egun eskualde batzuetan zezenketak debekatu dira-.

Hirugarrenez, herritarrek estatuaren duintasun nazionala berreskuratu izana positiboki baloratzen dute, baita Latinoamerikako integrazio prozesuan parte hartzeko nahia ere. Horrela, Ekuadorrek Nazioarteko Diru Funtsa bezalako nazioarteko erakundeei aurre egin die, eta burujabetza kontinentala sustatzen duten prozesu guztietan parte hartu du (ALBA, UNASUR, CELAC, etab.). Azkenik eta laugarrenez, herriak konfiantza dauka Movimiento País-ek ekonomia kapitalistatik eta estatu burges batetik Bizimodu Duinaren sozialismo baterantz -non kapitalaren ordez, bizitza erdigunean jartzen den, naturaren eskubideak barne- eta nazio anitzeko estatu baterantz igarotzearen alde egin duen apustuan. Hauxe da apusturik handiena, Correaren eta bere mugimenduaren konpromiso handia -indarrean dagoen Konstituzio aurrerakoia eraikitzen lagundu zuten beste pertsona eta erakunde askorekin batera-. Konpromiso sistemiko bat da, hauteskundeen epe laburreko erritmoak gainditzen dituena, eta adierazle historikoetan islatzen dena. 

Horrexegatik, eta ezinezkoa zen beste modu batean izatea, luzerako egindako apustu honek bere zailtasunak ere dauzka. Hain da horrela, gatazka puntu garrantzitsuena bihurtu dela, ez bakarrik Ekuadorko ezkerren artean, baizik eta aldaketa-gobernuak dauzkaten estatu guztien artean ere bai. Sistemaren trantsizio honetan aurrerapausoak ematen ari al dira? Aurrerakuntza gehiago eskatu al daitezke, irteera puntua zein den kontuan hartuta, pasa den denbora zein eskasa izan den jakinda, eta botere ekonomiko eta mediatikoaren hegemonia daukan eskumaren paper oztopatzailea ikusita? Posiblea izango da erauzketa birbanatzailea lehenesten duen eredu batetik (petrolioa, gasa, etab.) produkzio eredu berri batera igarotzea?

Trantsizio honen inguruan gertatzen ari diren erritmoak eta nahi politikoak, ezker ezberdinen arteko gatazkaren adierazpen nagusia dira. Batzuentzat eskasak; besteentzat, egingarria denaren mugetan. Hor korapilo garrantzitsuak kokatzen dira; uraren legea, edo elikagai transgenikoen inguruko eztabaida berriz zabaltzeko aukera, esaterako. Halaber, eta gai garrantzitsu honez gain, badaude bestelako gatazka gune zehatzagoak Ekuadorren. Izan ere, alde batetik, Nazio Anitzeko Batasunaren Koordinakundeak Correari modu autoritarioan gidatzea, protesta soziala kriminalizatzea eta bere programarekin bat egiten ez duten erakundeekin jarrera gatazkatsua izatea leporatzen dio.

Era berean, eta beste alde batetik, alderdi ofizialistetatik, Correa eskumarekin berdintzen duen kontzesiorik gabeko oposizioan jardutea leporatzen diote Koordinakundeari; baita alternatibarik erradikalena bere gain hartzea, aldi berean hilzorian dagoen demokrazia liberal-ordezkatzailearen printzipio eta egituraketen defentsa naif bat egiten den bitartean (adibidez prentsa askatasuna aldarrikatuz gobernuak eskumako komunikabide handiekin dituen gatazketan, edo botere banaketa aldarrikatuz justiziaren erreforma partzial eta kontserbadorea dela eta); azkenik, erasoak egin dira Koordinakunde honetako pertsona eta erakunde batzuen aurka, 2010eko irailaren 30ean gertatutako estatu kolpearen aurrean izandako jokaera isilagatik; adeitsua ere izan zela esanez.   

Hau da Correaren agintaldi berri honen irteera puntua. Nahiko genuke batetik, Bizimodu Duinaren sozialismoan esponentzialki eta nabarmenki aurrera egitea; bestetik, Ekuadorko ezker ezberdinak agenda komunen inguruan artikulatzea, borondate eraikitzaile eta elkarrenganako errespetuarekin. Gobernuaren lana da, baina baita oposizioarena ere. Biek euren erantzukizuna bere gain hartu behar dute, herriaren iraultzarekin Ekuadorren zabaldu den aukera ezin delako alferrik galdu. Herria esnatu da, eta ez du berriz ere lokartu nahi. Horregatik gure babes internazionalista guztia eskaintzen diogu Ekuadorko prozesuari, hainbeste gauza irakatsi diguna eta mundu osoko ezkerrari itxaropen handia ekarri diona.     

Berriak

Alternatiba | Ezkerra eraldatzearen erronka

X