Etiketa: Eskubide zibil eta politikoak

EAJ eta PSEk herritarren ekimenei ezarritako betoa salatu du EH Bilduk

EH Bilduko Udal Taldeak EAJ eta PSEk Uribarriko Gure Etxea bizilagun elkarteari ezarritako betoa salatu du. Elkarte horrek ekimen bat aurkeztu du urriko Udalbatzak jorratu dezan. Gobernua osatzen duten alderdi biek bidea eten diote herritarren ekimen horri.

Erabaki harrigarria kontuan izanda ezezkoa beste ekimen bat onartu ostean gertatu baita. Izan ere, Iradokizun eta Erreklamazioen Batzordeak aho batez onartu du beste ekimen bat. Hain zuzen ere, Kaleratzerik Ez! desjabetzeen aurkako plataformak aurkeztutakoa.

Alba Fatuarte Alternatibako kide eta EH Bilduko zinegotziak uste du EAJ eta PSEk “batean kale, bestean bale” jarrerari eusten diotela. “Beto honek erakusten du gobernuaren hitzaren balio eza. Aurreko ostiralean parte hartzeari buruz esandako guztia ezerezean geratu da. Horrelako jarrerarekin EAJk eta PSEk herritarren parte hartzea mespresatzen dutela erakutsi dute”.

EH Bilduk berriz ere argi uzten du herritarrek egindako proposamen guztiak Udalbatzan eztabaidatuak eta bozkatuak izan behar direla, inolako salbuespenik gabe.

Berriak

Arramendi kaskoan Aitzoli galdezka

Joseba Barriola – Alternatiba

Iluna zegoen oraindik, Arramendiko kaskora igo nintzenean. Zeruko ertz batean “Hiru Erregeen” konstelazioa, beste ertzean “Hartza Handia”-rena. Bien artean bost puntakoa. Eta ehunaka izarren tartean, distiratsu, Ilargi txikitxoa eta Artizarra. Aiako Harria ilun, Jaizkibel aldean Papelerak hedatutako ke zuriaz egindako xingola herriko gauargiz argitua. Aitzolekin elkarrizketa enpatiko bat egitea bururatu zitzaidan. Enpatikoa esanez, bere gogoaren muinarekin lotura egiten saiatzea esan nahi dut. Nik egiten nizkion galderak eta bere gogo enpatikoak erantzun. Hauxe da gertatu zena:

Kaixo Aitzol. Nola zaude?

Ni zigortua nago. Preso nago. Eta gaixotasun larri batek harrapatua nago. Nagoen egoeran batzuetan heriotzaren beldur nago. Beldur daude ere kartzeletako agintariak. Izan ere, preso bat jarri dute nirekin zelda berean ni zelatatzeko. Ez dute funtzionario bat jarri, preso bat. Ez dute nire lagun presoren bat jarri, preso bat baizik. Baditut preso lagunak eta baita medizina eta psikologia ikasten ari direnak, bainan ez dute horiek nire ondoan jarri. Zergatik daude beldur? Segur aski konplikatu xamar egingo zitzaielako, hainbeste urtetan kartzelan egondako preso gaixo larri bat hiltzen bazaie. Egon, bada, holaxe nago. Gaixotasunarekin jokoan, bizitza duin baten aldera eraman nahian egoera.

Zergatik zaude horrela?

Erabaki bat hartu nuen gazteago nintzenean, ETAkide izateko erabakia. Espainiako Gobernuak, bere aldetik, erabaki zuen ETArekin ezin zela negoziatu ezer eta ETAko guztiak preso, atzerriratu edo hilak egon behar ginela. Eta harrapatu ninduten. Bainan ez da arrazoi bakarra. Ni baino askoz ere gaixotasun suabeagoak izan duten beste preso batzuk (Tejero edo Galindo adibidez), borroka armatua egiteagatik kondenatuak, aspaldian daude libre. Aldiz, niri presoaldi askoz luzeagoa eginarazi didate, eta gaixotasun askozaz ere larriagoa izanda ez naute askatzen. Bainan bada beste arrazoi bat. Espainiako justizia guztiz faltsua da. Esaten dute bakeagatik hartu gaituztela preso, bainan gerrak antolatu eta ordaindu duten presidenteak (Felipe Gonzalez, Aznar, Zapatero, Rajoy) libre daude eta ohore eta soldata handiekin bizi dira. Esaten dute borroka armatua ezin dela inongo helburu politikogatik ez praktikatu eta ez justifikatu, bainan beraiek gerra armatua (Jugoslavia, Irak, Afganistan…), eta kolpe militarrak (2002ko Chavez-en kontrakoa, Aznarrek eragindakoa eta Zapaterok urte batzuk geroago babestua) eragiten dute helburu politikoak eta ekonomikoak lortzearren. Espainiako justizia faltsua da eta hipokrita. Ez da justizia, baizik eta boteredunen interesen araberako justizia. Horri deitzen diote etika sakro-santua.

Zu, Aitzol, norbait zara. Preso dagoen norbait. Gaixotasunarekin hil ala biziko jokoan dagoen norbait. Arrazoi batzugatik egoera batean dagoen norbait zara. Hauxe da bada galdera: Nor zara zu?

Nire bizialdia bukatutakoan bakarrik esan nezake nor naizen. Bitartean, erantzun probisionala baizik ezin dut eman. Momentu honetan nor naizen, alegia. Eta esango dizut, pentsatzen jarrita, erabaki askoren emaitza naizela.

Lehenik nire aurrekoen erabakien, eta guztiz bereziki nire gurasoen erabakiaren emaitza naiz. Beraiek erabaki zuten ni mundura ekartzea. Ez zekiten zenbat poza eta zenbat sufrimendu etorriko ziren erabaki haren ondoren, bainan erabaki zuten. Mundura ekarri, zaindu, lagundu, nire ondoan egon beti, unerik gogorrenetan ere. Aitaren patxada maitekorra, amaren negar bizigarria. Hori da gurasoei eskertzen diedanaren muina. Ni naiz beraien erabakiaren emaitza bizia.

Gainera, nire bizitzan hartu ditudan erabakien emaitza naiz. Eta nagoen egoerarekin lotura zuzena duten bi erabaki berezien emaitza. Esan dut lehenago gazteago nintzenean ETAkide izateko erabakia hartu nuela. Erabaki zaila, zalantza asko gainditu ondoren hartua, erabaki neurri batean mingotsa ere, bainan adorez eta konbentzimenduz hartua. Gogo batek bultzatu nindun urratsa egitera: gure herriaren eta gure herriko jende bakoitza eta guztiaren askatasunaren alde egitea. Eta gogo hari eransten badiozu ezarrita zegoen sistema konstituzionalarekin askatasunerako ate guztiak itxiak ikusten nituela, ulertzekoa da gogoak hartu zuen borroka modua. Modua eztabaidagarria izan daiteke. Guk beti egon gara eztabaidan: Ondo analizatu ote genuen egoera eta gure ekintzen ondorioak. Hartutako bidea egokia ote zen edo ez, askatasunera iristeko. Egindako gauzen artean ondo eginak edo gaizki eginak egon ote ziren. Bide horretan gehiegi luzatu ote ginen edo ez. Eragindako sufrimendua (gure artean eta gure artekoak ez zirenen artean) merezi ote zuen. Hori dena eztabaidatua izan da, haserreak ere piztu dira, zatiketak, tentsioak. Eztabaidatu daiteke eta ari gara. Hortik ere ikasi dezakegu dugun gogoa (herritarren bizitza duina eta askea) indartu dadin.

Bigarren erabakia, berriz, amankomunean hartu duguna izan da. Borroka modua uztea, askatasun gogoari arnas eta indar gehiago emango diola ustetan. Berriro ere, geroak argituko digu, erabaki egokia izan den ala ez. Bainan, momentu honetan, eta argudio serioekin, horretan gaude eta nago. Hau izan da beste erabaki garrantzitsu bat. Eta aldaketa honen ondoren, hemen nago preso. Egunero erabakitzen dut bizitzari baietz esatea, eta bizitzari zukua ateratzea, zuku gozagarria, adimentsua niretzako eta nire herriko jende guztiarentzat. Aurrerago esanen dizut nolatan mugitzen naizen, zer ari naizen ikasten ahalegin, batzuetan gogor, batzuetan etsipenetik gertu, baina beti, jasotzen dudan maitasun, laguntasun, babes eta animoak eskertuz eta nire alea jarriz, ahalegin saiatu honetan.

Eta esan dezaket nire bizitzan hartutako erabaki guztien emaitza naizela, eta nire nor izatean aipaturiko bi erabaki horiek eragin berezia izan dutela, eta nire egoerarekin guztiz lotuak daudela. Guzti horren emaitza naizela ni. Erretorikoa badirudi ere, esango nuke bizitzeko eta bizitza aske izateko gogoak bultzaturiko erabakien emaitza naizela.

Zer eskatzen diozu herriari?

Hasteko esan nahi dizut ni ere herria naizela, herriaren zatitxo bat. Orduan nik herriari, herrikideei, ez diot ezer eskatzen. Nik eskertzen diet nire kartzelaldia bukatu dadin ahaleginak egiten ari diren herrikideei. Ni pozten naiz nigan dagoen herri biziaren ametsa (herri askea, euskarari atxikitua, feminista, pentsamendu librekoa, bakezalea, lurraren zaintzailea, etorkinei irekia, eta edozein zanpaketaren aurka altxatzen ahalegintzen dena…) aurrerapausoak ematen duenean. Nire bizitzeko gogoa elikatzen da gurasoen bisitekin, lagunen eskutitzekin, ezezagunek gurasoen bidez bidaltzen didaten besarkadekin, herrian egin zen giza-katearekin, hitz batez erakusten nauzuten maitasunarekin eta ematen didazuten babesarekin. Nik ez dut ezer eskatzen. Hori bai, nahi eta nahi ez, nire egoerak esaten du, eta hitz hori esatea zilegi bekit: ni preso nago, bainan ez gaitezen engaina, denok gaude herrien kartzela den sistema batean, denok gaude merkatuaren lege itogarrietan kateaturik. Aska gaitezen denok batera.

Izarrak ezabatzen ari dira. Aiako Harriaren atzekaldetik goiz-albako lehen zuritasunak marraztu dute mendiaren irudia. Elkarrizketa enpatikoa poltsikoan gorde dut. Herrira jaitsi naiz. Amatxin kafetxo bat hartu dut. Etxera abiatu naiz. Ordenagailuaren aurrean jarri naiz.

Berriak

Ahalduntzeko Legearen aurkezpena: gure eredu politiko, ekonomiko eta soziala erabakitzea ahalbidetuko duen tresna da

EH Bilduk herritarrak eta eragileak elkartu ditu Portugaleteko El Solar plazan, Legebiltzarrean erregistratuko duen Herritarrak Ahalduntzeko Legearen edukiak azaldu eta haiekin eztabaidatzeko. Hurrengo azaroaren 4an erregistratuko du legea Legebiltzarrean, baina aurretik gaurkoa bezalako eztabaidarako eta ekarpenak jasotzeko lan-tailerrak egingo ditu Donostian eta Gasteizen. Oskar Matute eta Rebeka Ubera EH Bilduko bozeramaileek azaldu dutenez, “ez dugu gure legea bakarrik izatea nahi, herri oso baten legea izango da Legebiltzarrean aurkeztuko duguna”.

EH Bilduko bozeramaileek azpimarratu dutenez, “erabakiak hartzeko unea da. Araba, Bizkai eta Gipuzkoako herritarrek erabakiko dute zein izan behar den bere egitura politikoa, euskal lurraldeen arteko harremana edota Espainiako estatuarekiko harremana zein izan behar den. Baina ez hori bakarrik. Beraien egunerokoan zerikusia duten beste edozein arlotako erabakiak ere herritarren esku geratuko direla esan dute Matutek eta Uberak.

“Herritarrek erabakiko dute zein izan behar den gure eredu politikoa, baina eredu ekonomikoa eta soziala zein izan behar den ere erabakiko dute. Herritarrek erabakiko dute bankuak lagunduko diren edo etxebagabetzeak egingo diren; herritarrek erabakiko dute bizi dugun emergentzia sozial egoera honetatik ateratzeko neurririk eraginkorrenak zeintzuk diren edota zeintzuk sektore izan behar diren laguntza handiena jasoko dutenak; hezkuntza edota osasun sistema nola egituratuko den…”. Hori irudikatzeko, hain zuzen, erabaki du EH Bilduk Bizkaiko Ezkerraldean egitea legearen aurkezpen publikoa.

Erabaki horiek guztiak berme demokratiko guztiekin hartuko direla ahalbidetuko duen tresna Herritarrak Ahalduntzeko Legea dela esan dute Matutek eta Uberak. “Herritarrak beren buruen jabe dira eta hori praktikara eramatea nahi dugu. Herritarrak jarduera politikoaren erdigunean jarriko ditugu, beraiek izan daitezen herri honen etorkizun politikoa, ekonomikoa eta soziala erabakien bidez eraikiko dutenak”.

EH Bildu

https://scontent-mad1-1.xx.fbcdn.net/hphotos-xat1/t31.0-8/s960x960/12094834_1187444437939537_6383517178315967934_o.jpg

https://scontent-mad1-1.xx.fbcdn.net/hphotos-xap1/t31.0-8/s960x960/10344118_1187444457939535_2984996903802366586_o.jpg

https://fbcdn-photos-f-a.akamaihd.net/hphotos-ak-xap1/v/t1.0-0/p180x540/11217673_1187444347939546_6481486793201044463_n.jpg?oh=73e58c0f6e7fc6325c51f690fbd1ee00&oe=56CE4ADC&__gda__=1452839140_63cf7f7f1f4ec6f7487cee159d79a12f

https://fbcdn-photos-e-a.akamaihd.net/hphotos-ak-xal1/v/t1.0-0/p180x540/12143112_1187444354606212_2525980188682870580_n.jpg?oh=acb06b4f2db45d76d48de6192eb4201f&oe=569BE590&__gda__=1456340882_93f2a5f04750f04b246ef526b3ce37da

https://scontent-mad1-1.xx.fbcdn.net/hphotos-xtp1/v/t1.0-0/p180x540/12118902_1187444311272883_254476754823862168_n.jpg?oh=8677b66f63eb410665203694f05025c7&oe=56938156

https://scontent-mad1-1.xx.fbcdn.net/hphotos-xta1/v/t1.0-0/p180x540/12144721_1187444344606213_7316972102050364283_n.jpg?oh=a043479f7c4e49a821baaa5a0dbe74d5&oe=5696783D

https://scontent-mad1-1.xx.fbcdn.net/hphotos-xat1/t31.0-8/s960x960/12080397_1187444384606209_5233814870784694322_o.jpg

Berriak

EH Bilduk Herritarrak Ahalduntzeko Legea plaza publikoan aurkeztuko du

Gure kide eta EH Bilduko bozeramaile Oskar Matutek adierazi du lan dinamika jarriko dutela abian eragile sozialen eta herritarren iritzia jasotzeko asmoarekin, horrela, Gasteizko Legebiltzarrean aurkeztuko dena “herri oso baten” lege-proposamena izan dadin

Oskar Matutek  egindako agerraldi baten bidez iragarri duenez, Herritarrak Ahalduntzeko Legea hurrengo larunbatean aurkeztuko dute, Portugaleten egingo den ekitaldi baten bidez. Goizeko 10:30etatik aurrera, lan bilera egingo du EH Bilduk eragile sozialekin, legearen edukiak aurkezteko eta haien ekarpenak jasotzeko helburuarekin.

Matutek esan duenez, “herritarrak ahalduntzearen gaian ekarpenenen bat egin dezaketela uste duten eragile eta pertsona guztiak gonbidatzen ditugu Portugaleteko El Solar plazan egingo dugun ekitaldira. Era horretara bakarrik joan ahal izango gara pertsonak jarduera eta erabaki politikoen erdigunean izango diren etorkizun berri eta ilusionagarri bat eraikitzen”.

EH Bilduk hurrengo azaroaren 4an erregistratuko du legea Gasteizen, eta ordura arte, lan dinamika jarriko du abian, eragile sozialen eta herritarren iritziak eta ekarpenak jasotzeko helburuarekin. “Gasteizko Legebiltzarrean aurkeztuko den lege proposamena herri oso batena izatea nahi dugu, ez bakarrik EH Bildurena”.

Oskar Matutek gogoratu du badirela gure herrian herritarren ahalduntzearen gaia modu praktikoan lantzen ari diren mugimendu sozialak; hala nola, frackingaren aurkakoa, pentsiodunena, abortuaren aurkakoa, etab. “Bultzatzen dugun legearen helburua da herri honetako gizon eta emakumeek egunerokoan eragiten dien edozein gairen inguruko informazioa jasotzea, eztabaidatzea eta azkenean erabakitzea. Eta hori guztia berme demokratiko guztiekin egin ahal izatea”.

Matutek azpimarratu du 2016.a erabakien urtea izango dela. “Araba, Bizkaia eta Gipuzkoako herritarrek beraien etorkizuna erabakitzea nahi dugu; bai arlo politikoan, ekonomikoan edota sozialean. Eta hori 2016tik aurrera gertatzeko helburua daukagu. Bizi dugun paralisi egoeran beste batzuk hartzen dituzte euskal herritarrei eragiten diguten gaien gaineko erabakiak. Atera egin behar gara, ibili, gure erabakiak hartzen joateko eta herri heldua garela erakusteko”.

Herri honen etorkizun politikoa erabakitzea baino askoz gehiago dela legea esan du Matutek. “Herri honetan 200.000tik gora pertsona langabe bizi dira; gazteen langabezia tasa %40tik gorakoa da, eta Europako handienetakoa da; lan prekarietatearen ondorioz, gazte askok atzerrira joan behar dute etorkizun hobeago baten bila; pobrezia tasak gero eta larriagoak dira… Emergentzia sozial egoeran gaude, eta gizarte guztiak bat egitea behar dugu egoera honi aurre egiteko. Gizarte oso batek neurriak eta erabakiak hartu behar ditu, egoera honetatik ateratzeko. Herritarrak Ahalduntzeko Legearen bitartez herri honetako gizon eta emakumeek erabakiko dute etxegabetzeak egin behar diren edo ez, pertsonak edo bankuak erreskatatu behar diren edota azpiegitura handiak edo eskubide sozialak babestu behar diren”.

EH BIldu

Berriak

Preso larriki gaixoak: dira edo daude?

Joseba Barriola – Alternatiba

Igandean egon nintzen Kursaaletik Saguesera egin zen katean. Paparrean jarri nuen pegatina: «Larriki gaixorik dauden presoak, Etxera!». «Dauden» hitzari erreparatu nion. Gaixo daude. Egia da. Bainan izan, ez dira gaixoak. Izan, izatekotan, larriki gaixo dauden preso horiek, bizitzaren borrokalariak dira. Askatasunaren hautua, garai bakoitzean modu propioan eta ondo pentsatuan gauzatu behar dena, hastapeneko hautu hori tinko darrai gaixo dauden presoengan.

Hau ez da estrategia baten edo besten, aldeko edo kontrako, auzia. Zerbait sakonagoa da, estrategia guztien muinean egon beharko den zerbait. Duintasun pertsonalaren eta Herriaren duintasunaren agerpena. Hemen, presoekin dugun auzi etiko bakarra hauxe da: presoen bizitzaren alde gaude edo presoekin txantajea eginez etekin politikoa lortu nahi da.

Urkullu jaunak ez du eskubiderik auzi honetan etikaren izenean ezer exijitzeko, bere alderdian nagusi den etikaren barruan (Ardanza eta Arzallusen garaitik hona) dagoelako presoen dispertsioaren ezarpena eta erantzunkizuna. Argitu beharko luke PNVk dispertsioaren eta oro har politika «antiterroristaren» babesa nola negoziatu zen, eta babesaren truke, onura ekonomiko eta politikoak jaso ote zituen, eta jaso bazuen zeintzuk.
 
Duela gutxi Aitzoli buruz idatzitako bertso batzutan esaten nuen: Ez zera zu gaixoa/ ez daukazu gaitza/ Heriotzarekilan/ zure ahalegintza/ Bizirik irtetetzea/ iraun-esperantza/ Bizia bersortzea/ zain daukazun dantza.

Uste dut presoen askatasunari buruz hitzegiten dugunean beste tonu onuragarriago bat bilatu behar dugula. Ez penarena, ez ezintasunarena, ez etsipenarena.

Presoak etxean, gure esku dago! Bai? Bai.

Ez badira Erregimenaren botereak mugitzen (eta hori eskatzen gabiltza denbora luzez) bota beharko ditugu (eta hauxe da atarian izan dezakegun eginkizuna).

Ez badira Jaurlaritzakoak eta Nafarroako gobernukoak larritasunaz eta preso horien bizi-nahiaren edertasunaz konturatzen, ez badute sinisten «gure esku dagoela», bazterrean utzi beharko ditugu.

Eta gu geu baldin bagabiltza ezintasunez amorratuak, larritasunaz presatuak eta etsipenez kutsatuak? Gustokoak ditut Aitzolen ahoan jarri nituen azken bertsoaren ideiak: Ez nitaz euki pena/ ez egin negarrez/ Nire gogoz nabil ta/ ez ibili auspez/ Mundu berri bat daukat/ barnean saminez/ Hazi eder askoak/erditzeko minez.
 
Aitzol eta preso guztiak etxean izatea gure esku dagoela sinistuz. Aurrera bolie!

NAIZen argitaratua

Berriak

“Alterkaria” Alternatibaren paperezko aldizkariaren 5. zenbakia kalean da

Alterkariaren udazkeneko alea kalean da. Alternatibaren paperezko aldizkaria duzue, astero bidaltzen dugun boletin digitalaren osagarri. Oraingo honetan, Katalunia eraman dugu azalera, Jaume Casals CUPeko militantea elkarrizketatzeko aukera izan dugulako Euskal Herrian hainbat hitzaldu eskaintzera ekarri dugula baliatuta. Bestelako gaiak ere jorratu ditugu, hala nola errefuxiatuen afera, Greziako azken hauteskundeen osteko panorama, burujabetzaren garrantziaz edota indarkeria matxistaren inguruan. Aldizkaria zure etxean jaso nahi izanez gero, idatzi prentsa (a bildua)  alternatiba.net helbidera.

 

http://alternatiba.net/old-files/Alterkari_05_0.pdf

Berriak

Alternatibak dio hauteskundeek agerian utzi dutela Kataluniako prozesu eragilea atzeraezina dela

Alternatibak Kataluniako herria zoriondu du igandeko bozetan emandako emaitzengatik eta, bereziki, Candidatura d’Unitat Popular CUPen hautagaitzak lortutakoak nabarmendu ditu. Diana Urrea, Alternatibaren Koordinakunde Nazionalak eginiko hausnarketak abiapuntu, hauteskunde hauen esanahiaz aritu da, “prozesu eratzaileak atzera egiterik ez duela agerian utzi du, herri oso baten borondatea gelditzerik ez dagoela, Madriletik zuzendutako beldurraren kanpainari aurre egitea lortu baitute”.

Alderdi ezkertiarrak, 2012ko bozetan zein aurtengoetan CUPeri babes osoa agertu zionak, alderdi honen papera zein emaitzak, 336.000 boto baino gehiago eta 10 eserleku, azpimarratu ditu. Antonio Baños hautagai zuen alderdiak, Alternatibak bezala, “eraikuntza nazionala eta eraikuntza soziala batera jorratu behar direla eta jorratu daitezkeela defendatu du”. Horregatik, Urreak ziurtatu duenez, “burujabetza aldarrikatzen dute dena aldatzeko eta ez bakarrik bandera jakin bat”.

Ildo horretan, Koordinakunde Nazionalak CUPen koherentzia txalotu du, prozesu eragilea izenen gainetik babesten jarraitzen dutelako, “herriak bultzatutako prozesua baita, non inor ez den ezinbestekoa; ezin da beraz pertsona jakin batzuekin lotu”. Hala esan du Junts pel Si hautagaitzaren presidentziarako hautagai Artur Masen inguruan, CUPek esan baitu ez dutela babestuko, kanpainan esan duten bezala, alegia.

Edozein kasutan, Alternatibatik elkartasuna adierazi nahi izan diete iazko azaroaren 9an Katalunian eginiko galdeketaren harira inputatu dituzten hiru lagunei -Joana Ortega, Irene Rigau eta Artur Mas berari-. Herritarrei hitza emateagatik zigorrak ezarri nahi izatea “estatuko erregimenaren egoeraren adierazgarri da, Kataluniako herria nazio gisa bere burua eraikitzen duen erritmo berean desegiten ari dena”.

Espainiako ohiko bipartidismoa gainbeheran dagoela erakutsi dute emaitzek, PPren eta PSOEren artean legebiltzarraren %20 baino ez baitute lortu, “Kataluniako herriaren ahotsa ukatu nahi dutenek gero eta babes txikiagoa dute”. Urreak, hala ere, PPren aldean eskuin bigun gisa agertzen den eskumaren gorakadaz ohartarazi du, Ciudadanos hizpide, herrien burujabetzari dagozkion gaietan are arriskutsuagoak izan daitezkeelako”.

Azkenik, ohartarazi egin du “ezker estatalistaren erdibideko diskurtsoak porrot egin duela” eta deialdia egin dio “erabateko burujabetzaren alde dauden Kataluniako gehiengo herritarren mugimendu desobeditzailearekin bat egin” dezala.

Berriak

Azken gertakariak salatzeko manifestazio batera deitu dugu urriaren 3an Donostian “Bakea, erabakia” lelopearekin

Euskal Herriak ez du ezagutu, azken 175 urteotan, gatazka bizi izan ez duen belaunaldirik. Herri honek, modu batean edo bestean, ondo asko ezagutzen ditu gatazka etengabean bizitzeak dituen ondorioak. Orain ia lau urte, Aieteko nazioarteko bake konferentzian, gatazkaren behin betiko konponbiderako aukera eta esperantza ireki zitzaizkion Euskal Herriari.

Orduan, nazioarte osoaren begiradapean, aldebakartasunez emandako pausoek behin betiko bakea ekarriko zuten bideak ireki zituzten. Euskal Herriak hainbeste denboran amestutako bakea lortzeko bideari ekin zion.

https://pbs.twimg.com/media/CPlUfA6WUAAVGhY.jpg

Esperantzaz beteriko une haiek, ordea, oztopo eta traba ugari ezagutu dituzte: tamalez, herri honek bakean bizitzeko hartutako erabakiaren aurka, Estatu espainiar eta frantsesek, elkarlanean, gure bidea zapuztea erabaki dute. Ez dute bakerik nahi; gatazkan bakean baino erosoago sentitzen direlako.

Herri baketsua da gurea, bakea bakean biziz eraiki nahi duena. Bakean bizitzea erabaki duena. Konponbiderik nahi ez dutenen aurrean, gatazka etengabean aritu nahi dutenen aurrean, hitza eta erabakia nahi dituena. Erabakia eta bakea.

Ez dira txikira jokatzeko garaiak. Herri bezala hartutako erabakia, bakean eta askatasunean bizitzeko erabakia, muturreraino eramatekoak baizik. Abagune historiko honetan, beste behin, herri gisa jokatzeko erantzukizuna eta betebeharra dauzkagu. Ezin diegu hutsik egin bakea amets izatetik errealitate izatera igarotzeko hainbeste lan egin duten milaka eta milaka herritarrei.

Horregatik, Euskal Herriari eta geure buruari bi deialdi egin nahi dizkiegu, zintzotasunetik eta tinkotasunetik. Lehena, jarrai dezagula bakearen bidean urratsak ematen, elkarbizitzan eta bakegintzan eredu izaten. Ez diezaiogun uko egin bakean behin betiko bizitzeko ametsari. Jarrai dezagun posible dela erakusten. Jarrai dezagun, bakoitzak guretik, dagokiguna eginez, herri bezala bakea eraikitzen.

Bigarren deialdia, datorren urriaren 3an Donostiako kaleetan 17:00etatik aurrera, «Bakea, erabakia» lelopean egingo dugun manifestazioan parte hartzea. Bete ditzagun Donostiako kaleak bake eta askatasun egarriz. Bihur ditzagun Donostiako kaleak behin betiko bakera eramango gaituzten bide. Bihur ditzagun bideak pauso eta pausoak bide, Euskal Herriak, azkenean, gatazkarik ezagutuko ez duten belaunaldi berriei ongi etorria egin diezaien.

EH Bildu

Berriak

Amb la CUP-CC: Herri boterea eta batasuna herriz herri eraikitzen

Oskar Matute – Alternatibaren Koordinakunde Nazionalaren izenean

Irailaren 27an Kataluniako herriak bozkatu beharko du. Ez dira ohiko hauteskundeak. Zalantzarik gabe, garrantzi berezia duen mugarria da estaturik gabeko nazio batek, Herrialde Katalanak, bere izatea eta erabakitzeko eskubidea ukatzen duen estuaren aurka duen gatazkan.

Horregatik, eta hauteskunde hauen izaeraz jakitun, Alternatibatik gure babes argia eta zuzena adierazi nahi diogu CUP-Crida Constituent hausturaren hautagaitzari. Izan ere, 27ko erronkaren aurrean ez da nahikoa urrunetik emaitza begiratzea edota elkartasuna adieraztea. CUP-CCk dituen helburuekin, agenda politikoarekin eta lanarekin bat gatozela ohartarazi nahi dugu, guk Euskal Herriarentzat nahi dugunaren parekoak direlako.

Egia da, halaber, hilaren 27an Katalunian gertatuko dena bere naziotik kanpo ere eragina izango duela. Nazioak, pertsonak eta herriak gatibu gaituen gordiar korapiloa askatzeko giltza izan daiteke, trantsizioak ezarritako egonkortasun eta elkar-ulertze faltsuaren aroarekin apurtu nahi dugunontzat irtenbidea.

Kataluniari haustura usaina dario, trantsizioaren gau amaiezinaren ostean, egunsentia dator. Aukera paregabea da kataluniarrentzat, baina baita estatu beraren menpe gauden herri, nazio eta pertsona ororentzat, harrapakeriak eta ankerkeriak usteldutako sistema bermatzen duen estatuaren menpe, elite aldaezinek bahitutako demokraziaren itzalean, ikuspegi ultra atzerakoiaz zipriztindua, jendearen ahalduntzerako proiektuak garatzeko eskubidea urratu egiten duena.

Guzti horregatik, CUP-CCren alde egiten dugu. Bere jende eta jokabidearengan Kataluniako gizarte kontzientziadunaren bultzada ikusten dugu, mundu justuagoa, askeagoa eta parekideagoa nahi duten jendearena. Bere borroka ereduan, kalean zein erakundeetan, Katalunia burujabe, independente eta aske batek behar dituen osagaiak daude. Herritarren nazioa eraikitzera doaz, eta ez enpresa handiena.

Haiek bezala, herri boterea indartu beharra dagoela, izaera nazionala eta soziala uztartu behar direla eta kapitalismoari aurre egin behar zaiola uste dugu. Emantzipazioa helburu eta kapitalaren aurkako ezkerreko borroka guztietatik abiatuta. Patriarkatuaren aurrean, mendetasunaren aurrean eta finantzen botereari aurre eginez, austerizidioaren eta murrizketen kontra. Naziorik ez baina eredu bera partekatzen dutenen aurrean, ideologiak amaitu direla baina bereari eusten diotenen aurrean. Ezker politikoak, emantzipazioa xede duten mugimenduek bezala, erreferenteak behar ditu, norbere buruaren isla ikusteko ispiluak, guk ere bai, eta CUP-CCrengan hala dakusagu.

Hiru urte dira Kataluniako parlamentura indartsu sartu zirenetik, Goliaten kontra borrokatzeko prest dagoen David txiki baten modura. Politika instituzionalak ez ditu garaitu, bere ordezkariek, ondoan dituzten milaka lagunek bezala, erakutsi egin digute gauzak beste modu batera egin daitezkeela, herriarekin eta herriarentzat.

Hala, etorkinek, feminismoak, ekologismoak, langileek eta bazterkeria pairatzen duen orok, borrokarako aukera aurkitu dute: azkarra, parte-hartzailea, bizia eta bere burua inongo borrokaren bozeramaile parlamentario gisa aurkezten ez duena. Borroka horien parte delako, askok isilarazi nahi dituzten borroka horiena. Horregatik botereak bortizki eraso egiten die, CUP-CCk bultzatzen duen herri ahalduntzea boteretsuen galera eragin dezakeelako.

Ozen hitz egiteko ordua da, ahots erreboltari eta menderaezinei lekua egitea. Izan ere, etorkizuneko Kataluniak, burujabeak, gutxien dutenentzat aukera izango da CUP-CC hautagaitzak herria eta bere instituzioak baldintzatzeko indarra lortzen duen heinean. Mundura zabalik dagoen Katalunia baina bere iraganaz harro dagoen herriaren ikuspegiak, orainaren jakitun eta etorkizunean itxaropena duena, sektore guzti horiek herria zuzentzeko aukera izan dezatela eragin dezake.

Duintasunak, proposamen politikoak eta erantzun kolektiboak saria merezi badu, konpromisoaren eredu diren eta gehiengoaren lubakian borrokatzen dutenentzat izan beharko da. Horregatik nahi dugu ahalik eta emaitzarik onena CUP-CC hautagaitzarentzat, eta Euskal Herritik bertoko zein hango herritarrei dei egiten diegun haien alde lan egin dezatela.

Berriak

Diana Urrea: “Ezinbestekoa da errefuxiatuen aferari Euskal Herritik ere berehala hitzetatik ekintzetara pasatzea”

Euren jaioterrietan pairatzen dituzten gerrak, goseteak, pobrezia… atzean uzteko ihesean Europara iristen saiatzen diren pertsonen egoera dramatikoa da aspaldiko partez, eta EH Bilduk hala salatu du behin baino gehiagotan. Egunotan, ordea, Europa osoa lotsatu beharko lukeen tragedia hori neurri eta muga guztiak gainditzen ari da eta ezinbestekoa da Europar Batasunera iritsitako errefuxiatuei asilo ematea, Nazioarteko Zuzenbide Humanitarioak agindu bezala.

Hori dela eta, EH Bilduk legez besteko proposamena aurkeztu du gaur Legebiltzarrean Jaurlaritzak Araba, Bizkaia eta Gipuzkoa pertsona errefuxiatuen aterpe-lurralde izendatu ditzala eta pertsona horiei arreta egokia eskaintzeko behar diren baliabide guztiak bideratu ditzala eskatzeko. Milaka lagunen bizitza jokoan dago eta, ondorioz, EH Bilduk presazko tratamendua eman nahi dio bere proposamenari; horretarako, Erregelamenduak ematen dion aukera baliatuz, Osoko Bilkura deitzeko ere galdegin du, ekimen hori 15 egun igaro aurretik eztabaidatu ahal izateko.

Afrika eta Asiatik ihesean ateratzen diren etorkinen asilo eskubidea azpimarratu du EH Bilduk, bai eta pertsona horien jaioterrietan bizi den egoeran Europar Batasunak duen ardura ere. Hori dela eta, asilo eta babes politika berria eskatu dio Europar Batasunari, “betiere gisa eskubideen errespetua oinarri hartuko duena”, zehaztu du Diana Urrea Alternatibako kide eta EH Bilduko legebiltzarkideak.

Urreak azaldu duenez, “ezinbestekoa da errefuxiatuen aferari Euskal Herritik ere berehala ekimena hartzea eta hitzetatik ekintzetara pasatzea”. Horren haritik, EH Bilduren proposamenak eskari zehatzak egiten dizkio Jaurlaritzari, lehenik eta behin, “Euskal Autonomia Erkidegoa errefuxiatuen aterpe-lurralde izendatu dezala eta horretarako behar diren baliabide guztiak bideratu ditzala, pertsonen asilo eta aterpe emate alorrean lan egiten duten erakundeekin elkarlanean”.

Halaber, ahalik eta arinen erakunde horiekin eta alkateekin batera EAEk jaso dezakeen errefuxiatu kopurua zehaztu dezala eskatu dio EH Bilduk Lakuari, horren ostean espainiar Gobernuari kopuru hori jakinarazteko. Eta azkenik, euskal herritar askok eskainitako laguntza bideratzeko, zerbitzu bat sortzea proposatu du, laguntza guztiak koordinatzeko.

EH Bildu

Berriak

Alternatiba | Ezkerra eraldatzearen erronka

X