Josu Estarrona Koordinakunde Nazionaleko kide eta EHBilduko senatariak eta Nayua Aduh Jatri idazkaritza teknikoko kideak gaur Gasteizen egindako agerraldian, maiatzaren 8an Iruñean hasi eta maiatzaren 20an Gasteizen amaituko den hitzaldi ziklo bat aurkeztu dute.
Nayua Aduh Jatrik adierazi duenez, “saharar herriak bizi duen egoera politiko, sozial eta humanitarioa herritarrei hurbiltzeko helburu nagusia da, bere borroka ikusaraziz eta bere kausarekiko nazioarteko elkartasuna indartuz”. Azpimarratzekoa da Nayua Aduh Jatri-ren arabera hitzaldi-zikloaren egitaraua betetzen duten pertsonen aniztasuna “ekintzaileek, saharar ordezkariek eta akademikoek parte hartuko dute, eta hainbat begirada eta tresna eskainiko dituzte hainbat hamarkadatan luzatutako eta oraindik konpondu gabeko gatazka hobeto ulertzeko. Okupazio, errepresio eta ahanztura mediatikoko testuinguru batean, inoiz baino beharrezkoagoa iruditzen zaigu hausnarketa kritikorako eta salaketarako guneak irekitzea, Mendebaldeko Sahararako justiziarako eta askatasunerako bideak ere bideratu ahal izateko “.
Alternatibako ordezkariak gogorarazi duenez, jarduera amaitzeko aukeratutako data ez da kasualitatea, “maiatzaren 20a, sinbolismoz betetako data saharar herriarentzat, Fronte Polisarioaren sorreraren urteurrenarekin bat egiten baitu, Marokoren okupazioaren aurrean sahararren erresistentzia 50 urte baino gehiagoz gidatu duen askapen nazionaleko mugimenduaren urteurrenarekin, alegia. Data hori aukeratzea ez da kasualitatea: ekimen hau keinu politiko eta sinboliko bat ere izatea nahi dugu, Euskal Herritik Saharako herriak autodeterminaziorako duen eskubidearen aldarrikapenari ahotsak gehitzeko modu bat, nazioarteko ebazpen askotan aitortua, baina sistematikoki urratua.
Bestalde, Josu Estarronak gogorarazi duenez, duela hiru urte espainako gobernuaren posizio aldaketarekin “NBEren ebazpenei eta saharar herriak autodeterminaziorako duen eskubideari entzungor eginez. Posizio aldaketa horrekin, Espainiako Gobernuak potentzia administratzaile gisa dituen erantzukizunak alde batera uzteaz gain, Marokok lurraldea legez kanpo okupatzearen konplize bihurtu zen. Espainiako Gobernuak traizionatu zuen saharar herria, eta horrekin batera justiziaren, nazioarteko legeria eta deskolonizazioaren printzipioak ere.”
Ildo horretan, Josu Estarronak adierazi du Alternatinak Saharako auziari babesa emateko jarrerari eusten diola ” saharar borrokarekiko konpromiso irmoa berretsi nahi dugu: Justizia eta memoria historikoagatik. Saharar herriaren borrokarekin konprometitutako herria gara, beraz, ez dugu etsiko eta ez dugu onartuko Espainiako Gobernuak bidegabekeria eta okupazioa betikotzen jarraitzea. Horregatik, berriro ere eskatzen diogu bere jarrera zuzentzea eta nazioarteko legalitatearekin lerrokatzea. Ezin da ahaztu Mendebaldeko Sahara Afrikako azken kolonia dela oraindik, Marokoko Erresumaren errepresioaren eta espolioaren menpe, baina Espainiako Erresumaren konplizitatearekin eta adostasunarekin!.
Prentsaurrekoan, Alternatibako bi ordezkariek elkartasuna adierazi diote asteburuan erasotako Askatasunaren Ontzidiari “Askatasunaren Flotillaren Conscience ontziak jasandako erasoa salatuz hasi nahi dugu. Elikagaiak, ura, argindarra sendagaiak edo edozein laguntza humanitario Gazan sartzea debekatuta dauka Israelgo estatu genozidak. Horrek gosete krisia eragin du ehunka gazatarrengan, horietako asko haurrak. Milaka lagunek desnutrizioa pairatzen dute dagoeneko, NBEren arabera. Berriro ere, salaketarako eta mobilizaziorako deia egiten dugu, eta, batez ere, estatuei eta EBri dei egiten diegu neurriak har ditzaten Israelgo estatu genozidari babes politiko, finantzario eta militar guztia kentzeko. Aski da!
