Etiketa: Gizartea

Euskal indar politikoek eta eragile sozialek Euskal Herritarren Agenda osatzea proposatu dugu, gizarteak dituen erronkei erantzuteko

Euskal Herriko gizarteak marko demokratikoetan oinarrituko den aldaketa politiko eta soziala exijitzen duela esan du gaur EH Bilduk, eta horretarako, Euskal Herritarren Agenda abian jartzea proposatu du. “Hau da, euskal herritarren interesekoak diren gaien inguruan, euskal herritarren interesak defendatzen eta aldarrikatzen dituzten indar politikoek eta eragileek elkarrekin jardutea proposatzen dugu”, adierazi dute Oskar Matute eta Oihane Zabaleta EH Bilduko bozeramaileek, gaur, Donostian, egindako agerraldian. “Elkarlan hori Madrilen egin beharko litzateke, herri honek ahots propio eta indartsua izan dezan”, gaineratu dute.

“Baina ez Madrilen bakarrik. Benetako aldaketa politiko eta soziala gertatzeko aukera hemen daukagu, Euskal Herrian. Orain Madrilen jokatzen ari dira partida, baina itzulerako partida, egiazkoa, aldaketa ematea edo ez erabakiko duena, Euskal Herrian jokatuko da”, azpimarratu dute.

Matutek eta Zabaletak agertu dutenez, euskal gizarteak bizi duen egoera politiko, ekonomiko eta sozialak Euskal Herritarren Agenda lehenbailehen osatzera behartzen gaitu. Euskal indar politikoek eta eragile sozialek sortutako elkarlan esparru baterako aukerak daudela uste dute, eta hori osatzeko lehen proposamen gisa, lau alorretan batera jarduteko eskaintza egin dute: pentsio sistema, enplegu politikak, kontsultak egiteko eskuduntzak eta espetxe politika.

– Pentsio sistema. Euskal gizarteak pentsio sistema propioa nahi du eta behar duela eta Madrildik ezartzen diren pentsioek ez dutela bermatzen gure pentsiodunek bizi baldintza duinak eduki ahal izatea azpimarratu dute. Pentsiodunen kolektiboak bere egiten duen aldarrikapen historiko hori gauzatu bitartean, pentsioak 1.080 eurora osatzeko proposamen zehatza erregistratuko du EH Bilduk euskal instituzioetan, hurrengo egunetan.

– Enplegu politikak. “Enplegu politika Madrilgo gobernu zentralaren esku izateak gure berezitasunetara egokitutako enplegu politika eraginkorra abian jartzeko zailtasunak eragiten ditu”, azaldu dute Matutek eta Zabaletak. Hortaz, beharrezkoa ikusten du EH Bilduk enplegu politika aktiboen eskuduntza Hego Euskal Herriko instituzioek izatea. “Horren aldarrikapen bateratua egin beharko litzateke Madrilen”, esan dute. Halaber, lan harremanen euskal esparrua eraikitzeko urratsak ematea eskatu dute. “Egun daukagun egoerak eta Madrilen egiten dituzten lan erreforma atzerakoien menpe egoteak, euskal herritarren lan eta bizi baldintzak gero eta okerragoak izatea dakar berarekin. Enplegu politikak Euskal Herrian eta euskal herritarren artean erabakitzeak ondorio zuzenak izango lituzke Euskal Herriko gizon eta emakumeen eskubide sozialetan eta bizitza kalitatean. Duintasunean irabaziko genuke”. Hori gauzatu bitartean, herritarren bizi eta lan baldintzak duintzeko helburuarekin, Euskal Herrian ere urratsak emateko aukera jarri dute mahai gainean. Era horretara, gutxieneko soldata 1.200 eurokoa izateko proposamena erregistratuko du EH Bilduk euskal parlamentuetan, eragile sindikalen aldarrikapenarekin bat eginez.

– Kontsultak egiteko eskumena. “Herri gisa dagokigun erabakitzeko ahalmena aitor diezaion aldarrikatu behar diogu Espainiako estatuari, horretarako beharrezkoak diren bideetatik, demokraziaren ezinbesteko betekizuna dela gogoratuz”, nabarmendu dute Matutek eta Zabaletak. Baina Euskal Herrian ere gure urratsak ematea beharrezko ikusten dute, euskal gizarteak bere etorkizun politiko eta soziala erabaki ahal izateko. Zentzu horretan, kontsultak egiteko lege proposamenak erregistratuak dituzte Gasteizko eta Nafarroako parlamentuetan.

– Espetxe politika. Salbuespenezko espetxe politika bidegabeari amaiera emateko, beharrezko ikusten du EH Bilduk euskal indar politikoek eta eragileek espetxe politikaren eskuduntzak Hego Euskal Herriko erakundeei ematea.

Euskal indar politikoekin eta eragile sozialekin Euskal Herritarren Agenda osatzen hasteko eta elkarlanerako esparru berriak abiatzeko prestutasuna agertu du EH Bilduk. Matutek eta Zabaletak azpimarratu dutenez, “edukiak adosteko gure irekitasun eta prestutasuna azpimarratu nahi dugu, jokoan dagoena herri honetan aldaketa politiko eta soziala gauzatzea eta herritarren eskubideak berreskuratzea eta lan eta bizi baldintzak duintzea delako”.

EH Bildu

Berriak

Matute: “Pentsio sistema propioa nahi duten indar politiko guztiei elkarlanean aritzeko deia egiten diegu”

Pentsioena bezalako gai garrantzitsuaren inguruan EH Bilduren eta EAJren proposamenak ezagutu ditugu aste honetan. Oskar Matute Alternatibako kide eta koalizioko bozeramaileak esan duenez, “pentsioen sistema euskal instituzioek kudeakatzeko EAJk egindako proposamena arretaz ybegiratzen dugu; izan ere, gure eta euskal pentsionisten kolektiboak duen aldarrikapen historiko bati erantzuten dio”.

“Euskal pentsionistei pentsio duinak izatea bermatuko dien sistema propioa izateko defentsa eta aldarrikapena erabatekoa da”, azpimarratu du. “Jakitun gara egungo pentsioak ez dituztela bermatzen bizi baldintza duinak”.

Matutek gogoratu du EH Bilduk hainbat aldiz horma baten kontra jo duela Madrilen Gizarte Segurantzaren eskuduntzen transferentzia eskatu duenenean. “Madrilen aldarrikapen horren defentsa bateratua egiteko prest gaude baina, bitartean, hemengo instituzioetatik ere hobetu ditzakegu euskal pentsiodunen bizi baldintzak eta, horretarako, hemengo instituzioek pentsioak 1.080 euro arte osatzeko eta bizi baldintza duinak eduki ahal izateko proposamena aurkeztuko dugu Legebiltzarrean”.

Era berean, euskal gizartearen interesak defendatzen dituzten indar politikoei Madrilen elkarrekin jarduteko proposamena egiten ari dela EH Bildu eta indar horiekin hitz egiten ari dela gogoratu du Matutek. “Hego Euskal Herriako pentsio sistema propioa aldarrikatzen duten indar politiko guztiei elkarlanean aritzea eskaintzen diegu. Pentsio sistema propioa behar dugu, Euskal Herritik kudeatua, egoera kaskarrean dauden milaka eta milaka pentsiodunen baldintzak hobetu ahal izateko”.

 “Euskal herritarren interesak defendatzen dituzten indar politikoen esku dago pentsio duinak bermatuko dituen euskal pentsio sistema propioaren alde borrokatzea. Aldarrikapen historiko hori lortzea posible da, baldin eta elkarrekin jarduten badugu”, esan du.

Baina ohartarazi duenez, euskal herritarren interesei erantzungo dien pentsio sistema propioa izatea ez da nahikoa. “Bideragarria izango den pentsio sistema propioa eduki ahal izateko, beharrezkoa da premia horiei erantzungo dien zerga eredua izatea. Eta egun indarrean dagoen eredu fiskalak porrot egin du. Diru-bilketa aurreikuspenak bete ez izana horren erakusle da”, agertu du Matutek. Zentzu horretan, sortzen den aberastasuna hobeto banatuko duen zerga sistema bidezkoa eta progresiboa ezartzearen premia azaldu du.

EH Bildu

Berriak

Ander Rodriguez: «Desoreka sozialak errotik aldatuko lituzke oinarrizko errentak»

BERRIA egunkariko Oihan Vitoria kazetariak Ander Rodriguez Alternatibako kide eta Gipuzkoako Foru Aldundiko Gizarte Politikako diputatuari eginiko elkarrizketa oinarrizko errenta unibertsalaren harira.

Ondasunak eta enplegua aintzat hartu gabe, «gizaki izate hutsagatik», herritar orok oinarrizko errenta baldintzarik gabe jaso beharko lukeela uste du Ander Rodriguezek (Arrasate, Gipuzkoa, 1982), Gipuzkoako Diputazioko Gizarte Politikako diputatu ohiak (2011-2015). Alternatibako eta EH Bilduko kideak gogorarazi du Gipuzkoan erabat bideragarria dela.

Desiragarritzat soilik ez, bideragarritzat ere baduzu oinarrizko errenta unibertsala. Zergatik?
Eztabaida bereizi beharko litzatekeela iruditzen zait: alde batetik, bideragarritasun teknikoari buruzkoa debatea dago; eta bestetik, desiragarritasunaren ingurukoa. Zergatik bideragarria? Ekonomikoki horrela frogatu delako ezarri den tokietan. Eta zergatik desiragarria? Arrazoi ugarirengatik. Oinarrizko errenta, oro har, tresna eraginkorra da pobreziaren aurkako borrokan, baldintzapeko laguntzekin konparatuta pobreziari aurrea hartzeko gai baita. Diru sarrerak bermatzeko errenta kobratzen hasi ahal izateko, lehenik eta behin pobrea izan behar zara denbora batez eta, horrez gainera, pobrea zarela ere frogatu behar duzu. Oinarrizko errenta unibertsala, aldiz, pobrezia egoerara ailegatu baino lehen eskuratzen duzu, inolako baldintzarik gabe. Abantailak ageri-agerikoak dira.

Diru sarrerak bermatzeko errentarekin nahasten da sarri askotan, eta badirudi bat edo bestea aukeratzea dela bide bakarra.
Bai, arrazoi historiko bat dauka horrek: garai batean diru sarrerak bermatzeko errentari oinarrizko errenta deitu zion Eusko Jaurlaritzak, herri ekinbide legegile bati bide eman ostean, eduki aldetik zerikusirik ez bazuen ere. Nahasketa eragiten du horrek, eta eztabaida bi errenten arteko lehia gisara planteatzeak ere traba franko jartzen dizkio proposamenari. Oinarrizko errentak esklusiboki pobreziarekin amaituko balu, erabat justifikatua egongo litzateke haren ezarpena, baina harago doa: hori baino askoz gehiago da.

Zehazki zein da errenta unibertsalaren jatorria? Eta helmuga?
Gizakion askatasuna bermatzeko teoriarekin lotuta dago: pertsona bat ez da aske askatasuna gauzatzeko oinarri materialak ez baldin baditu. Bizirik irauteko beste pertsonen mende egotera derrigortuta dagoena ez da librea, baldintzatuta bizi baita. Eta herritarron erabateko askatasuna bermatzeko oinarri materialak ziurtatu behar dira. Hain justu, hor kokatzen da oinarrizko errenta: unibertsala, independentea eta baldintzarik gabea, boto eta osasun eskubideen parekoa kasik. Oinarrizko beharrak betetzeko diru kopuru bat ziurtatuko luke hilero, aitortu gabe. Pertsona libreak eraikiko lituzke, eta emakumeei, bereziki, gaur egun baino autonomia ekonomiko handiagoa emango lieke ahalduntzeko. Gabezia nabarmenak daude oraino kontu horietan.

Eta nola finantzatuko litzateke?
Gipuzkoako Foru Aldundian simulazio bat egin genuen Kataluniako hainbat aditurekin batera, eta ondorioztatu genuen baietz: oinarrizko errenta banakakoa, unibertsala eta baldintzarik gabekoa aplika zitekeela lurralde osoan. 2011ko 450.000 errenta aitorpen oinarri hartuta, bizi maila hobetuko litzatekeela eta biztanleen %75ei mesede egingo liekeela frogatu genuen. Proposamena bezain inportantea da finantzaketa.

Baina nondik aterako zen dirua?
Bada txeke zuri gisa ulertzen duenik, baina oinarrizko errenta ezkerraldetik defendatzen dugun gehientsuenok uste dugu zerbitzu publikoetatik zentimorik atera gabe finantzatu beharko litzatekeela. Diru sarrera guztiei eutsi, aurrezkiak sortzen hasi eta PFEZ pertsona fisikoen errentaren gaineko zerga errotik erreformatuko genuke, hobari eta kuota murrizketei tokia eginda. Errenta jakin batzuetako zenbait puntu ere igotzea komeniko litzateke, kasu batzuetan tasa bakarra jartzeraino.

Eta zer gertatuko litzakete osasun eta hezkuntza zerbitzuekin?
Ezta ukitu ere! Gizarte zerbitzuak ere ez. Sozietateen gaineko zerga, BEZa edo ingurumen zergak egokitzea proposatzen dute hainbat adituk, eta argi geratu da bideragarria dela: adingabeen oinarrizko errenta, esate baterako, posible litzateke berehala aplikatzea.

Adingabeentzakoa bakarrik?
Nik irmo sinesten dut oinarrizko errenta unibertsalean, baina uler dezaket herritar batzuei bertigo apur bat ematea berehalako ezarpenak. Hurrenez hurrengo pausoak eman beharko lirateke: adingabeen errenta oinarrizko errenta unibertsala ezartzeko lehenbiziko urrats bezala ulertu behar da. Prekaritatearen eta pobreziaren argazkiek argi eta garbi islatzen dute joera hori: 65 urtetik gorako pertsonetatik hasi, eta gazteenak kolpatzen ditu. Horrexegatik, presazkoa da haur pobrezia gutxitzeko eta larrialdi egoera hori iraultzeko neurriak hartzea lehenbailehen. Pausoz pauso aplikatzearen aldekoa naiz, baina, nahi izatekotan, egun batetik bestera ezar liteke. Horretarako, hori bai, gehiengoak bilatu behar dira. Familia gazteei lagunduko lieke, batik bat.

Laguntzak eta pentsioak ordezkatuko lituzke errenta berriak?
Diru sarrerak bermatzeko errenta, adibidez, bai. Pentsio, beka eta bestelakoen osagarri izango litzateke, eta diferentziak jasoko lituzkete onuradunek, betiere kopuru handiagokoak baldin badira.

Ez litzateke erosotasuna gailenduko eta kotizazioa apalduko?
Ezagutzen al duzu diru sarrerak bermatzeko errenta kobratzeko lana utzi duen pertsonarik? Nik, ez. Oinarrizko errentaren aurkakoek maiz darabilte argudio hori, baina ez da egia: ikerketa frankok bistaratu dute onuradunek ez luketela enplegua utziko, eta uztekotan ere, beste lan duinago bat topatzeko edo tarte batez formazioa jasotzeko izango litzatekeela. Bide batez, orobat, langileak ahalduntzeko balioko luke, enplegua eta bateragarritasuna sustatzen baititu: lanaldi murrizketak areagotu, orduak liberatu, eta kontziliazioa errazten du. Aurretiazko erresistentzia kutxa moduko bat da: koltxoi bat. Oinarri materialak ziurtatuta, nola onetsiko dugu eskaintzen diguten lehen lanpostua baldintzei erreparatu barik?

Nolatan ez ditu aldeko gehiago?
Arazo bat dugu gizarte gisa. Enplegu osoa utopia bat da, eta porrotak ez dira soilik bozetan gertatzen, ideologikoki ere gertatzen dira. Enpleguaren gizartea gara, ustez duintasunarena, baina sistemak merkantilizatutakoa bakarrik kontsideratzen du enplegu, eta errotua dugu ideia horixe: borondatezko lanak eta zaintza lanak, kasurako, ez dira enplegutzat jotzen. Ideia okerrak nagusitzea eragiten du horrek, baina lan egitea zabalagoa da. Gizartea ez du soilik jarduera produktiboak sostengatzen: zaintza lanik ezean, hondoratu egingo litzateke gizartea; ekoizteari lagako bagenio, ordea, ez litzateke kolapsatuko.

Mundu finitu batean ekonomia infinituki haztea ezinezkoa ei da.
Errenta, enplegua eta denbora injustuki banatuta daude, eta oinarrizko errentak hiru oinarri horiek birbanatzeko gaitasuna du. Paradoxikoa da: langileek ez dute aisialdirako astirik, eta langabeek denbora bai, baina diru askirik ez.

Desorekak hautsiko al lituzke?
Aldatu, behintzat, bai. Errotik. Ez luke eredu kapitalista gaindituko, baina, oinarrizko errentari esker, beste kapitalismo bat ezagutuko genuke: justuagoa, ezbairik gabe.

Berria

Berriak

Matute: “Borondate politikoa da, Donostian Bildu alkatetzan egon zen bitartean etxegabetze bat ere ez zelako egin”

Alternatibako kide eta EH Bilduko legebiltzarkide, Oskar Matutek, etxegabetzeen aurkako konpromiso argia eta eraginkorra eskatu dio Jaurlaritzari, “onartezina eta larria delako beti jendea kalean uztea alokairua edo mailegua ordaintzerik ez duelako, baina are onartezinagoa eta larriagoa da jendea kalean uzten duena gobernu bat denean”. Horren haritik, Matutek gogorarazi du “Jaurlaritzak, Alokabide elkartearen bitartez, gutxienez 450 etxegabetze prozedura ireki dituela azken hiru urteotan, eta prozedura horietako askoren azken emaitza etxegabetzea izan da; adibidez, 2015eko urtarriletik martxora bitartean 64 familia kalean utzi zituen”.

EH Bilduko legebiltzarkidearen iritziz, etxegabetzeen aurkako borrokan borondate politikoa da gakoa, borondate politikoa izanez gero, konponbidea egon badagoelako. “EH Bildu bera da horren froga”, azpimarratu du Matutek, “Donostian EH Bildu alkatetzan egon zen bitartean, etxegabetze bat ere ez zelako egin; EAJ-PSE udal gobernu berria sartu eta hilabete bat nahikoa izan zen etxegabetze bat egiteko, ordea”.

Matutek gogora ekarri du, baita ere, Urkullu lehendakariak Legebiltzarrean azaldu zuela etxegabetzeak eragozteko tresnak egon badaudela. “Hala ere, oraindik herritar asko kalean geratzen direla ikusirik, ondorioztatu beharko dugu Urkulluk aipatutako tresnak ez direla ez egiazkoak ez eraginkorrak edo Lakuan ez dagoela borondaterik tresna horiek aplikatzeko”.

EH Bilduk etxegabetzeen aurkako konpromiso argia eta eraginkorra eskatu dio gaur Jaurlaritzari, “onartezina eta larria delako beti jendea kalean uztea alokairua edo mailegua ordaintzerik ez duelako, baina are onartezinagoa eta larriagoa da jendea kalean uzten duena gobernu bat denean”. Horren haritik, Oskar Matutek gogorarazi du “Jaurlaritzak, Alokabide elkartearen bitartez, gutxienez 450 etxegabetze prozedura ireki dituela azken hiru urteotan, eta prozedura horietako askoren azken emaitza etxegabetzea izan da; adibidez, 2015eko urtarriletik martxora bitartean 64 familia kalean utzi zituen”.

EH Bilduko legebiltzarkidearen iritziz, etxegabetzeen aurkako borrokan borondate politikoa da gakoa, borondate politikoa izanez gero, konponbidea egon badagoelako. “EH Bildu bera da horren froga”, azpimarratu du Matutek, “Donostian EH Bildu alkatetzan egon zen bitartean, etxegabetze bat ere ez zelako egin; EAJ-PSE udal gobernu berria sartu eta hilabete bat nahikoa izan zen etxegabetze bat egiteko, ordea”.

Matutek gogora ekarri du, baita ere, Urkullu lehendakariak Legebiltzarrean azaldu zuela etxegabetzeak eragozteko tresnak egon badaudela. “Hala ere, oraindik herritar asko kalean geratzen direla ikusirik, ondorioztatu beharko dugu Urkulluk aipatutako tresnak ez direla ez egiazkoak ez eraginkorrak edo Lakuan ez dagoela borondaterik tresna horiek aplikatzeko”.

– See more at: http://ehbildu.eus/eu/instituzioak/gasteizko-legebiltzarra/8827-eh-bilduk-etxegabetzeen-aurkako-konpromisoa-eskatu-dio-jaurlaritzari-onartezina-baita-azken-3-urteotan-gutxienez-450-etxegabetze-prozedura-ireki-izana#sthash.1xZBtjKu.dpuf

EH Bildu

Berriak

Marimutil itsusi eta parte-hartze politikoaz

Irantzu Varela – Alternatibaren Mahai Feminista

Gizon nagusi, itsusi eta fatxa batek bere burua zilegi jo du egunkari batean honakoa galdetzeko: “zergatik izan behar dira Bildu eta CUP-eko emakumeak hain itsusiak?”.

Orokorrean hitz egiten zuela alde batera utzita –jakin badakit gizon horrek ez dituela “emakume independentista” guztiak ezagutzen, ez behintzat Bildukoak-, haserrea eta kezka eragiten dit bere ausardia arraroa ezta harrigarria ez dela onartu behar izateak.

Gizon honek argitara eman du beste askok pribatuan –eta ez beti- pentsatu eta zabaldu egiten dutena: jaungoikoak (edo patriarkatuak) ezarritako irizpideak betetzen ez ditugun emakumeak ez direla atseginak.

Bizi dugun menpekotasun sistema patriarkal honek, emakumeoi askatasun limosna txikiak eman izan dizkigu urteak joan urteak etorri. Bozkatzeko, gidatzeko, lan egiteko, dibortziatzeko edo kontu korrontea izateko aukera eman digute denborarekin. Alabaina, erailak, bortxatuak eta baztertuak izaten jarraitzen dugu, gehiengoaren atsekabearen eta axolagabekeriaren aurrean. Hori bai, gero eta jende gehiagorentzat oso gauza gaitzesgarria da. Neurri zehatzak hartu edo jokabide matxistak emakumeek gizartean duten paperarekin zerikusia duela onartzeko, baina, inolako asmorik gabe.

Bada esklabutza mota bat zeinetik askatzeko aukera inoiz emango ez diguten, sistema bera haren gainean eraiki dutelako, gure lekuan egotearena, gure papera betetzearena, gugandik espero dena egitearena: besteen desirak eta beharrak asetzea alegia. Zaintzea eta apaingarri izatea.

Gure espazioa eremu pribatuarena da, gure betebeharra besteen gustukoa izatea eta besteen zerbitzura egotea; gai garrantzitsuak, berriz, gizonezkoentzat dira, jendearen erdia bakarrik diren arren.

Eta esklabutza horretatik at bizi nahi duen emakumea zigortua izango da. Hemen ez ditugu harrikatu, zehatu edo estaltzera behartuko. Hemen, eremu publikoan aritzera ausartzen garen emakumeoi -gure eskubidea balitz bezala-, gizen, itsusi, argal edo zaharrak garela esango digute. Gure orrazkera, gure janzkera eta gure gorputza bilakatzen da hizpide.

Izan ere, politikan aritzera ausartzen garen emakumeok desobeditu egiten dugu. Gizonezkoen sistema matxista honetan, inor harritzen ez delako ordezkaritza eta erabakitze guneetan gizonezkoak bakarrik ikusita; inoren harridura ez du eragiten alderdien zerrendetan gorbatak eta bizarrak bakarrik ikusteak, baina asaldagarria da emakumek batek egin beharko ez lukeena egitea: negoziatzea, protestatzea, edozein forotan hitz egitea, edozein gaiez iritzia ematea, bere ikuspegia defendatzea edota bere interesak besteen interesen paran jartzea.

Hori egiten duten emakumeak lekuz kanpo daude gehienentzat, desatseginak eta deserosoak dira. Horretan aritzen garen emakumeok, nahita edo nahi gabe, patriarkatuaren oinarriari desafioa egiten diogu: gizonezkoek agintzen dute eta beharrak dituzte, guk obeditu eta behar horiek asebete egiten ditugu.

Baldarra, zaharkitua eta gainditua dirudien arren, ez da hala. Azken mendeetan emakumeok gainditu izan ditugun esklabutza guztiek – errebelatu egin izan direnei esker beti ere- gure bizi baldintzak eta gizartean dugun lekua hobetu egin dituzte, baina ez dute ekarri, inondik inora, gure menpekotasunezko lekua lagatzea. Gure menpekotasuna haien asebetetzea baita.

Zaintzaile bezala eta ederrak izaten asebetetzea. Inposatzen diguten eremua pribatua da, bertan bete behar dugulako zaintzaren inposizioa. Eta edertasunaren baldintza ere inposatzen digute. Aurrez ezarritako edertasunaren kontzeptu, irreala, arbitrarioa eta bidegabea, eskuraezina delako. Ia inork ez dio erantzuten eredu horri, baina oso bestelakoa da kontzeptuarekin bat ez datorrena emakumea bada.

Hala, emakumea eremu politikoan murgiltzen denean, eremu pribatuan bakarrik aritzeko duen mandatuari desobeditu egiten dio, eta inork ez dio barkatuko edertasunaren mandatua ere ez obeditzea.

Beraz, emakumeak, politikan parte hartzearekin batera, ikusgai egin beharko ditu bere gorputza, aurpegia, sexualitatea, arropa eta orrazkera, ondasun publikoa izango balira bezala; inposatutako ereduak betetzen ez dituztenean guztien barre, iritzi eta umilazioak pairatu beharko balituzte bezala, trufatzen aritzen direnak eredu horietatik oso urrun egon arren.

Emakumeak, bidezkoa deritzonaren alde borrokatzeko eskubidea praktikan jartzearekin batera, onartu beharko du aurrean dituen gizonezkoak, eta ondoan dituenak ere, aurkari edo bigarren mailako aliatutzat joko duela; diskurtsoari baino bere bularrei arreta gehiago jarriko diola eta bere ileari dituen proposamenei baino garrantzi gehiago emango diola.

Arazoa da halako gauzak gizon nagusi, itsusi eta fatxa batek esaten dituenean, matxista erradikalenek bakarrik txalotzen dutela, Jule Goikoetxeak dioenez, eskasak eta aspergarriak direla. Zer egin, ordea, berdintasunetik eta kide gisa ikusi beharrean etsai eta lorontzi bezala ikusten gaituztenak gureak direnean…?

Berria

Berriak

Igor Meltxorrekin hitzaldia antolatu du Alternatibak EAJren kudeaketaren inguruan; txiringitoak, zigorgabetasuna eta harrokeria

Urtarrilaren 21ean, osteguna, Alternatibaren Bilboko egoitzan (Casilla plaza 6, behealdea), Igor Meltxor analista politikoarekin hitz egiteko aukera izango dugu, PNVren kudeatzeko balizko gaitasuna zalantzan jarriko duen solasaldian. “Gestión a la vasca: Chiringuitos, impunidad y soberbia” eta “Caso Bidegi: ¿A dónde ha ido a parar el dinero?” ikerketa liburuen egileak, hainbat datu jarriko ditu mahai gainean jeltzaleen benetako interesak azalerazteko, #PNVstyle deritzonaren frogak azken batean.

Berriak

Fatuarte: “Herritarren arazoak konpontzeko dirurik ez, baina Espainiako Itzuliaren antolatzaile eta hotel handiei ordaintzeko badago”

Alba Fatuarte, EH Bilduko zinegotzi eta Alternatibako kideak, Espainiako Itzuliagatik ordaintzea suposatuko duen xahubidea salatu du. “Ulertezina da udal gobernuak hartu duen erabakia. Orain dela egun gutxi bilbotarrek aurrekonturako egindako proposamen guztiak atzera bota zituzten. Bilboko 16 auzokide eta kultur arloko elkarteek egindako 20 proposamenentzat ez dago dirurik. Herritarren eguneroko arazoak konpontzeko dirurik ez, beraz. Espainiako Itzuliaren antolatzaile eta hotel handiei ordaintzeko, berriz, ez dago inolako arazorik”, salatu du Fatuartek.

EH Bildu Bilbok gogoratu du orain dela lau urte gertatutakoa. Orduan 197.000 euro gastatu zituen Udalak. “Diru publikoa xahutzen ari dira. Ekonomian omen duen eragina behin eta berriz aipatzen dute horrelako ekitaldiak babestek, bilbotarren beharrizanak ahazten dituzten bitartean”.

Hori dela eta, EH Bilduk Gobernuari galdetuko aurten zenbat diru bideratuko den Espainiako Itzulia babesteko. Horretaz gain, Udalak ekitaldi horretara bideratuko dituen baliabideak zehaztu beharko ditu. Esaterako, ekitaldi horretan lan egingo duten udaltzaingo kopurua, argiztapena edo kaleak atontzeko egingo diren lanen inguruan galdetuko du EH Bilduk.

EH Bildu Bilbo

Berriak

Alba Fatuarte: “Zezenketak dira animalien aurkako indarkeriaren adibiderik argienak”

Ricardo Barkala alkateordeak eta Vista Alegre zezen plazako arduradunak, azpiegitura hau errentagarria izateko erabilera berriak bilatu behar zaizkiola onartu du. Barkalak egindako adierazpenen harira, EH Bilduk beste behin ere mahaigaineratu nahi du zezen plazaren etorkizuneko erabilera herritarrek erabaki behar dutela.

Alba Fatuarte zinegotzi eta Alternatibako kidearen ustez, “zezen plazaren erabileraren inguruan eztabaida irekitzeko unea da, bilbotarrek erabaki dezaten zein erabilera ematen zaion. Batetik, argi geratu da zezenketek gero eta babes txikiagoa dutela bilbotarren artean, plaza askotan erdi hutsik ikusi dugu eta. Bestetik, EH Bildutik animalien kontrako indarkeria sustatzen duten ekitaldiak alde batera uztea eskatzen dugu, eta Bilbon zezenketak dira indarkeria horren adibiderik argienak.”

Hori dela eta, EH Bilduk bere proposamenari eusten dio: “espazio hori urteko egun guztietarako Aisialdirako Plaza bihurtu dadin. Hainbat erabilera izango dituen instalazio publiko bat izan beharko litzateke. Bilboko erdigunean herritarren aisialdirako instalazio aproposa izateko aukera paregabea dugu”, azpimarratu du Fatuartek.

Agerraldi eskaera

Azken urteetan Vista Alegre zezen plazako arduradunek zezenketek izan dituzten onura ekonomikoak  behin eta berriz aipatu dituzte. Hala ere, haiek ere onartzen dute plazaren errentagarritasuna ez dela behar bestekoa. Izan ere, Bilboko Udalak sarrera eta abonamenduen erosketarekin egiten duen zeharkako dirulaguntzarik gabe zezen-plazaren diruzaintza zenbaki gorritan egongo zen, eta errealitatea da Vista Alegre zezen plaza ”negozio hondatzailea” dela hiriarentzat.

EH Bilduk gogoratu du ez dagoela Vista Alegre zezen plazako Administrazio Batzarrean ordezkatuta ”EAJk eta PSEk ezarritako betoagatik”. Hori dela eta, EH Bilduk Ricardo Barkalaren premiazko agerraldia eskatu du.  Vista Alegre Zezen Plazaren azken Administrazio Kontseiluan jorratutako edukien inguruko azalpenak eman ditzan eta bertan aurkeztutako balantze ekonomikoaren xehetasunak Batzordean aurkeztu ditzan.

EH Bildu Bilbo

Berriak

Jostailu ez sexistak oparitzea eskatzeko, kanpaina

kartela parekidetasuna

Gabon garaia haurrei jostailu gehien oparitzen den garaia dela kontuan izanda, EH Bilduk kanpaina bat abiatu du udalerrietan, oparitzen diren jostailuak ez sexistak izateko. Hala nola, kartel sorta bat ikusgarri jarriko du helduak kontzientziatzeko helburuarekin.

Haurren hazkuntzan eta hezkuntzan, bitarteko naturala da jolasa. Jolasen bidez sozializatzen dute, ikasten dute taldean aritzen eta norbanako izaera osatzen joaten zaie. Jolasteko, ordea, jostailuak erabiltzen dira, eta hauek haurren nortasunaren garapenerako ezinbestekoak dira. Jostailuekin jolastuz, haurra norbere identitatea eraikitzen hastearekin batera, besteekiko pertzepzioa, harremantze modua eta jendarteratzea lantzen da. Horregatik da garrantzitsua oso, jolasaren hautaketa, jakinda haurraren interesa, kanpoko eraginak eta gure asmoak, kontuan izan behar ditugula.

Ez dago jolas onik edo txarrik, jolasaren erabilerak baitira onak edo txarrak, izatekotan. Era berean, ez dago neska edo mutikoentzat den jolasik, izatekotan, jolas jakinak neskei edo mutikoei eskaintzen baitizkiegu; eta kasu hauetan, generoei esleitutako rolak eta aurreiritziak indartzen ditugu.

Horregatik guztiagatik, EH Bilduk uste du haurrei jostailuak oparitzen dieten helduek erantzukizunez jokatu behar dutela, eta horretaz kontzientziatzeko, kanpaina jarriko du abian.

kartela neskamutilak elkarrekin

kartel generoa jolasak

Berriak

Diana Urrea: “Pertsona guztiek eskubide berberak izango dituzten kolore askotako Euskal Herri bat eraikitzeko erabaki nahi dugu”

Bizkaiko EH Bilduren Kongresurako hautagai eta Alternatibako kide Diana Urreak salatu du migratzaileek pairatzen duten legedia «beraien kontrakoa eta justifikatu gabea» dela eta «tik arrazistak» dituela. «Atzerritarren Legearen helburua ez da migratzaileak gizarteratzea, baizik eta kontrolatzea, zigortzea eta haien eskubideak mugatzea», adierazi du.

Ildo horretan, salatu egin du Atzerritarren Legeak polizia funtzionarioen esku uzten dituela hainbat erabaki eta «sarri askotan era arbitrarioan» aplikatzen dela.

Halaber, arduradun politiko asko migrazioaren kontra egiten ari diren adierazpen ugariez mintzatu da Urrea. «Einsteinek zioen bezala, errazagoa da atomo bat apurtzea zurrumurru bat haustea baino eta, horren haritik, hainbeste zurrumurru zabaltzen ari diren honetan komeni da gogoraraztea immigrazioak kultur aberastasuna ekarri duela gure herrira eta, gainera, immigratzaileek hamarnaka milioi euro sartzen dituztela urtero Estatuaren diru kutxan (zalantzarik gabe, beraiek jasotzen duten baino askoz ere diru gehiago)», adierazi du.

Hala ere, Urreak salatu duenez, «migratzaileek bazterketa bidegabea pairatzen dute. Gehienak enplegurik zailenetara, txartoen ordainduetara eta desatseginenetara kondenatuta daude eta, gainera, diskriminazioa, xenofobia edo arrazakeria sufritzen dute».

Kongresurako hautagaiak esan du EH Bilduk «giza eskubide guzti-guztiak defendatzen» dituela eta, horregatik, Atzerritarrak Atxikitzeko Zentro guztien itxiera eskatu duela.

Errefuxiatuen larrialdi egoerari dagokionez, Europan asiloa eskatzeko bide seguruak bila ditzatela exijitu die Estatuko eta Europako erakundeei, «indarrean dagoen legeria betez».

Urrearen iritziz, «burujabetza funtsezkoa da berdintasunean, justizia sozialean eta elkartasunean oinarritutako Euskal Herri bat eraikitzeko», eta hau gaineratu du: «aldeztu, amestu eta sentitzen dugun Euskal Herri horretan inor ez dago soberan. Guztiok gara beharrezkoak, norberaren jatorria edozein dela ere. Eta, erabakitzeko eskubideaz hitz egiten dugunean esan nahi duguna da pertsona guztiek haiengan eragina duten gauza guztietan erabakitzeko aukera izan behar dutela, inolako bazterketarik gabe, era indibidual eta kolektiboan».

«Pertsona guztiek eskubide berberak izango dituzten kolore askotako Euskal Herri bat eraikitzeko erabaki nahi dugu ».

EH Bildu

Berriak

Alternatiba | Ezkerra eraldatzearen erronka

X