Etiketa: Gipuzkoa

Alternatibak bere babes eta elkartasun osoa eskaini dio Ander Rodriguez diputatuari Adegiren jazarpen estrategiaren aurrean

Alternatibako bozeramaile nazional Amaia Agirresarobek gogor salatu du Gipuzkoako Aldundiaren kontra Adegik egiten ari duen jazarpen estrategia, eta zehazki, Gizarte Politikako diputatu eta Alternatibako kide Ander Rodriguezen kontrako erasoa; eta horregatik, bere babes eta elkartasun osoa eskaini dio.

Agirresarobek Gipuzkoako patronalaren salaketa Aldundiaren kontrako eraso zuzenatzat jo du, baina batez ere, “borroka historiko horren kontrako erasoa” dela adierazi du, “instituzio batek lehenengo aldiz langileen eskubideen alde egin duelako, patronalaren interes ekonomikoen eta botere finantzarioen alde egin beharrean”.

Gauzak horrela, alderdi ezkertiarreko bozeramaileak herrialde honetako instituzio guztiei patronalaren aldeko esklabotza jarrera izatea leporatu die, eta aldi berean, Gipuzkoako Gobernua zoriondu du lehenengo aldiz zerbitzu publikoak, pertsona erabiltzaileak eta erresidentzietako langileak lehenetsi dituelako.

Bukatzeko, Alternatibatik, eta Adegiren eraso zuzen honi aurre egiteko ahalegin batean, haien elkartasun osoa eskaini nahi izan diote eta gogotsu txalotu dute Gizarte Politikako diputatu Ander Rodriguezek langileen eskubideen defentsan egindako lana; “klase borrokaren adierazpen maximoa” bezala izendatu dutena. 

Berriak

PNVren ezkutuko interesak daude errauskailua eraikitzeko asmoen atzean

Jakina denez, Zubietako errauste plantaren proiektuak dituen irregulartasunak direla kausa, Eusko Jaurlaritzak jarritako ingurumen baldintzak ez dira betetzen. Horren ondorioz, errauste plantaren eraikuntza bertan behera uztea erabaki du Gipuzkoako Hondakinen Kontsortzioak (GHK). Horren aurrean bere posizioa eman nahi du jakitera EH Bilduk.

1.- Hasteko eta bat, errespetu instituzionala exijitu nahi diegu aurreko egunean bere iritzia plazaratu duten hainbat eragile eta komunikabideri. GHK ez da Bilduk “kontrolatzen duen” erakunde pribatu bat, baizik eta Gipuzkoako mankomunitateek eta udaletxek hondakinen kudeaketarako aspaldi eratu zuten Partzuergoa.  Legitimitate demokratikoa dauka, beraz. Herritarrek emandakoa. Hiri hondakinen azken tratamenduaren ardura du Gipuzkoako Hondakinen Partzuergoak. Hala, hari dagokio egitea, besteak beste, transferentzia plantak, konpostatze plantak, birziklatzeko azpiegiturak, planta biomekanikoak edo/eta errauste plantak. Herritarren bozka oinarri duen instituzioa izanik, Bilduk duen gehiengoa herri borondatearen fruitua da. Inori ez litzaioke burutik pasako PNV, PSE eta PP alderdiek Batzar Nagusiak “kontrolatzen dituztela” esatea; era berean, GHKren osaketa eta legitimitatea zalantzan jartzea ez dugu onartuko.

2.- Errauste plantaren gelditzeak arrazoi sendoak eta ardura zehatzak ditu oinarrian. Askotan esan dugu PNVk kosta ahal kosta egin nahi zuen proiektua zela, eta diseinuan zein lizitazioan salatutako irregulartasunak, osasunerako arriskuak, kontrakotasunari jaramonik ez egitea eta proiektuaren beraren kostu itzela ez dira nahikoak izan Zubietako errauste plana baztertzeko. Bestelako arrazoiak, ezkutatu ezinak, daude egungo egoeraren muinean: baimendutako proiektuaren zer-nolakoak ere ez zituzten errespetatu lehengo gestoreek. Funtsezko aldaketak eginda, hondakin solido kutsagarriak eta errauts toxikoak tratatzeko azpiegitura DESAGERTARAZI zituzten proiektutik. Gauzak horrela, baimendu ez diren baldintza hauetan, proiektua eraikitzea legea urratzea litzateke.

3.- Kontsortzioak informazio zabala eman du, beraz, ez dugu argudio tekniko eta ingurumen mailakoetan sakonduko. Gainera, errauste plantaren sustatzaileek ez dute datu bakar bat ere eman errealitate hori ukatzeko. Aurreko foru gobernuaren eta GHK-ko aurreko arduradunen kudeaketa negargarria azalarazi du errauste plantaren aferak. PNV eta bere ezkutuko interesak daude, beste behin ere, argipenak eta ikerketa eskatzen duten auzi baten atzean. Honenbestez esana dago, ardurak ezin dira hala-nola sakabanatu: auzi honetatik eratorritako kalte eta galera guztiak PNVren ardurapekoak dira, ez beste inorenak.

4.- Ostrukarena eginez, kontrakoa adierazi nahi dute. Izan ere, erabaki horren ondorioz GHK-ko hondamendi ekonomikoa etorriko dela, kalte ordainak eta han-hemenka dauden auziak direla eta. Ezkutatzen dute, nahita, PNVko arduradunek sinatu zituzten “swap” kredituak (finantza-produktu toxikoak) eta eraiki ezin daitekeen proiektu bat enpresekin sinatzea daudela Kontsortzioak duen zorraren atzean. Argiago esanez: haiek, ez beste inork, sortutako zuloak eta arduragabekeriak ondorengoei leporatuko nahi diete. Kopeta lodia behar da!

5.- Nolanahi ere, gure asmoa ez da batzuek horrenbeste maite duten enfrentamenduaren logika elikatzea. Aitzitik, Zubietako proiektuaren definizioaren eta garapenaren deskalabrua aintzat hartuta, kudeaketa zentzuduna eta arduratsua egiten jarraituko dugula adierazi nahi dugu. Alde batetik, gipuzkoarren interesak eta ondasunak edozeren gainetik defendatzen, enpresen eskariak entzungo ditugu. Bestetik, instituzioen iraupena eta eraginkortasunaren abiapuntutik, GHKren bideragarritasuna eta solbentzia osoa bermatuko dugula. Edozein kasuan, Zubietako proiektuaren gauzatzeko ezintasunak eszenatoki berri batean kokatzen gaituela onartu beharra dago, non hondakinen trataera integrala definitu eta azpiegiturez hornitzea denon erantzukizuna den. Hala gauzak, alderdi, eragile eta instituzioen arteko elkarrizketa eta elkar ulertzea ezinbestekoa delakoan, debatea ireki eta soluziobideak aurkitzeko dinamikak eta harremanak sustatuko ditugu hurrengo egun eta asteotan.

Berriak

Tentsio altuko linea proiektua bertan behera uzteko eskatu du Gipuzkoako Foru Aldundiak

Gipuzkoako Foru Aldundiak Dikaztelu eta Ezkio-Itsaso eta Castejon-Muruarte arteko 400.000 voltioko lineen proiektua bertan behera uzteko eskatu du. Izan ere, Foru Aldundiak dioenez, Red Electrica Española enpresak sustatu nahi duen egitasmoa ez dago estatu energia elektrikoaren gaur egungo garraio sarearen plangintzan, eta, horrekin lotuta, 13/2012 Errege Lege Dekretuak honako hau dio hitzez hitz: “Ministroen Kontseiluak energia elektrikoa garraiatzeko sarearen plangintza berririk onartu arte, ezingo da Estatuko Administrazio Orokorraren eskumenekoak diren garraio-instalazioetarako administrazio baimen gehiagorik eman”. Beraz, Dikaztelu eta Ezkio-Itsaso eta Castejon-Muruarte arteko lineen proiektua gaur egungo plangintzan ez dagoenez, eta ezin denez, plangintza berririk onartu ezean, baimen gehiagorik eman, administrazio eskudunek bertan behera utzi beharko lukete proiektua. “Bestela, ez litzateke araudia beteko”, adierazi du Foru Aldundiko Ingurumen eta Lurralde Antolaketako Departamentuak.

Gogoan izan bi linea hauek 120 kilometro hartuko lituzketela, guztira, eta haietatik, hamalauk Gipuzkoa zeharkatuko luketela. Linea, hain zuzen ere, Gipuzkoako Partzuergotik barrena sartuko litzateke lurraldean, eta ondorengo udalerrietan izango luke eragina: Idiazabal, Zegama, Segura, Zerain, Mutiloa eta Gabiria. Linea altzairuzko dorre sorta batek osatuta legoke (Gipuzkoan 28 jarriko lirateke): dorreek 80 metroko altuera ere izango lukete, eta haien arteko batez besteko tartea 400 edo 500 metrokoa litzateke. Linea hau babesteko, 40 metroko zabalerako korridore bat egin beharko litzateke, non murrizketak ezarriko litzazkiekeen zuhaitzei. Lanak egiteko eta dorreen mantenimendua bermatzeko, 5,3 kilometroko bide berriak egin beharko lirateke Gipuzkoan.

Gipuzkoako Foru Aldundiak hainbat helegite aurkeztu dizkio tentsio altuko linea proiektuaz egindako ingurumen txostenari. Nagusia, lehen esandakoa. Horrez gain, Aldundiak dioenez, “gai honi buruz aurkeztu den informazioa ez da aski ezarri nahi diren instalazio horien benetako premia objektiboa justifikatzeko. Oinarrizko eta funtsezko gabezia horrek behartu beharko luke benetan eta seriotasunez hausnartzera proiektua aurrera eramatea komeni den ala ez”.

Are gehiago, Foru Aldundiak azaldu duenez, energia elektrikoaren eskari gordina nabarmen gutxitu da Estatu mailan azken sei urteetan, eta aurrerantzean ere joera bera izatea espero da. Horregatik, “eskariaren jaitsierari buruzko datuek adierazten dute ez dagoela elektrizitatea sortzeko eta garraiatzeko instalazio berririk egin beharrik, eta jasangarritasunaren ikuspegitik egin beharko litzatekeena energia aurreztea eta eraginkortasuna bultzatzea dela”. Ildo horretatik, proiektuan, ez dago daturik linearen beharra justifikatuko luketen energia planta berriez, ezta Estatuko gaur egungo lineen balizko saturazioaz ere.

Ingurumen eragina ere ez da behar bezala baloratu, Aldundiak dioenez. Ez dezagun ahaztu, esaterako, tentsio altuko lineak Natura 2000 Sarean babestutako hainbat eremutan izango lukeela eragin zuzena, eta hainbat espezierentzat –hegaztiak, batik bat- kaltegarria izan litekeela. Proiektuak herritarren artean kezka eta aurkako jarrera eragin duela ere gogorarazi du Aldundiak.

“Begien bistakoa da makroproiektu honek gabezia eta hutsune nabarmenak dituela: sustatzaileek ez dute haren beharra justifikatu; ingurumen azterketa ez da behar bezala egin, nahiz eta ingurumenean eta babestutako eremuetan eta espezien artean izugarrizko eragina izango lukeen; herritarren artean kontrako jarrera garbia eragin du, eta araudia bera ere ez luke beteko. Beraz, baimenik ez emateko eta bertan behera uzteko eskatu diogu Espainiako Gobernuari”, adierazi du Iñaki Errazkin Ingurumeneko eta Lurralde Antolaketako diputatuak.

GFA

Berriak

Gipuzkoa martxan dago, EAJren eredu neoliberala atzean utzita

Gipuzkoarrek lurraldeko erakunde publiko nagusien zuzendaritzan EH Bildu jarri zutenetik bi urte pasatu dira, eta legealdi erdian gaudenean, orokorrean esan dezakegu Gipuzkoan ezarrita zegoen eredu neoliberalen norabidea aldatzea lortu dugula, eta oinarri finkoak jarri ditugula datorren bi urte hauetan horren gainean eraikitzen jarraitzeko.

Orain dela 2 urte arte, Gipuzkoan zegoen eredua batez ere azpiegitura erraldoien eraikuntzan oinarritzen zen: errauskailua, Pasaiako kanpo kaia, errepide gehiago, Hondarribiko aireportua… Obra faraonikoak ziren orduan PNVk gobernatzen zuen Foru Diputazioaren helburu estrategiko bakarrak. Politika fiskalean, Gipuzkoa paradisu fiskala izatea helburu garbia zen. Horren ondorioa da Gipuzkoak gaur egun zorpetzen maila erraldoia, atzo bertan Kontu Auzitegiak gogoratu zuen bezala.

Bi urte beranduago Gipuzkoak beste norabide bat hartu du. Batzar Nagusi hauetan onartu diren 22 Foru arauak dira aldaketa horren lekuko. Gipuzkoa mugitzen ari da eta abiadura onean gainera. Adibide bat jartzearren, Markel Olanoren legealdiaren lehenengo bi urtetan bakarrik 13 norma aprobatu ziren. Datu honek egundoko garrantzia du, zenbait medioetatik kontrakoa irudikatu nahi badute ere, errealitatea delako EH Bilduren iniziatibaz Gipuzkoa martxan dago.

Diputazioak aurkeztutako eta Batzar Nagusiek onartutako arau foral hauen artean, aldaketa fiskala ahalbideratu duten arauak azpimarratzea gustatuko litzaiguke. Hauen artean, Ondarearen gaineko zergaren berreskurapena, Aberastasun handien gaineko zerga eta asteartean onartutako iruzurraren aurkako arau berria dira aipagarrienak. Arlo honetan, Gipuzkoako Batzar Nagusiak aitzindariak izan dira, hemen hasi ginelako erreforma fiskalari buruz hitz egiten eta pausuak ematen eta orain beste herrialdeak atzetik datoz.

Gipuzkoako garapen ekonomikorako ponentzia ere aho batez onartzea, legealdi honetan mugarria izan da. Bertan, Gipuzkoako ekonomiak hemendik aurrera izango dituen oinarriak finkatu dira. Enplegua sortzeko, ekonomia berdea eta zerbitzu sozialak bultzatzearen garrantzia argi geratu da, eta garapen ekonomikoa eskualdetatik sustatu behar dela adostu dugu. Garapena ahalik eta justuago izan dadin, kontratazio publikoetan langileen eskubideen defentsa bermatzeko aprobatu berri dugun araua ere azpimarratzekoa da.

Ganbera honetan akordioak alderdi guztien artean egon dira, guzti-guztien artean. Horrelakorik ez da orain arte gertatu beste herrialdetan, ezta Gasteizko legebiltzarrean ere. Aurrekontuak, adibidez, 2012an EAJrekin aurrera atera ziren eta 2013an PSErekin. Arau foralak ere adostasun maila handiarekin atera dira aurrera. Eta hau dena ez da izan oposizioak bere lana egiteari uko egin diolako. Guztiz kontrakoa: lehenengo bi urtetan gobernuaren kontrolerako 2187 ekimen aurkeztu ditu oposizioak, aurreko legealdiaren lehenengo bi urteak baino mila ekimen gehiago. Baldintza hauetan, onartutako 22 foru arauak aurrera atera izanak arrakasta itzela suposatzen du.

Aurrera begira, geratzen diren legealdiaren bi urte hauetan, garapen sozio-ekonomikoaren aldeko jarduera izango da gure lehentasuna. Gipuzkoak dituen helburu nagusiak finkatuta daude: Aberastasuna era iraunkorrean sortzea eta era justu batean banatzea. Datozen hilabete eta urteotan, EH Bilduk norabide horretan aurrera pausu sendoak ematen jarraituko du.

Berriak

Ander Rodriguez: “Ez dugu onartuko enpresek diru publikoarekin aberastea lan erreforma aplikatuta”

Zaharren egoitzak eta eguneko zentroak kudeatzen dituzten enpresa eta erakundeei zazpi eguneko epea eman die Gipuzkoako Foru Aldundiak, Gizarte Politikako Departamentuari jakinaraz diezaioten zein baldintza aplikatuko dizkieten langileei uztailaren 7tik aurrera, egun horretan jarri baitzen indarrean Espainiako lan erreforma. Informazio hori eskuratuta, foru administrazioak egokitu egingo ditu enpresei ordaintzen dizkien tarifak, lantoki bakoitzean aplikatzen den marko laboralaren arabera.

Gizarte Politikako diputatu Ander Rodriguezek –prentsa aurreko batean– deitoratu egin du Espainiako lan erreforma, bere ustez «langile klasearentzat inoiz izan den eskubide galera handienetako bat» baita. Poza agertu du, hala ere, Gipuzkoako zaharren egoitza eta eguneko zentro gehienetako langileek prekarietateari ihes egiteko aukera izan dutelako, lan hitzarmen propioak edota Aldundiak egindako adostasun proposamenaren araberakoak sinatu baitzituzten, erreformaren aurkako klausulekin, lansariak KPIren arabera igota eta Aldundiaren 9,2 milioi euroko ekarpenaren babesean.

Zehazki, sektorearen % 90 dago langileen eskubideak urratzen ez dituzten lan hitzarmenak izenpetuta. «Oso garrantzizkoa da halako egonkortasun lasai bat ematea sektore honi, Gipuzkoan 4.200 langile hartzen baititu, horietatik % 97 emakumeak. Horrek erakusten du Gizarte Politikako Departamentuak hilabete luzetan egin duen bitartekaritza lanak bere emaitzak ekarri dituela», adierazi du.

Hala eta guztiz ere, oraindik hor gelditzen dira zaharren egoitza eta eguneko zentroen % 10 inolako akordiorik izenpetu gabe, eta horietatik sei, gaur gaurkoz greban dira. Foru erakundearen ordezkariaren iritziz, «Aldundiak zehazki jakin behar du zein baldintza laboral ari diren aplikatzen bere finantzaketa jasotzen duten zentroetan. Egoitza gehienek, Aldundiaren proposamenaren arabera, langileen lansariak KPIren neurrian igoko dituzte. Ondorioz, Gizarte Politikako Departamentuak neurri horretan goratuko ditu tarifak. Aldiz, oraingoz ez dakigu zein lansari baldintza izango diren gatazkan trabatuta dauden enpresa horietan.  Espainiako lan erreforma aplikatzen badute, soldatak 400 euro beheratu eta lanorduak 200 orduz handitu daitezke urtean. Horrela baldin bada, Aldundiak neurri berean murriztuko ditu tarifak, foru gobernuak ez baitu lagako enpresa bat aberastea diru publikoz Espainiako lan erreforma aplikatuta».

Ondorioz, Gizarte Politikako Departamentuak gutun bat bidali die zaharren egoitzak kudeatzen dituzten erakunde eta enpresei, «zazpi eguneko epean, jakinaraz dezan administrazio honekin kontratatutako edo hitzartutako zentroan edo zerbitzuan lan egiten duten enpresa horretako langileei zein lan hitzarmen edo akordio aplikatzen zaien».

Idatziak azaltzen duenez, «dirubide publikoen erabilera eraginkorrak arau izan behar du administrazio jardueran guztietan; beraz, administrazioak jasotzen dituen zerbitzuak eta haien trukean ordaintzen dituen prezioak egokituta egon behar dira, baita ere komenioz edo hitzarmenez zenbait entitaterekin adostutako zerbitzuetan».

Bestalde, sei egoitzatan greban diren langileen aurka auzibide bat jartzeko Adegik egindako mehatxua aipatu du diputatuak, zenbait hedabidetan agertu diren albisteen harira: «Lehenik, gure elkartasuna adierazi nahi diegu langileei, era horretako mehatxuen aurrean. Gertakari larri bat da, inoiz gertatu gabea. Gipuzkoan greba eskubidea bertan behera utzi nahi izatea da hori. Adegik ez dauka mugarik. Aldundia auzibidean jartzeko gauza izateaz gain, orain epaitegira eraman nahi ditu gure zaharrak zaintzen dituzten langileak, lanean duintasuna eskatzeagatik. Gizarte zerbitzuen aurka ari dira erasoka, patronala oldarraldi gordin bat ari da gauzatzen mendeko pertsonen zaintza ziurtatzen duten zerbitzu publikoen aurka, baina Aldundiak aurre egingo dio, zerbitzu horien babesean».

Gainera, diputatuak argitu du Aldundia ez dela nor greba baimendu edo gaitzesteko, ez baita hori bere eskumena. Departamentuaren erantzukizuna da bermatzea Eusko Jaurlaritzaren Lan Ikuskaritzak ezartzen dituen gutxieneko zerbitzuen bitartez artapen egokia eskaintzen dela. Atzo, grebaren jarraipen bilera bat izan zen, baina gobernuak ez zigun inolako aldaketaren berri eman. Hortaz, orain arteko neurriak ezartzen jarraituko dugu:

–  Greban diren zentroetan ikuskapenak egingo ditugu.

–   Ez ditugu aldi baterako egonaldiak bidaliko.

–   Ez dugu gomendatuko behin betiko egonaldiak egitea.

–   Tarifatik kenduko dugu greban diren langileen soldatetan enpresek ordaintzen ez duten soldataren zatia.

Berriak

Jon Albizu: “Orain inoiz baino gehiago okerren daudenen alboan egon behar du administrazioak”

Donostiako Udal Gobernuak 304.600 euro banatuko ditu gizarte ekintzaren arloan ari diren irabazi asmorik gabeko 97 elkarteren artean. Jon Albizu, Gizarte Ongizateko zinegotzi eta Alternatibako kideak nabarmendu du diruaz haratago elkarte hauek egiten duten lana eta gizarteari egiten dioten ekarpena babestea dela diru-laguntza hauen helburu nagusia.

Esan duenez, “Udal Gobernu honen lehentasunen artean dago arlo soziala babestea eta diru laguntza hauen banaketa horren baitan kokatzen da, azken batean, elkarte hauek guztiek ezaugarri sozialak dituzte eta administrazio publikotik gure eginkizuna da elkarte hauek laguntzea. Orain inoiz baino gehiago ahulenen eta okerren daudenen alboan egon behar du administrazioak, erantzukizun bat dauka horretan, eta udal honek argi dauka hori, udal aurrekontuetan era agerian geratu da apustu hori”.

Berriak

Alternatibak salatu du Irungo alkateak emakumeak berriz baztertu dituela Alardean eta normaltasun irudia islatu nahi izan duela

Alternatibako bozeramaile Diana Urreak, herenegun Irunen ospatutako Alarde egunaren balantzea egin du gaur. Deitoratu du udal gobernuak -“beste talde batzuen adostasunarekin”- eta hainbat komunikabideek “onartezina den egoera ontzat eman” dutela berriro, emakumeen eta gizonezkoen arteko berdintasuna lortzea helburu duen gizartearentzat onartezina dena: “Normaltasuna esaten diote emakumeak diskriminatzeari, Irungo alkate eta EUDEL bezalako instituzio bateko lehendakariordeak berdintasun legea tranpa eginda urratzeari eta normala deritzote komunikabideek, pribatu zein guztion diruz ordaindutako publikoek ere bazterkeria jaso eta babesteari”.

Urreak gogorarazi duenez, Santano alkateak harrera egin dio berriz alarde baztertzaileari udaletxetik, Alarde publikoa eta parte-hartzailea agurtzea berriz ere ezeztatu zuen bitartean, nahiz eta Martin Garitano Gipuzkoako Ahaldun Nagusiak harekin eta foru gobernuko zein EHBilduko ordezkariekin batera balkoira ateratzeko gonbidapen zuzena egin zion, “berdintasunaren alde lan egiten duela” esan baitzien alkateak. Alternatibako kide eta EHBilduko legebiltzarkideak deitoratu zuen, halaber, arratsaldeko desfilean gertatutako liskarrak isildu egin direla, udaltzaingoa zein Ertzaintzaren esku-hartzea eragin zuten arren, “ohi bezala, Alarde publikoa babestu ordez, baztertzailearen aldekoek eginiko erasoen aurrean hauen alde egitera azaldu ziren”.

Hala eta guztiz ere, Alternatibatik txalotu dute irundarrek alarde publikoarekiko erakutsitako onarpenaren eta babesaren aurrerapauso argia, desfileak ikusten ari zirenen artean agerikoa izan zena. Alarde mistoa osatzen duten hamar konpainiak zoriondu dituzte ere, urtetik urtera parte-hartzaile kopuruan hazten direlako.

Bukatzeko, alderdi ezkertiarreko bozeramaileak deitoratu zuen komunikabide askok jasotako eta igorritako irudia: “Estatuan irakurle gehien dituen egunkaria normaltasunez aritu da, arratsaldean gertatu ziren erasoak aipatu gabe; Gipuzkoan irakurle gehien dituenak berriz, bost aldiz tarte zabalagoa alarde diskriminatzaileari eman dio publikoari eta parekideari baino; EITBko hedabide publikoek, aldiz, estaldura zabala eman diote, herriko jaietan emakumeen parte-hartzeko eskubideei eraso egiten dion alardeari zilegitasuna emanda”.

13/06/28 – Alternatibak Irungo Alardean emakumeak baztertzea ahalbidetzen duen egoera normalizatzeko ahalegina salatu du

Berriak

Alternatibak Irungo Alardean emakumeak baztertzea ahalbidetzen duen egoera normalizatzeko ahalegina salatu du

Alternatibako Mahai Feministako bozeramaile, Diana Urreak, Gipuzkoako gizarteari dei egin dio aurten ere datorren igandean, ekainak 30, Irunera hurbiltzeko “alarde publiko, parte-hartzaile eta parekide bakarrean” desfilatzen duten gizon-emakumeak babestera. Urreak “faltsua” iritzi dio zenbait komunikabidek urtero islatzen duten normaltasun egoerari, izan ere, “normaltasuna etorriko litzateke alarde bakarra egitetik, zeinetan herriko emakume eta gizon guztiek parte hartzeko aukera izango luketen”.

Gipuzkoatik aukeratutako legebiltzarkideak, alabaina, nabarmendu eta aitortu nahi izan du Irunen zein Hondarribian azken 17 urte hauetan borroka egin duten ehunka lagunek lortutako guztia emakumeek beren herriko jaietan parte hartzeko eskubidea izan dezaten: “Era guztietako erasoak pairatu dituzte, erakundeen axolagabetasuna eta poliziaren indarkeria beren aldarrikapenen legezko aitortza lortu arte, tamalez, ez dute lortu gizartearen zein klase politikoaren zati adierazgarri batena”. Edonola ere, jarraitu du, “egun daukagun egoera borrokaren hasierako helburuetatik urrun kokatzen gaitu, alarde bakarra, mistoa, publikoa eta bazterkeriarik gabekoa lortzea”.

Horregatik, alderdi ezkertiarreko bozeramaileak “egungo statu quoa gainditzera” deitu du, “emakumeen bigarren mailako parte-hartzea bakarrik onartzen duena eta, beti ere desfile nagusiari, alarde pribatu eta baztertzaileari enbarazu egin gabe, Irungo zein Gipuzkoako politikarien tarte zabal baten zilegitasun lotsagarria duena, herriko alkate eta EUDELeko lehendakariorde Jose Antonio Santanotik hasita”.

Urtero bezala, Alternatibako ordezkaritza zabal bat, Ander Rodriguez Gipuzkoako Gizarte Politikako diputatua buru, EHBilduko kideen ordezkaritza oparo batekin batera, Irungo kaleetan izango da alarde publikoa bultzatzen.

Berriak

EH Bilduk Zizurkilen iruzurra egiten harrapatutako EAJko kideen dimisioa eskatu du

Pasa den asteburuan Tolosaldea Txukun plataformak Zizurkilen antolatu berri duen herri kontsultan gertatutakoaren aurrean Gipuzkoako EH Bilduk gogor salatu nahi du Zizurkilen iruzur politikoa gertatu dela.

Lehenik eta behin, nabarmendu nahi dugu Tolosaldea Txukunen asteburuko kontsultan Zizurkilen 750 pertsonek parte hartu zutela. Jende asko, baino zentsoaren heren bat bakarrik. Zizurkilgo jendartearen gehiengoak bizkarra eman zion kontsultari, udalak eskatu bezala.

Gero, denok ikusi dugu nola datuak puztu egin dira, beste 300 bozka delegatuak omen zeudelako, eta hala eta guztiz ere ez dira iritsi %45ra. Edozein kasuetan, herri kontsulta honetan parte hartu dutenak aurreko hauteskundetan EAJ, PP eta PSEko bozka eman dutenak izan dira, gutxi gora behera. Beraz, udalaren legitimitatea zalantzan jarri nahi zutenek porrot egin dute.

Herritarren borondatearen isla den neurrian herri kontsulta bati erabateko errespetua zor zaio beti. Baina asteburuan Zizurkilen gertatutakoak erakusten du EH Bilduren proiektu politikoa desgastatzeko EAJ prest dagoela horrelako iruzurrak ere egiteko. EAJrentzat herri borondatea aitzakia hutsa da, unean uneko bitartekoa bere helburuak betetzeko eta aurkari politikoen proiektuak kaltetzeko. Jeltzaleek aspaldi erakutsi dute herritarren borondatea, herri kontsulta zer den beraientzat: gauerdiko ahuntzaren eztula. Txisteratik atera dituzten boto horiek dira jendartearen zerbitzura daudenen eta jendartearen gainetik pasa nahi dutenen arteko diferentzia.

Medio jakin batzuek ezkutatzen duten arren ikusitako bi dokumentu grafikoek argi eta garbi erakusten dute botu delegatuaren inguruan iruzurra nola egin den, kontsultaren emaitzak gizentzeko fartsa nola burutzen den, demokraziaren urrezko araua, pertsona bat botu bat zein lotsagabeki apurtzen duten. Iruzur demokratikotzat jotzen dugu, gertakari oso larritzat jotzen dugu faltsukeria hau.

Baina ozen esan nahi dugu bi dokumentu grafiko horiek argi eta garbi erakusten dutela ere iruzurra nortzuk egiten duten.

Ustezko herri plataforma independente horren atzean EAJren eskua dago. Bozeramaile lanak egiten ari den Egoitz Sorozabal, Zizurkilgo zinegotzi jeltzalea da, eta Marian Lazkano, gaur egun zinegotzia da ere, eta aurreko legegintzaldia alkate. Eta Zorione Etxezarraga EAJko batzarkidea bertan dago ere. Bideoetan hirurak dira protagonista, hirurak dira iruzurgile. Ardura politikoak betetzen dituzte Zizurkilen eta Gipuzkoan. Eta ozen diogu iruzurgileek ez dutela tokirik gure herrietan ezta batzar nagusietan ere. Tranpa egiten dutenak, iruzurrak egiten dituztenak, herri borondateari errespetu minimoa ez diotenak ez dute tokirik ez politikagintzan, are gutxiago herrigintzan. Egoitz Sorozabalek, Zorione Etxezarragak eta Marian Lazkanok lotsatuta egon beharko lukete egindakoaz, lotsa apurra balute dimititu egin beharko lukete. EH Bilduk hiru pertsona hauen dimisioa eskatzen du, herri ordezkari izateko zilegitasun guztia galdu dutelako.

Zer ez dute egingo kontsulta batean eskua sartzeko prest dauden iruzurgileek? Zer egingo lukete hiru tranpati hauek gobernu ardurak balituzte? Kameren aurrean lotsagabeko herritarren borondatea bihurritzeko prest dagoenak zer ez luke egingo herritarron diruekin, herritarron proiektuekin, herritarron interesekin?

Bestetik, EAJri exijitzen diogu argi dezala herritarren borondatearekin jolasean aritu diren bi zinegotzi horiek tokirik ote duten PNVn, eta horrela ez bada zein neurri hartuko duen haien kontra.

Hurrengo asteburuan deituta dauden herri kontsultak direla eta, Irura, Anoeta eta Ordiziako herritarrek pasa den asteburuan Zizurkilen gertatukoa kontuan hartuko dutela espero dugu. Berriro ere EAJk deitutako herri kontsulta iruzurti horiei bizkarra emango dietela espero dugu.

Bukatzeko, esan behar dugu Zizurkilen erabili den herri kontsultaren eredua ez dela gure eredua, inondik inora, iruzurrari bidea irekitzen diolako. Gu herritarren parte hartzearen alde gaude eta bultzatu egiten dugu, baina ez hondakinen kontuan bakarrik, beste gai batzuetan ere bai.

EHBildu Gipuzkoa

Berriak

EH Bilduko legebiltzarkideek greba eguneko soldata Gipuzkoako egoitzetan greban dauden langileei bideratu diete

Zerbitzu publikoen kalitatea bermatu eta langileen eskubideak zaintzeko, EH Bilduko legebiltzarkideek egoitzetako langileekin bat egin dute eta Rajoyren Lan Erreforma baliatzeari uko egiteko eskatu diote patronalari.

Gehiengo sindikalak eta hamaika eragilek maiatzaren 30ean deitutako greba orokorrean parte hartzearekin batera euskal jendartearekin hartutako konpromisoari jarraiki, EH Bilduko legebiltzarkideek greba egun horri zegokion soldata kobratzeari uko egin diote eta Gipuzkoako adinekoentzako egoitzetan greba mugagabean dauden langileei bideratu diete gaur Donostian, Bulebarreko akanpadan bertan, hain zuzen. Parlamentarioek koherentziaz jokatzea eta diru kopuru hori horrela bideratzea erabaki dute Legebiltzarreko zerbitzuek azaldu zutelako legalki ezinezkoa zela greba eguneko soldata hautetsien nominatik zuzenean deskontatzea.

Legebiltzarkideek elkartasuna eta babesa adierazi nahi izan diete modu horretan Gipuzkoan euren lan eskubideen alde greban dauden egoitzetako langileei, horren ondorioz pairatzen ari diren egoera ekonomikoa ahal den neurrian arintzeko asmoz. EH Bildu legebiltzar-taldeak eredugarritzat jotzen du langile horien borroka, Gipuzkoako Foru Aldundiarekin batera erakusten ari direlako ahal dela zerbitzu publikoen kalitatea mantendu eta langileen eskubideak zaindu, espainiar Gobernuak onartutako Lan Erreformaren murrizketak aintzat hartu gabe.

Horren harira, parlamentarioek egoitzetako gatazka hasi zenetik Aldundiak eginiko bitartekaritza goraipatu dute, horri esker zentro gehienetan jada akordio batera iritsi direlako eta sektoreko langileen %78a Rajoyren erreformatik salbu geratu delako. Halaber, Adegi eta Lares patronalen jokaera salatu eta euren etekin ekonomikoa ziurtatze aldera Lan Erreforma baliatzeari uko egiteko eskatu diete. Enpresa eta entitate gehienek euren langileekiko hitzarmena sinatu dutela ikusirik, agerikoa da Adegik eta Laresek ez dituztela zentro horien interesak ordezkatzen eta hitzarmen kolektiboa sinatzeari ezetz esaten diotela beste interes politiko batzuk defendatzea nahiago dutelako, zerbitzu publikoen kalitatea eta lan baldintza duinak baino.

EHBildu

Berriak

Alternatiba | Ezkerra eraldatzearen erronka

X