Etiketa: Gizartea

Bilbo, hiri santua

Ana Etxarte eta Carmen Garcia – Alternatiba Bilbo

Bistakoa da gizartea gero eta gehiago aldentzen ari dela erlijioengandik, eta bereziki eliza katolikotik, gehiengo sozialaren balore eta sinesmenak ordezkatzeko erakusten duen ezintasuna dela eta. Aitzitik, Bilboko Udala eta bestelako instituzioak, Estatu eta Elizaren arteko harreman estua mantentzen tematuta daude, akonfesionaltasuna gauzatzeko duten erantzukizunari aurre egin ordez.

Harreman estu hau, Udalak Eliza Katolikoaren alde duen jokaera bereizlea, azken Udalbatzan ikusi ahal izan dugu. Bertan, PNVk babestu egin zuen Bilboko Aste Santua Interes Kulturaleko Ondasun bihurtzeko PPk egindako proposamena, euren esanetan, Bizkaitar gehienen sinesbide erlijiosoa kristautasuna delako.

Gutxienez, gure buruari uste hau egiazkoa ote den galdetu beharko genioke. Eta azaleko irakurketa bat eginez, ezezko erantzuna datorkigu burura. Mezaren ostean edozein elizako atean biltzen den jende kopuruari besterik ez diogu erreparatu behar, tenplu kristauetara euren fedea praktikatzera doazenak jendetza ez direla ikusteko. 

Gainera datuak gure susmoa indartzera datoz. Eusko Jaurlaritzak duela gutxi argitaratutako ikerketa baten arabera, euskal gazteriaren %54ak ateo, agnostiko edo ez erlijiosotzat jotzen du bere burua. Kopuru hau urterik urte hazten doa, eta bere burua katolikotzat jotzen duen %34ari aurre egiten dio, zeinetatik %4ak besterik ez dio praktikantea denik.

Hau da egungo errealitatea, zeinean erlijio hegemonikoak espazio publiko guztiak indarrez hartzen zituen garai ilunei aurre eginez, gizartea erlijiotik gero eta aldenduagoa dagoen, inongo kredorik praktikatu gabe.   

Baina dirudienez, PPk datu hauek alde batera uzten ditu, eta nahiago du Eliza Katolikoarenak kontuan hartu. Hauen arabera, bataiatutako pertsona oro eliztarra da. Ez du axola pertsona horrek erlijioa ez praktikatzea, ez sinestea edota katolizismoari uko egin nahi izatea. Eliza katolikoaren ustez, Estatuarekin negoziatu eta etekin ekonomikoak lortzeko asmoz, pertsona horiek eliztarrak izango dira betirako. Edozein sektan gertatzen den bezala, behin sartzen zarela, ezin izango zara inoiz irten.  

Bilboko Aste Santua Interes Kulturaleko Ondasun bihurtzearen alde PNVk hartutako erabakiaren ezaugarririk larriena, gure gizartearen izaera akonfesionalaren eta laikotasunaren aurka jotzea da. Gaur egun, erlijio katolikoaren arabera definitutako hamaika ekitaldi, jaiegun eta errealitate publiko daude. Erabaki honek, are gehiago indartuko du zilegi ez den logika hau, tradizio katolikoetatik eta hauen atxikimendutik gero eta aldenduagoa dagoen gizarteari so egiten ez diona. Bertan, erlijio aniztasuna oso zabala da, eta erlijio guzti horiek eremu pribatura mugatu behar izango lirateke.  

Laikotasun gehiago behar dugu; bide horretan aurrera egin behar dugu. Hauxe da sinesmen ezberdinak dituzten pertsonen artean bizikidetza bermatzeko testuinguru bakarra. Eta arau hori ez betetzeak diskriminazioa, pertsona batzuen baloreak besteei inposatzea eta oro har, kontzientzia-askatasunaren oinarrizko eskubidearen urraketa dakar.

Administrazio publikoa erlijio ezberdinetatik aldentzea, udal publizitatean Aste Santuko prozesioak gure ondare eta izaeraren ezaugarritzat ez jasotzea dakar, pertsona askok ez dugulako gure burua erlijio katolikoarekin identifikatzen. Honez gain, eta hau oso garrantzitsua da murrizketa garaietan, egitasmo hauek diru publikoarekin -aurten 9.000 euro izan dira- ez finantzatzea dakar. Egokiagoa litzake diru hori pertsona guztien sinesmenak errespetatzen dituzten bestelako kultur-ekintzei ematea, auzoetako jaiei, esaterako.

Zoritxarrez, PNVk hileta zibilak leku publikoetan eta udal lokaletan egitea onartzeko Bilduk aurkeztutako mozio bati ezetza ematen dion bitartean, baietza ematen dio beste proposamen honi, PPren eta PNVren eskuma bilbotarraren izaera babestuz: erlijio kontserbadorismoa, Bilbo turismoari zuzendutako hiri-erakustoki batean bihurtzeko obsesioari gehituta.

Azkunari eta bere lantaldeari adierazi nahi diogu Bilbotarrek nahiago dutela bestelako egitasmo batzuk Interes Kulturaleko Ondasun bihurtzea. Gure herrian benetako sustrai sakonak dituzten egitasmoak alegia, guztion sinesmen eta eskubideak errespetatzen dituztenak, eta sufrimenduarekin, erruarekin, odolarekin eta militarismoarekin zerikusirik ez dituztenak, hauek baitira Aste Santua definitzen dituzten ezaugarriak. Nahikoa sufrimendu pairatu behar izaten dugu jada, eskumako alderdiek martxan jartzen dituzten erreforma eta murrizketen ondorioz.

Berriak

Onartezina da Bizkaiak saskibaloi talde bati 5,2 milioi euro ematea

Jakin bagenekien Jose Luis Bilbao eta PNV, saldu nahi digutenaren kontra, oso kudeatzaile txarrak direla. Bizkaitarrekiko behintzat, izan ere, haien adiskide bankari eta enpresaburu handika poz-pozik dituzte haien mesederako eginiko zerga politikarekin. Supersur errepidea dugu adibiderik onena, inork behar eta erabiltzen ez duen makro azpiegitura defizitarioa. Urtero gero eta zulo handiagoa eragiten dio Bizkaiko ekonomiari, baina hasieratik ere, Bilbaok berak aitortu zuen bizkaitarron hainbat belaunaldirako hipoteka zela obra hura… Baina aurrekari horiekin ere, ezin genuen espero Bizkaiko Foru Aldundiaren azken erabakia, kirol talde pribatu bati 5,2 milioi euro bideratzea. Noiz era politika sozialetarako dirurik ez dagoela esaten duenean. Honetaz ari ote zen duela hilabete batzuk “gastuak egokitu eta ekonomia sustatzeaz” hitz egin zuenean? Iruzurraren kontra duela gutxi aurkeztutako kanpaina berregin diogu Bilbaori: Adarra jotzen?

Berriak

Adegiren jarrera eta zaharren egoitzen auzian EAJk patronalari emandako babesa salatu ditu EHBilduk

Administrazioarekin plazak hitzartuta dituzten Gipuzkoako zaharren egoitzetako eta Eguneko Zentroetako 4.800 langileen lan-baldintzak hobetzeko 8,2 milioi eurotako diru-partida eskaintzeko konpromisoa hartu zuen Diputazioak, joan den otsailaren 8an.

Era horretara, sektoreko sindikatuen eta patronalaren arteko negoziazioetan zegoen blokeo egoera konpontzeko urratsa eman zuen Diputazioak. Adegi eta Lares patronalak eta ordezkaritza soziala urritik ari dira negoziatzen, akordietara iritsi ezinik, eta hainbat greba ere egin dira. Mobilizazio gehiago ere iragarri dituzte.

Blokeo egoera gainditu ezean eta akordiorik lortu ezean, ezin izango da herrialdeko hitzarmenik sinatu eta, ondorioz, sektore honetan estatuan dagoen erregulazioa jarriko da indarrean. Horrek eragin zuzena eta kaltegarria izango luke langileen lan-baldintzetan eta eskaintzen den zerbitzuaren kalitatean.

Foru Erakundeak gure herrialdean eskaintzen diren plazen %87 finantzatzen du, eta 4.800 langileen soldatak ere berak ordaintzen ditu. Horrenbestez, kontzertatutako plaza publikoetan eskaintzen den zerbitzuaren kalitatea bermatzearen azken erantzulea da Diputazioa; era berean, zentro horietan lan egiten duten pertsonen lan-eskubideak bermatuak daudela ziurtatu behar du, herritarrei eskaintzen zaien zerbitzuan eragin zuzena dutelako langileen baldintzek.

Horregatik guztiagatik, eta bi aldeek Administrazioa interpelatu ondoren, Foru Gobernuak proposamena egin zien patronalari eta sindikatuei, blokeo egoera gainditzeko helburuarekin.

Baina Foru Gobernuak agertutako erantzukizunari eta konpromisoari salaketa batekin erantzun dio Adegik. Gainera, 187.000 euroko kalte-ordaina eskatzen dio.

Egoera honen aurrean, zera nahi dugu:

* Zaharren egoitzetako eta Eguneko Zentroetako 4.800 langileei: ez zaudete bakarrik. Lan baldintza duinekin aritzeko eta zuen eskubideak ez murrizteko herrialdeko hitzarmena eskuratzeko egiten ari zareten borrokarekin bat egiten du EH Bilduk. Espainiako lan erreformaren aurka izango gara beti. Ez gara makurtuko patronalaren aurrean.

* Gipuzkoako Foru Aldundiari: herri honetako langile klasearen bizkarrak zaintzen jarrai dezala, batez ere jokoan dagoena zerbitzu publikoen kalitatea eta zerbitzu publikoetako langileen eta erabiltzaileen duintasuna denean.

* Adegiri: kendu dezala Diputazioaren aurka jarri duen salaketa, negoziatzera eser dadila eta Gipuzkoako langileen bizitza kaskartzen duen Espainiako lan erreforma indarrean jartzeari uko egin diezaiola. Patronala ase-ezina da. Zaharren egoitzetako langileen gero eta diru gehiagorekin geratu nahi du, baina orain, foru altxortegitik ere beste zatitxo bat atera nahi du, Diputazioak kalte-ordaina ematea eskatu duelako. Iraingarria da hori gure herrialdeko zerbitzu publikoen erabiltzaileentzat, 187.000 euro kendu nahi dizkietelako.

* EAJri: patronalaren interesen zerbitzura aritzeari utz diezaiola eta Gipuzkoako herritarren interesak defendi ditzala. Izan ere, Diputazioaren aurka Adegik jarritako salaketaren edukietan agerian geratu da EAJ praktikan Adegiren beso politikoa dela instituzioetan. Adegik jarritako salaketaren oinarria  Batzar Nagusietan EAJk egindako galdera bati Diputazioak emandako erantzunean dago. Kontrol publikorako dauden mekanismoak nahi bezala erabil ditzake EAJk, eta nahi beste galdera egin ditzake Batzar Nagusietan, baina, kasu honetan, galdera egin du patronalari mesede egiteko eta Diputazioaren interesak kaltetzeko helburuarekin. Azalpen asko eman beharko dizkiete zaharren egoitzetako langileei eta erabiltzaileei. EAJk patronalarentzat egiten du lan; EH Bilduk, aldiz, herritarren interes orokorraren alde eta langileen duintasuna bermatzearen alde egiten du lan.

Berriak

Alternatibak Adegiri leporatu dio zahar-etxeetako langileen eta Gipuzkoako Aldundiaren diruarekin “harrapakeria egin” nahi izatea

Alternatibako bozeramaile nazional Oskar Matutek gogor kritikatu du Adegi patronalak Gipuzkoako Aldundiko Politika Sozialeko Sailaren kontra aurkeztutako salaketa, atzo prentsaren bitartez honen inguruko xehetasun gehiago ezagutu eta gero. “Emakumeen eta langileriaren kontrako eraso berri eta basati baten aurrean gaude. Gipuzkoako patronalak etekin handiagoa atera nahi dio eta ez zaio inporta bidetik bereziki desegonkorra eta femenizatua dagoen sektore hau birrintzea, krisi ekonomikoa, krisi soziala eta zaintzaren krisia areagotuta. Lan erreformak, zaintza zerbitzuetan eta emakumeen bizitzan ekarriko lukeen edesegonkortasuna eta baliabide eskasia onartezina da”.

Adegik Aldundiaren kontra irekitako auziaren harira -Gipuzkoako Batzar Nagusietako agindua bete eta ezinbesteko lan publikoa egiten duten milaka langileren lan baldintza duinak bermatu nahi izanagatik- Adegik ia 190.000 euroko kalte ordaina exijitzen du ere: “Salaketa ohartarazpena da; administrazioek lan erreformaren kontrako jarrera aktiboa mantendu ez dezaten. Baina  Alternatibatik eta EHBilduren bidez ordezkaritza dugun administrazioetan, ez dugu horrelakorik onartuko”.

Alderdi ezkertiarreko bozeramaileak Miguel Angel Lujua, Confebaskeko presidentearen hitzak gogoratu ditu, klase borroka iraganeko gauza zaharkitua dela aipatzean “enpresaburuen eta langileen iritziak eta interesak izatez kontrakotzat jotzen dituena eta alde batentzat ona dena, halabeharrean bestearentzat txarra izango dela uste duena”. Matutek baietsi duenez, desberdintasuna ondorengoan datza: “Lehenengo aldiz, patronalak ez du aliaturik lortu Gipuzkoako Foru Aldundian. Lehenengo aldiz, Gobernu batek bere herriko langileen alde egin du eta enpresa klasearen nagusikeriari aurre egin dio”.

Alternatibatik gogoratu dute politika neutrotik ez dagoela, “klase baten mesedean egiten du bestearen kalterako. Adegiren kasuan, proposamena langileen poltsikoetatik dirua hartzea da ondoren, enpresaburuen poltsikoetan gordetzeko. Baina ez gara lan erreforma ezarri nahi dutenen bidaide izango, ezta langileak eta hauek zaintzen dituzten pertsonei kalte egin nahi dietenen bidaide ere ez”.

Legebiltzarkidearen hitzetan, “Adegi hegazti harrapari modura jokatzen ari da, langileen soldataz jabetzeko lotsagabekeria duena eta gainera, epaitegian Aldundiari gipuzkoarren diruarekin kalte ordaina lortu nahi du”. Alabaina, “Adegik jakin beharra dauka, Aldundiko aurrekontua bere zerbitzura erabili zezakeen garaia bukatu dela”.

Bukatzeko, Matutek EAJren jokaera salatu du, “beti bezala, patronalarekin eta enpresaburu klasearekin bat datorrela erakutsi eta langile klasearen kontra dagoela egiaztatu duelako. Bere printzipio gabezia agerian utzi du, Batzar Nagusietan informazioa eskatzeko eskubidea erabili izanagatik, informazio hau Adegiri emateko helburu bakarrarekin. Adegi datuekin hornitu du, honek gero zahar-etxeetako langileen eta Gipuzkoako Aldundiaren kontrako erasoan erabili ahal izateko”.

Berriak

Aguraindik ere, matxinatzeko arrazoiak

Toni Ramos – Alternatiba Araba

Krisiaz modu orokorrean hitz egitea, honezkero, nekagarria eta errepikakorra ere izan daiteke. Dagoeneko, ezkerreko gizon eta emakume guztiok bat gatoz esatean hau ez dela krisi ekonomiko soila, ez dela krisi zikliko horietako bat, kapitalismoaren babesleek irakatsi nahi izan diguten bezala, igaroko diren horietakoak eta azken buruan merkatuak ia berez konponduko dituena. Izan ere, errealitatean, sistema kapitalista beraren krisi bat da, krisi ekonomiko, ekologiko eta energetiko batean ondorioztatu dena. Egoera honetan, kaltetuak betikoak dira, bereziki emakumeak. 

Gertuko kasuak ezagutzea interesgarriagoa izan daiteke; Gogoeta eragin eta horrelako egoerak pairatzen dituzten pertsonez errukiarazten gaituztenak; gehiago ala gutxiago, basakeria honen eraginik jasotzen dutenak eta noiz edo noiz mobilizazioren bat babesteko kalera ateratzen animatzen diren horiek hunkitu ditzaketenak. Hau eraginkorragoa izan daiteke kontzientziak pizteko, bai, baina kasu horiek ere, gero eta gehiago, gure egunerokotasunaren parte dira eta ohikoak bihurtzeko,  eta beraz sentsazionalismoan erortzeko arriskua dute.

Inguruan begiratu besterik ez dugu egin behar, bizilagunak entzun, udal asanbladetara joan (deitzen diren lekuetan, noski), kalean dauden kartelak begiratu eta norberaren burua ispiluan begiratu. Aski da gainean dugun egoeraz jabetzeko. Gure inguruan gertatzen dena azaletik aztertu besterik ez dugu behar. Honen bitartez ulertuko dugunez, ez da beharrezkoa azalpen global bat bilatzea, azalpena bere horretan datorrelako, eta ez dugu eredu dramatiko bat behar, parez pare dugu eta.

Nik ariketa hau praktikan jarri dut nire herrian, Agurainen. Higiezinen eztandak eta bestelako txorakeriek eraginda, aurreko udal gobernuak sustatutako kudeaketa negargarriaren erruz Udalak duen zor izugarriaz konturatu naiz; FCC talde boteretsuaren filial batean estalitako erraustegi bat Olaztin eraiki nahi izateagatik guztiok sufritzen dugun arriskua ikusi dut; langabeziaren lekuko izan naiz, azken urtean %10eko igoera izan duena, Agurainen %19ko tasa eutsiezinera heldu dela; eta etxe kaleratzeen itzal makabroa eta baita familia aguraindarren zelatan dauden putreak ere. Horrela, kasu jakinetan gelditzeko beharrik gabe eta azalpen globalak emateko beharrik gabe, egoera onartezina dela ondorioztatu dut eta arrazoi nahikoa dauzkagula bidegabekeria horien guztien aurka kalera ateratzeko eta matxinatzeko; sistema kapitalistaren aurka matxinatzeko. 

Baina Agurainen kasua ez da bakarra, ez da salbuespen bat, ez da aparteko gertakari bat. Eta gure herri eta hiri guztietan, gure inguruan gertatzen denari buruz azaleko analisi hau bera egiten badugu, argudio berdin eta ezberdinekin topo egingo dugu, kalera irteteko eta munstro zapaltzailearen  aurka eta bere ondorioen aurka matxinatzeko.

Berriak

Bilduk berebizikoa ikusten du ostalarien interesak auzokideen deskantsurako eskubidearekin tartekatzea

Ana Etxarte eta Aitziber Ibaibarriaga zinegotziek, Bildu Udal taldeak Ostalaritza Ordenantza moldatzeko egindako ekarpenak aurkeztu dituzte gaur goizean. Bilduk, aurretiaz ostalaritzaren egoeraren inguruko diagnostiko bat egin ez izana deitoratu du, era honetan, ostalaritza, espazio publikoa eta terrazak, ingurugiroa edota zaraten arloak bere baitan kontutan hartu ahal dituen proposamen globala egin ahal izateko, soilik honela tartekatu baitaitezke ostalaritzaren interesak eta auzokideen deskantsurako eskubidea. Etxartek adierazi du hurrengo Udalbatzan Aisialdiaren Zarata Mapa egiteko proposamena aurkeztuko dutela, modu honetan, aipatutako jarduerak eragindako zarata maila neurtu ahal izateko.

Etxartek eta Ibaibarriagak, Udal gobernu batzordeak egindako Ostalaritzaren gaineko Ordenantzaren aldaketa “zuloa estaltzeko” egin dutela adierazi dute. Ibaibarriagak salatu du, Udalak, Ordenantza aurretiazko diagnostiko bat egin gabe abiatu duela etaauzo elkarteen parte hartzea kontutan hartu gabe “Udalak proposatutakoarekin bat egiten ez duena”.

Bilduko zinegotziek ezinbesteko jotzen dute hiriarentzat horren garrantzitsua den ostalaritza bezalako sektore ekonomikoaren, bizilagunen deskantsurako eskubidearen, ingurugiroaren zaintzaren eta espazio publikoaren arteko oreka bilatzea.

“Oreka hau bermatu ahal izateko ezinbestekoa da egoeraren diagnosi bat edukitzea, azken urteotan aisialdi ereduan ematen ari diren aldaketak kontutan hartuko dituena: Tabako lege berriak sortu dituen jende multzoen kontzentrazioak, kalean kokaturiko terrazen gorakada, eguneko tabernen ugaritzea zonalde batzuetan, eta abar luze bat”, azpimarratu du Ibaibarriagak.

Bilduk uste du Gobernu batzordeak egindako Ordenantza proposamenak “ez duela arazoaren muina konponduko”. Ibaibarriagak Udalari osoko ekinbidea martxan jartzea eskatu dio. “Deskantsurako eskubidea bermatzeaz gain, kalitatezko ostalaritza bultzatu beharra dago, eguneroko errealitatean oinarrituta egongo dena, eta ez soilik turismoaren baitan ezartzen diren espektatibetan. Ostalaritzaren sostengu nagusia eguneroko bezeroak dira eta horiei begirako neurriak planteatuko beharko lirateke”.

Antzemandako gabeziak gainditzeari begira, Udal talde soberanistak lau zuzenketa aurkeztu ditu eta, honekin batera, mozio-proposamen bat eramango du apirileko Udalbatzarrerako. “Bertan Aisialdiaren Zarata Mapa osatzea proposatuko dugu, modu honetan jakin dezagun behingoz zein den mota honetako jarduerek sortzen duten kaltea”, azaldu du Ibaibarriagak. Mapa hau osatu eta gero Ekintza Plan bat osatzea litzateke hurrengo pausua, Babes Bereziko guneak ezarriz, maparen bitartez bizilagunen osasunerako kaltegarriak izan daitezkeen zarata mailak gainditzen diren eremuetan.

Aurkeztu ditugun zuzenketak

  • Bertan behera geratzea II taldeari dagokionean lizentzia berrien tramitazio guztiak, Aisialdiaren Zarata Mapa osatu bitartean, Babes Akustikoko Eremu Berezietan. Babes Akustikoko Eremu Berezi hauek behin behineko izaera izango dute, Aisialdiaren Zarata Mapa osatu bitartean, dekretu baten bitartez eta kalearen edo plazaren morfologia, dimentsioak eta kalean dagoeneko ezarriak dauden ostalaritza jardueren portzentajea kontutan hartuta. 
  • Lizentzia motari dagokionean ezingo da I taldetik II taldera inongo aldaketarik eman,  Aisialdiko Zarata Maparen bitartez Babes Akustikoko Eremu Bereziak zeintzuk diren zehaztu arte. 
  • Hiriko zonalde zehatzetan ostalaritza jarduera berriak ezartzea debekatuko da eremu horiek Babes Akustikoko Eremu Bereziak izendatzen direnean, Aisialdiko Zarata Maparen bitartez. Babes Akustikoko Eremu Berezietan ez da aplikatuko 7. artikuluak distantzia minimoei buruz zehazten duena, baizik eta Ekintza Planak zehazten duena. 
  • Gaiaren inguruan bizilagunek ahalik eta informazio handiena izan dezaten, ostalaritza jarduera guztietako fatxadan edo atean kaletik errez ikusi daitekeen bereizgarri bat ezarriko da bertan jardueraren lizentzia mota eta bete beharreko ordutegia zein den izango dituena.
Berriak

Alternatibak Jose Luis Bilbaoren gobernuari leporatu dio gizartearen haserreaz jabetzea eta bere publizitatean barregarri uztea

Alternatibako Bizkaiko bozeramaile Asier Vegak salatu du aste honetan Bizkaiko Foru Aldundiak aurkeztutako kanpaina publizitarioa iruzur fiskalari aurre egiteko, bere “eraginkortasuna eztabaidagarria” izan daitekeen arren. Kanpaina honen iragarkietan sexu eta adin desberdineko pertsonak pankarta baten atzean manifestatzen agertzen dira “Guri iruzurrik ez” lemapean. Pankartan STOP seinale bereizgarria -iruzurraren kontrakoa kasu honetan- ere ikusten da, “kaleetan geroz eta maizago egiten diren kaleratzeen, iruzur politikoaren, langileriaren eskubideen eta lanpostuen suntsiketa dakartzaten lan erreformen aplikazioen kontrako protesten leloen eta sinboloen jabe egiteko ahalegin batean”.

Vegaren hitzetan: “deitoragarria da instituzio publiko batek Bizkaiko herri klaseei bizkarra ematea dirudunen faborean gobernatzeko, herriaren suminduraren sinbologia usurpatzen den bitartean, barregarri uzteraino. Iraingarria da benetan Bilbao-Iruarrizaga bikoteak ezartzen dutenen tankerako politiken kontra kalean egunero erabiltzen diren lelo eta pankartak imitatzea”. Modu berean, iruzur fiskalaren kontrako publizitatea gaitzetsi du, Foru Ogasunak iaz antzemandako zenbatekoa %19an jaitsi zen bitartean.

Hau guztiarekin batera, alderdi ezkertiarreko bozeramaileak ondorengoa azpimarratu du: “PNVren eskuetan dagoen Aldundiaren politika fiskala oraindik ere larriagoa da iruzur legalizatua ahalbidetzen duelako, eta horren ondorioz, zerbitzu sozialak bermatuko dituen eta gizartea transformatzeko balioko duen bilketa eragozten duelako”. Gauzak horrela, eta publizitate honen “faltsutasunaren” adibide bat jarri nahian, iragarkian agertzen den aniztasun funtzionaleko kolektiboaren erabilera salatu du, gurpil aulkian dagoen mutiko baten bidez irudikatuta dagoena. Faltsukeriaz josita dago, Bizkaian laguntza pertsonalerako laguntza ekonomikoak “oso urriak direlako, bost onuradun inguru bakarrik daudela, Gipuzkoan 1.100 baino gehiago diren bitartean”.

Zoritxarrez, jarraitu du esaten, adibide gehiago dago: “Iragarkiak gizon baino emakume gehiago hautatu ditu pankartaren atzean jartzeko, baina BFAaren aurrekontua sakonki aztertzen badugu, berdintasun sailaren aurrekontua gastu totalaren %0,09an dela ikus dezakegu”. Adineko pertsonak ere agertzen dira, “gizarte osasun zentroetan murrizketak sufritzen ari dituztenak”.

Egoera hau dela eta, Alternatibatik Aldundiari eta Foru Ogasunari erantzukizuna exijitu diote, eta aldi berean, “gizartearen gehiengo bat iraintzen duen kanpaina hau erretiratzeko” eskatu dute; “kolektibo hauek dira Bilbao jaunak politika sozialetan aplikatutako murrizketak gehien sufritzen dituztenak, eta hauekiko elkartasunean kalera ateratzen direnen kontra ere egiten duelako”.

Berriak

Bilduk Bilbo Zaharra, San Frantzisko eta Zabalako Plan Komunitarioak inpakturik izan ez duela salatu du

Bildu Udal Taldeak orain dela urte bat martxan jarri zen Bilbo Zaharra, San Frantzisko eta Zabalako auzoetarako Plan Komunitarioa inpakturik izan ez duela salatu du gaur goizean.

Ana Etxarte zinegotziak aipatu duenez, 3 planekin kontatu arren eta lehenengoa landu zenetik 13 urte pasa direlarik, “udalak oraindik ez du esku-hartze serio, koherentea eta integrala egin auzo hauetan. Alderantziz, gizarte laguntzetan, esku-hartze soziala lantzen duten eragileen baliabidetan eta enplegua bermatzeko formakuntzan murrizketak egiten jarraitu du”.

Zinegotziak bere desadostasuna erakutsi du planari emandako enfokeagatik, helburu nagusi bezala bizikidetzako arazoak konpontzea proposatzen duelako eta ez auzo hauek dituzten arazo nagusiak, pobrezia, bazterketa soziala eta langabezia gainditzea.

Etxartek auzo hauek jasaten duten langabezia tasa aipatu du. 2011an Bilbo Zaharra, San Frantzisko eta Zabalan langabezi tasa %35,5a zen bitartean, Bilbon %11,4koa zen. Gainera, gazteek eta epe luzerako langabetuek kaltetu nagusiak dira, 16-24 urte bitarteko gazteen artean %56,8 portzentaia baitu eta langabezian dauden pertsonen %40a baino gehiagok bi urte baino gehiago daramatzate lana bilatzen.
Bilduk auzoetako mugimendu asoziatiboarekin adostutako plangintza bat egitea presazkoa dela uste du, auzoetako errealitate eta aukeretan oinarritutako proposamenei esker, auzoetan bizi diren norbanako eta kolektiboen ongizatea bermatzeko esku-hartze sozial, ekonomikoak eta urbanistikoak jasoz.

Zentzu honetan, Bilduk proposatu du pertsona guztien oinarrizko beharrak asetzen dituzten laguntza sozialak eta zerbitzuak bermatzea, enplegu duina sortzen dituzten jarduera ekonomikoak babestea, etxebizitza eskubide gisa kontutan hartzea eta pertsona guztiei bizitzeko leku duin bat bermatzea, kalitateko heziketa-eskaintza publikoa, eskola integrazioko eta kultur-aniztun espazioa bihurtuz, bortizkeria matxistaren aurkako borroka era integralean biziagotzea, Komunitate-ekipamenduak eta topaketa guneak sortzea Kultur-aniztasuna, berdintasuna eta bizikidetasuna bultzatzen dituzten kultur eta aisialdiko jarduerak bultzatzeko.

Berriak

Martxoak 3: Ez dugu ahazten eta ez dugu ahaztuko

Martxoak 3ko gertutasuna dela eta, Gasteiz iraganera begira jarriko da beste behin ere, duela 37 urte Zaramagako auzoa odolez tindatutako egun hartara. Amorruz eta suminez, baina harrotasunez batez ere.

Orduan, Gasteizko langileria, antolakuntzarako eta konpromisorako gaitasuna erakutsi zuen. Aldaketa Politiko, Sozial eta Ekonomikoa ahalbidetzeko baldintzak ezarri ziren eta oinarri eta balio horiek gaur egun diraute eta langileon eskubideak urratzen ari diren garai honetan duintasunez erantzuna emateko baliatuko ditugu. Paper garrantzitsua izan zuten elkartasun komitean aritutako emakume askok eta askok, gazteak eta ikasleak baita ere.

Gaur egun, garai hartan bezala, gure eskubideak lapurtu nahi dizkigute.

Eta Arabar guztion defentsan aritu beharko liratekenak, alfonbra gorria jartzen diete Madriletik datozen inposaketei, BAI, ateak irekitzen dizkiete “De Andresek” eta “Alderdi Popularrak” Madriletik jasan behar ditugun neurri neoliberalei.

Egoera honi aurre egiteko, EH BILDUk burujabetza eta aldaketa sozialaren aldeko aldarria egiten du. Irtenbidea badagoelako, eta alternatibak baditugulako. Honen harira, AMAIUR taldeko Sabino Cuadra eta Rafa Larreina kongresistak, datorren martxoaren 7an, ostegunean, “Villa Suso”-n eskeiniko duten hitzaldira gonbitea luzatu nahi diegu herritar orori, aldaketarako proposamenak eta neurriak ezagutzeko aukera eskeiniz.

Aldez aurretik, Martxoak 3 dugu bueltan. Borrokaren ikurra baina hilketarena ere bai. Poliziak 5 langile hil zituen eta ehundaka zauritu. 37 urte pasa dira eta Estatuak oraindik ez du bere ardura aitortu. Datorren igandean, goizeko 11:00tan Gasteizko langileria pairatutako errepresio bortitza, bidegabekeria eta zigorgabetasuna salatzeko eta bizia galdu zutenen memoria gurera ekartzeko, omenaldi xumea egingo dugu Zaramagako auzoan, urteroko manifestazioaren aurretik.

Ez dugu ahazten eta ez dugu ahaztuko.

Berriak

Tas-Tas eta Hala Bedi irrati libreei buruzko bideo-erreportajea egin du Alternatibak

Alternatibaren Bilboko Asanbladako militanteek Irrati Libre eta Komunitarioen inguruko bideo-erreportajea egin dute, Bilboko Tas-Tas Irratiko eta Gasteizko Hala Bedi Irratiko ordezkariak elkarrizketatuz, beren eragin eremuetan gehien errotuetako hedabide alternatiboetako bi, alegia; hamarkadak baitaramatzate ahotsik ez dutenen ahotsa izaten, tokiko errealitateari begira FM bidez emitituta zein beren uhinak mundu osora zabalduta Interneteko emisioen bitartez.

Biak ala biak dira, gainera, Euskal Herriko hogeitik gora irrati libre biltzen dituen Arrosa Sareko kide, haien arteko elkarlana sustatzeko martxan jarritako proiektua, euskarazko irratsaioak elkar trukatuz edota beren kideen trebakuntza hobetzeko tailerrak prestatzen.

Elkarrizketen bidez, komunikazio proiektu herritar hauen sorrera eta garapena, Eusko Jaurlaritzak egin eta bertan behera utzitako azken lizentzia lehiaketa edota irrati libreek inguruko eragile sozialekin dituzten harreman zein elkarlanaren berri ematen da bideoan. Erreportajea Alternatibaren YouTubeko katean zein webgunean ikus daiteke dagoeneko. Euskaraz grabatu izan da eta 11 minutu inguruko iraupena dauka.

Berriak

Alternatiba | Ezkerra eraldatzearen erronka

X