Hamabostero bezala, Euskal Herria Bilduren aldizkari digitala kaleratu dugu, 10. zenbakia oraingoan, PDF formatuan deskargatu edo sarean ikusteko. Lurralde bakoitzean koalizioak egiten duen lanaren berri eta, asteon, Eskoziaren erreferendumaren inguruko analisia egiten dugu. Aldizkaria zure posta elektronikoaren bidez zuzenean jasotzeko, egizu harpidetza.
Lehen mailako hainbat gertakari politikoek, Estaturik gabeko herrientzako eta bere herritarrentzako garai oparoak datozela iragartzen dute. Pasa den ostegunean Catalunyako Diada Nazionala ospatu genuen, datorren azaroaren 9an katalanek Estatu independentea osatzeko egingo duten ariketari elkartasuna adierazteko.
Modu berean, gaur bertan Eskozia erabakitzeko eskubidearen ariketa burutzen ari da Estatu independentea izan nahi ote duen argi eta garbi adierazteko.
Erreferendumaren emaitzetatik haratago, Eskoziak dagoeneko irabazi du. Erresuma Batuko gobernuak Eskozia erabakitzeko eskubidearen subjektu politikoa dela aitortu du eta ondorioz autodeterminazio ariketa burutu da gaur bertan. Hau guztia itzuli ezinezko erreferentzia bilakatuko da eskubide horren ariketa noizbait egin ahal izateko borrokan ari diren Europako nazio guztientzat.
Hasteko, Eskoziako erreferendumak nabarmen utzi du autodeterminazio eskubidea guztiz aplikagarria dela XXI. mendeko mendebaldeko Europan, eta gainera adostutako prozedura baten bidez gauzatu daitekeela. Eskoziakoak agerian uzten du estatuen jarrera ez dela demokratikoa eta helburu bakarra dutela, hots, beren etorkizuna libre eta demokratikoki erabaki nahi duten herrien askatasuna indarrez ekiditea.
Bitartean, Madrilek erabakitzeko eskubidearen aldekoak iraindu eta espetxe zigorrez mehatxatzen gaitu. Eskozia, Catalunya eta Euskal Herriko prozesuen arteko desberdintasuna aurrean dauzkagun Estatuen baitakoa da: Erresuma Batuak eskoziarrei eskaintza demokratikoa egiten dien bitartean, katalanei eta euskaldunoi hitza ukatu egiten zaigu, baita nazio izaera bera ere eta ondorioz herri gisako eskubide politikoak.
Erreferenduma gertatu izanak akuilua izan behar du katalanek eta euskaldunok gure etorkizuna libreki erabaki ahal izateko. Gehiengo sozial eta politikoek eskubide hori babesten dute eta horregatik, dudarik ez daukagu euskaldunok gure etorkizuna erabaki ahal izango dugula.
Horretarako beharrezkoa da herri gisa pentsatu eta ekitea, alde guztiok izan ditzakegun ikuspegi partikularretatik harago. Euskal herritarron askatasunak gizarte osoaren konpromisoa eskatzen du. Adostu dezagun burujabetzarako euskal bidea. Horrek erabakitzeko dugun eskubidearen defentsa eta ariketarako akordioen beharra jartzen du mahai-gainean. Gure ardurari eustea eskatzen zaigu, ihesbide antzuak bazter utzita. Zailtasunak zailtasun, helburu bat daukanak horretarako bidea aurkitu ohi du; aldiz, ezer egitea lehenesten duenak aitzakiei eutsi besterik ez du egiten.
Gaurkoan poztasun handiz ari gara ospatzen eskoziarrek burututako autodeterminazio eskubidearen ariketa. Modu berean, azaroaren 9an katalanek burutuko duten kontsulta babestu nahi dugu; epe motzean Euskal Herria ere bere buruaren jabe izango den segurtasunarekin. Gure esku dago; gero eta gehiago gara.
Munduko Saskibaloi Txapelketaren harira, EH Bildutik txosten bat osatu dugu Bilbora gerturatu diren ehunka kazetarien artean banatzeko eta Euskal Herriko errealitatearen sarreratxo bat azaltzen duena. Bisitariak Espainiara etorri direla pentsatzen dutela badakigu, eta horregatik, dokumentu honen bidez modu zehatz eta argi batean gure herriaren historia eta bertoko herritarren errealitatea eta egoera politikoa helarazi nahi diegu.
Uda osoan zehar egin izan dugun bezala, Euskal Herriko hiri eta herriak bisitatu dituzten milaka pertsonei gure herriaren errealitatea erakusten eta azaltzen ibili gara. Oraingo honetan, EH Bildutik gauza bera egin nahi dugu nazioarteko hedabideekin, eta azken batean, talde desberdinak animatzera etorri diren zaleekin ere: gure herriak gatazkaren konponbidearekiko duen konpromisoa erakustea eta estatu espainiarretik zein frantsesetik independente izateko erabakia gure herriaren eskuetan dagoela aldarrikatzea.
Eta bide batez, bukatzeko, EH Bildutik ongietorria eman nahi diegu egun hauetan Euskal Herria bisitatzera etorri diren pertsona guztiei eta egonaldiaz disfrutatu dezatela espero dugu.
Alternatibako Mahai Internazionalistako bozeramaile Diana Urreak ontzat eman du Gazako Zerrendan hitzartutako su etena “50 egun eta 50 gau iraun ditun erasoaldi desorekatu bati amaiera ematen diolako, milaka emakume, gizon eta ume bonbardatu eta sarraskitu dituena, Israelgo Estatuaren okupazioa hasi zenetik bere lurraldeen askatasuna aldarrikatu duen herri baten eskubideak modu sistematikoan urratuz”.
Aldi berean, Urreak Israelen ‘behin-betiko’ su eten delako hori “engainagarritzat jo du” hain zuzen “aurreko menia guztiak hautsi dituenean”. Horrexegatik, “estatu genozida honi adi kasu egitearen beharra” azpimarratu du, “bere helburu bakarra kolonizazio hedapen proiektuarekin aurrera egitea eta herri palestinarra ezabatzea delako”.
Egoera honen aurrean, Alternatibatik “nazioarteko herrialdeen isiltasun konplizea” salatu nahi izan dute, beste behin ere, “neurri honetako genozidio baten aurrean ezikusiarena egin dutelako”. Hau dela eta, alderdi ezkertiarretik Euskal Herriko jendarteari zein munduko herri solidario guztiei dei egin diete “Palestinaren askatasuna aldarrikatzen eta BDS mugimenduaren boikot kanpaina babesten jarrai dezatela, Palestinako herriaren oinarrizko eskubideak behin eta berriro zapaltzen dituen apartheid sistema honekin behingoz buka dezagun”.
ISIL taldea, Ekialde Hurbilean, egun hauetan, komunitate etniko eta erlijioso desberdinen aurka aurrera eramaten ari den ofentsibaren aurrean, EHBilduk ondorengoa adierazi nahi du:
Kurdistandik, erregio honetako gutxiengoen genozidio arriskuaren inguruan helarazten ari zaizkigun berriak direla eta zeharo kezkatuta gaude.
Egun hauetan, Irak iparraldeko nahiz Kurdistan hegoaldeko kristau, asiriar, ezidi, chiita eta aluitar komunitateak ISILen jazarpen sektario eta totalitarioaren biktima izaten ari dira.
Arrazoi horregatik, milaka zibil erailak izan dira eta milaka emakume bortxatuak eta esklabo gisa salduak izan dira. Era berean, 40.000 pertsona baino gehiagok (Turkomanoak, ezidi kurdutarrak) Shengal mendian errefuxiatu beharrean aurkitu dira. Bertan ez dute ez urik ez elikagairik, hamarnaka lagun hiltzeko arrazoia izan da. Kurduar gerrilla hauek babestera hurbildu badira ere, ISILen ofentsibak aurrera darrai komunitate hauen aurka.
Horregatik, EH Bilduk:
1.- Ofentsiba hau jasaten ari diren herri nahiz komunitateei elkartasun agur bat helarazten die.
2.- Indar kurduek, desberdintasunen gainekin, kurduen nahiz bestelako gutxiengo ez kurduen giza eskubideen defentsan elkarrekin joateko egin duten esfortzua agurtzen du.
3.- Hego Kurdistango Gobernu Erregional Kurduarren autoritateek nahiz oro har indar kurduek errefuxiatu guztiak (kristau, asirio, ezidi, chiita, alauita eta turkomanoak) jasotzeko eta babesteko azaldutako disposizioa aitortu eta eskertzen du
4.- Nazioarteko komunitateak errefuxiatuak babestu eta hauei laguntza eskaintzeko deia egiten du
5.- Gure babes osoa adierazten diegu milizia kurdu eta Gobernu Erregional Kurduari giza eskubideen defentsan betetzen ari den funtzioetan.
Alternatibako bozeramaile nazional Asier Vegak ETAren agiria izan du hizpide “bake prozesua eta gatazkaren konponbidea oinarri duen pauso definitiboa dela” ziurtatuta. Vegak “agiri honen bitartez, konfrontazio desberdinen eraginez izan diren ondorioak gainditzeko bidea ireki dela” uste du, “bake justua eta iraunkorra lortzea ahalbidetuko duena”. Aldi berean, ETAk “eragileen lekua hartzeko duen borondaterik ez duela” azpimarratu du, “Euskal Herriko indarren elkarlanari eta gizartearen aktibazioari protagonismo osoa emanez”.
Zentzu horretan, alderdi ezkertiarreko bozeramaileak “Espainiako gobernuari, presoen irteera progresibo baten bitartez bere espetxe politikaren erabateko aldaketa exijitzeko garaia dela” nabarmendu du; duela 30 urte baino gehiago egin bezala, egun modu arbitrarioan eta helburu politiko argiekin urratzen diren euskal presoen eskubideak berrezartzea ahalbidetuko duena. Eta bide batez, Euskal Herrian indarkeria poliziala eta paramilitarra pairatu dutenenei sufrimendua aitortzea, oraindik biktima izaera ere ez dutenak”.
Aldi berean, Vegak horrela berretsi du “Auzitegi Nazionala bezalako salbuespen epaitegi bat existitzea eta armak utzi dituen erakunde bati lotutako berariazko lege antiterrorista egitura oraindik aplikatzea inolako zentzurik ez duela”, eta horregatik, “espetxe politika salbuespenak mantentzea eutsiezina dela” adierazi du. Hau dela eta, “sakabanaketaren amaiera eta zigorra bete edota gaixo larri dauden presoen berehalako kaleratzea exijitu du”.
Bukatzeko, Alternatibatik sakabanaketaren erabilpena inoiz defendatu duten eta oraindik ere defendatzen duten indar politikoak – PP, EAJ eta PSOE – premiatu ditu “euskal gizartearen gehiengo zabalaren eskaerari entzungorrarena egiteari utz diezaioten eta behin betikoz, praktika antidemokratiko honekin amai dezatela, Bake Foro Sozialaren aholkuek jasotzen duten moduan”.
Estatu espainiarra bere horretan dirau; epaiketa politikoak ezkerreko mugimendu zein ekintza politikoak zapaltzeko tresna boteretsua eskuan. Oraingoan, beste hainbatetan bezala, euskal gazteria du ituan, eta geziak zorrotz datoz. Makroepaiketa berri honek Euskal Herriko 28 gazteen kontra egiten du, beste modu batean pentsatu eta gizarte libreago bat aldarrikatu eta eraiki nahi izanagatik.
Egoera honen aurrean ezin gara geldirik geratu eta ez gara geldirik geratuko. Horregatik, Alternatibatik euskal gazteriaren kontrako jazarpen berri hau salatu nahi dugu eta behingoz, eskubideen urraketa sistematikoarekin buka dezatela eskatzen dugu. Epaiketa honekin gazteen kontra egin ez ezik, euskal herritar guztien eskubide oinarrizkoena ari direlako zapaltzen: adierazpen askatasuna, alegia.
Hau guztia dela eta, makroepaiketa bertan behera uzteko exijitzen dugu, edota pasa den ekainean Entzutegi Nazionalak auziperatutako 40 gazte absolbitu zituenean bezala, 28 gazte hauek ere absolbitzea.
Garai latzak izan dira eskubide zibil eta politikoentzat, adierazpen askatasunaz hitz egiteko eta pentsatzeko aukera gabekoak. Baina harresiak botatzeko eta hainbat hamarkadetan pairatutako bidegabekeria horrekin bukatzeko garaia heldu zaigu orain. Horregatik, euskal herritarrok ez dugu amore emango eta ez dugu gure gazteen kontrako jazarpen gehiagorik onartuko. Tinko mantenduko gara 28ak ere jazarpenik gabe eta libre izan arte!
#28akereLIBRE nahi ditugu! Gora euskal gazteria!
Toni Ramos eta Cristina Bereziartua – Alternatiba Araba
Maroto jauna, egunotan egin dituzun adierazpen arrazista eta xenofoboen aurrean, gure gaitzespenik irmoena ozen adierazteko beharra sentitzen dugu. Ez dakigu herritarrekin nahita aritu zaren gezurretan edo zure ezjakintasuna azaldu besterik ez ote duzun egin ziurtatzean aljeriarrak eta marokoarrak laguntza sozialak jasotzeko Gasteizen erroldatzen direla. Zure iruzur sozialaren aurkako gurutzadaren datuak ikusita, argi dago erroldatik kanporatutako pertsona gehienak, %75, bertakoak direla, eta %18ra ere heltzen ez direla jatorri magrebtarrekoak. Ez legoke gaizki zurea bezalako kargua dutenek informazioa bilatzea halako salaketa larriak egin aurretik, are gehiago herritar guztiek -zuk ere bai- dakitenean zure alderdiko bulego dotoreetan esertzen direnetako asko iruzurrarekin eta ustelkeriarekin harreman zuzena dutela, herritarren lepotik gainera, diru publikotik milioika euro desagerrarazten dituztela. Beraz, zuzenagoa litzateke esatea zu zeu, PPkoa izate hutsagatik politikari ustela zarela, pertsona jakin bat magrebtarra izateagatik iruzurra egiten duela esatea baino.
Zoritxarrez, zure adierazpen arduragabeekin ohituta gaude dagoeneko, are okerrago, ildo beretik doazen politikak ezartzera ohituak gaituzu, Frantzian Le Pen bezalako muturreko eskuindarrek babestutako politiken parekoak direla. Mota honetako diskurtsoak, Maroto jauna, arrazakeria eta xenofobiaren txinparta piztu besterik ez dute egiten krisiak kolpatutako gizartean, etorkinak egoera horren errudun bilakatuta. Baina egoera hau, zure alderdiak Gasteizko Udalean, Arabako Aldundian zein Espainiako Erresumaren Gobernutik ezarritako politiken emaitza zuzena dira. Zure hitzak gezurra baino askoz gehiago dira, gizartean pentsamolde faxistari bide egiten dion pozoitzea ekar dezakete.
Oker dabilena, are gehiago oker dabilena alkatea denean eta herritarrei kalte egiten dienean, okerra zuzendu eta publikoki barkamena eskatu behar du. Baina egia esanda, ez dugu uste hala jokatuko duzunik, zure politika arrazista eta xenofoboak aldatuko dituzunik uste ez dugun bezala. Ez dirudi, halaber, arduraz aritzearen argia piztuta diskurtso populista lagako duzunik hitz pedagogikoak eta arrazoituak erabiltzen hasteko. Eta benetan diogu, Maroto jauna, gustatuko litzaigukeela honetan oker dabiltzanak gu izatea.
Estatu espainiarrak presoei eragindako mina erabiltzen ari da EAJ gaurkotasunaren arreta mahi gainean dauden gai garrantzitsuenetatik aldentzeko asmoz, jeltzaleen Euskadi ereduaren porrot ikaragarria irudikatzen dutelako.
Euskal preso politikoek zigorra pairatzen ari dira, egungo garai politikoarekin zein euskal gizartearen gogoarekin bat ez datorren zigorra. Eta hala ere, ezin daiteke esan gatazka gainditzeko eta elkarbizitza eraikitzeko urratsak egiten ez direnik. EAJ arduragabekeriaz jokatzen du herritarren artean kezka sortzen duen gatazka beren gabeziak ezkutatzeko baliatzen dituenean.
Eta bitartean, EAJk oraindik ez du argitu eskubide urraketa hauen eta beren ondorioen gainean non kokatzen den. Sakabanaketak istripuak eragiten dituela eta legearen arabera gaixotasun larriak dituztelako aske egon behar luketen presoak ziegan jarraitzen dutela, norekin dago EAJ? Euskal gizartearen gehiengoaren borondatearekin edo Madrilera begira? Momentuz bigarrena hautatzen duela dirudi.
Euskal gizartea engainatzeko taktikaren azkenean gaude. Kutxabanken kontrol publikoarekin bukatzeko prozesua bultzatu dute eta Fundazioen Batzarretako eserlekuak tarta pribatua balitz bezala banatu dituzte. Madrilen onartutako legediaren ustezko inposaketaz ari dira, Kutxa eta Banku Fundazioen legea haiek onetsi zutela ezkutatu nahian.
Bizkaiko fiskalitate zuzenaren istorioa behin eta berriro errepikatzen digute, errealitateak aberastasunaren bidezko banaketari begira dauden eredu progresiboagoak badirela erakusten digunean, eraginkorragoak eta haien iragarpen apokaliptikoak betetzen ez diren bitartean.
Eusko Legebiltzarrak Epsilon-Hiriko kasuari lotutako ikerketa komisioa ixtear dago, EAJk diru publikoa enpresa pribatuetara bideratzeko duen zaletasun handia agerian utzi duena, besteak beste, Abiadura Handiko Trenaren lanetan atzemandako irregulartasun larriak.
EAJren kudeaketa zuzenaren irudipen horrek lurra jotzen ari du eta Itxaso Atutxak, aurretik Ortuzar eta Erkorekak egin bezala, euskal preso politikoen sufrimenduaren atzean ezkutatzen saiatzen da.
EHBildu
Prentsa agerraldia egin dute gaur Irune Soto eta Asier Vega batzarkideek (Alternatibako kidea ere bigarrena) Bizkaiko kurtso politikoaren balantzea egiteko.
Joan den astean izan genuen Batzar Nagusietan azken osoko bilkura eta horrekin batera amaitu da legegintzaldi honetako hirugarren urtea. Beraz, momentu egokia da Bizkaiko Aldundiaren jardunaren inguruko eta Bizkaiko egoerari buruzko balorazioa egiteko. Hala egin dugu EH Bilduko batzarkide taldeko kideok eta gaur zuekin konpartitu nahi dugu hausnarketa hori.
Lehenik eta behin, Jose Luis Bilbaoren eta EAJren ekimen faltaz hitz egin beharrean gaude. Iniziatiba gabezia oso nabarmena da eta Bizkaiko Aldundiaren gaitza bihurtu da. Hainbesterainokoa da EAJren utzikeria, ez dela bizkaitarron behar nagusiei inolako erantzunik eskaintzeko gai izan.
Jose Luis Bilbaok enpleguaren sustatzea finkatu zuen Aldundiaren lehentasun gisa. Eta zer ikusi dugu aurten, ez bada Bizkaiak 100.000 langabetu dituela? “Enplegu Plan Berezia”-rekin Bilbao jaunak ez du ezer berririk eskaini, ez du apusturik egin, EAJk ez du Bizkaian enplegua sortzeko estrategia eta norabiderik. Gainera, lan baldintzak kaskartzea helburu duten erasoen aurrean, Aldundiak ez du neurri bakar bat ere hartu, sindikatu eta langileekin batzeko trabak jarri ditu gatazka gehienetan eta obra publikoetan publikoetako baldintza duinak ez ditu bermatu. Guztion diruaz finantzatu diren obretaz ari gara; dela San Mames, dela Bilboko Portuko lanetan. Aldundiak ez du sekula iniziatibarik hartu egoera horiei aurre egiteko.
Era berean, Bilbaoren gobenuak ez du ahaleginik egin sektore publikoaren bultzadaz enplegu egonkorra sortzeko. EH Bildutik erabakiorra deritzogu egun pairatzen dugun egoerari aurre egiteko sektore publikoak jokatu behar duen papera. Zentzu horretan, inbertsio sozialaren aldeko apustu garbia egiten dugu. Batetik, behar sozialei erantzuna emateko bidea delako beharrak geroz eta handiagoak diren honetan. Eta bestetik, kalitatezko enplegua sortzeko ere balio duelako. Horri, jarduerak sortzen duen itzulera ekonomikoaren abantaila gehitu behar zaio. Aldundiak ez du urrats bakar bat eman norabide horretan.
Oinarrizko beste zenbait eskubide ere aurrez aurre kolpatzen dituzte Aldundiaren politikek. Adibidez, etxebizitza eskubidea. Zer egin du Bizkaiko Aldundiak herrialdean izan ditugun milaka etxegabetzeak ekiditeko? Zer egin dute Aldundiak eta EAJk BBKn dituzten ordezkariek etxegabetzeen kontra? Zergatik ez die Aldundiak familia kaltetuei guk proposatutako laguntza psikologiko eta juridikoa eman nahi izan? Zergatik ez ditu erraztu Aldundiak bere esku dituen etxe hutsak? Oraindik 88 etxe mantentzen ditu hutsik. Herritarrenganako konpromiso faltak gidatu du Aldundiaren eta EAJren jarduna gai honetan ere.
Bizkaian pobrezia tasak gora doazen honetan, gizarte laguntzetan murrizketak aplikatu ditu Bilbaoren gobernuak. Laguntzak eskuratzeko baldintzak gogortu ditu. Politika prebentzionista bat bultzatu beharrean, arazoei aurre egiteko nahikoak ez diren partxeak jartzera mugatzen da.
Herritarren beharrekiko inplikazio faltak badu txanponaren kontrako aldea. Bizkaiko Aldundiak konpromiso oso sendoa agertu baitu, herritar guztion dirua xahutzen jarraitzeko. Horren erakusgarri, BECen kasua. BECen gestio txarrak eragiten duen zuloari buelta emateko gai izan ez, eta gainera, zorra itzultzeko atzerapenaren ondorioz, interes gehiago ordaindu beharko dugu bizkaitarrok. Supersurraren defizitak ere hazten jarraitzen du.
Bitartean, Kutxabank pribatizatzeko edo Bilbao Basket taldea bi aldiz erreskatatzeko zeru lurrak astintzeko gai direla erakutsi digute Aldundiak eta EAJk. Baina hatz bakar bat ere ez dute mugitu bankuak etxegabetzeak eten ditzan. Gogoratu behar da, Kutxabank dela Bizkaian etxegabetze gehien exekutatu dituen bankua.
Herritarren behar nagusienentzako ahaleginik ez du egiten Aldundiak baina Bilbao Basket erreskatatzeko 5 milioi euro baino gehiago berehala topatu zituen. Baita inolako bermerik eskatu gabe eman ere. Bestela, nola da posible sei hilabete beranduago, kluba kiebran egotea?
Bizkaiko Aldundiak hartzen dituen erabakiak ez dira gizartearen gehiengo zabalaren interesen aldekoak. Gutxi batzuei egiten die mesede eta gehiengoaren kontrakoak dira. Horregatik, Aldundi honen hirugarren ezaugarri nagusia, beharrezkoa zaiona, iluntasuna da.
Bilbaoren gobernuak zurruntasun osoz jokatzen du Bizkaiko gizartearekiko. Informazio partziala eskaintzen du, oinarrizko datuak ezkutatzen ditu eta oposizioaren lana oztopatzen saiatzen da ahalik eta gehien, Aldundiaren zenbait erabaki herritarrek ezagutu ez ditzaten.
Berezkoa du halaber, erabakiak bulego itxietan hartzea, gizarte eragileen parte hartzea ukatzea, eskakizunak dituzten herritar taldeekin ez biltzea. Finean, gizartearekiko urrun mantentzea. Ukiezina izatea.
EH Bildu osatzen dugunok bestelako gizarte bat dugu helburu. Egun daukagun ereduari buelta emateko aldaketa beharrezko ikusten dugu. Erakundeak gizarte beharrei erantzuteko daude eta norabide horretan jarri behar ditugu lanean. Guztion diruarekin kudeaketa arduratsua egin eta beti gizarte onuraren mesedetara bideratu behar dira guztion baliabideak. Horretarako, berme bakarra, erakundeen gardentasuna eta gizarte sektoreen parte hartzea dira.
EH Bilduk eta batzarkide talde honek, horretan jardungo du lanean eta norabide horretan jarraituko dugu Jose Luis Bilbaoren gobernuaren jarduna kontrolatzen. Bizkaian pairatzen dugun politika injustuak azaleratu eta gizarteratzen ahaleginduko gara indar eta ilusio guztiekin.
EH Bildu Bizkaia
Alternatiba | Ezkerra eraldatzearen erronka
