Etiketa: Euskal Herria

Alternatibak salatu du udal erreformak demokraziari eta publikoa den orori eraso egiten diola enpresa pribatu handien mesederako

Alternatibako bozeramaile Oskar Matutek salatu egin ditu Espainiako Kongresuan gaur eztabaidatzen ari diren udal erreformaren eduki zein helburuak, izan ere, “Alderdi Popularrak publikoa den oro pribatizatzen jarraitzeko nahiari erantzuten dio, tokikoa pribatizatzeari oraingoan, enpresa pribatu handien mesederako, haiek baitira udal txikiei kenduko zaizkien eskumenak bereganatuko dituztenak”.

Matutek gaitzetsi du PPk udal erakundeei ezarri nahi dizkiela zeintzuk diren jorratu ahal dituzten eskumenak eta zeintzuk ez, “hezkuntza, zerbitzu sozialak eta etxebizitza kudeatzea galaraziko die, horretarako baliabide nahikoak izan arren”. Ildo beretik, defizitarioak direnean, Madrilek ezarritako egonkortasun irizpideen arabera, oinarrizko zerbitzuak pribatizatuko dira, gainerakoak itxita.

Ezkertiar alderditik onartezintzat jo dute legeak 5.000 bizilagun baino gutxiagoko udalerriak desagerrarazi nahi izatea, Hego Euskal Herrian bakarrik, 430 udalerriengan eragina izango duena. Baina oraindik ere harago doa, “eraso egiten dio demokrazia parte-hartzaileari, 100 bizilagun baino gutxiagoko herriek duten Udalbatza Irekiaren formularekin akabatzen duelako, udaletako azpi erakundeekin bukatzen duen bitartean”. Ez dira libratzen ere 20.000 pertsonarainoko udalerriak, legeak hauei eskumen guztiak kentzea ahalbidetzen duelako, beti ere Madrilek aproposa dela uste badu, enpresa pribatuaren mesedean. Horrela eskumenak enpresa handien eskuetan uzten dira, hauek izanik legeak finkatutakoa betetzeko gaitasuna duten bakarrak”. Matutek, erreforma udalek egiten duten lanaren kontrako eraso zuzena dela ziurtatu du, batez ere, zerbitzu sozialak, berdintasun politikak, haur-eskolak, uraren kudeaketa publikoa eta kooperazioaren garapena bezalako arlo garrantzitsuetan.

Bukatzeko, Alternatibaren bozeramaileak lege honen kontrako mobilizazio eta ekimen guztietara gehitzera deitu du, eta bide batez eskaini ditu ere “gastu publikoa arrazionalizatzeko irtenbide askoz demokratikoagoak, Rajoyk baieztatzen duen bezalaxe; diru publikoarekin mantendutakoen artean, monarkia adibiderik larriena dela; aldi berean, Hego Euskal Herrian ditugun gehiegizko polizia alboratu edota senatua bezalako instituzioa saihestu daitezkeen bezala”.

Berriak

Aktibatu

Ez dut geldirik egon nahi, ez naiz geldirik egon behar eta ezin naiz geldirik egon. Konpromisoa agertzen duen pertsona aktibo, erantzule eta solidarioa naizelako; baina batez ere pertsona librea naizen heinean, nire ideien arabera jarduten dut; mugimenduan dauden ideiak, ideia biziak, horiek aldatzeko beldurrik gabe. Nire ideiek naizen hori eraikitzen dutelako, pertsona osoa sentiarazten naute; beraiekin beti izango naiz ni neu, eta ez dut inoiz pentsamendu librea jarduten utziko. 

Duela hamar urte Jose Saramagok baieztapen bikain hau egin zuen: “Badira bi superpotentzia: Bata Estatu Batuak, eta bestea zu”. Estatu Batuek Iraken aurka zuzendutako erasoaren testuinguruan egin zuen, baina edozein garaietan erabili daitekeen ideia bat eskaini zigun. Buruan sartu behar dugu erasoen aurrean ezin dugula etsi. Zapaltzen gaituzten dominazio sistemen aurkako borrokan aurrera egin ordez, etsipenean erortzeko arriskua dugu, eskumak aipatzen duen gehiengo isil horren parte bihurtzeko arriskua, etxean gelditzen den jendearena, hain zuzen. Horregatik, gure erronka nagusienetako bat, pertsonei murrizketa, jazarpen eta menpekotasun moduan heltzen zaizkien erasoak ez onartzeko beharrizana  helaraztea da. Menperatzen gaituztenen aurrean; gure identitatea, gure etorkizuna eta eredu alternatibo bat erabaki eta eraikitzeko eskubidea ukatzen digutenen aurrean aktibatzeko momentua da.   

Gaur inoiz baino gehiago gure burua antolatu behar dugu. Justua ez den sistema honi aurre egiteko modu asko daude; auzoetako elkarteetan parte hartuz, mugimendu sozialetan, edota erakunde sindikal eta politikoetan. Bakoitza bere errealitate eta aukeretatik. Baina azken finean, garrantzitsuena zu zara. Ez zu edo ni, aurrez aurre jartzen gaituen “edo” horrekin, kapitalismoaren oinarrizko araua dena; baizik eta asmatzera goazen gehitze partikularekin, egitasmo eta mugimendu alternatiboek osatutako gune zabal bat eraikitzera eramango gaituena, erresistentzia sozialen harresi bat.

Hainbeste errepresio eta injustiziaren aurrean mobilizatu behar gara, aktibatu behar gara, iraultza norberak hasten duelako, baina batez ere, horixe delako ni naizena eta izango naizena. Ideiak, mugimenduan dauden ideiak, nire burua eraikitzen dutenak; ideia horiek beste batzuekin batera, ez dute inoiz amore emango mundu hobeago bat asmatzen. Aktiba zaitez! Aktibatu!

AKTIBATU

http://alternatiba.net/old-files/SuperpotentziaRGBweb.jpg

Berriak

Diana Urrea: “Emakumeok erabaki, erakunde publikoek bermatu eta elizaren esku-hartzerik ez”

Emakumea ez da erantzulea; hori izan da Gallardonek Senatuan ugalketa eta sexu eskubideen legearen gaineko erreforma defendatzeko erabili duen argudioa. Bestela esanda, PPren ustez emakumeok ez gara gai gure kabuz gorputza, bizitza, sexualitatea edota amatasuna bezalako oinarrizko gaiei buruz erabakiak hartzeko. Hala, gure gorputzaren gaineko erabakia ez dago gure esku, Diputatuen kongresuaren gehiengo kontserbadorearen esku baizik; non gehienak gizonezkoak diren, beste behin ere, Eliza katolikoaren sektore atzerakoienekin, bizitzaren aldeko elkarteekin eta antzekoekin bat egiten dutenak.  Beraiek erabakiak hartzen dituzte eta emakumeok men egin behar dugu, gure buruaren gainean erabakitzeko gaitasunik gabeko adin txikikoak izango bagina bezala. 

Alderdi Popularra, abortuaren arautze berriaren inguruko eztabaida, defendatzen duten ustezko moralaren testuingurura eramaten saiatzen da, nahiz eta argudio horiek pertsonalak eta besterenezinak izan. Horrela, PPk emakumeen eskubideak herritar guztiei inposatu nahi dizkien ustezko balore erlijiosoen menpe jartzen ditu, unibertsalak izango balira bezala, erlijioa zerbait pribatua dela ulertu gabe; euren sinesmenen gainetik, estatuak pertsona guztiei eskubide guztiak bermatu behar dizkie, baita emakumeen eskubideak, beste behin ere bigarren mailakotzat jo direnak.

EHBildutik uste dugu PPren asmoek emakumeon autonomiaren eta gure gorputzen eta bizitzen gainean gure kabuz erabakiak hartzeko eskubidearen aurkako erasoa azaleratzen dutela. Ezarri nahi diguten kontrola, indarkeriazko ekintza larria da eta eremu guztietatik erantzun sendoa eman behar diogu. Euskal Herriko eragile politiko, sozial eta sindikal guztien erantzukizuna da, gaur inoiz baino gehiago, abortu librea eta doakoa eskatzea. 

Erreforma hau onartzen bada, emakumeok horrela erabakitzen badugu abortatzen jarraituko dugu, baina Kode Penalaren zigorpean eta gure osasuna eta bizitza arrisku larrian jarriz. Legeak aurrera egiten badu, aberatsek eskubide aitortu hori edukiko dute eta pobreek berriz, ez dute inondik inora bermatuta izango. Abortua kapitalismoa irabaztera eramango duen negozioa bihurtzen bada, osasun publikoan modu kontsekuentean egindako ebakuntza publikoa izateari utziko dio. Abortatzea ezinezkoa bazaigu, amatasuna eta zaintza gure etorkizuna izaten jarraituko dute, eta etxeetan garatuko da, non Menpekotasun Legearen murrizketen erasoak leundu beharko ditugun gure lan isil, doako eta ezkutatuarekin. Izan ere, Legea onartzen bada eta ezin badugu abortuaren inguruan erabaki, zeinek ziurtatzen digu desiratu,  nahi eta behar dugun antolaketa sozialaren ereduaren gainean erabaki ahal izango dugula?

PSEk aurkeztu duen ekimenari babesa ematen diogu Alderdi Popularrak proposatutako Erreformari uko egitean bat egiten dugulako, baina era berean, ekimena aurkeztu duen alderdiarekiko atsekabea adierazi nahi genuke. Alderdi honek, ez zuen inoiz emakumeek euren bizitzen, sexualitatearen eta amatasunaren gainean libreki erabakitzeko eskubidea  guztiz defendatu, eta bere aukera izan zuenean, lege eskas eta koldar bat onartu zuen; mugimendu feministaren aldarrikapenei jaramonik egin ez zien lege bat; abortua delitutzat jotzen zuen lege bat; emakumeen erabakitzeko ahalmena kontrolpean jartzen zuen lege bat, sektore publikoan abortuaren praktika bermatuko zuen neurri zehatzik ezarri ez zituena.

Emakumeen eskubideak modu eta neurri ezberdinetan botoak eskuratzeko erabiltzen dituen klase politikoaren gehiengoaren aurrean, EHBildutik emakumeen erabakitzeko eskubidearen errespetua bermatzeko erlijioen zeregina testuinguru pribatura mugatuko dituzten estatu laikoak eraiki behar dira defendatzen dugu. Horregatik, Eliza Katolikoaren hierarkiari eztabaida eta ez dagozkion espazioak okupatzen uztea, eta emakumeak gutxiesten laguntzen duten egoerak sortzeko eta sustatzeko izan duen ahalegin historikoa bertan behera uztea eskatzen diogu.  Emakumeok ez dugu inoren kontrolik behar.

Emakume guztiei doako abortua bermatuko dien legedia defendatzen dugu, emakumeei euren gorputzaren gainean erabakitzeko eta euren sexualitateaz gozatzeko askatasuna ziurtatzen diena, ugalketa kontuan hartu gabe eta aukera sexual guztien errespetutik.

Eta azkenik, abortua emakumeen eskubideei lotutako zerbait dela uste dugun heinean, emakumeen gogoa soilik nahikoa izan beharko litzateke abortatu nahi duten ala ez erabakitzeko. Horregatik diogu eskubideak ez direla negoziatzen. Ez dira negoziatzen gai hau auzi moral eta bizitzaren defentsa moduan aurkeztu nahi duten taldeekin. Ez da negoziatzen pertsonen erabakitzeko eskubidearen gainetik, familia tradizionalean eta balore zehatz batzuetan oinarritutako bizitza eredu bat defendatzeko eztabaida hau erabiltzen duten taldeekin. Ez da negoziatzen eliza katolikoaren hierarkiarekin, oraindik ez duenak ulertu erlijioa eremu pribatura mugatu beharreko zerbait dela, eta euren sinesmenen gainetik estatuak eskubide guztiak bermatu behar dizkiela herritar guztiei, eta batzuei ez gustatu ere, emakumeenak barne. Ez da negoziatzen iritzi publikoa nahastu nahi dutenekin, abortua pertsona guztien artean, informazio guztiarekin eta proposamen guztiak ezagututa eztabaidatzea galarazten dutenak.

Emakumeen eskubideen aurkako eraso bortitz honen aurrean, mobilizatzera deitu nahi dugu, herritarren gehiengoa bestelako gizarte baten alde dagoela erakusteko, emakumeen eskubideak guztiz bermatuko dituena, haurdunaldiaren etete boluntarioaren legeztatze zabalagoa eta aurrerakoiagoa abiapuntu izango dituena. 

Berriak

Makro-epaiketen helburu politikoak salatu eta deituko diren mobilizazioekin bat egiten du EHBilduk

Berriro ere, indarrez, eskubide zibil eta politikoak urratuz, makro-epaiketa biren hasiera dugu aurrean. Gaur bertan gazte mugimendu independentistaren aurka hasiko dena, 26/11 sumario bezala ezagutzen dena, eta 40 gazte Audientzia Nazionalaren aulkietan eseriko dituena; eta ostegunean hasiko dena 35/02 bezala ezagutzen dena, eta hainbat ordezkari politiko eta Herriko Taberna zein elkarteko ordezkariak epaitiko dituena.

Guztira 80 lagun, Euskal Herritar auziperatuen aulkian. Zio eta helburu politiko argiak dituen epaiketa baten aurrean gaude, dena ETA da, estrategiaren baitan. Bakearen eraikuntza eta Normalizazio politikoa oztopatuz; euskal herritarron eta erakundeen eskubide zibil eta politikoak ukatuz. Agerian utziz Estatuko botere desberdinen jokabide eta izaera antidemokratikoa.

ETAk borroka armatua utzi zuenetik, ziklo berri bat, garai berri bati ekin genion Euskal Herrian. Baina batuek nahiago izan dute, iraganeko jokabideetan katramilatuak geratu.

Denborak erakutsi digu ezer gutxi espero dezakegula Madrileko Gobernu zein botere desberdinetatik, eta guk soilik, eraikiko dugula Euskal Herritik, Euskal Herriarentzat guztion artean Bakea eta elkarbizitza demokratikoa. Hori dela Espainiako agintariak mugiarazteko bide bakarra. Nazioarte mailan beraien aurpegi antidemokratiko, oztopatzailea ikustarazteko bide bakarra. Eta ziur gaude lortuko dugula. Ez da erraza izango. Gordina eta latza izaten ari den bezala hainbat eta hainbat euskal herritar bahituak izatea Espainiako kartzeletan, behin eta berriro beraien eskubideak urratzen direla ikustea.

Baina lanean jarraituko dugu, bakearen, elkarbizitzaren alde gauden guztion indarrak bilduz, indarrak artikulatuz, pertsona guztien eskubideak errespetatuak eta bermatuak izateko; hainbat eta hainbat familien sufrimenduarekin amaitzeko. Eta Pertsona guztiek, ideia guztiek, proiektu guztiek tokia izango duten Herria
eraikitzeko.

Hori dela eta, esandako guztiarekin bat egiten duten herritar, erakundeei eskaera zuzena egin nahi diegu gaurko agerraldian: Makro- epaiketa bi horien aurka deitu diren eta deituko diren mobilizazio eta ekimenetan parte hartzea. Eta bukatzeko, gure aldetik aste honetan epaiketan murgilduko diren pertsona eta familiei gure elkartasuna eta animoak helarazi nahiko genizkieke. Beraiekin gaudela.

Berriak

Asier Vega: “Atxilotuen delitu bakarra elkartasuna da”

Alternatibako bozeramaile Asier Vegaren adierazpenak joan den larunbateko manifestazio nazionalaren hasieran.

1. Herriraren kontrako operazio bortitza salatu nahi dugu, atxilotu zituzten 18 lagunen delitu bakarra elkartasuna eta presoen eskubideen errespetua babestea besterik ez delako.

2. Herriraren jarduera legez kanpo utzi izana estatuaren totalitarismoaren adierazlea da. Atxilotuen kargu guztiak kendu eta Herrira legeztatzea exijitzen dugu.

3. Onartezina da ere Beltran de Herediaren ertzainak jokatu duen papera, Guardia Zibilaren bizkartzain aritu ez ezik, gure senatari bat, Amalur Mendizabal,  jipoitzera heldu delako. Argitu dezatela eraso horren ardura.

4. Txalogarria da, aldiz, jendearen erantzuna, kaleak bete ditu gertatutako salatu eta atxilotutakoen askatasuna exijitzeko. Gaur Bilbon gertatuko den bezala.

https://fbcdn-sphotos-a-a.akamaihd.net/hphotos-ak-prn2/1265554_733856379965014_1248909769_o.jpg

https://fbcdn-sphotos-f-a.akamaihd.net/hphotos-ak-ash4/1273505_733856639964988_401085954_o.jpg

https://fbcdn-sphotos-d-a.akamaihd.net/hphotos-ak-ash3/857220_733856686631650_792436283_o.jpg

https://fbcdn-sphotos-g-a.akamaihd.net/hphotos-ak-prn2/1277380_733856693298316_575822101_o.jpg

https://fbcdn-sphotos-c-a.akamaihd.net/hphotos-ak-ash3/135216_733856869964965_1334171351_o.jpg

https://fbcdn-sphotos-e-a.akamaihd.net/hphotos-ak-ash3/1277547_733856873298298_1777255685_o.jpg

https://fbcdn-sphotos-d-a.akamaihd.net/hphotos-ak-prn2/1266840_733856996631619_804526865_o.jpg

https://fbcdn-sphotos-b-a.akamaihd.net/hphotos-ak-prn2/1291864_733856989964953_877163053_o.jpg

https://fbcdn-sphotos-d-a.akamaihd.net/hphotos-ak-frc3/1277228_733857329964919_454092124_o.jpg

https://fbcdn-sphotos-a-a.akamaihd.net/hphotos-ak-frc1/1274328_733857753298210_1537905914_o.jpg

https://fbcdn-sphotos-f-a.akamaihd.net/hphotos-ak-ash4/1269458_733857733298212_2095801788_o.jpg

https://fbcdn-sphotos-d-a.akamaihd.net/hphotos-ak-prn2/1277624_733858309964821_639699772_o.jpg

https://fbcdn-sphotos-h-a.akamaihd.net/hphotos-ak-ash3/1278006_733858789964773_575399030_o.jpg

https://scontent-b-ams.xx.fbcdn.net/hphotos-prn2/1391528_733858759964776_1162598385_n.jpg

https://scontent-a-ams.xx.fbcdn.net/hphotos-frc3/1380157_733858849964767_2041340413_n.jpg

Berriak

Estatuaren indarkeriaren aurrean, Herriraren elkartasun itsasoa

Oskar Matute – Alternatibako bozeramailea

Euskal Herrian, antzinatik jarduera errepresiboen laborategi izan den honetan, egun Estatu espainiarraren estrategia bikoitzaren eraginpean bizi gara gaur. Batetik, nolabaiteko erosotasun egoera irudikatu nahi dute, indarkeriaren desagerpenaren ondorio, soilik ETArena aipatzen dutela. Bestetik, estatuaren eta bere politika antidemokratikoen aurrean antolatutako erresistentzia eta mobilizazio egitura guztien aurkako errepresio etengabea erabiltzen jarraitzen dute.

Hala, bake prozesu erreal bat eraikitzeko beharra defendatzen dugunok, inplikatutako eragileak, ETA barne, animatzen jarraitzeko prest gaudenok, aldebakarrekotasunaren bidean aurrera egin nahi dugunok, ETAren jarduera armatua desagertu ostean gatazka amaitutzat ematen dutenen irakurketa politikoarekin topo egiten dugu.

Eta nahiz eta gobernu, salbuespen auzitegi eta talde mediatikoen itxura hartzen duten botere-baliabideak erabili; nahiz eta gure herriaren kultura eta historiaren ukapena, errepresioa eta bere kontakizunaren zein zoru etikoaren inposaketa, edota herritar guztiengan eragin nahi duten narkolepsia bezalako tresnak erabili, askok Euskal Herrian oraindik ez dela inolako bake prozesurik ezta honi lotutako adiskidetze testuingururik osatu baieztatzen dugu.

Estatu espainiarrak denborak markatzen ditu, komeni zaionaren arabera errepresioa eta paralisia erabiliz, gutxienez bi helburu lortzeko: lehenik indarkeria bakarra ETArena zela eta horren atzean ez zegoela inolako gatazka politikorik sinestaraztea; eta bigarrenik, Guardia Zibila bezalako indar errepresiboen bitartez, PNVren gobernu morroiak gidatutako Ertzaintzaren laguntzarekin batera, espainiarren irudimen kolektiboan gaitz guztien arrazoia ETAren existentzia eta iraunkortasunaren mehatxua dela berrezartzea.

Une historiko honetan, gaizki izendatutako trantsizio demokratikotik -faxista hutsak demokrata petoetan eraldatu zituenak- sortutako erregimenak porrot egin duenean, arreta desbideratu behar dute, eta gainera, barruan dagoen etsai baten aurka egiteko batasuna aldarrikatzeko aukera izan behar dute.  

Baina euren demokrazia, estatu autoritarioa normaltasunez janzteko erabiltzen duten estalkia besterik ez da. Estatu honetan inolako hauteskundeetara aurkeztu ez diren eliteak dira nagusi; gizartearen sektore gutxietsienei duintasunarekin eta giza zein lan eskubideekin bat datorren erantzun bat eskaini ezin diotenak, edo eskaini nahi ez diotenak, Troika ez haserrarazteko asmoz. Kudeaketa publikoaren etika eza dela eta, herritarrek euren zilegitasuna zalantzan jartzen dute eta gainera herri kataluniarraren ausardiaren aurrean erabilitako jazarpen metodoak agerian gelditu dira, Estatu espainiarra herrien espetxe bat dela eta larriki zauritua dagoela agerian geldituz.

Eta larriki zauritua dago, existitzeko eta bere buruari nazio deitu ahal izateko, Euskal Herria bezalako beste herri batzuen zapalkuntza behar duelako. Eta hona hemen diferentzia garrantzitsu bat; guk ez baitugu Espainia behar gure burua nazio gisa aitortzeko.

Horregatik ez dute bake prozesurik ezta irtenbide demokratikorik nahi: Euren lotsa estaltzeagatik, euren ezintasun eta interes ezkutuak estaltzeagatik. Baina Euskal Herrian oso argi daukagu jarduera armatua bertan behera uzteko ETAk hartutako erabakiak ez duela atzera bueltarik eta bere egitura militarrak desegiteko eman beharreko pausuak ematen jarraitzeko asmoa sendoa dela.

Hori jakin badakite egun gure herria oraindik desagertu ez den indarkeriaren kiribilean sartu nahi dutenek, inoiz barkamenik eskatu ez dutenek, eragindako biktimez damutu ez direnak eta armak uzteko asmorik erakutsi ez dutenek: indarkeriaz jokatzen duten Estatuaren aparatuek.   

Irailaren 30ean, indarkeria honek Herrira, euskal preso politikoen eskubideen aldeko mugimenduaren bihotzaren aurka jo zuten. Eta gure gizartearen zati handi bat erasotzen ari zela jakinda egin zuten. Herrira erakundeak presoen eskubideen defentsa oraindik hasteko dagoen bake prozesuaren oinarrizko zutabe bihurtu du eta euren jarduerak beti lehenetsi du eskubide guztien errespetua pertsona guztientzat.

Horregatik Herrira guztiok garela esatera ausartuko naiz. Laster beteko dira bi urte ETAk bere ekintza armatuarekin bukatuko zuela adierazi zuela. Garai berria, biktimen errespetutik eta egia bilatuz, pertsona guztiei, presoak barne, eta gure herriari, Euskal Herriari, eskubide guztiak itzuliko dizkien konponbide prozesu bati ekiteko baldintzak errazteko balio izatea nahi dugunak gehiengoa gara.

Horrela, Euskal Herrian garatutako prozesu oso bat behin eta berriz mindu nahi duen indarkeriaren aurrean, milaka pertsonek, tantaz tanta gure herrietako kaleak beteko ditugu, bahituta mantentzen gaituen uharka gainditu arte; iheslari edo pertsona preso bakoitzaren askatasun indibidualetik eta bere burujabetza berreskuratzeko bidean dagoen herri honen askatasun kolektibotik aldetzen gaituzten espetxeetako barrak  gainditu arte. Burujabetza hori aldaketa politiko eta sozial baten zerbitzura egongo da eta boterea esku egokietan utziko du, Euskal Herriko biztanleen eskuetan alegia, horietan besterik ez.

Honakoetan argitaratu da:

Astekari Digitala

Berria

Naiz

Berriak

Ta zer ez da berdin

Xabier Soto – Alternatiba

Ez dira betiko garai onenak. Azken finean gizaki hutsak gara. Bai, aitortzen dut: izenburua eta testuaren hasiera abesti desberdinen letrarekin osatuta daude, biak ere Hertzainak taldearenak. Hitz egin dezagun bada Hertzainetaz, Herriaren zaindariak izan beharko liratekeen horietaz. Hitz egin dezagun Herriraren aurkako operazio politiko-militarraz.Izan ere, astelehen eta astearteko irudiek 80. hamarkadako garairik latzenetarikoetara itzularazi gaituzte bapatean, back to the future pelikularen euskal remake makabro bat ikusten ariko bagina bezala.

Hala ere, sinetsi nahi dut Espainiako katakunbetatik orkestatutako Herriraren aurkako operazioaren ondoren ezer ez dela berdina izango. ETAk bere ekintza armatuen amaiera iragarri zuenetik, bake prozesua -hau existitzen bada- bere egoerarik okerrenean dago #sindudarikgabe, baina honek ere badu irakurketa optimista bat: hemendik aurrera gauzek onera besterik ezin dute egin.

Astelehen gauean Hernanin (eta beste hainbat tokitan) Espainiako Guardia Zibilaren esanetara aritu ziren Ertzainen indarkeriazko jarrera kontuan hartuta, hainbat alorretan aldaketak saihestezinak izango direla deritzot. Alde batetik, EAJ eta Sorturen arteko erlazioak, bakegintzari dagokionean behintzat, ondo bideratu beharko dira; ez badugu haien arteko zubi-arteko hobiigaroezina eraikitzerik nahi. Beraien ardura izango da hau horrela izatea, eta honetan behintzat haiengan konfidantza badaukat.

Beste alde batetik, bai EHBilduk bai Eusko Jaurlaritzan agintean den EAJk berak hainbeste aldiz aipaturiko Ertzaintzaren birmoldaketa inoiz baino beharrezkoagoa dela erakusten dute Amalur Mendizabalen buruan oraindik itxi gabe dauden 8 puntuek. Honen harira, gogora ekarri nahi ditut duela 5 hilabete egunkari honetan bertan ERNE sindikatuko koordinatzaile Roberto Seijok desobedientziaz galdetuta esandako hitzak: “Orain esaten badidate ‘jo ezazu kazetari hau’… ‘Ez, ez, nik ezin dut hori egin. Zergatik joko dut ba?’ Eta ez dut agindua betetzen”. “Kazetari” ipintzen duen tokian “Senatari” ipini, eta hortxe izango duzue elkarrizketa gaurkotua esklusiban.

Badakit ordea, hasieran nioen bezala, azken finean gizaki hutsak garela eta hortaz, gauza bat dela desio duguna -kasu honetan, berbalizatua izan dena- eta beste gauza bat dela errealitatea -gure ekintzekin islatzen duguna-. Esan beharrik ez dago kasu honetan errealitatea desioari gailendu zaiola beste behin ere. Txoritxo batek esan zidan behin desioak errealitatera moldatu behar direla, eta inoiz ez alderantziz; baina guztiok ezagutzen dugu, eta gure esku daukagu, errealitatea gure desioetara moldatzeko tresna magiko bezain eraginkorra: DESOBEDIENTZIA.

Honengatik guztiagatik, artikulu hau esperantza islatzen duen aitormen batekin amaituko dut: ea laister denboran atzera bidaiatu eta irria ahoan dugula honakoa esan dezakegun: ezer ez da berdin.

Bihoakie besarkadarik beroenak 18 atxilotutakoei eta Amalur Mendizabali.

Berriak

Alternatibak bihar Bilboko kaleak zipriztinduko dituen elkartasun itsasoaren tanta izatera deitu du

Alternatibako bozeramaile Asier Vegak bihar Bilboko kaleak zeharkatuko dituen manifestazio nazionalean parte hartzeko deia egin du euskal presoen eskubideak aldarrikatu eta Herriraren kontra aste honetan eginiko operazio polizial “bortitza” salatzeko. Elkarretaratzea 17:30etan abiatuko da La Casillatik “Tantaz tanta euskal presoen eskubideen alde” lemapean.

Alternatibatik azpimarratu dute ezinbestekoa dela “herritarren borondateaz eginiko harresia eraikitzea, gatazkaren konponbidearen, normalizazioaren eta eskubide guztiak berrezartzearen alde, eskubide zibil, sozial eta politikoa guztiak euskal herritar ororentzat”. Hala, ezkerreko alderditik Euskal Herriko auzo eta hirietan “egunotan ikusten ari garen elkartasun itsasoaren tanta” izatera deitu dute, “Espainiako Erresumaren politika zapaltzaileen amaiera eskatzeko, gizarteak eskatzen duen prozesua oztopatzea besterik bilatzen ez duena”.

Berriak

Alternatibak Segurtasun sailburu Estefania Beltran de Herediaren dimisioa exijitu du

Alternatibako bozeramaile Asier Vegak salatu egin du Ertzaintzak atzo azaldutako jarrera Herriaren kontrako operazioaren harira egin ziren elkarretaratzeetan, izan ere, “inolako beharrik ez zutenean indarkeriaz aritu ziren espainiar Estatuaren botere gehiegikeriaren aurrean haserrea eta inpotentzia adierazten ari ziren herritarren kontra”. Hala, Vegak bereziki larritzat jo du “Amaiur Mendizabal senatariari bortizki oldartu izana, egoera baretu besterik egin nahi ez zuenean eraso baitzioten, bere akreditazioa eskuan zuen arren”.

Alternatibatik salatu dute Ertzaintzaren jarrerak “Guardia Zibilarekin Euskal Herrian kaosa zabaltzeko elkarlanean aritzeko inolako oztoporik izan ez duen Eusko Jaurlaritzaren jokabideari erantzuten” diola eta, horrexegatik, Estefania Beltran de Heredia Segurtasun Sailburuari exijitu dio bere kargutik berehala dimititzeko.

Talde ezkertiarreko bozeramaileak, halaber, Urkullu lehendakariari zuzendio dizkio hitza, “berriz ere galdetu behar diogu ea zein den armak bere herritarren kontra erabiltzeko inolako eragozpenik ez duen gobernu baten zoru etikoa”. Ildo horretatik, Vegak leporatu dio” egun batean, bere alderdiaren jaian, burujabetzaz hitz egitea eta, hurrengo egunean, erregimen espainiarraren morroi gisa jokatzea, Auzitegi Naizonala bezalako erakunde postfrankista batentzat bizkartzain lanak eginda”.

Azkenik, polizia autonomikoa desegitearen aldeko apustua egin du, “baldin eta bere papera boteretsuen mesedetara eta euskal herritarren kontra aritzea bada; elkartasun harresiak hautsi, beren lanpostuen defentsan ari diren langileak kaleratu eta Guardia Zibilaren kopia txarra izatera mugatuko bada”.

Berriak

Alternatiba | Ezkerra eraldatzearen erronka

X