Etiketa: Bizkaia

Urkulluk azaldu behar du zein izan den bere esku-hartzea Iurbenor auzian, susmo guztiak argitze aldera

EH Bilduk galdera zuzena egingo dio lehendakariari Legebiltzarrean, “Jabyer Fernandezen akusazioak oso larriak direlako eta, egiazkoak izanez gero, ustelkeria afera baten aurrean egongo ginatekeelako”.

Egunotan Bizkaian epaitzen ari den Iurbenor auzian Jabyer Fernandez enpresariak Iñigo Urkulluren eta EAJren aurka egindako akusazioen larritasuna kontuan hartuta, EH Bilduk ezinbestekotzat jotzen du lehendakariak horren inguruko azalpenak ematea. Hori dela eta, hilaren 18an egitekoa den kontrolerako osoko bilkuran galdera zehatza egingo dio, “Urkulluk argi eta garbi azaldu behar duelako auzi horretan aipatzen ari diren proiektuetan izan duen esku-hartzea eta zertan gauzatu den, esku-hartze hori benetan egon bada. Argibide guztiak eman behar ditu, bere gain jaurtitako susmo guztiak argitze aldera”, Unai Urruzunok eta Oskar Matutek adierazi dutenez.

Jabyer Fernandezek bere negozioen eta EAJko buruzagi batzuen artean “zehaztu gabeko faboreak trukatu direla” aitortu duela gogora ekarri dute EH Bilduko legebiltzarkideek, eta nabarmendu dute “zantzuak oso larriak direla eta, akusazioak egiazkoak izanez gero, ustelkeria afera baten aurrean egongo ginatekeela”.

Edonola ere, EH Bilduren iritziz, “Iurbenor auzia herri honetan urteetan lurzoru eta etxebizitzarekin egin den politikaren paradigma argia da, negozio pribatuen inguruan izugarrizko sarea sortu duena, alderdi politikoak eta erakunde publikoak nahastuz”. Matuteren eta Urruzunoren hitzetan, “oso kezkagarria da botere publikoek Europa osoan zalantzan dauden enpresa-eredu zehatz batzuekin harremanak izatea, enpresa-eredu horiek izaera espekulatibo hutsa dutelako eta interes orokorretik oso urrun daudelako”.

EHBildu

Berriak

Getxoko Udala: Gardentasuna? Gobernu ona? Kudeaketa ona?

Kurtso berria dugu baina Getxoko udalean duguna ez da batere berria. Pasa den uztailaren 12ko Getxoberrin, Getxoko EAJren Gobernua, Udal honen eta bere Erakunde Autonomoen gardentasuna eta burutzen ari diren kudeaketa ona saltzen saiatu zen. Harro sentitzen zen, Herri-Kontuen Euskal Epaitegiaren arabera (HKEE), Euskal Autonomi Erkidegoko lehen 25 Udalen barruan eta Bizkaiko 6garren udala izatea, zeinaren bere kontu publikoek ez duten hutsik aurkezten. Ba susmatu bezala, mitoa erori da. Aipatutako Epaitegiaren kontu-ikuskaritzak egindako behin behineko txostenek (2011ko ekitaldiei dagozkiena), argi erakutsi eta ziurtatzen dute gardentasuna opakutasunarekin nahasten dela eta gobernatze ona eta kontrolatua nahasmen hutsarekin.

Herri-Kontuen Euskal Epaitegiak 2011ko ekitaldiei dagozkien txostenak aztertuz, honakoarekin topo egiten dugu.

 

1. PLANIFIKAZIO GABEKO ETA GUZTIZ PREKARIOA DEN PERTSONAL POLITIKA:

Aipatutako txostena aztertuz, aldi baterako lanaz abusatzen duen politika batekin topo egiten dugu, lan baldintzak ezegonkortzen dituena, ilegalitateetan erortzen dena, lan harremanak epaitegietan bukatzen dutenak,  eta langileari itxaropen faltsuak sortzen dizkiona.

Hainbat adibide:

a.- Udalean 20 langile mantentzen dira (15 gehiago Kultur Etxean, 45 Nagusien Udal Egoitzan eta 4 Musika Eskolan), aldi baterako obra kontratuekin  (batzuek 1999 aurretik), “finko mugagabe” bihurtu direnak eta gure ustez, eta indarrean dagoen legeari eutsiz, langile finko izan beharko liratekeenak. (txosteneko  II.1.3 atalean, 14. orrialdean)

b.- Udaleko Lanpostu- Zerrendan (LPZ) 19 lanpostu daude aurrekontuan diru-hornidurarik ez dutenak. (txosteneko  II.1.3 atalean, 14. orrialdean). zer egingo dute gure kudeatzaileek?, lanpostu hauek amortizatu eta Lan Eskaintza Publikora (LEP) zuzendu?

c.- Izendapen askeko lan-postu: 5 (nahi erara). Hauetako 3 Justizia Auzitegiak baliogabetuko ditu.  (txosteneko  II.1.3 atalean, 14. orrialdean). 

d.- Nagusien Udal Egoitzan, 188 lan kontratu egin ziren 13 langilerentzat 2002ko lan poltsak erabiliz, deialdietan publizitaterik gabe eta Funtzio Publikoan oinarri diren berdintasun, meritu eta gaitasun printzipioak baztertuz  (txosteneko  II.1.2 atalean, 9. orrialdean). 

e.- 2011. urtean Nagusien Udal Egoitzan 838 aldi-baterako lan kontratu egin ziren 73 langilerentzako eta erabili ziren lan poltsa batzuk 1999 urte aurretikoak ziren (txosteneko  A22 eranskinean, 9. orrialdean). Urte horretan Egoitzak 113 langile zituen eta haietatik 84 aldi-baterakoak ziren.

Nola justifikatuko dute nahasmen hau? Esanez zuzentzen ari direla 2010tik egiteke duten Lan Eskaintza Publikoarekin? EAJren Gobernu Taldeak oinarrizko lan eskubideak errespetatu beharko lituzke, langile guztien lan egoera erregularizatuz eta kalitatezko enplegu publikoa sortuz.

 

2. OBRA ETA ZERBITZUEN KONTRATUETAN GAIZKI EGINAK:  

HKEEk salatzen dituenak honakoak dira:  konkurrentzia eta publizitate printzipioak betetzen ez dituzten zerbitzu, obra eta azpikontraten kontratuak; %86raino bere prezioa igotzen duten zerbitzu eta obren esleipenak; gaizki kalifikatzen diren kontratuak eta beraz, euren kalifikazio eta iraupen legala betetzen ez dutenak; Osoko Bilkuretatik ebasten diren erabakiak; azpikontratazio ilegalak; zenbait kasutan eskaintza ekonomikoenak zigortzen dituzten esleipen sistemak, txarto aplikatutako fidantzak …  

HKEEk salatutako adibideak:

a.- Esleipen prezioa izugarri igotzen dituzten kontratuak, esleipen prezioa desitxuratzen eta beraz lizitazio bera ere bai. Adibidez: Getxo Antzokiko 2. Faseko obrak 2,9M €tik 3,773M €ra pasatzea (%30 baino gehiago), proiektu obraren zuzendaritza eta proiektuaren erredakzioa esleipenean 1,1 M€ izatetik 2,047 M€ izatera (%86 baino gehiago), Erromoko kolektorea berritzeko obra 902.982€tik 1,369 M€ra pasatzen da  (%51 baino gehiago). (txosteneko A.16.1 eranskinean, 60. orrialdean).  Zuzenean esleitutako 1,5 M eurokogastuak publizitatearekin negoziatutako prozedura erabiliz bideratu behar zirenak (txosteneko A.16.2 eranskinean, 63. orrialdean). 1,459 M€ko gastuak kontratu txiki modura bideratuak lizitaziora atera behar zirenak (txosteneko A.16.1 eranskinean, 60. orrialdean). 

b.- Publizitate barik eta negoziaketen bitartez esleitu zen Etxe Sorginduaren berritzearen kontratua 998.029 eurotan. Hemen ez zen frogatu esleipena jaso zuen enpresak bakarrik egin zezakeela. (txosteneko  II.1.1 atalean, 7. orrialdean). Geroago, legeria hautsiz, exekuzioa epez kanpo luzatu zen horretarako aurretiko luzatzea onartua izan gabe. (txosteneko  A.16.1 eranskinean, 60. orrialdean)

c.- 26,9 M eurotan esleitutako 9 kasutan kontratuak baloratzeko eta esleitzeko formula matematikek, eskaintza ekonomikoenak zigortzen ditu.  (txosteneko III.1.4 atalean, 15. orrialdean). Kultur Etxeari dagozkion kontratazio espediente guztietan, kontratazio mahaia behar bezala osatuta ez egoteagatik, hainbat hutsune atzematen dira administrazio agirien irekitzeari dagokionez , baita formula baten bidez kuantifikatu ezin diren irizpideei dagozkien agirietan (txosteneko III.2.2 atalean, 18. orrialdean).

d.- Hiri Garbiketa eta Zaborren Batzearen kontratuaren luzapena Gobernu Batzordeak onetsi zuen, onespen honen ardura Osoko Bilkurari zegokiolarik (txosteneko II.1.1 atalean, 7. orrialdean).

e.- Parke eta Lorategien mantenuaren kontratua 2006ko Ekainaren 20ean esleitu zen 1,8M eurotan 6 urterako iraupenarekin, administrazio kontratu berezi  modura, argi dagoenean zerbitzu-kontratu bat dela eta beraz, bere iraupen legalak ezin duela 4 urte baino gehiagokoa izan (txosteneko II.1.1 atalean, 7. orrialdean).

Epaitegiaren txostenean adibide gehiago agertzen dira baina ez dugu nahi gehiegi luzatu. Guretzat oso larria da herritarren dirua gaizki erabiltzea eta irregularrak diren kontratuak burutzea. Azken finean, kontratu hauek kontu ilunetaz eta faboreen kontratuetaz pentsatzera garamatzate. Kontratazioan gardentasuna beti exijituko dugu, are gehiago, herriaren ekonomia baldintzatzen duten proiektu handien kasuetan. 

 

3. JUSTIFIKATU GABEKO KOPURUAN ADOSTU ZEN PUNTA BEGOÑAKO HOTELAREN KONTRATUAREN APURKETA:

PUNTA BEGOÑAKO GALERIETAKO hotelaren kontratuaren amaieraz Epaitegiak adierazten du Udal Idazkariak kalte ordainaren kopurua negoziatu zuela, Udal Kontu-hartzailearen iritziaren aurka. Udal Kontu-hartzailearen iritziz aditu batek aztertu beharko lukeen Barceló enpresaren ospa egiteak Getxoko Udalean sortutako eragin ekonomikoa. Aditu horrek baloratu behar zuen Barcelók eman zuen dirua: 1,2M euro (jarritako fidantza 8,6M eurokoa zen) arrazoizko balioa ote zen kalte ordaina bezala. (txosteneko III.1.4 atalean, 16. orrialdean).  Udal Idazkariak, estatuko funtzionarioa eta bere eginkizunen artean udalean egiten diren gauzak legalak izatea zaindu behar duenak, Udal Kontu-hartzailearen gomendioen kontra NEGOZIATU ZUEN.

Jakin nahi dugu: zergatik ez zaio kasurik egin Kontu-hartzaileari? zein kaudimen edo formaltasun profesionalarekin negoziatu du Idazkariak? zeintzuk izan dira erabilitako irizpideak baloratu ahal izateko udalari eragindako kaltea? zer nahi dute jendeak pentsatzea arrazoitu gabeko 7,4 M euroko beherapenaz?

 

4. MUGARIK GABEKO AZPIKONTRATAZIOAK:

Zerbitzu kontratuei buruz Epaitegiak, besteak beste, ondoko irregulartasunak ikusi ditu:

a.- Udal Gobernuak 2010ko uztailaren 20ean bilketa kudeaketan zerbitzu osagarrientzako kontratua esleitu zuen 3,6 M eurotan eta 4 urteko iraupenarekin. Udalak aipaturiko kontratuan azaltzen diren zerbitzuen berrikusketa egin beharko du, zerbitzu horietako baten batek autoritate-ariketarik behar duenentz. Hala balitz, udaleko funtzionarioek soilik egin ahalko lukete lan hori.  (txosteneko III.1.4 atalean, 16. orrialdean). Guk argi dugu, autoritate-ariketa behar duela eta beraz ezin dela azpikontratatu. Bestalde, gogoratu behar dugu 2011ko ekitaldian, kobratu gabeko zergengatik 7,7 M€ hornitu zirela diruzaintzako soberakinetik. Honek argi erakusten du kontratatutako zerbitzuaren eraginkortasun eza.   

b.- Aztertutako obra espediente guztietan ez dago proiektua gainbegiratzen duenaren txostenik.  (txosteneko III.1.4 atalean, 15. orrialdean).

c.- Aztertutako kontratazio espediente guztietan, bai administrazio agirien irekieran baita formulen bidez kuantifikatu ezin daitezkeen agirietan, Kontratazio Legea betetzen ez duen Mahi Kontratazio ordezkatze bat dago (txosteneko III.1.4 atalean, 15. orrialdean).

Gobernu Taldeak zerbitzu publikoen azpikontratatzearen alde nabarmen egiten du, baita legeak onartzen ez dituen kasuetan ere. Horrez gain, ez du azpikontraten lanaren segimendurik egiten eta zerbitzu edo obraren kontrola enpresa beraien eskuetan uzten du.

 

5. UDAL BALANTZEETAN IBILGETUA ZENBATEKOA DEN EZAGUTZEKO EUSKARRIRIK EZ:

Txosteneko II.2 ataleko 11. orrialdean Epaitegiak esaten du ez dagoela euskarri egoki eta nahikorik Udaleko eta Erakunde Autonomoen balantzean jasotzen den ibilgetuaren kopurua ezagutzeko eta honegatik ezin da jakin erreala ote den Balantzean agertzen den 2011ko Abenduaren 31rainoko ondasun eta eskubideen egoera. Beraz, ibilgetua amortizatzeko, Galdu-Irabazien kontuetan jasotako diru kopurua egokia den ez dakigu eta ondorioz zalantzagarria da udal estatu finantzarioa (hau eta aurreko beste hainbat ohar, HKEEk 2003ko ekitaldiari zegozkion txostenetan aipatzen zituen). Bestaldetik, Epaitegiak Udalak Udal Lurzoru Ondarearen erregistrorik ez duela salatzen du (Txosteneko II.2 ataleko 11. orrialdean) .

Non gelditzen dira Ondarea, Egoera Finantzarioa eta Udalaren Emaitzen irudi leialaren printzipioak, kontabilitate ororen oinarrizko irizpide direnak?

 

ONDORIOA: HIRITARREN PARTE-HARTZE EZA

Aurreko atalean 35 ez-betetze baino gehiago aipa genitzake, baina hala ere uste dugu idazki honetan esandakoekin nahikoa dela argiro ikusteko Getxoko udal kudeaketan dagoen gardentasunik ezak dakartzan ondorio kaltegarriak. Izan ere, adierazi behar dugu edonorentzat eskuragarri jartzeko asmoa dugula idazki honetan aipatutako EHEEren txostenak.

Egia esan, GETXOko EHBILDUn ez genituen EHEEren txostenak behar ondorioztatzeko udal kudeaketa oso opakua eta irregularra dela. Egunez egun ikusten ditugu hiritarrentzat itxita dauden batzar informatiboak, datuen ostentze eta manipulatzea, erantzunen berandutzea, dokumentazioa lortzeko zailtasunak, zerbitzu publikoen pribatizaziorako obsesioa, etxebizitza publikoen politikarik ez izatea eta ekimen pribatuaren eskutan soilik uztea, laster datorren Udal Erregelamendu Organikoaren erreforman hiritarrei audientzia eta hitza emateko gure eskariari eman dioten ezetza. Honek guztiak opakutasunez, nagusikeriaz eta  ilunkeriaz  osatutako koktel bat dakar, udal bizitzan hiritarrek parterik ez hartzeak ahalbidetzen duena.

GURE PROPOSAMENA

Idazki honen helburua ez da soilik datuak, moduak eta udal gobernuak egiten duen kudeaketa txarra argitara ematea. Berez ez litzateke ezertarako erabilgarri, eskandalurako ez ezik, baina ez litzateke arazoaren irtenbide. EHBILDUren uste sendo eta konpromisoa da soilik demokrazia zuzena eta parte hartzailearen indartze eta bultzadak eta horrekiko hiritargoaren konpromisoak zuzendu ditzakeela salatutako moduko egoerak, udal mailan zein horretatik kanpo eskandaluz eskandalu gabiltza eta denon artean ordaintzen ditugu horien kostuak: prestazioen murrizketak (osasungintzan, pentsioetan, kulturan, hezkuntzan, babes eta elkartasun sozialean azken batean) eta askatasun zein eskubideen murrizketak.

Hiritargoari, era guztietako elkarteei (kulturalei, politikoei, sindikalei, etorkinenei, feministei, ekologistei, kirol arlokoei,…), PNVko eta gainerako partiduetako afiliatu eta boto-emaileei,  (PNV, PSOE eta PPko zinegotziak Udal Erregelamendu Organikoaren berrikuntzan hiritarrek udal organoetan parte hartzearen aurka azaldu baitira) dei egiten diegu gure herrian hiritargoak udal kudeaketan parte har dezan mugimendu bat sortzeko, kudeaketaren gardentasuna helburu, kontsultiboak soilik izango ez diren parte hartzerako guneak sortzeko, eta batez ere, udal gai estrategikoetan herri kontsulta egingarri bihurtuko duena.

Atxikitako dokumentoak:

Getxoko Udalaren 2011ko fiskalizazio lanaren ondorioak (Herri Kontuen Euskal Epaitegia)

Herri kontuen Euskal Epaitegiak Getxoko Udalaren 2011ko ekitaldi fiskaleko txostenean ageri dituen irregulartasunak

http://alternatiba.net/old-files/Ayto. de Getxo TVC P ejercicio 2011.pdf

Berriak

EHBilduk errenta irregularren araudia moldatzeko eskatu du, gehien duenak gehiago ordain dezan eta gainontzeko alderdiek baztertu dute

EH Bilduk Pertsona Fisikoen Gaineko Zerga (PFGZ) moldatzea eskatu du gaur Bizkaiko Batzar Nagusietan “gehien dutenek gehiago ordaindu dezaten”. Zehazki, errenta irregularrei dagokien araudia moldatzeko eskaera da koalizioak aurkeztu duena eta errenta horiei aplikatzen zaien abantaila fiskalei muga bat jartzea proposatu du.

Araudiak errenta irregular gisa kontsideratzen ditu bi urte baino gehiagoko epean sortutako irabaziak edota denboran aldizkakotasunez lortu ez direnak. Irabazi pilatu horiei ez zaie PFGZren tipoa osorik aplikatzen, kopuruaren %50a edo %60a soilik, kasuaren arabera.

Asier Vega EH Bilduko batzarkideak adierazi duenez, errenta irregularren salbuspenak beharrezkoak dira. “Gainontzean, hainbat urtetan lan egindakoa urte bakarrean aitortzen bada, zergaren progresibotasunaren ondorioz, behar baino gehiago ordaindu beharko litzatekeelako. Hori gertatu ahalko litzateke, adibidez, finikitoekin”. Aldiz, Vegak nabarmendu duenez, egungo araudiak ez du inolako sabairik zehazten abantaila fiskal horretaz baliatu daitekeen diru kopuruari eta hala, Bizkaiko Aldundiak elusiorako zirrikitu garrantzitsu bat zabalik uzten duela salatu du. Hori dela eta, errenta irregular gisa aitortu daitekeenaren gehiegizko kopurua ezartzea proposatu du EH Bilduk eta muga hori 300.000 eurotan zehazteko ekimena eraman du Batzar Nagusietara.

Elusiorako bide denaren adibide gisa, elite kirolarien kasua aipatu du EH Bilduk, errenta irregular gisa tipifikatzen baitira eta ez dira osorik zergapetzen. Demagun beraz Bizkaian errenta aitorpena egiten duen futbolari profesional batek bi milioi euro irabazten dituela. Egungo araudia aplikatuz, kopuru horren erdiari ezarriko litzaioke soilik PFGZ. Hau da, milioi bat eurori. Aldiz, EH Bilduren proposamenarekin, salbuespena gehienez 300.000 euroko kopuruari aplikatuko litzaioke, eta beraz, 1.850.000 euro zergapetuko lirateke.

EHBildu Bizkaia

Berriak

Bizkaiko Batzar Nagusiek Gizarte Larrialdirako Laguntzak bermatzeko eskatu diote Jaurlaritzari EH Bilduren ekimenez

Bizkaiko Batzar Nagusiek Eusko Jaurlaritzari Gizarte Larrialdirako Laguntzak bermatzeko eskatu diote. EH Bilduk aurkeztutako ekimenak aurrera egin du eta Jaurlaritzari dei egiten dio “2013. urtean zehar jasoko diren Gizarte Larrialdietako Laguntzen eskaera guztiak asetzea berma dezala”. Horrez gain, “2014. urteko aurrekontu proiektuan, gutxienez, eskaera guztiak betetzeko diru-partida ziurta dezala” eskatzen dio.

Koalizioaren ekimenak PSEren babesa jaso du. EAJk eta PPk, ordea, ez dute neurriarekin bat egin eta abstenitu egin dira.

EH Bilduko batzarkide Amaia Agirresarobek “egindako hanka sartzea konpontzeko” eskatu dio EAJri eta Jaurlaritzak “dituen ardurak bere gain hartu” behar dituela nabarmendu du. “Orain udaletxeek euren poltsikotik jarri behar dute dirua gero zeta handiagoa den eskariari erantzun ahal izateko baina denek ezingo diete horri aurre egin”.

Gizarte Larrialdietarako laguntzak alokairua ordaintzeko, hipoteka ordaintzeko eta bizitzeko oinarrizkoak diren beharrak asetzeko zailtasunak dituztenei zuzentzen zaizkien laguntzak direla hartuta, Agirresarobek “arduragabekeria” gisa ezaugarritu du laguntzak eteteko Jaurlaritzaren erabakia. “Oraindik lau hilabete falta dira urtea amaitzeko eta laguntza eskatzen ari diren pertsonak ezin duten babesik gabe geratu”.

EH Bilduko batzarkideak EAJren jarrera salatu du “pobreziaren hazkundea eta gizarte bazterketa” sustatzen dutelako. Dena den, EAJren erabakiak ez du harritu “aukera izan duen bakoitzean murrizketei bide eman eta bultzatu dituelako”.

Koalizioaren eskariak PSEren babesa jaso du. Aldiz, EAJ eta PPk ez dute bat egin eta abstenitu egin dira.

Eskariak Jaurlaritzari dei egiten dio 2014ko aurrekontuetan laguntzak bermatzeko diru partida ziurtatzera.

EHBildu Bizkaia

Berriak

EHBilduk bi proposamen aurkeztu ditu Bizkaian EJZ eta OHG zergak aldatuz politika fiskal justuagoa eta progresiboagoa lortzeko

EHBildu Udal Taldeak hurrengo udalbatzarrerako, hilak 25, aurkeztu dituen bi proposamenen berri eman du gaur goizean. Proposamen hauekin, gehien duenak gutxiago ordaintzean oinarrituta dagoen Bizkaiko politika fiskal atzerakoiaren baitan aldaketak sartu nahi ditu. Ana Etxarte zinegotziaren iritziz, proposamen hauekin “egoerari buelta eman” nahi zaio eta “justuagoa eta progresiboagoa den politika fiskal bat lortu”.

Aurkeztutako lehenengo proposamenak, Bizkaiko Batzar Nagusiei eskatzen die Ondasun Higiezinen Gaineko Zerga doitzen duen Foru-Araua alda dezala eta etxebizitza hutsaren kontzeptua defini dezala, honela udalei etxebizitza hutsetarako %150en gainordaina jartzeko aukera emateko.

Bilbon etxebizitza-arazo larri bat dagoela adierazi du Etxartek. “Udal-Etxebizitzetan 9.000 pertsona alokairu sozialeko etxebizitza eskuratzeko itxaroten duten bitartean, Udalak 15.567 etxebizitza huts ditu zenbatuta”, aipatu du.

“Ondasun Higiezinen Gaineko Zergan, etxebizitzaren okupazioaren arabera karga-tipo desberdinak ezartzea edo etxebizitza hutsetarako gainordaina ezartzea dugu helburu, etxebizitzak alokairuko merkatuari bideratzeko bultzada bat izango baita”, EHBilduko zinegotziaren aburuz.

Aldakatea hau jada Gipuzkoako Batzar Nagusiek onartu dute eta Donostia, Hondarribia, Irun, Oñati edo Tolosa, besteak beste, aukera honetaz baliatu dira gaionardainak aplikatzeko. Aipatutako udaletatik, EAJk Hondarribin gobernatzen du eta PSEk Irunen; beraz, Etxarteren aburuz alderdi hauek ez lukete inongo objekziorik izan beharko mozio honen alde agertzeko.

Aurkeztutako bigarren mozioa ere, Batzar Nagusiek arautzen duten Ekonomia-Jardueren Gaineko Zergarekin (EJZ) erlazionatuta dago. EHBildu, Batzar Nagusiengana zuzendu da zerga hau arautzen duen Foru-Araua aldatzeko. Egun 2 milioi euroko operazio-bolumena gainditzen ez duten enpresak libre daude zerga hau ordaintzeaz; horregatik, salbuespen hau milioi bat euroko operazio-bolumena duten subjektu pasiboentzako izatea eskatu du.

“Honela, Udal honen Ekonomia Eta Ogasun Sailaren datuen arabera, 773 subjektu pasibok zergak ordaintzeko beharra izango lukete, udal-sarrerak nabarmen handituz. Udalak honela, baliabide gehiago izango lituzke eta EAJren gobernuak ez luke egingo zerbitzu publikoetan egiten ari dena, murrizketak alegia. Adibide batzuk jartzearren, Bilbon bizi garenok ez genuke ikusiko autobusen maiztasuna nola murrizten den edota udal anbulantzien zerbitzua nola %50an murrizten den”, adierazi du Etxartek.

“Ez dugu ulertzen zergatik Bilboko hiritarrok zergak eta tasak ordaindu behar ditugun gure egoera ekomikoa kontutan izan gabe, zaborrengatik, uragatik, etxebizitzagatik… ordaintzen dugun bitartean, enpresa batzuk EJZ ordaintzeaz libre daude. Proposamen honekin faborezko tratu hau desagertzea bilatzen dugu”,esan du.

EHBildu

Berriak

EH Bilduk Bizkaibuseko proiektua eragile sozial eta Udalekin batera berregiteko eskatuko dio Aldundiari

Bizkaibuseko proiektuak eragin duen gatazka herritarrei bizkar emanda diseinatu izanaren ondorio zuzena da EH Bilduren iritziz. Gizarte eragile, sindikal, udaletxe eta herritarren parte hartzerik gabe osatu baita proiektua. Aldundia alegazioak biltzera mugatu da soilik eta ez du horietako ia bat bera kontuan hartu.

Begi bistakoa da Aldundiaren jokaerak hainbat gizarte eragile eta sindikaturengan sortu duen haserrea. Gainera, hainbat Udalek adierazitako beharrei erantzun gabe jarraitzeko hautua egin du Foru Aldundiak.

EH Bilduren ustez, guztiz arduragabea da zerbitzu etenek eragingo duten kaltearen errua Bizkaibuseko langileei leporatzea. Are gehiago, Aldundiak berak langileek egindako proposamenak kontuan hartzeari muzin egin dionean (bai lan baldintzei nahiz zerbitzuari dagokienean) eta gainera, zerbitzuak murrizteko hautua eginez, herritarrak kaltetzeko erabakia berak hartu duenean.

Bizkaibusentzako proiektua egiterakoan Aldundiak bi lehentasun izan beharko lituzke besteen gainetik EH Bilduren iritziz:

·         Herritarren eskari eta beharrei erantzungo dien kalitatezko garraio publiko zerbitzua lortzea.

·         Zerbitzu publikoan lan baldintza duinak bermatzeko neurriak hartzea.

Bizkaiak beste garraio eredu bat behar du eta beste kudeaketa eredu bat. Guztion baliabideak gizartearen egiazko beharrei erantzuteko erabiliko dituena.

EH Bilduk Bizkaibuseko sindikatuek iragarri dituzten mobilizazioak babesten ditu eta gizarte osoari, gizarte eragileei eta Udalei dei egiten diegu kalitatezko zerbitzu publiko baten aldeko jarrera hartzera.

Zentzu horretan, EH Bilduk urgentziazko Arauz Besteko Proposamena erregistratuko du Batzar Nagusietan, Foru Aldundiak Bizkaibuserako proiektua berregin dezan eskatuz. Gizarte eragile, sindikatu, agente politiko eta Udalekin batera abiatutako elkarrizketa eta parte hartze prozesu baten bidez egindako proiektua eskatuko du koalizioak, helburua Bizkaibuseko lan baldintzen inguruan eta eskaini beharreko zerbitzuaren gainean adostasun zabala lortzea izango delarik.

Berriak

Alternatibak kaleak hartzen jarraitzera deitu du estatuaren gainbehera agerian uzten duten politika totalitarioen aurrean

Alternatibako bozeramaile nazional Oskar Matutek azken egunetan Carlos Urquijo Espainiako Gobernuko EAEko ordezkariaren eta zenbait elkartek, “eskubide ukatzaileak eta PPren ildokoak” Bilboko Aste Nagusiaren harira erakutsitako jarrera salatu du, bere ustez, “Espainiako estatuak bizi duen gainbehera politikoa agerian berriz ere utzi baitute”.

Alderdi ezkertiarrarentzat, Urquijok Bilboko jaiak tresna gisa erabili nahi izan ditu, “bere apustu totalitarioaren mesedetan, parte-hartze sozial eta demokratikoarekin zerikusia duen guztia desagerrarazteko helburuarekin, Euskal Herriko gizartea guztiz kontra agertzen den arren pentsamendu jakin bat inposatzeko lanean ari baita”.

Guzti horregatik, Matutek ezinbestekotzat jo du “kaleak hartzen jarraitzea, parte hartzen jarraitzea eta politikagintzarekin aurrera egitea”. Hala, Euskal Herriko gizarteari dei egin dio EHBilduk bihar Bilbon deitutako manifestazioarekin bat egitera, Sasi guztien gainetik Euskal Herrialemapean Moyua plazatik eguerdian abiatuko den martxarekin bat egitera. Esan duenez, “Euskal Herriaren esku, bere burujabetzaren bitartez, herri berria eraikitzeko beharra aldarrikatuko da bihar; herri demokratikoa eta justua: herri berri bat, behetik eta ezkerretik eraikia”.

Berriak

Bilboko Aste Nagusian gertatutako eraso sexista salatzeko protestarako deia egin du EHBilduk

Bilboko Aste Nagusian joan zen igande gauaz beste eraso sexista bat gertatu zen. Beste behin ere, emakumeenganako edozein indarkeria adierazpen salatu nahi du EH Bilduk, bai izaera fisikoa dutenak, izaera sexualekoak edo psikologikotik haratagokoak. Horretarako, indarkeria matxistaren kontrako ardura soziala eta politikoa gure gain hartzeko konpromisoa hartzen dugu. Halaber, emakume eta gizonen arteko berdintasunean oinarritutako jendarte eredu berri baterantz bide egiteko, emakumeen aurkako indarkeriari amaiera emateko bide bakarra dela azpimarratu nahi dugu.

Hau dela eta, gaur asteartea, 18.00etan. Arriaga Plazan, Bilboko Konpartsek deituriko elkarretaratzearekin bat egiten dugu eta bertara joateko deia zabaltzen dugu.

Ez dugu eraso sexistarik onartuko, ezta Aste Nagusian ere!

 

 

Berriak

Sotanak eta arrosarioak Aste Nagusian

Ana Etxarte – Alternatibaren Bilboko Asanblada

Gizarte bat benetan berdintasunean oinarrituta dago, ez bakarrik berdintasuna erretorikaz defendatzen duenean; berdintasun hori efektibo egingo dituen jarduera politikoak, prozesuak eta ekimenak martxan jartzen dituenean baizik. Zoritxarrez, egun bizi dugun garai honetan, administrazio publiko askok berdintasunaren bermatzaileak izan beharrean, ez adituarena egin eta boteretsuen interesei men egiten diete.

Boteretsu hauen artean Eliza Katolikoa dago, bere doktrina beste doktrinen gainetik kokatzeko betiko gogo biziaz, erakunde publikoak bere estrategiaren parte-hartzaile zuzenak bihurtzen dituena. Horrela, eta gizarte laiko eta akonfesionalean bizi bagara ere, administrazio asko eta asko diraute erritu erlijiosoak, katolikoak gehien bat, bultzatzen eta hauetan parte hartzen, betiere, aurretik aipatutako akonfesionaltasun, laikotasun eta berdintasun oinarriak ezerezean utziz.

Honen adibide argia, behin eta berriro, Bilboko Udala dugu. Orain dela hilabete batzuk, harriduraz Bilboko Aste Santua Interes Kulturaleko Ondasuna aitortzeko EAJ eta PP kontserbadoreen – PSEren ez beharrezko abstentzioaz lagunduta – arteko hitzarmen baten lekuko izan ginen; Udalaren lokaletan eta eremu publikoetan hileta zibilak ospatzeko proposamena atzera botatzen zuten garai berdinean.

Zerrenda luze bateko bi adibide baino ez dira hauek, eskuinak konfesio erlijioso zehatz baten -katolikoa- interesekiko “egiten uzteko” ohitura agerian uzten duena, tradizio katolikoetatik geroz eta urrunago dagoen gizarte baten kontra eginez, sinesbide eta erlijio aniztasuna dagoen arren.

Preseski, sinesmen aniztasun honekiko errespetu kezkatsuak bakarrik, inolako lehentasunik gabekoa, ahalbidetuko luke berdintasunean, pluraltasunean eta baldintza berdinetako bizikidetzan oinarritutako gizarte bat. Laikotasunak, batzuek sinestarazi nahi digutenaren kontra, ez du erlijiozkotasuna gaitzesten, ez eta konfesio erlijioso baten aritzea eragozten, guztiz kontrakoa baizik; erlijio pluraltasuna bermatzen du, beti ere, praktika hau esparru pertsonal eta pribatura mugatzen bada.

Oraindik ere, Bilboko Udalak publikoa pribatuarekin nahastearen alde egiten du apustu, sinesmen batzuen nagusitasuna besteen gainetik jarriz eta ohitura katolikoak agerraldi publikoetan sartzeko erabaki konfesional hori mantenduz.

Honen adibide bikaina, Aste Nagusiko programa dugu, urtero bezala, ekitaldi eta ospakizunen artean hainbat egintza erlijioso barne hartu, eta hauetara Udalbatzari dei egiten duena. Zehazki, abuztuaren 15ean Begoñako basilikan eta abuztuaren 16an Pagasarri eta Artxandako ermitetan egingo diren mezaz ari gara.

Zergatik behar dute parte hartu kargu publikoek, herritar guztien ordezkari eta haien sinesmenak edozein direla eta, horrelako ekitaldi erlijiosoetan? Zergatik horrenbesteko burugogorkeria esparru publikoa eta pribatua, partikularra eta erlijiosoa denarekin nahasteko? Zergatik sartu Udala, guztiona den instituzio bat, gizartean geroz eta txikiagoa den sektore pribatu bakar baten ekitaldietan?

Dimentsio erlijiosoa lan instituzionaletik kanpo mantendu behar da eta edozein praktika erlijiosoren erabilera ezingo da inoiz eremu pribatutik atera. Hau da akonfesionaltasunaren oinarria bermatzeko bide bakarra. Guzti honengatik, eta benetan laikotasuna eta akonfesionaltasuna bermatu nahi badira, Udalak ezingo du hauetan parte-hartzera dei egin, eta kargu publikoek ezingo dute modu ofizialean, inolako konfesio motaren ekitaldi erlijiosoetan parte hartu.

Noiz hartu behar du Bilboko Udalak, instituzio publiko bat den heinean, praktikan jarri beharko lukeen akonfesionaltasun hori serio? Noiz arte babestuko ditu ekitaldi erlijiosoak eta jarraitu behar du Aste Nagusiko ospakizunen parte bezala mezak antolatzen? Bilbotarrok Aste Nagusia herrikoia, dibertigarria, alaia eta parte-hartzailea nahi dugu, sinesmenekin eta pertsona guztien eskubideekin adeitsua dena, eta ez batzuen morala, besteon moralaren gainetik gailentzen duen Aste Nagusia.

Berriak

Amaia Agirresarobe: “Emakumeon eskubideak ez dira negoziatzen, ez eta gure bizitzaren gaineko erabakiak hartzeko eskubidea ere”

Alternatibako kide eta EHBilduren Bizkaiko batzarkide Amaia Agirresarobek emakumeek haien sexualitatea, eta gorputzen eta bizitzen gaineko erabakiak hartzeko eskubidea defendatu du Batzar Nagusietan, Gallardonek kongresuan aurkeztutako abortuaren legearen gaineko erreforma proposamenari erantzuteko ahalegin batean. Agirresarobek,  sinemen erlijiosoen gainetik, estatu baten betebeharra pertsona guztien eskubideak bermatzea dela azpimarratu du -emakumeen eskubideak barne-. Baina tamalez, erreforma proposamen honen ondorioz bigarren maila batera mugatu dituztenak berriro ere.  

Berriak

Alternatiba | Ezkerra eraldatzearen erronka

X