Alternatibaren Bizkaiko koordinatzaile Asier Vegak  herritarrei dei egin die Euskal Herriko kaleak betetzera atera daitezela, Euskal Herri osoko herri eta hirietan antolatutako elkarretaratzeetan parte hartzeko, gaur zein bihar, Herriraren aurkako operazioa salatu eta atxilotutako lagunei elkartasuna adierazteko.

Alternatibatik gogorarazi dutenez, Herrira kolektibo jakin baten eskubideen alde lan egitea beste deliturik ez du egin, Euskal Herriko preso politikoena, beren eskubideak behin eta berriz urratuak dituztenak eta salbuespen politikak pairatzen dituztenak, ez bakarrik beren osasun eta osotasunaren aurkakoak, beren senide eta lagunen aurka ere bai, Madrilek haien kontrako zigorrak ere ezartzen dituelako.

Vegak nabarmendu du nazioarteko eragile desberdinek aitortu dituztela urraketa horiek, Estrasburgotik hasi, NBEraino eta Nazioarteko Amnistiak ere. Guzti horregatik, ezinbestekotzat jo du “eragile sozial eta politiko guztiak aktibatzea, herritarrekin batera, Madrilek herri honetako bakea eta normalizazioaren bidea oztopatzea lortu ez dezan. Haien ustelkeriak, eskubide sozialen aurkako erasoak eta beren oinordetza frankista estaltzeko justizia erabiltzeari uzteko garaia dute.

Azkenik, ezkerreko alderditik beren elkartasun osoa adierazi diete atxilotuei zein erakundeari berari. Bihar ziren lotzekoak Alternatiba eta Herrira, euskal preso eta senideen eskubideen egoeraren eta datozen hilabetez begirako mobilizazioen berri emateko hain zuzen ere.

Euskal Herria Bilduk “euskal etxea” eraki nahi duten herritar eta eragile guztiei “Euskal Bidea”ri ekiteko gonbitea egin du.

Alternatibako bozeramaile nazionalak, Amaia Agirresarobek, positibotzat jo du ETAk Gara egunkarira bidalitako agiriaren edukia, zeinetan iragan martxoan Iruñean eta Bilbon antolatutako Foro Sozialaren gomendioak “ekarpen eraikigarriak” direla onartzen du; “bere irakurketa zein ekarpen propioak egiteko asmoa iragarri arren, ETAk gomendioekiko konpromisoa adierazten du agirian, nazioarteko gatazketan esperientzia izan duten hainbat adituren parte-hartzea eta herritar ugariren zilegitasuna izandako foroaren gomendioak izanik”.

Bestetik, Alternatibatik azpimarratu nahi izan dute “berriro ere, ETAk herritarren protagonismoa aitortu” duela, gatazkaren konponbideari begira parte hartu izan duten lagun ugariak aipatuta. Herritarrak, gainera, “normalizazio politikoaren eta konponbidearen abangoardia bilakatu dira, beren diskurtsoa blokatzean eta geldotasunean oinarritzen dutenen aurrean”, Frantzia eta Espainiako gobernuen jarrera salatuta. Haiei Aieteko adierazpenaren zein Foro Sozialaren gomendioen edukiak bere egitera deitu ditu.

Alderdi ezkertiarreko bozeramaileak, azkenik, “eragile sozial eta politiko guztiak bakearekin konprometitzeko” beharra berretsi du, norabide egokian eraman ahal izateko gizartearen aspaldiko aldarrikapena, “inolako indarkeriarik gabeko Euskal Herria lortzea, non pertsona guztien eskubide guztiak errespetatuko diren”. Hala, onartezina iritzi die Madrildik heltzen diren eraso jarraiei prozesuaren aurka, Auzitegi Nazionaletik asteburuan heldu den azkenaren modukoak, Arnaldo Otegi –Jesus Egigurenekin batera- bakea eta berradiskidetzearen saria eman izanagatik Gernikako alkatea inputatu baitute.