Etiketa: Berria

Alternatibak salatu du gora egin dutela murrizketen aurkako protesta sozialetan parte hartzen dutenen kontrako mehatxu administratiboek

Alternatibako bozeramaile Amaia Agirresarobek gogor salatu ditu Eusko Jaurlaritzak Sestaoko hiru bizilagunen kontra bultzatutako bost administrazio zigor eta bi epaiketa prozesuak, pasa den ostiralean, urtarrilak 25, herriko kolektibo batek langabezia hazkundearen ondorioz eskualdean dagoen egoera larria eta pobrezia salatzeko egindako  protestaren ostean. Protesta hau Lanbideko bulegoan hainbat manifestarien eserialdi baketsu batekin bukatu zen.

Alderdi ezkertiarreko bozeramaileak gaitzetsi du Eusko Jaurlaritzak, enplegu zerbitzua eta polizia autonomikoa kudeatzearen arduraduna, “krisiaren zartadak gehien sufritzen dituztenei eraso egitea” eta “herritar eskaerei pertsonen neurrira egindako irtenbide politikoekin eta ez errepresio poliziala eta zigorrekin erantzutera” premiatu du. Horrela, Bizkaiko Alternatibatik Ezkerraldeko pertsonek eta taldeek egindako protestaren zilegitasuna defendatu dute, langabezia tasa ikaragarriak sufritzen dituztelako: gizarte eragileen arabera, 22.000 pertsona langabezian daude eta 41.000 geroz eta baldintza prekarioagoetan lan egiten dute, Eusko Jaurlaritzaren, Aldundiaren eta eskualdeko udalen pasibotasunaren aurrean.

Egoera guzti hau dela eta, Agirresarobek justizia sozialaren borrokarekiko duen elkartasuna berretsi nahi izan du, pasa den astean Sestaon egin zen bezala “Lanbideri zerbitzu sozial publiko eta kalitatezkoa izatea eta kudeaketa eraginkorra eskaintzea modu baketsuan exijitu” ziotenean.  Zentzu horretan, Agirresarobek biharko, otsailak 1, manifestazioarekin bat egitera deitu du 19:30tan Kasko Plazatik abiatuko dena eta Sestaoko kaleak zeharkatuko dituena udalerriko Lanbide Euskal Enplegu Zerbitzuaren bulegoaren atean bukatzeko.

Azkenik, Alternatibako bozeramaileak “ezinbestekotzat” jo du “ezkerreko eragile sozial, sindikal eta politikoen arteko erresistentziarako harresia sortzea eskubide sozialei eraso egiten dien eta aldi berean eskubide horien defentsan protesta egiten dutenak gero eta gehiago zapaltzen dituen sistemaren kontra, botere ekonomikoei aberasten jarraitzeko aukera eman nahi dietelako”. Hala, Xuban Nafarrate Gasteizko gazteari gertatutakoa jarri du adibide gisa, pikete informatibo batean parte hartzen ari zela poliziaren indarkeria basatia pairatu zuena eta, Ertzaintzaren aurka jarritako salaketa artxibatu ez ezik, epaitegiek desordena publikoa leporatzen diote orain; Euskal Herritik haratago, Alfonso Fernandez beste greba egun batean atxilotu egin zuten, poliziak berak bere motxilan jarritako lehergailuengatik. Azken finean, amaitu du, “hamarkadetan hainbat ekintzaile eta kolektibok pairatutako errepresio forma bera da, AHTren kontrako protestetan erabilitakoa kasu, orain kalea atera ateratzen den ororekin egiten dena”.

Berriak

Iruneko Akordio Estrategikoaren sinatzaileek Hendaiako ikastolaren aurkako erasoa salatu dute

Ezker Abertzalea, Eusko Alkartasuna, Aralar, Alternatiba eta Abertzaleen Batasuna, 2012ko apirilaren 28an, Irunen, Ficoban sinatutako akordio estrategikoak biltzen dituen indar politikook, Baionako suprefetak Hendaian ikastola berri baten eraikitzearen aurkako erasoari elkarrekin ihardestea erabaki dugu. Oraingoan, Hendaiako ikastolaren aurkako eraso bati buruz ari gara, baina suprefetaren asmoak egi bilakatzen badira, Ipar Euskal Herriko ikastola guztiak kaltetuak izango dira eta desagertzeko zorian egon daitezke.

Baionako suprefetak Ipar Euskal Herrian Seaska eta herriko etxean artean zegoen funtzionamendurako 20 urteetako akordio tazitoa apurtzen du. Suprefetak Seaska eta eskuin zein ezkerreko udalen arteko kontsentuari ezin dio muzin egin. Erabaki hau euskarazko murgiltze hezkuntza sistemaren aurkako eraso zuzena da.

Denek onartutako ohiko jarduera eta suprefetak hartutako posizioaren arteko kontraesanak inoiz baino gehiago agerian uzten du marko juridiko bermatzaile baten beharra, hots, euskararen ofizialtasun estatusa edo perspektiba zabalago batean Frantziako estatuan diren hizkuntz gutxitu guztiena.

Horrez gain, salatu nahi dugu Frantziako Alderdi Sozialista jarrera. François Hollandek Europako Hizkuntz Gutxituen Gutunaren sinadura bere programaren puntu bat egin zuen, eta egun bere gobernuak izendatu duen suprefeta batek argi eta garbi erasotzen du euskarazko murgiltze hezkuntza.

Euskal gizarteari deia luzatzen diogu larunbateko manifestazioan parte hartzeko. Mobiliazioa arratsaldeko 17:00etan abiatuko da, Hendaiako tren geltokitik.

http://alternatiba.net/old-files/p002_f01.jpg

Berriak

Bortxatuak izateko jaioak

Laura Gómez, Gipuzkoako Foru Aldundiko Berdintasuneko zuzendaria

Sei gizonek 23 urteko emakume bat bortxatu dute New Delhiko autobus batean». «Bederatzi urteko neskatoa bahitu eta bortxatu dute bi gizonek Pakistanen». «Donostiako Egia auzoan 17 urteko neska bat bortxatu dute hiru gaztek». «Bi mutil 19 urteko bi neskari sexu erasoa egiten saiatu dira Elgoibarren, Gipuzkoa».

Egunero, neurriz kanpoko emakumeen kontrako indarkeria matxistak eragiten digun amorruari eta haserreari aurre egin behar izaten diogu. Horretarako, ezinbestekoa da guk, indarkeria horren guztiaren jomuga garenok, diskurtso erreboltariak sortzea, erasorik erantzunik gabe ez uzteko. Izan ere, emakume bati egindako erasoa, guztioi egindako erasoa ere bada.

Azken aste hauetan Gipuzkoan gertatu diren hainbat erasoren berri izan dugu komunikabideetan, eta horiek guztiek hamaika artikulu eragin dituzte. Indarkeria matxista kasu puntualekin lotzera mugatzen diren analisi sinplistetatik urrun, azken egunetan sortu den eztabaidari ekarpena egin nahi genioke, hausnarketa bat proposatuz; errealitate horren benetako kausa edo zergatien inguruan eta emakumeok, egunen batean bakean bizi ahal izateko, hartu behar dugun bideari buruz.

Sexu erasoak eta, horien artean, bortxaketak, eguneroko errealitatea dira emakumeentzat, bai gure Lurraldean eta baita munduko beste edozein lekutan ere. Dena den, nahiago izaten dugu horrelakoak atzerrian uztea. Ezinezkoa da gizonek emakumeen kontra egiten dituzten sexu erasoak kuantifikatzea, komunikabideen bidez publiko egiten diren edo salatuak izan direnen berri izaten baitugu bakarrik. Gainerakoak, gehienak, ez dira ezagutzen; beste hainbat arrazoiren artean, sexu erasoa salatzea zaila delako emakumeentzat.

Ez dago emakumeen kontrako indarkeria matxista akabatzeko «tekla magikorik», nahiz eta antzerako iradokizunik jaso boladako zenbait analisitan. Eta ez dago halako «teklarik», indarkeria horren kausa, jatorrian, sistema kapitalista, sexista eta patriarkala delako; emakumeen eta gizonen arteko desberdintasunak babesten eta legitimatzen dituen sistema, alegia.

Ikuspegi horretatik, eraso matxistek ez diote erantzuten indibiduo batzuen portaera isolatuari; aitzitik, neurri handiagoan ala txikiagoan emakumeen kontrako indarkeriarekiko permisibitatea posible egiten duen sistemaren parte dira erasoak. Giro horren oinarrian dago, hain zuzen ere, portaera bortitz eta matxista ugari eta anitzei eman zaien legitimitatea; legitimitatea jasota ere, azken finean, emakumeok gure bizitzan zehar bizi ditugun eraso diren portaerak. Sexu erasoak, askotan, ligatzeko modu legitimotzat hartzen dira, eta horien larritasuna erlatibizatu egiten da, heterosexualen gorteiatzeko kode naturalaren parte direla ulertzen delako.

Gizonek sexu erasoak egiten dizkiete emakumeei, mendean hartzen dituztela erakusteko, plano intimoenean, sexualitatean, eta hala egin dezaketela uste dutelako. Horrek gogorarazten digu zulo bat garela, objektu bat, bortxa daitekeen gorputz bat.

Emakume guztiok beldur diogu bortxatuak izateari eta, beldurraren gidoi horri jarraituz, uste dugu gure erantzukizuna dela bortxaketari aurrea hartzea. Horrela, gizarte osoak ebaluatuko du erasoa justifikatu zitekeen ala ez, galdetuko digu nola gindoazen jantzita, zergatik genbiltzan han, erasotzailearekin lakrikunkeriatan ibili ote ginen, zergatik joan ginen bere etxera… Erruak, bortxatua izan denaren estigmak eta gertatutakoaren egiazkotasunaren inguruko zalantzak azaltzen dute, azken finean, zergatik diren hain gutxi salaketa jartzera ausartzen diren emakumeak.

Eta zer gertatzen da erasotzaileekin? Noiz erakutsi behar diegu gizonei ez zaizkiola lizunkeriak oihukatu behar goizeko hiruretan kaletik bakarrik doan emakume bati, tabernetan ez dela ipurdirik ukitu behar, sexu-organoekin igurztea erasoa dela, hitz egitean gutxieneko distantziak errespetatu behar direla eta, batez bere, emakume batek ezetz esaten duenean ezetz esan nahi duela?

Premiazkoa da gizonezko guztiek hausnarketa egitea, indarkeria matxistari dagokionez betetzen duten paperaren inguruan: zer den eraso bat eta zer ez den identifikatzeko zailtasunak, erasoetan duten parte-hartze aktiboa, edota soilik ikusle pasibo gisa betetzen duten papera, eraso- aren aurka egonik ere.

Beraz, «tekla» hori da, besterik gabe, guztion bizitza antolatzerakoan lehentasuna ematea pertsonei, pertsonak jartzea erdigunean, berdintasun egoeran. Horrela sortzen dira guztiok indarkeria matxistarik gabeko bizitza libreak bizi ahal izateko ezinbesteko ditugun baldintzak. Kontzientziazio eta informazio kanpainak, autodefentsa feminista, hiri debekatuaren mapak, hezkidetza… Tresna horiek beharrezkoak dira, ezinbestekoak. Baina hori guztia ez da nahikoa, baldin eta berdintasun politikak marjinalak badira. Gogoan hartu dezagun; bestela, ez dugu inoiz amaituko emakumeen kontrako indarkeria matxista.

Berriak

EAJk eta PPk uko egin diote “etxegabetzeen arazoaren aurrean soluzioak emateari”

Koalizioak hauteskunde kanpainan emandako hitza bete du horrela eta legegintzaldi berrian defendatu duen lehenengo ekimenak etxegabetzeekin zerikusia izan du. Marian Beitialarrangoitia legebiltzarkideak adierazi du EH Bilduk ez daukala asmorik lege aldaketei itxaroteko. “Etxebizitza eskubidearen aurkako erasorik bortitzenak dira etxegabetzeak, eta horregatik, gaur arazoarekin bukatzeko lehenengo urrats garrantzitsua eman gura genuen, lege aldaketa heldu arte eta erakunde finantzarioen borondatea aldatu arte”, azaldu du Beitialarrangoitiak.

Baina EAJk eta PPk, UPyDrekin batera, EH Bilduren legez besteko proposamena bertan behera utzi eta bi alderdien arteko erdibideko proposamena onartu dute. Koalizioak hitzartuta zeukan PSErekin 10 puntutako proposamena. EH Bilduren ordezkariaren iritziz, “hitzetan geratzen den proposamena da, soluziorik ematen ez duena”. Beitialarrangoitiak gogor kritikatu du arazoari aurre egiteko hiru alderdi horien “borondate falta”. “Minimoa zen finantza erakundeak presionatzeko neurri zehatzak hartzea eta hori ere erortzen utzi dute. Arazoarekin bukatzeko ekimena hartu behar da; bestela, euskal gizartea aterako da galtzailea”, ohartarazi du.

Marian Beitialarrangoitiak gogor kritikatu du ere finantza erakundeek eta bereziki Kutxabankek arazoaren aurrean daukan jarrera: “ezin da bankuen borondatearen esku utzi gai honekin zerbait egitea. Ardura maila handiagoa eskatzen diegu bankuei, bereziki Kutxabanki, duen zeregin soziala aintzat hartzea, alegia”. EAJri ere leporatu dio “Kutxetako asanbladetara etxegabetzeen gaia eramateko oztopoak jarri izana”.

Eusko Legebiltzarreko eskuineko bi indarrek eta UPyDk euren botoak elkartu dituzte, etxegabetzeekin bukatzeko helburuarekin EH Bilduren legez besteko proposamena indar gabe uzteko.

Berriak

EAJ eta PPk sinatutako akordioaren aurrean bere alternatibak plazaratzen ditu EH Bilduk

Azken egunetan antzezten ibili diren maitasun-dantza paperera eraman dute azkenean EAJk eta PPk. Hemendik metro gutxitara, bizkaitarrak pobreziara eta prekarietatera eramango dituen hitzarmena sinatu dute. Bizkaiak inoiz izan dituen aurrekontu antisozialenak dira, EAJk azken urteetan indarrean ipini dituen neurri bidegabeetan oinarritutakoak. Eta gainera, orain austeritate eta murrizketa sozialetan Europako buru den PPren babesa bilatu dute jeltzaleek.

Bizi dugun krisi ekonomiko eta sozial latzean herritarren beharraz ahazten diren aurrekontuak dira. Alderdi interes hutsei eta kapitalaren interesei erantzuten dieten aurrekontuak dira. Ez herritarren interesei eta premiei erantzuten dieten aurrekontuak. EAJk bizkaitarrei azaldu beharko die zer adostu duten Barcenasen alderdiarekin, langile klasearen aurka ostiralero dekretuak inposatzen dituztenekin.

 

 

EH Bilduk uste duenez, Bizkaian behar sozialei erantzuna emateko, aurrekontu sozialak behar ditugu. Hemendik aurrera ezagutuko dugu zertan datzan akordioak, baina ez dugu zalantzarik egiten EAJk eta PPk bizkaitarrei esango dietenaz: herrialdearen egoera ekonomikoa txarra dela, neurri gogorrak hartu beharko direla eta politika sozialak bermatzen ahaleginduko direla. Alternatibarik gabeko egoera irudikatuko dute. Baina alternatiba egon badago.

EH Bilduk aurrekontu sozialak aldarrikatzen ditu Euskal Herriarentzat. Aldiz, EAJ eta PPren aurrekontuekin behar sozialak geroz eta handiagoak izango dira eta gizarte babesa geroz eta ahulagoa. Horren adibide da aurrekontu proiektu horren arabera, Gizarte Ekintzarako bideratuko den kopurua %38a baino ez dela izango. Gizarteratzeko laguntzak ere behera doaz Bizkaian; 2010ean 4 milioi euro zuzendu ziren horretarako, aurten 2 milioi euro aurreikusten dira. Bada, Gipuzkoan, ezkerreko soberanistok aurrekontuaren %48 bideratzen dugu gizarte politiketara eta Madrilen inposatutako dekretazoei eta murrizketei erantzuten dihardugu.

Egungo sistema fiskala ez da progresiboa eta errenta altuenetan ordaindu beharreko ehunekoak behera egiten du. Iruzur fiskalari ezarritako zigorren bidez bildutakoaren hazkundea 2011-2012 tarte horretan %6,2 izan zen.

Bizkaiko Foru Aldundiaren gaurko zor metatua, gehi 2013rako aurreikusten dena eta Merkataritza Foru Sozietateen zorra, guzti-guztira, 2.200 milioi eurokoa da.

Kupoa delarik, hau da banketxeen zorrak kitatzeko, espainiar monarkia mantentzearren edota armada finantzatzeko 353 euro ordainduko dugu 2013an bizkaitar bakoitzeko.

EH Bilduk alternatibak planteatzen ditu. Gaur hasita eta datozen egunetan eskupapera honen banaketa zabala egiten arituko gara Bizkaiko kaleetan. EAJ eta PPk lortutako adostasuna dela medio bizkaitarrok pairatuko dugun aurrekontuen deskribapena eman nahian, dokumentu honetan aurrekontu orokorraren banaketaz gain, ekonomia sustapenerako zuzendutako zenbakiak eskaintzen ditugu. Datuak datu, azpiegiturak, udal finantzak, euskara eta kulturari dagozkionak ere ikus ditzakezue eskupaperean.

Berriak

Alternatibak Kataluniako Parlamentua zoriondu eta alderdiak estatuaren aurrean desobeditzera deitu ditu

Alternatibako bozeramaile Jonathan Martinezek Kataluniako Parlamentua zoriondu nahi izan du gaur, berriro ere, bere subiranotasunaren defentsaren alde egin duelako, “Espainiako Estatuak aurretik urratu duen subiranotasuna, hain zuzen, Estatut berria Kataluniako Legebiltzarrean onartu zen arren azkenean murriztu eta edukirik gabe utzi zutelako”.

Egoera hau dela eta, talde ezkertiarretik alderdi kataluniarrak premiatu dituzte “beraien subiranotasuna erakundeen adierazpenen gainetik defenda” dezatela eta “adierazpena ez dadila ezerezean gelditu; horretarako, beharrezkoa balitz, Estatuaren aurrean benetako desobedientzia erabilita, herriaren gehiengoaren babesa eta legebiltzarraren berrespena dutelako”.

Martinezek, alabaina, ez ditu CIU, ERC eta ICVk hitzartutako idatziaren “gabeziak” ahaztu nahi izan: “Batetik, Herrialde Katalanak bere osotasunean kanpoan utzi dituzte, Kataluniatik haratago doan errealitate nazionala izanik; eta bestetik, kapitalean eta herrien eskubideen ezeztapenean oinarritzen den Europar Batasunera jaso da inolako kritikarik gabe, eta Kataluniako gizartea horren inguruan hitza hartu gabe”.

Hala ere, Alternatibatik Kataluniako Legebiltzarrari zein gizarteari emandako zorionak berretsi dituzte, “azken finean, gizartea izan delako mobilizazioaren bidez gaurkotasun politikoa eta sozialaren lehen planoan burujabetzaren aldarrikapena kokatu duena”. Horrexegatik, adierazpena “Kataluniako herriaren askatasun nazionalerako urrats berri” gisa hartu dute baina, beti ere, “hemendik aurrera gehiengo herritarrek egin beharreko bidea dela nabarmenduz, beren ordezkari politikoetatik haratago”.

Berriak

Gipuzkoako Aldundiak handitu du mendekotasuna duten pertsonen zaintza kontratatzeko prestazio eskubidea

Gipuzkoako Foru Aldundiak erabaki du mendekotasuna duten pertsonentzako prestazio ekonomikoak handitzea, hartara etxean zaintzeko laguntza pertsonala kontrata dezaten. Horrela onartu zuen atzo Diputatuen Kontseiluak. Hemendik aurrera, prestazioa jasotzeko eskubidea izango dute, mendekotasun larriko pertsonek ez ezik (III. gradua), mendekotasun handiko gipuzkoar guztiek (II. gradua) eta mendekotasun arineko batzuek (I. gradua, 2. maila).

Guztira ia 12.500 pertsona daude Lurraldean gradu horietako batekin balioetsita; beraz, horiek guztiak izan daitezke Laguntza Pertsonaleko Prestazio Ekonomikoa handitzearen onuradun. Prestazio hori etxeko zaintzako gastuak ordaintzeko da. Prestazioaren gehienezko zenbatekoa 833,96 euro da hilero mendekotasun larria dutenentzat, eta 300 euro mendekotasun arinekoentzat.

Laguntza horiek handitzeko, Foru Gobernuak Mendekotasun Legearen interpretazio zabala egin du. Ondorioz, Gipuzkoa da Espainiako Erreinuko Lurralde bakarra beste gradu horiei lagunduko diena. Une honetan, Estatuan 1.300 Laguntza Pertsonaleko Prestazio Ekonomiko daude emanak; horietarik, 1.190 Gipuzkoan.

Hemendik aurrera, pertsona gehiagok izango dute aukera prestazio hori izateko eta, horrela, laguntzaile pertsonal bat kontratatzearen gastuei aurre egiteko. Foru Aldundiak 2012an 8.713.000 euro gastatu zituen Laguntza Pertsonaleko Prestazio Ekonomikoan. Aurreikusten duenez, neurri berriak urtean 600.000 euroko gastua ekarriko du, eta haren kontura 163 kontratu berri egingo dira 2013 Gipuzkoan.

Ander Rodríguez Gizarte Politikako diputatuak prentsaurreko batean eman du erabaki horren berri, eta nabarmendu duenez “mendekotasuna duten pertsonek beren ingurunean ahalik eta denbora gehien eman dezaten, Gizarte Politikako Departamentuak hori sustatzen duten politikak indartzea du ekitaldi honetarako lehentasunetako bat. Hori dela eta, gure ustez, ezinbestekoa da talde horri behar adina lanabes ematea autonomia pertsonala izan dezaten etxean bertan, hartara beste baliabide batzuk, egoitzak esaterako, bestelakoak ezin eta orduan erabil ditzaten”.

“Lanabes” horiek hauek dira: batetik, zerbitzuak (Eguneko Zentroak, Etxeko laguntza zerbitzuak edo Sendian zerbitzuko aldi baterako egonaldiak); eta, bestetik, prestazio ekonomikoak. Azken horien artean, Laguntza Pertsonaleko Prestazio Ekonomikoak aukera ematen du mendekotasuna duten pertsonek behar duten laguntza pertsonala finantzatzeko. Laguntzaile hori pertsonaren etxean aritzen da, familiako laguntzaileei laguntzen.

“Gizarte Politikako Departamentuak 2012ko aurrekontuetan egin zuen ahalegin handiena zenbait zerbitzutako plaza kopurua handitzea izan zen. Horrela, 250 plaza berri sortu zituen egoitza eta eguneko zentroetan. Horri esker, egoitza baliabideetako itxaron zerrendak ia % 26 murriztu dira. Eta 2012an egindako lan hori borobiltzeko, 2013an beste zenbait politika egingo ditugu mendekotasuna duten pertsonek etxean bertan jarrai dezaten; prestazio ekonomikoak ematea, esaterako”, azpimarratu du diputatuak.

Gogorarazi duenez, ahaleginik handiena Espainiako Gobernuak onartutako Mendekotasun Legearen gaineko murrizketei aurre egitea izan da, bertan egungo prestazioen gaineko % 15eko murrizpena ezarri baitu. Gipuzkoan laguntzek beren horretan jarraituko dute (2012/9/5eko Diputatuen Kontseiluaren erabakia). Horrek urtean 10 milioi euro gehiago inbertitzea dakar.

http://alternatiba.net/old-files/Foto1.3..jpg

Berriak

Presoen aldeko aldarria eramango dute EH Bilduko hautetsiek instituzioetara

Aurreko urtarrilaren 12an, euskal presoen eskubideen alde inoiz egin den manifestaziorik jendetsuena burutu zen Bilboko kaleetan. Zalantzarik gabe, Euskal Herrian burutu diren manifestazio jendetsuenetakoa izan zen hilaren 12koa.

EH Bilduren iritziz, manifestazioaren leloak primeran laburbiltzen du euskal gehiengo politiko eta sozialaren aldarria eta exijentzia: Giza eskubideak. Konponbidea. Bakea. Euskal presoak Euskal Herrira.

Herri interpelazio erraldoia suposatu zuen Bilboko mobilizazioak. Lehenik eta behin, Espainia eta Frantziako gobernuak izan ziren interpelatuak, gatazkaren konponbiderako aukeraren aurrean duten blokeo jarrerarengatik eta jarrera hori, hein handi batean, euskal presoen eskubideen urraketan oinarritzeagatik.

Baina era berean, eragile politiko, sindikal eta sozial guztiak izan gara interpelatuak. Euskal jendarteak konpromisoak eskatzen dizkigu guztioi; dispertsioarekin amaitzeko, giza eskubide guztien aitortza eta errespeturako, gatazkaren konponbiderako eta bakearen eraikuntzarako.

Aldarrikapen horiek lehentasunezkoak ditu EH Bilduk, bidezkoak izateaz gain gizartearentzat ere garrantzitsuak direla argi geratu delako.

Presoen eskubideen inguruko adostasuna dago euskal gizartean. Euskaldunok jakin baitakigu presoen eskubideak betetzen ez diren bitartean prozesuak aurrera egiteko zama jasanezina izango duela.

Gatazka politikoaren ondorioei aurre egiteko garaia heldu da, aspalditxo iritsi zen egia esanda. Eta aitortu beharra dago zenbait arlotan aurrerapausoak eman badira ere, asko dagoela egiteko normalizazio arloan, elkarbitzitzan, biktima guztien aitorpenean eta abar baino arlo bakarra dago inolako aurrerapausorik eman ez dena eta hori presoen eskubideena da, non jarrerarik inmobilistenak ikusten ari garen.

Guzti hori dela eta gaurko agerraldi honetan EH Bildu koalizioa euskal presoen eskubideen alde hartzera doan konpromisoen berri ematera gatozkizue.

Ezinbestekoa da lehen bait lehen dispertsioa eta suposatzen duen eskubide urraketarekin amaitzea eta konponbide prozesuari Madrilek eta Parisek ezartzen dioten blokeoa gainditzea. Horregatik, arestian esan bezala, EH Bilduk eta koalizioaren hautetsiek helburu hauekin bat egiten duten heinean, aldarrikapen hauek instituzio guztietara eramango dituzte.

Horrela bada, honako konpromisoak jakinarazi nahi ditugu gaurkoan:

· Bihartik aurrera, “Giza eskubideak. Konponbide. Bakea. Euskal presoak Euskal Herrira” aldarrikapena bilduko duen kredentziala eramango dute EH Bilduko hautetsi guztiek.

· Era berean, aldarrikapen berbera udaletxe ezberdinetara eraman asmo dugu, leku ikusgarrietan eskegiz.

Berriak

Murrizketen eta politika sozialen deuseztapenaren aurrekontuak dira EAJk eta PPk Bizkairako eskaintzen dizkigutenak

PPk eta EAJk akordioa lortu dute Gasteizko Udaleko aurrekontuen inguruan eta bi alderdi horiek akordioa Araba eta Bizkaiara hedatzea adosten ari dira. Hau da, Bizkaiko aurrekontuen eztabaidaren bezperan, PPrekin kromo trukaketa egingo dute jeltzaleek, eta azken orduan eta berandu bada ere, Bizkaian aurrekontuak aurrera ateratzea lortuko du EAJk Raxoiren alderdiaren laguntzarekin. Ez edozein preziotara, murrizketa antisozialetan Europako errege den alderdiarekin adostuko baitituzte aurrekontuak.

Kontrakoa sinestarazi nahi diguten arren, alternatiba egon badago. Eta alternatiba hori eraikitzeko gure borondatea erakusten dugu; pertsonen, herri mugimenduen eta sindikatuen alde lan egiten duten eragileen ekarpenetan oinarritutako alternatiba, hain zuzen.

EH Bilduren ustean, aspalditik sumatzen genuena baieztatu egin da: Beste arlo batean burutzen ari zela negoziazioa saldu nahi izan digute, baina bai Ortuzarrek eta bai Basagoitik erreparorik gabe onartu dute kromo aldaketa zela negoziatzen ari zirena, interes partidisten mesedeetara eta ez bizkaitarron beharrei erantzuteko.

 

 

Gasteizko Udaleko akordioa lortu aurretik, atzo bertan, kromo aldaketa ukatu zuen Ortuzarrek, negoziaketarako denbora luzea hartzen ari zirela argudiatuz.

EAJren eta PPren arteko negoziazioen ikuskizun mediatiko tamalgarria salatu genuen, eta orain herritarren egiazko eguneroko arazoei erreparatzen ez dien adostutako ituna agerian gelditu da.

Murrizketen eta politika sozialen deuseztapenaren aurrekontuak dira EAJk eta PPk eskaintzen dizkigutenak. Lortu duten akordioa ez da zerotik sortzen, azken baten, EAJk proposatu duen aurrekontua eskuinekoa da eta, beraz, eskuineko beste alderdi batek arazorik gabe defenda dezake. Horren eredu da, Bizkaiko Foru Aldundian gizarte gaietara bideratzen den dirua aurrekontuaren %38a izatea, Gipuzkoan %48a den bitartean. Gizarte eredu bera partekatzen dute EAJk eta PPk, eta hori agerian geratu da aurrekontuen edukien negoziazioan aritu beharrean, kromo trukaketa nola egin izan delako negoziazioen ardatza. Bizkaitarren beharrak asetzen ez dituen eta oinarrizko giza eskubideekiko onartezinak diren murrizketak planteatzen dituzten aurrekontuak dira.

Porlanaren eta azpiegituren aurrekontuak dira EAJk eta PPk proposatuko dizkigutenak. Berdin zaio Jose Luis Bilbaori alderdikide duen Urkullu lehendakariak berak aitortutakoa, herritarrei begirako politikaren garaia dela esatean. Berdin zaie bai batari eta bai besteari, ez dutelako benetan mezu horretan sinesten eta ez dutelako inoiz praktikan jarri. Pertsonen aldeko politikak egiteko garaia da bai, ez da momentua porlana eta azpiegituren aldeko egitasmoak mantentzeko edo helburu sozialik gabeko proiektu berriak martxan jartzeko.

Bizkaiak azken urtean jasan dituen erregulazio espedienteen kopuruaren hazkundeak, kontrolatzen duten Kutxabankek ekiditen ez dituen etxegabetzeenak, bazterketa sozialaren igoerak… EAJk gauzatu dituen politiken datu adierazgarriak ematen dizkigute. Beste politika bat egitea ezinbestekoa da eta EAJk eta PPk proposatzen dizkiguten aurrekontuek amildegira garamatzate.

Baina egunotan egiaztatu duguna ondokoa da: botere kuotak dira banatzen ari direna eta EAJ, bere burua kudeaketaren eta akordioaren txapeldun nagusitzat agertzen duen alderdiak, ez dauka akordioetara iristeko eta kudeaketarako gaitasunik, baldin eta botere kuota nahikorik ez badauka banatzeko.

Eta behin akordioren bat lortuz gero, murrizketen bidez herritarren eskubideak zapaltzen ari denarekin egingo du, ustelkeria ikuskizun tamalgarria ematen ari den alderdiarekin, bizkaitarron eskubide sozial eta laboralak oraindik eta gehiago ondoratuz eta prekarizazio mailan oraindik eta gehiago sakonduz. Madriletik inposatzen dizkiguten murrizketei aurre egiteko inposaketaren ardura duen alderdiarekin adostu egiten du Bizkaiko aurrekontua Jose Luis Bilbaok, hori da bere bidea, eta EH Bilduren ustez bide okerra da.

Dei zuzena egin nahi dio EH Bilduk EAJri, joka dezala benetako erantzukizunez, eguneroko arazo larriak aintzat izanda eta horiei soluzioak bilatuta, eta ez bestelako interesei begiratuta. Premisa horiekin jokatuz gero, eta gizarte ekintzan murriztu beharrean indartu egiten dituen aurrekontuak eta enplegua sortzeko helburua dutena aurrera ateratzeko prestutasuna izanez gero, EH Bildu elkarlanerako prest egongo da.

Berriak

Alternatibak salatu du Barakaldoko alkateak “ezer ere ez” egiten ez duela udalerriko emakumeen aurka ematen diren erasoen aurrean

Alternatibaren Bizkaiko bozeramaile Asier Vegak deitoratu egin du Bizkaiko Aldundiaren eta Barakaldoko Udalaren arteko eskumen eztabaida, Lutxanako tuneletan eman diren bortizkeri matxista gertaerak ekiditeko irtenbideak bilatu ez dituztelako. Egoera hau dela eta, Vegak bi erakundeei “merkatal gune erraldoien zerbitzura diseinatutako eredu urbanistikoekin, zaintza lanak eta gehienbat hauek egiten dituzten emakumeei bizkarra ematen diena” aldatzeko eskatu die eta aldi berean, Barakaldoko emakume taldeek osatutako leku arriskutsuen txostena aintzat hartzeko.

Bizkaiko Alternatibak genero ikuspegia galdegin du hiri eta herrietako hirigintza planifikatzeko orduan, “emakumeentzat debekatuta dauden lekurik ez egoteko horietan erasoak pairatzeko arriskua sentitzen dutelako”. Ildo horretatik, azpimarratu nahi izan dute Argitan talde feministak duela 4 urte salatu zituela hiriak dituen gune beltzak, “Lutxanako pasabidearena bezalakoak, Udalak horiek konpontzeko ezertxo ere egin ez duen arren eta, gerora, iazko urrian bezala, erasoak eman diren lekuak”. Hala, Vegak eskuduntzekin aitzakiak jartzea leporatu dio Tontxu Rodriguez alkateari, “ez al zaio nahikoa iruditzen bortxatu dituzten emakumeak berak gobernatzen duen udalerrikoak izatea?”.

Edonola ere, alderdi ezkertiarreko bozeramaileak gogorarazi du hirigintzatik segurtasun eza beharrezkoa diren  konponbide guztiak ez ezik, ezinbestekoa dela indarkeria matxistaren jatorriaren aurka egin, izan ere, eraso sexualak ez dira “ez zoriagatik ezta kasuistikagatik ematen, emakumeen aurkako indarkeria darabilten gizonezkoak existitzen direlako baizik, patriarkatuaren adierazpenik bortitzena baina inondik inora bakarra”. Hori dela eta, Vegak gizartean eman beharreko “errotiko aldaketaz” hitz egin du, “emakumeak babestu beharreko biktimak gehiago ez izateko”. Aldaketak, alabaina, udal erakundeek Barakaldon gertatzen diren hainbat ekitaldiren aurrean zer edo zer esatea eskatzen du, “bertoko diskoteketan jai sexistak egiten direnekoak kasu, zeinetara jendea erakartzeko emakumeen sasi zozketak egiten diren”.

Berriak

Alternatiba | Ezkerra eraldatzearen erronka

X