Eusko Alkartasunak eta Alternatibak Nafarroako lekukoari heldu diote eta ezkerreko subiranistekin bilerak iragarri dituzte Hego Euskal Herri osorako ahalik eta subjektu elektoralik anitzena lortzeko asmoz

Bilbon, 2011ko martxoaren 29an
Eusko Alkartasunak eta Alternatibak aldaketarako deia egin zuten nafar ordezkarien lekukoari heldu diote, herrialde horretan ez ezik, Hego Euskal Herri osora zabaltzeko asmoz.

Erakunde biek, ezker abertzalearekin batera Euskal Herria Ezkerretik akordioa sinatu zutenak, beharrezkotzat jo dute euskal gizarteari subjektu elektoral berria aurkeztea, ezkertiarra eta subiranista, sigletatik eta hauteskundeetatik haratago gogoak bilduko dituena eta gure herrian aldaketa gauzatzea ahalbidetuko duena.

Hala, ezkerreko subiranotasuna, betorik eta bazterketarik gabekoa, ordezkatuko duen eskaintza plazaratzeko lanean hasiko direla iragarri dute. Joan den larunbatean, Lizarran, Nafarroako milaka herritar ordezkatzen dituzten indar politikoek subjektu abertzale, azkertiar eta aurrerakoi bat sortzearen alde egin zuten, bakarrik bide demokratiko, bakezale eta demokratikoetatik aldaketa politikoa eta soziala sustatuko duena, eskumari eremu guztietan aurre egingo diona.

Gaur goizean eginiko bileran, erakunde biek egitasmo horrekin bat egin dute eta eremu guztietako ezkerreko indar subiranistekin harremanak hasiko dituztela iragarri dute, Araban, Bizkaian eta Gipuzkoan ere ahalik eta akordiorik zabalena lortzeko helburuan indarrak biltzeko. Larunbatean Lizarran irekitako lan ildotik aurrera egin eta lan egiteko prest dauden pertsona independenteak badirela jakinda, harremanak berehala hasiko
dituzte erakunde bietako ordezkariek.

Eusko Alkartasunaren eta Alternatibaren ustez, abagune politiko berria ilusioz beterik dator, zeinetan ezker anitzek, subiranistak eta independentistak, Euskal Herrian aldaketa sakona eragingo duen agenda bateratua jorratzeko prest dauden. Horixe bera da, bi erakundeetako ordezkarien arabera, milaka eta milaka euskal herritarrek duten itxaropena eta eskakizuna, pertsona guztien eskubide guztiak errespetatuko dituen Euskal Herri baten alde borrokatzeko.

Eusko Alkartasuneko eta Alternatibako bozeramaileek adierazi dutenez, datozen foru eta udal hauteskundeak eraketa prozesu baterako bultzada izan daitezke, hauteskundeetan amaiera izango ez duena eta Euskal Herri subiranoa eraikitzen saiatuko dena, behetik eta ezkerretik.

Euskal Herriarentzat normalizazioa: LEGALIZAZIOA ORAIN!

Espainiako Auzitegi Gorenak Sortu alderdi politikoa ez legeztatzeko hartu duen erabakiak euskal gizartearengan eragindako egonezinaren jabe gara. Azken batean, Sortu ez legeztatzeak espainiar Estatuak euskal herritarren oinarrizko eskubide zibil eta politiko guztiekiko duen begirune eskasa berriro agerian uzten du. Gure iritziz, bake eta normalizazio politiko agertoki baterantz bidean, giza eskubideak oinarri izanik, eskubide zibil eta politiko guztiekiko begirunea ezinbestekoa da.

Tamalez, Espainiako Auzitegi Gorenak hartutako erabakiak berriro ere espainar Estatuak heldutasun demokratiko eskasa erakutsi du. Gernikako Akordioa izenpetu dugun eragile guztion aburuz, espainiar Estatuak legalizazioak eta jarduera politiko guztien normalizazioa kontrapartida politikorik eskatu gabe eman behar ditu

Gauzak horrela, ez dugu zalantzarik erabaki berri honen bitartez espainiar Estatuak Euskal Herrian abian dagoen bake eta normalizazio prozesua zapuztu nahi duela. Gainera Auzitegi Gorenaren erabakia ez da, zoritxarrez, uharte bat ozeano zabalean, ezta gutxiago ere. Azken hilabeteetan Estatuak Euskal Herrian behin eta berriz oinarrizko eskubideen aurkako jarduera latzak kateatu egin ditu, hala antolakunde independentistetako kideen atxiloketak nola tortura kasu izugarriak.

Badakigu Euskal Herriko jendarteak bake eta normalizazio politiko agertokia nahi eta behar duena. Badakigu Euskal Herriko gehiengo politiko, sindikal eta sozialak eskaera honekin bat egiten duena. Hargatik, Gernikako Akordioarekin bat egin dugun eragileok espainiar Estatuak euskal jendartearen gainean etsipen zama astuna utzi nahi duela pentsatzen dugu.

Gernikako Akordioa sinatzen dugunok Euskal Herriko jendarteari gaurkoan ere prozesu honen motorea izan behar duela jakinarazi nahi diogu, berari eta bakarrik berari prozesu honetako protagonismo guztia baitagokio. Gure lana jendarte horren mesedean tresnak jartzea da, prozesuaren baitan dagokion protagonismoa har dezan tresnak eskaintzea, hain zuzen ere. Luze jotzen duen ibilbidea egiteko tresna berriak, tresna desberdinak eskaintzeko konpromisoa hartzen badugu ere, gaurkoan etsipen oro gaindituz bidea eginez segitzeko tresna zehatza jarri nahi dugu Euskal Herriko jendarte osoaren esku: apirilaren 2an, Bilbon La Casillatik arratsaldeko 5´30etan abiatuko den nazio manifestazioan parte hartzeko deia luzatzen diogu. “Euskal Herriarentzat normalizazioa. LEGALIZAZIOA ORAIN!” lelopean Bilboko kaleak legalizazioa eta jarduera politiko guztien normalizazioa nahi dituen gizarte oso baten bozgoragailuak izango dira.

Alternatiba: “Hauteskundeek defizit demokratiko larria izateko arriskua dute Euskal Herrian, Sorturen aurkako epaiaren ondorioz”

DONOSTIAN, 2011KO MARTXOAREN 24AN – Datozen udal eta foru-hauteskundeek Euskal Herrian pairatuko duten defizit demokratikoaren aurrean, Alternatibak “erantzun bateratua” emateko dei egin ditu euskal alderdiak. Izan ere, “itzulipurdi juridiko harrigarriaz” baliatuz, Auzitegi Goreneko 61eko aretoaren epaiak “errugabetasun-presuntzioa urratu eta errunduntasunarena ezartzen du, Zuzenbidezko Estatua behin-betiko hautsiz”.

Epaiaren eduki osoa oraindik ezagutzeke dagoen arren, Alternatibako bozeramaile Oskar Matutek aurreratu du funtsezko oinarri juridiko batzuk urratuko dituela: “Hasteko, frogatu beharraren kargaren inbertsioa egiten du eta auzitara eramandako subjektua behartzen du Alderdien Legea betetzen duela frogatzera, lan hori Fiskaltzaren eta Estatuko Abokatutzaren esku utzi beharrean”. Hori dela eta, “errugabetasun-presuntzioa urratu eta errunduntasunarena ezartzen da”.

Era berean, “sinesgarritasun kontzeptua” oinarri juridiko gisa “onartezina” dela nabarmendu du Matutek. Batez ere, “araudiak a posteriori egindako ilegalizazioa eta hautetsiei aktak kentzeko aukera” aurreikusten duela kontuan hartuta. Azaldutako guztiaren ondorioz, erabaki honek “alderdi zein gobernu jakin batzuek hainbestetan aipatzen duten Zuzenbidezko Estatu horren haustura” suposatzen duela gaineratu du Matutek.

Sorturen aurkako sententzia “bidegabekeri hutsa” izanda ere, “ziur gaude Ezker Abertzaleak bide demokratiko eta baketsuei eutsiko diela, indarkeria errefusatuz eta bizitza publikoan parte hartzeko eskubidea ukatzen dioten lagun horiei nabarmen utziz”, buruzagi ezkertiarrak adierazi duen legez.

Alternatibak “esperpento politiko-juridikotzat” jo du Espainiako Auzitegi Gorenaren epaia eta “PP eta PSOEren borondateari” men egiten diola salatu du

Alternatibak “esperpento politiko-juridikotzat” jo du Sorturen legeztapena eragotzi duen Auzitegi Gorenaren epaia “PP eta PSOEren borondate politikoari” men egiten diolako, oinarri juridikoei baino.

Sententziaren argudioen “arbitrariotasuna” salatzeaz gain,  Alternatibako bozeramaile Oskar Matutek gogorarazi du saiakera berri honek milaka euskal herritarren parte-hartze politikorako eskubidea “bahitzeko” helburua duela.

Matutek adierazi du “Espainiako politikarien alderik erreakzionarioenak” ezarritako oztopoek ezin izango dutela  geldiarazi “euskal jendartea eskatzen ari den aldaketa politikoaren eta sozialaren aldeko apustua”.

Zentzu honetan, hauteskundeei begira euskal herritarrek “eragile politiko batzuen zein besteen borondate politikoa” baloratzen jakingo dutela gaineratu du. Azkenik, Alternatibako bozeramaileak Gorenaren erabakia deitoratu egin du “ustez demokratikoa den sistema honen kalitatea” are gehiago murrizten duelako.

BILBOn, 2011ko MARTXOAren 1ean – Alternatibako bozeramaile Oskar Matutek PSEren eta PPren jokaera salatu du, UPyDren laguntzarekin batera, “Eusko Legebiltzarra Eusko Irrati Telebista EiTBk euskal herritarrei eskaini behar dien izaera informatiboa zentsuratu eta perbertitzeko erabili dutelako”. Alderdi hauek, erakunde publikoaren Kontrol Batzordearen baitan, legez kanpo dauden alderdi eta ordezkariak EiTBko programetara ez eramateko eta haien berri ez emateko eskatu zioten EiTBko zuzendaritzari. Matutek gogorarazi duenez, “hiru hilabete besterik ez dira pasa, abenduaren 2an, Gasteizko Legebiltzarrak EiTBri aho batez eskatu zionetik egiazaletasuna, iritzi aniztasuna eta interes informatiboa berma dezala eta horiek izan daitezela bere albistegiak garatzeko ardatzak, “irrati-telebista publikoa beren proiektu politikoaren zerbitzura jartzea erabaki dutenek atzo onartu zutenarekin talka egiten duen eskaera da hau”.

Eusko Legebiltzarreko VIII. legealdian EiTBko Kontrol Batzordeko presidente izandako Matutek, “deitoragarria” iritzi dio “bere burua demokratatzat duen parlamentuak zentsura informatiboaren aldarri egitea” eta bere elkartasuna adierazi die komunikabide publikoan ari diren profesionalei, “euskal gizartearekin batera, EiTBko askatasun informatiboaren biktima direlako”. Era berean, Alternatibako bozeramaileak Carlos Urquijo (PP) bezalako legebiltzarkideen hipokresia salatu du, ideia guztiak ez direla zilegi babestu eta, adibide gisa, arrazakeriaren aldeko talde bat komunikabideetan ez dela agertu behar ziurtatu duelako. Emandako argudioaren arabera, Matutek PPren zentsura informatiboa eskatzeko galdegin dio Urquijori, “bere alderdikide katalanek etorkinen aurkako kanpaina irekia egin berri dutelako”, eragile askok salatu dutenez, PSOEk berak kasu.

Patxi Lopezen Gobernuari, bestetik, “euskal gizarteak EiTBren erabilera alderdikoiari bizkarra eman” diola gogorarazi dio ezkerreko buruzagiak, “ikus-entzuleen datuek hilabetez hilabete erakutsi dutenez. Datu hauen adierazgarritasunetik haratago, Matutek PSE-PP itunak euskal irrati telebista publikoaren gidaritzapean emandako “lorpen zalantzagarrietako” batzuk azpimarratu nahi izan ditu: “Albistegietako langileak presionatu eta espedienteekin ere mehatxatu egin dituzte, ituneko politikariek elkarrizketak aldez aurretik gainbegiratzea ahalbidetu dute, atzoko batzordean jakinarazi zenez. Horrez gain, EHUko Gizarte eta Komunikazio Zientzien Fakultateko katedradun eta irakasle ugariren artean kezka handia eragin dute, duela gutxi horietako askok adierazi zutenez. Noski, PP-PSEk zehaztutako irizpideak jarraitu ez dituzten programak, langileak eta kolaboratzaileak kaleratzeko trebetasuna ere izan dute, eta gehiengoa duten sindikatuek kontra jartzea eragin dute”.

Guzti horregatik, Matutek “EiTBren gaineko kontrola, zaintza eta zentsura lagatzeko” exijitu dio Eusko Jaurlaritzari eta informazioa anitza, egiazalea eta gizartearen zerbitzura jartzearen aldeko apustua egiteko eskatu dio.

DONOSTIA, 2011KO OTSAILAREN 25A – Alternatibak gaur berretsi du ez dela kikilduko Espainiako Lehendakaritza ministro Ramon Jauregiren ilegalizazio mehatxuen ostean. Aitzitik, dagokion lan politikoari askatasunez eta demokratikoki ekingo dio: “Gure ideiak defendatuko ditugu Sorturekin, EArekin zein aldaketa politikoa eta soziala helburutzat duen ezkerretik abiatutako iraultza baketsuaren alde dagoen edozein alderdi nahiz herritarrekin batera”.

Modu honetan erantzun dio alderdi ezkertiarreko bozeramaile Oskar Matutek atzo Jauregik egindako adierazpenei. Ministroak ohartarazi zuen legez, Espainiako Gobernuak Alternatibako eta EAko hautes-zerrendak aztertuko ditu “kutsatutako” Ezker Abertzaleko kideen bila.

“Alternatibak osatuko dituen hautes-zerrendak kostu baxuko demokrazia honi haize pixka bat eman nahi dioten herritarrek baino ez dituzte kutsatuko. Hau da, herri honek aldaketa bat behar duela uste duten herritarrak izango dira: aberastasuna era egokiagoan banatuz, gizarte-eredu desberdina sustatuz eta giza-eskubide, eskubide zibilen eta politikoen defentsa irmoari ekinez”, erantzun du Matutek.

Buruzagi ezkertiarrak “deitoragarritzat” jo du “Erreinuko gobernuak aro politiko berriari eta euskal gizarteak iragan larunbateko manifestazio jendetsuan plazaratutako eskaerari ilegalizazioaren mamua sektore gehiagorengana zabalduz” erantzun izana. Honek zera esan nahi du: “Gurea bezalako taldeen eskubide zibilak eta politikoak praktikan urratzen ari direla, gure zerrendetan hautetsi independenteen presentzia mugatu nahi dutelako. Hau guztia Berlangaren “Todos a la cárcel” filmearen antza hartzen ari da”.

Matutek ohartarazi du Alternatibak ez duela “inoren tutoretzarik” onartuko. Era berean, gogorarazi du ez dagoela prest “bizitzaren zein oinarrizko eskubideen defentsari buruzko ikasbiderik” onartzeko “euren erantzukizun instituzionalaren jardunean, gure gizartean giza eskubideen urraketak saihesteko gai izan ez direnen aldetik”.

Alternatibak “esperpentikotzat” jo du Sortu “ETAren tresna hutsa” dela “inongo froga fidagarririk gabe” dioen txosten poliziala. Aldi berean, Espainiako gobernuari sorgin ehizarekin amaitu dezan eta susmoaren itzala zabaltzeari utzi diezaiola eskatu dio. “Egunkaria eta Udalbiltza auzietan gertatu bezala, txosten polizialek ETArekin lotura izatea leporatu diote Sorturi inolako froga barik”, Alternatibako bozeramaile Oskar Matutek azaldu duen legez. Gainera, txostenok Alternatiba aipatzen dute Ezker Abertzalearekin akordio estrategikoak izateagatik.

“Hau guztia ondorioztatu dutenek Egunkaria itxi eta Udalbiltzako kideei terrorista deitu zieten indar polizial berak dira. Espainiako gobernua arinkeriaz salatzeko ohitura dauka Euskal Herrian. Izan ere, herri honetan susmoaren orbana tesi ofizialak kolokan jartzen dituen edozein gizarte eta politika arlora zabaltzen da”, salatu du bozeramaileak.

“Orban hau Alternatibara heltzen ari da”, Matuteren hitzetan. Alternatiba Espainiako Polizia Nazionalaren eta Guardia Zibilaren txostenetan agertu da Ezker Abertzaleko kideekin akordio estrategikoak lortu dituelako. “Gurea hutsik gabeko ibilbide demokratikoa da eta ez dugu onartuko inork bakearen eta normalizazio politikoaren alde daukagun konpromisoa zalantzan jarri dezan, horren alde denbora luzea daramagulako borrokan”, ohartarazi du buruzagi ezkertiarrak.

Hori dela eta, Espainiako Gobernuari sorgin ehiza bukatu dezala eskatzeaz gain, Matutek “indarkeria mota guztiak euren estatutuetan errefusatzen duten alderdi zein lagunak” seinalatzeari uzteko eskaera egin dio, jarrera horrek demokraziaren kalitatea kaltetzen duelako, hain zuzen.

BILBON, 2011ko OTSAILAren 15ean – Alternatibak datorren larunbatean, otsailak 19, Bilboko kaleak zeharkatuko dituen manifestazioarekin bat egin du, euskal politika, kultura eta gizarteko 22 ordezkari ezagunek deitutakoa eta bakea zein Sorturen legeztatzea eskatuko duena. Martxa isilak ‘Bakerantz, legalizazioa’ leloa izango du eta gizartearen gehiengoaren borondateari erantzun egingo dio, “indarkeriarik gabeko bidetik aurrera egitea aukera politiko guztiak zilegi direla”.

Ildo honetatik, Oskar Matute Alternatibako bozeramaileak gogorarazi du “herritarrak direla, haien botoekin, apustu politikoak berretsi edo ezeztatu behar dituztenak” eta, horrexegatik, “beharrezkoa” deritzo “ezker abertzaleak datozen udal eta foru hauteskundeetan” egoteari. Errefusatu ditu, aldiz, “hauteskunde interesei jarraituta euskal gizartearen zati adierazgarri baten botoa bahitzen jarraitzeko legeak sortu eta manipulatzeko asmoak dituztenak”.

 “ETAren indarkeria behin betiko baztertuta izango duen garai berriaren beldur diren alderdiak eta erakundeak” egotea deitoratu du Matutek eta, azpimarratu du, halaber, “eskubide zibil eta politiko guztien urraketak gaindituko dituen egoera eraikitzea beharrezkoa dela gatazka gainditzeko”. Hori dela eta, Alternatibako bozeramaileak Brian Currin abokatu hegoafrikarrak sustatutko Nazioarteko Harreman Taldeko kideen bitartekaritza txalotu du.