Etiketa: Nazio Auzia

Estrategia nazionalerako engaiamendua izenpetu dute Alternatibak, EAk, ABk, Aralarrek eta Ezker Abertzaleak

Ezker abertzalea, Aralar, EA, Alternatiba eta AB ezkerreko alderdi abertzaleek estrategia nazionalerako konpromisoa aurkeztu eta sinatu dute eguerdian Irunen, Ficoba erakustazokan. 25 minutuko ekitaldia izan da: akordioaren irakurketa eta izenpetzea.

“Indarrak biltzearen aldeko apustu sendo eta estrategikoa” dela esan dute, “eraikuntza nazionala eta eraldaketa soziala bultzatzeko” asmoz, “bakean, askatasunean eta justizia sozialean oinarritutako Euskal Herria eraikitzeko”. Azken batean, “Europan Euskal Herria nazio burujabea” lortzeko xedea daukate.

Euskal gatazka politikoa gainditzeko “akordio demokratikoa” aldarrikatu dute, eta horretarako bazterketarik gabeko elkarrizketa behar dela uste dute. Pertsona eta kolektibo guztien eskubideak behar dira, haien arabera, eta horien artean erabaki eskubidea funtsezkoa dela diote gatazkaren korapiloa askatzeko.

“Eredu ekonomiko subiranoa, justua eta ekologikoa” behar dela diote. “Euskal identitatearen ikur nagusia euskara” dela azpimarratu dute, eta Euskal Herri osoan ofiziala behar duela izan.

Irakurketan eta sinaduran parte hartu dute ezker abertzaleko Rufi Etxeberria eta Anita Lopepek, Aralarreko Patxi Zabaleta eta Rebeka Uberak, EAko Pello Urizar eta Miren Urrestietak, Alternatibako Oskar Matute eta Amaia Agirresarobek eta ABko Peio Etxebarri-Aintziart eta Mertxe Colinak.

http://www.youtube.com/watch?v=7BmO4IxfKZw

http://alternatiba.net/old-files/120428AkordioNazionala.pdf

Berriak

Aralarrek, ABk, Ezker Abertzaleak, EAk eta Alternatibak indarrak biltzeko apustu estrategikoa aurkeztuko dute hilaren 28an

Martxoaren 14ean, bost alderdiek publikoki adierazi genuen, elkar-lana estrategiko bati begirako engaiamendu bat lantzen ari ginela.

Oinarrian lan hori abiatzera eraman gaituen egoeraren azterketaren gakoak bi hitzez ber-gogoratzea inportantea iduritzen zaigu :

– Bizi dugun abagune historikoak herri honek ezagutzen duen gatazka politikoa gainditzeari begira eta bere eraikuntza nazionalaren zein eraldaketa sozialaren bultzatzeko mementu erabakigarrian kokatzen gaituela uste dugu.

– Urrats inportanteak eman dira azkeneko hilabeteetan eta abian den prozesua oso baikorki baloratzen dugu. Bainan konstatzen ditugu ere bai, Frantses eta Espainol Estatuek Euskal Herriarekiko mantentzen dituzten jarrera hertsiak eta indarrean dirauten urraketa demokratikoak, blokatze instituzionalak, mota anitzeko errepresioa eta abarrekoak… Honen aintzinean prozesu honek urrats berriak eman behar ditugula diogu.

– Bizitzen dugun kapitalismoaren krisiak krisi sistematiko baten izaera daukala deritzogu eta eragiten dituen eskubide indibidual zein kolektiboen urraketak indar ezkertiarren erantzun sendo eta bateratua eskatzen du gure ustetan.

– Hori dela eta, konbentzituak gara gure alderdien artean elkarlanerako unea heldu zaigula.

Ficoban aurkeztuko dugun estrategi nazionalareko engaiamendu/konpromisoaren erranahi orokorra

Gaurkoan, iragarri nahi dugu estrategi nazionalerako engaiamendu/konpromisoaren eskema itxia daukagula eta horren aurkezpena apirilaren 28an, Irungo Ficoba erakustazokan iraganen den ekitaldi batean aurkeztuko dugula. Gure ustetan, urrats hori, urrats inportantea da oso.

Izan ere, engaiamendua honen bitartez, alderdi abertzale eta ezkertiarrek, Euskal Herri osoan, beren indarrak amankomunatzeko xedea plazaratzen dute, gure Herria errealitate onartua eta errespetatua bilaka dadin Europan.

Euskal Herriak bizi dituen erronkak lurralde bakoitzean ezberdinki eta erritmo propioetan deklinatzen dira, baina problematika nazional osoa osatzen dute denek. Hortaz, zehaztu dugun elkar-lanerako engaimenduak/konpromisoak abertzaletasunaren praktika politikoa nazio estrategi baten baitan kokatzeko xedea du.

Bestetik, abertzaletasuna nazio estrategi batean finkatzeko engaiamendu/konpromisoa zehazteaz gain, apirilaren 28an emanen dugun urratsak, proiektu independentista balore progresista eta ezkertiarretan kokatzeko xedea du, arrazoin sinple batengatik : bizitzen dugun krisiak, etengabean erasotuak diren oinarrizko eskubide sozio-ekonomikoen defentsaz haratago, sistema beraren gainditzea eskatzen du.

Funtsean, formalizatu dugun engaiamendu/konpromisoak helburu argiak ditu :

Euskal Herrian martxan den prozesuari bultzada ematea eta bere azken geltokiraino eramatea

Prozesu honen eragile nagusia euskal gizartea bera da, eta bere motorra indar metaketa ahalik eta zabalena izan behar du.

Hortaz, urrats berri bat ematera goaz, Euskal Herri osoan, erabakitzeko eskubidearen aitortza finkatuko duen giza indar-metaketa indartsua gorpuztuz.

Bestetik, pairatzen dugun krisi sistematikoari erantzuteak beste eredu bateri begira urratsak ematea suposatzen badu, sistema beraren gainditzea ahalbidetuko duten alternatiba praktikoak gauzatzen hasteko anbizioa dugu.

Horrek ere, aliantza herritarra ahalik eta zabal eta azkarrena konfiguratzea eskatzen du.

Bost alderdiei, helburu horien inguruan, Euskal Herri osoan masa sozial oso zabala dagoela deritzogu eta landu dugun engaiamendu/konpromisoak masa sozial honen aktibazioarako espasazioak idekitzea bilatzen du. Eta segur gaude, masa sozial honen aktibazioak eta mobilizazioak Euskal Herrian bakean, askatasunean eta justizia sozialean oinarritutako aro eraikitzea lortuko duela.

Estrategi nazionalerako engaiamendu/konpromisoaren garapena

Erran bezala, apirilaren 28an, Ficoban, estrategi nazionalerako engaimendu/konpromisioa izenpetuko dugu.

Engaiamendu/konpromiso honek, Euskal Herri osoari begirako elkar-lan estrategiko bat lantzeko eta adosteko xedea adierazten du ; elkar-lan estrategiko bat, Hego nahiz Iparraldeari egokituriko erritmo, molde eta eduki zehatzak izanen dituena.

Apirilaren 28tik landa, izenpetuko dugun engaiamendu/konpromisoaren gauzapena bi denboretan emanen da.

– Ondoko asteetan, engaiamendu/konpromisu honek bere lehen deklinazioa zehaztua izanen du, Hego Euskal Herriari begirako akordio estrategiko baten bitartez.

– Ipar Euskal Herriari dagokionean aldiz, engaiamenduaren deklinazio zehatza udazkenean landuko da.

Erran bezala, deklinazio horietan, lan ardatz konkretuak eta ibilmoldeak zehatzuko dira.

http://www.youtube.com/watch?v=eW2OY6GQdl8

Berriak

Aresi dimititzeko exijitu diote berriz Alternatibak, EAk, Aralarrek eta Ezker Abertzaleak

Eusko Alkartasunak, Aralarrek, Alternatibak eta Ezker Abertzaleak agerraldia egiten dugu gaur, Ertzaintzaren pilotakada bat jaso ondoren hil zen Iñigo Cabacas gaztearen harira Rodolfo Ares Herrizaingo sailburuak atzo Gasteizko Legebiltzarrean egindako agerraldiaren balorazioa egiteko.

  • Gasteizko Legebiltzarrean atzo Rodolfo Aresek egindako agerraldia ihesaldi politikorako ariketa hutsa izan zela deritzogu.
  • Aresek bere kabuz egin zuen agerraldia, eta ez zen gai izan Iñigo hilik suertatu zen gertaeren inguruko bertsio sinesgarria emateko, nahiz eta ordudanik astebete igaro den.
  • Aurreko ostegunean Ertzaintzak izandako jarrera arrazoitzera mugatu zen bere agerraldia, baina horretarako, informazioa ezkutatu zuen eta testigu zein kaltetutako pertsonei errespetu falta izugarria erakutsi zuen. Jasotako testigantzak “gezur hutsa” zirela esan zuen, baina testigantza horiek egin zituzten pertsonen asmoa gertatutakoa argitzea baino ez zen. Horren ondorioz, egiazko asmoa gertatutakoa benetan argitzea ote den zalantzan jartzen dugu.
  • Izan ere, orain arte bildutako testigantza eta froga guztiek bertan behera uzten dituzte aurreko ostegunean Ertzaintzak izandako jarrera arrazoitzeko Herrizaingo Sailak erabilitako argudioak.
  • Iñigo Cabacas hil den arte Eusko Jaurlaritzak aurpegia eman ez izana oso larria deritzogu; gainera, hasiera batean gertatutakoa ezkutatzen ahalegindu zen eta, gero, jazoerak manipulatzeko ahaleginetan aritu da.

Horregatik guztiagatik, Eusko Alkartasunak, Aralarrek, Alternatibak eta Ezker Abertzaleak uste dugu azken asteotan izandako gertaera larriak ez errepikatzeko neurriak hartzea lehentasun osoa duela. Horrenbestez:

  • Iñigo Cabacasen heriotza bezalakoak etorkizunean ez errepikatzeko Aresek bermedun neurriak proposatu ez izana kritikatzen dugu. Are gehiago, Gasteizen agerraldia egiten duen bitartean, bere aginduetara dauden poliziek Bilbon prentsaurreko bat eskaintzen ari zirenen kontra egin dute.
  • Rodolfo Ares Herrizaingo sailburuak bere gain erantzukizun osoa hartu beharko lukeela uste dugu eta, horrenbestez, dimisioa eman beharko lukeela. Atzo Legebiltzarrean ikusi eta entzun genuenak astelehenean egin genion eskaera berresten du. Europako Batasunaren zuzentarauek esaten dutenaren aurkako materiala erabiltzen jarraitzea erabat politikoa da eta, beraz, erantzukizunak politikoak izan behar dira.
  • Zauritu oso larriak edota hildakoa eragin duten azken jardueren ikerketa gardena eta zorrotza lehenbailehen abian jartzea exijitzen dugu, eta beharrezkoa balitz, tartean dauden poliziekin, arduradunekin eta arduradun politikoekin neurriak hartzea.
  • Euskal Herrian aritzen diren polizia ezberdinek erabiltzen duten materialetik haratago doan hausnarketa abian jartzea beharrezkoa deritzogu. Herri honek behar duen polizia ereduaren inguruko eztabaidari heldu behar zaio. Egungo egoera sozialari erantzun egokia emango dion eta herritarren zerbitzura eta pertsonak babesteko helburua izango duen polizia eredua.

Berriak

Ezker abertzalea, Aralar, EA eta Alternatibak Aresen dimisioa eskatu dute Cabacasen erailketagatik

Lehenik eta behin, bertan bildutakook, ordezkatzen ditugun indar politikoen izenean, gure elkartasun osoa adierazi nahi diegu Iñigo Cabacas gaztearen senide eta lagunei. Gure herriak azken hamarkadetan pairatzen duen indarkeria polizial gordinaren azken biktima da Iñigo Cabacas. Gure herrian normaltasun eta demokrazia egoera bat saihesteko eraikitako salbuespenezko neurri eta neurri errepresiboen egitura osoak justifikaturiko eta babesturiko indarkeria poliziala alegia.

Gure herriaren begietara, ordea, justifika ezina eta erabat desproportzionatua den indarkeria polizial baten aurrean aurkitzen gara. Izan ere, nahiz eta instantzia ofizialetatik gertaera ezkutatu eta manipulatzeko saiakerak egon, Iñigo Cabacas-en heriotza ez da gertaera isolatu bat. Aurreko ostegunean, Ertzaintzak Xuban Nafarrete gaztea jipoitzen zuen era basatian. Gazte hau Zaintza Intentsiboetako Unitatean ingresatu behar izan zuen, ertzainen bortizkeriak eragindako garun isuria zela eta.

Astebetera, Iñigo Cabacas gazteak jaso zuen Ertzaintzak jaurtiriko pilotakada, gaur bere heriotza jakinarazi den arte koman egon delarik.

Gertaera lazgarri hauen aurrean, Eusko Alkartasuna, Aralar, Alternatiba eta ezker Abertzaleak honako hausnarketak luzatu nahi ditugu:

o Gure herrian jarduten duten polizia ezberdinek euskal herritarren aurka indarkeria inolako ardurarik gabe eta era zigorgabean erabiltzea erabat larria deritzogu.

o Gure iritziz indarkeria polizialaren erantzuleak ez dira elementu isolatuak; gure herrian sortu diren bake eta soluzio itxaropenak zapuztu nahi dituen estrategia bati erantzuten dio indarkeria polizialak. Horren adibide da azken hilabeteotan polizia ezberdinen indarkeria erakustaldiak, jazarpen edota errepide kontrolak biderkatu egin direla.

o Urteetan zehar hainbat hildako eta dozenaka zauritu eragin dituzten gerramaterialak erabiltzeari behin betiko uzteko deia luzatzen diegu indar polizial ezberdinei.

o Ertzaintzaren arduradun politikoaren, hau da Rodolfo Ares Barne Sailburuaren berehalako dimisioa exijitzen dugu. Ares da Iñigo Cabacasen heriotzaren erantzule politikoa.

o Era berean, erabat larria deritzogu gaur gaurkoz martxoaren 29an Gasteizen eta aurreko ostegunean Bilbon jazotakoen inguruan inolako azalpen ofizialik eman ez izana.

o Zauritu larri edo hildakoak eragindako azken polizia ekintzetan nahasturiko polizien berehalako ikerketa eta ardurak argitzea exijitzen dugu. Euskal jendartea nazkaturik dago errepresioan nahasturikoek duten inpunitateaz.

o Azkenik, Iñigo Cabacas gaztearen heriotzari ETB eskainiriko trataera tamalgarria kritikatu nahi dugu. Alberto Suriok zuzenduriko telebistaren asmo politikoa antzematen dugu, jazoriko gertaerei larritasuna kendu eta Rodolfo Aresi lan zikina egiteko.

Amaitzeko, bertan bilduriko lau indar politikook Iñigo Cabacas gaztearen heriotza salatzeko eta bere senide eta lagunei elkartasuna adierazteko deituko diren ekimen ezberdinei gure atxikimendua adierazi nahi diegu. Era berean, deia luzatzen diegu herritarrei ekimen horietan parte har dezaten.

Berriak

Euskal Herriaren etorkizun hurbila eraikitzen

Xabier Soto eta Igor Nabarro – Alternatiba

Beste urte batez Aberri Eguna ospatzera goaz. Zalantzarik gabe, Euskal Herriko gizon eta emakume askorentzat balio sinboliko eta emozional sendoa duen eguna. Egia da guztientzat ez dela horrela, eta dudarik gabe, hau jorratzeke dugun ikasgai bat da, Alternatibak bezala, gure herriarekin, bere eskubideekin eta nola ez, bere herritarrekin begirunezko erreferentzia kolektibo barneratzaileak eraikitzeko helburua dugunontzat.

Baina Aberri Egun hau ezin daiteke aurrekoak bezala kontuan hartu. Aurten, Donibane Garazin egingo den ekitaldirako, burujabetzaren eta ezkerreko independentziaren inguruko 5 indar politikok, deialdi bateratua egin dugu. Bertan, Aberri Eguna dela eta, Euskal Herriak nazio izateko duen nahia omentzeaz gain, batez ere garai berri baten hasiera plazaratuko da; burujabetzaren eta independentziaren aldeko indar ezkertiarren metaketa ardatz izanik, herri hau eraikitzeko eta egunero euskaldunok jasan beharreko dominazio sistema anitzei erantzuteko gai izango dena.

Bateratzeko ahalegin honek, zalantzarik gabe, printzipioei uko egin gabeko eraginkortasuna adierazten du. Guztion artean subjektu politikoa indartzeko modu bat da, bere ezaugarri nagusietako bat ere kendu gabe: Burujabetza, autodeterminazioa, lurraldetasuna, eredu ekonomiko eta sozial berria, Ama Lurraren errespetuan oinarrituko den eta antzinatik harreman sozialak menderatu dituen patriarkatua alde batera utziko duen Euskal Herri bat.

Donibane Garaziko Aberri Egunean lehen aldiz ikusiko den indar metaketa, gure ikuspuntutik, Alternatibako gizon eta emakumeon ustez, aldaketa politikoa lortu eta sistema kapitalista gainditu dezakeen tresna bakarra da, geroz eta Euskal Herritar gehiagok itxaroten eta desiratzen dutena.

Horregatik aurtengoa, iraganera soilik begiratuko ez duen Aberri Egun bat izan behar dela adieraztera ausartzen gara. Nostalgiaz betetako data sinboliko bat, Euskal Herri berri baten abiapuntu bihurtzeko unea iritsi da, hasieran aipatutako dominazio sistema anitzetatik aske izango dena.

Euskal Herri libre eta sozialista bat, halabeharrez errealitateari aurre egin behar izango diona, kasu batzuetan paralisiak eta beste batzuetan mendekotasunak markatutakoa. Jakin badakigu beraz, zeintzuk diren aurka dauzkagun zailtasunak. Estatu espainol eta frantsesetako gobernu zentraletatik, EAE eta Nafarroako gobernuen laguntzarekin, mantentzen den blokeoa sustatzen duten zailtasunak, gure herrian bake justua eta iraunkorra mantentzeko xedea duen bake prozesu eta konponbide demokratiko baten hasieraren aurrean. 

Izan ere, ezin dugu ahaztu aipatutako gobernuek espetxe-politikaren aldaketaren alorrean erakusten duten egoskorkeria, Parot doktrina indarrean mantenduz, gaixo sendaezinen askapena ezeztatuz edo Bateragune prozesuaren ondorioz zigortutakoak espetxean mantenduz. Jokabide berdina mantentzen jarraitzen dute, “dena ETA da” eta “ETAren aurka edozerk balio du”, errealitateak iraganeko eskema hori bertan behera utzi ez balu bezala. Aurreko Aberri Egunetik gauza asko aldatu dira alor honetan, ETAk borroka armatua behin betiko utzi izana barne, baina haiek geroz eta jende gutxiagok ulertzen dituen iraganeko jokamoldeetara harpidetuta diraute. 

Bestetik, ez dugu ahaztu nahi Aberri Egun hau krisi sakonak markatuta datorrela, edo iruzurrak markatuta, nahiago bezala. Sinestarazi nahi digutenaren aurka, hau ez da soilik finantzen krisia. Borroka garaia da, argi eta garbi, guda ideologiko baten garaia, merkatuen eta kapitalaren gosea asetzeko esklabo bihurtu nahi gaituztenen eta beste Euskal Herri bat eta beste eredu ekonomiko bat posiblea eta berebizikoa dela defendatzen dugunon artekoa.

Berebizikoa da bizitzaren jasangarritasuna bermatzeko. Euskal Herriko hiritar guztiontzat duina izango den bizitzarena. Posiblea den sistema bakartzat jotzen den kapitalismoaren jasangarritasunetik aldenduko dena eta antzinatik gizakion harremanak menderatu dituen patriarkatuari, planetaren mugei so egiten ez dien garapen bortitzari, gure kultura aberastasuna zapuzten duen kultura asimilazioari eta gure beharretatik haratago kontsumitzera behartzen gaituen sistemari aurre egingo diona, kontsumismoa gaindituko duen errealitate berri baterantz abiatuz. Gizartea eta ekonomia antolatzeko era berri bat, guztion ongizatea banakoaren gainetik lehenetsiko duena, gauza guztien erdigunean pertsonak jartzen dituena eta ez boterea dutenen beharrizanen sua elikatzen duen egurra. 

Azken finean, duela egun batzuk Hego Euskal Herrian eginiko greba orokor arrakastatsuaren egunean euskal sindikatuek azpimarratzen zuten moduan, Euskal Herri ezberdin bat, kapitalismoaren aurkakoa, behetik eta ezkerretik eraikia. 

Eta azpimarratutako bi faktoreekin batera, sistemaren krisia eta bake-prozesuaren zein konponbide demokratikoen blokeoa alegia, Alternatibatik hirugarren bat aipatu nahi dugu. Demokrazia prekario honen zilegitasun galera, hain zuzen ere.

Demokrazia hau, hauteskundeetara aurkeztu ere egiten ez diren eta aldi berean gure xedeak zehazten dizkiguten botereen zerbitzura dagoen tresna moduan ikusten da gero eta gehiago. Hiritarrak erabaki-hartze kolektiboaren kudeaketan parte hartzea lortu ezin duen edo nahi ez duen demokrazia bat da. Eta agortutako demokrazia honen aurrean bestelako demokrazia bat, zuzena, parte-hartzailea eta erradikala eraikitzen hasi behar gara. Pertsona oro hausnartzeko zein erabakiak hartzeko prozesu guztietan modu aktiboan barneratuko dituen sistema.

Egun indarrean dauden errealitate gordin horiei aurre egiteko gai bagara, Euskal Herri sozialista, feminista eta ekologista berri baten oinarriak eraikitzeaz gain, Bolivia, Kuba edo Venezuela bezalako beste herri eta nazioen norabide berdinean bultzatzen egongo gara. Izan ere, ikuspuntu internazionalista batetik, ez ditugu ahaztu behar, ezta Aberri Eguna bezalako data batean ere.

Berriak

Alternatiba | Ezkerra eraldatzearen erronka

X