Urkullu lehendakariarekin bihar izan behar dugun bileraren aurretik, EH Bilduk bere posizionamendua zein den argi utzi nahi du jendaurrean.
Jaurlaritzarako aurrekontuen diseinua eta negoziazioa oso testuinguru berezian gertatzen ari da. Alde batetik, egoera politiko berria dugu Euskal Herrian. 16 hilabete joan dira ETA erakundeak indarkeriaren erabilerari behin betiko uko egiten ziola iragarri zuenetik eta horrek bakegintzarako eta normalizazio politikorako atea parez pare zabaldu zuenetik. Baina aldebakarreko urrats horrek ez du erantzun baikorrik izan estatuen aldetik.
Bestetik, Espainiako estatuan bizi duten egoera politiko nahasiak kezka eragiten digu. PPren gobernuak hasiera-hasieratik ekin zion bere aspaldiko ametsak gauzatzeari eta berzentralizazio prozesua abian jarri zuen, herri gisa geratzen zaigun burujabetza apurra deuseztatuz. Era berean, ustelkeria kasuek printzipio demokratiko eskasetan ere atzerapausoak emateko aukera zabaldu dute. Horiekin guztiekin aurrera egiteko koartada perfektua dute Espainiako sektore eskuindarrek. Izan ere, egoera ekonomikoa oso larria da, langabezia tasak egoera dramatikoak eragiten ari dira, eta horren aitzakian, eraso neoliberal basatiak egiten ari dira. Aurtengo perspektibak ere oso kezkagarriak dira.
Testuinguru horretan, EH Bildutik argi daukagu herri gisa erantzun beharko geniokeela egoera honi, Madrildik datorkigun eraso zentralizatzaile eta neoliberalari. Eta etorriko direnak, ate joka baititugu erreforma laboral berria, LOMCE, Udalak, kutxak… Baina EAJn ez dugu sumatzen horretarako asmorik, ezta gutxiago ere. Hala, kezka handiz hartzen dugu EAJren epeltasuna.
Honen guztiaren aurrean planto egin beharra dago, bai murrizketetan eta baita herri gisa garatzeko atzerapausoa suposatzen duen kasuetan. Eta horixe izango da Urkullu jaunari eramango diogun mezu nagusia. EH Bilduk ez du inolaz ere onartuko murrizketarik hezkuntza eta osasun arloetan. Herri gisa zein herritar gisa dugun etorkizuna baldintzatuko duten neurri murriztailerik ez dugu onartuko. Azken egunetan agerian utzi duen bezala, errealitatea mozorrotzeko eta oinarrizko zerbitzuetan ezkutuko murrizketak gauzatzeko asmoa badu EAJk, EH Bildu ez da konplizea izango.
Era berean, krisi honetara ekarri gaituzten politikak ezin direla errepikatu azpimarratuko diogu UrkuLlurri. Baina hemen ere kezkaz begiratzen diogu EAJren azken asteetako jardun politikoari, Europan murrizketen bidea inork baino hobeto sakondu duen PP bidelagun hartua duelako akordioak gauzatzerako orduan.
Herri honek emergentzia plan bat behar duela uste dugu EH Bildutik. Lau herrialdeetako instituzio guztien arteko elkarlana beharrezkoa da, eta guk horren aldeko apustua egiten dugu. Emergentzia planak atal ezberdinak izan beharko lituzke. Administrazio publikoetarako diru-sarrerei dagokionez, estabilitate legearen aplikazio propioaren alde egin beharko litzateke, kanpoko neurri eta aginduekiko menpekotasunik gabekoa; zerga politika ausarta ere eskatzen dugu, orain arte ez zaigulako horrelakorik aurkeztu; Kutxabankek bestelako jarrera izan beharko luke, eta bertako ekonomia lagundu eta berpizteko funtsezko tresna izan beharko litzateke. Gastuei dagokionean, eredu berri bat eraikitzeko inbertsioak ezinbestekoak direla deritzogu, esparru laboral propioa edukitzera begirakoak, lan banaketa justua eta solidarioa bermatuko dutenak, sektore estrategikoak finkatu eta bultzatuko dituztenak. Baina horretarako, ezinbestekoa ikusten dugu obra faraoniko guzti-guztiak gelditzea, eta horko dirua politika sozialak eta zerbitzu publikoak bermatzeko erabiltzea.
Ideia eta proposamen horiek guztiak zehaztasunez jasotzen dituen dokumentua helarazi genion bere garaian EAJri, baina oraindik ez dugu erantzunik ere jaso.
Amaitzeko, baina garrantzi berdinarekin, gatazkaren eta bere ondorioen konponbide integralerako urratsak emateko deia egiten diogu EAJri. Bide horretan urratsak emateko eskatuko diogu Urkulluri eta bere gobernuari. Halaber, gure herriaren erabakitzeko eskubidea gauzatzeko urratsak ere eskatuko dizkiogu, herri honen gehiengo handi batek behin eta berriro hala exijitu duelako.