Alternatibako Mahai Internazionalistak babesa eta elkartasuna adierazi nahi du Youssef 23 urteko zuzenbide ikasle eta ekintzaile sahararraren egoeraren aurrean. Gaur egun, Youssef Bilboko aireportuan dago, Marokoko jazarpenetik eta torturatik ihes egin ondoren. Asilo politikoa eskatu arren, Espainiako Auzitegi Nazionalak ukatu egin dio nazioarteko babesa. Espainiako Estatuak aintzat hartu behar du asilo politikorako eskaera legitimo hau 1949ko Genevako Hitzarmenek eta haren protokolo gehigarriek ezartzen duten bezala,, gero aberrigabeko estatutua onartua izan dadin.
Erbesteratzeak esan nahiko luke tortura berriak jasatera bidaltzea, Youssef berriro errepresaliatu bihurtzera; Marokoren aizkora odoltsuaren beste adibide bat saharar herriaren aurka, Espainiako Estatuaren adostasunarekin. Horregatik, askapena eta asiloa eskatzen dituen euskal gizarte zibilaren oihuei erantzuteko eskatzen dugu. Mendebaldeko Sahara okupatu eta fronte guztietatik erasotu baten aurrean, ezin da Marokorekiko kolaborazionismorik onartu. Gazte hori bere harrapatzaileei emateak Espainiako Estatuak saharar herriarekiko konponbideak aurkitzeko duen borondate falta baino ez luke indartuko.
Deportatua izateko orduak zenbatzen dituen erloju baten pisuaren pean, Youssefek gose grebari eusten dio, eta espero dugu Espainiako erakundeak bere posizioa aldatzea egoeraren aurrean. Loiuko ez-onartuen aretotik, El Aaiungo militante gazte honek Saharako herriak jasaten duen jazarpena erakusten digu. Izan ere, Saharako herriaren lurrak deskolonizatzeko zain dagoen lurralde ez-autonomotzat hartzen ditu oraindik NBEk.
Ezin da onartu Husein Amadour unibertsitate-ikasle sahararraren historia errepikatzea; izan ere, Las Palmasera iritsi eta asiloa eskatu ondoren, 2019an, Marokora deportatu zuten, eta, ordutik, oso baldintza txarretan dago kartzelan.
Espainiar gezurrezko deskolonizazioaren ondoren eta Marokoren okupazioaren eta errepresioaren ondoren, Mendebaldeko Sahararen egoera zauri ireki bat da, eta Espainiako Estatuak, bere erantzukizun historiko eta politikoagatik, ezin du Sahara alde batera utzi. Espainiako gobernuak Marokoko tiraniarekiko duen konplizitatea eten egin behar du hemen eta orain. Aski da!
