Euskal Herriak, Kataluniak bezala, bere bidea egingo duela Madrilen zain egon gabe
Beharrezkoa da Kataluniako gizartea zoriontzea. Igandean erabakitzeko eskubidearen ariketa praktikoa egin zuten, Rajoyren Gobernuak, Estatuak ezarritako oztopo guztien gainetik.
Kataluniako gizarteak hitz egin du eta bere etorkizunerako nahi duen estatus politikoa adierazi. Espainiar demokrazia eskasaren testuinguruan balio politiko handia dauka erabakiak eta, batez ere, Kataluniako herriaren zilegitasuna du.
Prozesu honen aurrean Kataluniako gizarteak jarrera eredugarria izan du eta Madrilgo Gobernuak demokrazia mailan dituen gabeziak erakutsi ditu. Ez du maila eman, ez du gaitasunik erakutsi, mehatxua izan da bere erantzun bakarra. Betoa ezarri nahi izan du, baina ez du lortu kataluniarrak isiltzea.
Alderdi espainiarrek berriz, krispazioaren mamua atera dute berriro ere. Gehiengoak dituen eskubideak lortzear dagoenean ikustean immobilismoa eta ukazioa da erantzun bakarra.
Baina Kataluniak utzi dituen lezioez aparte, Euskal Herriak ere bideari ekin behar diola uste du EH Bilduk. Eta hori egiteko bi baldintza behar dira: gizartearen babesa eta eragile politiko, sozial eta sindikal gehienen adostasuna. Hau da, bere buruaren jabe izan nahi duen gizartea eta maila ematen duen ordezkari politikoak. Euskal gizarteari ahotsa emateko helburuarekin akordioak, konpromisoak eta konplizitateak lantzeko ordua da.
Prozesu demokratiko eta konstituziogilea egiteko gure proposamena plazaratuko dugu. Prozesuak ahalik eta babes handiena lortu behar du eta aldebakarrekoa izan behar da. Argi dago Madril eta Parisek ez dutela nazio bezala ditugun eskubideak aitortzeko asmorik. Eta egoera horretan, bere eskubide osoen jabea den subjektu bezala aitortuak ez garenean, ez dago burujabetza partekatuarentzako lekurik, ez berdinen arteko hitzarmenak lortzeko aukerarik.
Euskal Bidearen ordua da, eta EH Bildu bide hori gainontzeko eragile politiko, sozial eta sindikalekin egiteko prest dago. Izan ere, Euskal Herriak Madrilen erantzunaren zain egon gabe egingo du bere bidea, Kataluniak egin duen bezala. Estatu espainiarrak demokraziaren arauak bete nahi baditu, ondo, etab estela gizartea gainetik pasako da, igandean gertatu bezala.
Alfonbra gorria muturreko eskuinari
Toni Ramos – Alternatiba
Kapitalismoak eragindako krisiaren ondorioz, gehien kaltetutako klaseak miseriara kondenatuta daude, bankuen, multinazionalen eta oligopolio energetikoen mesedetan. Testuinguru honetan, ulergarriena litzateke langileek ezkerreko indar alternatiboen alde egitea, eta honek militantzia eta bozka gehiago irabaztea, alderdi politiko klasikoen gainbeheraren aurrean. Eta hala gertatzen ari den arren, bestelako aukera batek ere gero eta jarraitzaile gehiago irabazten ditu azkenaldian.
Murrizketa sozialak, ustelkeria eta gizarte gehienak klase politikoarekiko garatu duen desilusioa baliatuz, muturreko eskuina eta faxismo berria azaleratzen dira. Eta diskurtso populista, erraz eta xume batekin egiten dute, inongo arrazoibiderik gabe, defendatzerik ez duen etsaiaren aurka gorrotoa erabilita eta gezur bat etengabe errepikatuz egi bihurtzearen arauari jarraiki. Izan ere, arrazakeria eta xenofobia oinarritzat hartuta, neofaxismoa krisiaren aurkako diskurtsoa entzuteko prest dagoen orori irtenbide erraz bat eskainiz elikatzen da: egoera honen errudunak etorkinak dira.
Baina faxismoaren eta muturreko eskuinaren etorrera ez da ustekabekoa; diskurtso mota hau bozak lortzeko tresna modura ikusi duten alderdi politiko tradizionalei egotzi behar genieke zalantzazko meritu hori. Hona hemen adibide batzuk:
Herri eskandinaviarretan, Norvegiako Alderdi Aurrerakoia edo Suediako Demokratak bezalako muturreko eskuineko alderdien diskurtso arrazistak gero eta indartsuagoak dira. Alderdi kontserbadoreak, arrazakeria eta xenofobiaren aurka agertu beharrean, gauza bera egiten hasi ziren, ultraeskuindarren presioak eraginda, etorkinen kriminalizazioa sustatzen zuten politikak abian jarriz. Guzti honen ondorioa muturrera heldu zen 2011 urtean gertatutako Utoyako sarraskian.
Frantzian ere antzera gertatu da. Le Pen xenofobia erabiltzen hasi zen herriaren arazoen errua ahulenei egotziz. Sarkozy kontserbadorea ere bozka errazaren trenera igo zen eta Errumaniatik etorritako ijitoak Frantziatik kaleratzen hasi zen, herritar musulmanen erlijio askatasun eskubidea urratzen zuen bitartean. Hollandek ere ez du egoera zuzendu. Politika hauen jarraikortasuna sustatzearen ondorioz, Fronte Nazional alderdi neofaxista Europako azken hauteskundeetan alderdi bozkatuena izan zen. Gaur egun, Marine Le Pen, muturreko eskuineko alderdiaren sortzailearen alabak, bere burua Frantziako Lehen Ministro gisa ikusten du.
Antzeko adibideak daude Herbehereetan, Erresuma Batuan edo Italian, eta Euskal Herria ere ez dago fenomeno honetatik aske. Gurean bizi diren sona politiko handiko pertsonaiek, beren burura defendatu ezin duten etorkinak, boto eskubiderik ere ez dutenak, kriminalizatzen dituen diskurtso hau aspaldi erabiltzen dute.
Hauteskundeetan bozak lortzeko, babesgabe daudenak erruduntzen dituzte, eta ez PPk ezta PNVk ere, ez dute botere gehiago eskuratzeko aukera galtzeko asmorik. Berdin zaie bere diskurtsoak ez gutxiengo horri bakarrik baizik eta gizarte osoari kalte egiten badie. Europari besterik ez diogu begiratu behar, muturreko eskuina gure herrian ezartzeari bidea zabaltzen diotela ikusteko.
Araba eta Bizkaiko Foru Aldundietatik, eta Sestao edo Gasteiz bezalako Udaletatik, etorkinen kolektiboaren aurkako salaketa faltsuak egin dira, orain arte ezkutuan mantendu den neofaxismoari alfonbra gorria jarriz, muturreko eskumaren iritziak bereganatuz eta politika naziak ezarriz. Kezkagarria da ikustea nola Gasteizen baliabiderik gabeko pertsonek saltoki sare jakin batean eta soilik berdez markatutako produktu zehatz batzuk erosteko baimena duten. Elikagaien errazionamendua gertuko enpresen onurako erabiltzea Francoren diktadurako garai ilunen ohiko zerbait izan zen, eta Javier Marotoren eskutik itzuli da.
Josu Begara, Jose Luis Bilbao, Javier de Andres eta Maroto bezalako politika munduko pertsona ezagunak iritzi arrazistak publikoki azaleratzeko gai badira, nork aurpegiratuko dio Democracia Nacional-i gauza bera egitea? Sasi-erakunde nazi hau Gasteiz inguruan etorkinen aurkako kartelak pegatzen hasi da dagoeneko.
PP eta PNVko buruzagiei gogorarazi behar izango genieke, higiezinen eztandaren garaian, lanik falta ez zenean, Espainiako Erresumaren BPGaren hazkundearen ia erdia etorkinen ekarpenaren ondorioa zela. Akaso kontuan izan beharko lukete pertsona hauek Euskal Herrian bizi eta lan egiten dutela; Euskal Herrian jaten eta erosten dutela, eta ondorioz zerga zuzen eta zeharkakoak ordaintzen dituztela, beste edozein euskal herritar bezala. Agian ere kontuan izan beharko lukete kultur aniztasunak ematen digun aberastasuna. Eta batez ere, gogorarazi beharko genieke gure gizartearen zati oso handi bat (militante jeltzale asko tartean) euskal jatorrikoak ez diren etorkinek edo beren ondorengoek osatzen dutela.
Etorkin katalan batek sinatuta, edozein etorkin marokoar edota zortzi euskal abizen dauzkan edozein bezain euskalduna.
EHBilduren 14. aldizkaria: Katalunia eta Euskal Herria, aldebakarreko bidea
Hamabostero bezala, Euskal Herria Bilduren aldizkari digitala kaleratu dugu, PDF formatuan deskargatu edo sarean ikusteko. Lurralde bakoitzean koalizioak egiten duen lanaren berri eta, asteon, Kataluniako erabakitzeko eskubidearen inguruko irakurketa jasotzen duena. Aldizkari zure posta elektronikoaren bidez zuzenean jasotzeko, egizu harpidetza.
Alternatibak ezkerrari dei egin dio erregimenaren gainbehera bigarren trantsizioz makillatzeko ahaleginei aurre egiteko
Alternatibaren bozeramaile nazional Asier Vegak eta Oskar Matutek prentsa agerraldia egin dute Alternatibaren Batzar Nagusiaren ospakizunaren aurretik. Estatu espainiarraren erregimen politikoaren gainbeheraren irakurketa politikoa egin ez ezik, burujabetza osoaren aldeko apustua aztertuko dute eredu sozial, politiko eta ekonomiko hau bere osotasunean aldatzeko funtsezko giltza bezala, beti ere, erabakitzeko eskubidea eta Kataluniako errealitatea mahai gainean izanda.
Alternatibak bere Batzar Nazionala egingo du gaur, erakundearen organo gorena, sei hilabetean behin elkartzen dena. Gaurkoan egoera sozioekonomiko eta politikoaren azterketa egiteko asmoa dugu, hausnarketaren ostean, Euskal Herriari zuzenean eragiten dion ziklo aldaketaren aurrean neurri urgenteak proposatzeko. Espainiar estatuaren egiturazko krisiak baldintzatutako ziklo aldaketaz ari gara.
Eredua bera dago krisian, estatuaren egitura instituzionala, bere maila guztietan ustelkeriaren gaitz endemikoak kolpatua ageri zaiguna eta, ondorioz, hari lotutako erakunde politikoak zipriztindu egiten dituena. Sistema zaharkitu hau demokraziatik eta zuzenbide estatutik gero eta urrunago ageri zaigu.
Hala, gizarteak haserrez ikusten du aberatsenen zerrenda lizuneko kideak gero eta ondasun gehiago pilatzen dituztela, aldi berean, CEOEk soldatak moderatzeaz eta gerrikoa estutzeaz hitz egiten digu; enpresarien elkarte horretako buruzagi atxilotuak eredugarri bailitzan.Izan ere, oraindik ere pairatzen ditugu Espainiako erresuman indarrean dagoen bipartidismoak konpondu ezin duen krisiaren ondorioak; baina inoiz ezingo ditu konpondu boteretsuen morroi gisa jokatzen duten bitartean. Merkatuen menpe daude eta ekonomia herritarren zerbitzura kudeatzeari uko egin zioten aspaldi.
Noski, lurraldetasun krisialdi baten aurrean ere gaude, adibide nagusiak, Kataluniak, erakutsi digunez. Biharko galdeketak agerian utziko du estatu hau herri eta nazioen kartzela gisa jokatzen duela, bertan egotea erabaki ez duten eta egotea ere nahi ez duten presoena, hain zuzen. Alternatibatik errealitate hori gainditu eta berea eraiki nahi dutenekin bat egiten dugu eta, horregatik, erregimenaren gainbeherak kaltetutako guztiei elkartasuna adierazi nahi diegu.
Eszenario honen aurrean, ezkerretik alternatiba argiak eta proposamen erradikalak jarri behar ditugu mahai gainean. Demokrazia bizitza politikoan txertatu; erakundeetako errealitatea eta botere guztia herritarren esku jarri; eta ekonomia gehiengoaren interesen menpe jarri eta ez gutxi batzuen mesederako.
Zentsu honetan, uste dugu apurketaren unea iritsi dela, ez duela balio hondamendi hau baliatzea erregimena balizko erreformekin makillatzeko. Ez baita egia, hala saldu nahi diguten arren, bigarren trantsizioa irtenbide bakarra denik. Zilegi da pobretzen gaituen guztiarekin apurtzea; zilegi da demokratikoki bizitzea eragozten digun egitura guztiekin apurtzea; eta zilegi da, halaber, gure herriak hautatu ez duen errealitate baten menpe bizitzera behartzen gaituenarekin apurtzea.
Horregatik uste dugu ezkerraren, Alternatibaren eta gizarte osoaren zeregina dela edozein operazio estetikoaren aurkako oposizioa gorpuztea. Gehiengoa erakartzeko diskurtsoa sortu eta eguneroko jardunean aurrekoarekin apurtuko duen errealitatea altxatzeko gai izango dena. Alternatibaren Batzarrak egoera honen aurrean ezkerrak jokatu beharreko paperaz hausnartuko du; eta era berean, Euskal Herriko ezkerrarentzat Euskal Herria Bildu izan behar den tresna izango du hizpide. Eraldaketan aurrera egiteko tresna ez ezik, bakea eta askatasuna nagusi izango diren etorkizuna eraikitzeko aldaketak ekarriko dituena.
Horixe da Alternatibaren helburua eta EHBildu osatzen dugun indar politiko guztiok partekatzen duguna. Hitza herritarrei bueltatzea, gizarte erabat demokratikoa eraiki eta horretarako bestelako eredu ekonomikoa eta sozialaren aldeko apustua eginda, dirua baino, pertsonak lehenetsita eta ardatz gisa beren beharrizanak eta duintasuna jarriko dituena.
Antolatu kanpaina
Bestaldetik, Alternatibak kurtso politikoarekin martxan jarri dugun aktibazio sozialerako kanpaina berria aurkezten dugu gaurkoan. Duela urtebete AKTIBATU leloa erabili genuen. Injustizia sozialaren eta murrizketen kontra altxatzera eta baita ere, krisi deitzen diogun egoera hau eragin dutenen pribilegioen aurrean harresi bat eraikitzera deitzen zuena. Euskal Herriko gizon eta emakume bakoitzari politikoki eta sozialki aktibatzeko deia; ez etsitzeko; beti ere, egungo egoerari buelta emango dion kontzientzia kritikoa garatzeko ahalegin batean.
Hala eta guztiz ere, gure kanpainak dioen bezala, aktibatzea ez da nahikoa; norbanakoaren borroka besteen borrokarekin bat eginda eraginkorragoa delako. Horregatik, aurten erabili dugun leloak horrela esaten du: ANTOLATU. Zapaltzen gaituzten menpekotasun sistema desberdinei aurre eginez; gure aldarrikapenak besteen oihuei lehenetsi gabe, aurpegi desberdinen atzean ezkutatzen den arerio berari aurre egiten diogulako.
Kanpaina honek pertsona desberdinak aurkezten dizkigu, denak bakoitzaren borrokan aktiboak, baina militantzia bateratua egin arte, sistemari aurre egiteko nahia asetzeko ezinean ibili diren horietakoak. Kartelak zera dio: “suspertutako kontzientzia berri bakoitza sistemari aurre egiten dion erronka berria da, eta besteekin bat egitean, bere gaitasuna biderkatzen du”.
Kanpainaren euskarriek, dagoeneko hiri eta herrietako kaleetan ikus daitezkeenak, kartel eta diptiko forma hartzen dute. Baina kanpaina honek urrats berria ere badakar, hurrengo egunetan Antolatu abestiaren eta bideokliparen aireratzea ere egingo dugu.
Manifestazioa Bilbon, Kobanen herri kurduak daraman borrokarekin elkartasunez
Herri Kurduarekin Elkartasun Ekimenak, antolakunde eta mugimendu ezberdinez, tartean Komite Internazionalistak, mobilizazioa deitu du Azaroaren 1erako. Manifestazioa bilboko udaletik Guggenheim museora burutuko da, eguerdiko 12etan. Protesta honekin, Kobanin (Kurdistan) ematen ari den erresistentziari elkartasun eta sostengua adierazi nahi diogu, bai eta Estatu Islamikoa errefusatu ere.
Ekimenak bat egiten du Kobanen (Rojava) ematen den borrokarekiko elkartasunez eta Estatu Islamikoaren aurrean mendebaldeko gobernuen pasibotasuna salatzeko eginiko deialdi europarrarekin. Egun horretarako deialdia EUTCk (EU Turkey Civic Comission) egin du, Turkiak EBrekin bat egite aldera jarritako irizpideak betetzen dituen aztertzen duen hiritar erakundea da hau. Deialdi honek Kurdistango Nazio Kongresuaren (KNK) babesa jaso du.(KNK).
Manifestua:
Joan den irailaren 15ean Estatu Islamikoa erakunde kriminalak, inperialismoak bere tresna bezala darabilenak, Rojava’ko eskualdea autonomoan (Siria iparraldean) kokaturiko Kobanê hiri kurduaren aurkako fronte anitzeko erasoa abiatu zuen, hiria eskuratzeko hirugarren saiakera dena. EI-ak, berriro elkarturik, bortizki erasotu ditu, bereizi gabe, bai borrokalari kurduak bai herritar zibilak, helburu bakarrarekin: herri kurduak Rojavan eraikitako proiektu demokratiko eta askatzailea suntsitzea.
2013ko urtarrilean abiatu zuten kudeaketa autonomo honek, Konfederalismo Demokratikoan oinarriturik, eredu demokratiko bat garatzea du helburu, ez soilik Kurdistanen bizi diren herrientzat, baita Ekialde Hurbil osoarentzako etsenplu moduan ere. Asko dira ordea Rojavan martxan dagoen eredu demokratiko alternatibo honek izutu dituenak, baita haien buruak demokratikotzat agertzen dituzten horiek ere. Estatu Islamikoak Kobanê suntsitu nahi du eta, egun, hiru albotatik dauka inguratua, ia osorik, iparraldeko turkiar mugatik gertu dagoen aldetik izan ezik.
Estatu Islamikoa Amerikako Estatu Batuetan egindako armementu astunarekin sartu zen Kobanên, arma kimikoak ere (fosforo bonbak adibidez) erabili zituztelaren frogak badaudelarik. Turkiak ondo babesten du ere EI, bai armekin bai logistikoki, entzungor eginez nazioarteko erakundeen aldarriei (Nazio Batuak tartean) mugak laguntza humanitaroaren sarrerari irekitzeko eskatzen diotenean; eta egoera honen ondorioz ihes egitera beharturik izan diren ehundaka pertsonei ia inolako laguntzarik eman gabe. Kobanê-ko herriak, bitartean, Herriaren Defentsarako Taldeekin (YPJ eta YPG) erantzuten die eraso basatiei, EI-ren armamentu astunari arma arinak erabilita soilik eginez aurre.
Honek guztiak bultzatzen gaitu ESTATU ISLAMIKOAREN AURKA, KOBANÊREN ALDE, HUMANITATEAREN ALDE, NAZIOARTEKO DEIALDIAREKIN bat egitera.
Kobanêren erresistentzia askatasunaren eta demokrazioaren sinbolo bihurtu da jada, eta azkeneraino borrokatzeko erabaki irmoa hartu dute erresistentziaren indarrek. Euskal Herritik, Herri Kurduarekin Elkartasun Ekimena osatzen dugunok, eraso hau herri kurduaren helburu demokratikoak suntsitzeko xede argia duen sarraski antolatua dela ikusi eta berau gelditzeko exijitzen diogu nazioarteari. GELDI DEZAGUN SARRASKIA! BABES DITZAGUN GURE NEBA-ARREBAK HAIEN ETENIK GABEKO BORROKAN, HUMANITATEAREN ETSAIA DEN ESTATU ISLAMIKO GENOZIDA ETA FAXISTAREN AURKA!
Espainiako Erresumak enpresari kolpista eta hiltzaileak saritzen ditu
Alternatibaren Mahai Internazionalista
Madrilen, hile hasieran, Latinoamerikako Enpresari Kontseilua CEALen topaketa ospatu zen. Pentsa daiteke desberdintasun sozial eta ekonomiko handiak dituen kontinentean, bertako enpresaburuek bidegabekeria horietan erantzukizunen bat izango dutela. Adibide bikaina da Miguel Facusse, Honduraseko lurraren %0,14ren jabe da eta 2.000 lempiraren aberastasuna dauka, nekazari batek, batez bestez, urtean 5.000 lempira irabazten dituen.
Gainera, ezin dugu ahaztu halako aberastasuna duen pertsona batek politikari ustelen laguntza izan behar duela, enpresa pribatuen galerak herritarren lepotik ordaintzea baimentzen diotelako, edota aipatutako politikari ustel horiek estaldura eta zilegitasuna ematen dietelako enpresari horiei. Horixe da egunotan Madrilen gertatu dena, Mariano Rajoy eta Felipe Gonzalez CEAL topaketan Facusse bezalako alprojen aurrean hitz egin dutenean. Hondurasen Celaya presidenteak klase herritarren aldeko erreforma txikiak egin nahi izan zituenean, enpresari honek milaka hildako eragin zituen estatu kolpe kriminala sustatu zuen.
Guzti horregatik, Alternatibatik salatu nahi dugu Felipe Gonzalez eta Mariano Rajoy kriminalekin duten elkar aditzea, eta gure elkartasun osoa adierazi nahi diogu Honduraseko herritarren borrokari, estatu kolpe baten bidez boterea zitalki kendu zietelako.
Alternatibak elkartasuna adierazi dio faxisten erasoa pairatu duen Puyalon de Cuchas-ko antolakuntza idazkariari
Alternatibako Koordinakunde Nazionalak bere elkartasuna adierazi nahi dio Puyalon de Cuchas Aragoiko ezker independentistako alderdi adiskideari. Izan ere, bart gauean Puyaloneko antolakuntza idazkari Diego Marinek hiru neonazien erasoa pairatu zuen.
Adierazgarria da erasoa gertatu izana Puyalonek kideak #BesicoDisident kanpainako kartel batzuk gainean zituenean; jai herritarrak, barneratzaileak eta askatasun sexualen kontrako erasorik gabekoak aldarrikatzen dituen kartelak hain zuzen ere. Partekatzen ditugun edukiak dira baina, noski, pertsonen askatasuna eta aniztasunaren aurkakoak diren muturreko eskuinari enbarazu egiten diete.
Alternatibatik besarkada internazionalista helarazten diegu Puyalon osatzen duten gizon-emakumeei, eta Aragoi antifaxista baten alde lanean jarraitzera animatzen ditugu, non Marinek atzo pairatutako erasoen modukoek lekurik izango ez duten. Zorionez, ez duen bestelako ondoriorik izan, baina Zaragoza bezalako hirietan neonazien indarkeria gero eta larriagoa dela berrestera dator.
Mehatxuen aurrean demokraziak garaitu behar du, inposizioen aurrean gehiengoari entzun beharra dago
Catalunyako gizartearen gehiengoaren eskariari erantzunez azaroaren 9ko kontsulta deialdia errealitatea da dagoeneko. EH Bildutik zoriondu nahi ditugu posible egin dutenak eta Catalunyak bizi duen prozesuari gure elkartasuna eta babesa adierazi nahi diogu. Prozesua demokratikoa da eta Catalunyako gizarteak bere nahiak adierazteko aukera izango du.
Madrilek iragarri du erantzuna, bere horretan segitzen du, mehatxua, immobilismoa eta ukazioa dira Estatuak Catalunya eta Euskal Herriari eskaintzen diona. Gehiengoaren eskari demokratikoari Madrilek eskaintzen diona inposizioa da, espreski erabakitzeko eskubidea baztertu eta ukatzeko eraikitako legea onartzea besterik ez.
Estatua erreforma frankistaren porrotan kateatuta dago, egiturazko ahuleziak jota eta demokraziari beldur dio, gizartearen adierazpenari beldur dio. Ez du proposamenik, ez du borondaterik, Madrilek nahi duena arazoa bertan behera uztea da eta herrientzako kartzela den konstituzioa erabiliz Catalunyak eta Euskal Herria aldarrikatzen duten erabakitzeko eskubideari bidea itxi.
Oso une garrantzitsua da. Europan, Eskoziak atea zabaldu dio ez bakarrik eztabaidari, baita autodeterminazio eskubidearen ariketa praktikoari, Argi utzi dute Europan erreferendum independentista egitea posiblea dela, borondate kontua dela baina hori ez dute ez Madril eta ez Paris. Euskal Herrian ere nahi dugun autodeterminazio eskubideari. Beraz, bidea ireki da, aukera erreala da. Orain, gure etorkizuna eraikitzeko subiranotasuna defendatzen dugunon ardura du, eskatzen digutenari erantzun egokia eman behar diogu eta gizarteari errealitatea egiteko bidea eskaini behar diogu
Ez da epe edo presa kontua, demokrazia kontua baizik, hiritarron nahia errespetatzeko kontua, aurrera egiteko borondatearen kontua. Euskal gizarteari argi hitz egin behar diogu, zein da gure proiektua argi azaldu, zein da eskaintzen diogun bidea eta bide hori elkarrekin egiteko prest gauden esateko. Beste guztia distrakzio ariketa da.
Inertzia politikoa, geldotasuna, epe motzeko interesak, edo alderdi interesak ezin dira aukera historiko hau pasatzen usteko justifikazioa izan. Bidea aitortzan dago, errealitate desberdinetatik abiatuta, Euskal Herria erabakiaren subjektu politikoa da. Mehatxuen aurrean demokraziak garaitu behar du, inposizioen aurrean entzun eta euskal gehiengoaren nahia errespetatu arazi. Herriek erabakitzeko duten eskubidea onartu eta onartuko ez duenekin harremanak hausteko ordua da.
Bide hori baztertzea, aukera baztertzea arduragabekeria litzateke eta gizartearen gehiengoari iruzurra, honek bide propioa eskatzen baitu.
Madrilen danbateko eta ukazioa besterik ez dugu aurkituko, ez bada gure herria ukatzen duen lege sisteman lekua izen dezaketen erreformarekin konforme diren batzuk. Subiranotasuna konpartitzeko lehen izan beharra da. Euskal Herriaren etorkizuna ez doa Madriletik, Iruñetik, Baionatik doa, gure politika ekonomiko, sozialak, kultural, hezkuntzazkoak hemen erabakitzetik doa. Akordioak Euskal herrian izan behar dira eta Euskal Herrirako.
EH Bildu argi esan du, eta gaur errepikatzen dugu: bide hori egin nahi dugu, bide hori konpartitu nahi dugu eta eragile politiko, ekonomiko, sozial, sindikalekin. Gizartea protagonista izan dezala proposatzen dugu eta gizartea izan behar da Euskal Bidearen bermea, subiranotasunerantz euskal bidearen bermea.
EH Bildu bake prozesua desblokeatzeko prest agertu da eta elkarlana eskaini du erabakitze eskubidea gauzatzeko
EH Bilduk bihar politika orokorreko osoko bilkuran mahai gainean ipiniko dituen ardatz nagusien berri eman du gaur. Juanjo Agirrezabalak eta Oskar Matutek iragarri dutenez, koalizioa, PPren eta PSEren itxikeriaren gainetik, bake prozesua desblokeatzeko urratsak ematen jarraitzeko borondatea berretsiko du, pertsona guztien giza eskubideak, presoenak barne, bermatzeko eta biktima guzti-guztiak duintasunez aintzat hartzeko.
Euskal Herriak erabakitze eskubidea gauzatzeari begira, EH Bilduk aurrerapausoak ematen hastearen aldeko apustua egiten du eta bide horretan elkarlanean aritzea eskaintzen die helburu hori bera duten eragile guztiei. Norabide horretan Eskozia eta Katalunia eredu direla gogorarazi ondoren, Agirrezabalak eta Matutek adierazi dute Euskal Herrian ere inakzio politikoa gainditzeko unea iritsi dela. Diotenez, “ezin gaitezke Gobernu espainola mugitzearen zain egon”. Hori dela eta, erabakitze eskubidearen defentsak funtsezko elementua izan behar du jardun politikoan, “hemen erabakitzea ezinbesteko baldintza izango delako euskal jendarteak egunero dituen arazoei erantzun argia eta zuzena eman ahal izateko”.
Horren haritik, EH Bilduko legebiltzarkideek Madrilek egindako inposaketak eta murrizketak salatu dituzte, arrakala soziala handitzen dutelako. Errealitate hori kontuan hartuta, koalizioak eskua luzatzen die Gobernu espainolaren erasoei aurre egin nahi dieten eragile guztiei, Rajoyk bultzatutako prozesu murriztailea geldiarazteko. Finean, “herriari herriarena dena itzultzeko ordua da”, esan dute Agirrezabalak eta Matutek. Hau da, ditugun tresnak, Kutxabank esaterako, herriaren mesedetan jarri behar da eta guztion dirua ezin da erabili gutxi batzuk aberasteko AHT bezalako azpiegitura erraldoiak eginez edo, etorkizunean, frackingaren bidez; ditugun baliabideak jendearen benetako beharrei erantzuteko erabili behar dira”.
EH Bilduk pertsonekiko eta haien beharrekiko duen konpromisoa ez da agertzen, ordea, Jaurlaritzaren jardueran, ez baita langabeziari eta injustizia sozialei aurre egiteko gauza”. Izan ere, “PPk bezala, EAJk ere interes ekonomikoen menpe ipini du bere burua, herritarren zerbitzari izan ordez”.