Diana Urrea Alternatibako kide eta EHBilduren Kongresurako Bizkaiko hautagaiak “euskal gizarteak, lehen eta orain, sahararren borrokari erakutsi dion atxekimendua txalotu du”.

Urreak, Fronte POLISARIOa bere XIV.garren kongresua egiten ari den Dakhlako errefuxiatu eremutik “euskal gizartearen jarrera” nabarmendu eta Mendebaldeko Sahararen aldeko Legebiltzarreko lan taldearen ekimena nabarmendu ditu.  

Hala ere, legebiltzarkide subiranistak herri sahararraren autodeterminazio borrokarekiko elkartasuna areagotzera deitu ditu euskal erakundeak.

Era berean, Urreak Espainiako gobernuak joan den urriko uholdeek errefuxiatu eremuetan sortutako larrialdi egoeraren aurrean erakutsitako jarrera salatu du.

EH Bilduk irmo salatu nahi ditu Frantziako estatuko armada Sirian egiten ari den bonbardaketak; era berean, horrek guztiak populazio zibilean eragingo dituen ondorioen aurrean bere atsekabea azaldu nahi du. Sirian egindako eraso masiboak ez dira konponbidea, arazoa dira; izan ere, eraso horietan gatazkarekin ezelango zerikusirik ez duen populazio zibila hilko da. Eraso masibo horiek mina areagotzea eta gatazka gordintzea baino ez dute eragiten: Kobane, Beirut, Palestina eta munduko beste leku pairatzen ari direnak hainbat inperialismoren ondorioa dira. Guzti-guztiak salatzen ditugu salbuespenik gabe, eta herrien eta herritarren eskubideetan oinarritutako eskubideetan oinarritutako konponbide politikoak aldarrikatzen ditugu.

Mendebaldeko herrialde nagusiek aitortu dute talde ezberdinak finantzatu eta elikatu dituztela hainbat interesei jarraituta. EH Bildutik azpimarratu nahi dugu arazoa bere osotasunean ulertu behar dela: erantzukizunak argiak dira, Mendebaldean ere bai.

Ekintza eta jarrera bortitz horiek giza eskubideen urraketak eragiten ari dira Sirian eta inguruetan, herri horretako pertsonak beren etxeak eta herria uztera behartuta daudelako. EH Bildu drama hori bizitzen ari diren pertsonekin dago eta egon da. Josu Juaristi EH Bilduko europarlamentaria Errefuxiatuen Bidea egiten ari da Balkanetan, eta duela aste batzuk Jordaniako errefuxiatu zelai handiena bisitatu zuen. Ikusten ari dena kontatzen da: tratu txarrak, sufrimendu asko… Eta badirudi Europan ez inon ez dagoela inor prest horren gaineko erantzukizuna bere gain hartzeko. Beharrezkoa da errefuxiatuei laguntza humanitarioa eskaintzea eta gure herrietan jasotzea. Baina benetan beharrezkoa dena da pertsona horiek guztiak drama batekin aurkitzea beste drama batetik ihes egiten ari direnean.

EH Bilduren adierazpena Pariseko erasoen aurrean

Atzo Parisen gertatutako eraso latzen aurrean EH Bilduk adierazpen hau helarazi nahi dio gizarteari eta iritzi publikoari:

-Lehenik eta behin gure samina adierazi nahi diegu Pariseko erasoetan  hilik edo zauriturik izan diren herritarrei eta haien familiei. Horrekin batera gure babes eta elkartasun osoa adierazi nahi diegu Frantziako estatuko herritarrei une larri hauetan.

– Giza eskubideetan eta demokrazian oinarritutako gizarte ereduan sinesten du EH Bilduk, eta horren alde lan egiten du eta borrokatzen du egunero, Euskal Herrian eta mundu zabalean harremanak dituen herrialde guztietan. Mundu osoan gertatutako giza eskubideen eta oinarrizko printzipio demokratikoen aurkako eraso guztiak salatzen ditugu.

-Zentzu horretan, Parisen gertatutako erasoaren erantzuna giza eskubideetan eta oinarrizko irizpide demokratikoetan oinarritu behar dela aldarrikatzen dugu. Populazio zibilak modu bidegabean pairatu duen eraso ankerraren erantzuna ezin da inola izan neurri eta izaera berekoa. Eskubideen murrizketan oinarritutako salbuespen legeek demokrazia ahultzen dute eta ez dute inoren segurtasuna bermatzen.

– Parisen bizi den sufrimendua ez da mundu osoan bizi diren gatazketan bizi denarekiko ezberdina. Horregatik, aldarrikatzen jarraitzen dugu inork ez dezala indarkeria erabili errugabeen aurka, inork ez ditzala armak saldu bere etekinak handitzeko, eta inoren Nazioarteko politikak ez ditzala gatazka gehiago eragin. Herri eta pertsona guztien askatasunak baino ez du lortuko mundu osoan ditugun gatazka lazgarri guztiak gainditzea.

EH Bildu

Ekialde Hurbileko gatazkaren areagotzea kezka arrazoia da eta bakearen aldeko jarrera aktiboa eskatzen du.

Urriaren lehenengo hamabostaldian 30 palestinar baino gehiago hil dira eta ehundaka zauritu -horietako hainbat larriki-, eta 10 israeldar izan dira era berean, bizitza galdu dutenak.

Akzio-erreakzioan oinarritutako eskalada berri eta arriskutsu batean aurrean gaude berriro ere, eta beti bezala, biktimen gehiengoa zibilak dira.

Al-Aqsa Mezkitara sartzeko sarrera eta ordutegi mugek, Gazako erasoek, lurraldeen kolonizazio iraunkor eta itogarriak eta kolonoak eta soldaduak herritar palestinarren aurka darabilten inpunitateak geroz eta eszenatoki lehergarriagoa sortzen ari dira.

Nazio Batuen Erakundeak (NBE) berak onartzen duenez, 2020. urtean Gaza ez da bizitzeko moduko lurraldea izango. Urteetako setio eta blokeoaren ostean, ordea, dagoeneko egoera arnastezina ez ote den galdetu behar da. Hala, gehiago itxaron gabe,  gazako herritarrek bizi duten dramari lehenbailehen irtenbidea eman behar zaio.

Ezinbestekoa da distentsioa bilatzea eta nazioarteko legediaren betetzea. Era berean, aurrez egina dugu gisan, EH Bilduk ezinbestekotzat jotzen du Estatu Palestinarra onartzea, jakinda errekonozimendu horrek ondorio erangikorrak izan ditzan ezinbestekoa dela nazioarteko komunitateak okupazioaren amaiera behartzea.

Okupazioa, espetxea, erbestea, atxiloketak, bortxazko kanporatzeak, tortura eta beste hainbat opresio moduk denbora gehiegi iraun dute dagoeneko Palestinan, ia 70 urte. NBE ren fundaziotik gaur egun arte agendan iraun duen auzi bakarra dela gogoratzearekin nahikoa da.

Marwam Bargoutik, espetxetik, duela gutxi ongi esan zuen gisan “Palestinarrei esan zitzaien bitarteko baketsuez eta bide diplomatikoez baliatuz gero okupazioari amaiera jartzeko nazioarteko komunitatearen babesa jasoko zutela. Eta aldiz, nazioarteko komunitatea ez da gai izan nazioarteko zuzenbidea eta NBE ren ebazpenak aplikatzeko nazioarteko egitura bat abiarazteko; ezta kontuen eskatzea posible egiten duten neurri eraginkorrak aplikatzeko ere.”

Era berean, Marwan Bargoutik “okupazioaren azken eguna bakearen lehenengoa” izango dela adierazi zuen.

EH Bildu gisa bakearen bila irrikaz dihardutenak, Palestinan gisan Euskal Herrian, okupazioaren amaiera eta Estatu Palestinarra errealitate egiteko premisa hori bete dadin gure konpromisoa indartu behar dugu

EH Bilduk Palestinarekiko elkartasuna areagotzeko konpromisoa berresten du, Estatu Palestinarraren errekonozimenduaren aldeko esfortzuei eta nazioarteko araudia betetzeko ekarpena egiteko.

Justizia auzia delako, Ekialde Hurbilean bake justua eta iraunkorra lortzea horren baitan dagoelako: Zisjordaniaren okupazioari berehala amaiera ematea eta Gazaren blokeoa altxatzea aldarrikatzen ditugu.

EH Bildu

Otto Perez Molina presidente ohia, irmo jokatu behar zuena, burua eta bihotza erabili, ez zenuen baina irmotasunik azaldu iruzurrarekin amaitzeko. Are gehiago, iruzurraren jaun eta jabe egin zara, Horregatik, Zigorgabetasunaren Kontrako Guatemalako Batzordeak (CIGIC), Estatuko fiskaltzak eta Guatemalako Diputatuen Kongresuak hala ikusi dute eta, horregatik, aduenetako zergetan iruzur masiboan parte hartzeagatik zu inputatzeko zantzuak daudela erabaki dute.

Baina hein handi batean, Guatemalako herrian izan da, etengabeko mobilizazioaren bitartez eta borrokaren bidez, usteldutako instituzioak horretara bultzatu duena. Ez dute beste aukerarik izan eta orain arte Guatemalako presidentea izandakoa atxilotzeko agindua eman dute.

Berri honek poztu egiten gaitu, eta Guatemalako herria zoriondu nahi dugu, bere borrokarengatik, eta garaipen partzial hau ospatzen dugu, militar kaibil honen kargugabetzeagatik, bihotzik gabeko genozida eta lapurra delako Perez Molina.

Bestetik, ziurgabetasuneko egunak dira hauek Guatemalako ezkerrarentzat, izan ere, irailaren 6an hauteskundean egin behar zituzten. Mobilizazioetan aritzen direnen zati handi batek bozak atzeratu beharra ikusten dute, berme demokratiko nahikorik ez delakoan, horregatik, egitekotan, abstentzio arduratsua eskatuko dute. Ezkerraren beste talde batek, aldiz, parte-hartzeko beharra ikusten du, eskura dezaketen ordezkaritza gal ez dadila.

Emaitza edozein izanda ere, Alternatibatik herri honetako herritarren kemena nabarmendu nahi dugu eta arretaz jarraituko dugu beren etorkizuna.