Espainiako Gobernuak aurrera atera nahi duen abortuaren legearen erreformari erabateko gaitzespena adierazteko agertzen gara gaur zuen aurrera. Zentzu horretan, antzuak eta faltsuak iruditzen zaizkigu Alderdi Popularreko kideen artean gai honen inguruan jendaurrean azaldu dituzten desadostasunak, ez baitugu ahaztu behar emakumeen aurkako eraso hori beraien hauteskunde programan jasotzen zela.

Eraso hau ez da Madrilgo gobernutik datorkigun eskubideen urraketen zerrendako beste bat. Haratago doan eraso bat da. Izan ere, oraingo honetan ez dira izan ekonomia eliteak agindua eman dutenak; elite erlijiosoak izan dira. Dena dela, lege hori biztanleriaren erdiaren aurka egindako eraso zuzena da. Emakumeon autonomiaren aurkako zein gure bizitzarengan eta gure gorputzengan erabakitzeko izan behar dugun eskubidearen aurkako eraso larria da.

Tamaina honetako erasoaren aurrean, salaketa publikotik haratago joan behar garela uste dugu. Hala, kontrarreforma honi aurre egiteko erakunde guztietan abiatuko ditugu ekimenak (Iruñeko legebiltzarrean, Gasteizen, Gipuzkoako Batzar Nagusietan eta ondoren mozioa aurkeztuko dugu udaletxeetan). Gure bizitzaren gainean, gure gorputzaren gainean eta gure osasunaren gainean erabakitzeko dugun oinarrizko eskubidea erasotzen duen erreformaren aurrean gaudela esango dugu mozio horren bitartez, baina horrez gain, gure instituzioei eskatuko diegu beren eskumen guztiak erabil ditzatela eta berme guztiak jar ditzatela emakumeok libreki erabaki ahal izateko. Osasun arloko, lege arloko zein gizarte arloko bermeez ari gara.

Horrenbestez, legeak suposatzen duen urraketaren adinako erantzun irmoa eman nahi dugu, eta hori bide politikotik zein instituzionaletik egitea. Indar politiko, sindikal eta sozial guztioi dagokigulako erreforma honi erantzutea eta geldiaraztea. Era berean, guztiok jabetu behar gara oraindik ere indarrean dagoen araudia aldatu behar bada emakumeon eskubideak zabaltzeko izan behar dela, gure kabuz erabaki ahal izateko ama izan nahi dugun edo ez.

Lege atzerakoia da, hamarkadetan borroka feministaren bidez erdietsitakoak lurperatzen dituena. Eta erreforma honi esker ere bai, Espainiako estatua eskubideen urraketen zerrenda lotsagarrian goi-goiko postuetan dago. Horren erakusgarri da erreforma babestu duen bakarra Europako ultraeskuin arrazistena, xenofoboena eta matxistena izan dela. Eta Espainiako estatuan hori gertatzen den bitartean, Frantziako Gobernuak ere bere legea aldatuko du, baina kasu honetan, abortua eskubide bihurtzeko eta, modu horretara, erabaki hori hartzen duten emakumeen aurkako presio itsua arintzeko.

EHBildutik gogoratu nahi dugu eskubideak negoziaezinak direla eta are gutxiago, ezin direla elite erlijiosoen nahien arabera arautu, horien lekua esparru pribatura mugatzen dela ahazten baitute sarri askotan. Abortu librea eta doakoa bermatu beharra dago osasun sistema publikoan, hori baita eskubide horren unibertsaltasuna bermatzeko modu bakarra. Horregatik egiten dugu desobedientziarako deia. Euskal Herriko erakundeek beren burujabetza erabili behar dute abortua librea eta doakoa izango dela bermatzeko, horretarako bitartekoak sortu eta bide propioa jorratuz.

Amaitzeko, erreforma honi Euskal Herriko mugimendu feministatik ematen ari zaion erantzuna goraipatu nahi dugu, eta emakumeon bizitzak kontrolatzeko zein erabakitzeko eskubidea ezabatzeko ahalegin berri honen aurka egingo diren protesta ekintzetan parte hartzeko deia egiten diegu herritarrei.

EHBildu

https://fbcdn-sphotos-c-a.akamaihd.net/hphotos-ak-prn1/p206x206/1016239_802331633117488_2138186361_n.jpg

https://fbcdn-sphotos-h-a.akamaihd.net/hphotos-ak-ash3/t31/1265265_802331596450825_588586500_o.jpg

https://scontent-b-cdg.xx.fbcdn.net/hphotos-ash4/t31/1522650_802331576450827_199604328_o.jpg

https://fbcdn-sphotos-g-a.akamaihd.net/hphotos-ak-frc1/t31/774230_802331743117477_38849032_o.jpg

Euskal Herria Bilduren izenean, gure erabateko gaitzespena adierazi nahi dugu PPren Espainiako Gobernuak atzoko ministro kontseiluan aurkeztutako abortoaren legearen aurrean. Lege honek emakumeen autonomia errotik urratzea dakar, eta gure gorputzen zein bizitzen gainean dugun erabaki gaitasuna erasotzen du.

Biolentzia ekintza oso larri honen aurrean, erantzunak inoiz baino argiagoa behar du izan. Inoiz baino premiazkoagoa da gogora ekartzea,eragile politiko, sindikal eta sozialek libre eta doako abortoa exijitzea, eta emakumeak pertsona autonomo, libre eta berdinak garenez, geure bizitzaren eta gorputzaren gaineko erabakiak guri hartzea dagokigula.

Kontra-erreforma honen edukien arabera, 30 urteko atzerakada etorriko da, hamarkadetan borroka feministari esker eskubide sexual eta erreproduktiboen inguruan eskuratutako lorpenak hankaz gora jartzen baitira. Gallardonek lege honekin emakumeak abortoaren aurrean “biktima eta ez errudun” egingo gintuela esan zuenean, sakoneko mezua bota zuen: emakumeak obedientziazko posizioetan kokatzera behartzen gaitu. Izan ere, beste batzuk erabakiko dute noiz abortatu daitekeen eta noiz ez; hainbat profesionalen irizpideen menpe jartzen gaitu baimena lortu ahal izateko. Finean, kontra-erreforma honek emakumeak gure baitakoak ez diren legeen menpe jartzen gaituzte, eta eskubideen subjektu izatea ukatzen digute. Gutxietsi, menpekotu, iraindu eta biolentatzen gaitu.

Murriztatzailea eta urratzailea den lege honen aurrean, EH Bildutik emakume guztientzat doakotasuna bermatuko duen legedia babesten dugu, emakumeek norbere gorputzaren gaineko erabakiak eta dagokion sexualitateaz gozatzeko aukera bermatuko duena, ernaltzetik haratago eta aukera sexualak direnak direla.

Era berean, EH Bildutik babesten dugu emakumeen erabakitze eskubideak estatu laikoak eraikitzetik etorri behar duela, erlijio egituren papera esparru pribatura mugatuz. Horregatik, eliza katolikoaren hierarkiari bi gauza eskatzen dizkiogu: ez dagozkion eztabaida eta espazioak okupatzeari utz diezaiola; eta emakumeentzat berdintasun eza eragin eta hauek sakonduko dituen egoerak bultzatzeko izan duen interes historikoa alboratu dezala. Emakumeok ez dugu behar eta ez dugu nahi tutelarik.

Azkenik, abortoa emakumeen eskubideei lotutako gaia dela ekarri nahi dugu gogora. Horregatik diogu emakumeak abortatu nahi duen ala ez erabakitzea arrazoi nahikoa eta soberakoa behar duela izan erabakitakoarekin aurrera egiteko. Eta horregatik diogu eskubideak ez direla negoziatzen. Ezin negoziatu daiteke gai hau moralaren eta bizitzaren ustezko defentsan kokatu nahi dutenekin. Ezin negozia daiteke gai hau pertsonek erabakitzeko dugun askatasunaren gainetik, bizitza eredua aurrez zehaztutako balore batzuen defentsa eginez, familia tradizionalean oinarritu eta unibertsaltzat jotzen dituzten taldeekin. Ezin negozia daiteke eliza katolikoaren hierarkiarekin, erlijioa esparru pribatuari dagokion gaia dela ulertu nahi ez duten horiekin; norbere sinesmenetik haratago, administrazioek jendarteari dagokion eskubideen gauzapena bermatzeko betebeharra baitute, emakumeena barne, hainbatek ulertu nahi ez badu ere. Eta azkenik, ezin negozia daiteke PPren moduko alderdi batekin, Euskal Herriko gehiengoak dioenari muzin egin eta dagozkigun eskubideak bortxatuz murrizketak inposatzen dituen harekin. Eraso bortitz honen aurrean, desobedientziarako deia egiten dugu; eta Eusko Jaurlaritza zein Nafarroako Gobernuari dei egiten diegu lege hau aplikatu ez dezaten, eta aborto libre eta doakoa bermatu dezaten EAE eta Nafarroako osasun publikoan.

Abortatzeko eskubide unibertsala errespetatuko dela ziurtatzeko modu bakarra osasun sistema publikoak bere egiteko bermea jasotzetik dator. Instituzio publikoen erantzukizuna, beraz, argia da. Eta horregatik, Gasteiz eta Iruñeako Gobernuak interpelatzen ditugu, abortatzeko eskubide unibertsala bermatu dezaten.

Azken eraso honek agerian uzten du, berriro, Hego Euskal Herrian bide propioa egiteko beharra. Batez ere Nafarroa Garaiko egoerari erreparatuz gero, non ia aborto gehienak Nafarroako lurraldetik kanpora edo abortoak egiten dituen klinika pribatu bakarrera bideratzen diren; egoera honen ondorioetako bat izan da, 2011ean adibidez, kudeatutako 844 abortoetatik 3 bakarrik egin ahal izan direla Nafarroako osasun sistema publikoan.

Ezin dugu aipatu gabe utzi, gainera, libre eta doan abortatzeko emakumeen eskubidea bermatzeaz gainera, ezinbestekoa dela hezkuntza afektibo-sexuala garatzeko behar adinako baliabide ezarri eta aktibatzea, emakumeek beraien gorputza eta sexualitatearen gaineko kontrola eta boterea sustatua izan dadin.

Bukatzeko, EH Bildutik mobilizazio eta erresistentziarako deia luzatzen dugu, emakumeei dagozkigun eskubide guztiak garatuko dituen jendarte eredua babesten dugunak gehiengoa garela erakusteko, libre eta doakoa izango den haurdunaldia eteteko nahia erregulatzetik hasita.

Alternatibako bozeramaile nazional Amaia Agirresarobek salatu du, Justizia ministro Alberto Ruiz Gallardonek azkenean Ministroen Kontseilura eraman duen Abortuaren Legearen erreforma “basati eta atzeragarria”: “emakumeen oinarrizko eskubideen kontrako eraso basatia da hau; gure bizitzaren, gorputzaren, sexualitatearen eta amatasunaren inguruan erabakitzeko ahalmenaren atzerakada larria”.

Agirresarobek zehaztu duenez “bere iragarpena egin zenetik, erreforma hau okultismoan murgilduta egon da, hierarkia katolikoaren eta abortuaren kontrako erakundeen exijentziei erantzutera bideratuta, emakumeak “zaintzeko” aitzakiarekin eta haien erabaki ahalmena kentzeko helburuarekin”. Zentzu horretan, PPko gobernuari Espainiako Apezpikuen Batzarrari hitza eta botoa emateari uztea, eta bide batez, “behin betikoz, historikoki Eliza Katolikoak eztabaida legegileetan izan duen boterea” mugatzeko exijitu dio.

Bestaldetik, alderdi ezkertiarreko bozeramaileak azpimarratu nahi izan du “erreforma honen onespenak epeak kendu, eta baita ere, 30 urteko atzerakada suposatu ez ezik, mugimendu feministek gaur arte sexu eta ugalketa eskubideen arloan lortutako aurrerapenak desegiten dituela”. Aldi berean, kontrarreformaren alde asko eta asko onartezintzat jo ditu, adibidez: “ospitaleari atxikitako batzorde batek azken hitza izatea, emakume batek abortatzeko eskubidea duen edo ez erabakitzeko; edota medikuen kontzientzia eragozpen eskubidea, emakumearen haurdunaldia eteteko eskubidearen gainetik jartzea”.

Alternatibak, aurretik PSOEk onartutako erreformak “gabezia handiak” zituela salatu zuena ez zuelako abortua zigor kodetik ateratzen eta sistema publikoan abortatu ahal izateko bermeak jartzen ez zituelako, “iraingarria” iritzi dio ministroak “bizitzaren defentsa” gisa aurkezteari, benetan “emakumeen osasun fisiko zein psikologikoaren gaineko atzerakada basatia izango denean; abortatzeko kasu gehienak galaraziko ditu eta abortatzeko baimena dutenak, igarobide luze eta umiliagarriak egin beharko dituzte”.

Bukatzeko, Alternatibatik irmo arbuiatu dute erreforma atzerakoi hau, eta horregatik, indarkeri ekintza honen aurrean, indar politiko, sozial eta sindikal guztiei, eta gizarte osoari dei egin diete Gallardonen erreformaren kontrako erantzun sendoa emateko, eta hau bermatzeko helburuarekin abortuari dagokionean: “emakumeek erabakia hartu dezatela eta estatuak bermatu dezala elizaren esku hartzerik gabe”. Horrela, Euskal Herriko herri eta hiri desberdinetan mugimendu feministek deitutako mobilizazioekin bate egitera deitu dute. 

Alternatibako Mahai Feministak abortuaren erreformaren kontra egindako bideoa:

Badirudi dagoeneko saihestezina izango dela Gallardonen abortuari buruzko legearen etorrera. Emakumeen eskubideen aurkako eraso bortitz hau gainera datorkigu. Izan ere, epe eta baldintzarik gabeko abortu libre eta doakoaz hitz egiten dugunean, gure gorputzen eta bizitzen gaineko erabakiak hartzeko oinarrizko eskubideaz ari gara.  Ezarri nahi diguten kontrol mota hau, patriarkatuaren eraso larria da, esparru guztietatik erantzun sendoa jaso behar duena. Baina jakin badakigu beste behin ere erantzun hori epela izango dela, kasu batzuetan interesen araberako manipulazio soila izango delarik.