Alternatibako bozeramaile nazional Asier Vegak, estatuko segurtasun indarren “legezko oinarrik gabeko enegarren operazioa” salatu du, gaur arratsaldean zortzi lagunen aurka garatutakoaren harira, “haien delitu ezagun bakarra Euskal Herriko presoen babes juridikoa izan arren”. Zentzu beretik, “jokabide deitoragarria erakusten dutenen ildoan” kokatu du ekintza, “ke lainoak eraiki beharra dutenak dira, konponbidearen eta bakearen bidetik geldotasuna besterik ez erakusten dutenen esku, Europako auzitegiek Espainiako Erresumaren espetxe politikak eskubideak eta legea urratzen dituela  ebatzi eta hilabete gutxira ematen dena beren jarraitzaileak asebetetzeko”.

Alternatibatik onartezintzat jo dute halako operazioa egin izana presoen kolektibok bakearen alde inoiz baino urrats gehiago egiten ari denean, “EPPK kolektiboak zabaldutako adierazpenaren bitartez, gatazkaren ondorioz eragindako kalteak onartu eta Bake Foro Sozialaren gomendioak bere egin dituenean”, are gehiago, larunbat honetan Bilboko kaleak elkartasunez eta aldarrikapenez beteko dituen euskal presoen eskubideen aldeko mobilizazioaren bezperan.

Vegak, gatazkaren konponbidearen bidean gaudenean, eragile politiko zein sozialak eraso hau salatzera premiatu ditu. Aldi berean, Guardia Zibilak gaur egindako polizi operazio hauen kontra altxatzeko eta salatzeko eskatu dio Eusko Jaurlaritzari ere, Herriraren kontrako erasotik hilabete gutxi pasatu direnean, “elkartasuna kriminalizatu eta euskal presoen babes eskubidea urratzeko helburu bakarra dutelako”. Horrela, EAJ eskubideak aldarrikatzen dituztenen alde egitera deitu du “torturaz, zurikeriaz eta mota guztietako eskubideen urraketaz zikindutako zoru etikoak babesten dituztenen alde egin beharrean, larunbateko bezalako mobilizazioak bultzatuz”.

Atxilotutako lagunak askatzeko exijitu ez ezik, azkenik, gaur arratsaldean, 20:00etan, Bilboko udaletxetik abiatu eta Arriagao Plazan bukatuko den manifestazioarekin bat egitera deitu dute alderdi ezkertiarretik.

Alternatibaren bozeramaile nazional Oskar Matutek, EAJk gaur Eusko Legebiltzarrean aurkeztutako autogobernua gaurkotzeko proposamenaren ibilbide falta azpimarratu du, “euskaldunon borondate politikoari ahotsa eman nahi diola” esaten duen aldi berean, “gure subiranotasuna ukatzen dutenekin akordioak egiten dituelako”. Matutek deitoratu du “Ibarretxe Planarekin gertatutakoaren ondorioz ezer ikasi ez izana”, garai horretan PP eta PSOErekin akordioak egitea ezinezkoa dela baieztatu zelako, haiek izan baitira beti Euskal Herriaren autodeterminazioaren bidea oztopatu nahi izan duten lehenak”.

Alderdi ezkertiarreko bozeramaileak bereziki nabarmendu du Kataluniaren kasua: “Herrialde Katalanak haien subiranotasunaren alde apustu egiten duten bitartean, EAJk gure sumisioa indartu nahi du, herria gehiago pobretuko ez duen eta gure eskubideak urratuko ez dituen sistema bat eraikitzeko aukera guztiak ezabatuz”. Horregatik, EAJri “eredu politiko, ekonomiko eta sozial desberdin batean oinarritutako autogobernu baten eraikitzean lan egiteko” eskatu dio, “bizitza ardatz gisa duena, eta ez merkatuak”.

Alternatiban “herriari ahotsa ematearen alde”egiten dute apustu, “geroz eta gehiago, herrien eta pertsonen eskubideak ukatzen dituen erregimen espainiarrarekin apurtzeko”. Bukatzeko, Matutek azpimarratu du horrela: “ez da estatutu berri bati hiru edo lau aldaketa egiteko garaia, herriari ahotsa emateko eta bere erabakiari oztoporik ez jartzeko garaia baizik”.

Alternatibako bozeramaile nazional Oskar Matutek, Eusko Jaurlaritzako Enplegu eta Politika Sozialeko kontseilari Juan Maria Aburtori leporatu dio nolabaiteko laguntza soziala jasotzen duten pertsonak gaizkileekin parekatu izana; hala egin baitzuen atzo gizartearen onurako lanak egitera behartuko dituztela iragartzean, “egun, sistema judizialak zigor gisa darabiltena, Barne Ministerioak berak eskubide gabezia eragiten duen zigorralditzat jotzen duena”.

Zentzu horretan, alderdi ezkertiarretik Aburtori eta Eusko Jaurlaritzari leporatu diete “diktadurako alferren eta gaizkileen legea berpiztu nahi izatea, langabeak zigortuz”. Gainera, Matutek galdetu du zer nolako zerbitzu publikoak eskaini nahi dituzten honen bidez, eta egun lanpostu hauetan dauden zenbat pertsona kaleratuko dituzten, “nola ahalbidetuko du sailburuak laguntza sozialen jasotzaileek lana topatzea horrelako neurriek lanpostu gehiago suntsituko eginak diruditenean? Are gehiago, lan hauekin ez dute ez kotizatuko, ez sarrera fiskalik eragingo, laguntza sozialak jaso behar izatearen egoera betikotuz. 

Bukatzeko, Alternatibatik ondorengo baieztapen “onartezina” gaitzetsi dute: langabetuak menpekotasuna duten pertsonak zaintzeko bezalako lanaz arduratu daitezke, baina aldiz, segurtasun zibilerako lanak betetzeko, langile “trebatuak eta egonkorrak” beharrezkoak dira. Politika Sozialetarako sailburuak horrelako adierazpenak egitea “guztiz salagarria da, pertsonen duintasuna bermatzeko oinarrizkoa den lanarekiko mespretxua areagotzen duelako”.