Euskal Herria – 76 orrialdea

EHBilduk Abortatzeko Eskubidearen Nazioarteko Egunaren harira bihar egingo diren manifestazioetan parte hartzera deitu du

Alberto Ruiz Gallardon justizia ministroaren eta Ana Mato osasun arduradunaren mehatxuaren aurrean, emakumeek beren bizitzaren, sexualitatearen eta amatasunaren gainean erabakitzeko eskubidean atzera egin nahi duen Abortuaren Legea laster egingo dutela iragarrita, Euskal Herria Bildutik irmo arbuiatu nahi dugu erreforma atzerakoi hau.

Horregatik, koalizioko ordezkariok kalean izango gara bihar, irailak 28, Abortatzeko Eskubidearen Aldeko Nazioarteko Egunean, Euskal Herriko herri eta hirietan mugimendu feministak deituta egingo diren elkarretaratze desberdinetan, emakumeek beren gorputzaren gaineko erabakitzeko eskubidea aldarrikatu eta Mariano Rajoyren Gobernuak egin asmo duen erreforma legegilea salatzeko.

EHBildutik, beren gorputzen, sexualitatearen eta amatasunaren gaineko emakumeen autonomiaren defentsa berretsi nahi dugu, eta abortua kode penaletik kendu beharra ere. Izan ere, abortatzea ez da delitua eta horregatik ez dauka lekurik zigor penaletan, hausnarketarako epeak ere soberan daudela, emakumeek beren erabaki propioak hartzeko duten eskubidea urratzen baitute. Abortua sistema publikoan bermatu beharra dago, emakumeen sexu eta ugalketa osasunerako duten eskubideetako bat delako.

13/09/27

Berriak

Alternatibak Batzar Nazionala egingo du larunbatean Koordinakunde berria izendatu eta Europako bozen inguruan erabakitzeko

Alternatiban badakigu hasi berri dugun kurtso politikoa ez dela erraza izango, eta ez egoera ekonomikoarengatik, baizik eta gauzak aldatzeko gaitasuna dutenek, porrot egin duen eredua eraldatzeko asmorik ez dutelako. Hala, herritarrak pobretu, eskubideak murriztu eta elite ekonomikoen irabaziak bermatu dituzten politikak aplikatzera mugatu dira.

Jose Luis Bilbaok, berriz ere esan zuen atzo itxaropen izpiak ikusten dituela; PNVk bere egin nahi dituen izpiak. SuperSur bezalako azpiegitura erraldoiekin, beharrezkoak ez diren proiektuekin alegia, erabat hipotekatu gaituen alderdiaz ari gara, bizkaitarren hurrengo belaunaldiak ere zorpetu dituen alderdiari buruz. Enpleguaz hitz egiten dute, beren lanpostuengatik borrokan ari diren langileen kontra ertzainak bidaltzen dituzten bitartean; kirol talde pribatuei zergak barkatu egiten dizkien eskuma da, laguntza sozialak murrizten dituen berbera. Ezkerraldean langabezia tasa jasanezina egotearekin arazorik ez duen eskuma da ere, badakielako horrek lan baldintza prekarioak onartzeko prest egongo den jendetza sortzen duela, enpresariek atzo eskatu bezala, gutxieneko soldataren azpiko saria onartzeko prest dauden gazteak kasu.

Abenduan, 5 urte beteko dira Alternatiba abiatu genuenetik, eta larunbat honetako Batzarrean bere garaian aipatutako erronkei aurre egiten jarraitzeko erabaki garrantzitsuak hartuko ditugu. Tamalez, 2008an ezagunak genituen krisi eta menpekotasun desberdinak ditugu aurrean oraindik ere. Orduan esan genuen, ez ginela jaiotzen euskal politikari sigla berri bat ekartzeko, Euskal Herriko ezkerren arteko elkarlana sustatzeko baizik; ezker indartsua sortzeko, borroka sozialen eskutik ibiltzeko gai izango zena baina sistema eraldatzeko beharra erakundeetara ere eramango zuena; herri honetan eskuma osatzen duten PNVk, PPk, PSOEk eta UPNk ez dutelako arazorik gehien dutenen mesederako politikak onartzeko orduan.

Gure Batzarrak hartuko duen lehen erabaki nagusia Alternatibaren Koordinakunde Nazionala berritzea izango da. Unean uneko erabakiak hartzen dituen organo delegatua da, genero, lurralde eta erakundearen talde lanketaren parte-hartzeari dagozkion irizpide jakin batzuk bete behar dituena. 9 kide dira, erakundearen norabidea egunerokotasunean markatzeko lana eta militantzia eskainiko dutenak. Hiru urte bete dira egungo Koordinakunde Nazionala sortu zenetik eta, estatutuek, berritzeko unea dela zehazten dute, larunbatean itxiko dugun prozesuan. Horretarako, gutxienez hautagaitza bat izango dugu.

Eta une honetan, berriro ere, aurrera begiratu behar dugu datorren urteko Europako hauteskundeetan parte hartuko dugun erabakitzeko. Euskal Herrian ezker subiranista indartsua behar dugula diogun bezala, Gipuzkoako aldundia bezalako erakundeak gobernatu eta eraldatzen hasteko gai izan dena; Europa ere estrategikoa dela uste dugu; herrien burujabetza aldarrikatu ez ezik, ezker alternatiboaren aldeko apustua egiteko. Helburua ez baita indarrean dagoen sistema aldatzea, gainditzea baino. Herritar burujabeak behar ditugu, egungoarekin oso bestelakoa izango den Europa berria eraikitzeko. Hauek izango dira Alternatibaren parte-hartzeaz eztabaidatu eta erabakitzeko jorratuko ditugun ardatzak.

Gure azken erronka, Alternatibarentzat garrantzitsuena kurtso berriari begira, herritarrei dei egitea da erasoen aurrean geldi gera ez daitezela. Lan erreformaren, pentsioen murrizketen eta berzentralizazio frankista jarraitzen duten asmoen aurrean, jendeari aktibatzeko deia egiten diogu; kalera ateratzea ezinbestekoa da, laster egingo dugun bezala, ezarri nahi diguten abortuaren legearen aurka, emakumeen ugalketa eta sexu eskubideak iraganera bueltarazi nahi dituztelako. Eraso guzti horien eta bidean daudenen kontrako harresia altxatu behar dugu, etxean gelditzen diren gehiengo isilak aldarrikatzen dituztenen kontra; Herrialde Katalanetan egin bezala, erabakitzeko eskubidearen alde kalera atera diren ehunka milika herritarren ereduari jarraiki.

https://fbcdn-sphotos-c-a.akamaihd.net/hphotos-ak-ash3/1265159_727619143922071_620574825_o.jpg

https://fbcdn-sphotos-b-a.akamaihd.net/hphotos-ak-frc3/1270509_727618870588765_1546285585_o.jpg

https://scontent-a-cdg.xx.fbcdn.net/hphotos-prn2/1378602_727618863922099_1681924343_n.jpg

https://fbcdn-sphotos-c-a.akamaihd.net/hphotos-ak-ash3/1262627_727618873922098_1890108951_o.jpg

https://fbcdn-sphotos-h-a.akamaihd.net/hphotos-ak-frc3/1262859_727619033922082_1131297732_o.jpg

https://fbcdn-sphotos-f-a.akamaihd.net/hphotos-ak-ash3/1040074_727619063922079_1938563950_o.jpg

https://scontent-b-cdg.xx.fbcdn.net/hphotos-ash3/1235973_727619057255413_96141940_n.jpg

13/09/25

Berriak

EAJk eta PSEk zerga politikaz eztabaida faltsua nahi dute

Bihar Legebiltzarrean egitekoa den zerga politikari buruzko eztabaida monografikoa EAJren eta PSEren inakzioa ezkutatzeko antzezlan hutsa izango dela salatu du EH Bilduk, bi alderdi horiek iragarritako ebazpen-proposamenek orokorkeriak baino ez dituztelako planteatzen eta konponbide zehatzak eta errealak ematen ez dituztelako, Oskar Matutek eta Dani Maeztuk adierazi dutenez. Biharkoa, beraz, “EAJren eta PSEren estrategiaren barruan dagoen elementua da, haien arteko akordioari babesa emateko”.

EH Bilduko legebiltzarkideek azaldu dutenez, EAJk eta PSEk, behar eta premia politiko partikularrek bultzatuta, sinatu dute euren akordioa eta “orain Legebiltzarra erabili nahi dute krisiaren oinarrian dagoen eredu sozioekonomikoari eta Madrilekiko menpekotasun harremanari abala ematen dion akordio hori bedeinkatzeko eta zuritzeko”. Finean, mahai gainean dauden bi ereduak agerian utziko ditu biharko eztabaidak: batetik, EAJk, PSEk eta PPk partekatzen dutena, baliabide gutxien dutenak zigortzen dituena, alegia; bestetik, EH Bildurena, burujabetza osoa eta erreminta propiak eskatzen dituena egungo sistema ekonomiko eta soziala eraldatzeko, gizarte babesa bermatuz.

Horren ildotik, EH Bilduk proposamen zehatzak eta argiak egingo ditu bihar, zerga politikaren arlo bakoitzean, progresibidadean eta aberastasunaren birbanaketa justuago batean sakontzeko. Koalizioak neurri zehatzak ipiniko ditu mahai gainean, beraz, eta horien inguruko iritzia ematera behartuko ditu EAJ eta PSE, euren benetako asmoak zeintzuk diren azalarazteko eta agerian uzteko. Horrela, besteak beste, Gipuzkoan jada aplikatzen den aberastasun handien gaineko zerga Arabara eta Bizkaira ere hedatzea proposatuko du EH Bilduk, bai eta kapitalen errentak gehiago kargatzea eta udal zergak ikutzea ere. Izan ere, EAJk eta PSEk sinatutako itun fiskalak ez du ezer konponduko, beraiek ere aitortu egin baitute, esaterako, ez duela enpleguaren suntsipena saihestuko eta datorren urtean beste 6.000 lanpostu gehiago galduko direla.

EHBildu

13/09/25

Berriak

Zerga politikan Gipuzkoan hasitako bidean ez duela atzerapausorik emango erantzun die EHBilduk EAJri eta PSEri

Pasa den astean EAJk eta PSEk euren arteko akordioa aurkeztu eta gero, EH Bilduren ordezkaritza bat alderdi horiekin bildu da gaur Legebiltzarrean eta zerga politikan Gipuzkoako Aldundiak hasitako bidean sakontzera eta aurrera egitera dei egin die. Oskar Matutek, Leire Pinedok, Marian Beitialarrangoitiak eta Dani Maeztuk azaldu dutenez, “arlo horretan Gipuzkoan hartzen ari diren neurriak egokiak badira, ez dugu ulertzen zergatik egin behar den atzera Araban eta Bizkaian ere ezartzeko; hori da eskatzen digutena, atzera egin dezagula Arabako eta Bizkaiko aldundiek historikoki erakutsi duten ausardia faltagatik; askoz errazagoa litzateke Araban eta Bizkaian euren etxeko lanak egitea eta Gipuzkoakoak bezalako neurriak hartzea, aberastasuna banatzeko eta gizarte babesa berreskuratzea ahalbidetuko luketen baliabide ekonomikoak eskuratzeko”.

EH Bilduk, beraz, atzerapausotzat jo du EAJk eta PSEk hitzartutakoa, Gipuzkoako ereduari jarraitzeari uko egiten diotelako eta egungo marko sozioekonomikoak dituen mugak eta ezintasunak ontzat ematen dituztelako, egungo egoera ekonomikoari aurre egiteko euskal jendarteak burujabetzaren bidean behar dituen tresna propioak eskuratzeko inolako borondaterik erakutsi gabe. Finean, “akordioak EAJren eta PSEren behar politiko partikularrak asetzen ditu, baina ez herritarrek dituztenak”, kritikatu dute EH Bilduko legebiltzarkideek.

EHBildu