Blog

Eredu sozioekonomiko alternatibo eta sozialista berri baten alde (Alternatiba)

Iragan hiru hamarkadetako eskubide urraketarik latzena pairatzen ari da euskal langileria azken urteotan. Hala, planetak sufritzen duen krisi sistemikoak ez du kapitalismoa bideraezina, eutsiezina eta berez bidegabea delaren inguruko eztabaidarik piztu Espainiako Erresumako, EAEko eta Nafarroako gobernuen baitan. Aitzitik, patronalen eta merkatuen eskutik aurrera egiteko estrategia koldarrari eutsi diote, langileen ahulezia areagotuz. Honela, biztanleriak ez du ezer erabakitzen eta merkatuen diktadura inposatzen da; langileen eskubideak babestu beharrean, krisia eragin duten enpresa transnazionalen pribilegioak eta interesak defendatzen dira; ez da gatazkaren oinarrira jotzen, hau da, sistema kapitalistaren errora; aitzitik, sua erregaiez amatatzeko ahaleginak egiten diharduta.

Hala ere, egoera hau aldatu daiteke, badago alternatiba bat, baina ez dago inondik inora elkarrizketa soziala deritzon horretan. Ameskeria hutsa da unean uneko gobernuaren gidaritzapean langileek eta enpresariek berdinen arteko elkarrizketa ematen denik. Irudipen demokratiko honek agerian utzi du politikoki hutsala dela. Sekula ez da berdintasnik izango gehiengoen eskubideen eta patronalaren interesen artean; gobernu eskuindarrek edota liberalek sekula ez dute zuzentasunez jokatuko; gauzak sekula ez dira argi egongo langileentzat, erabakiak beste alde batetik hartu ohi direlako, ikusi dugun legez. Gauzak horrela, une honetan elkarrizketa sozialaren alde egiteak erreformak eta eskubide urraketak laguntzea baino ez dakar. Beraz, alternatiba hori euskal herritarren burujabetzea eragozten duten kapitala zein
gainontzeko zapalkuntza sistemei aurre egitean datza, borroken artikulazio beretik abiatuz; agenda antikapitalista, feminista, ekologista, subiranista eta arrazakeriaren aurkakoarekin bat eginez. Eredu sozialista egingarria da, beharrezkoa eta premiazkoa da. Izan ere, artikulazio honetaz baliatzea da egoera honi buelta emateko eta Euskal Herri emantzipaturantz jotzeko aukera bakarra.

Zentzu honetan, Maiatzaren Lehenak kapitalaren borroka zuzenarekiko bat egitea finkatu behar du indar ezkertiarren estrategia politiko gisa, egungo kapitalismo basatiari alternatiba sozialista bat eraikitzeko bidean. Hasteko, onartutako erreformak atzera bota behar ditugu eta datozen erreforma mehatxagarriak geldiarazi:

  • Lan erreformaren aurrean, eskubideak bermatzen dituzten kontratu mugagabeen aldeko apustua, lanbide arteko gutxieneko soldata EB15eko batez bestekora hurbilduz, eta Atzerritarren Legearen erreforma osoa bultzatuz.
  • Pentsioen erreformaren aurrean, erretiroa 60 urtera aurreratu, gazteen kontratazioa lagunduko duelako, pentsio sistema pribatu eutsiezinei ateak itxiz eta pentsio publiko duinak bermatuz.
  • Pribatizazioen eta euskal Aurrezki Kutxen fusioaren aurrean, euskal finantzasistema publikoaren aldeko apustua, espekulazoarekin amaitzeko eta kutxen jatorrizko zeregin sozialei ekinez, haren kontrol demokratikoa bermatuz.
  • Politika sozial publikoen desegitearen aurrean, zerbitzu sozialen areagotzea eta zaintzan oinarritutako eredu ekonomikoa; ordainketa partekatuaren aurrean, politika sozial indartsuak sortuko dituzten politika fiskal progresiboak pribatizazioa eta lagun askok, emakumeak batez ere, pairatzen dituzten azpikontratazioei aurre egiteko.
  • Produktibitateari lotutako soldaten aurrean, kapitalaren eta soldaten errenten arteko desoreka iraingarria desagerraraztea.
  • Konfrontazioa babesten duen euskal sindikalismoak pairatzen dituen erasoen aurrean, lan harremanen euskal esparruaren eta negoziazio kolektiboaren berrindartzea, langileriaren eskubideen defentsaren tresna gisa.

MAIATZAREN LEHENEAN, ALTERNATIBAK EZEZKO BIRIBILA EMANGO DIO ELKARRIZKETA
SOZIALARI
BORROKEN ARTIKULAZIOARI BAI, BAI EREDU SOZIALISTA ALTERNATIBOARI
GORA EUSKAL LANGILERIA!

Berriak

Alternatibak bat egin du Otegi askatzeko manifestazioarekin

Alternatibak atxikimendua agertu nahi dio Arnaldo Otegiren askapena eskatzeko bihar egingo den manifestazioari. “Arnaldo askatu, politika askatu” lelopean, manifestaldia Elgoibarko plazatik aterako da 17:30ean eta Oskar Matutek parte hartuko du Alternatibaren izenean.

Bake eta normalizazio prozesuarekin aurrera egiteko bidean “ezinbestekotzat” jo du Alternatibako bozeramaileak Euskal Herriko eragile guztiek politika egiteko eskubidea bermatuta izan dezatela. “Otegi erabaki politikoen ondorioz dute espetxean oraindik. Are gehiago, bakearen aldeko bere ekimen politikoak izan dira auzipetua eta espetxeratua izatera eraman dituztenak eta hori salatu beharra dago”, gaineratu du.

Berriak

Bilduk segurtasunaren eta lan osasunaren aldeko mobilizazioak babestu ditu

Bilduk bere babesa erakutsi die ELA, LAB, STEE-EILAS, EHNE eta HIRUk Lan Osasunaren Nazioarteko Egunean egin dituzten mobilizazioei. Koalizioak bat egin du eskubide sozial eta laboralek dakartzaten murrizketen kalteak salatzean, Euskal Herriko langileen bizi-kalitate eta osasunarengan eragina izango dutelako.

Bilduk “ezinbestekotzat” jo du lan osasuna osasun publikoaren baitan jasotzea. Izan ere, koalizioak gogorarazi duen legez, 2010ean 80 behargin hil ziren lan istripuetan eta 2011ko lehen lauhilekoan 18 hildako zenbatu dituzte sindikatuek Euskal Herrian. “Gehiegizko ekoizpen helburuak izateak lan istripuak eragiten ditu, jakin badakigulako segurtasun neurriak murrizten doazela etekin ekonomikoak lehenesten diren heinean”, Bilduk salatu duen legez.

Era berean, Bilduk Zapateroren gobernuari leporatu dio prekarietatea “dekretuz” areagotu izana, azken hau “lan istripu gehienen oinarrian” dagoela azpimarratuz. Modu honetan, Bilduk salatu du azken lan erreformaren bitartez “bereziki arriskutsuak direlako Aldi Baterako Lan Enpresek (ABLE) hartzea debekatuta duten lanen zerrenda” murriztu dutela.

Gainera, koalizioak “kontrol publikoa areagotzeko eskaera” luzatu du aseguru mutuek beharginak lanera bidaltzen dituztelako guztiz sendatuta egon gabe eta beste batzuk Gizarte Segurantzara bidaltzen dituztela “laneko gaixotasunak izan beharrean endekapenezko gaixotasunak direla argudiatuz”. Zentzu honetan, Bilduk nabarmendu du, egungo arazoak konpondu baino, erretiro adina atzeratzeak “lan istripu eta gaixotasun gehiago” eragingo dituela.

Hori guztia dela eta, koalizioak azpimarratu du lan harremanetarako eta gizarte-babeserako euskal esparrua sortu beharra dagoela. “Inoiz baino beharrezkoagoa da Euskal Herriak bere segurtasun eta lan osasuneko politikak erabakitzeko ahalmen normatiboa izatea”, adierazi duten legez.

Berriak

Alternatiba: “Bakea egonkortzeko bakoitzak egin beharrekoa onartu beharra dago”

Alternatibak albiste baikorra deritzo su etena hausten ez duen ETAren edozein agiriari. Hala ere, ETAri, “erantzukizunak besteengan ez lagatzeko eta dagokiona bete dezan” eskatu dio, “indarkeria behin betiko utzita”. Era berean, Espainia eta Frantziako Gobernuei “bake prozesuan parte hartu eta berau baieztatzeko lan egin” dezatela galdegin die.

Alternatibako bozeramaile Oskar Matutek indarkeriaren kontrako konpromisoa berretsi eta “bakea egonkortzeko guztion konpromisoak beharrezkoak” direla gogorazi du, “ezin dira bakoitzaren ardurak besteei leporatu, bakoitzari dagozkionak onartu behar dira eta horiek betetzeko ahal duen guztia egin beharra dago”.
 
Ildo beretik, ETAri dagokiona “estrategia militar antzua behin betiko lagatzea eta euskal gizarteak bere eragile sozial eta sindikalekin batera eskatzen duena onartzea da, gizartea delako Euskal Herriak behar duen bake eta normalizazio prozesua gidatu behar duena”.
 
Era berean, eta frantziar estatuan gertatutako tiroketak eragin dituen zalantzen aurrean, Espainia eta Frantziako Gobernuei “bake prozesuarekin benetako konpromisoa hartu eta ETAk iragarritako su etena baieztatzeko” dei egin die.
Berriak

Eraiki nahi dugun aberria (Alternatiba)

Irudia: Iñigo Arsuaga
Igande honetan, apirilak 24, Aberri Eguna ospatzen da, Alternatibak autodeterminaziorako eskubide erreala eta eraginkorra aldarrikatzeko baliatzen duen eguna. Menpekotasun sistema guztiak gaindituko dituen Euskal Herria eraiki beharra daukagu: kapitalismo aseezina, patriarkatuaren bidegabekeria, produktibismo suntsikorra, arrazakeri ankerra, itxurazko demokrazia eta kultur asimilizazioa gaindituko dituena.

Borroka guzti hauek izan behar dute lekua Aberri Eguneko ospakizunetan, hala uste dugu Alternatiba osatzen dugun gizon-emakumeok, bakarrik horiei aurre egin eta urratsak egiteko gai den herria izango delako benetan demokratikoa.

Egun honek folklorea gainditu behar du, gure lurraldean diren gatazka sozial, politiko eta ekologikoen aurrean entzungor dirauen nazio ikuspegia baztertzen dugu. Ez dugu haien nazioa nahi, naziorik ez baitago berdintasuna urratuta eta pertsona guztien eskubide guztiak errespetatu gabe. Ez gara ikurren defentsarekin konformatuko, Euskal Herri justuagoa eraikitzeak herritarrentzako eskubideak eta askatasunak zabaldu behar dituela aldarrikatzen dugu.

Garai berria bizi du Euskal Herriak, egoera politiko berria non, herriak eskatzen duenaren bidetik, elkarlanaren alde egiten dugu. Alternatibak eragile ezkertiar eta subiranistek indarrak batzearen aldeko apustua egin du beti, eta oraingoan etorkizun komun baterako bidea partekatzeko aukera gauzatu dugu. Zailtasunak daudela jakin badakigu, eta ez gara bakea eta nazio eraikuntza oztopatu nahi dutenei buruz bakarrik ari. Izan ere, badira askoz traba gehiago: desberdintasunak, pobrezia, era guztietako eskubideen urraketa eta indarrean dauden logika zapaltzaileak.

Seguruenik, esan ohi denez, ez daude diren guztiak, baina badakigu zer garen barruan gaudenok. Euskal Herriko pertsona guztien eskubide indibidual eta kolektibo guztiak bermatu beharraz seguru gaude, bakerantz   egin beharreko urratsen premiaz, indarkeria, mehatxu eta errepresio forma guztiak gaindituta, gatazkaren parte diren edozein erakunde, eragile zein instituzioen aldetik. Askok ukatzen badute ere, gatazka herritar guztiek gainditu nahi dutela jakin badakigu.

Era berean, Euskal Herrian diren subiranotasun nahiak zilegi direla konbentzituta gaude. Bere buruari zuzenbidezkoa deritzon estatuak zilegitasun hori modu gaitzesgarrian urratzen duela salatzen dugu, horretarako milaka eta milaka herritarren parte-hartze politikorako eskubidea bortxatzen du, 50.000 lagunena zuzenean eta bi milioitik gora lagunena zeharka. Demokrazioaren aurkako bidegabakeria honen aurrean, behin et aberriz exijituko diogu Espainiako estatuari, ETAri indarkeriazko ekintzak uzteko galdegin genion irmotasun berberarekin, gobernu espainiarrek urratu izan dituzten eskubide guztiak berrezar ditzala: elkartzeko eskubidea, adierazpen eta manifestazio askatasunarena eta herritarren botoa bahitzen duen Alderdien Legea bertan behera uztea.

Bestetik, Iruñea eta Gasteizko gobernuen politika neoliberalekiko morroitzari erantzuteko alternatibak eskaini behar ditugu, herri sozialista, ekologista eta feminista eraikiz. Eta nazio eraikuntzan zein eremu sozialean herria desegiten dutenen aurka egin behar dugu.

Hauxe da Aberri Egun honetan Alternatibak egiten duen aldarrikapena, azken hilabeteotan elkarrekin egin ditugun urratsek herri honen eraikuntzarako aukera berriak eta itxaropentsuak eskainiko dituelakoan, herri honetan sinesten dugulako, ezkerreko Euskal Herrian sinesten dugulako.

Euskal Herrian, 2011ko apirilaren 24an

Berriak

Bildu.info webgunea aurkeztu du koalizioak

Bilduk “bilgune” izan nahi duen webgunea aurkeztu du gaur

Eusko Alkartasuna, Alternatiba eta independente ezkertiarrek osatutako koalizioak Bildu.info atariaren aurkezpena egin du gaur Bilbon. Prentsaurrekoan Zuriñe Gaintza, Amaia Agirresarobe, Lore Martinez eta Asier Gomez izan dira. “Herritar guztiei eskaini eta beraiekin konpartitu nahi dugun tresna da webgune hau”, Gaintzak adierazi duen legez.

Koalizioari buruzko berriak, irudiak eta bideoak jasotzeaz gain, Araba, Bizkaia, Gipuzkoa eta Nafarroak espazio propioak dituzte webgunean. Era berean, herriz herri hautes-programen eta hautagaiei buruzko kontsultak egiteko aukera zabalduko du. Gainera, Martinezek aurreratu duen legez, ekitaldi nazioanalak streaming-ean emitituko dira aurrerantzean.

Koalizioak teknologia berrien “trena” hartu nahi du eta webgunea ezezik, hemendik aurrera Facebook, Tuenti eta Twitter sare sozialetan ere ariko da, aurreratu du Gomezek. “Herritarron sareko eremu pertsonal horretara sartu nahi dugu eta herritarrei gure berri eskaintzeaz gain, partaide izan dadila nahi dugu”.

Agirresarobek “ekarpen motibagarritzat” jo du webgunea eta “egun Euskal Herrian bizi dugun ilusio eta itxaropena” lau haizetara zabaltzen lagunduko duela iragarri du. Izan ere, “aldaketa politiko eta sozialerako” lagungarri izan daitekeela gaineratu du: “Hemen ez da filtrazio interesaturik izango, herritarren indarrak biltzeko gogoa isladatuko da, prozesuari bultzada geldiezina erakusteko leihoa izango da eta ezkerreko politikak aplikatzeko proposamenen kokapena”.    

Azkenik, Gaintzak “EAJk, PSE-EEk eta UPN-Alderdi Popularrak isladatzen duten politika egiteko estilo zaharkitu, usteldu eta etsigarritik” aldendu eta  “freskura, ilusioa, gogoa eta itxaropena” kontrajarri nahi diotela nabarmendu du. Izan ere, “herri interesak” dira Bilduren lehentasunak eta horrek “Madrilen zein euskal alderdi jakin batzuetan” kezka handia eragin du, bere ustez. “Kezka horien iturria jasotzen ari garen babes zañaba baino ez da”, laburbildu du zerrendaburuak.

Berriak

Rubalcaba eta Trilloren jazarpena salatu du Bilduk

Jazarpen politiko bortitza salatu du Bilduk eta PSOEren Gobernua Aznarren ministroen aginduetara makurtzea deituratu du

Eusko Alkartasunak, Alternatibak eta independete ezkertiar eta subiranistek osatutako Bilduk Rubalcaba eta Trillo jaunek koalizioaren zerrenda guztien kontra egiteko akordioaren berri izan du prentsari eginiko filtrazioen ostean. Hala, berriz ere demokrazioaren oinarrizko printzipioak urratu eta herritarren partaidetza politikoaren aurka joateko asmoa dutela salatu nahi du Bilduk. Era berean, argitaratutakoa egiaztatuko balitz, euskal herritarrei dagokiena Madrilen, Euskal Herritik urrun, erabakitzen dutela baieztatuko litzateke, eta beste behin ere euskal herritarren eskubideak urratzeko.

Bilduk azpimarratu du jazarpen politikoa eta mediatikoa onartezina dela, are gutxiago, zerrendak aurkeztu aurretik egiten denean eta euskal gizartea demokrazioaren aurkakoa den lege bat erabiltzearekin ohituta egon arren. Izan ere, alderdien legeak milaka herritarren parte-hartze politikoa galarazi du, eta orain legezkoak diren bi alderdien eta ezkertiar independentisten aurka bortizki egitera doa.

PSOE PPren aginduetara makurtzea deitoratzen du Bilduk, eta ekintza horien helburua euskal erakundeetan maiatzaren 23tik aurrera eman daitekeen aldaketa politikoa geldiaraztea dela salatu du, Bilduk bide politiko, bakezale eta demokratikoen alde eta era guztietako indarkeria formak arbuiatuz adierazitako konpromiso eztabaidaezin eta ukaezinaren inguruan susmoak ezarri nahian dabiltza, PP-PSOE binomioaren mesederako errealitate elektorala berresteko, gizartearen nahiak faltsutzen duen errealiteta, Eusko Legebiltzarrean bezala, herritarren botoa ordezkatzen ez dituzten erakundeak lortzeko. Laburbilduz, zeren beldur dira Rubalcalba eta Trillo jaunak? Bada, maiatzaren 22an susto ederra hartzea espero dute, Euskal Herrian aldaketa politikoaren eta sozialaren aldeko milaka boto jasoko ditugulako.

Guzti hau berretsi du Ertzaintza Bilduren hautagaitzak ikertzen hasi dela ziurtatzen duen informazioak, Madriletik Rubalcabak agindutakoa betetzen hasi da Rodolfo Ares.

Jazarpen polizial, juridiko eta mediatikoaren aurrean, Bilduk bere apustua berretsi nahi du, indarkeriaren eta mehatxu ororen kontrakoa, pertsona guztien eskubide zibil zein politikoen aldekoa eta Euskal Herriko milaka herritarren botoa bahitzen duen legearen aurka.

Berriak

Bilduk Gipuzkoako eta Donostiako zerrendaburuak aurkeztu ditu

Bilduk gaur aurkeztu du Gipuzkoako Batzar Nagusietarako hautagaitza: “Aldaketaren garaia heldu delako, egungo boterea ordezkatzeko eraldaketa sozialerako aurrerapausoak eman behar ditugu, lurraldeen arteko oreka, jasangarritasun ekonomikoa, laborala, ingurumenarena eta sozialaren aldeko Gipuzkoa eraikiz”.
 
Erronka hauek lortzeko bidean, Bildu Gipuzkoa egitasmo berritzaile, anitz eta eraldatzaile honekin konpromiso irmoa hartu duen taldeaz baliatuko da. Hautes-zerrendetan sindikatuen, kulturaren edota komunikabideen arlotik datozen hautagai independenteak daude, besteak beste, Martin Garitano (Gara egunkariko kazetaria eta Infozazpi irratiko esataria), Idoia Ormazabal (Hezkuntza arloko sindikatuetako ordezkaria) edota Elene Armentia (soziolinguista eta Elhuyar-eko aholkularia).
 
Eusko Alkartasunako kideen artean, udal-kudeaketan eta erakundeetan eskarmentu handia duten hautagaiak daude, besteak beste, Zumaiako alkate Iñaki Agirrezabalaga, Onintza Lasa Soziologia eta Zientzia Politikoetan lizentziaduna eta legebiltzarkide ohia edota Josu Ruiz, Donostiako Turismo zinegotzi izandakoa.
 
Bilduko hautes-zerrendan Gipuzkoako Batzar Nagusietan Alternatibako ordezkari diren  Ander Rodriguez arrasatearra eta Jon Lasa donostiarra ariko dira. Eurekin batera, Enrique Martinez Florez abokatua izango da, militante ezkertiar ezaguna.

Bildu Donostia
Bildu Donostiak ere Gipuzkoako hiribuko zerrendaburuak aurkeztu ditu gaur. “Aldaketarako ilusioak eta Donostiak behar duen eraldaketa sozialak” bultzatuta, Bildu Donostiak politika ezkertiar, euskaltzale, partehartzaile, feminista eta jasangarrietan oinarritatutako kudeaketarekiko bere konpromiso irmoa helarazi nahi die herritarrei.
 
Gizon-emakume independenteek, Alternatibako eta Eusko Alkartasunako kideekin batera osatzen dute Bilduren hautagaitza. Bilduren hautes-zerrendan Juan Carlos Izagirre sendagile igeldotarrak bezala, auzolanarekin konpromiso sendoa duten hautagaia izango da. Izagirre zerrendaburua Itxas Aurre plataformako bozeramailea baita.
 
Izagirrerekin batera, udal-kudeaketan eskarmentu handia duten Josu Ruiz (EAko kidea, enpresa ikasketak egin dituena eta 1995etik 1999ra Turismo zinegotzi izandakoa) edota Alternatibako kide Jon Albizu (Zientzia Politikoetan lizentziaduna, zortzi urtez sail desberdinetan aritu dena: Herritarren partaidetza, Berdintasuna, Hezkuntza, Kirolak, Euskara eta Lankidetza).
 
“Guk osatzen dugu Bildu Donostia. Auzoak mimatzen dituen hiriaren aldeko apustua egiten dugu eta herritarrei ilusioa, lana eta konpromisoa eskaintzen dizkiegu. Ez dugu nahi erakusleiho hutsa den Donostia, baizik eta gauzak aldatu nahi ditugu herritarrekin batera eta herritarrentzat”, laburbildu dute.

Berriak

Elikadura subiranotasunik gabe, ez dago subiranotasun politikorik (Alternatiba)

“Nazioarteko merkatuaren baldintzak ez dira bidezkoak, eta ezingo dira izan elikagaiak, giza eskubidetzat baino, salgaitzat jotzen diren bitartean”

1996ko apirilaren 17an, Brasilgo polizia militarrak tiro egin zuen Lurrik Gabeko Nekazarien Mugimenduak deitutako manifestazio baten aurka El Dorado dos Carajas-en. Nekazarien eskubideak aldarrikatzeko manifestaldia zen hura. Guztira, hemeretzi nekazari hil zituzten eta hirurogeita bederatzik mozketak pairatu zituzten, ehunka zauritu suertatu ziren eta hamar lagun epaiketarik gabe exekutatu zituzten, gutxienez, atxilotu ostean.

Egun horretan, zoritxarreko gertaerak jazotzen ari ziren bitartean, Via Campesina elkarteak nazioarteko bigarren biltzarra egiten ari zen Tlaxcalan, Mexikon. Mundu zabaleko nekazariek “Nekazarien Borrokaren Nazioarteko Eguna” izendatu zuten egun hura.

Hamabost urte igaro ondoren eta urtero egiten den legez, apirilaren 17an aldarrikapen bikoitza egin ohi da mundu osoan: alde batetik, nekazariek eta herri landatarrek bizirauteko duten eskubidea eta, bestetik, mundua elikatzen jarraitzeko borroka gogoraraztekoa. Elikadura subiranotasunean oinarritutako sistema berria defendatzeko ekintzak dira.

Baina, zer dakigu elikadura subiranotasunari buruz? Nondik dator kontzeptua? Zein da bere esanahia?

56 herrialdetako nekazarien 150 erakunde batzen dituen Via Campesina-k garatu zuen elikadura subiranotasunaren kontzeptua eta publikoki eztabaidatu zen lehenengoz 1996an FAOren egoitza zentralean (Erroma) egindako Elikaduraren Munduko goi-bileran. Hortik aurrera, kontzeptu hori eztabaidagai nagusienetakoa bilakatu da nazioarteko nekazaritzaren alorrean, baita Nazio Batuen barne instantzietan ere. Izan ere, 2002ko FAOko Elikaduraren Munduko goi-bilerari lotutako GKE-k antolatu zuten batzar paraleoaren ardatz nagusia bilakatu zen.

Elikadura subiranotasunak honako eskubide hauen aldarrikapenean datza: herriek euren nekazaritza- eta elikadura-politika zehazteko; dumping mekanismoen bitartez produktu soberakinen sarbidea saihesteko eta lurraldea errespetatuko duen nekazaritza lokala, anitza, landatarra eta ekologikoa sustatzeko, hau da, nazioarteko merkataritza ekoizpen lokalaren osagarri gisa jardungo duena. Elikadura subiranotasunak ondasun naturalen gaineko kontrola (lurra, ura eta haziak) komunitateei itzultzean datza, baita bizitzaren pribatizazioaren aurka borrokatzean, ura era jasangarrian banatu dadin bere ondasun publikoko izaerari eutsiz, eta genetikoki eraldatutako organismoen aurkako borrokari ekinez, haziak askatasunez eskuratu ahal izateko. Horra hor nekazaritza-erreformen beharra.

Elikadura subiranotasunak ez ditu trukeak errefusatzen, bai, ordea, esportazioei emandako lehentasuna, nazioarteko merkatuetan sartzea ez delako nekazariek behar duten konponbidea. Nekazariek duten arazorik larriena zera da: merkatu lokal propietara sartzeko zailtasuna, elikagaien industriak oso salneurri baxuan finkatzen dituelako bere produktuak.

Politika neoliberalek mugarik gabeko mozkinen bilateraki lotuta dagoen nazioarteko merkataritza lehenesten dute. Gainera, nazioarteko merkataritzan sartzea duten nekazaritza-ekoizpenak nekazaritza-enpresa boteretsuenen kontrolpean daude, premiazko ondasunak esportatzen dituzten iparraldeko herrialdeen ekoizpenei mesede eginez, eta hegoaldeko nekazariak kaltetuz, bigarren mailako elikagaiak baino ezin dituztelako esportatu.

Hegoaldeko herrialdeetako elikagaien esportazioek munduko eskaera osoaren herena suposatzen dute, iparraldeko herrialde aberatsek gainontzeko bi herenak esportatzen dituzten bitartean. Aitzitik, euren kanpo zorrari aurre egiteko beharrak hegoaldeko herrialdeak baldintzatzen ditu nazioarteko merkataritzan, euren egoera hobetu ezinean.

Argi dago, beraz, nazioarteko merkatuaren baldintzak ez direla bidezkoak, eta ezin izango direla bidezko izan elikagaiak merkantziatzat jotzen diren bitartean, giza eskubide gisa hartu beharrean. Gainera, planetaren elikadura nazioarteko merkataritzan oinarritzeak komunitate askoren eredu kulturalen aldaketa suposatzen du inposatutako ohituren bat-egitearen alde.

Hortaz, elikadura subiranotasunak alternatiba bat eskaintzen dio egungo nekazaritza-eredu industrialari. Eredu berri honek oinarrizko giza eskubidetzat jotzen du elikadura, herri eta estatu guztiek euren nekazaritza-politika propioak zehazteko eskubidea aldarrikatzen du eta elikagaiak ekoizten dituztenak politika hauen ardatz nagusi gisa hartzen ditu: nekazariak, baserritarrak eta arrantzaleak, baita kontsumitzaileak ere. Elikaduraren subiranotasuna subiranotasun politikoaren oinarrizko ardatza baita.

Berriak

Bizkaiko eta Bilboko zerrendaburuak aurkeztu ditu Bilduk

Bilduk gaur aurkeztu ditu udal eta foru hauteskundeetako Bilboko zein Bizkaiko hauteskunde-barrutietako zerrendaburuak. Aurkezpenean zerrenda bietako hogeita hamar hautagai izan dira. Bilboko alkategai Txema Azkuenagak, Busturia-Uribe barrutiko zerrendaburu Joseba Gezuragak eta Bilboko zerrendako laugarren hautagai Ana Etxartek hartu dute hitza.

Ana Etxartek adierazi du Bilduk iragarritako aldaketa politikoan “oinarrizko tresna” izan nahi duela. Euskal politika ezkertiarren barruan ibilbide desberdinak izan arren, “Bildu desadostasunak alde batera utzi eta batzen gaituen guztia lehenesteko gai izan delako”. “Bizkaiak desgobernu urte larregi pairatu behar izan ditu, besteak beste, krisi ekonomikoa eta soziala, eskubide indibidual eta kolektiboen urraketa”, hautagaiaren hitzetan.

Etxartek argi dauka alderdi hegemonikoek ez dutela inolako aldaketarik nahi: “Ez dute nahi euskal ezkerraren ahotsa ozen entzun dadin, kalean zein erakundeetan, aurrez aurre eta demokratikoki egotea. Beldur dira baina entzungo digute”. Bilduko hautagaiek jakin badakite aurretik duten bidea ez dela “samurra” izango, agintean dauden alderdiek “krisia ordaintzen jarraitu dezagun nahi izango dutelako, murriztutako demokrazia areagotuz, askatasunak mugatzen jarraituz, patriarkatuari eutsiz eta desarrollismoari ekinez”.

Inposizio hauen aurrean, Bilduk “bestelako eredu ekonomiko eta sozialaren alde” egingo du, hau da, “bidezkoagoa den eredu bat, demokrazia osoa, zuzena eta parte-hartzailea, eskubide zibil eta politiko guztien aldeko defentsan aktiboki ari den Bizkaia baten alde, baita emakumeen parte-hartzea bermatzen duen berdintasunezko eredu sozial baten alde”.

Txema Azkuenaga Bilboko alkategaiak “aldaketa politikoa eremu guztietara” eramatearen aldeko apustua egin du, “baita Bilbora ere”. Bizkaiko hiriburuak aldaketa handiak izan ditu azken urteetan baina, aldaketa hauek “noren onuran eta zeren truke?” izan diren galdetu du. Bilbori buruzko diagnostikoa eginda, “argi dago aldaketak auzoen kontra doazela eta auzoen partaidetzarik gabe egiten direla”.

Bilduk salatu duenez, EAJk eta Ezker Batuak, “PP eta PSOEren isileko babesarekin bazterketa politikoa baliatu dute inolako oposiziorik gabe herritarren beharrak asetzen ez dituen itxurazko hiri eredua sortzeko”. Azkuenagak gaitzetsi duenez, “bi abiaduratako Bilbo” eriakitzen ari dira, “erdialdearen eta auzoen arteko desorekak gero eta handiagoak” direla. Gogorarazi du, halaber, langabezian dauden bilbotarrak 27.000tik gora direla, “laguntza sozialak murrizten dituzten bitartean”.

Azkuenagak, bestetik, egungo alkatearen jarrera salatu du, “Euskal Herrira baino Madrilera begirako hiria” zuzentzen duelako eta “euskara zein euskal kultura arbuiatzen ditu, auzo elkarte eta eragileekin egiten duen bezala”. Honen aurrean, alkategaiak ziurtatu du “Bilbok bizi duen defizit demokratikoari konponbidea” emango diola, Bilduk herritarren parte-hartzea oinarrizko printzipio gisa ezartzera doalako.

Joseba Gezuragak Bilduk eragin duen ilusioa nabarmendu du eta koalizioak “Euskal Herriko panorama politikoan” aldaketa eragingo duela iragarri du. Autodeterminaziorantz doan Bizkaia zein Euskal Herri osoa eraikitzeko apustua egin du, eta hori lortzeko “ezinbestekotzat” jo du lurraldeen arteko politika komunak ezartzea. Zentzu honetan, ezinbestekotzat jo du “baliabideak hobeto erabili” beharra, eskumenen bikoiztasunarekin amaituz eta Lurralde Historikoen Legearen aldaketa sakona sustatuz.

“Biztanle, herri eta eskualdeetan” oinarritutako Bizkaiaren alde egin du Gezuragak. Lurraldearen antolamenduko politika desegokiak eragindako “egungo desoreka sozioekonomiko nabarmenak” zuzentzeko helburua du Bilduk. Irtenbidea, bere ustez, eskualdeen arteko zein gainontzeko Euskal Herriko eskualdeekiko “garraiobide eta zerbitzuen maila” orekatzean datza. Bilduk justizia sozialaren aldeko apustua berretsi du, politika fiskalaren iruzurrarekiko borroka areagotuz.

“Bizkaiko Foru Aldundiak bultzatutako politika erregresibo bezain bidegabea, errentarik altuenei mesede egiten diena, hain zuen”, Gezuragaren hitzetan. Koalizio ezkertiarrak tarterik altuenekiko presio fiskala handitzearen alde egingo du, “gehien duenak gehien ordain dezan”. Aldi berean, ondarearen gaineko zerga berreskuratzearen alde ariko da, baita sozietate zerga PFEZrekin parekatzera ere.

Azkenik, Gezuragak Bilduren beste proposamen batzuk aurreratu ditu, besteak beste, Herritargoaren Oinarrizko Errentaren sorrera. Era berean, iragarri du hemendik gutxira Bilduren programari buruzko xehetasun gehiago jakinaraziko dituztela.

Berriak

Alternatiba | Ezkerra eraldatzearen erronka

X