Etiketa: Ekonomia

Urrea: “EAEren enbaxadek AHTaren euskal adarrak baino 1.000 aldiz gutxiago balio dute”

Alternatibako bozeramaile eta Euskal Herria Bilduko legebiltzarkide Diana Urreak Eusko Legebiltzarrean esandakoa Gorka Maneirok (UPyD) eginiko eskaeri erantzuten, honek EAEko enbaxadak ixteko eskatzeko mozioa egin baitu.

Gaur, UPyD-k aurrezki planaz mozorrotutako mozioa aurkezten digu, baina errealitatean espainiar ultranazionalismoaren erakusgarria baino ez da, estatu eredu frankistarako atzerakada demokratikoaren erakusgarria.

Maneiro jaunak bere interpelazioan enbaxadak mantentzeko gastatu diren urteroko bost milioiaz aritu da; esate baterako, Abiadura Handiko Trenaren euskal adarraren eraikuntzak baino mila bider gutxiago dena. Hala ere, UPyD-k ez du gastuaren gakora zuzentzen den beste aurrezte neurririk aurkezten, azaleko neurriak besterik ez ditu proposatzen haien ametsetako Espainia Handi eta Libre honetan euskal identitatea desegitera  bideratuta daudenak.

Lehenik eta behin, Eusko Jaurlaritzaren izatea aintzat hartzen duzun heinean, bere interesak EAEtik kanpo defendatzeko zilegitasuna aintzat hartu beharko zenuke ere, Auzitegi Konstituzionalak egiten duen bezalaxe. Eta zu, Maneiro jauna, eredu honekin bat ez bazatoz eta euskal lurraldeentzat eredu aurre konstituzionala zein aurre estatuarioa nahiago badituzu, behintzat, utzi iezaiozu itzulinguruka hitz egiteari eta argi esan. Eusko Jaurlaritzaren eta Eusko Legebiltzarraren desegitea eskatu eta zure parlamentari akta entregatu. Hau litzateke sare autonomiko maltzurraren kontra koherentziaz jokatzeko biderik egokiena, zuen esanetan, espainiarren baliabide guztiak xahutzen dituena.

Edozein kasutan, zuen intentzioa ordezkaritza antzuetan aurreztea bada, EAEn eta Nafarroan dauden Espainiako Gobernu Ordezkaritzen desagerpena eskatu. Eta eskatu Carlos Urquijo jaunari erretiratzea eta etxera joateko. Euskal instituzioek libreki eta demokratikoki hartzen dituzten erabakien zentsuratzaile izateari utzi diezaiola.

Eta atzerriko ordezkaritzetan diru gehiago behar baduzue, Espainiako armadak eta Estatuko Segurtasun Indarrek Euskal Herrian gehiegizko ordezkaritza dutela uste dugu. Euskal Herrian soberan ditugu Espainiako ejertzitoaren kuartel militarrak, estatuaren aurrekontuaren 6 milioi euro xurgatzen dituztenak. EAEn Guardia Zibilaren eta Polizia Nazionalaren 4.000 kideak soberan ditugu, eta hauek suposatzen duten gastu mardula ere bai.

Gure taldeak, EH Bildu, Eusko Jaurlaritzak atzerrian dituen ordezkaritzak mantentzea nahi du, eta hauek zabaldu ditzatela euskal herritarron interesen eta beharren arabera. Ordezkaritza hauek bizirautea nahi dugu Euskal Herriak bere enbaxada eta kontsulatu propioa izan arte; Madrilen zein Parisen euskal enbaxadorea izan arte, gure ondoko bi herrialdeekin adiskidetasun eta kooperazio loturak sendotuz.

Euskal Herriaren izena atzerriari begira solidaritate internazionalistaren sinonimo bihurtzea nahi dugu, beste herrialdeentzako eredu demokratikoa bihurtuz eta herri borroken erreferentea bilakatuz gizarte libreago eta duinago baten bilaketan. Dudarik gabe, Euskal Herria izena Espainia Markaren kontrakoa izatea nahi dugu, krisiaren eta kapitalaren munstroaz,  Banco Santander, Inditex, Telefonica edo Gas Natural Fenosa, babestuta dagoena. Eta aldi berean, Francoren nahierara hautatutako monarkiaz ere babestuta dagoena.

Sentitzen dugu, Maneiro jauna, baina hori ez da gure irudia, hori ez da gure herriaren irudia.

Berriak

Udal erreforma, gutun-azalak eta bestelako zentzugabekeriak

Luis Maria Salgado eta Begoña Vesga – Alternatiba

Barcenas kasuaren une gorenean, Espainiako gobernua harrotu egiten da, Alderdi Popularraren esanetan, udal administrazioa arrazionalizatzea, txikitzea eta bertan bizirauten duten kargu publikoen kopurua murriztea xede duen lege proiektu bat aurkezteagatik. Halabeharrezko arrazionalizatzea arrazoizkoa dirudi; administrazioen murrizketa, ados egon gabe ere, ulergarria da, publikoaren alde egin beharrean pribatizazioa sustatzen duen alderdi batengan; eta buruzagien soldatak murrizteko aukerak, justuak bekatariengandik bereizten ez dituen munstroak, klase politiko deiturikoak eragiten dituen etengabeko murrizketak jasan behar izaten dituen herriari gozarazten dio.

PPren ustetan, zentzuzkoena da Espainiako legeak udalei bere eskumenak zeintzuk diren zehaztea eta zeintzuk eskuordetze bidez gauzatu ditzakeenak. Beste guztia, udalaren kolore politikoa edota egoera ekonomikoa edozein delarik, debekatuta dago. Horregatik udal entitateek ezin izango diote herritarrei bere eskumenetik kanpo dauden zerbitzurik eskaini, ezta horretarako baliabideak izanda ere, ezta administrazio eskudunek, murrizketengatik jota daudenak, eskaini nahi ez dituztenean ere. Horregatik udal ikuskatzaileak, Espainiako gobernuaren ordezkari txikietan bihurtutakoak, legea indarrean egon orduko esan behar izango dute zeintzuk diren modu desegokian erabiltzen diren eskumenak, eta zerbitzu horiek bertan behera geldituko dira. Bat-bateko erregulazioa indartzeko, PPren proiektuak Udalen eskumenen zerrenda murriztu du, orain arte modu zehatzean onartzen ziren batzuk ezabatuz. Ingurumenean ezer ez, zaborrak eta lorategiak ez ezik; etxebizitzan ezer egiterik ez; hezkuntzan zero; ezta gizarte zerbitzuetan ere, soilik -eta bakarrik azken kasu honetan- Autonomia Erkidegoak delegatzekotan eta udalerriak onartzen badu, eta beti ere lehenaren kontrolpean.

Eskumenak murriztu ostean, lege proiektuak udalek eskaini beharreko oinarrizko zerbitzuak gutxitzen ditu. Hilerriak, argiztapena, zaborrak, ura, estolderia, errolda, parkeak eta liburutegiak bezalako zerbitzuak, udala defizitarioa denean pribatizatu ahal izango dira eta beste zerbitzu guztiak -PPren ustez oinarrizkoak ez direnak-  itxi egingo dira udalerriak ez baditu Madriletik agindutako aurrekontu egonkortasuneko baldintzak betetzen.

Adi egon daitezela egonkortasun sakro-santuaren aurka ezer esaten duten 5.000 biztanle baino gutxiagoko udalerriak; indargabe utzi eta ondokoari anexionatuak izango direlako. Izan ere, alderdi popularrarentzat -akaso konplexuren batengatik- tamainak badu garrantzia eta horregatik txikia dena deuseztatzen dute patologikoki; herritarren parte-hartzeari legeak egindako erreferentzia txikiak ezabatzen dituzte; Udalbatza Irekia -100 biztanle baino gutxiago dituzten udaletan indarrean dagoen gobernu eredu asanbladaduna- deuseztatzen dute eta udalez-peko erakundeak desagertzea errazten du. Izan ere, kudeaketa eta partaidetza espazio hauek, herritarrengandik hurbilegi daude, autoritate printzipioa ahaztarazi eta herritarrak demokraziara gaizki ohitu ditzake.

Ez pentsa erdikoak salbu daudenik; 20.000 biztanletik beherako herrietan ere arriskua egongo baita; ez disolbatzeko, baizik eta lapurtuak izateko. Izan ere, aldundiek udal hauei zerbitzuen kudeaketa kendu ahal izango die ditxosozko aurrekontuen egonkortasuna betetzen ez denean, edo eskala-ekonomiari ganorazko arreta ematen ez zaionean edo zerbitzuen kostua Espainiako Gobernuak ezarritakoa baino handiagoa denean. Bestela esanda; sudur-puntan jartzen zaienean. Arraroa dirudi liberala izateaz harrotzen den gobernuak zerbitzu baten prezioa ezartzea. Baina kontuan hartuta kopuru hori zehaztuko duen adierazleetako bat deuseztatzeko asmoa dutela, hitzarmen kolektiboak alegia, guztiak zentzua hartzen du. Era berean, zentzua dauka kontuak esleitzerakoan eskala-ekonomiak duen lehentasuna, zeren horren eskala handian, zerbitzuen hornitzaile bakarrak enpresa talde handiak izan daitezke, enpresa txikiak aukerarik gabe utziz. Nondik zetozen Barcenasen gutun-azal ezagunak ustez betetzen zituzten ustezko dohaintzak?

Bestalde, Rajoy eta bere lagunak, merkatu handi eta libre baten alde, urrats desarautzaile berri bat egin dute. Hala, jarduera ekonomiko bati ekiteko, udalaren baimena ez da beharrezkoa izango, lege sektorial batek hala zehazten ez badu. Arreta deitzen du jarduera ekonomikoa liberalizatzen den bakarra izatea, beste guztiarekin -aisialdi, espiritu edo elkarte alorrean- udalek zorrotz jokatzeko baimena izango dutelarik.   

Tira, beti gelditzen zaigu zinegotzien soldaten murrizketaren kontsolamendua. Tamalez, soldata bazterketa batez ere oposizioko alderdiei eragingo die, eta txikienei bereziki. Udal langabetuen banaketa sistema proportzional bat zehaztu zezaketen, edo are gehiago, arreta berdina jarri zezaketen soldatapeko zinegotziak baino kopuru handiagoan dauden gobernu taldeen aholkulariekin. Adibidez, 240.000 biztanleko udalerri batean, soldatapeko 18 zinegotzirekin batera, 27 behin-behineko kargu egongo lirateke, erreformaren hutsuneei esker, guztiak aholkulariak izan zitekeelarik.  

Proiektuaren letra txikiaren azken kontsolamenduaren ostean, gelditzen zaigun gauza bakarra da gure buruei galdetzea aldundiek Hego Euskal Herriko udalerriak oligopolioaren laguna den olatu antidemokratiko honetatik babestuko ote dituzten. Erantzuna arriskutsua da, baina kontuan hartuta Espainiako gobernuak ezarritako eta merkatuen zerbitzura jarritako salbuespen-egoera, UPN-PP ententea eta Rajoy eta Urkulluren arteko elkar-ulertzea, ez litzake harritzekoa foru izaera salbatuko duen eta aldi berean erreformaren oinarrian dagoen publikoa den guztiaren suntsipena bermatuko duen trikimailuren bat asmatzea.

Tamalgarria. Behin arrazionalizatzen eta murrizten hasita, norbaiti monarkia deuseztatzea bururatu ahal zitzaion, edo hainbat polizia Ebroaren bestaldera itzultzea, bankuei errutasun-presuntzioa ezartzea, senatua ixtea eta bide batez, pertsonen eskubideak babesten ez dituen eta zorigaiztoko nazio gutxituen nahiari erantzunik ematen ez dion Estatu hau desegitea… hasiera bikaina lirateke.

Berriak

Lan erreformaren ondorioak salatzeko kalera atera da gara Bilboko Modas Marialuzeko langileekin batera

Modas Marialuz saltokiaren aurrean kontzentrazioa egin dute gaur eguerdian EHBilduko 30 bat lagunek, tartean Alternatibako Oskar Matute, Ana Etxarte eta Asier Vegak. Langileekin batera eta elurpean salatu dute langileak lan erreforma baliatuta kaleratu nahi dituztela, kaleratzi ordainik ordaindu gabe ere. Matutek berak eta Sortuko Maribi Ugarteburuk hitz egin dute EHBilduren izenean, eta Maribi Luquek langileen ordezkari gisa.

Krisia gogor ari da kolpatzen Euskal Herria. Krisiaren aitzakiapean, patronalak eta hainbat enpresarik kaleratzeak biderkatu eta lanpostuak suntsitzen ari dira.  Espainiar gobernuak onartutako erreformak eta neurri gogorrak baliatzen dituzte horretarako eta horrek ondorio latzak ditu gizartean eta gure ekonomian.

Rajoyren lan erreformarekin, enplegua sortu ordez, langabezia tasak biderkatu egin dira Euskal Herrian, eta sektore guztiak eta kontratazio modalitate ezberdinak kaltetu ditu. Horrela, hamarkadetan lortutako lan eskubideak eta hobekuntzak ezabatzen ari dira eta prekarietateari ateak ireki zaizkio parez-pare.

Enpresa handietako kaleratze masiboei buruz hitz egiten duten titular handiez harago, Bizkaian badira oharkabean pasatzen diren kaleratze asko.

Kaleratze hauek ez dira ohiko hedabideetako albisteetan agertzen, baina pertsona asko ari dira geratzen langabezian kaleratze horien ondorioz, eta mota honetako lanpostu gehiegi deuseztatu dira dagoeneko, lan erreformak eskaintzen dituen erraztasunen erruz. Hau da: langileak inolako kosturik gabe kaleratzeko aukera ari dira baliatzen gaur hemen dugun gisako hainbat tailer eta enpresa ertainetan.

EH Bilduk elkartasuna adierazi nahi die gaur Modas Marialuzeko langileei, haien lanpostuen defentsan modu eredugarrian jokatzen ari direlako.

Azpimarratu nahi dugu, baita ere, Lan Erreforma honen ondorio latzak apaltzeko hainbat neurri hartzea posible dela. Erakunde publikoen kontratazioetan klausula sozialak bermatzea posible da eta posible da baita ere Herrialdeetako Lan Hitzarmenen defentsa egitea. Batzuk, ordea, nahiago dute Madriletik datozen politika antisozialei bide ematea eta lege injustu horiek aplikatzera mugatzen dira.

EH Bilduk, ordea, gobernatzen duen erakundeetan ari da dagoeneko neurriok bultzatzen. Era berean, enpleguaren eta lanaren banaketaren alde jarraituko dugu lanean, eta langileekin batera egongo gara lanpostuak defendatzen.

EH Bildutik oso argi daukagu egoera honen irtenbidea eredu sozial eta ekonomikoaren aldaketan dagoela eta herri honen subiranotasunerantz urratsak ematea dela gakoa, lan harremanetarako marko propioa izan dezagun.

Horregatik, aukera hau baliatu nahi dugu euskal herritar guztiei dei egiteko datorren larunbatean, martxoak 16, Bilbon egingo den manifestazioan parte hartzera. Eredu sozial eta ekonomiko berri baten alde, enpleguaren defentsan, EH Bildu kalean izango da. 17:30etan, Bihotz Sakratuaren plazan ikusiko dugu elkar.

https://fbcdn-sphotos-g-a.akamaihd.net/hphotos-ak-ash3/892698_619283818088938_1472824220_o.jpg

https://fbcdn-sphotos-g-a.akamaihd.net/hphotos-ak-frc3/894846_619283608088959_1932649652_o.jpg

https://fbcdn-sphotos-b-a.akamaihd.net/hphotos-ak-prn1/892296_619283474755639_396928830_o.jpg

https://fbcdn-sphotos-c-a.akamaihd.net/hphotos-ak-frc1/887503_619283488088971_235733170_o.jpg

https://fbcdn-sphotos-e-a.akamaihd.net/hphotos-ak-ash3/885693_619283588088961_59856238_o.jpg

https://fbcdn-sphotos-h-a.akamaihd.net/hphotos-ak-prn1/135179_619283698088950_1124515319_o.jpg

Berriak

Nafarroako herritarrok ez ditugu barkamen eskutitzak nahi, dimisio eskutitzak baizik

Larunbatean milaka pertsona bildu ginen Iruñean eta Bilbon, enpleguaren aldeko manifestazioetan. EH Bilduko hainbat kidek hartu zuten parte mobilizazioan, Bakartxo Ruiz Bilduko parlamentaria Iruñeakoan izan zen; prentsari egindako adierazpenetan, Ruizek CANeko dieten eskandaluaren inguruan hitz egin zuen.

“Nafarroako jendartea haserre dago egun hauetan Nafarroako Kutxaren inguruan gertatu dena jakin duenean”, adierazi zuen Ruizek, “gerrikoa estutu behar genuela esaten duten berberek, dirutza lortu dute nafar guztien bizkarrez”.

Bilduko parlamentariaren esanetan, dirua nola lortzen duten ikustea “lotsagarria eta eskandalagarria” da, baina bere ustez “are lotsagarriagoak” izan dira Yolanda Barcina, Miguel Sanz, Enrique Maya edo Roberto Jimenezek beraien burua justifikatzeko egin dituzten adierazpenak; “jende askorentzat adierazpen mingarriak izan dira, nafar gehienok irainduak sentitu garelako”.

Barcinak publikatutako barkamen eskutitzari erreferentzia eginez, Ruizek adierazi du Nafarroako jendarteak behar duena ez dela barkamen eskutitz bat, oraindik kargu publiko direnen dimisio eskutitza baizik. “Hori da egin behar dutena, erantzukizun politikoak onartu, karguak bertan behera utzi eta hauteskundeak deitu, herritarrok erabaki dezagun gobernu berria”.

Bilduko parlamentariaren ustez Nafarroak politika egiteko beste era bat behar du, orain arte UPNk eta PSNk ezarri duten sistemaren “ondorio larriak” ikusten ari garelako; “jendartearen gehiengoarentzat langabezia, EREak, langileen eskubideak murriztu… eta gutxi batzuk, bitartean, aberastu dira beraien kargu politikoaz baliatuz”, salatu du.

http://alternatiba.net/old-files/483851_617289831621670_22706532_n.jpg

Berriak

Alternatibak terrorismo finantzarioaren heriotza berria salatu du eta kaleak hartzera deitu du etxegabetzeen amaiera exijitzeko

Alternatiba Bizkaiko bozeramaile Asier Vegak salatu du “terrorismo finantzariak eragindako heriotza berria”, Bilboko gizon batek bere buruaz beste egitea erabaki duenean etxegabetu behar zutenean alokairuari aurre egiterik ezin zuelako: “Zeren zain gaude desjabetze guztiak geldiarazteko? Zer gertatu behar da larrialdietarako laguntza sozialek bere funtzioa bete dezatela eta pertsona batek ikusten duen irtenbide bakarra heriotza izateari uzteko?”

Ildo beretik, alderdi ezkertiarreko bozeramaileak salatu du “ez PNVren esku dauden Bilboko Udalak, Bizkaiko Foru Aldundiak eta Eusko Jaurlaritzak, ezta PPren Espainiako Gobernuak ez dutela etxegabetzeen afera konpontzeko benetako asmorik. Kritikatu ditu, halaber, “bankuek eta gobernuek erabiltzen dituzten eufemismoak hondamendi gizatiarrak aipatzean, sistema kapitalistak eraildako biktimez ari garenean, eta berau babesten duen estatua eskuak odoleztatuak ditu”.

Azkenik, Vegak mobilizazioekin jarraitzeko beharra azpimarratu du, bankuei zein gobernuei desjabetzeen amaiera kalean exijitzeko, horregatik, bere taldearen atxikimendua adierazi dio terrorismo finantzarioa salatzeko egiten diren elkarretaratze guztiei.

Berriak

Alternatibak ustelkeriaren aurkako protestetan parte hartzera deitu du

Alternatibaren Bilboko Asanbladako bozeramaile Iagoba Itxasok mugimendu sozial, sindikal edota politiko orok egunotan argitara emandako ustelkeria kasu larri guztiak salatzeko deitzen dituzten protesta guztiekin bat egitera deitu du, “PP eta Mariano Raxoiren gobernua tartean sartuta daudela frogatutako kasuak, egunero murrizketak sufritzen dituzten herritarren haserrea areagotzen dituztenak, boteretsuenen alde bakarrik gobernatzen duen buruzagien kasta izateaz gain, haien jardunean aberastu eta inolako konplexurik gabe pribilegioaz gozatzen dutenak modu ez zilegi, eta askotan ere, legeztutako moduetan”.  

Ildo honetatik, alderdi ezkertiarreko bozeramaileak “tamalez ohikoak” diren hainbat kasu salatu ditu, “kargu politikoetan egondako batzuentzat dauden ate birakariak, bere garaian administrazioen laguntza eskuratu zuten enpresen lehendakaritzetan edota administrazio kontseiluetan eserlekua ematen diena; herritarren diruaren lepotik angulak jateari normala deritzon agintari ohiena edota alderdi politiko jakin batzuek jasotzen dituzten dohaintza anonimo eskandalagarriak”. Hala, Itxasok nabarmendu ditu duela gutxi argitara eman diren datuak PPk eta PNVk 1993 eta 2011 urte bitartean jasotako dohaintzen gainean, hurrenez hurren 28 eta 18 milioi euro jaso zituztela: “eta esan beharra dago PNV dela, alde nabarmenaz, igorle ezagunik gabe diru gehien jaso duen alderdia bere ekintza eremuko biztanleria aintzat hartuta”.

Egoera honen aurrean, Alternatibatik ustelkeriaren aurkako protesta guztietan parte hartzeko deia berretsi dute, gaur arratsaldean, 19:00etatik aurrera Bilbon herritar talde batek antolatu duena kasu, Moyua plazan izango da, Espainiako gobernuaren ordezkaritzaren eraikinaren aurrean, “Estatua ustelduta dago, bagoaz” lemapean.

Berriak

Mas, Urkullu, Raxoi eta Borboidarren trena

Aitor Miguel Quintana – Alternatiba Araba

Orain dela gutxi, Espainiako Erresumako egunkarietako azalak morboz beteriko argazkiarekin bete ziren Mariano Raxoi, Sustapen ministroa, Borboidarren oinordekoa eta Kataluniako lehendakaria Artur Mas elkartzen zituena Madril-Paris Abiadura Handiko trenbidearen azken zatiaren inaugurazioan.

Bazen ere tentsioz beteriko argazkia, Kataluniako subiranotasunaren gatazka biziaren ikuspuntutik begiratuz gero. Kataluniako subiranistak eta herritarren zein haien lurraldeen askatasunaren gainetik estatuaren erabakiak ezartzen dituztenak aurrez aurre.

Argazki honek sorrarazi zuen norgehiagoka sentsazioa, seguru aski, ez zen guztiek eta neurri berean partekatua izan. Subiranotasunari beste ikuspuntu batetik begiratzen diogunok, erosotasunez bidaiatzen zuten lau pertsona ikusten genituen. Lau buruzagi, banatzen dituzten ustezko gerra mediatikoen gainetik, komunean dutenarengatik askoz ere batuagoak ziruditenak.  Horrexegatik, haien arteko identitate desberdintasunak alde batera utzita, ezin gusturago ageri ziren Abiadura Handian elkarrekin bidaiatzen.

Batzuentzat subiranotasun nazionala epe laburrerako lanabesa baino ez da, ez bada herri guztien subiranotasun osoa lortzeko erabiltzen. Subiranotasun nazionala gutxirako balio digu betiko eredu sozioekonomikoa berregiteko erabiltzen badugu.

Abiadura Handian eta zubien bitartez herrien oso gainetik bidaiatzen duten bitartean ez dugu Raxoi eta Masen arteko funtsezko desberdintasunik ikusten. Ez dugu desberdintasunik ikusten, biek egoeraren araberako krisialdia bizi dugula esaten dutelako, krisi sistematikoa bizi dugula ukatuz. Gainera, biek murrizketetan eta makro-proiektuetan oinarritutako bide berdinak erabiltzen dituzte, haien ospea handitzeko eta gutxi batzuen onuraren alde.

Abiadura Handiko Trena bezalako proiektuak aldez aurretik higikortasun ikerketak egin gabe eta beren eragin ekonomikoa aztertu gabe sustatu izan dira. Ezta ingurumenean eragina duten ekintzetan gidatu beharreko ardura printzipioen arabera egin ere, herrialdeen baliabide ekonomikoak hamarkada luzeetan galzorian ipintzen dituztenak.

Mariano, Mas, Urkullu eta enparauak dira eredu sozioekonomiko berdinaren buruzagiak, AHTaren, Supersurraren, errausteko makro labeen eta frackingaren gainean eraikitzen dutena. Primitibo izatea leporatu digute garapen modu honen kontra egin dugunoi. Oraindik ere, gizajale deitzen digute Elikadura Burujabetzaz ari garenean. Baina kontua da gaur egun, eta 20 urteko ustiapenaren ostean, AHTren kontuak ez zaizkiola ateratzen Espainiako estatuari. Ezta Bizkaiari Supersurrarekin. Arabako akuiferoak ere kutsatu behar al ditugu Frackinga ez dela bidea frogatzeko?

Eredu desegoki eta zibilizazio gaixotu batek bakarrik zuzentzen ditu bere baliabide gehienak arrakasta bermerik gabeko proiektuetara, izaera alternatiboa duten aitzakiarekin, osasuna eta hezkuntza bezalako ezinbesteko oinarri sozialak deseginez.

Subiranotasun nazionala da, hartara, desberdintzen gaituen eta berezko zentzua duen tresna bakarra, internazionalista eta solidarioa, herrialdeen subiranotasun osorako trantsizioa bermatuko duen ereduaren aldaketa. 

http://alternatiba.net/old-files/El-Principe-Felipe–Mariano-Rajoy–Artur-Mas-y-Ana-Pastor-en-el-viaje-Barcelona-Girona.jpg

Berriak

Alternatibak Urkulluri exijitu dio AHT ordaintzeari utz diezaiola oinarrizko eskubide sozialak bermatu ahal izateko

Alternatibako bozeramaile Oskar Matutek Iñigo Urkulluri exijitu dio gaur lehendakariak berak dioen bezala “larrialdiko egoeraren aurrean bagaude, Abiadura Handiko Trenerako diru publikoa bideratzeari utz diezaiola, EAEko biztanleen oinarrizko eskubide eta zerbitzu sozialak blindatu ahal izateko”. Eskaera egin du Ana Oregik sailburuak Ana Pastor Espainiako Sustapen ministroarekin AHTari buruz hitz egiteko gaur egin behar duten bileraren harira.

Bilera honen aurrean, alderdi ezkertiarreko bozeramaileak Urkulluren gobernuko Ingurumen eta Lurralde Politikako arduradun Oregiri eskatu dio “mahai gainean jarritako datu guztiak euskal gizartearekin partekatzeko: epeak, azpiegitura honekiko dituzten konpromiso zein asmoak, Burgos eta Gasteiz arteko ibilbidearen bilakaera eta gainerakoak”.

Bestaldetik, Matutek salatu du Eusko Jaurlaritzak hurrengo aurrekontuetan 1.200 milioi euroko murrizketak iragarri arren AHTerako finantziazioaren eutsi diola, gerora berreskuratu daitekeen aurrerapen gisa izan arren, “bide okerretik doazela berrestetik haratago doa, izan ere, Araba, Bizkai eta Gipuzkoako herritarren bizi baldintzek okerrera egingo dutela baieztatu ere egiten dute, 350 milioi euro bideratzen baitituzte inolako errentagarritasun sozialik eta bideragarritasun bermerik gabeko azpiegitura baterako”.

Azkenik, Alternatibatik nabarmendu egin nahi izan dute “une honetan obren exekuzioek enpresei baino ez dietela mesede egiten, euskal gizartean pobrezia zabaltzen den bitartean; eta AHT 2018rako martxan egoteak, horrekiko zalantza handiak dauden arren, zertan hobetuko du langabezian eta eskubide sozialik gabe dauden herritarren bizitza?” Horrexegatik, Matutek galdegin dio lehendakariari aitor dezala “AHT beste garai bateko jokabide megalomanoei erantzuten dien proiektua dela” eta eskatu dio “pertsonen bizitza duinak ardatz hartuta gobernatzeko, eta ez porlana eta ingurumenaren suntsipenerako”.

Berriak

Zerga iruzurra eta legezko iruzurra

Asier Vega – Bizkaiko EHBilduko batzarkidea

“Bizkaian magnate gutxi dago”. Hauxe izan zen PNVk erabilitako aitzakia 2008an Ondarea Zerga ezabatzeko. Gezurra zen bere garaian eta gezurra da gaur egun ere. Orduan zein gaur egunean, Bizkaiko magnateek, izan badirela eta hain urriak ez direnak, ordaindu beharrekoa baino zerga gutxiago ordaintzen dute, horretarako aukera eman zaielako oraindik ere.

PNVk fiskalitateaz diharduenean eta mundu guztia kontent mantentzeko asmoz, gauza bat esan eta aldi berean, kontrakoa baieztatzeko gaitasun ikaragarria dauka. Hori dela eta, harrokeriaz amestu eta esan dezake egun batean Ondare Zergari dagokionean Bilduri ezkerretik aurrea hartu diola eta, handik gutxira, errenta altuenei PFEZa %45tik %46ra igotzeari uko egiten dio bildu beharreko diru kopurua urriegia izango dela argudiatuz. Antza, Bilbao jaunarentzat diru xehea da hiru milioi euroko bilketa.

Diskurtso bikoitz honen aurrean, askoz argigarriagoa deritzogu Ahaldun Nagusiaren alderdiko buruaren azalpenei kasu egiteari; Iñigo Urkulluk oso argi utzi zuen: “gehiago irabazten dutenek gehiago ordaindu behar izatea demagogia hutsa da”. Argudio errepikakor eta, beraz, intentzioen salatari izanik, jakin badakigu ez zela lapsus-ik izan bere hitzetan.

Bizkaiko Aldundiaren 2013ko aurrekontua aztertzean agerian gelditzen den lehenengo gauza, pentsamendu neoliberal honek dakartzan diru sarrera gabezia da, beti ere, enpresaburu eta dirudunen mesederako. Honen adibiderik onena, Aldundiak aurten enpresarioei barkatuko dizkien 207 milioi euroak ditugu, gehienbat eraginik gabeko kenkari eta diru-laguntza bidegabeetan oinarritutakoak.

Aurrekontuek islatzen duen beste adibide bat, zerga ezkutuak Ondare Zergarengan duen eragina da. Bizkaiko Ogasunak egun indargabetuta dagoen eta soilik 2011 eta 2012 bitartean indarrean egon zen zerga honen ondorioa kalkulatu du. Aberatsenei 43 milioi euro barkatu dizkie, zergaren izaera injustua eta atzerakoia agerian utziz.

PNVren aurreko urteetako zerga erreformak desegitea beharrezkoa da, horietako bakoitzean Bizkaiko ogasunak dirua biltzeko ahalmena galdu duelako. Zerbitzu sozialak bermatu eta gizartea eraldatzeko balioko digun bilketa nahikoa izateko Foru-Arauak aldatu beharra dago. Ez dezagun ahaztu fiskalitateak bide oso desberdinetatik arazo berdinak jorratzeko ahalmena daukala. Etxebizitza alorrean adibidez, zerga politikak bigarren etxebizitza erosi nahi dutenen mesedetara egin daitezke, aspaldi egiten zen bezala, edo ostera, hutsik dauden etxebizitzak Ondasun Higiezinen Zerga igota alokairura bideratzeko erabili daitezke.

Gehiago irabazten edo gehien dutenei presio fiskala areagotzea ez dago PNVren lehentasunen artean. Horren ordez, Iruarrizaga-Bilbao tandemak bi ildoetako zergak eskaintzen dizkigu. Ildo batetik, soldatapeko arruntak doaz, zergak automatikoki ordaintzen dituztenak; beste ildotik, aldiz, zergadun bereziak daude, Ogasunari gutxiago ordaintzeko moduen artean kartara aukeratu dezaketenak: aurrezki errentak %20an edo PFEZan elite mailako kirolarientzako errenta irregularrak, enpresetako mozkinak kalkulatzeko modua, kenkari kopuru izugarriak, Sozietate Zergaren gaineko erregimen bereziak edota zerga ezkutua edota enpresen Ondarearen Zergaren gaineko aberastasuna ezkutatzea. Iruzur fiskalari aurrea egitea bezain garrantzitsua da legezko iruzur honekin bukatzea. Eta egitekotan, noski, magnateren bat haserretuko da…

Berriak

Alternatiba | Ezkerra eraldatzearen erronka

X