Hamabostero bezala, Euskal Herria Bilduren aldizkari digitala kaleratu dugu, 10. zenbakia oraingoan, PDF formatuan deskargatu edo sarean ikusteko. Lurralde bakoitzean koalizioak egiten duen lanaren berri eta, asteon, Eskoziaren erreferendumaren inguruko analisia egiten dugu. Aldizkaria zure posta elektronikoaren bidez zuzenean jasotzeko, egizu harpidetza.
Lehen mailako hainbat gertakari politikoek, Estaturik gabeko herrientzako eta bere herritarrentzako garai oparoak datozela iragartzen dute. Pasa den ostegunean Catalunyako Diada Nazionala ospatu genuen, datorren azaroaren 9an katalanek Estatu independentea osatzeko egingo duten ariketari elkartasuna adierazteko.
Modu berean, gaur bertan Eskozia erabakitzeko eskubidearen ariketa burutzen ari da Estatu independentea izan nahi ote duen argi eta garbi adierazteko.
Erreferendumaren emaitzetatik haratago, Eskoziak dagoeneko irabazi du. Erresuma Batuko gobernuak Eskozia erabakitzeko eskubidearen subjektu politikoa dela aitortu du eta ondorioz autodeterminazio ariketa burutu da gaur bertan. Hau guztia itzuli ezinezko erreferentzia bilakatuko da eskubide horren ariketa noizbait egin ahal izateko borrokan ari diren Europako nazio guztientzat.
Hasteko, Eskoziako erreferendumak nabarmen utzi du autodeterminazio eskubidea guztiz aplikagarria dela XXI. mendeko mendebaldeko Europan, eta gainera adostutako prozedura baten bidez gauzatu daitekeela. Eskoziakoak agerian uzten du estatuen jarrera ez dela demokratikoa eta helburu bakarra dutela, hots, beren etorkizuna libre eta demokratikoki erabaki nahi duten herrien askatasuna indarrez ekiditea.
Bitartean, Madrilek erabakitzeko eskubidearen aldekoak iraindu eta espetxe zigorrez mehatxatzen gaitu. Eskozia, Catalunya eta Euskal Herriko prozesuen arteko desberdintasuna aurrean dauzkagun Estatuen baitakoa da: Erresuma Batuak eskoziarrei eskaintza demokratikoa egiten dien bitartean, katalanei eta euskaldunoi hitza ukatu egiten zaigu, baita nazio izaera bera ere eta ondorioz herri gisako eskubide politikoak.
Erreferenduma gertatu izanak akuilua izan behar du katalanek eta euskaldunok gure etorkizuna libreki erabaki ahal izateko. Gehiengo sozial eta politikoek eskubide hori babesten dute eta horregatik, dudarik ez daukagu euskaldunok gure etorkizuna erabaki ahal izango dugula.
Horretarako beharrezkoa da herri gisa pentsatu eta ekitea, alde guztiok izan ditzakegun ikuspegi partikularretatik harago. Euskal herritarron askatasunak gizarte osoaren konpromisoa eskatzen du. Adostu dezagun burujabetzarako euskal bidea. Horrek erabakitzeko dugun eskubidearen defentsa eta ariketarako akordioen beharra jartzen du mahai-gainean. Gure ardurari eustea eskatzen zaigu, ihesbide antzuak bazter utzita. Zailtasunak zailtasun, helburu bat daukanak horretarako bidea aurkitu ohi du; aldiz, ezer egitea lehenesten duenak aitzakiei eutsi besterik ez du egiten.
Gaurkoan poztasun handiz ari gara ospatzen eskoziarrek burututako autodeterminazio eskubidearen ariketa. Modu berean, azaroaren 9an katalanek burutuko duten kontsulta babestu nahi dugu; epe motzean Euskal Herria ere bere buruaren jabe izango den segurtasunarekin. Gure esku dago; gero eta gehiago gara.
Gipuzkoako Gizarte politikako diputatu eta Alternatibaren kide Ander Rodriguezek Alzheimerra pairatzen duten pertsonekiko sentsibilizazio kanpaina aurkeztu du gaur Donostian.
Alzheimerraren inguruan kontzientziatzeko jarduera programa bat aurkeztu dute AFAGI Gipuzkoako Alzheimerdunen eta Bestelako Dementziadunen Senitartekoen eta Lagunen Elkarteak eta Gipuzkoako Foru Aldundiak, datorren irailaren 21ean Alzheimerraren Munduko Eguna ospatuko baita. Hamaika ekitaldik osatutako egutegia bihar bertan hasiko da, Lazkaoko Txindoki egoitzan emango den hitzaldiarekin, Alzheimerra duten pertsonekiko komunikazioari buruz, eta urriaren 2an itxiko da, Irunen, zaintzaileei zuzendutako hitzaldi batekin. Bihartik hilaren amaierara arte, informazio mahaiak, hitzaldiak, AFAGIko bazkideen arteko topaketak eta jarduera solidarioak egingo dira, gaixotasun honen inguruko sentsibilizazioa bilatzeko eta alzheimerraren errealitatea Gipuzkoako eskualde guztietara helarazteko.
Kanpaina honen ekitaldi nagusia irailaren 20an izango da, Donostiako Kontxako Pasealekuan: bertan, ohikoa den giza katea egingo da, eta globoak askatuko dira, alzheimerra duten pertsonekiko eta horien familiekiko elkartasunaren adierazle.
Gipuzkoako Gizarte Politikako diputatuak, Ander Rodriguez, eta AFAGIko presidenteak, Koldo Aulestia, Alzheimerraren Munduko Egunaren inguruko sentsibilizazio kanpainako jardueren programa eta kartelak aurkeztu dituzte gaur. Aurtengoan, Alzheimerraren Munduko Egunaren leloa “elkartasuna” da.
Koldo Aulestiak azaldu du AFAGIk gogor lan egiten duela, “elkartasun” hori beti egon dadin gure bizitzetan: “Elkartasuna, zentzurik zabalenean, gizartearen sektore guztietara iritsiz, eta ez, zuzenean edo zeharka, XXI. mendeko pandemia honekiko erantzukizuna edo lotura duten horietara soilik. Elkartasuna, konplizitatearen eta konpromisoaren isla gisa, eta ez pena edo errukiaren adierazle gisa”. Helburua hori izanik, AFAGIk parte hartzen du elkarteen konfederazio estatalak (CEAFA) abian jarri duen proiektu batean: “Solidarioak Alzheimerrarekin”.
Proiektu honen xedea da printzipioz gaixotasunarekiko lotura zuzena ez duten entitate publiko zein pribatuek arazo soziosanitario honekiko duten sentsibilizazioa ikusaraztea. Une honetan, deklarazioa sinatu duten 328 entitate publikoetatik (gehienak udalak), 35 Gipuzkoakoak dira.
Kalkulatzen da Espainian, gaur egun, 65 urtetik gorako pertsonen % 7k (503.681) eta 85 urtetik gorako % 50ek (623.723) arriskua dute zuzenean dementzia motaren bat sufritzeko (eta Alzheimerra da gehien ematen dena). Beraz, kalkulatu dezakegu kasu kopurua 1,2 milioi pertsonara iristen dela (1.127.403 hain zuzen ere); horrek Estatuko biztanleriaren % 2,4 egiten du (65 urtetik gorakoen % 13,4). Gipuzkoari dagokionez, 23.630 pertsonara iritsiko litzake.
Ander Rodríguezek azaldu duenez, gaixoen %84 atenditzen ditu Gizarte Politikako Departamentuak. Horietatik, %40 adinekoen egoitzetan daude eta %60k etxean jarraitzen dute, familia inguruko zainketetarako laguntza ekonomikoen babesarekin, Etxerako Laguntza Zerbitzuarekin, eguneko zentro edo bestelako zerbitzuekin.
Diputatuaren hitzetan, “mendeko pertsona etxean bere inguruan mantentzea Foru Aldundiaren lehentasunetako bat da, horregatik handitu ditugu Gipuzkoan Mendekotasun Legearen laguntza ekonomikoak, Espainako Gobernutik murrizketa bortitzak jaso arren. Ez hori bakarrik, hobetze bidean, arreta espezializatua eta pertsonengan zentratuta bilatzen ari gara, horregatik unitate psikogeriatrikoen aldeko apustua egin dugu egoitzen barruan. Iaz 15 plaza psikogeriatriko gehiago zabalduko genituen Lasarte-Oriako Atsobakar egoitzan eta hurrengo hilabeteetan, 18 gehiago zabalduko ditugu Bergaran”.
Aulestiak adierazi du, baita ere, ez dela ahaztu behar Alzheimerrak eragina duela, baita ere, “gaixo gazteengan”; hau da, 65 urte baino gutxiagoko pertsonak, gaixotasun honen ondorio suntsitzaileak pairatzen dituztenak. “Gaixo gazte” hauek dira kasu guztien % 10 inguru.
Inpaktu sozialari dagokionez, Alzheimerra ez da gaixoarekin bakarrik grinatzen. Izan ere, familiak beregain hartzen du gaixoa zaintzearen eta behar duen arreta ematearen pisua eta erantzukizuna. Ondorioz, eta egitura familiarra kontuan hartuta, esan dezakegu gaixotasunak, Estatuan, eragina duela 4.509.612 pertsonengan, hau da, biztanleria osoaren % 9,7rengan. Gipuzkoan, 94.520 pertsonengan du eragina.
Hala ere, AFAGIko presidentearen hitzetan, “datu horiek gaur gaurkoak dira. Ez dute balio datozen urteetarako. Izan ere, aurreikuspenak aintzat hartuta, gure biztanleriaren zaharkitzea areagotzen joango da eta, beraz, kopuru horiek bikoiztu egingo dira epe ertainera”.
Alternatibako kide eta Gasteizko EHBilduren zinegotzi David Pinak Gasteizko alkate Marotori ikasleen garraio sari-txartelak martxan jartzeko exijitu dio, eta bide batez, bere Gobernuari laguntza gehien behar duten kolektiboak bost axola zaizkiela erakusteari uzteko eskatu dio”
PPren Gobernuak, bigarren urtez jarraian, hiri garraiorako ikasle txartelaren hobariak hilabete atzeratu ditu. Urtero bezala kurtsoa irailean hasi da, deskontuak urria arte ez direla abian jarriko egiaztatu dugu.
“Alkateari eta bere Gobernuari laguntza gehien behar duten kolektiboak zenbat bost axola zaizkiela ikusten dugu beste behin ere”, azaldu du zinegotzi eta TUVISAko kontseilaria den David Pinak. Bere gobernuaren utzikeria gorritzeko modukoa da. “Ekainean jada hobariak epean martxan jartzeaz ohartarazi genuen, aurreko ikasturtean gertatutakoa errepikatu ez zedin. Eta beste behin ere berdina egin dute”, gogoratu du. “Egoera lehen aldiz salatu genuenean, Gobernuak TUVISAri leporatu zion errua. Egun, aipatu behar da, Alfredo Iturricha zinegotzia udal garraio elkartearen lehendakariorde dugula eta beraz, PPren arabera euren zinegotzia dela honen erruduna”.
Gobernuari eskatu diogu hobariak berehala martxan jartzeko eta gai honi buruzko azalpenak emateko eskatu dugu bai Hezkuntza batzordean eta baita TUVISAko kontseiluan bertan ere.
Irailaren 22an 28 euskal gazteren kontrako epaiketa hasiko da Espainiako Auzitegi Nazionalean, Segi erakundeko kideak izatea leporatuta. Enegarren aldiz, militantzia politikoan aritzea delitu bakarra duten gazteek kartzela zigorrei aurre egin beharko diete. Euskal Herria Bildutik, berriz ere, euskal herritarren kontrako – bereziki gazteen kontrako- epai politikoen amaiera exijitzen dugu. Gizarteak ozen adierazi du, behin eta berriro, gatazka gainditu eta pertsona guztien eskubide guztiak bermatuko dituen Euskal Herria eraiki nahi duela; eta bide horretan, hamar egun barru hasiko denaren moduko epaiketa politiko guztiak lekuz kanpo daude.
Egoera larri honetan dauden gazteekin elkartasunean, gaurtik igandera “Asteburu laranja” deritzonaren baitan dozenaka ekitaldi antolatu dira Euskal Herriko hainbat auzo, herri eta hiriburuetan. EH Bilduk gure kaleetan izango diren elkartasun uholdeekin bat egin nahi dugu eta, horregatik, herritarrei beren eremuko ekitaldietarako joateko deia egiten die.
Horrez gain, koalizioko ordezkariak ere kalean izango dira, tokiko ekimenetan zein igandean Gernikako Astra kultur zentroan egingo den ekitaldi nazionalean parte hartzeko. Han izango dira, besteak beste, Maribi Ugarteburu, Diana Urrea eta Arri Zulaika EH Bilduko Gasteizeko legebiltzarkideak, koalizioko beste kideekin batera, Jon Salaberria kasu.
Dakizuen bezala, EHBildutik hilabeteak egin ditugu Kutxabanken kontrol sozial eta publikoa berma daitekeela aldarrikatzen eta horretarako urratsak emateko exijitzen, modu horretara gu guztionak diren kutxa publikoen eta Kutxabanken pribatizazioa saihesteko. Denbora honetan guztian ezezkoak baino ez ditugu jaso; hori ezinezkoa zela erantzun digute beti, legeak bestelakoa agintzen duela argudiatuta. Gipuzkoako Foru Aldundiak eskatuta egindako txosten juridikoak, ordea, agerian utzi du badaudela alternatiba errealak hiru herrialdetako kutxak izaera publikoa izaten jarraitzeko. Hau da, EHBildutik hainbeste denboran esan eta aldarrikatu duguna posible da.
Gipuzkoako Foru Aldundiak eskatuta egindako txosten juridikoak agerian uzten duena eta euskal jendarteari eskaintzen dion aukera ezin da bazterrean utzi. Kutxak euskal instituzioen eta euskal herritarren ekimenaren eta lanaren fruituak dira. Kutxak eta Kutxabank gaur egun diren finantza-erakunde baliagarriak eta bideragarriak badira, euskal jendarte osoaren inplikazioa eta borondatea egon delako da. Jabego publikoa eta izaera soziala izanda lortu dute kutxek eta Kutxabankek orain direna izatea.
EAJk, PPk eta PSEk (eta CCOO) baina, bestelako asmoak dituzte Kutxabankentzat. Pairatzen ari garen krisi ekonomikoa aitzakia bezala hartuta eta Europako Batasunetik datorren aginpide batean ezkutatuta, Kutxabanken jabegoa esku pribatuen esku utzi nahi dute. Horren ondorioak erabat kaltegarriak eta tamalgarriak dira euskal jendartearentzat: gure herriaren ekonomiaren egonkortasunerako funtsezkoa den tresna da Kutxabank, baina bere kontrol publikoa izatearen bermea galduko dugu eta, horrekin batera, bere izaera soziala eta jendarteari egin diezaiokeen ekarpena ere kolokan geratzen da.
Kutxabank pribatizatzea beste aukerarik ez zegoela esaten aritu diren EAJ, PP eta PSE gezurretan aritu direla demostratu du Gipuzkoako Foru Aldundiak eskatuta egindako txosten juridikoak. Posible da Kutxabanken jabetza publikoa izatea, posible da bere izaera soziala mantentzea, posible da euskal gizarteak eta euskal ekonomiak bere etorkizunerako funtsezkoaduen finantza-tresna mantentzea. Posible da. Borondate politikoa baino ez da behar.
Horregatik, beren jarrera aldatzera eta Kutxabanken pribatizazioa gelditzeko dei zuzena egin nahi diegu EAJri, PPri eta PSEri (eta CCOOri). Frogatu egin da Kutxabank publikoa izaten jarraitzeko berme legal serio eta fidagarriak daudela. Alternatiba mahai gainean dago, eta gauzagarria da. Lege aldetik, jada, ez dago aitzakiarik. EAJri, PPri eta PSEri dagokie orain erabakia hartzea. Edo izaera sozial eta jabego publikoa bermatua izango duen Kutxabanken alde egiten dute, edo euskal gizartearen ondarean den Kutxabank finantza-oligarkien esku uzten dute.
Zentzu horretan, interpelazio zuzena egin nahi diogu EAJri. Euskal Herria, euskal nazioa, egunez eguneko jardunarekin eraikitzen da. Euskal Herria egunero hartzen diren erabaki xume zein handiekin eraikitzen da. Euskal ekonomiak eta euskal herritarron orainak eta etorkizunak finantza-erakunde indartsua izatea eskatzen dute, kontrol publikoa bermatua izango duena, herritarren eta euskal ekonomiaren interesak lehenetsiko dituena eta ez gutxi batzuen interes ezkutuak… Euskal Herriak eta euskal jendarteak Kutxabank publikoa nahi du eta behar du; etxegabetzerik burutuko ez duen Kutxabak publikoa, IRPH bezalako indize maltzurrik aplikatuko ez duen Kutxabank publikoa, herri honen ehun produktiboan inbertituko duena, enpresa eta kooperatiba txiki eta ertainak lagunduz, erakunde publikoen egitasmoak lagunduz…
Aitzakia legal guztiak alboratuta, EAJren esku dago euskal nazioaren eraikuntzan beste urrats garrantzitsu bat ematea. Borondate politikoa badu eta herritarron interesa pertsona gutxi batzuen interesen gainetik jartzea erabakitzen badu, ondoan izango du EHBildu. Parez pare zabaldu zaigun aukerak merezi duela uste dugu.
Lehenik eta behin, zoriondu nahi dugu Jaizkibel konpainia. Hondarribian eta Euskal Herri osoan emakumeen eskubideen aldeko ikurra zarete. Segi lanean, alarde bakarra eta parekidea gero eta gertuago dago zuen urteetako zuen lana eta konpromisoari esker. Herri honen historian leku bat duzue irabazita.
Aldiz, amorru handiz ikusi dugu aurten berriro ere Jaizkibel konpainiaren aurkako plastiko beltzak agertu direla eta hori onartezina da. Urte asko pasatu dira eta Eusko Jaurlaritzak eta Hondarribiko udalak alardearen gatazka konpontzeko ez dutela inongo borondaterik konprobatzeko tartea izan dugu batzuk eta besteek. Bereziki larria da Hondarribiko alkatearen jarrera, eta de fakto bere karguan jarraitzeko indargabetua geratu da. Beraz, Hondarribiko alkateak gaur bertan bere dimisioa aurkeztu behar du. Aitor Kerejeta alkateak Jaizkibel konpainiari egiten dion mespretxua gero eta argiagoa da. Emakumeen bazterketaren ikurra bihurtu da Kerejeta eta gatazka betikotzeko arduradun nagusian bilakatu da.
EH bildutik salatu behar dugu aurten EAJren zenbait kargu publikok alarde baztertzailearen aldeko jarrera argia agertu dutela. Aitor Kerejeta alkateaz gain, Eider Mendoza batzarkideak eta Kristina Uriarte Sailburuak bere babes osoa adierazi diote Alarde matxistari eta bizkarra eman diote Alarde parekideari.
EH Bilduren iritziz, gure instituzioetan horrelako jarrerek ez dute lekurik izan behar eta hiru kargu publiko hauei, Kerejeta, Mendoza eta Uriarteri, irtenbide bakarra geratzen zaie: edo publikoki emakumeen parte hartzearen alde egiten dute edo berehala bere dimisioa aurkeztu beharko dute.
Alderdi politikoei dagokienez, Gipuzkoako EAJ eta PSEri Hondarribian jarreraz aldatzeko denbora agortu zaio. Egoera honek ezin du gehiago iraun. Hondarribitik kanpo emakumearen berdintasuna aldarrikatzen dute baino bertan bazterketaren aldeko eragile sutsuenak dira. Markel Olanok, Egibarrek eta Arriolak etxeko lanak egin behar dituzte eta emakumeen bazterketa defendatzen duten bere kargu publikoak kanporatu behar dituzte.
EH Bilduren iritziz, posible da gatazka konpontzea eta jaia berdintasunean ospatzea. Baina horretako erakunde guztiek norabide egokian lan egin behar dute. Emakunde, Ararteko eta Diputazioak egin bezala, udalak ere bere aldetik lan egin behar du. Gipuzkoan bertan esperientzia desberdinak daude eta horrelako gatazkak konpondu daitezkeela adierazten digute. Donostian, Tolosan eta EH Bildu gobernatzen ari den herri guztietan horren alde ari gara lanean eta emaitzak hor daude.
Emakumeak eremu publikoan baztertzearen ziren garaiak betirako pasatzen ari dira Gipuzkoa osoan. Hondarribian eta Irunen ere laster horrela izango dela ziur gaude eta horretarako ari gara lanean. Hondarribiko populazioaren gehiengoak gatazka konpontzea nahi du eta emakumeen presentzia ziurtatzea nahi du. Hori da bidea eta ziur gaude denon artean lortuko dugula.
Alternatibako bozeramaile Diana Urreak herritarrei dei egin die hurrengo irailaren 8an, berriro ere, “Hondarribiko kaleetara irten daitezela, urtetik urtera, alardean emakumeen bazterketarik gabeko jai libreen alde borroka egiten duten guztiak babestera”. Urreak “Hondarribiko eta Irungo ehunka emakume eta gizonen merezimendua eta esfortzua” gailendu du “atsedenik gabe eta indarra biziaz eskubideak konkistatzen jarraitzen dutelako, konplexurik gabe emakumeen eskubideak urratzen dituzten hainbat instituzioei aurre eginez”.
Aldi berean, alderdi ezkertiarreko bozeramaileak “Urkulluren gobernuak Hondarribiko eta Irungo udalei erakusten dien konplizitatea” deitoratu du, “alarde sexisten zerbitzura baliabide publikoak bideratzen dituenean, berdintasunerako oinarrizko eskubidearen urraketa baimenduz”. Zentzu horretan, exekutiba jeltzalea bere konpromisoa erakusten duen “pauso ausartak ematera” premiatu du “bi herrietako alkateak legea betetzera behartzea adibidez, Hondarribian urtero Berdintasunerako Legea urtero urratzen baita”.
Azkenik, Alternatibatik bere babes osoa agertu nahi izan diote Jaizkibel konpainiari, hala nola, kale nagusian gora laguntzen duten pertsona guztiei ere, “gatazkaren konponbidean instituzioei aurrea hartu dietela erakusten dutelako”. Bukatzeko, “eskubideak ez bozkatu, ez negoziatu; eskubideak irabazi egiten direla” aldarrikatu dute, horregatik, euskal jendarte osoari eskubideak konkistatzen jarraitzera dei egin diote “Euskal Herriko jai eta tradizio guztietan emakumeen parte-hartzea defendatuz”.
EHBilduk gaur goizean baloratu du, atzo Euskal Herriko Aldizkari Ofizialean agertu bezala, merkataritza ordutegiei dagokienez, Bilbo eremu turismo handiko eremutzat jo izana. Ana Etxarte zinegotziak adierazpena gogor kritikatu du soilik merkatal kate handiei on egiten baitie, merkatu txikia “babesik gabe utzi eta desagerpenera kondenatuz, langileen baldintzak gero eta gehiago kaskartuz”.
Ezkerreko zinegotzi soberanistak, aipatutako adierazpena EAJ-k Bilbon merkatu ertain eta txikia kaltetzeko duen estrategiaren baitan kokatu du. “PPk Madriletik inposatutako merkatuaren liberalizazioaren onarpenarekin ikusi ahal izan dugu” adierazi du Etxartek.
Zentzu honetan, Etxartek salatu du Eusko Jaurlaritzak, Arantza Tapiak hain zuzen, “egiari muzin egin diola” ez baita egia “irekiera librearen aukera ahal den gehienera mugatzen duenik”.
EHBilduko zinegotziaren ustez, Gasteizko exekutiboak goian aipatutakoa benetan egin nahi izan balu, “eremu turistiko handiko eremu, auzo bakar bat, edo Guggenheimaren inguruko bizpahiru kale izendatuko lituzke. Dekretuak, zonalde bakar bat eremu turistiko handiko eremu izendatzearekin nahikoa izango litzatekeela adierazten baitu. Aldiz, bost auzo izendatu dituzte (Abando, Indautxu, Garellano, Alde Zaharra eta Deustu), hiriaren erdigune osoa hain zuzen. Honek zera adierazten du, azalera handiko merkatu, supermerkatu eta kate komertzial handientzako ordutegi askatasunari ateak irekitzea”.
Etxartek azpimarratu du Eusko Jaurlaritzak, merkatu ertain eta txikia babestetik urrun, Bilboko EAJren gogo liberalizatzaileei men egin diela, “dekretua publikatu bezain pronto Lakuari hiriko erdigune osoaren liberalizazioa onartzeko eskatu baitzion”.
“2012ko otsailaz geroztik, hau da, EAJ, PP eta PSOEk, EHBilduren oposizio bakarraz, 8 jai egunetako egutegia aurrera atera zutenez geroztik, EAJk ez du etenik izan kate komertzial handiak bultzatzeko ekimenean, Rajoyren dekretua aitzakia baino ez da, PPk bultzatutako proiektua martxan jarriko du EAJrenaren berdin berdina izanik. Hau guztia, kate handien etekinak handitzea baino ez du ekarriko” deitoratu du Etxartek.
EHBilduren zinegotziak adierazi du neurri honek merkatu txikia babesik gabe uzten duela, “desagerpenera kondenatu eta langileen eskubideak gero eta gehiago kaskartuz. Hau, ordutegien liberalizazioa aplikatu den beste eremu batzuetan gertatu da jadanik, Madril eta Valentzia kasu”.
Azkenik, Etxartek Andoni Aldekoa alkatetzako ordezkariarengana zuzendu da, “merkatu txikiaren gainean etengabe jazarpen politika ezartzen duen arren, haren konpromisoa eskatzen jarraitzen duelarik”, merkatu ertain eta txikiarekiko zein langileekiko EAJren konpromisoa zein dengaldetzeko. Non ote dago kaltetuen aterako diren auzoetako merkatuekiko konpromisoa?”.
Munduko Saskibaloi Txapelketaren harira, EH Bildutik txosten bat osatu dugu Bilbora gerturatu diren ehunka kazetarien artean banatzeko eta Euskal Herriko errealitatearen sarreratxo bat azaltzen duena. Bisitariak Espainiara etorri direla pentsatzen dutela badakigu, eta horregatik, dokumentu honen bidez modu zehatz eta argi batean gure herriaren historia eta bertoko herritarren errealitatea eta egoera politikoa helarazi nahi diegu.
Uda osoan zehar egin izan dugun bezala, Euskal Herriko hiri eta herriak bisitatu dituzten milaka pertsonei gure herriaren errealitatea erakusten eta azaltzen ibili gara. Oraingo honetan, EH Bildutik gauza bera egin nahi dugu nazioarteko hedabideekin, eta azken batean, talde desberdinak animatzera etorri diren zaleekin ere: gure herriak gatazkaren konponbidearekiko duen konpromisoa erakustea eta estatu espainiarretik zein frantsesetik independente izateko erabakia gure herriaren eskuetan dagoela aldarrikatzea.
Eta bide batez, bukatzeko, EH Bildutik ongietorria eman nahi diegu egun hauetan Euskal Herria bisitatzera etorri diren pertsona guztiei eta egonaldiaz disfrutatu dezatela espero dugu.
Alternatiba | Ezkerra eraldatzearen erronka
