Alternatibako kide eta EH Bildu Bilboko zinegotzi Alba Fatuarteren hitzartzea azken udalbatzan indarkeria matxistaren harira eta udal gobernuak haren kontra egiteko borondate faltaren inguruan.

Udalberrik proposatuta eraso matxistei nola aurre egin galderaren inguruan eztabaidatu dugu gaurko Osoko Bilkuran. Udalbatzan entzundakoa oso interesgarria eta beharrezkoa izan da, baina EH Bildurentzat are garrantzitsuagoa plan eta helburu haiek aurrekontu partida zehatzetara eta egutegi konkretu batera lotuta egotea, plan hauek kajoi batean ahaztuta gelditu ez daitezen.

Adibide bat ematearren, uste dugu oso argigarria dela 2010ean landutako Hiri debekatuaren Maparen kasua. 2012an  EH Bildutik Mapa hori burutzeko plangintza bat eskatu genuenean, hau da, planean agertzen ziren ondorioak eta gomendioak aplikatzeko egutegi batera lotutako baliabideak zehaztea eskatu genuenean, PNVren eta PPren ezezkoa jaso genuen Udalbatzar honetan bertan.

Plan hori egin zenetik 5 urte igaro dira, eta joan den astean sexu eraso bat gertatu zen, plan horretan bertan zehazki aipatzen den zonalde eta kale batean (Hermogenes Rojo Kalea). Eta ez hori bakarrik, Udal honek jakin badaki hiri honetan puntu beltz berriak sortzen ari direla, adibidez Isozaki dorretan, eta ez du ezer egin arazo honi aurre egiteko. Eta zerbait egitekotan, gehienetan izaten da erasoak gertatu ondoren; adibidez Iturribide eta Zabalbide arteko kasuan bezala. Puntu hori identifikatuta zegoen aspalditik, emakumeen elkarteek eta mugimendu feministatik ere puntu hori behin baino gehiagotan salatu zuten, baina Udalarentzat ez zen lehentasun bat izan, han sexu eraso bat gertatu zen arte.

Orduan guk ikusten duguna da Udal honek oso intentzio onak adierazten dituela, baina gero, asmo hoiek ez direla lehentasunetan bihurtzen, ez zaizkielako baliabideak bideratzen. Orduan, txostengintza egitea oso ondo dago, baina goazen interbentzio eta egitasmo errealetan gehiago inbertitzera, mesedez.

EH Bilbu Bilbo

Emakumeen duintasunaren aurkako estereotipo sexistak sustatzen dituzten hainbat publizitate kanpaina Bilbao Ekintzak diruz lagunduta egotea salatu eta, egoera hori errepikatu ez dadin, zenbait proposamen aurkeztu ditu Alternatibako kide eta EH Bilduko zinegotzi Alba Fatuartek.

Astebeteko epean, EH Bilduko udal taldeak izaera sexista duten bi publizitate kanpaina salatu behar izan ditu, biak Bilboko Udalak diruz lagunduta, Bilbao Ekintzaren bidez.

Bi kanpaina hauetan argi azalarazten da publizitatean gehien erabilitako estereotipoetako bat: Emakume Modeloarena, alegia. “Emakume hau objektu eder baten itxurapean aurkezten digute, bere ardura bakarra polita izan eta bere burua nabarmentzea delarik. Iragarki hauetan emakumeen balore intelektualak ukatu egiten dira soilik bere itxura fisikoarekin arduratuta dagoenaren irudia sustatuz. Iragarki hauek sinestarazi nahi dute gizartean arrakasta izateko emakumea ederra izan behar dela. Ez dezagun ahaztu horrelako mezuek gazteengan osasun psikiko eta fisiko ugari eragiten dituztela. Horra, adibidez, anorexia edo bulimia. Horretaz gain, irudi hori errealitatetik urrun dago eta emakumeekiko errespetu falta itzela azaleratzen dute”, salatu du Alba Fatuarte zinegotziak.

“EH Bilduk Santutxu Stock kanpaina salatu ostean, hau bertan behera geratu zen. Egun gutxira Bilbao Shopping Night kanpainaren berri izan genuen eta gure salaketaren harira antolatzaileei Begira Dekalogoa igorri zitzaien mezu elektroniko bitartez. Kasu honetan kanpainari eutsi zioten. Horrek agerian uzten du egoerak erantzun integral bat eskatzen duela”, gaineratu du Fatuartek.

EH Bilduk beti defendatuko du gure hiriaren merkatari txikien jarduera sustatzeko kanpainak diruz laguntzeko beharra, baina inoiz ez kanpaina horiek estereotipo sexistetan oinarritzen badira. Izan ere, Berdintasun Legea betearazi behar duenak ezin die horrelako kanpainei sostengurik eman.

Guzti honengatik uste dugu arazo honi eman beharreko erantzuna, ez dela soilik kontrolaren bidetik etorriko: pedagogia, azterketa eta jarraipen lanetik baizik. Soilik horrela ziurtatu ahal izango dugu emakumeen duintasunaren aurka doazen publizitate kanpaina sexistarik berriro ez argitaratzea.

Ildo horretatik abiatuta, mozioa aurkeztu dugu, urriaren 29an izango den Udalbatzarrean eztabaidatu dadin. Proposamenean gobernu batzordeari agintzen diogu Udalak diruz lagundutako publizitate kanpainen jarraipen eta analisia gauzatzeko lan plangintza bat abian jartzea eta hauetan sexismoaren erabilera antzemateko eta eragozteko tresnak artikulatzea. Bestetik, iragarki hauen kudeaketaz arduratuko diren entitate eta enpresei zuzendutako aholkularitza programa bat martxan jartzea proposatzen da. Azkenik, publizitate sexistarekin zerikusia duten salaketak jasotzeko tresnak abian jartzea ere berebizikoa dela uste dugu. Proposamen eta neurri guzti hauen helburua estereotipo sexistak sustatzen dituzten kanpainak edota emakumeen duintasunaren aurkako irudiak diru publikoz ez ordaintzea da.

EHBildu Bilbo

Aurreko astean Santutxun egindako kanpaina sexista salatu zuen Alternatibako kide eta EHBilduko zinegotzi Alba Fatuartek. Kanpaina bertan behera geratu da.

Joan den astean Santutxuko merkataritza sustatzeko kanpaina sexista baten berri izan genuen. Irudian maniki itxurako hainbat emakume agertzen ziren. Arropa erostea ardura bakarra duen pertsona bat bezala irudikatzen zuten emakumea. Oso larritzat jo genuen horrelako kanpaina bat abiaraztea eta salatu egin genuen.

Hala ere, are larriagoa iruditu zitzaigun kanpaina horrek Bilboko Udalaren eta Eusko Jaurlaritzaren babesa jaso zuela jakiteak. Izan ere, Berdintasun Legea betearazi behar duenak ezin ditu horrelako iragarkiak babestu.

Salaketa horren ondorioz kanpaina bertan behera uztea erabaki dute. Horretaz gain, ematen dituzten diru-laguntza guztietan berdintasunarekin zerikusia duten klausulak indartuko dituzte.

EHBildu Bilbo