Etiketa: Ekonomia

Makiaveloren handikiak

Diana Urrea eta Xabier Soto – Alternatiba

“Errepublika orotan daude kontrajarritako bi joera: handikienaeta herriarena”. Makiavelo izan zen esaldi honekin, duela bost mende, gizarte orok izango zuen interes gatazka aurreikusi zuena. Politika-ekonomia eliteak ezarritako jabetza pribatuak eta lege hauek amildegia ireki dute hierarkikoki oso bananduak dauden bi klaseen artean: Jabeek osatutako klasea, boteretsuen eta buruzagien klasea, jabetzarik ez duen klasearekin, pobreen eta langileen klasearekin kontrajarrita. Gutxi batzuen pribilegioak, ororen ongiaren kontra; herrian sortutako presioa alde batetik, eta handikiena bestetik.

Aurtengo, maiatzaren lehenarekin batera, eta maiatzaren 30erako deitutako greba orokorraren atarian egonda, Gipuzkoa, duela hainbat mende iragarritakoklase borroka horren adibide bikainaren ikusle bihurtu da. Baina oraingo honetan, ñabardura desberdin bat dago. Zerbait aldatu da. Boteretsuek antzeman dute jada, eta urduri daude.

Lurraldeko hirugarren adinekoen egoitza guztietan lan egiten duten 4.800 pertsonak, lan hitzarmenaren negoziaketan haien eskubideak ez galtzeko borrokan ari dira. Borroka, langileek eskura dituzten arma bakarrekin egiten dute: kartelak, txilibituak, lemak, pankartak… Baina armak eskuan prest dituen erraldoi baten kontra ari dira. Makiaveloren handikiak, Adegi patronala kasu honetan, haien botere politiko, ekonomiko eta mediatiko osoarekin eraso egiten diote langileriari (sektoreko gehienak emakumeak izatea ez da kasualitatea).

Komunikazio talde boteretsuaz eta EAJ eta PP bezalako alderdiaz babestuta, Adegik probetxua hartu ez ezik, Madrileko konplizeek haien zerbitzura jarritako arma baliagarriena eta gaiztoena ere dute eskuragarri: Espainiako lan kontra-erreforma. Erreforma betez, eta Euskal Herriko dozenaka lan itunekin gertatu behar den bezala, bi aldeen arteko hitzarmena lortzen ez bada, uztailaren 7an sektoreari dagokion estatu hitzarmena indarrean sartuko da eta milaka dozena langilek dituzten lan baldintzak larri kaltetuak izango dira. Gipuzkoako zahar-etxeetako langileek patronalaren baldintzak onartzen ez badituzte, bi hilabeteren buruan hau izango da haien egoera: 400 eurotako soldata jaitsiera eta 200 lanordutako igoera urteko.

Borroka ezin da desorekatuagoa izan. Txilibituak arrazoi osoarekin hots eginda ere, ezin dute botere politiko eta ekonomikoen artilleria astunaz jositako aliantzen kontra ezer egin. Lehenengo aldiz, ostera, zerbait ari da aldatzen. Gipuzkoako herritarrek erabaki dute, klaseen borroka horretan, botere instituzionala herriaren alde daudenek izan behar dutela. Eta EAJko gobernuarekin hamarkada luzez hitzarmenak egin ostean, orainhandikiek haien Gipuzkoako konplizea galdu dute. Bilduren Foru Gobernuak zerbitzu publikoen aldeko bandera goratzea eta lurraldeko zahar-etxeetan zein eguneko zentroetan lan egiten duten emakumeak babestea erabaki du. Argi eta ozen esan du: “Emakumeak babestuko ditugu”.

Espainiako lan erreformaren aurka eta herri honetako edozein langilek lortutako eskubideak kentzearen kontra dagoela aditzera eman dio mundu guztiari. Konpromiso hori ixteko eta langileen soldata igoerari eusteko, mahai gainean 8,2 milioi euro jarri ditu, langile hauen lan duina bermatzea, herritarrei kalitatezko zerbitzu duinak eskaintzearekin lotuta dagoelako.

Adegiren suminduraz beteriko erantzuna Aldundiaren kontrako auzia jartzea izan da: “negoziaketa kolektiboan aurrekaririk gabeko esku sartzea” salatzeko. Hor dago koska: “aurrekaririk gabekoa”. Harrituta, patronalaren handikiek Aldundiari auzia jartzera behartuta sentitu diren historian lehenengo aldia dela ziurtatu dute. Txundituta esaten dute, norabidea galduta botere politikoaren eta enpresarien arteko ohiko adostasun hori galdu dutenean. Urteak eman dituzte Aldundian paseatzen, bostekoak elkarri ematen, diru publikoarekin tripa-festa ederrak egiten eta gorbatadun gizon boteretsuekin bilkurak ospatzen. Baina orain, epaimahaien babesa eskatu dute Foru Gobernuak haien poltsikoak betetzen jarraitzeari uko egin diolako.

Makiaveloren handikiak urduri daude. Bilduren Gobernuaren jarrera hain da ezohikoa, legez kanpokoa ere iruditzen zaiela. Orain arte, publikoaren eta langileriaren duintasunaren alde egiten duen Gobernu baten berririk ez zuten. Zaintza lanen, dagoeneko kolokan dagoen sektore feminizatuaren lan baldintzak okertzeko prest ez dagoen botere politikoa zegoenik ez zekiten. Lan ezegonkortasunaren biktima diren emakumeen eskubideak defendatzen dituen instituziorik dagoenik ez zekiten. Ez eta, enplegu prekarioa dutenen, zaintzaren ezkutuko ekonomian bizi direnen eta familia aurrera ateratzeko aldi baterako kontratuak dituzten ezkutuko langileen defentsan inor zegoenik.  

Horregatik, Alternatibatik Aldundiaren Politika Soziala Sailaren eta bere ordezkari – militantzian kide dugun- Ander Rodriguezen jarrera txalotzen ditugu, baita bere lan-talde osoarena ere. Aldi berean, Gipuzkoako Aldundiak langileekiko berretsitako konpromisoa txalotzen dugu, diru publikoarekin ordaindutako obretan lan baldintzak eta hitzarmenak betetzen ez dituzten enpresei zigorra ezarriko diela jakinarazi berri baitu.

Gaur lehenengo aldiz, emakumeek, langile klaseek eta sektore zapalduek aliatu bat dute Gobernuan. Klase borroka su gabe diraki, Gipuzkoan zein Euskal Herrian.

Berriak

Aurrekontua: EAJren porrota agerikoa da, herri honen beharrei erantzuteko gai ez izateagatik

Jaurlaritzaren aurrekontuei buruzko eztabaida irekiz geroztik, EH Bilduk diru-sarreren atala handitu beharra nabarmendu du behin eta berriz. Besteak beste, espainiar Estatuak inposatutako defizit muga, EAJk ontzat eman duena, ez onartzea eta igotzea ezinbestekotzat jo du koalizioak, Jaurlaritzak euskal jendartearen beharrei modu egokian erantzuteko behar adina baliabide eskuratu ahal izateko. EAJk planteamendu hori errefusatu du etengabe, baina orain bere aurrekontu-proiektua bertan behera utziko duela iragartzen du, defizit muga igo behar dela onartuz, EH Bilduk eskatzen zioena, hain justu.

 

“Aurrekontu-proiektua bertan behera uztearekin EAJk bere porrota agerian utzi du, herri honen beharrei erantzuteko gai izan ez delako eta bere egitasmoa aurrera eramatearren behar zuen babes politikoa lortzeko gai izan ez delako”, Oskar Matutek eta Belen Arrondok adierazi dutenez. Defizit muga igotzearen aldeko koalizioaren apustua gogora ekarri du Matutek, eta salatu du Jaurlaritzatik zein Sabin Etxetik “utopikoak izatea eta errealitatetik kanpo bizitzea leporatu digutela horregatik; orain, aldiz, Urkulluk berak aitortzen du hori dela bidea eta, finean, guk arrazoia geneukala”.

Aurrekontu-proiektua erretiratzeak sortarazten duen egoeraren ardura osoa EAJri dagokiola azaldu du EH Bilduko legebiltzarkideak, eta hemendik aurrera ere jeltzaleen ardura izango da Jaurlaritzaren politika ekonomikoa norabide egokian jartzea. “Eztabaidari beste parametro batzuetatik heltzeko aukera dauka orain Jaurlaritzak, eredu sozioekonomiko berri baten alde, eskubide sozialak babesteko eta bizi baldintza duinak bermatzeko, baina orain arteko ereduari eusten baldin badio, Troikak, Bruselak eta merkatuek nahi duten ereduaren aldeko apustua egiten badu, aurrez aurre izango gaitu”, ohartarazi dute Matutek eta Arrondok. Ido horri jarraituz, EH Bilduk emergentzia plana eskatzen dio Urkulluri, krisiaren ondorioei eraginkortasunez erantzuteko plan hori ezinbestekoa delakoan; are gehiago, Gobernuaren aurrekontuak berak plan orokor horren tresna izan behar du.

Azaldu dutenez, aurrekontu-proiektuari egindako zuzenketa guztien bitartez EH Bilduk Jaurlaritzaren diskurtsoa gainditu du eta beste eredu bat egon badagoela argi utzi du, “posiblea dela diru publikoa beste modu batean erabiltzea, doktrina neoliberalarekin apurtuz eta erdian pertsonak jarriz, kalitatezko zerbitzu publikoak eta lan baldintza duinak bermatzeko eta ekonomia berpizteko”. Oskar Matuteren esanetan, “horixe da EAJk nahi ez duena, jendeak jakitea krisiari aurre egiteko beste modu bat dagoela; horregatik uko egin dio eztabaida horretan sartzeari, eta bere aurrekontua aukera posible bakarra balitz bezala aurkeztu du; akordioak bilatu beharrean, bere proiektua inposatu nahi izan du, azkenean bertan behera utzi behar izan duen arte”.

 

Berriak

Onartezina da Bizkaiak saskibaloi talde bati 5,2 milioi euro ematea

Jakin bagenekien Jose Luis Bilbao eta PNV, saldu nahi digutenaren kontra, oso kudeatzaile txarrak direla. Bizkaitarrekiko behintzat, izan ere, haien adiskide bankari eta enpresaburu handika poz-pozik dituzte haien mesederako eginiko zerga politikarekin. Supersur errepidea dugu adibiderik onena, inork behar eta erabiltzen ez duen makro azpiegitura defizitarioa. Urtero gero eta zulo handiagoa eragiten dio Bizkaiko ekonomiari, baina hasieratik ere, Bilbaok berak aitortu zuen bizkaitarron hainbat belaunaldirako hipoteka zela obra hura… Baina aurrekari horiekin ere, ezin genuen espero Bizkaiko Foru Aldundiaren azken erabakia, kirol talde pribatu bati 5,2 milioi euro bideratzea. Noiz era politika sozialetarako dirurik ez dagoela esaten duenean. Honetaz ari ote zen duela hilabete batzuk “gastuak egokitu eta ekonomia sustatzeaz” hitz egin zuenean? Iruzurraren kontra duela gutxi aurkeztutako kanpaina berregin diogu Bilbaori: Adarra jotzen?

Berriak

Oskar Matuteri elkarrizketa Radio Euskadin

EHBilduko legebiltzarkide Oskar Matuteri elkarrizketa Radio Euskadin. Matutek, Eusko Jaurlaritzaren aurrekontuaz, maiatzaren 30eko Greba Orokorraz, bake prozesuaz eta zabor bilketa sistema desberdinen inguruko polemikaz hitz egin du. 

Oskar Matute EH Bilduko legebiltzarkidearen ustez, Eusko Jaurlaritzaren aurrekontu proiektu “neoliberala eta atzeragarriak” “eskuinaren babesa” jasoko du, hau da, PPk eta UPyDk babestuko dute.

PPk osoko zuzenketa aurkeztuko badu ere, Antonio Basagoitiren alderdiak akordioa lortu arte horren “printzipioak aldatu” egingo dituela kritikatu du Matutek.

Legebiltzarkide abertzalearen esanetan, EAJk azaldu egin beharko du zergatik akordioa lortzeko “ahaleginak” PPri eta UPyDri zuzenduta dauden.

Matutek “muga gorriak” zeharkatu izana egotzi dio Jaurlaritzari, osasunaren, hezkuntzaren eta gizarte laguntzen arloetan murrizketak egin baititu. Hori dela eta, EH Bilduk “ezin du” proiektua babestu, eta PSE-EEk “nekez” egingo duela dirudiela gaineratu du.

Greba orokorra

Hego Euskal Herriko gehiengo sindikalak maiatzaren 30erako deitutako greba orokorra-ri dagokionez, Alternatibako buruak ukatu egin du “gutizia” dela, eta langileek soldataren parte bati uko egingo diotela gogorarazi du.

Matuteren aburuz, greba orokorra egitea herritarren desengainua adierazteko modu onena da, eta “hobe litzateke” gainerako sindikatuek ere bat egitea. CCOOk eta UGTk bat egiten ez badute ere, hori ezin dela greba egiteko “oztopo” izan iritzi dio.

Berriak

BBKren Batzar Nagusian “gure bankua herritarren mesedetan” jarri behar dela defendatuko du EHBilduk

Kutxabank sortu zenetik 15 hilabete pasatu direnean, azken hauteskundeak izan zirenetik lehen ohiko Batzar Orokorra egingo du BBK-k etzi, hilaren 11n, Bilbon. Batzarrerako ez da aurreikusten finantza jarduerari buruzko informaziorik, hori KutxaBanken Administrazio Kontseiluan (EAJ + PPk osatzen dute) erabakitzen omen da: erreserbetara jarritako 585 milioi euroak (2011n baino %21 gehiago), Banku txarrean jarritako 100 milioi euroak… EHBilduren ustean, finantza jarduera KutxaBanki dagokio, bai, baina KutxaBanken akzioen %57 BBKrenak dira eta zerbait esateko, aztertzeko, eztabaidatzeko aukera izan beharko genuke.

Gauzak horrela, BBKren Batzar Orokorrean, soilik emaitzaren informazioa emango digute, eta horren arabera, Gizarte Ekintza proposamena. Erabaki guzti horiek eragina zuzena dute BBK-ko Batzar Orokorrak erabaki behar duen Gizarte Ekintzako aurrekontuan. BBK-k akzioen %57 izanda, Batzar Orokorrak zerbait esan beharko zuen finantza jardueraz. Baina, ez.

Errealitate gordinari uko eginez, ehunka etxe-kaleratze ematen ari dira azken hilabeteetan, eta horietako askotan, BBK-k erantzunkizun zuzena du. Hala ere, etxe-kaleratzeen gaia ez dira aztertuko etziko batzarrean. Eskaera egin genuen batzar honetan gaia sartzeko, baina ezetz erantzun digute. Eskaera bera egin dugu Gipuzkoan eta Araban, eta Vitalen batzarrean gaia eztabaidatuko dute, gehiengoa PPren eskuetan egonda. Gai-zerrendan sartu dute, ez bakarrik etxe-kaleratzeen gaia, pribatizazioarena ere aztertuko dutelako. PP EAJ baino zabalagoa da? EAJk badu non hausnartu.

Atzo, KutxaBankeko lehendakari Mario Fernandezek esan zuen Gizarte Ekintza dela egun KutxaBank izatearen ardatz nagusia. Baina berehala argitu zuen bere tranpa: bankuaren irabaziaren araberako garapena du Gizarte Ekintzak, beraz, gero eta etekin laburrago, orduan eta diru gutxiago Gizarte Ekintzarako. Eta hori da, hain justu, gertatzen ari dena: gero eta diru gutxiago bideratzen da Gizarte Ekintzara. Iaztik, erdia baino gehiago murriztu da Gizarte Ekintzarako aurrekontua: Gizarte Ekintzako Zentroena, %87.

Horrek adierazten du BBK-k berezkoa duen gizarte ekintza deuseztatzeko jokaera. Baina kolaborazioan egindako programak eta jarduerak ere %77 gutxitzen dira. Eta murrizketa horiek izanda, gai dira esateko jarduera eta proiektu guztiak egingo dituztela. Gezurra, jakin badakigulako Sukarrietako txanda bat edo jarduereren bat kendu dituztela; era berean. BBKren egoitza zen Reina de la Paz-ek Vitalitas aseguru etxe pribatuaren bitartez eskaintzen ditu zerbitzuak.

Gizarte ekintzako txostena irakurriz gero, horrelako harribitxiak aurki ditzakezue: “… ehun urte bete dituen Aurrezki Kutxa arrakastatsuaren oinordekoa dena eta, horregatik, finantza- eta gizarte-bazterketak sortutako gizarte-beharrei dagokienez oso sentikorra dena. Gizarte-ekonomiako tresnak sustatuz, bazterketaren aurkako borrokan eskarmentu handia dugu, eta gainera liderrak eta aitzindariak izaten jarraitu nahi dugu”. Ikusi al duzue gizarte-beharrekiko sentikortasun-izpi bat Kutxabankek jendea bere etxetik kaleratzen duenean?

2012ko Gizarte Ekintzako Txostenean ere aurki ditzakezue horrelakoak: sozietate publikoarekin lankidetzan. Programa horren egikaritzan, BBK-k herritarren eskura jarri ditu Gaztelondon, Errekaldeko barrutian, bere jabetzakoak diren BOEn sustapeneko 40 etxebizitza -beren eranskin eta guzti-, alokairu sozialeko erregimenean erabil ditzaten. Proiektu horrekin, BBK-k erantzuna ematen dio bizkaitarrekin duen konpromiso nagusienetakoari, hots, bateko edo besteko bideak erabiliz etxebizitza babestuak eskuratzea erraztea, bereziki gazteenei. Izan ere, Bilboko Udal Etxebizitzei higiezinak doan utzi dizkie 50 urtez.

2010etik diote, baina beti kopuru berbera da: 2010ean, 40; 2012an, 40; 2013an, 40,… hori da bizkaitarrek etxebizitza babestuak eskuratzea errazteko BBK-k hartzen duen konpromisoa. Eta ahaztu egin zaie esatea Gizarte Ekintzaren 2008-2010 epealdirako Plan Estrategikoaren helburu bat zela gazteek alokatzeko BOE etxebizitzaren proiektua gauzatzea. Zenbat etxebizitza egin ziren? Bat ere ez. Aitzakia: Lurzoruaren Legea eta udalek ezarritako oztopoak.

BBK cuadro

40 etxebizitza alokairu sozialerako, eta bitartean, zenbat pertsona utzi du etxe gabe KutxaBankek? Datu hori KutxaBank-ek ez digu ematen, baina…

KutxaBank eta BBK-ko lehendakari Mario Fernandezek orain dela gutxi adierazi du hipoteka ordaindu ezin duten kasuen %92,7an akordioa lortzen dela kreditua birnegoziatzeko eta etxebizitza ez galtzeko. Beraz… %7,3a KutxaBankek etxetik kaleratzen du.
2012ko iraila arte, hau da, 9 hilabetean, 2.088 hipoteka-exekuzio egon dira Bizkaian.

Kontuan izanda hipoteka gehienak KutxaBank-en eskuetan daudela…

Ziur gaude KutxaBankek 40 pertsona baino gehiago etxetik kaleratu edo kaleratzeko arriskuan daudela.

KutxaBankek 40 etxebizitza utzi dizkie doan Bilboko Udal Etxebizitzei 50 urtez. Zergatik ez ditu uzten doan eta 50 urtez Bilboko Udal Etxebizitzei edota Etxebideri hipoteka-exekuzioan dauden etxebizitza guztiak beraiek alokairu sozialean eskaini diezaien bertan bizi eta hipoteka ordaindu ezin dutenei? Horrelako proposamenak bai adieraziko luketela BBK-k finantza eta gizarte-bazterketak sortutako gizarte-beharrekiko oso sentikorra dela, baina ez dugu ikusten bide horretatik joateko asmorik duenik.

http://alternatiba.net/old-files/Agerraldia BBK.jpg

Berriak

Petronorren koke plantaren inaugurazioa inposizio segida baten azken urratsa da

Petronorrek Muskizeko findegian eraiki duen koke planta gaur (apirilak 3) inauguratuko da eta urrats bat gehiago emango da, beraz, Eusko Jaurlaritzak 2008ko azaroan haren instalaziorako ingurumen baimena eman zuenetik, gaur arte eman den inposizio segidan.

Urte hartan, EAJko buruzagi ohi eta gaur Petronorreko presidente den Josu Jon Imazek Petronorren “etorkizun bideragarria”-rekin lotu zuen koke planta. Botere ekonomikoen asmoak agiri-agirian zeuden, kasu honetan petrolio enpresa baten interesak, %86a Repsolen esku eta %14a Kutxabanken esku dituena. Koke plantaren proiektuak, ordea, parez pare izan ditu bertako bizilagunen antolakuntza eta mugimendu ekologista. Osasunaren eta ingurugiroaren alde lan egin dute, biztanleria informatu, mobilizatu eta halako jarduerarekin lotutako instalaziorik etxe ondoan nahi duten ala ez erabakitzeko eskubidea dutela aldarrikatu dute.

Petronorreko agintariek entzungor egin diete Muskiz eta inguruko biztanleriaren eskariei, koke plantaren proiektuari dagokionean hitza hartu eta haien jarrera argitu nahi izan duten bakoitzean. Are larriagoa da, ordea, Petronorreko agintariek hartu duten bidea. Administrazioarekiko Auzien Epaitegiak joan den martxoaren 1ean eman zuen epaia, plantaren eraikitzea eta jarduera bertan behera uzten zituena. Petronorreko arduradunek ez dute epaia onartu eta errekurtsoa aurkeztuko dutela iragarri dute. Epaitegiaren erabakiaren arabera, 853 milioi euroko kostua izan duen instalazio horrek ez zuen eraikia izan behar.

Petrolio enpresako agintariek inaugurazio ekitaldirako xehetasun guztiak ondo prestatu dituzte. Segurtasun neurriak indartu dituzte, hainbat langileri jai eman eta gainontzekoei ibilgailu propioan joateko aukera ukatuz. Instalazioaren itxura hobetzeko garbiketa lanak ere egin dituzte, bihar izango duten “ohorezko” gonbidatuari harrera egiteko, Espainiako Errege Etxeko ordezkari Borboiko Felipe, alegia. Espainiako printzea Muskizen izango da bihar 300dik gorako gonbidatu izango dituen ekitaldian. Espainiako Errege Etxeko ordezkariaren gonbitea, inposizio segida honen azken kapitulua da eta garbi erakusten du korporazio handiek halako negozioak ixteko darabilten jokabidea, haien interesak beste edozein konturen gainetik ipiniz beti.

Instalazio berriarekin batera hitz eman diren la postu berriak direla eta, azpimarratzekoa da Petronorrek hainbat langileren kontra erabili dituen mehatxuak. Joan den urtean findegiaren jarduera etenda egon zen erregaiaren prezioan margen nahikorik ez zegoela argudiatuta eta testuinguru horretan Petronorrek erregulazio espedientea aurkezteko asmoa iragarri zuen.

EH Bilduk dei egin nahi die herritar guztiei Muskizko bizilagunei inposatu zaien koke plantaren aurka eta Espainiako printzearen bisitaren kontra antolatuko diren mobilizazio guztietan parte hartzera. Proiektu horrek korporazio handien interesei bakarrik erantzuten die eta inolaz ere ez enpleguaren sorrerari edo eskualdearen beharretara egokitutako garapen ereduari. Petronorrek, inposizioaren bidez, sistema ekonomiko injustua eta ingurugiroaren aurkakoa ezarri nahi du poltsiko gutxi batzuk loditzearen truke.

http://alternatiba.net/old-files/keepcalm.jpg

Berriak

Opariak eta kudeaketa publikoa

Diana Urrea, Asier Imaz, Eva Blanco eta Ernesto Merino EH Bilduko legebiltzarkideak

Egunero egunkarietako lehen orrietan ditugun ustelkeria kasuek egoera benetan kaxkarra erakusten digute. Alderdi politiko eta erakundeetako arduradunengan zeukan konfiantza eskasa galtzen ari da jendea, eta politikagintza gizartearen arazo nagusietako bat da egun hiritarrentzat.

Ustelkeria kasurik larrienei buruzko informazioa jasotzen dugu egunero komunikabideen bitartez: Gürtel auzia, Urdangarin kasua, Bárcenas, CANen espoliazioa, Barcina eta bere laguntxoen dietak… Hamaika datu ditugu, eta, hala ere, esan nahi digutena baino ez dugula jakingo ematen du: sistemaren oinarriak minduta ez ikusteko adina baino ez.

Edonola ere, eta alderdi barruko borrokak alde batera utzita, ustelkeria kasu horiek zerbait gehiagorako erabiltzen ari direla ematen du. Krisia Ongizate Estatua akabatzeko erabili da, langileen eskubideak murrizteko, Estatuaren birzentralizatze prozesuari ekiteko. Ba, era berean, ustelkeria kasuak «klase politikoaren» irudi zehatza saltzeko erabiltzen ari dira: politikari guztiak bere poltsikoaren onerako eta alderdiaren ekonomiaren alde ari direla adierazten ari dira.

Eta, gauzak horrela, zerbait egitea beharrezkoa denez, PPren Gobernuak neurriak hartuko dituela iragarri du. Neurri horien bitartez, etorkizunean erakundeak ez dira politikarien eskuetan egongo —guztiak ustelak baitira—, teknikari, funtzionario, teknokraten eskuetan baizik. Horiek zenbat eta zertan gastatu erabakiko dute, gizarteak hautatu duen ideologia edo hauteskunde programaren gainetik. Helburu hori daukate PPren Gobernuak onartu duen azken neurriek: zinegotzien kopurua murriztea, udalerriak desagerraraztea…

Gizartea nazkatuta dago, eta ulergarria da «politikari guztiak berdinak» direla esatea, baina PPk, Madrilgo Gobernuak, badaki hori ez dela egia; faltsua da, eta politika egiteko, kudeatzeko beste eredu bat dagoela ezkutatzen du. Botereak ez du inor gaizto bihurtzen. Eta gure artean badaude historia luzea duten alderdiak eta ustelkeriak inoiz kutsatu ez dituenak.

Alderdi politiko batzuen kudeaketa ereduaren oinarrian dago ustelkeria. Inork ez du Jaguar bat, poltsa garesti bat edo traje bat oparituko trukean zerbait jaso behar ez badu. Edonork daki hori hausnarketa mamitsua egin gabe. Era berean, guztiok badakigu enpresa batek ez diola gobernatzen ari den alderdiari dirua emango ezer jasotzeko itxaropenik gabe.

Ustelkeria kasu gehienen azpian enpresariak aurkitu ditugu, eraikitzaileak sarriegi, politiko ustelen lagunak. Hori horrela dela diote egunero irakurtzen ditugun berriek. Eta enpresa eraikitzaileei buruz hitz egiten eta gaia gurera ekarrita, esan behar da batzuek ez dutela Espainiako ohitura txarrak hemen kopiatzeko arazorik. Erakundeek esleitutako aurrekontuetan egiten diren gehiegikeriez ari gara, adibidez, ustez legezkoa den bezala eta txosten garbiarekin esleitutako lanen azken prezioa aurretik zehaztutakoaren bikoitza denean. Eta horrek zalantza bat sortzen du, ezin uler daitekeelako aurreikuspenak horren gaizki egin eta zigor administratiborik ez jasotzeaz gain kontratazio gehiago jasotzea sari bezala.

Horrelako kasu batzuk ditugu Euskal Herrian ere: AP1 eraikitzeko jasanezinezko kostua, Bidegin antzemandako desorekak… Horiek ikusita, galdera bat datorkigu burura: erakunde bati hitzartutakoa baino %48 gehiago fakturatu ondoren, zenbateko esker ona ager dezake enpresari batek?

Interesen joko hori eta alderdi politikoen finantzaketarako dohaintza sistema iluna daukagula kontuan hartuta, benetan agertoki itsusia dugula aitortu beharra dago.

Agertoki itsusia ez bakarrik Espainian, Euskal Herrian ere dohaintza trafikoa baitugu, eta ez dakigu horren azpian zer dagoen. Duela gutxi komunikabideetan irakurri dugunez, euskal alderdi bat dugu benetan iaioa dohaintzak eskuratzeko lanetan: Estatuan azkeneko hamar urteetan dohaintza gehien jaso duten alderdien artean hirugarren postuan dago EAJ, ia 22 milioi euro jaso baititu (3.500 milioi pezeta). CiU dago bigarren postuan, eta 46.577.789 euro lortu ditu, eta PP lehen postuan, 39.185.016 euro eskuratuta. EAJren kasuan, gainera, dohaintza ia guztiak, %86, anonimoak izan dira.

Estatu mailan ondo irabazitako hirugarren postuan dago EAJ, PP eta CiUren ondotik —eta bitxia bada ere, PSOEren aurretik—, baina alderdi politiko bakoitzaren esparruari (Espainia, Katalunia eta EAE) eta biztanleriari begiratuta, EAJ txapeldun handia da: biztanle bakoitzeko 10 euro jasotzen baititu —bere kudeaketa esparrua EAE dela kontuan izanda—; bere atzetik CiU dago, pertsona bakoitzeko 6,15 euro jasota, eta PP, askoz ere gutxiago lortuta, 0,80 euro. Kudeaketa arloko txapeldunak oso onak dira baliabideak bilatzen ere, antza denez. Eta, hala eta guztiz ere, jatetxe batean ia 200 euroko menua afaltzera doazenean, angula eta guzti, diru publikoarekin ordaintzen dute.

Ustelkeria badago, ezin da ukatu, ziurrenik azaleratu dena baino gehiago. Baina gizarteak zigorgabetasunean eta alderdien zuzendaritzaren babesarekin aberasten diren politikarien berri duen bitartean, beste errealitate bat ezkutatzen da: legalitatean oinarrituta eta garrantzitsuagoa dena etikan oinarrituta aritzen diren alderdi eta politikariak daude.

Eta etikaz ari garenean ez dugu esan nahi ez lapurtzea bakarrik, diru publikoa, guztion dirua, ondo kudeatzeaz ari gara. Eta hori oso zabala da: legebiltzarkideek —gizartearen batez besteko soldata baino askoz ere gehiago jasotzen dutela— beren tabletak erostea; bidaietako dietak izan behar direnak izatea… Gai horiei buruzko bere iritzia plazaratu du EH Bilduk, eta aldaketak lortu ditu.

EH Bilduko kargudun publikook joera etikoa izateko konpromisoa sinatu dugu, politika egiteko beste modu batean sinisten dugulako, diru publikoa arduraz, eraginkortasunez eta gardentasunez kudeatu behar dela uste dugulako. Ustelkeria kiribil infinituan murgildurik, gizartearen konfiantza falta ulertzen dugu, baina EH Bilduko kargudunak eta EH Bildu osatzen dugun alderdietako kargudunak sekula ez dira ustelkeria kasuetan zikindu. Politikari guztiak ez dira ustelak, politikari guztiek ez dute bere poltsikoaren onuraren alde lan egiten, eta titularretan agertzen diren ustel horien kudeaketa eredua ez da dagoen bakarra. Politika egiteko eta diru publikoa kudeatzeko beste eredu bat dago, EH Bildukook erakusten ari garenez.

http://alternatiba.net/old-files/Barcina presa.jpg

Berriak

Alternatibak Jose Luis Bilbaoren gobernuari leporatu dio gizartearen haserreaz jabetzea eta bere publizitatean barregarri uztea

Alternatibako Bizkaiko bozeramaile Asier Vegak salatu du aste honetan Bizkaiko Foru Aldundiak aurkeztutako kanpaina publizitarioa iruzur fiskalari aurre egiteko, bere “eraginkortasuna eztabaidagarria” izan daitekeen arren. Kanpaina honen iragarkietan sexu eta adin desberdineko pertsonak pankarta baten atzean manifestatzen agertzen dira “Guri iruzurrik ez” lemapean. Pankartan STOP seinale bereizgarria -iruzurraren kontrakoa kasu honetan- ere ikusten da, “kaleetan geroz eta maizago egiten diren kaleratzeen, iruzur politikoaren, langileriaren eskubideen eta lanpostuen suntsiketa dakartzaten lan erreformen aplikazioen kontrako protesten leloen eta sinboloen jabe egiteko ahalegin batean”.

Vegaren hitzetan: “deitoragarria da instituzio publiko batek Bizkaiko herri klaseei bizkarra ematea dirudunen faborean gobernatzeko, herriaren suminduraren sinbologia usurpatzen den bitartean, barregarri uzteraino. Iraingarria da benetan Bilbao-Iruarrizaga bikoteak ezartzen dutenen tankerako politiken kontra kalean egunero erabiltzen diren lelo eta pankartak imitatzea”. Modu berean, iruzur fiskalaren kontrako publizitatea gaitzetsi du, Foru Ogasunak iaz antzemandako zenbatekoa %19an jaitsi zen bitartean.

Hau guztiarekin batera, alderdi ezkertiarreko bozeramaileak ondorengoa azpimarratu du: “PNVren eskuetan dagoen Aldundiaren politika fiskala oraindik ere larriagoa da iruzur legalizatua ahalbidetzen duelako, eta horren ondorioz, zerbitzu sozialak bermatuko dituen eta gizartea transformatzeko balioko duen bilketa eragozten duelako”. Gauzak horrela, eta publizitate honen “faltsutasunaren” adibide bat jarri nahian, iragarkian agertzen den aniztasun funtzionaleko kolektiboaren erabilera salatu du, gurpil aulkian dagoen mutiko baten bidez irudikatuta dagoena. Faltsukeriaz josita dago, Bizkaian laguntza pertsonalerako laguntza ekonomikoak “oso urriak direlako, bost onuradun inguru bakarrik daudela, Gipuzkoan 1.100 baino gehiago diren bitartean”.

Zoritxarrez, jarraitu du esaten, adibide gehiago dago: “Iragarkiak gizon baino emakume gehiago hautatu ditu pankartaren atzean jartzeko, baina BFAaren aurrekontua sakonki aztertzen badugu, berdintasun sailaren aurrekontua gastu totalaren %0,09an dela ikus dezakegu”. Adineko pertsonak ere agertzen dira, “gizarte osasun zentroetan murrizketak sufritzen ari dituztenak”.

Egoera hau dela eta, Alternatibatik Aldundiari eta Foru Ogasunari erantzukizuna exijitu diote, eta aldi berean, “gizartearen gehiengo bat iraintzen duen kanpaina hau erretiratzeko” eskatu dute; “kolektibo hauek dira Bilbao jaunak politika sozialetan aplikatutako murrizketak gehien sufritzen dituztenak, eta hauekiko elkartasunean kalera ateratzen direnen kontra ere egiten duelako”.

Berriak

Alternatiba | Ezkerra eraldatzearen erronka

X