Gizartea – 36 orrialdea

EHBilduko legebiltzarkideek ez dute pribilegiorik nahi eta BECen doan sartzeko txartelak itzuli dituzte

“Politika prestigiatu nahi dugu eta horren ildotik pribilegio guztiak, txikienak ere bai, ezabatu behar ditugu; horregatik, gure zeregin politikoa betetzeagatik edozein sarrera doan eskuratzeari uko egitea logikoena eta koherenteena da”.

Legealdi hasieratik bertatik ezarritako irizpideari jarraituz, EH Bilduko legebiltzarkideek Bilbao Exhibition Centre-BECeko zuzendaritzak bidalitako “ohorezko txartelak” itzultzea erabaki dute. BECek txartel horiek bidali ohi dizkie urtero Gasteizko legebiltzarkideei, hauek urtean zehar bertan antolatzen diren erakusketa guztietara doan sartzeko aukera izan dezaten. EH Bilduk, ordea, horrelako gonbidapenak pribilegiotzat jotzen ditu eta, iaz bezala, aurten ere txartelak itzuli ditu. “Legebiltzarkideok soldata ona dugu eta ez dugu faborezko traturik ez behar, ez merezi; edozein herritarrek sarrera ordaindu behar badu BECeko erakusketetara sartzeagatik, legebiltzarkideok ere berdin egin behar dugu”.

EH Bilduren legebiltzarkideen erabakia bat dator horrelakoetan izan duten jokabidearekin, aurrekoetan ere opera, zinema eta antzerkirako sarrerak eta gonbidapenak itzuli dituztelako, kargu publikoen jarduera eta pribilegiotzat jo daitekeen edozein elementu errotik bereizi nahian. “Gure asmoa politika eta politikariak prestigiatzea da eta horren ildotik pribilegio guztiak, txikienak ere bai, ezabatu behar ditugu; horregatik, gure zeregin politikoa betetzeagatik edozein pase edo sarrera doan eskuratzeari uko egitea logikoena eta koherenteena dela uste dugu”.

ehbildu.net-en irakurri

14/02/12

Berriak

Hiri eredu berrian sakontzeko, herritarren ekarpena bultzatuko du Donostiako EHBilduk

Azken urteetan egindako lana baloratzeko eta “hiri eredu berria eraikitzeko ditugun erronkak herritarrekin partekatzeko” herri batzarrak antolatu ditu EH Bilduk Donostian. Gaur egindako agerraldian, duela bi urte abiarazi zen aldaketan sakontzeko herritarren ekarpena ezinbesteko osagaitzat jo dute EH Bilduko ordezkariek. Bertan izan da ere Alternatiba Gipuzkoako kide Ayem Oskoz.

“2011ko maiatzean burutu ziren udal hauteskundeek aldaketa esanguratsua eragin zuten Donostiako Udalean. EH Bildu Donostiako Udal Gobernuaren buru jarriz, urte luzez Donostian garatutako politika eredua aldatzea hautatu zuten herritarrek. 2011ko maiatza hartan, gauzak beste modu batera egiteko jarri gintuzten herritarrek Udal Gobernuaren buru, eta geroztik, mandatu horrek gidatu ditu gure urratsak.

Bi urte eta erdi hauetan, aldaketa hori gorpuztuz joan gara, bai politika egiteko moduei dagokienean, baita politika horien edukiei dagokienean ere. Formei dagokienean, Udaletxearen ateak herritarrei zabaldu dizkiegu eta herritarren parte hartzerako bideak ugaldu. Auzoetara joan gara arazoen aurrean aurpegia ematera eta informazioa herritarren esku jarri dugu. Herritarrak Donostiako politikagintzaren protagonista bilakatzen ari gara.

Baina politika egiteko moduez harago, garatzen ari garen politikek ere, aldaketa nabarmena ekarri dute Donostiara. Gure politiken erdigunean ere, pertsonak, donostiarrak jarri baititugu. Donostiarren interesek gidatzen dituzte, gaur inoiz ez bezala, Donostiako Udaletik bultzatzen diren politikak. Eskubide sozialen eremuan, enpleguaren sustapenean, giza eskubideen alorrean, ekologian, hizkuntzan, kulturan edota aniztasunean, herritarrak dira EH Bilduren politiken abiapuntua eta helmuga. Herritarrak dira gure politikaren ardatza.

Eta hori horrela izanik, berebiziko garrantzia du EH Bildurentzako instituzioetan egiten ari garen lan hori guztia herritar sare zabalekin iraunkorki partekatzea. Informazioa zuzenki elkartrukatu eta egiten dugun lana elkarrekin baloratzeko, baita aurrera begira ditugun erronkak elkarrekin aztertu eta zehazteko ere. Ekainaren 23an, legegintzaldiak bi urte bete zituenean, Miramarren ehun herritar inguru elkartu ginen egindako bidearen balantzea egiteko, eta bertan, ondorio argia atera genuen. Alegia, halako saio irekiak biderkatu behar genituela.

Eta hala egingo dugu. Otsaila eta martxoan zehar lau saio antolatu ditugu hiriko gune ezberdinetan. Esan bezala, saioen helburua bikoitza izango da: egindako bidearen balorazioa egitea eta aurrera begira ditugun erronkak partekatzea. Saio guztiak larunbatez burutuko ditugu, goizeko 11:00etan abiatuta, eta metodologia aldetik, herritarren parte hartzea bultzatzeko formatuak landuko ditugu (talde txikietan banatu…).

– Datorren larunbatean, otsailaren 15ean, Okendo Kultur Etxean herritarren partaidetzaz arituko gara “Herritarrok egiten dugu Donostia” izendatu dugun saioan.

– Otsailaren 22an, Egiako Kultur Etxean, euskara izango dugu hizpide “Bizi euskaraz Donostia” lemapean.

– Martxoaren 22an, Loiolako Kultur Etxean hirigintzaz arituko gara “pertsonentzako hiria” izenburupean.

– Martxoaren 29an Altzako Casares Kultur Etxean, ongizate politikak aztertuko ditugu “Donostia justu eta solidarioa” saioan.

Guk argi dugu, guk eraiki nahi dugun Donostia, herritarron Donostia, herritarrekiko justu eta solidarioa, parte hartzailea, euskalduna, jasangarria, kultur-anitza… eraikitzen jarraitzeko, herritarren inplikazioa eta babesa ezinbesteko osagaia dugula. Horregatik, batzar hauetan parte hartzeko deia ozen luzatu nahi diegu EH Bildu bultzatzen ari den hiri eredu berri honekin bat egiten duten herritar guztiei.

14/02/11

Berriak

Prozesu parte-hartzailea abiatu dugu, horren premiazkoa den aldaketa sustatzeko helburuz

Aldaketa sustatzea xede izango duen prozesu parte hartzailea abiarazi dugu. Bilbon horren premiazkoa den aldaketarako oinariak definitu nahi ditugu. Horretarako, orain hasi eta 2015eko udaberrira arte luzatuko den prozesuari ekin diogu. Lehenbizi, arloz arloko eta auzoz auzoko diagnostiko eguneratu bat egingo dugu.

200 lagun inguru elkartu gara horretarako; jatorri, adin, trebakuntza, lanbide, militantzia esparru eta ikuspegi desberdineko 200 lagun. Ondoren, diagnostiko horren gaineko proposamenak landuko ditugu, hala nahi duten herritar eta eragile guztien parte hartzearekin. Denon artean denontzako ibilbide orri bat zehazteko helburuz. Herritarrengandik herritarrenganako eskaintza osatuz. Helmuga: Beste Bilbo bat. Herritarron Bilbo.

‘Aldaketa abian. ¡Estamos en marcha!’ goiburu hartuta, Bilbon aldaketa sustatzeko xedez abiarazitako prozesu parte hartzailea aurkeztu dugu gaur Zabalguneko Azokan. Bilbon horren premiazkoa den aldaketarako oinarriak definitu nahi ditugu, aldaketa sozioekomikorako eta aldaketa soziokulturalerako zimenduak ezarri. Joan zen abenduan hasi genuen dinamika, eta 2015eko udaberrira arte iraungo du.

Baina zertan datza abian jarri dugun prozesua? Zein helburu du? Zein ekinbide?

Bilboko egoeraren diagnostiko bat egingo dugu aurrena, diagnostiko berritu bat, egungo egoerari erantzuteko. Arlokakoa orain, eta auzokakoa, irailetik aurrera. 200 lagun inguru elkartu gara horretarako. Jatorri, adin, trebakuntza, lanbide, militantzia esparru eta ikuspegi desberdineko 200 lagun.

Lau ardatzen inguruan antolaturiko 18 lan taldeetan ari gara lanean. Honakoetan, hain justu: Pertsonak lehenetsiko dituen hiria (Ogasuna eta fiskalitatea, Enplegua eta Merkataritza, Elikadura Burujabetza eta Eskubide Sozialak), Hiri eredu iraunkorra (Hirigintza, Mugikortasuna, Ingurumena, Etxebizitza, Turismoa), Bertoko kulturan oinarrituriko hiria (Kultura sormena, Jai eredua, Euskara, Kirola, Aisialdia, Hezkuntza) eta Askatasuna ardatz izango duen hiria (Politika Feminista, Gazteria, Hirugarren adina-Pentsionistak, Aniztasuna eta Migrazioa).

Horien artean daude, besteak beste, Xabier Landabidea (Deustuko Unibertsitateko irakaslea), Joseba Martin (Lankidetza Garapenerako teknikaria), Karlos Renedo (Arkitektoa eta Otxarkoagako herri mugimenduko kidea), Aitor Apraiz (Udal Etxebizitzetako langilea), Ula Iruretagoiena (Arkitektoa eta EHUko irakaslea), Ibai Gandiaga (Arkitektoen Elkargoko kidea), Aitor Torre (Bizkaiko Batzarkidea), Andrea Heuschmid (Alemanian sortutako bilbotarra, Gertuko turismoan aditua), Karmelo Landa (EHUko irakaslea eta Europako Parlamentario ohia), Jon Aritz Bengoetxea (Irakaslea eta zinegotzi ohia), Mirian Alonso (Stilo futbol areto taldeko jokalaria eta zinemagilea), Edriga Aranburu (Bizkaiko Arraun Federazioko idazkaria), Maite Arraizar (Athletismo Santutxuko korrikalaria), Ana Etxarte (Zinegotzia), Urtzi Martinez (Arangoitiko gazte mugimenduko kidea), Mikel Arginarena (Irakasle erretiratua eta Pentsionistak Martxaneko kidea), Xabat Moran (Santutxuko Jai Batzordeko kidea), Raquel Goñi (7. Barrutiko kontseilaria), Jose Felix Aguilera (4. Barrutiko kontseilaria), Igone Iriarte (8. Barrutiko kontseilaria).

Bilbon aldaketa gauzatzen hasteko estrategiko eta klabe diren arloetan ari gara lanean, bakoitzaren argazkia zein den ikusteko, lehenik eta behin; eta argazki horren gainean lan egiteko, gero. Errealitatea kontuan hartu eta helburuak ezarri ondoren, horiek lortzeko proposamenak egiteko, hain justu. Denon artean, denontzako ibilbide orri bat zehazteko. Helmuga: Beste Bilbo bat. Herritarron Bilbo.

Hala, diagnostikoa osatu ondoren, parte hartzeari ateak irekiko dizkiogu bete-betean, lan taldeetan osatutako azterlan horien gainean ekarpenak egin ditzaten hala nahi duten herritar eta eragile guztiek. Horretarako, hainbat ekinbide antolatuko ditugu, hala nola jardunaldiak eta parte hartzea ardatz izango duten bestelako dinamikak ere. Hirigunean zein auzoetan. Bilbo mailan zein auzoen perspektiban.

Eta horren ondotik, prozesuaren bigarren atal batean, proposamenak lantzeari eta jasotzeari ekingo diogu, herritarron Bilbo sortzeko bidean urrats eta ekinbideak zein izango diren denen artean erabakitzeko.

Izan ere, postaleko hiria saldu nahi diguten arren, oso bestelakoa da Bilboren egiazko argazkia.

Langabeziak muga historiko guztiak hautsi ditu; %18ko langabezia tasa du Bilbok, hau da, 30.987 langabe daude egun. Hiria osatzen duten 38 auzoetatik soilik 4 daude hiriaren bataz besteko errentaren gainetik. Eta iaz, bost etxegabe hil ziren kalean. Arazo latza baitu Bilbok; 236 pertsonak lo egiten dute, egunero, kale gorrian.

Hala eta guztiz ere, larrialdietarako laguntzak emateko leihatila irailean itxi egin zuen udalak, “dirurik ez zegoelako”.

Horrez gain, Behatokiak urtero egiten duen txostenaren aurreneko postuetan dago Bilboko Udala, hau da, hizkuntz eskubideak urratzen dituzten erakundeen zerrendaren lehenetariko postuen artean da. Eta oraindik orain, badira auzo handiak inongo haurreskola zerbitzurik ez dutenak, hala nola, Alde Zaharra, Indautxu, Errekalde, Txurdinaga…

EHBildu Bilbo

14/02/03

Berriak

Alternatibak dio Adegik pairatutako enegarren porrot judizialak agerian utzi duela patronalak faltan duela Gipuzkoa itzalpetik gobernatzen zueneko garaia

Alternatibako Gipuzkoako koordinatzaile Ayem Oskozek baikor hartu du EAEko Auzitegi Nagusiak Adegik Gipuzkoako Politika Sozialeko departamentuaren zein zahar egoitza eta eguneko zentroetako sektoreko patronaletako baten aurka aurkeztutako salaketa atzera bota izana, iaz milaka langile beren lan baldintzen defentsan grebara eraman zituen auziaren harira. Hala, Oskozek adierazi du Gipuzkoako patronalak pairatutako “enegarren porrot judizialak” bi ondorio argi dituela: “Batetik, Adegi justizia eta politikaren gainetik dagoela uste arren, errealitatearekin topo egiten duela eta, bestetik, patronalak faltan duela Gipuzkoa itzalpetik gobernatzen zueneko garaia, erakunde publikoetatik adiskidekeria bakarrik jasotzen zuenean”.

Alderdi ezkertiarretik gatazkaren sorburua gogoratu nahi izan dute, zaintza lanen sektorea alegia, “guztiz feminizatua, prekarioa eta ikusiezina dena, ezinbesteko funtzio soziala betetzen duen arren”; eta baita ere, milaka emakumeen “borroka eredugarria” aipatu dute, lurralde osoan grebak eta mobilizazioak egin zituztelako haien lan baldintzak mantentzeko, patronalaren lan erreforma aplikatzeko asmoari aurre eginez. Aldi berean, bozeramaileak Politika Sozialeko sailaren jarrera nabarmendu du “sektorean lan egiten duten 5.000 pertsonen baldintzak ez pobretzeko beharrezkoak ziren bitartekoak jarri zituelako, diputatu eta Alternatibako kide Ander Rodriguezen kontrako Adegiren beste salaketa bat ekarri zuena, berriz ere justiziak atzera bota zuena”.

Azkenik, Alternatibatik egoerak ironia faltarik ez duela uste dute “langileak beldurtzeko eta banan-banan haien lan baldintzak ezabatzeko negoziaketa kolektiboarekin bukatu nahi duen patronal bera izan delako, hain zuzen ere, justiziara jo duena negoziaketa kolektiborako duen eskubidea aldarrikatu duena, Diputazioa eta sindikatuak urraketaren erruduntzat joz”.

14/01/28

Berriak

Donostian ospatutako ‘5 urtez alternatibak lotuz’ hitzaldien bideoak Gorripidea, Puyalón de Cuchas eta Alternatibako kideekin

Pasa den abenduaren 13an, Alternatibak 5 urte bete zituen. 5 urte alternatibak lotuz eta Euskal Herriko ezkerra eraldatzearen alde egiten, mundua eraldatzen laguntzeko helburuarekin. Urtemugaren harira, hitzaldi sorta bat antolatu genuen Gasteiz, Bilbo eta Donostian. Hemen dira Donostiako Koldo Mitxelena Kulturunean egindako parte-hartzeak.

Gorripidea-ko kide Joxe Iriarte ‘Bikila-ren’ parte-hartzea. Bere hitzaldian Bikilak subiranotasunaren eta emntzipazioaren inguruko gako batzuk ematen dizkigu: “Prozesu emanzipatzaileak, bi aurpiko txanpona izan beharrean, poliedroak dira; Aurpegi asko dituzte, horregatik uste dut Euskal Herriaren emantzipazioa prozesu orokor baten barruan garatu behar da, besteak beste, joera sozialista, alternatiboa, ekologista, feminista eta internazionalista izan behar duena. Poliedro horren kanpo dagoen askatasun nazionalerako prozesurik ezin dut irudikatu”.

Puyalón de Cuchaseko (Aragón) kide Zésar Corellaren parte-hartzea, hitzaldiaren titulua ‘Subiranotasuna eta emantzaipazioa’ abiapuntzat hartuta Aragoiko nazionalismoaren iraganeko, oraingo eta etorkizuneko laburpena egiten digu; Euskal Herrian gutxi entzun badugu ere, ibilbide historiko luzeko nazionalismoa dugu hau.

Alternatibako kide Diana Urrearen hitzaldia. Bere parte-harztean Urreak Euskal Herriaren subiranotasuna eta emantzipazioaren gakoaz hizt egiten digu: “Herri bat ez da sekula subirano izango, nazioa osatzen duten pertsonak subiranoak ez badira. Horregatik, eraikitze nazionala ezin da ulertu eraikitze sozialik gabe”. Aldi berean, borroka guztiak defendatuko dituen mugimendu popularra sortzeko beharraz egiten du berba, eta honen harira, azpimarratzen du “benetako askatasun nazionala lortu nahi badugu, ezinbestekoa da pertsona guztien eskubideak bermatzea aurretik”.