Egilea: admin

Gobernu espainiarraren espetxe politika Iosu hiltzen ari da

Gaurkoan EH Bilduk euskal preso politikoen senitartekoen elkartearekin, Etxerat-ekin, izaniko bileraren ondotik larritasun ahotsa altxatu nahi du eta Iosu Uribetxeberria preso arrasatearrak bizi duen egoera irmoki salatu nahi du.

Iosu Uribetxeberriaren osasun egoera larriak ez du atzerabueltarik eta senitartekoek adierazi bezala Iosu hil egingo da. Hain gordin adierazi digute senitartekoek zein den Iosu-ren egoera eta hortaz EH Bildu-tik lanean jarraituko dugula adierazi diegu Iosu-ren eskubideak onartu daitezen. Egungo espainiar legediaren arabera dagoeneko 2007tik etxean behar luke eta askatasunean, baina askatasun eskaera ukatua izan zen eta erabaki horrek Iosu-ren hiltze akta suposatu zuen.

Euskal preso politiko askoren bizia arrisku larrian dago eta gero eta denbora eta aukera gutxiago dute espainiar espetxeetatik bizirik ateratzeko. Iosuren osasun egoera asko gaiztotu da, ekidin bazitekeen ere. Legearen arabera, Iosu kalean behar luke 2007tik, baina eskari hori ukatua izan zen.

Mendekuzko eta salbuespenezko espetxe politika hau deuseztatzeko garaia da, Iosu eta gainontzeko euskal preso politikoak hiltzen ari delako. Iosu-ren osasun egoera larriaren oinarrian espetxe politika anker hau baino ez dago. Espetxe politika honen ondorioz, Iosu-k ez du jaso behar bezalako laguntza medikurik bere gaixotasun larria sendatu ahal izateko. Biriketako minbizia iragarri ziotenetik ez du behar besteko laguntza medikurik jaso eta horrek hilzorian jarri du. Gobernu espainiarrak aplikatzen duen espetxe politika honek ez du preso gaixoen asistentzia medikurik bermatzen eta horren ondorioz euskal preso politikoen kopuru altuak gaixotasunak pairatzen ditu. Behar bezalako laguntza medikua jaso izanak Iosu-ren bizia bermatu ahal izango luke.

Iosuren egoerak, espainiar gobernuak, euskal preso politikoekin aplikatzen duen mendekuzko eta salbuezpeneko espetxe politikaren adierazlea da. Espainiar gobernuak, PSOEren laguntzaz, gure herrian ireki den irtenbide prozesua baldintzatu nahi du, prozesuaren oinarriak Aieteko Agirian jasota daude, baina prozesu honek euskal jendarte gehiengoaren bultzada du.

Espetxe politika honen helburu nagusia euskal presoen eskubideak deuseztatzea da. Euskal Preso Politikoen Kolektiboa ahuldu, horretarako mendekuzko eta salbuezpeneko politika aplikatuz, era berean, konponbide prozesua, euskal jendartearen gehiagoak bultzatzen duena hondoratzeko.

Egungo medekuzko eta salbuespenezko espetxe politika honen helburua, egungo espainiar legedia bera errespetatzen ez duena eta Giza Eskubideen Europar Epaitegiaren aginduei muzin egiten diena, Euskal Preso Politikoen Kolektiboaren eskubideak murriztea eta pertsona gisa suntsitzea da, era berean, euskal jendartearen gehiengoak babesten eta bultzatzen duen konponbide prozesua zapuzteko.

Dei bat luzatzen diegu gainontzeko alderdi eta arduradun politikoei erantzukizunez joka dezaten eta berehalakoan Iosu-ren askatasuna eska dezaten beste 13 presoena bezalaxe.

Josu askatu! Hamalauak herrira! Hau da gobernu espainiarrari luzatzen diogun esijentzia. Ondorioz, espainiar gobernuari Josu Uribetxeberria berehalakoan aske utz dezaten esijitzen diogu, gaixo dauden gainontzeko 13 presoak bezalaxe.

Berriak

2012ko Abuztua

Alternatibak elkartasuna adierazi dio SAT sindikatuari eta bere militanteen aurkako jazarpenari uzteko exijitu dio Madrilgo gobernuari

lternatibatik SATeko militanteen atxiloketak gelditzeko exijitu du, “aberatsenak babesten dituen gobernu baten menpekotasunari bakarrik erantzuten diotelako, herritar xumeen egoera larria arintzeko ezer egiten ez duen bitartean”. Alderdi ezkertiarreko ordezkariak, halaber, Mercadona bezalako elikadura sektoreko supermerkatu kateek zaborrera botatzen duten elikagai kopuru handiaz ohartarazi du, gero eta pertsona gehiago pobrezian bizi direnean.

http://alternatiba.net/idazlanak/1845/alternatibak-elkartasuna-adierazi-dio-sat-sindikatuari-eta-bere-militanteen-aurkako-j

Elikadura subiranotasuna eta NPB (Bideoa)

Antonio Basagoitik eta beste hainbatek asteotan botatako astakerien ostean, EhBilduk Elikadura Subiranotasunaren aldeko lan taldea martxan jarri izanaren harira; argigarria izan daiteke elikadura subiranotasuntaz ari garenean zertaz ari garen argitzea. Bide honek horretarako aukera bikaina ematen du oso modu errazean (gazteleraz baino ez dago).

http://alternatiba.net/idazlanak/1846/soberan%C3%AD-alimentaria-y-las-pac-elikadura-subiranotasuna-eta-npb

Alternatibak kopagoaren bidegabekeria salatu du eta Lakuari eskubide sozialak propagandatik haratago babesteko galdegin dio

Alternatibatik bidegabea deritzote herritarren gehiengoari botikak ordainarazi eta gizarteko sektorerik ahulenetako bati osasun estaldura kentzeari. Gainera, ezkerreko bozeramaileak azpimarratu duenez, “ustez, 33 milioi euro aurrezteko besterik ez du balio, Espainiako Aurrekontu Orokorrek aurten AHTeko lanetarako aurreikusitakoaren hamarren bat beraz”. Kopuru horri, halaber, “sistema berria ezarri eta kudeatzeak dakarren gastua kendu beharko zaio”. Gogorarazi du, bestetik, EAE, Nafarroarekin batera, Espainiako Erresuman industria farmazeutikoarekiko zor gutxien duen erkidego autonomoa dela.

http://alternatiba.net/idazlanak/1840/alternatibak-kopagoaren-bidegabekeria-salatu-du-eta-lakuari-eskubide-sozialak-propaga

Ez dugu sakrifiziorik onartzen

Espainiako Erresumako Presidente Mariano Raxoik lepora zuzendutako labankada eman die herritarrei, murrizketa, BEZaren igoera eta kotizazio sozialen beherakada – langileen soldataren zati bat jaitsita- deitu arren. Erasoa justifikatzeko, Aznarren ondorengoak “sakrifizioa onartu eta zerbaiti uko egiteko” unea heldu dela ziurtatu zuen, bestela, “sakrifizioak alboratu eta guztiari uko egin” beharko litzaiokeelako. Banka ahalguztiduna odol eske ari da, eta ez du inongo aingerurik bidaliko Abrahamen eskua geldiarazteko. Herria da bere kateak eskatu beharko dituena, sakrifizioak orain onartzeak guztiari uko egitea ekarriko baitu.

http://alternatiba.net/idazlanak/1838/ez-dugu-sakrifiziorik-onartzen

PPk, EAJk eta PSEk Kutxabank lehenbailehen pribatizatu nahi dutela salatu du EH Bilduk

PNVk PPrekin bat eginik, aurrezki kutxak banketxe pribatu bihurtzeko asmoa salatu behar dugu eta gizarte ekintzaren edo kapital publikoaren inolako arrastorik ez uztea. Euskal kutxak fundazio bihurtzeak bere sorrerako helburua alboratzea suposatuko du, gizarte ekintzaren desagerpena ekarriko du eta pribatizazioaren bideari ateak irekiko dizkio. Horretarako egin dute ituna PPk eta EAJk administrazio kontseiluan botere osoa eskuratzeko, beren eredu eta apustua Kutxabank-en etorkizuna esku pribatuetan uztea delako, eta horretan PSEk babesa adierazi die.

http://alternatiba.net/idazlanak/1837/ppk-eajk-eta-psek-kutxabank-lehenbailehen-pribatizatu-nahi-dutela-salatu-du-eh-bilduk

Berriak

Alternatibak kopagoaren bidegabekeria salatu du eta Lakuari eskubide sozialak propagandatik haratago babesteko galdegin dio

Alternatibako bozeramaile Amaia Agirresarobek ordainketa partekatuaren inposizioa salatu du gaur, Auzitegi Konstituzionalak Lopez Gobernuak onartutako “arau elektoralista” bertan behera utzi ondoren. Agirresarobek gogorarazi du “kopagoa pertsonen eskubideen eta duintasunaren kontrako hamaikagarren kolpea dela, izendapenetik hasita ere iruzur handia izateaz gain; izan ere, aurretik ere herritarrek ordaintzen zituztelako botikak, klase popularrak gero eta gehiago zamatzen eta gehien dutenentzat hain mesedegarria den fiskalitatearen bidez”. Horregatik, “ordainketa partekatua baino, berrordainketa” deitu beharraz ohartarazi du.

Alternatibatik bidegabea deritzote herritarren gehiengoari botikak ordainarazi eta gizarteko sektorerik ahulenetako bati osasun estaldura kentzeari. Gainera, ezkerreko bozeramaileak azpimarratu duenez, “ustez, 33 milioi euro aurrezteko besterik ez du balio, Espainiako Aurrekontu Orokorrek aurten AHTeko lanetarako aurreikusitakoaren hamarren bat beraz”. Kopuru horri, halaber, “sistema berria ezarri eta kudeatzeak dakarren gastua kendu beharko zaio”. Gogorarazi du, bestetik, EAE, Nafarroarekin batera, Espainiako Erresuman industria farmazeutikoarekiko zor gutxien duen erkidego autonomoa dela.

Berrordainketarekin Bengoak zein Lopezek egunotan erabilitako aitzakia eta azpijokoen harira, azkenik, Agirresarobek “intsumisio formako propaganda astintzea” leporatu dio Eusko Jaurlaritzari, “inongo esku-hartzerik gabe murrizketa propioak egin dituztenean, hezkuntzan, laguntza sozialetan eta, baita ere, osasungintzan”. Horrexegatik, lehendakariari galdegin dio “eskubide sozialak bere eskumenetatik eta propagandatik haratago babesteko”. Ildo horretarik, bestelako euskal erakundeek zerga politikaren inguruan erakutsitako jarrera ere kritikatu du, zamarik handiena langileen esku jartzen jarraitu dutelako, gehien irabazten dutenei zergak barkatuta: “Ikaragarria da gogoratzea superabita zegoenean enpresa eta aberestasun handienei zergak jaisteko baliatzen zutela, orain, baliabide publikoak falta diren garairako, askoz egoera okerragoan utzi gaituztela”.

Berriak

Ez dugu sakrifiziorik onartzen

Asier Vega eta Amaia Agirresarobe – Alternatiba

Biblian jasotzen denez, Abrahamek bere seme Isaac sakrifikatzeko asmoa zuen, hari esan gabe Jaungoikoari eskaintzera zihoan sakrifizioa semea bera zela. Agindu jainkotiarra betetzeko prest zegoenean, aingerua agertu zitzaion, esanez: “Ez egin minik mutikoari, dagoeneko badakit Jainkoaren beldur zarela, ez baitiozu ezetzik izan zure seme bakarra niri emateari”. Tamalez, testu biblikoak asteotako egunkarietako azalekin antzekotasun gehiegi ditu.

Espainiako Erresumako Presidente Mariano Raxoik lepora zuzendutako labankada eman die herritarrei, murrizketa, BEZaren igoera eta kotizazio sozialen beherakada – langileen soldataren zati bat jaitsita- deitu arren. Erasoa justifikatzeko, Aznarren ondorengoak “sakrifizioa onartu eta zerbaiti uko egiteko” unea heldu dela ziurtatu zuen, bestela, “sakrifizioak alboratu eta guztiari uko egin” beharko litzaiokeelako. Banka ahalguztiduna odol eske ari da, eta ez du inongo aingerurik bidaliko Abrahamen eskua geldiarazteko. Herria da bere kateak eskatu beharko dituena, sakrifizioak orain onartzeak guztiari uko egitea ekarriko baitu.

Raxoik esan zuen Espainiari eman beharreko laguntzak inposatutako baldintzarik ez zuela izango. MoU deritzona (Ulermenerako memoranduma) ikusi ostean, PPko buruzagiak banan-banan jarraitu dituen eskakizun guztiak jasotzen direla egiazta daiteke; gezurretan ari ziren beraz, zigor bikoitzarekin gainera. Laguntza ez da Espainiarentzat, Alemaniako banku eta zordun diren banka pribatuko gainerakoentzat baizik. Gainera, ezarritako baldintza zorrotzek, gutxien dutenek are okerrago egon daitezela besterik ez dute eragingo, Espainiako Erresuma beste erreskate baten atarian jarrita zorra ordaintzerik ez duenean. Europako Banku Zentralaren, Europako Batzordearen eta Europako Banku Agintaritzaren eskutik etorriko da inposatutako baldintza guztiak zintzo betetzen diren ikuskatzea.

Greziaren finantzak kontrolatzen dituen troikak ez-bezala, zor pribatuaren zama arintzea proposatu berri duten NDFako ortodoxoak Europako Banku Agintaritzarekin ordezkatu dituzte, finantza sisteman egonkortasuna eta gardentasuna sustatzeko helburua omen duena baina Londresko City ilunean egoitza duena.

BEZaren igoera benetako labankada da, herritar guztiek modu berean ordaindu beharko dutelako haien gaitasun ekonomikoa edozein izanda ere. Nekazaritzan eta abeltzaintzan erabilitako lehengaiak, esaterako, %8tik %21era igoko dira. Montorok, tartean, errugabeek bekatariengatik ordaindu beharko dutela onartu du (BEZarekin iruzurrean ari direnak eta amnistia fiskala darabiltenak, edota Erresumako hiriburuko hamaikagarren saio olinpikoa babestearen truke kenkariak baliatuko dituztenak). Kotizazio sozialen beherapena ere dakar erasoak, pentsio sistema publikoari kalte egin eta langabezia saria seigarren hilabetetik aurrera murriztuta, existitzen ez den enpleguaren bilaketa sustatzeko aitzakiapean. Murrizketek 65.000 milioi euro aurreztea dute helburu, baina ahaztu egiten dute sozialki zein ingurumenari begira sostengaezinak diren obretan zein ejertzito, monarkia edo senatua bezalako eremuetan murriztea. Jaitsi egin dute, halaber, funtzionarioen soldata (parte bat bankari oparituta) eta aniztasuna zein kontrol politikoa ere kaltetuko dute, zinegotzien %30 murriztuta.

Pentsa zitekeen dagoeneko guztien kontra egin dutela baina, tamalez, seguru gaude murrizketak ez direla horretara mugatuko: pentsioak jaistea eta erretiro adinaren atzeratzea bizkortzea laster izango ditugu mahai gainean.

Maastrichteko Ituna, Lisboakoa eta ukiezina zirudien konstituzioaren erreforma defizit publikoari muga jartzeko. Guzti horiekin, urratsez urrats, Espainiako Erresumak politika ekonomikoa egiteko berezkoak zituen lanabesei uko egin die. MoU memorandumak Espainiako finantza sistemak bete beharreko 37 baldintza zehazten ditu; are gehiago, jaso gabeko edozein neurri hartzeko asmorik izango balu, gobernuak jagoleei ohartarazi beharko lieke. Burujabetza laga dutela erakusten dute Margallo ministroaren hitzek, “subiranotasun nazionalaz hitz egitea ergelkeria” zela esan zuenean, “partekatutako subiranotasunen munduan bizi garelako”.

Memorandumak, halaber, aurrezki kutxak bankuen gainean duten jabetza %50aren azpitik mugatzera behartzen ditu. Espainiak horretarako beharra ezarriko du legez, eta, hori gertatzen denean, euskal kutxek Kutxabank kontrolatzeari utziko diote eta gizarte ekintza galtzetik urrats txiki batera egongo gara. Horrela, agerian gelditu da Gipuzkoako erakunde sortzaileen pribatizazioa saihesteko asmoz negoziatutako mugak ez direla nahikoak izan, are mingarriagoa dena banka publikoa inoiz baino beharrezkoa denean.

Konponbidea, berriz ere, hartu izan diren neurrien kontrako norabidean doa. Zergatik bultzatu zituen Europak fusio berriak, aurretik zabaldutako kezka finantza erakundeen tamaina zenean eta, ziotenez, erortzen uzteko handiegiak zirenean? Banka pribatua erreskatatu aurretik aztertu beharko litzateke zergatik herritarren lepotik ordaindu behar den. Ackermannen banka alemaniarrak zor hori erosi zuenean, ez omen zekien ezinezkoa izango zela bueltatzea? Ikuskaritza egin beharra dugu, zorraren zein parte den zilegi erabakitzeko eta, horren arabera, zer ordaindu eta zer ez.

Etortzeke dauden politikek eta esku-hartzeek mozkinak eta finantza errenta jartzen duten beste ezeren gainetik. Austeritatea, eskubide murrizketak, pribatizazioak; guztiak dira gizarte desjabetze eta harraparitza politikak. Konponbidea errenta zein aberastasunaren eskutik etorriko da, eskubide sozialak indartzetik. Ez dugu sakrifiziorik  onartuko, ez jainkoaren ezta bankaren izenean ere ez.

Berriak

PPk, EAJk eta PSEk Kutxabank lehenbailehen pribatizatu nahi dutela salatu du EH Bilduk

Datorren ostegunean egingo diren euskal kutxen asambladak direla eta, ehbilduk gaurko egunez PP, PNV eta PSEk Kutxabak berehala pribatizatzeko asmoaz ohartarazi nahi dugu euskal jendarte osoa.

Ehbildutik euskal sistema finantzarioaren egoeraren larritasuna azpimarratu nahi dugu, eta neurri handi batean euskal eta espainiar eskuinak, Urkulluren PNV eta Rajoy-ren PPk adosturiko eta PSEk babesturiko Kutxen Legea dago larritasun horren oinarrian.

PNV eta PP alderdiek Kutxabank-en boterea banatzeko adostasuna lortu dute, Bildu alboratuz, eta horrela Kutxabank-en kontrol organoetan euskal jendartearen aniztasuna ezabatu dute. Euskal Kutxen Legeak udalak diskriminatzen ditu, batzarren osaketan ordezkaritza murriztuz eta instituzio publikoek batzarretan duten ordezkaritza ere %50etik %40ra jaitsiz.

Eta hau ez da integrazio kontratuan Bildurekin adostu zutena. Gogoratu beharra dago, halaber, Aralarrek kontra bozkatu zuela. Akordio horretan zera adostu zen, hiru euskal kutxen batzarrei zegokiela kapital pribatuari sarrera emateko erabakia. Orain, ordea, Espainiako Bankuaren erregulazioak, Luis de Guindos ministroaren eta PPren helburuek eta Kutxen Euskal Legeak eta ostegunean bozketara eramango diren estatutuek, euskal aurrezki kutxak pribatizatzeko asmoak indartzen dituzte.

Are gehiago, Europar Batasunak estatu espainiarrari laguntza finantzieroak jasotzeko kaleratutako “memorandum” batean zera jasotzen du, aurrezki kutxen eta bankuen banaketa dekretua ezarri behar duela azarorako, beraz, argi esan dezakegu, azaroan Kutxabank erabat pribatua izango dela. Zentzu honetan ulertzen dira azken boladan, kutxak fundazioak bilakatzeko emaniko urratsak.

PNVk PPrekin bat eginik, aurrezki kutxak banketxe pribatu bihurtzeko asmoa salatu behar dugu eta gizarte ekintzaren edo kapital publikoaren inolako arrastorik ez uztea. Euskal kutxak fundazio bihurtzeak bere sorrerako helburua alboratzea suposatuko du, gizarte ekintzaren desagerpena ekarriko du eta pribatizazioaren bideari ateak irekiko dizkio. Horretarako egin dute ituna PPk eta EAJk administrazio kontseiluan botere osoa eskuratzeko, beren eredu eta apustua Kutxabank-en etorkizuna esku pribatuetan uztea delako, eta horretan PSEk babesa adierazi die.

Ezin dugu onartu Kutxabank-en pribatizazioa. Herritarren zerbitzura egongo den eta planifikazio sozial eta ekonomikoa izango duen banka publikoa behar dugu, eta hori da gure aldarrikapena. Sistema finantzario publiko, garden eta demokratikoa behar dugu, gure herriko ehun industrial eta sozialaren beharretara egokituko dena. Krisi sistemikoa gainditzen lagunduko gaituen sistema finantzario publikoa defendatzen dugu.

Azken finean, honakoa aldarrikatzen du Euskal Herria Bilduk: bere funtzio soziala definituko duen entitate publikoa, banka komertzialaren rola gaindituz irizpide ekologiko eta sozialetan oinarrituko den inbertsio produktiboa erraztuko duen inbertsio banka bihurtuaz. Espekulazio finantzarioaren aldeko apustua egingo ez duena, inbertsio militarra eta megaproiektuei errefusatuko dituena. Funtzio sozial konkretuei eutsiko dien kutxa behar dugu: zaintza ekonomiaren lehentasunei prestamu eta inbertsio egokiak egingo dizkiona, kalitatezko enpleguaren sorrera bultzatuko duena eta aldaketa klimatikoaren aurka borrokatuko duena, elikadura burujabetza eta sektore zaurgarrienen kontsumoa babestuko duena. Azken finean, justizia soziala lehenetsiko duena eta demokrazia parte-hartzaile eta gardentasunaren printzipioengatik zuzenduko dena.

Berriak

Guztiona eta guztiontzat

Mireia Arginzoniz, Josu Aztiria, Karmele Aierbe eta Jokin Melida – EH Bilduko kideak

Diskurtso ofizialak eraginda, gizarteak ez du sinesten euskara desagertzeko arriskuan dagoenik. Gauza asko egin dugu denon artean eta hil-kanpaiak ez ditugu joko, baina errealitatea egoskorra da.

Behatokiaren urtez urteko txostenek erakusten dute euskaldunen hizkuntz eskubideek urratuta jarraitzen dutela Euskal Herri osoan, eta administrazio guztiek egunero urratzen dituztela; kale erabileraren neurketak eta inkesta soziolinguistikoak argi gorriak piztu dituzte. Agertutako datuek diote euskararen kale erabilera ez dela hazi azken hamabost urtean eta %13 eta %14 artean goia jo du. Hein horretan trabatuta dago, eta planto egin du. Soziolinguistikaren Klusterrak iradoki duen bezala, baldintzak aldatzen ez badira erabilerak ez du gora egingo, ez eta ez bada hiztun kopurua handitzen eta hiztunei euskara erabiltzeko aukera gehiago ez bazaie ematen.

Bestetik, euskaldunen kopuruak bost puntu egin du gora azken bi hamarkadetan Euskal Herrian, eta azken urteetan hazkunde hori apaldu egin da. Igoera hori batez ere gazteen artean gertatu da. Baina joera hori ez da islatu erabileran. Gazte elebidun gehiago egon arren, euskara gutxiago erabiltzen dute gaurko gazteek duela hogei urteko gazteek baino. Ez baitira euskaldun osoak; hobeto moldatzen dira erdaraz, eta euskaraz jarduteko zailtasunak dituzte; gune erdaldunetan bizi dira; euskararenganako atxikimendu apalagoa dute; eta pisu demografiko txikia dute, jaiotze tasak behera egin duenez.

Geldotze eta moteltze zantzuak sumatzen dira, beraz, euskararen normalizazioa galtze joeraren abiapuntu batean dago, eta ez badugu ezer egiten, galdu egingo dugu. Aurrera ez egitea atzera egitea da.

Bi estatu handien mehatxupean, euskarak mendeko estatus juridikoa du. Espainiako eta Frantziako Konstituzioek espainierari eta frantsesari balio hierarkizagarria ematen diete, estatuen baitan dauden gainerako hizkuntz komunitateak menderatu eta hizkuntza horietako herritarrak bigarren mailako bihurtzen dituzte. Asimetriak eta kanpo mugak nabarmenak dira: denok behartuta gaude erdara jakitera, baina ezin dugu inor behartu euskara jakitera. Euskal Autonomia Erkidegoaren Estatutuak eta Nafarroako Foru Hobekuntzak Espainiako Konstituzioak ezarritako erdaldunen elebakartasuna toleratzen dute eta euskaldunena eragozten.

Gaur egun euskara ez da ofiziala Euskal Herriko bere lurralde osoan. Eta euskararen estatusa, bi estatutan zatitua, bost eraentza juridikok arautzen dute. Ondorioz, euskal hiztunak eskubide desberdinak ditu bizi den edo dagoen tokiaren arabera; eta ofiziala ez den eremuetan euskaldunak ez du hizkuntz eskubiderik.

Bidegurutzean gaude: euskararen egungo politika eta egitura juridiko hauskorrean jarraitzea ala euskararen politika aldatzea eta beste marko normalizagarri bat eraikitzea. EH Bilduk euskararen politika zaurgarri honetatik ahal den azkarren irtetea eta euskararen beste marko normalizagarri bat eraiki nahi du.

Orain arteko hizkuntz politikek ez dute balio izan euskaldun eleaniztunez osatutako Euskal Herri euskalduna berreskuratu eta berrezartzeko. Kasurik onenean ere, intentsitate gutxiko politikak izan dira. Euskararen garapenak behar dituen minimoen azpitik. Eta, oro har, euskararen egoera minorizatuak ito egiten ditu ahalegin normalizagarri horiek, oztopoak bultzadak baino handiagoak direlako.

Horrenbestez, EH Bilduren ustez, hogeita hamar urteko mendeko politika partzialaren ondoren, euskararen garapen osoa azkartu eta lortzeko, beste hizkuntz politika bat, lehentasunezkoa eta burujabea, garatu eta gauzatu behar dugu. Euskarari estatus egokia ematea ezinbestekoa da, berezkoa, normalizatu beharrekoa, ofiziala, lehentasunezkoa eta jakin beharrekoa izan dadin. Hizkuntz politika berriaren oinarriak honako hauek izan behar dute:

1.- Burujabea, kanpo esku-hartzerik gabekoa. Gaur egun dauden oztopoak eta debekuak gainditzeko eta politika eragingarria abian jartzeko.

2.- Estatus juridiko egokia duena. Euskara da Euskal Herriko berezko hizkuntza eta normalizatu beharrekoa, hizkuntza ofiziala, lehentasunezkoa eta jakin beharrekoa.

3.- Euskara erdigunean jarri eta baliabide nahikoak dituena: Euskararen normalizazioaren zentralitatea aldarrikatu eta praktikara eraman behar dugu. Euskara ardatz bai diskurtso eta praxi politikoan, eta baita administrazio publikoaren egituretan ere. Era berean, zentralitateak esan nahi du baliabide pertsonalak eta baliabide ekonomiko nahikoak bideratu behar direla euskararen normalizaziorako, pauso kuantitatibo eta kualitatibo nabarmena emanez.

4.- Zeharkakoa egin. Euskararen normalizazioa gizabanako eta eragile guztien bultzadatik eta auzolanaren eskutik etorriko da. Eragile guztien erantzukizun aktiborik ez bada, ez da normalizaziorik lortuko. Era berean, hizkuntz politika bateratua egiteko Araban, Bizkaian eta Gipuzkoan, eta Nafarroa Garaiarekin eta Iparraldearekin koordinatzeko; tokian tokiko errealitate bakoitzaren abiaburua, baldintzak eta erritmoak kontuan hartu behar dira.

Euskaraz bizitzea ahalbidetuko duten baldintza politikoak, juridikoak, sozialak, ekonomikoak eta kulturalak lortu behar ditugu. Euskararen erabilera irabazpidean jartzeko, beste hizkuntz politika bat egiteko, euskararen normalizazioan jauzi kualitatiboa emateko, euskara unibertsalizatzeko. Euskara denona eta denontzat izateko.

Berriak

Bilboko Konpartsak-en kontrako jazarpena bertan behera utz dezala eskatu dio Bilduk Azkunari

Gaur goizean Bilboko Konpartsak-en kontra abiatutako jazarpenaren kapitulu berri bat ezagutu izan dugu. Oraingo honetan, Konpartsero Eguna Areatzan egiteko debekua jaso izan dute konpartsakideek. Horren aurrean, Aitziber Ibaibarriaga Bilduko zinegotziak dei zuzena egin dio Azkuna alkateari zuzen dezala eta, behingoz, Bilboko Konpartsak-en kontrako jazarpenari amaiera jar dezala. Bide batez, gogor salatu du oso eztabaidagarria den Espazio Publikoaren gaineko Ordenantzaren Udalak egiten duen erabilpen okerra.

Bilduko zinegotziak uste du Azkunak azken aldi honetan biderkatu dituen mespretxuzko adierazpenek eta jazarpenek ez dutela batere laguntzen iraganeko gatazkak gainditzeko Batzorde Mistoan talde guztiak egiten ari diren esfortzuan.

Jarraian, Ibaibarriagak azpimarratu du Espazio Publikoaren gaineko Ordenantzaren Udalak egiten duen erabilpen okerra. Bilduk bat egiten du aurreko astean Kalea Guztiona da herri ekimenak egindako salaketarekin. Ibaibarriagak gogoratu du Udalak behin eta berriro erabiltzen duela “ez da interes publikokoa” leloa denetariko jarduerak debekatzeko. “Aitzakia horrekin, herritarrei inolako eragozpenik sortuko ez zieten eta espazio publikoaren erabilera pribatibo edo berezirik egingo ez zuten oso jarduera desberdinak debekatu ditu. Jokabide horrek argi erakusten du zein zen udalaren helburua: kalea herritarren gozamenerako eta errebindikazioetarako erabiltzeari mugak jartzea” , gaineratu du.

Ibaibarriagak biharko deialdia mantentzearen aldeko Bilboko Konpartsak-ek erakutsitako jarrera irmoa txalotu du. Honetaz gain, deia luzatu die herritarrei biharko ekimenetan parte hartzeko “Azkunari zein EAJri argi uzteko kalea guztiona dela”. Bukatzeko, Ibaibarriagak bihar Areatzara hurbilduko dela konpartsei babesa emateko iragarri du.

Berriak

EH Bilduk bat egiten du I26ko greba deialdiarekin eta murrizketen aurka bihar Bilboko kaleak betetzeko deia egin du

Egun batzuk lehenago iragarri zituzten arren, gaur astebete onartu zituen Mariano Raxoiren Espainiako Gobernuak pertsonen eskubide sozialen eta duintasunaren aurkako eraso bortitzenetako batzuk. Murrizketen itxuran heldu zaizkigun eraso horiei orain hilabete batzuk abian jarritakoak gaineratu behar dizkiegu, eta, ez dugu ahaztu behar, krisiaren etengabeko aitzakian aurreko gobernuek abian jarritakoak.

Euskal Herria Bildutik neurri horiek bata bestearen atzetik salatu ditugu, eta bide beretik jarraituko dugu erasoek darraiten bitartean. Onartutako neurri guztien helburua baita finantza merkatuen eta sistema kapitalistaren erreskatea gauzatzea. Horiek dira beraiek krisia deitzen duten horren sorburua, herritarrok argi dugulako horrek beste izen bat daukala: estafa. Madrilgo gobernuak, Alemaniako instituzioek eta batez ere bankak agindutakoaren aurrean makurtuta, eta Gasteizko gobernuaren erantzun epela tarteko, salbuespen egoera batean kokatu gaitu. Egoera horrek, baina, badu ondorio baikor bat: herritarrak ez dira eskuak gurutzatuta geratuko tamaina honetako zapalketaren aurrean.

Asteon, Alderdi Popularrak ezarritako murrizketa larrien aurkako dozenaka protesta ekitaldi egin dira Euskal Herriko herri, plaza eta lantokietan. Merkatuen agindupean egin diren eskubide urraketen aurkako jarrera agertu duten milaka gizon eta emakume kalera atera dira bai Euskal Herrian eta bai Espainiako estatuan. Eta atzo bertan, greba orokorrera deituak izan ginen Hego Euskal Herrian; aurtengo bigarren greba orokorra izango da, gainera. 8 sindikatu eta ia ehun plataforma eta mugimendu sozial ados jarri dira, irailaren 26an gure herria geratzeko. EH Bilduk bat egiten du deialdi horrekin, eta bat egingo duten eragileak oraindik eta gehiago izango direnaren itxaropena du.

Era berean, herritarrek beren haserrea agertu ahal izateko koalizio honetatik biharko egiten dugun manifestazio nazionalerako deialdia berresten dugu. ‘Murrizketarik ez, burujabetza ekonomikoa” lelopean egingo den mobilizazioa Bilboko Jesusen Bihotzetik abiatuko da. Herritar orori manifestazio horretan parte hartzeko deia egiten diegu, guzti-guztion eskubideak eta duintasuna direlako jokoan daudenak eta guztiok batera elkarlanean arituta bakarrik lortuko dugulako erasoak geldiaraztea eta alternatibak eraikitzea.

Erakundeek, gizarte eragileek, sindikatuek, alderdi politikoek eta, nola ez, jendarteak egoera aldatzeko gaitasuna eta ardura dutela erantzuten die EH Bilduk mobilizazioak ez duela ezertarako balio esaten dutenei. Alternatiba egon badagoela sinisten dugunok baikoitzak bere alroan lan egiteko aukera dugu eta, ahal den guztietan, modu osagarrian, PPk inposatu nahi duen gizarte, ekonomia eta herri eredua gelditzeko. Bihar burujabetza ekonomikoa aldarrikatuko dugu gure herriarentzat, jakin badakigulako posible dela interes kolektiboak eta ez gutxi batzuen diru gosea defendituko dituen sistema eraikitzea. Bizirauteko edozein prezio ordaintzeko prest dagoen porrot egin duen kapitalismo bidegabearen aurrean, alternatiba sozioekonomiko sinesgarria, eraginkorra eta herritarra eraikitzeko, burujabetza aldarrikatzen dugu.

Euskal Herriko eta Espainiako eskuinak, EAJk, PPk, PSOEk eta UPNk osatzen duten laukoteak, sinestarazi nahi digute egoera honetara ekarri gaituzten politika berak direla gauden putzutik aterako gaituztenak. Eta halaxe sinesten dute, ez baitute nahi ezer aldatzea, daukaten guztia galtzeko beldur direlako; kapitalaren neurrira eta pertsonen kolkora egindako sistema defendatzen dutelako.

Eusteko borondatea daukagula erakutsi behar diegu, alternatibak ditugula, eta horiek abian jartzeko beharrezkoak diren tresnak aldarrikatzen jarraituko dugula. Bihar, larunbata, kalera atera behar gara guztiok; eta irailaren 26an, Hego Euskal Herria erabat geldituko dugu. Eta bien bitartean, zalantzarik gabe uda garai honetan helduko zaizkigun eroso berrien aurrean adi egongo gara.

Berriak

Iberdrola edo erruduna nola saritu

Bilboko Udalak, Azkuna alkatearen ekimenez, Bilbotar Ospetsu titulua eman zion iaz Iberdrola enpresari. Araudiaren arabera, hiriaren zein hiritarren irudi zein mesederako eginiko lan goraipagarria egin duten pertsona edo erakundeak bereizten ditu Udalak aipatu tituluarekin. Izendapena, azken batean, jokabide zibiko eta eredugarriaren aitortza da.

Esan daiteke nahiko modu arraroan ulertzen duela jokabide zibiko eredugarria gobernu taldeak: herritarrak energia nuklearraren arriskupean jartzea; bizkaitarron onurarako politika sozialak garatzea galarazten dituzten zerga kenkariak baliatzea; azpikontratatutako enpresetako langileen eskubideak urratzea eta, azken finean, Iberdrola ezartzen den leku orotan inpaktu sozial eta ekologiko lazgarria izatea, Latinoamerikan batez ere. Hau al da jokabide eredugarria haientzat?

Fukushiman gertatutakoa gertatua ere, Iberdrolak Garoñaren bizitza luzatzearen aldeko jarrera dauka. Herritar guztiak mehatxatzearen parekoa da hori, 40 urtetik gora duen zentral nuklearraz ari garenean. Argi dago mozkina dutela lehentasun, eta oso bigarren mailan, gu guztion segurtasuna.

Iberdrolak, halaber, Madrilgo Gobernu desberdinen lan erreformak baliatu izan ditu bere langileak zapaltzeko, azpikontraten bidez multinazionalarentzat lan egiten dutenak batez ere. KONEKTA da adibiderik argigarri eta, era berean, mingarriena. Izan ere, Iberdrolaren bezeroekiko arreta zerbitzua kudeatzen dutenetik 50 langile kaleratu dituzte. Jokabide benetan eredugarria bai.

Azkenik, multinazional guztiek bezala, irabaziak beste ezerren gainetik lehenesteko estrategiaren baitan, Iberdrolak ez du inolako eragozpenik beste herrialde batzuetako baliabideak ustiatzeko, bere diskurtso berdea zeharo ahaztuta eta bereziki Latinoamerikan aztarna beltza utzita: giza eskubideen alde nazioartean jasotzen diren eskubide sozial, politiko eta ekologikoak ezabatuta. Hala, eta herrialde jakin batzuek enpresa transnazionalekiko dituzten legedi eskuzabalak baliatuta, erabat ohikoak dituzte kaleratzeak, sindikatutako langileekiko mehatxuak, prezioen zein ordainketen gaineko iruzurra, lur desjabetze zein jende kanporatzeak haien proiektu energetikoen ondorioz, eta abarrekoak.

Saritzeko moduko portaerak al dira aipatutakoak? Eredugarria al da Latinoamerikan pertsona askoren bizitzaren lepotik ahal bezain beste mozkin lortzen jarraitzea? Gure segurtasuna kolokan jar dezaketen azpiegituren aldeko apustuari eustea da bilbotarrok eskertu behar duguna? Langabezia, pobrezia eta bazterkeria nagusi direnean urtero 9 milioi eurotik gorako saria duen Sanchez Galan presidentea goraipatzea?

Iberdrolaren ohiko jardueren zati bat besterik ez dugu birpasatu baina, non da zibismoa guzti honetan? Elkartasun, etika zein justizia gabezia baino ez dugu ikusten. Onartezina deritzogu halako jokabideak saritzeari. Guztiz lotsagarria da pertsonen aurkako hainbeste zapalkuntzen errudunei saria ematea eta, horregatik, Bilbotar Ospetsu titulua ken diezaiotela aldarrikatuko dugu behin eta berriro, gero eta ozenago.

Ana Etxarte – Alternatiba Bilbo

http://alternatiba.net/old-files/iberdrola.jpg

Berriak

Guztion ardura da, eragile sozial, politiko eta sindikalena, emergentziazko egoeran erantzun eta alternatibak plazaratzea

“Murrizketarik ez. Burujabetza ekonomikoa” lelopean Euskal Herria Bildu koalizioak datorren larunbaterako deituriko mobilizazioaren harira ELA sindikatuak kaleraturiko oharraren inguruan, honakoa adierazi nahi dugu:

Gobernu espainiarrak hartu dituen neurriek sortu duten egoera larri eta ezinegon orokortuaren aurrean, murrizketen aurkako eta burujabetza ekonomikoa aldarrikatzeko pertsona eta kolektibo orok mobilizaziorako eskubidea dutela adierazi nahi dugu.

Era berean, adierazi nahi dugu errespetatzen dugula ELAren jarrera, baina ez gaudela ados hartu duen jokabidea eta erabakiarekin. Halaber, aldarrikatu nahi dugu esparru sozial eta sindikala ez direla inoren jabegokoak, baizik eta herri osoarenak direla. Herri osoarenak diren bezala bestelako esparruak, besteak beste, erakundeak eta kaleak.

ELA sindikatuak eremu sindikal eta sozialera mugatzen du Gobernu espainiarraren neurri ekonomiko eta sozialei erantzuteko ardura, indar politikoon eragin eremua instituzioetara mugatuz. Irakurketa erratua da hori EH Bilduren iritziz. Guztion ardura da, sindikatuena, alderdiena eta eragile sozialena, emergentziazko egoera honetan, erantzutea eta alternatibak plazaratzea.

Honela bada, Euskal Herria Bildu koalizioak eremu guztietan egingo du euskal herritarren eskubide guztien defentsa, bai kalean eta bai instituzioetan eta horretarako prest dauden eragile guztiekin egingo du, ELA barne, ulertzen baitugu gu guztion eskuak beharrezkoak izango direla estatu golpe ekonomiko honi aurre egiteko. Ez dago inor soberan, eta ez gara inor inoren parte hartzea mugatu edo baldintzatzeko.

Bukatzeko, euskal herritar guztiei deia luzatzen diogu uztailak 21, larunbata, Bilbon, “Murrizketarik Ez. Burujabetza Ekonomikoa” lelopean egingo dugun manifestazioan parte hartzera.

Berriak

Alternatiba | Ezkerra eraldatzearen erronka

X