Etiketa: Bizkaia

Azken eraso sexistak emakumeek aurretik salatutako guneetan jazo direla salatu Ana Etxarte Bilboko zinegotziak

Bilduko Udal Taldeak salatu du Bilbon izandako azken eraso sexistak emakumeek 2011n Hiri Debekatuaren Mapa osatzean salatutako gune ilunetan jazo direla. Ana Etxarte zinegotziak premiazko neurriak hartzea eskatu dio Berdintasun arloko zinegotziari gaur izandako agerraldian.

Aipatutako diagnostikoa egiteko 218 emakumek parte hartu zuten urte eta erdiko lansaioetan. Bertan 236 gune ilun detektatu ziren “eta horietako asko konpondu gabe daude egun eta eraso sexistak izaten jarraitzen dute”, adierazi du Etxartek.

Zinegotziak salatu du Udaleko Obra eta Zerbitzuetako sailak ez duela konpondu gune ilunek sortzen duten segurtasun eza.

Bilduk gogoratu du 2011ko apirilean talde soberanistak Obra eta Zerbitzuak sailari planifikazio bat eskatu ziola. “Eta orduan jasotako erantzuna gaur eman diguten berdina izan zen: erabilgarri dauden giza baliabide eta baliabide teknikoak erabiltzen ari direla. Eta hortxe bertan dago akatsa: udalak ez duela bideratzen behar bezalako diru-partidak gune ilun guztiekin amaitzeko”, azpimarratu du Etxartek.

Gai honekiko udalak erakutsitako jarrera “pasiboak agerian utzi du, beste behin ere, indarkeria sexistaren kontrako borroka Udal honen lehentasuna ez dela”. “EAJri ez zaio ardura emakumeok beldurrez ibiltzea leku eta ordu jakin batzuetan. Hiriko hainbat lekutan pasatzean beldurra izaten jarraituko dugu”, adierazi du Bilduko zinegotziak.

Bilduk deia luzatu dio Berdintasun sailari ekimenak aurrera eramateko emakumeek indarkeria sexistaren aurrean nola defendatu eta nondik sortzen den jakin dezaten. Zentzu honetan, Etxartek argi dauka autodefentsa feminista dela eraso sexistei aurre egiteko armarik eraginkorrena.

http://alternatiba.net/old-files/tuneles lutxana.jpg

Berriak

Bilbo, hiri santua

Ana Etxarte eta Carmen Garcia – Alternatiba Bilbo

Bistakoa da gizartea gero eta gehiago aldentzen ari dela erlijioengandik, eta bereziki eliza katolikotik, gehiengo sozialaren balore eta sinesmenak ordezkatzeko erakusten duen ezintasuna dela eta. Aitzitik, Bilboko Udala eta bestelako instituzioak, Estatu eta Elizaren arteko harreman estua mantentzen tematuta daude, akonfesionaltasuna gauzatzeko duten erantzukizunari aurre egin ordez.

Harreman estu hau, Udalak Eliza Katolikoaren alde duen jokaera bereizlea, azken Udalbatzan ikusi ahal izan dugu. Bertan, PNVk babestu egin zuen Bilboko Aste Santua Interes Kulturaleko Ondasun bihurtzeko PPk egindako proposamena, euren esanetan, Bizkaitar gehienen sinesbide erlijiosoa kristautasuna delako.

Gutxienez, gure buruari uste hau egiazkoa ote den galdetu beharko genioke. Eta azaleko irakurketa bat eginez, ezezko erantzuna datorkigu burura. Mezaren ostean edozein elizako atean biltzen den jende kopuruari besterik ez diogu erreparatu behar, tenplu kristauetara euren fedea praktikatzera doazenak jendetza ez direla ikusteko. 

Gainera datuak gure susmoa indartzera datoz. Eusko Jaurlaritzak duela gutxi argitaratutako ikerketa baten arabera, euskal gazteriaren %54ak ateo, agnostiko edo ez erlijiosotzat jotzen du bere burua. Kopuru hau urterik urte hazten doa, eta bere burua katolikotzat jotzen duen %34ari aurre egiten dio, zeinetatik %4ak besterik ez dio praktikantea denik.

Hau da egungo errealitatea, zeinean erlijio hegemonikoak espazio publiko guztiak indarrez hartzen zituen garai ilunei aurre eginez, gizartea erlijiotik gero eta aldenduagoa dagoen, inongo kredorik praktikatu gabe.   

Baina dirudienez, PPk datu hauek alde batera uzten ditu, eta nahiago du Eliza Katolikoarenak kontuan hartu. Hauen arabera, bataiatutako pertsona oro eliztarra da. Ez du axola pertsona horrek erlijioa ez praktikatzea, ez sinestea edota katolizismoari uko egin nahi izatea. Eliza katolikoaren ustez, Estatuarekin negoziatu eta etekin ekonomikoak lortzeko asmoz, pertsona horiek eliztarrak izango dira betirako. Edozein sektan gertatzen den bezala, behin sartzen zarela, ezin izango zara inoiz irten.  

Bilboko Aste Santua Interes Kulturaleko Ondasun bihurtzearen alde PNVk hartutako erabakiaren ezaugarririk larriena, gure gizartearen izaera akonfesionalaren eta laikotasunaren aurka jotzea da. Gaur egun, erlijio katolikoaren arabera definitutako hamaika ekitaldi, jaiegun eta errealitate publiko daude. Erabaki honek, are gehiago indartuko du zilegi ez den logika hau, tradizio katolikoetatik eta hauen atxikimendutik gero eta aldenduagoa dagoen gizarteari so egiten ez diona. Bertan, erlijio aniztasuna oso zabala da, eta erlijio guzti horiek eremu pribatura mugatu behar izango lirateke.  

Laikotasun gehiago behar dugu; bide horretan aurrera egin behar dugu. Hauxe da sinesmen ezberdinak dituzten pertsonen artean bizikidetza bermatzeko testuinguru bakarra. Eta arau hori ez betetzeak diskriminazioa, pertsona batzuen baloreak besteei inposatzea eta oro har, kontzientzia-askatasunaren oinarrizko eskubidearen urraketa dakar.

Administrazio publikoa erlijio ezberdinetatik aldentzea, udal publizitatean Aste Santuko prozesioak gure ondare eta izaeraren ezaugarritzat ez jasotzea dakar, pertsona askok ez dugulako gure burua erlijio katolikoarekin identifikatzen. Honez gain, eta hau oso garrantzitsua da murrizketa garaietan, egitasmo hauek diru publikoarekin -aurten 9.000 euro izan dira- ez finantzatzea dakar. Egokiagoa litzake diru hori pertsona guztien sinesmenak errespetatzen dituzten bestelako kultur-ekintzei ematea, auzoetako jaiei, esaterako.

Zoritxarrez, PNVk hileta zibilak leku publikoetan eta udal lokaletan egitea onartzeko Bilduk aurkeztutako mozio bati ezetza ematen dion bitartean, baietza ematen dio beste proposamen honi, PPren eta PNVren eskuma bilbotarraren izaera babestuz: erlijio kontserbadorismoa, Bilbo turismoari zuzendutako hiri-erakustoki batean bihurtzeko obsesioari gehituta.

Azkunari eta bere lantaldeari adierazi nahi diogu Bilbotarrek nahiago dutela bestelako egitasmo batzuk Interes Kulturaleko Ondasun bihurtzea. Gure herrian benetako sustrai sakonak dituzten egitasmoak alegia, guztion sinesmen eta eskubideak errespetatzen dituztenak, eta sufrimenduarekin, erruarekin, odolarekin eta militarismoarekin zerikusirik ez dituztenak, hauek baitira Aste Santua definitzen dituzten ezaugarriak. Nahikoa sufrimendu pairatu behar izaten dugu jada, eskumako alderdiek martxan jartzen dituzten erreforma eta murrizketen ondorioz.

Berriak

Bizkaiko EHBilduk etxegabetzeei aurre egiteko eragile sozialekin elkarlanean aritzeko prestutasuna agertu du

Bizkaiko EHBilduko ordezkaritza batek bilera egin du gaur goizean Bizkaiko Stop Desahucios plataformako kideekin, etxegabetzeen arazoaren inguruan hitz egiteko. Eragile sozialaren aldetik Marte Uriarte izan da batzarrean, eta koaliziotik, besteak beste, Ander Busto, Asier Vega, Helena Gartzia eta Maribi Ugarteburu bertaratu dira. Azken honek esan duenez, “etxe desjabetzeak jendearteak gaur egun pairatzen dituen arazo larrienetakoa da”.

Koalizioko legebiltzarkidearen hitzetan, “neurri bidegabe eta inposatuak” datoz Espainiatik eta “Gobernua oraindik ere okerrera jotzeko bidean” dagoela deitoratu du. Horrexegatik, Euskal Herritik “egoera honi aurre egiteko tresnak” exijitu ditu, Etxebizitzaren lege justu bat egiteko besteak beste, “35 urte eta gero, oraindik ere, jendeari etxebizitza duin baterako eskubidea bermatuko dion legerik ez baitaukagu”.

EHBilduk norabide horretan urratsak egiteko prest dagoela ziurtatu arren, legea lortu arte jendeak soluzioak behar dituela nabarmendu du Ugarteburuk. Hala, mugimendu sozialek esan beharrekoa entzun eta “elkarlanerako prest” agertzearekin batera, “ordezkaritza edota gobernua dugun erakunde guztietatik herritarren etxebizitza duinerako eskubidea defendatzen jarraituko dugu”.

https://fbcdn-sphotos-g-a.akamaihd.net/hphotos-ak-ash4/468309_646003172083669_1945464835_o.jpg

https://fbcdn-sphotos-g-a.akamaihd.net/hphotos-ak-frc1/920893_646003262083660_1700369335_o.jpg

https://fbcdn-sphotos-a-a.akamaihd.net/hphotos-ak-frc1/901279_646003325416987_1874550308_o.jpg

https://fbcdn-sphotos-h-a.akamaihd.net/hphotos-ak-ash3/922501_646003162083670_2035428706_o.jpg

https://fbcdn-sphotos-b-a.akamaihd.net/hphotos-ak-frc1/914137_646003185417001_1665665176_o.jpg

Berriak

Bilboko Udalaren 79 milioi euroko zorrak bere eraginkortasun eta gardentasun falta agerian utzi ditu

Udal gobernu taldearen kudeaketa eredu ustez bikainak dauzkan pitzadurak gero eta nabarmenagoak dira, EH Bilduren Bilboko udal taldeak aurreko astean jakinarazitako informazioek argiro erakusten dutenez. Kontuak ustez eguneratuak eta defizitik ez zuen Udalak, gutxien-gutxienez, 79 milioi euroko zorra duela salatu du Aitziber Ibaibarriaga zinegotziak. “Hautsi da, beraz, EAJren inguruan eraikitako kudeaketa bikainaren eta zero zorraren inguruko mitoa”, esan du.

Ibaibarriagak azaldu duenez, “79 milioi euro horietatik 30 milioi, Deustuko kanala irekitzeko lanen ondoriozkoak dira. Bilbao Ria 2000 sozietate publikoaren desegiteak, halaber, 195 milioi euroko zorra utzi du; eta horren %15 Udalarena dezenez gero, aipaturiko 30 milioi horiei beste 29 milioi gehitu behar zaizkie”. Ibaibarriagak ohartarazi du: “Baina hori ez da dena; gehiago ere badago: Bilbao Ria 2000 sozietate publikoaren baitan, beste 20 milioi euroko zorra ere badu Azkunaren taldeak, Iberdrolaren Gardokiko egoitzaren lursailaren rekalifikazioaren ondoriozkoa. Izan ere, Iberdrolak ordaindu beharko lituzkeen 20 milioi euro bere gain hartu zituen Udalak 2005ean”.

Horrenbestez, herritarrei bizkar emanez gobernatzea, eta abiadura biko Bilbo bat sustatzea egotzi dio EH Bilduko zinegotziak EAJren gobernuari, “noiz, eta 32.559 bilbotarrek enplegurik ez duten garaion”.

Irizpide ekonomikoetan oinarritutako EAJren hiri eredu horren aurrean, pertsonak abiaburu eta helburu izango duen hiri ereduaren aldeko apustua berretsi du EH Bilduk. “Pertsonen Bilbo sortzea da gure helburua”, esan du Jon Salaberria Bilboko EH Bilduko ordezkariak, “eta ez multinazionalen Bilbo”.

Salaberriak azaldu duenez, “bestelako hiri eredu bat premiazkoa dela erakusteaz gain, gaurdanik bertatik gauzagarria ere badela erakutsiko dugu jardunaldietan”.

Horretarako, esparru teorikoa lantzeaz gain, EH Bilduren jardunaldietara biltzen direnek beste herri batzuetan arrakastaz abian jarritako ekinbide zehatzak izango dituzte aztergai, haien protagonisten eskutik. Besteak beste, espazio publikoaren pribatizazioaren kalteez, sektore publikoa blindatzearen garrantziaz, ekonomia pertsonen zerbitzura jartzeko moduez, etxebizitza politika publikoak sustatzeko ekinaldiez eta espazio eta ekipamendu publikoaren erabilera parte-hartzaile eta zabala ziurtatzeko baldintzez jardungo dira ‘Bilbo kudeatzeko bestelako ereduak’ jardunaldian parte hartzen dutenek.

http://alternatiba.net/old-files/IMAG0784-1024×615.jpg

Berriak

Bilduk diktadura frankistaren garaian zigortutako udal langileen birgaitze ofiziala eskatu du

Zigoitian aurkitutako hobi komunak agerian utzi du, beste behin ere, frankistek egindako sarraskiak. Bilbon ere errepresioa nagusitu zen eta jazarpena pairatu zuten kolektiboen artean Udal langileak egon ziren.

Francoren aldeko prentsak Bilboko Udaleko garbiketa erabatekoa izan zela azpimarratzen du. 1.684 udal langiletatik 982 kaleratu zituzten, hots, pertsonalaren %59. Beste 319ri enplegu zein soldatarik gabeko zigorra ezarri zioten. 1937ko azaroaren 23an La Gaceta del Norte egunkariak udaleko langilearen %77ak zigorraren bat edo beste jaso zuela argitaratu zuen.

Hori dela eta, diktadura frankistaren garaian zigortutako udal funtzionario eta langileen birgaitze ofiziala egiteko eskatuko dugu. Honetaz gain, errepresaliatutako udal langileak omentzeko ekitaldi ofizial bat egiteko aukera eta beharra proposatuko dugu.

Berriak

Onartezina da Bizkaiak saskibaloi talde bati 5,2 milioi euro ematea

Jakin bagenekien Jose Luis Bilbao eta PNV, saldu nahi digutenaren kontra, oso kudeatzaile txarrak direla. Bizkaitarrekiko behintzat, izan ere, haien adiskide bankari eta enpresaburu handika poz-pozik dituzte haien mesederako eginiko zerga politikarekin. Supersur errepidea dugu adibiderik onena, inork behar eta erabiltzen ez duen makro azpiegitura defizitarioa. Urtero gero eta zulo handiagoa eragiten dio Bizkaiko ekonomiari, baina hasieratik ere, Bilbaok berak aitortu zuen bizkaitarron hainbat belaunaldirako hipoteka zela obra hura… Baina aurrekari horiekin ere, ezin genuen espero Bizkaiko Foru Aldundiaren azken erabakia, kirol talde pribatu bati 5,2 milioi euro bideratzea. Noiz era politika sozialetarako dirurik ez dagoela esaten duenean. Honetaz ari ote zen duela hilabete batzuk “gastuak egokitu eta ekonomia sustatzeaz” hitz egin zuenean? Iruzurraren kontra duela gutxi aurkeztutako kanpaina berregin diogu Bilbaori: Adarra jotzen?

Berriak

Errepublikanismoaren alde (adierazpen bateratua)

Adierazpen bateratua (Alternatiba Bilbo, Antikapitalistak, Aralar, Equo, Gorripieda, Ezker Anitza eta EPK) Errepublikaren aldarrikapenaren alde, eta egunotan ospatzen diren ekitaldi errepublikar ezberdinen babesean, esparru ideologiko ezberdinetako alderdiek, baina parte-hartze demokratikoaren aldeko eta justizia sozialaren aldeko helburu komunekoak izanda, honako hau elkarrekin defendatu nahi dugu:

1.- Errepublikanismoa soilik monarkiaren kontra joatea baino gehiago dela, eta gobernu forma zehatz bat defendatzeaz haratik dagoela.

2.- Hiritarra izateak, gure inguruko gaietan parte-hartzea eta deliberatu ahal izatea suposatzen duela. Izan ere, Errepublika latineko “res publica-tik” dator, hau da, gauza publikoa, kidegoaren gauzak alegia. Horretarako, galdeketa elektoralean ahotsa duten elementuak baino gehiago izan behar gara. Beharrezkoak ditugu beraz, demokrazia zuzenagoak eta parte-hartzaileagoak. Herritargoak botere hartzea izango da benetako parte hartze bat bermatzeko bide bakarra. Alderdi eta ekintzaile sozio- politikoei, herritargoak erabaki hartzeetatik aldentzeak dakarreneko kalteen inguruko hausnarketa bat eskatu nahi diegu, eta honen arabera behar direneko pausuak har ditzatela. Politika oinarrian eta hurbilean errotu behar da berriz, parte hartzeko demokrazia zuzenaren bidez.

3- Askatasuna ez da edonolako oparia, legeak bermatzen du, ezin delarik gutxietsi edota pribilegio ekonomiko edo klasekoen alde egokitu. Iraultza frantsesak esan zuen bezala: “Ze zentzu dauka legeak eskubide berdintasunari omenaldi hipokrita bat egiteak, legerik premiazkoenak, beharrak, herriaren parterik osasuntsuena eta ugariena honi uko egitera behartzen badio!. Ez da askatasun estutua gaur behartzen duena, lan eta etxerik gabe bizitzera pertsona asko, beste batzuek metatzen eta espekulatzen duten bitartean?. Ez da iruzurra legearen bitartez pribilegioak ematea, bake sozialaren aitzakiarekin, isilune-harresi bat hedatuz?

4- Errepublika ezin da errege baten agindupean egon, gure bizitzak zuzentzen dituen produktibismo hegemonikoak eta patriarkalak egiten duen moduan; herriak zuzendu behar du. Emakumeen menpekotasunetik aske eta fisikoki eta psikologikoki nola eta zerekin elikatu behar garen esaten digun kapitalismotik libre dagoena. Errepublika, gizatasunean, herrian eta bizitzan ezin murriztea esan nahi duelako ere.    

5- Aurrekoarekin erlazionatuta, berdintasunak justizia sozialeko, birbanaketa eta pribilegioen amaierako eskaera dakar, beraz. Zentzu honetan, laikotasuna berdintasunaren adierazpen bat da.

6- XXI. mendean planetaren mugak ignoratzen dituzten akziorik ez dezakegula babes. Klima-aldaketa, hondakinak eta eredu energetiko fosilistaren agorpena, kontsumoan murgildutako eredu sozial eta ekonomikoa, neurrigabeko ekoizpena, poluzioa eta hegoaren baliabideen lotsagabeko esplotazioa, irteerarik gabeko bide batera eramaten gaituzte, ekologikoki eta sozialki ere. Norabidea, gehiago itxoin gabe, biratu behar da.

7- Anaitasuna koherentziako elementua dela, eta pertsonen, taldeen eta herrien arteko solidaritatean oinarritutako etika.

Errepublikanismoaz eta kapitalismoaz galdetzea zilegi eta beharrezkoa dela ulertzen dugu ere. Pribilegioak defendatzen dituen sistemak bide ematen dio jendearen parte-hartzea urruntzeari, legea bere probetxurako erabiltzen du, etekin ekonomikoa eta hazkundea gizakiaren gainetik jartzen du, eta ekologikoki eta sozialki kaltegarria da. Hain zuzen ere, gogoratu ditugun balio errepublikanoen guztiz kontrakoa. Askatasuna, berdintasuna eta anaitasuna kolokan jartzen ditu, eta giza eskubideak mozteko baldintzak bultzatzen ditu. Horrela esan dezakegu kapitalismoa eta neoliberalismoa oztopo bat direla errepublikarako. Gehiago esango genuke, antirrepublikanoak dira.

Transformazio sozialeko entitate politikoei, besteen artean ordezkatzen ditugunei, kontu hauek eztabaida politikoaren zentroan jartzeko erantzukizuna, eta koherenteak izatea, tokatzen zaie. Balio errepublikanoek gure ekimenak bultzatu behar dituzte, eta hiritarrei parte-hartzeko bide errealak irekiak mantentzeko bultzada izan behar dira.

Osasuna eta Errepublika!

Berriak

BBKren Batzar Nagusian “gure bankua herritarren mesedetan” jarri behar dela defendatuko du EHBilduk

Kutxabank sortu zenetik 15 hilabete pasatu direnean, azken hauteskundeak izan zirenetik lehen ohiko Batzar Orokorra egingo du BBK-k etzi, hilaren 11n, Bilbon. Batzarrerako ez da aurreikusten finantza jarduerari buruzko informaziorik, hori KutxaBanken Administrazio Kontseiluan (EAJ + PPk osatzen dute) erabakitzen omen da: erreserbetara jarritako 585 milioi euroak (2011n baino %21 gehiago), Banku txarrean jarritako 100 milioi euroak… EHBilduren ustean, finantza jarduera KutxaBanki dagokio, bai, baina KutxaBanken akzioen %57 BBKrenak dira eta zerbait esateko, aztertzeko, eztabaidatzeko aukera izan beharko genuke.

Gauzak horrela, BBKren Batzar Orokorrean, soilik emaitzaren informazioa emango digute, eta horren arabera, Gizarte Ekintza proposamena. Erabaki guzti horiek eragina zuzena dute BBK-ko Batzar Orokorrak erabaki behar duen Gizarte Ekintzako aurrekontuan. BBK-k akzioen %57 izanda, Batzar Orokorrak zerbait esan beharko zuen finantza jardueraz. Baina, ez.

Errealitate gordinari uko eginez, ehunka etxe-kaleratze ematen ari dira azken hilabeteetan, eta horietako askotan, BBK-k erantzunkizun zuzena du. Hala ere, etxe-kaleratzeen gaia ez dira aztertuko etziko batzarrean. Eskaera egin genuen batzar honetan gaia sartzeko, baina ezetz erantzun digute. Eskaera bera egin dugu Gipuzkoan eta Araban, eta Vitalen batzarrean gaia eztabaidatuko dute, gehiengoa PPren eskuetan egonda. Gai-zerrendan sartu dute, ez bakarrik etxe-kaleratzeen gaia, pribatizazioarena ere aztertuko dutelako. PP EAJ baino zabalagoa da? EAJk badu non hausnartu.

Atzo, KutxaBankeko lehendakari Mario Fernandezek esan zuen Gizarte Ekintza dela egun KutxaBank izatearen ardatz nagusia. Baina berehala argitu zuen bere tranpa: bankuaren irabaziaren araberako garapena du Gizarte Ekintzak, beraz, gero eta etekin laburrago, orduan eta diru gutxiago Gizarte Ekintzarako. Eta hori da, hain justu, gertatzen ari dena: gero eta diru gutxiago bideratzen da Gizarte Ekintzara. Iaztik, erdia baino gehiago murriztu da Gizarte Ekintzarako aurrekontua: Gizarte Ekintzako Zentroena, %87.

Horrek adierazten du BBK-k berezkoa duen gizarte ekintza deuseztatzeko jokaera. Baina kolaborazioan egindako programak eta jarduerak ere %77 gutxitzen dira. Eta murrizketa horiek izanda, gai dira esateko jarduera eta proiektu guztiak egingo dituztela. Gezurra, jakin badakigulako Sukarrietako txanda bat edo jarduereren bat kendu dituztela; era berean. BBKren egoitza zen Reina de la Paz-ek Vitalitas aseguru etxe pribatuaren bitartez eskaintzen ditu zerbitzuak.

Gizarte ekintzako txostena irakurriz gero, horrelako harribitxiak aurki ditzakezue: “… ehun urte bete dituen Aurrezki Kutxa arrakastatsuaren oinordekoa dena eta, horregatik, finantza- eta gizarte-bazterketak sortutako gizarte-beharrei dagokienez oso sentikorra dena. Gizarte-ekonomiako tresnak sustatuz, bazterketaren aurkako borrokan eskarmentu handia dugu, eta gainera liderrak eta aitzindariak izaten jarraitu nahi dugu”. Ikusi al duzue gizarte-beharrekiko sentikortasun-izpi bat Kutxabankek jendea bere etxetik kaleratzen duenean?

2012ko Gizarte Ekintzako Txostenean ere aurki ditzakezue horrelakoak: sozietate publikoarekin lankidetzan. Programa horren egikaritzan, BBK-k herritarren eskura jarri ditu Gaztelondon, Errekaldeko barrutian, bere jabetzakoak diren BOEn sustapeneko 40 etxebizitza -beren eranskin eta guzti-, alokairu sozialeko erregimenean erabil ditzaten. Proiektu horrekin, BBK-k erantzuna ematen dio bizkaitarrekin duen konpromiso nagusienetakoari, hots, bateko edo besteko bideak erabiliz etxebizitza babestuak eskuratzea erraztea, bereziki gazteenei. Izan ere, Bilboko Udal Etxebizitzei higiezinak doan utzi dizkie 50 urtez.

2010etik diote, baina beti kopuru berbera da: 2010ean, 40; 2012an, 40; 2013an, 40,… hori da bizkaitarrek etxebizitza babestuak eskuratzea errazteko BBK-k hartzen duen konpromisoa. Eta ahaztu egin zaie esatea Gizarte Ekintzaren 2008-2010 epealdirako Plan Estrategikoaren helburu bat zela gazteek alokatzeko BOE etxebizitzaren proiektua gauzatzea. Zenbat etxebizitza egin ziren? Bat ere ez. Aitzakia: Lurzoruaren Legea eta udalek ezarritako oztopoak.

BBK cuadro

40 etxebizitza alokairu sozialerako, eta bitartean, zenbat pertsona utzi du etxe gabe KutxaBankek? Datu hori KutxaBank-ek ez digu ematen, baina…

KutxaBank eta BBK-ko lehendakari Mario Fernandezek orain dela gutxi adierazi du hipoteka ordaindu ezin duten kasuen %92,7an akordioa lortzen dela kreditua birnegoziatzeko eta etxebizitza ez galtzeko. Beraz… %7,3a KutxaBankek etxetik kaleratzen du.
2012ko iraila arte, hau da, 9 hilabetean, 2.088 hipoteka-exekuzio egon dira Bizkaian.

Kontuan izanda hipoteka gehienak KutxaBank-en eskuetan daudela…

Ziur gaude KutxaBankek 40 pertsona baino gehiago etxetik kaleratu edo kaleratzeko arriskuan daudela.

KutxaBankek 40 etxebizitza utzi dizkie doan Bilboko Udal Etxebizitzei 50 urtez. Zergatik ez ditu uzten doan eta 50 urtez Bilboko Udal Etxebizitzei edota Etxebideri hipoteka-exekuzioan dauden etxebizitza guztiak beraiek alokairu sozialean eskaini diezaien bertan bizi eta hipoteka ordaindu ezin dutenei? Horrelako proposamenak bai adieraziko luketela BBK-k finantza eta gizarte-bazterketak sortutako gizarte-beharrekiko oso sentikorra dela, baina ez dugu ikusten bide horretatik joateko asmorik duenik.

http://alternatiba.net/old-files/Agerraldia BBK.jpg

Berriak

Petronorren koke plantaren inaugurazioa inposizio segida baten azken urratsa da

Petronorrek Muskizeko findegian eraiki duen koke planta gaur (apirilak 3) inauguratuko da eta urrats bat gehiago emango da, beraz, Eusko Jaurlaritzak 2008ko azaroan haren instalaziorako ingurumen baimena eman zuenetik, gaur arte eman den inposizio segidan.

Urte hartan, EAJko buruzagi ohi eta gaur Petronorreko presidente den Josu Jon Imazek Petronorren “etorkizun bideragarria”-rekin lotu zuen koke planta. Botere ekonomikoen asmoak agiri-agirian zeuden, kasu honetan petrolio enpresa baten interesak, %86a Repsolen esku eta %14a Kutxabanken esku dituena. Koke plantaren proiektuak, ordea, parez pare izan ditu bertako bizilagunen antolakuntza eta mugimendu ekologista. Osasunaren eta ingurugiroaren alde lan egin dute, biztanleria informatu, mobilizatu eta halako jarduerarekin lotutako instalaziorik etxe ondoan nahi duten ala ez erabakitzeko eskubidea dutela aldarrikatu dute.

Petronorreko agintariek entzungor egin diete Muskiz eta inguruko biztanleriaren eskariei, koke plantaren proiektuari dagokionean hitza hartu eta haien jarrera argitu nahi izan duten bakoitzean. Are larriagoa da, ordea, Petronorreko agintariek hartu duten bidea. Administrazioarekiko Auzien Epaitegiak joan den martxoaren 1ean eman zuen epaia, plantaren eraikitzea eta jarduera bertan behera uzten zituena. Petronorreko arduradunek ez dute epaia onartu eta errekurtsoa aurkeztuko dutela iragarri dute. Epaitegiaren erabakiaren arabera, 853 milioi euroko kostua izan duen instalazio horrek ez zuen eraikia izan behar.

Petrolio enpresako agintariek inaugurazio ekitaldirako xehetasun guztiak ondo prestatu dituzte. Segurtasun neurriak indartu dituzte, hainbat langileri jai eman eta gainontzekoei ibilgailu propioan joateko aukera ukatuz. Instalazioaren itxura hobetzeko garbiketa lanak ere egin dituzte, bihar izango duten “ohorezko” gonbidatuari harrera egiteko, Espainiako Errege Etxeko ordezkari Borboiko Felipe, alegia. Espainiako printzea Muskizen izango da bihar 300dik gorako gonbidatu izango dituen ekitaldian. Espainiako Errege Etxeko ordezkariaren gonbitea, inposizio segida honen azken kapitulua da eta garbi erakusten du korporazio handiek halako negozioak ixteko darabilten jokabidea, haien interesak beste edozein konturen gainetik ipiniz beti.

Instalazio berriarekin batera hitz eman diren la postu berriak direla eta, azpimarratzekoa da Petronorrek hainbat langileren kontra erabili dituen mehatxuak. Joan den urtean findegiaren jarduera etenda egon zen erregaiaren prezioan margen nahikorik ez zegoela argudiatuta eta testuinguru horretan Petronorrek erregulazio espedientea aurkezteko asmoa iragarri zuen.

EH Bilduk dei egin nahi die herritar guztiei Muskizko bizilagunei inposatu zaien koke plantaren aurka eta Espainiako printzearen bisitaren kontra antolatuko diren mobilizazio guztietan parte hartzera. Proiektu horrek korporazio handien interesei bakarrik erantzuten die eta inolaz ere ez enpleguaren sorrerari edo eskualdearen beharretara egokitutako garapen ereduari. Petronorrek, inposizioaren bidez, sistema ekonomiko injustua eta ingurugiroaren aurkakoa ezarri nahi du poltsiko gutxi batzuk loditzearen truke.

http://alternatiba.net/old-files/keepcalm.jpg

Berriak

Alternatiba | Ezkerra eraldatzearen erronka

X