Joan den abenduaren 1ean eta 2an, #LeftYouthStruggles gazte ezkertiarren Europako topaketak egin ziren Gernika-Lumon. GUE/NGL taldeak antolatuta, EH Bilduren taldea Europako legebiltzarrean, hitzartze ugari izan ziren askotariko erronka eta abagune politikoen gainean. Bukaeran, topaketen manifestua irakurri zuen Sandra Llano Alternatibako kideak. Hona hemen bideoa.
Turkian eta Ipar Kurdistanen azken egun hauetan gertatzen ari direnekin oso kezkatuta gaude: Ankaran gertatutako atentatu odoltsuarekin eta HDP alderdiko ehunetik gorako kideen atxiloketa indiskriminatuekin.
Lehenik eta behin, elkartasuna adierazten dio EH Bilduk Ankaran hildako guztien familiartekoei eta bat egiten du beraien doluarekin. Halaber, gertaera bortitz horren aurrean bat egiten dugu HDPk eginiko irakurketarekin eta gaitzespenarekin. Bigarrenik, salatu egiten dugu Turkiako gobernuak ekainetik hona areagotu duen jite errepresiboa eta, zehazki, igandean gertatutako HDPko ehunetik gorako kideen atxiloketa indiskriminatuak. Elkartasuna ere atxilotutakoen familiari eta lagunarteari. Giza eskubideek eta libertate demokratikoek hutsaren hurrengo balioa dute gaur egun Turkian.
Eskatu egiten diogu nazioarteko komunitateari, eta bereziki Europako Batasunari, Turkiako egoera eta gatazka modu demokratikoak bideratzen ahalegina egin dezan egoera okerragora egin aurretik.
Azken hilabeteotan gertatutako errepresioa eta giza eskubideen urraketak salatzeko eta herri kurduari elkartasuna adierazteko dei egiten diegu euskal herritarrei joan daitezela datorren abenduaren 17an, larunbatarekin, Kurdistanen aldeko eta giza-eskubideekiko errespetua aldarrikatzeko Bilbon egingo den manifestaziora. Plaza Eliptikoan ekingo diogu manifestazioari 12:30ean ‘Faxismoaren aurrean, Gora Kurdistan’ lelopean.
Euskal Herriko ezker soberanistaren koalizioak bere elkartasuna eta doluminak helarazi nahi dizkio Kubako herriari eta Fidel Castroren familiari. Munduko historia hurbilean pertsonaia esanguratsua da Fidel Castro, eta mundo mailan urte askoan gogoratua izango da.
Mundu hobea eraiki nahi dugunontzat erreferentzia saihestazina izan da eta da Fidel Castro. Eredua da desberdintasunen aurka lan egiten duten guztientzat. Gure doluminik sentikorrena helarazi nahi diogu Euskal Herritik Kubako herriari eta Fidelen heriotzagatik penatuta dauden guztiei.
El Correo-k gaur argitaratu duen albistearen inguruan, zeinaren arabera EH Bilduk AEBetako presidente berria zoriondu ei duen, Alternatibatik honakoa adierazi nahi dugu:
-Inork ez luke kortesia instituzionala eta honen bideak (horretan batere iaioak ez garela aitortuta) nahastu beharko ezkerreko indar batek iraganean, gaur egunean eta etorkizunean erakutsitako jarrera politikoarekin.
– Alternatibatik jakin badakigu ez Donald Trumpek ezta Hillary Clintonen kokapen politikoek – NATOren egituraren jarraipenetik erator daitekeenak barne- ez dutela ezer onik ekarriko aurrerapen sozialerako, justizia sozialerako ezta herri arteko elkartasunaren bidean.
– Hala, zalantzarik ez dugu kapitalismoa gaindituko duen orden sozial berria eraikitzearekin tematuta dauden ezkerrek, horien artean EH Bildu dagoela uste dugu, berdintasuna, askatasuna eta tolerantzia mehatxatzen duten politika atzerakoien aurka egingo dutela.
Joxe Iriarte ‘Bikila’
1994. Mexiko ustez otzandu eta baretu batean, Salinas de Gortadi presidente neoliberalak sinatu berria du TLCAN- NAFTA ituna. Amaitutzat ematen da Pancho Villa eta Emiliano Zapataren iraultzaren hondarrean Lázaro Cárdenasek baliabide energetiko eta indar produktibo nagusiak nazionalizatuta eraikitako ongizateko estatu paternalista eta abertzalea. Kapital transnazionalei (eta bertako oligarkiei) parez pare irekitzen zaizkio ateak ondare nazionalak pribatizatzeko eta ustiatzeko.
Supituki, Emiliano Zapata ikur Lacandona oihanetik beren buruak mozorrotuta daramaten indigenek osaturiko armada batek (EZLN) San Cristóbal de las Casas bere egiten du, Lurra eta askatasuna! aldarri. Armada horrek ez du zer ikusterik ohiko gerrila-rekin. Izaera indigena du eta bere helburua ez da Estatu boterea bere egitea, botereari aurre egitea baizik.
Eta gu harri eta zur.
Harez geroztik EZLNk bidea egin du Chiapas lurraldean, komunitate indigenen auto-antolakuntza babestuz eta komunitatea helburu duen filosofian oinarrituriko obedecer mandando (aginduz obeditu) xedez eraturiko gobernu autonomoak (caracolak) osatuz. Alabaina ez da mugatu liberatutako txokoan goxo egotera. Gai izan da La sesta deituriko internazional sarea sustatzeko, baita egoeraren arabera Mexiko osorako ekimenak antolatzeko ere aldian-aldian. 2006an izugarrizko arrakasta izan zuen La Otra Campaña Mexiko osoan era askotariko komunitate eta talde desberdinen laguntza eta sostengua lortuz.
2016. Mexikok amildegiaren ertzean dagoen traza guztiak ditu. Instituzioak pipiak janda daude; ustelkeria da nagusi politikan eta herrian miseria; baliabide naturalen ustiaketa basatia aurrera doa komunitateak deseginez; gizartea militarizatu egin da narkoei aurre egiteko aitzakiaz, eta indar parapolizialen jazarpen hiltzailea nonahi dago. “Emakumezidioa” ahaztu gabe.
Berriro, ustekabean, ohiko abstentzioa alde batera utziz, izugarrizko lurrikara politikoa eragin du EZLNk eta CNIk (Indigenen Biltzar Nazionala) hauteskundeetan parte hartuko dutela adierazi izanak, komunitate auto-antolatuak oinarri, presidentegaia emakume indigena izango dutelarik.
Eta gu aho bete hortz.
Eliteen erantzuna. Mespretxua, arrazakeria eta misoginia. Castillas 1 (gazteleraz, alegia) erdipurdi hitz egingo duen emakume ezjakin bat presidente gai? Izorratuenenean, berriz, poza eta itxaropena.
(1) Galeano (lehen Marcos) subkomandanteak ohiko zuhurtziarekin erantzun die: emakume horrek agian ez du castilla-z egoki hitz egingo, baina argi eta garbi bai, eta denok ulertzen dugu. Zuen erretolika ikasia, aldiz, hutsala, iluna eta ulertezina da herriarentzat. Horra diferentzia!
Argian argitaratua
Alternatibak Bergako alkate Montse Venturosen atxiloketa salatu du, eta gainbeheran dagoen erregimenaren izenean prestatutako jazarpen politikoa delako. Aldi berean, udal agintariaren jokaeraren tinkotasuna, erabakitasuna eta koherentzia txalotu ditu, subiranotasun osoaren bidean bakeari helduta lan egiten duen herri baten eskubideak zapaldu nahi dituen eskakizun judizial inkisitorialak desobeditu dituelako.
Alderdi ezkertiarretik Hauteskunde Batzordearen agindua legez kanpotzat jo dute, alkateak herriari zor dion heinean, gehiengoaren borondate eta sentimenduaren kontra atentatzen duelako. Preseski horregatik, eskakizun judizialei men ez egitea guztiz zentzuzkoa dela adierazi dute, alegia, gehiengoaren borondate horren kontra egiten dutelako.
Azkenik, erakunde subiranistak bere elkartasuna bidali nahi izan dio Montse Venturos eta Kataluniako herriari ere, egunero Errepublika aske, burujabe eta justuago baten alde koherentziaz borrokan ari direlako.
Diana Urrea – Alternatiba
Zortzi milioi biktima, 250.000 hildako eta desagertutako 70.000 lagun utzi ditu. Bakea eta Justizia Soziala oinarri izango duen historia idatzi ahal izango du. Izan ere, itunak eduki benetan azpimarragarriak ditu:
Nekazaritza erreforma osoa: Kolonbian biztanleriaren %0,04 lurralde osoaren %60aren jabe da. Nekazariei zortzi milioi hektarea inguru kendu dizkiete.
Bakea eraikitzeko irekitasun demokratikoa: eremu politikoan arazo nagusien inguruan hausnarketa aberastuko duten indar berriei ateak irekiko dizkiete.
Legez kanpoko drogen arazoari aurre egitea: horren desagerpena erabakigarria izango da. Labore hauek, hilero, bilioika dolar mugitzen dituzte.
Biktimak: Egia, Justizia, Erreparazioa eta Berriz ez Gertatzeko Sistema Integrala ezartzen da, bitarteko judizial zein bide judizialetatik kanpokoak, biktimak ahal den neurrian gogobetetzeko.
Behin betiko su-etena eta bi aldeen arteko erasoei amaiera behin betikoa ematea, armak laga eta gatazka bukatzea. 180 eguneko epean armak uzteko kronograma zehaztuta, ondoren, bizitza zibilerako urratsa egin ahal izan du FARCek.
Inplementazioa, egiaztatzea eta berrestea: Akordioak jaso du sinaduraren ostean, herritarrek berrestu beharko dutela. Horixe da gaurko ariketa. Habanan Genero Azpibatzorde bat ezarri da, halaber, emakumeei ahalbidetu diena bizi izan duten indarkeriaren berri ematea. Akordioaren atal guztiak ikuspegi horretatik garatu dira.
Prozesua atzeraezina da, baina ezin ahaztu bakearen etsaiek, Uribe buru, ahal duten guztia egingo dutela akordioan jasotakoa gauza ez dadin. Esaterako, nekazariei kendutako lurrak berrezartzeak, paramilitarren ekintzekin egingo du topo. Kezkak ditugu, halaber, FARC-EP alderdi politiko bilatzeko bidearen inguruan. Izan ere, 1980ko hamarkadan Union Patrioticako 4.000 lagun erail zituzten, bizirik atera ziren apurrek erbesterako bidea hartuta. 30 urteko zigorgabetasunaren ostean, Kolonbiako presidenteak krimen horien erantzukizuna aitortu eta barkamena eskatu zuen lehen aldiz. Hala ere, azken urtean Marcha Patrioticako 100 lagun baino gehiago hil dituzte.
Sinetsita nago galdeketan baiezkoak irabaziko duela, baina egia da kanpaina gogorra ari dela egiten bakearen aurka, prozesuaren kontra hitz egiten eta gizateriaren aurkako krimenak egin dituztenak babesten. Hiriguneetan sarbidea duen diskurtsoa da, landa eremuan pairatu baitira gatazkaren ondorio nagusiak, eta bertakoak, konbentzituta daude bakea ezartzeko bidearen hasiera dela akordioa.
Nabarmendu behar da Kolonbiako Gobernuak eta FARC-EPk erakutsi duten ausardia. Borondate politikoa dagoenean, bakea eraiki daitekeela frogatu dute, mailaketarik gabeko biktimak aitortu daitezkeela eta garaile zein galtzailerik gabeko prozesua egin daitekeela. Eta Kolonbian egin izan bada, Euskal Herrian ere egin ahalko da.
Galdeketa honetan bakeari baiezkoa ematea, etorkizun hobea marrazteari baiezkoa ematearen parekoa da. Horregatik espero dugu bakea eta justizia soziala garaile ateratzea gorrotoaren eta gerraren aurrean.
Koalizio subiranistak Espainiako Gobernuko presidenteari zuzendutako gutun bat erregistratu du Diputatuen Kongresuan. Gutunean, Oskar Matute Alternatibako kide eta EH Bilduko diputatuak, Marian Beitialarrangoitiaren batera, irailaren 26an Kolonbiako Bake Akordioa sinatzeko ekitaldira ez joateko eskatzen diote Mariano Rajoyri.
EH Bilduren ustez, Mariano Rajoyren gobernuak Euskal Herriko prozesu politikoaren nahiz Saharako gatazkaren aurrean daukan jarrera “ez da koherentea Kolonbiako Bake Akordioa ospatzearekin”. Horregatik, eta “kontuan izanik mota guztietako ad intra nahiz ad extra gatazkak kudeatzeko eta konpontzeko erakutsi duen ezgaitasuna eta Kolonbiako bake prozesuari dagokionez bere gobernuak ez duela inolako ekarpenik egin eta prozesu horretatik ez duela ezertxo ere ikasi”, koalizio subiranistak uste du “zentzuzkoena” dela Mariano Rajoyren gobernua ez joatea Kolonbiara irailaren 26an, “ez duelako inolako ekarpenik egin eta beraren aldetik ez delako ezer espero”.
Habanan Kolonbiako presidente Juan Manuel Santosek eta FARC-EPk lortutako bake akordioaren aurrean, Alternatibak Kolonbiako herritarrak zoriondu nahi ditu, lau urteko negoziazio gogorrek etekina izan baitute. Bi aldeen arteko konpromisoari esker, azkenean garatu egin dituzte negoziazioaren hasieran ezarritako bost puntuak: Nekazal erreforma, parte-hartze politikoa, bi aldeen su eten zein armagabetzea, drogen kontrola eta biktimak.
Azken ituna, “osoa eta behin betikoa”, Kolonbiara eraman beharko dute orain, Kongresuan eta Senatuan berretsi eta, azkenean, urrian egingo den herri galdeketa baten bidez herritarrek azken hitza izateko.
Hala, atzean geldituko da ia sei hamarkadetako gerra, eta helduko da eguna kolonbiar guztiek aukera izango dutela memoria partekatua eraikitzeko, aniztasun politiko, sozial eta kulturaletik. Guzti horregatik, Euskal Herritik eta Alternatibatik, #SiAlaPaz (bakeari bai) lemarekin bat egiten dugu, bakea eta justizia soziala helburu duen bidetik ibiltzen hasteko. Espero dugu, halaber, ahal bezain pronto ELNrekiko akordio bat ere lortu ahal izatea.
Estatuek harresiak altxatzen dituzte, baina elkartasunak ez du mugarik. Azken asteetan, euskal karabana solidarioa ibili da Greziarik, Europako ateak jotzen dituzten errefuxiatuen eskubideen alde. Bertan, Euskal Herriko eragile sozial ugarietako ordezkariekin batera, Alternatiba eta Ehbilduko kide Diana Urrea eta Aitor Miguel ibili dira. #InorEzDaIlegala
#vergUEnza #ongietorrierrefuxiatuak pic.twitter.com/AWH6TytSwP
— Diana Urrea (@DianaUrrea5) 2016(e)ko uztailak 23
https://scontent-cdg2-1.xx.fbcdn.net/t31.0-8/13708248_1379534802063832_7099983328722214904_o.jpg
https://scontent-cdg2-1.xx.fbcdn.net/t31.0-8/13701117_1379533332063979_2882124211309593238_o.jpg
https://scontent-cdg2-1.xx.fbcdn.net/t31.0-8/13731789_1379533348730644_532214136499256810_o.jpg
https://scontent-cdg2-1.xx.fbcdn.net/t31.0-8/13732043_1379534798730499_6239289591022934580_o.jpg
https://scontent-cdg2-1.xx.fbcdn.net/t31.0-8/13693001_1379533068730672_619017488374487142_o.jpg
https://scontent-cdg2-1.xx.fbcdn.net/t31.0-8/13724070_1379532995397346_6525615737556388157_o.jpg
Alternatiba | Ezkerra eraldatzearen erronka
