Baina, zalantzarik gabe, ideia nagusitzat hartu dugu, euskal ezker nazionalaren aldeko aldarria, barneratzailea eta ez-baztertzailea, internazionalista, subiranista, eta zeharo demokratikoa izango dena, esperientzia zahar batzuen lanari berrekinez –paradigma berri batetik, baina- nazio eraikuntza eta eraikuntza soziala uztarrezinak direlako ideia faltsuarekin amaitzeko.
Hala, euskal internazionalista izan daitekeela aldarrikatzen dugu, geure gizarte edo herriaren antolatzea defendatuz, era berean ekintzan eta ekintzarako langileen elkarlanaren alde eginda. Ez dugu, ordea, bat egiten izaera organikoko batasun nazional ikuspegiarekin, zeinak nazio eta gizarte eraikuntzaren arteko harremana ukatzen duen. Ezin Euskal Herria egungo irizpideen arabera eraiki, egungo mendekotasun eta baztertze sistemei jaramonik egin gabe. Gutxieneko batzuetatik abiatuta, borroka eta eraldaketa subjektuak uztartuko dituen proposamen barneratzaile batek soilik egin ahalko du aurrera norabide horretan.