Etiketa: Gipuzkoa

“Erresidentziak borrokan – Trabajo invisible en lucha” hitzaldiaren bideoak

Kultur Alternatibak hitzaldi irekia antolatu zuen pasa den ekainaren 6an Donostiako Koldo Mitxelenan, Gipuzkoako erresidentzietako langileen egoera eta borroka aztertzeko, egun 4.800 lagunei eragiten diena. Amaia Agirresarobe Alternatibako Mahai Feministako ordezkariak moderatzaile lanetan aritu zen, eta Elena Arbina eta Conchi Pereira, Aldakonea eta Sanmarkosene egoitzetako langileak izan genituen borroka honen errealitatea azaltzeko. Hitzaldiak ikusteko lehenengo bideoan dituzue.

Hitzaldien ostean, galdeketaren txanda ireki zen (bigarren bideoa) bere kabuz informazio eta bizipen desberdinen trukaketa batean bihurtu zena. Eztabaidan parte hartu zuten askok lurraldeko erresidentzia desberdinetako langileak ziren heinean, eztabaida borrokan jarraitzeko gogoz, animoz eta indarrez josita egon zen. 

Berriak

Alternatibak zaintzaren lan ikusezinaren sektoreari buruzko hitzaldia egingo du bihar Gipuzkoako egoitzen gatazkaren testuinguruan

Kultur Alternatibak hitzaldi irekia antolatu du biharko, ekainak 6 arratsaldeko 19:00etatik aurrera, Donostiako Koldo Mitxelenan, sektore honetako egoera eta borroka aztertzeko, egun 4.800 lagunei eragiten diena. Amaia Agirresarobe Alternatibako Mahai Feministako ordezkariak moderatzaile lanetan ariko da eta Manu Egaña Oñatiko Ongizate Zerbitzuetako zinegotziak zein Elena Arbina eta Conchi Pereira, Aldakonea eta Sanmarkosene egoitzetako langileek parte hartuko dute.

Alternatibarentzat, ikusezintasun egoera iraunkorrean dagoen zaintza lana azaleratu egin da Gipuzkoako Aldundiko Gizarte Politika Saila eta Adegiren arteko gatazkaren ondorioz. Bestelako administrazioek ez bezala, Gipuzkoako Aldundiak sektorearen lan-baldintzak hobetzearen aldeko pausua eman du, bizitza babesteko erantzukizuna kolektiboa dela oinarritzat hartuta, eta ez enpresa pribatuen negozio aukera gisa. Lehenengo aldiz, zaintzaileen eskubideak, orain arte ahaztuak, instituzio publiko baten kezka dira.

Hala, Aldundiaren eta patronalaren arteko gatazka, enpresen diru-gosearen aurkako borroka bat da, langileen baldintzen eta herritarrei zuzendutako zerbitzuen kalitatearen gainetik euren etekinak lehenesten dituztenen aurkakoa, hain zuzen. Baina batez ere, gatazka honek herritarrak defendatzeko erantzukizun publikoaren aldarrikapena dakar, herritarren bizitzen zaintzaren alorrean mugarik gabe zabaltzen ari den logika pribatuari aurre eginez.

Trabajo invisible en lucha

Berriak

Lan ikusezina borrokan

Amaia Agirresarobe eta Xabier Soto – Alternatiba

Badira ezertarako balio ez duten lanak. Badaude duin egin ordez, pertsonak okertzen dituzten lanak. Badaude beharrezkoak ez diren lan mota asko, gehiegi, ez dutelako ekarpenik egiten, jasangarriak ez direlako edo soilik egingarriak direlako beste pertsona batzuen esplotazioari esker. Bestalde, badaude ezinbestekoak diren lanak, baina aztarnarik uzten ez dutenak. Lan ikusezinak dira, ikusten ez ditugunak, nahiz eta gure bizitzen beharrizanak asetzeko oinarrizkoak diren eta gure aurrean egiten diren.

Bizitza zaintzeko lana ikusezina da, ez duelako prestazio sozialik sortzen; hain ikusezina da, soldata eta lan baldintzei dagokionez beti zigortuta dagoela; ikusezina da etxeetan gordeta dagoelako; ikusezina, lana izendatzea ere merezi ez duelako; ikusezina, emakumeek egiten dutelako. Hala, segurutzat jotzen da inork ez dituela zertan babestu, diruz lagundu edo aldarrikatu behar, pertsonen zaintza ez delako eskubide bat, ez delako guztion erantzukizuna eta edozelan ere, eta emakumeei esker, beti hor egongo direlako, mugagabeki zorrotz, ezin prekarioagoak, baina gure bizitzak aurrera jarraitu ahal izateko nahikoak.

Zaintzaren gizarte antolaketa bidegabea, etxeetan pribatizatua, ordaintzen ez den lan prekarioaren eskuetan eta administrazio publikoaren oso babes txikia duela, ez da ia inoiz eztabaida publikoan plazaratzen, eta egiten denean, zaintzak nahikoak ez direnean eta emakumeek eurengandik espero den lana betetzen ez dutelako da. Eztabaida, laburbilduz, emakumeei errua leporatzeko terminoetan gertatzen da eta inoiz ez haien eskubideen ikuspuntutik. Jasotzen diren zaintzak nahikoak al dira pertsona guztientzat? edo soilik gutxi batzuentzat, ordaindu ahal dutenentzat alegia, eta emakume gehienen prekarietatearen truke? Galdera hauek ez dute tarterik agenda politikoan ezta alderdi politiko gehienen kezken artean, hondoratzen ari den eredu bat babesten dutenak, bizirauteko emakumeen mendekotasuna eta esplotazioa behar duena hain zuzen.

Salbuespen moduan, ikusezintasun egoera iraunkorrean dagoen errealitate honen gutxiespena, azaleratu egin da Gipuzkoako Aldundiko Gizarte Politika Saila eta Adegiren arteko gatazkaren ondorioz. Bestelako administrazioek ez bezala, Gipuzkoako Aldundiak sektorearen lan-baldintzak hobetzearen aldeko pausua eman du, bizitza babesteko erantzukizuna kolektiboa dela oinarritzat hartuta, eta ez enpresa pribatuen negozio aukera berri gisa ikusita. Lehenengo aldiz, zaintzaileen eskubideak, orain arte ahaztuak eta enpresa pribatu baten barruan desberdintasun egoeran borrokatuak behar izan direnak, instituzio publiko baten kezka dira. Horrela, Aldundiaren eta patronalaren arteko gatazka, enpresen diru-gosearen aurkako borroka bat da, langileen lan baldintzen eta herritarrei zuzendutako zerbitzuen kalitatearen gainetik euren etekinak lehenesten dituztenen aurkakoa, hain zuzen. Baina batez ere, gatazka honek herritarrak defendatzeko erantzukizun publikoaren aldarrikapena dakar, herritarren bizitzen zaintzaren alorrean mugarik gabe zabaltzen ari den logika pribatuari aurre eginez. Azken finean, aurrerapauso bat da guztiz beharrezkoa den apustu batean, zeinaren arabera politika publikoen erdigunean bizitzaren jasangarritasuna kokatzen den, kapitalaren interesen ordez. 

Gatazka honen oinarrian dagoen eztabaidaren muina, zaintzaren erantzukizunean datza, nork eta nola hartuko duen eta zein den instituzio publikoen zeregina eredu hau gainditzeko, non gero eta zerbitzu gehiago pribatizatzen diren eta pertsona guztien zaintza eskubidea bermatzen ez den, ezta sektorearentzako lan baldintza duinak ere. Kolokan dagoena guztion eskubideak dira eta baita eredu bidegabe eta baztertzaile bat zalantzan jartzea ere, non enpresek mugarik gabe jardun izan duten, administrazio publikoarekin izandako harreman adeikorrari esker.

Beraz, ez gaitezen erratu; egun euren eskubideak defendatzeko kalera irtetea erabaki duten Gipuzkoako emakumeen borrokak, indarrean dagoen ereduari aurre egiten dio, eta honek min egiten die bere babesleei; zaintza ikusezinak mantendu nahi dituztenei; esku-hartze publikotik eta eztabaida publikoaren erdigunetik aldenduta, negozioa eta etekinak pertsona guztien gainetik lehenesten dituztenei. Emakume hauen borroka ere borroka feminista bat da, pertsona guztientzako zaintza duinaren aldeko borroka. Eta bere azaleratzea zein defentsa guztioi dagokigu!

Berriak

Alternatibak Gipuzkoako zahar egoitzetako langileen kanpalekua bisitatu du haien borrokarekin bat egiteko

Alternatibako bozeramaile nazional Oskar Matute eta Amaia Agirresarobek, alderdiaren Gipuzkoako hainbat kargurekin batera (lurraldeko koordinatzaile Xabier Soto, Begoña Vesga eta Enrique Martinez batzarkideak eta Jon Albizu Donostiako zinegotzia), Gipuzkoako hirugarren adinekoen egoitza eta eguneko zentroetako langileen Donostiako Boulevardeko kanpaldian izan dira, atzotik greba mugagabean dauden beharginen borrokaren berri izan eta beren elkartasuna adierazteko.

Sektoreko enpresetako askok ez dute onartu Gipuzkoako Foru Aldundiko Politika Sozialeko departamentuak eginiko proposamena, beharginen lan baldintzak babesten dituena azken lan erreformak hitzarmen kolektiboetan uztailetik aurrera izango dituen ondorioetatik, horretarako beharrezkoa den dirua mahai gainean jarrita. Matutek langileen adorea nabarmendu du, “haien eskubideen aldeko borrokan ari direlako dena kontra izan arren; patronalak beren lan baldintzak are gehiago okertzeko helburua duela eta sistema neoliberalak emakumeak etxeetara buelta daitezela nahi duela, ordainik eta aitormenik gabeko lanak egitera, beharrezkoak izan arren”.

Gainera, azpimarratu du bereziki garrantzitsua dela borroka hau, izan ere, “lehenengo aldiz gobernu batek erakutsi egin du enpresaburuen eta finantza botereen aginduetara aritzea ez den beste zer edo zer egin daitekeela, langileen eskubideen alde egiteko, hain zuzen ere”; hala esan du Aldundiaren eta, bereziki, Politika Sozialeko Diputatu eta Alternatibako kide Ander Rodriguezen harira. Zerbitzu publikoa eta ezinbestekoa eskaintzen duten 4.800 langileko sektoreko beharginen duintasuna bermatu nahi izateagatik eraman du Adegi patronalak Diputazioa auzitara, kalte-ordainak eskatuta gainera bere irudiari eginiko kalteengatik.

https://fbcdn-sphotos-b-a.akamaihd.net/hphotos-ak-ash4/966741_649483908402262_393471957_o.jpg

https://fbcdn-sphotos-h-a.akamaihd.net/hphotos-ak-ash3/922076_649483925068927_981403533_o.jpg

https://fbcdn-sphotos-e-a.akamaihd.net/hphotos-ak-ash4/462644_649484108402242_1364301951_o.jpg

https://fbcdn-sphotos-b-a.akamaihd.net/hphotos-ak-ash4/966918_649484448402208_391080218_o.jpg

https://fbcdn-sphotos-h-a.akamaihd.net/hphotos-ak-ash4/919578_649484455068874_1516166899_o.jpg

https://fbcdn-sphotos-e-a.akamaihd.net/hphotos-ak-ash3/920449_649486905068629_647087544_o.jpg

https://fbcdn-sphotos-c-a.akamaihd.net/hphotos-ak-ash3/919345_649486915068628_331304927_o.jpg

Berriak

Matute: “Burbuilak eztanda egin du eta orain ez duzue Pasaiako lurrak nori saldu”

Orkar Matutek Eusko Legebiltzarrean Pasaiako portuaren gaur eguneko egoera tamalgarriaz hitz gin du, lurren pribatizazioa egin ostean eta geroztik saldu ezinean, lekua guztiz abandonatuta dagoela salatuz.

Matute: “Alderdi Sozialistako bozeramailea entzun genuen Pasaiako portua mundu mailako erreferente bihurtu behar zela esaten. Momentuz, eta gure herrialderaren onerako, bere ametsetako munduan baino ez da erreferente”. 

Berriak

Gipuzkoak milioi bat euroko proposamena aurkeztu du adinekoen egoitzen gatazka desblokeatzeko

Gipuzkoako Foru Aldundiak, Lurraldeko egoitza eta eguneko zentroetan eragina izaten ari den gatazkarekin amaitze aldera, adinekoen arretarako sektorearen patronalei eskaintza berria aurkeztu diela jakinarazi du. Horren arabera, Gizarte Politikako Departamentuak beste milioi euro bideratuko du errekurtso hauek kudeatzeaz arduratzen diren entitateei ordaintzen zaien tarifa handitzeko, betiere Espainiako lan erreformari uko egin eta sektoreko 4.800 langileen eskubideak ez zapaltzearen baldintzarekin

Gizarte Politikako diputatu Ander Rodriguezek azaldutakoaren arabera, pasa den asteartean Diputazioak bilera izan zuen Lares patronalarekin eta Adegiren kide diren hainbat enpresetako ordezkariekin. Bilera horretan Administrazioak eskaintza berria aurkeztu zuen, kudeaketaz arduratzen diren entitateei egoitzetan hitzartutako plaza bakoitzeko Diputazioak ordaintzen dien tarifa ekonomikoaren igoera suposatuko lukeena: “Kudeaketa entitateen eskaera ekonomikoen parte bat onartzeko prest gaude, baldin eta langileen duintasuna errespetatu eta zerbitzuaren kalitatea bermatzen badute. Lan eskubideak errespetatzearen konpromisoa hartzen duten egoitzek bakarrik aterako diote etekina Diputazioaren proposamenari. Espainiako lan erreforma aplikatzen dutenei, berriz, ez diegu tarifarik igoko”.

Diputazioak egonaldi, mantenu edota garbiketa gastuak (tarifaren %30a) bere gain hartzen duen tarifa abonatzen du hilero, baita langileriaren gastuak (tarifaren %70a) ere. Gizarte Politikako departamentuak lan-zatiari KPI aplikatzea erabaki zuen 2012. urtean, gainontzeko gastuak bere horretan utziz. Pasa den asteartean aurkeztutako eskaintza berriarekin, berriz, bere horretan utzitako zati hori berreskuratzearen konpromisoa hartzen du Gizarte Politikako departamentuak, tarifa %0,7a igoz.

Igoera hau Diputazioak aurkeztutako hitzarmen proposamenari baiezkoa ematen dioten enpresei aplikatuko zaie edo, egotekotan, sektorearen Lurralde mailakoari.

Kantitate hau sektoreko 4.800 langileen soldatei datozen bi urteetan KPIaren igoera aplikatzeko Foru Administrazioak mahai gainean jarritako 8,2 milioi euroei gehituko zitzaion, betiere patronalek lan baldintzak errespetatzen dituen hitzarmena sinatzen badute.

Gizarte Politikako diputatuaren hitzetan, “mahai gainean jartzen ditugun 9,2 milioi euro horiek agerian uzten dute gatazka hau gainditzeko dugun konpromisoa, arreta eskaintzen diegun adinekoen galerak saihestu eta sektoreko langileen duintasuna errespetatzeko. Ulertezina litzateke patronalek proposamen honi uko egitea, langileria prekarietate eta ezegonkortasunera kondenatuz”. Era berean, “Diputazioarekin izandako bileretan Laresek prozesu honetan errespetuz eta jarrera eraikitzailearekin jokatu izana” azpimarratu du Rodriguezek, horregatik konfiantza osoa dauka “proposamen berri honetan gatazkaren amaierarako giltza aurkituko duela”.

Adegiri dagokionez, “sektoreko langileentzako Diputazioak mahai gainean jarritako 8,2 milioiak nahikoak ez direla esaterakoan gezurretan ari” dela esan du diputatuak. “Euren asmoa diru horrekin Administrazioak kontratatzen dituen enpresek jasotzen duten etekin industrialari Diputazioak aplikatutako %2ko murrizketa estaltzea da, eta hori ez dugu onartu behar”.

audio/mpeg voz 022.mp3 [AUDIO – 686KB]

Berriak

Gipuzkoak ez du utziko egoitzak kudeatzen dituzten enpresek grebatik onura ekonomikorik ateratzea

Ander Rodríguez Gizarte Politikako diputatuak azpimarratu du Foru Gobernuarentzat garrantzizkoa dela diru publikoa modu arduratsuan, eraginkortasunez eta gardentasunez kudeatzea. Horregatik, ezin du onartu greba dagoen bitartean eman ez duten zerbitzuengatik administrazioaren dirua jasotzen duten enpresak egotea, eta  are gutxiago langileei dagokien soldataren zati batekin geratzea. Hori dela eta, egoitzak eta eguneko zentroak kudeatzen dituzten enpresei Gizarte Politikako Departamentuak hilero ordaintzen dien tarifatik kendu egingo da enpresa horiek, greba irauten duen bitartean, langileei ordainduko ez dieten zenbatekoa.

Neurri hori  joan zen otsailean jarri zen abian lehen aldiz, hiru egun iraun zuen lan uztean. Orduan, Foru Gobernuak 81.278,66 euro kendu zituen enpresei ordaindutako tarifatik.

María del Río, Plangintzako, Inbertsioetako eta Prestazio Ekonomikoetako zuzendari nagusiak adierazi du Gipuzkoako Foru Aldundiak hilero ordaintzen diela tarifa bat Gipuzkoako egoitzak kudeatzen dituzten enpresei eta irabazi asmorik gabeko elkarteei, honako gastu hauek hartzen dituena: ostatua, mantenua, garbiketa, etab. (tarifaren % 30) eta langileen soldatak (tarifaren % 70). Greba dagoenean, enpresek ez diete ordaintzen langileei lanera joan ez diren egunengatik. Hala ere, aurreko legealdietan, Foru Aldundiak ordaintzen jarraitzen zien tarifa berbera entitateei, nahiz eta jakin soldatei buruzko gastua txikiagoa zela. Hori dela eta, enpresek onura ekonomikoak ateratzen zituzten mobilizazio horietatik, langileek beren soldataren zati bat galtzen zuten bitartean.

“Egoera hori ez da berriz errepikatuko. Grebalariei soldata murrizten dieten enpresek beren diru sarrerak ere murriztuak izango dituzte”, amaitu du Del Ríok.

Berriak

Donostiako gazteen kontrako espetxe zigorra dela eta azken asteotan Donostian gertaturikoaren inguruko adierazpenak

EHBildu koalizioa osatzen dugun indar politikook, Donostiako 8 gazteen kartzelaratzea irmoki salatu nahi dugu.

Bada garaia gure herrian jazarpen politikoa amaitu dadin. Ezin onar dezakegu, gaur egun, gure hirian, beraien ideia politikoengatik 8 gazte 6 urtez espetxera bidaltzea. Atxiloketa eta epaiketa politiko guztiak behin betiko eten behar direla, ozen aldarrikatzen dugu. Kartzelak husteko garaiak dira honakoak, ez hauek betetzen jarraitzekoak.

Gure elkartasun eta babes osoa adierazi nahi diegu atxilotuei beraiei baita haien senide eta lagunei ere, bizitzen ari diren une zail hauetan.

Herri honek gatazka politikoa konpontzeko eta bakea eraikitzeko urratsak eskatzen ditu; sufrimendu egoerekin behingoaz amaitzea, eta ez, etengabean sufrimendu egoera berriak sortzen jarraitzea.

EHBilduk, orain artean bezalaxe, pertsona guztien eskubide guztiak errespetatu daitezen lanean jarraituko du buru-belarri. Sinetsiak gaude, horixe dela sentsibilitate ezberdinetako herritarren gogoa.

Gazte hauekin burutu den injustizia salatzeko, elkartasunezko ekimena abiarazi zuen herritar talde batek Donostiako Bulebarrean.

Azken bi asteotan Donostian sortu den elkartasun eta salaketa mugimendua, ikaragarria izan da. Gure zorionak eman nahi dizkiegu Aske Gunea posible egin duten herritar guztiei. Zuen jarrera eraikitzaile eta arduratsuarekin antolaketa eta konpromiso lezio ederra eskaini diguzue donostiar guztioi.

Horrekin batera, bertan bildutakoak kanporatzeko ertzaintzak izandako jokamoldea salatu beharrean gaude. Asko izan dira, mehatxuak, umiliazio sexistak eta eraso fisikoak salatu dituzten herritarrak.

Azkenik, PNV, PSE eta PPren jarrerari dagokionean zera adierazi nahi dugu:

Eskandalagarria iruditzen zaigu azken asteotan Donostiako oposizioko alderdiek erakutsi duten jokaera arduragabea. Zortzi gazte lan politikoa egiteagatik 6 urtez kartzelaratu behar dituztenean, hori salatzen duten herritarren aurka oldartu dira. Larriagoa da, nonbait, Bulebarrean protesta egitea zortzi familiaren bizitzak bidegabeki apurtzea baino.

Herritarren ahotsa entzutera gonbidatzen ditugu PNV, PSE eta PPko Donostiako ordezkariak. Ausardia eskatzen diegu, beraien alderdien irizpideak alboratu ditzaten eta Donostiarren gehiengoaren nahiarekin bat egin dezaten.

Beraien oinarriek pentsatzen dutena esatera animatzen ditugu. Alegia, 2013an, gure hiriko seme alabak Madrileko agindu injustuak betez kartzelara bidaltzea onartezina dela.

Bakea eta elkarbizitza eraikitzeko, alderdi guztion ekarpena beharrezkoa da, eta bide horretan, jarrera ausart eta positiboak bultzatu behar ditugu Donostian ere. Donostia elkarbizitzaren erreferente bilakatu nahi badugu, oinarrizko eskubideen kontrako eraso hauekin amaitu beharra dago, ezinbestean.

Berriak

Alternatibak Donostian erakutsitako “bidegabekeriaren aurkako erresistentzia, borroka eta duintasunaren eredua” txalotu du

Alternatibako bozeramaile nazional Oskar Matutek bere alderdiaren elkartasuna adierazi nahi izan die Ertzaintzak gaur goizean Donostian atxilotu dituen gazteei, gogorarazi duenez, “militantzia politiko hutsagatik kondenatu dituztelako”. Atxiloketen gainetik, alabaina, Matutek txalotu egin du ehunka lagunek erakutsitako “erresistentzia baketsua, herri duintasuna eta elkartasuna, egunak daramatzatelako kalean gazteak babesten”.

Alderdi ezkertiarreko bozeramailearen hitzetan, euskal gazteriak “elkartasun aktiboa eta ez-biolentziarekiko konpromisoa agertu dute erresistentzia zibilaren bitartez, eta auzi honetan bakoitzaren kokapena agerian utzita”. Hala, “deitoragarria” iritzi dio Iñigo Urkulluren Gobernuak erakutsitako jarrerari, “berriz ere jarri baitu Ertzaintza bakea zein normalizazio politikoa oztopatzeko asmoa besterik ez duen Espainiako Erresumako Gobernuaren borondatearen zerbitzura”.

Honen harira, bere ardura plazaratu du “polizi autonomikoak Askegunea husteko indarkeria erabili duelako eta eguneko ordu txikietatik aurrera dozenaka lagunek salatutako mehatxuak eta irainak ugariak izan direlako”. Horrela, jarraitu du esanez “onartezina da komunikazio hedabideei haien lana egitea galarazi izana, gaur goizeko gertakariez berri ematera hurbildu direnean”.

Matutek, Askegunea hustea lortu duten arren, “elkartasuna eta Euskal Herrian pertsona guztien eskubide guztiak berrezartzea helburu duen prozesua geldiarazterik ez dutela lortuko” ziurtatu du. Era berean, “Askeguneak luze iraungo” duela gaineratu du, “bidegabekeriaren aurkako borroka, duintasuna eta erresistentzia eredua bilakatu delako”. Azkenik, Alternatibatik gaur arratsalderako eta biharko deitutako elkartasun mobilizazioetan parte hartzera deitu dute.

Berriak

Adegiren jarrera eta zaharren egoitzen auzian EAJk patronalari emandako babesa salatu ditu EHBilduk

Administrazioarekin plazak hitzartuta dituzten Gipuzkoako zaharren egoitzetako eta Eguneko Zentroetako 4.800 langileen lan-baldintzak hobetzeko 8,2 milioi eurotako diru-partida eskaintzeko konpromisoa hartu zuen Diputazioak, joan den otsailaren 8an.

Era horretara, sektoreko sindikatuen eta patronalaren arteko negoziazioetan zegoen blokeo egoera konpontzeko urratsa eman zuen Diputazioak. Adegi eta Lares patronalak eta ordezkaritza soziala urritik ari dira negoziatzen, akordietara iritsi ezinik, eta hainbat greba ere egin dira. Mobilizazio gehiago ere iragarri dituzte.

Blokeo egoera gainditu ezean eta akordiorik lortu ezean, ezin izango da herrialdeko hitzarmenik sinatu eta, ondorioz, sektore honetan estatuan dagoen erregulazioa jarriko da indarrean. Horrek eragin zuzena eta kaltegarria izango luke langileen lan-baldintzetan eta eskaintzen den zerbitzuaren kalitatean.

Foru Erakundeak gure herrialdean eskaintzen diren plazen %87 finantzatzen du, eta 4.800 langileen soldatak ere berak ordaintzen ditu. Horrenbestez, kontzertatutako plaza publikoetan eskaintzen den zerbitzuaren kalitatea bermatzearen azken erantzulea da Diputazioa; era berean, zentro horietan lan egiten duten pertsonen lan-eskubideak bermatuak daudela ziurtatu behar du, herritarrei eskaintzen zaien zerbitzuan eragin zuzena dutelako langileen baldintzek.

Horregatik guztiagatik, eta bi aldeek Administrazioa interpelatu ondoren, Foru Gobernuak proposamena egin zien patronalari eta sindikatuei, blokeo egoera gainditzeko helburuarekin.

Baina Foru Gobernuak agertutako erantzukizunari eta konpromisoari salaketa batekin erantzun dio Adegik. Gainera, 187.000 euroko kalte-ordaina eskatzen dio.

Egoera honen aurrean, zera nahi dugu:

* Zaharren egoitzetako eta Eguneko Zentroetako 4.800 langileei: ez zaudete bakarrik. Lan baldintza duinekin aritzeko eta zuen eskubideak ez murrizteko herrialdeko hitzarmena eskuratzeko egiten ari zareten borrokarekin bat egiten du EH Bilduk. Espainiako lan erreformaren aurka izango gara beti. Ez gara makurtuko patronalaren aurrean.

* Gipuzkoako Foru Aldundiari: herri honetako langile klasearen bizkarrak zaintzen jarrai dezala, batez ere jokoan dagoena zerbitzu publikoen kalitatea eta zerbitzu publikoetako langileen eta erabiltzaileen duintasuna denean.

* Adegiri: kendu dezala Diputazioaren aurka jarri duen salaketa, negoziatzera eser dadila eta Gipuzkoako langileen bizitza kaskartzen duen Espainiako lan erreforma indarrean jartzeari uko egin diezaiola. Patronala ase-ezina da. Zaharren egoitzetako langileen gero eta diru gehiagorekin geratu nahi du, baina orain, foru altxortegitik ere beste zatitxo bat atera nahi du, Diputazioak kalte-ordaina ematea eskatu duelako. Iraingarria da hori gure herrialdeko zerbitzu publikoen erabiltzaileentzat, 187.000 euro kendu nahi dizkietelako.

* EAJri: patronalaren interesen zerbitzura aritzeari utz diezaiola eta Gipuzkoako herritarren interesak defendi ditzala. Izan ere, Diputazioaren aurka Adegik jarritako salaketaren edukietan agerian geratu da EAJ praktikan Adegiren beso politikoa dela instituzioetan. Adegik jarritako salaketaren oinarria  Batzar Nagusietan EAJk egindako galdera bati Diputazioak emandako erantzunean dago. Kontrol publikorako dauden mekanismoak nahi bezala erabil ditzake EAJk, eta nahi beste galdera egin ditzake Batzar Nagusietan, baina, kasu honetan, galdera egin du patronalari mesede egiteko eta Diputazioaren interesak kaltetzeko helburuarekin. Azalpen asko eman beharko dizkiete zaharren egoitzetako langileei eta erabiltzaileei. EAJk patronalarentzat egiten du lan; EH Bilduk, aldiz, herritarren interes orokorraren alde eta langileen duintasuna bermatzearen alde egiten du lan.

Berriak

Alternatiba | Ezkerra eraldatzearen erronka

X