Etiketa: Euskal Herria

Alternatibak Igor Urrutikoetxea bezalako militante internazionalistaren galera deitoratzen du

LABeko Nazioarteko Harremanen idazkari Igor Urrutikoetxea Brasilen zendu berri dela jakin ostean, Alternatibatik uste dugu internazionalismoak dolu eguna duela gaurkoa, herrien duintasunaren eta elkartasun internazionalistaren aldeko borrokalari nekaezinaren galerarengatik. Dolu horrekin bat egiten dugu eta gure sostengua eta elkartasuna adierazi nahi diegu Igorren hurbilekoei zen bere sindikatuari, baita harekin batera munduko bazter eta borroka desberdinetan bat egin duten guztiei.

Ez da denbora asko igaro pankarta baten atzean ondoan izan genuenetik, Kolonbiako Bilboko kontsuletxearen aurrean izan zen, Paro Agrarioan borrokan ari ziren nekazari eta herritarrekin elkartasuna azaltzeko kontzentrazioan. Handik honako hitz hauek utzi zizkigun:

http://youtu.be/07HjNYaslLY?t=2m43s

Agur eta ohore,

Bilbon, 2013ko azaroaren 29an

Berriak

Lurralde kolektibitate berezitua aldarrikatzeko Mauleko manifestazioan parte hartzeko deia egin die EH Bilduk euskal herritarrei

Lapurdik, Nafarroa Behereak eta Zuberoak lurralde kolektibitate berezitua osatzea aldarrikatzeko manifestazioa egingo dute, larunbatean, Mauleko kaleetan, eta EH Bilduko ordezkariak bertan izango dira, aldarrikapen horrek onurak baino ez dizkielako ekarriko Iparraldeko herritarrei.

Frantziako estatua mehatxuak baino ez da egiten ari Iparraldean egituratuta duten elkarlanari, eta horri aurre egin ahal izateko tresna bakarra lurralde kolektibo berezitu bat eratzea da. Azken hilabeteetara bakarrik so eginez, hor daude, esaterako, Iparraldeko ikastolen inguruan sortutako auzia, Laborantza Ganberak pairatu behar izan duen jazarpena edo kantonamenduen antolaketa berrirako proposamenak ekarriko duen zatiketa oraindik eta handiagoa.

EH Bilduk uste du Lapurdi, Nafarroa Behereak eta Zuberoak lurralde elkargo berezitua osatzeak Iparraldeko herritarren borondateari eta ongizate nahiari erantzuten diola. Aldarrikapen bidezko eta zilegia da, hainbat arlotako politika bateratu propioak gauzatzeko bidea ematen duena. Hau da, Iparraldeko herritarren ongizatea bilatzen duen aldarrikapena da.

Horregatik guztiagatik, eta lurralde kolektibitate berezitua egituratzeak Iparraldearen burujabetzan ekarriko lukeen aurrerapausoarengatik, EH Bildu Mauleko kaleetan izango da hurrengo larunbatean, eta mobilizazioan parte hartzeko deia egiten die euskal herritar guztiei.

Berriak

Amaia Agirresarobe: “Informazio publikorako sarbidea geroz eta ilunagoa eta opakuagoa da”

Alternatibako bozeramaile nazional eta EHBilduko Bizkaiko batzarkide Amaia Agirresaroberen interbentzioa informazioa, literatura eta kulturarentzako sarbidea oinarrizko eskubide bat dela defendatzen, hauek baitira gizartean modu arduratsu batean parte hartzea ahalbidetzen gaituztenak. Ideia honen harira, Agirresarobek instituzioak informazioaren sarbide zuzena bermatu behar dutenak direla azpimarratu du, horrela, gure herriaren funtzionamendu demokratiko zuzenari laguntzeko.

Berriak

EHBilduk gaurko mobilizazioetara deitu du era guztietako indarkeria matxistarik gabeko gizartea aldarrikatzeko

Euskal Herria Bilduk gaur, azaroak 25 Emakumeen Aurkako Indarkeriaren Nazioarteko Egunaren harira Euskal Herriko leku desberdinetan egingo diren jarduera eta mobilizazioekin bat egiten du, era guztietako indarkeria matxistarik gabeko gizartea eraikitzeko lanean jarraitu behar dugula aldarrikatzeko eguna.

Gogorarazi nahi dugu indarkeria fisikoa, emakumeen aurka egiten den bortitzena eta gehien azaleratzen dena izan arren, ez dela inondik inora bakarra. Aurpegi eta adierazpen anitzeko errealitateari aurre egiten diogu, emakume guztiei eta eren bizitza osoan eragiten diena. Indarkeria etxea ematen da, baian baita eremu publikoetan ere, zeinetan maila eta mota desberdinetako indarkeriazko jokabide matxistak ematen diren.

Edonola ere, indarkeriarik bada justifikatu eta zilegi bilakatzearen ondorioz ematen dela defendatzen duen ideiarekin bat egiten dugu EHBildun. Horregatik, emakume eta gizonen arteko desberdintasun estrukturalari aurre egiteko konpromisoa berresten dugu, indarkeria matxistari aurre egiteko ardatz nagusia delako. Era berean, indarkeria mota eta ematen diren eremu desberdinak agerian uzteko konpromisoa gure gain hartzen dugu, adierazpen kultural diskriminatzaileen aurka ere egitea eskatzen duena, indarkeria gisa aitortzen ez diren errealitate soziokultural batzuk indarkeria bezala identifikatuz.

Azkenik, transfobia, lesbofobia edota homofobia bezalako indarkeria matxistaren aldaera desberdinak azalerazi, prebenitu eta erantzutera deitzen dugu, emakumeak eta gizonak nolakoak izan behar diren inposatzen dutenen ereduak gainditzen dituztenek pairatzen dituztenak.

Berriak

EHBilduk Fagorren erreskate publikoa eta kooperatiba berria sortzea eskatu du

Oskar Matutek inbertsio funtsa ere sortzeko eskatu dio Urkulluri, sektore estrategikoen bideragarritasuna bermatze aldera. Frantziar gobernua FagorBrandt salbatzeko neurriak hartzen ari dela gogora ekarri eta Jaurlaritzaren inakzioa salatu du, nora ezean dabilelako.

Fagor ixtearen ondorio larriez jabeturik, EH Bilduk Jaurlaritza busti dadila eta neurri zehatzak eta eraginkorrak har ditzala galdegin dio gaur lehendakariari, Fagorren egoera bideratzeari begira. Zehazki, Oskar Matutek Fagorren erreskate publikoa eskatu du, erakunde publikoek eta Kutxabankek, plan integral bati jarraituz, laguntza ekonomikoa eman dezatela, kooperatiba berri bat sortze aldera, lanpostuak eta Deba Goienako eta Basauriko etorkizuna bermatzearren. Izan ere, ohartarazi du, “ez da aski zaintza paliatiboak ematea, Jaurlaritzak egiten duen bezala, ehun industriala bertan behera erortzen ari den bitartean”.

Halaber, Kutxabankekin batera, elkarlanean, inbertsio funts publikoa sor dezala eskatu dio EH Bilduko legebiltzarkideak Jaurlaritzari, industria sektore estrategikoen bideragarritasuna ziurtatuko duen finantziazioa bermatzeko. Matutek dioenez, “marko legala aitzakiatzat hartzen dute ezer ez egiteko, baina marko legal horrexek Bankari 41.000 milioi euro ematea ahalbidetu du, eta %70a inoiz ez da berreskuratuko. Horregatik, ez Estatuaren aldetik, ez marko horren aldetik ezin dugulako ezer espero, ezinbestekoa da Jaurlaritzak lidergoa erakustea eta ausardiaz jokatzea”.

Matute, hala ere, kezkatuta agertu da, orain arte lehendakaria bera eta bere Gobernua nora ezean ibili direlako afera honetan, Fagorren arazoaren konponbidean modu erabakigarrian esku hartzeko ausardiarik gabe. Horren harira, EH Bilduren ordezkariak Jaurlaritzaren jokaera eta frantziar Gobernuarenarena kontrajarri ditu, Parisen neurri zehatzak hartzen ari baitira sektore publikotik FagorBrandt eta bertako lanpostuak salbatzeko. Hemen, ordea, “inakzioa nagusitu da Lakuako bulegoetan eta Gobernua nora ezean dabil, lidergorik eta estrategia argirik gabe, Fagorren egoera larriari nola heldu jakin gabe”.

EHBildu

Berriak

EHBilduren ekimenez Legebiltzarrak ateak irekiko dizkio gazteriaren parte hartze zuzenari

Euskal gazteriak Legebiltzarreko jardun politikoan zuzenean parte hartzeko aukera izango du. Horretarako, ponentzia zehatza sortuko da Legebiltzarrean, gazteriaren arazo eta soluzioei buruz eztabaida egiteko. EH Bilduk eraman du proposamena ganberara. Diana Urrea legebiltzarkidearen iritziz, gazteek politikagintzan parte hartzeko beharrizana bistakoa den arren, errealitate bihurtzea iraultzailea ere litzateke. Ponentzia urtea bukatu baino lehen sortu da ganberako foro berri hori.

“Ulertzekoa da gazteek politikarekiko duten iritzi negatiboa. Izan ere, gazteen parte hartzea ezabatzeaz gain, klase politikoak neurri kapitalista eta patriarkalak hartzen dituenean, ez zaio rol aktiborik uzten. Gazteen aurka egiten da politika eta horrek eragin negatiboa du”, salatu du Urreak. Legebiltzarkideak eredu aldaketa bat aldarrikatu du, “justizia sozialean, gazteen parte hartze aktiboan, burujabetza eta genero ikuspegia barneratuko duena eta hartzen diren erabakiak loteslea izatea defendatzen dugu”. Izan ere, gaur egun eredu espainolaren menpe gaude, zeinak “euskal gazteen parte hartzea kriminalizatu egiten duen, Madrilgo salbuespeneko epaitegietara eramanez”, kritikatu du.

Urreak gazteen egoeraren diagnostiko sakona egin du eta bereziki azpimarratu du emakumeek pairatzen duten krisiaren kalte bikoitza. “Emakumeez ari bagara prekarietatea bikoitza da, murrizketa gehiago pairatzen dituzte eta egiten diren murrizketak kalte gehiago egiten die emakumeei. Gainera, langabezi tasa handiagoa dute”.

EH Bilduren iritziz, klase politikoren zati batek beldur handia dio gazteen enpoderamenduari, eta horregatik saiatzen deira parte hartze politikak oztopatzen. Ponentzia enpoderamendu horri lagunduko dio, “gazteek gazteentzat egindako hausnarketak izango dira, eta etorkizun politikoa diseinatzeko balio beharko du”.

EHBildu

Berriak

Matute: “EHBildun behean dagoen jendearekin gehiago pentsatzen saiatzen gara”

EH Bildu legebiltzar-taldeak egindako legez besteko proposamena, Espainiako Gobernuak defizita malgutzeko hartutako erabakiaren ondorioz Jaurlaritzak izango duen baliabide ekonomiko gehigarriaren zertarakoari buruz. Eztabaida eta behin betiko ebazpena.

Oskar Matute bere eskuhartzean: “Eta zalantzarik gabe, EHBildutik behean dagoen jendearekin pentsatuko dugu. Hori da gure borondatea. Gustatuko litzaiguke beste talde guztiek horixe bera nahi izatea, horrela, gizartearen benetazko interes nagusiak ezagutuko genituzkelako: gizarteak dituen benetazko interesak eta behar duen eredu sozio-ekonomikoa, haien eskubideak defendatu eta garapen pertsonala bermatuko duena, epe motz, ertain eta luzean”

Berriak

EHBilduk erakunde publikoen esku hartze integrala eskatu du Fagorren auziak arriskuan jartzen dituen lanpostuak erreskatatzeko

Erakundeei “irakurketa eta soluzio globala” eskatzeaz gain, Kutxabanki ere inplikazio eta konpromiso zehatzak eskatu dizkio, “baduelako zer egina industria sektorea indartu eta mantentzeko bidean”.

Gasteizen emandako prentsaurrekoan, EH Bilduk “esku hartze publiko zuzena eta serioa eskatu die administrazio guztiei, Fagorrek eta inguruko enpresetako lanpostu guztiak erreskatatzeko. “Epe laburreko eta arazoa bere osotasunean aztertzen ez dituzten iragarpenak ez dute sakoneko arazoa konpontzeko balio izango”, salatu dute. Horren haritik, “elkarlanean soluzio integralak bilatzeko” eskaria luzatu die erakunde ezberdinei, bereziki Eusko Jaurlaritzari, atzoko bilerara “itxiera zertifikatzeko borondatearekin soilik joan baitzen”.

Koalizioaren izenean Oskar Matute eta Marian Beitialarrangoitia legebiltzarkideek prentsaurrekoan oso kritiko agertu dira Jaurlaritza eta MMCrekin, prozesuan egiten ari diren kudeaketarekin. “Gobernuak ez dauka argi ze industri politika jarraitu eta bultzatu behar duen, herri honetako industriak eta sektore estrategikoek aurrera egin dezaten”, kritikatu dute. Gainera, Fagorren itxieraren prozesu osoan egon den “gardentasun eza” salatu dute. “Batzuk diskrezioaren beharra aldarrikatu dute, gardentasun falta ezkutatzeko, bereziki langile eta kaltetuekiko. Guk gardentasun falta atzeman dugu, ez diskrezioa”.

“Epe laburreko erabakietatik eta erabaki partzialetatik aldendu egin behar gara. Irakurketak eta azterketak globala izan behar du, eta erakundeei elkarlanean aritzeaz gain, Kutxabanki ere inplikazioa eta konpromiso zehatzak eskatzen dizkiogu, herri honen industria mantendu eta indartzeko prozesuan”, gaineratu dute.

EHBildu

Berriak

Alternatiba | Ezkerra eraldatzearen erronka

X