Etiketa: Bizkaia

Alternatibak dio merkatal gune handiak konponbidea izango balira Ezkerraldea ez litzatekeela izango EAEn langabe gehien duen eskualdea

Bizkaiko Alternatibaren bozeramaile Asier Vegak lurraldeko udalerri desberdinetan ireki daitezkeen Mercadona kateko saltokien inguruko informazio eta adierazpenen harira hitz egin du, “ongi etorria beroa ematen diote gure merkataritzari inolako mesederik egiten ez dionean, guztiz kontrakoa baizik: saltoki handiek gure herriak eta auzoak basamortu bihurtzen dituzte, saltoki txikietan lanpostuak suntsitu eta nekazalgoa pobretzen duen kultura industrializatuaren eredua defendatzen dute, maila lokalean zein nazioartean”.

Alderdi ezkertiarreko ordezkariak, merkatal gune erraldoien ugaltzeak Euskal Herriko eskualde desberdinetan eragindako inpaktua gogoratu du, Baionatik Iparraldean, “bizitza eta merkataritzarik gabeko kaleak izan ziren ondorioa”, Ezkerraldeko udalerriek sufritutako inpakturaino, non biztanle bakoitzarekiko eraikitako merkatal gune metro koadro tasa oso handia den. “Gune hauek aberastasuna eta lanpostuak ekarriko dituztenaren promesa egia balitz, hamarkada ugariz horrelako saltoki handiak sustatu ostean, Ezkerraldea ez litzateke oraindik EAEn langabezi handiena duen eskualdea izango”.

Alternatibatik gaitzetsi egin dute alkateen arduragabekeria hori, banaketa kate handi hauen promesak inolako lotsarik gabe zabaltzen dituztelako “berez, agerian geratzen diren gezurrak dira hauek, Mercadonak salduko dituen produktuak behar-beharrezkoak direlako, elikagaiak batez ere, eta hauek noski, dagoeneko erosi egiten dira. Saltoki txikiei bezeroak kenduko dizkiela baino ezin da ziurtatu, merkatal guneetako lanpostu bakoitzeko 5 langile baititu merkataritza mota honek eta, ziurrenik, lan baldintza duinagoekin”.

Vegak, azkenik, Mercadonaren izaera azpimarratu du, “nekazari txikien lepotik, prezioak kontrolatzea onarri duen eredu produktiboaren onuradun eta konplize da, elikadura burujabetzaren kontra doan ereduarena”. Jokabide honek Greenpeace erakundeak argitaratutako enpresa kaltegarrien zerrendan azaltzera eraman du, “lan baldintza prekarioak, ingurumenaren aurkako erasoak, nahita desinformatzea eta ardura sozial korporatiboari dagozkion bestelakoak” epaitzen dituen zerrenda, hain zuzen ere.

Berriak

Alternatibak Mungian izandako terrorismo matxistaren biktima berria salatu du eta emakumeen kontra indarkeriaren aurka egitera deitu du

Alternatibaren Uribe Butroeko asanbladako bozeramaile eta Gasteizko legebiltzarkide Diana Urreak Mungian gertatutako emakume baten erailketa salatu du: “Indarkeria matxistaren ondorio bortitz eta agerikoena izan arren, inondik inora bakarra ez bada ere; edozein kasutan gaurtik haratago eta gizartearen eremu guztietan arbuiatu beharrekoa da, ez bakarrik gaur eta halako gertaeren harira”. Ildo honetatik, gogorarazi du “patriarkatua menpekotasun sistemarik zaharrena dela eta pobrezia, indarkeria edo bazterkeria ematen den leku guztietan, emakumeok modu bortitzagoan pairatzen dugula beti”.

Hala, Alternatibatik gogorarazi dute emakumeak erailtzea ez dela gertaera isolatua edota zorizkoa, aitzitik, “egiturazko desberdintasuna ezarri duen gizarte patriarkalaren ondorio zuzena da, non emakumeok askotariko bortizkeria formak pairatzen ditugun, askotan estamentu, komunikabide eta instituzio batzuek isilarazi eta justifikatu ere egiten dituztenak”. Erakunde publikoen harira, hain zuzen ere, parekidetasunaren aldeko benetako legeak eskatu ditu, propagandatik haratago. Izan ere, “kontraesana” iritzi dio Eudel bezalako erakunde batetik hilketa honen inguruan berdintasunaren alde lan egitera deitu izanari, bere lehendakariorde Jose Antonio Santanok, bitartean, “alkate den herrian, Irunen, urtero emakumeen kontrako bazterkeria publikoki sustatzen duela”, alardea gogorarazita.

Bestaldetik, eraildako emakumearen jatorria zehazteko eta azpimarratzeko hedabideek egiten dituzten saiakerak salatu ditu legebiltzarkideak, “emakumeen kontrako indarkeria etengabeak ez daki ez mugaz, ez nazionaltasunaz, berriki argitaratu den txostenak baieztatzen duen bezalaxe, Europako hiru emakumeetatik batek, 62 milioi emakume baino gehiagok alegia, bere bizitzan indarkeria fisikoa edo sexuala sufritu dutela berresten duena”.

Bukatzeko, alderdi ezkertiarraren Uribe Butroeko asanbladatik, gaur arratsaldeko 19:00etan Mungiako udaletxean egingo den elkarretaratze isilarekin bat egitera deitu dute “terrorismo matxista eta patriarkalaren enegarren biktimaren” heriotza salatzeko. Bertan, Diana Urrea bera eta Alternatibaren Bizkaiko bozeramaile Asier Vega izango dira, eskualdeko militanteekin batera.

Berriak

EAJ, PP eta PSOEren parte-hartze ereduak herritarrek Udalbatzarretan hitza izateari uko egiten jarraituko du

EHBilduk Udalbatzaren araudia aldatzeko proposamena eraman du gaurko Osoko Bilkurara. Herritarrek Udalbatzarretan hitza izateko eta proposamenak aurkezteko eta defendatzeko aukera izatea zuen helburu EHBilduren proposamenak. EAJk, PPk eta PSOEk bat egin dute eta agerian utzi dute aipatutako hiru alderdien parte-hartze ereduan herritarren hitzak tokia ez duenik.

Bilbao eta Parte-hartzea hiritarrak protagonista Udalaren ekintzetan. Hau da udal politikan herritarren parte-hartzea sustatzeko Parte-hartze sailak argitaratu duen dokumentu baten goiburua.

Hori horrela izanda, argi esan behar dugu udalbatzarretan herritarren hitza ez dela entzuten, nahiz eta Udalbatzaren Araudi Organikoak bigarren artikuluan adierazi Udalbatza herritarren ordezkaritza politikorik handieneko organoa dela udal gobernuan.

Egoera hau iraultzea izan behar dugu helburu. Unea da araudia aldatzeko eta herritarren hitza eta proposamenak udalbatzarrean entzuten eta eztabaidatzen dela bermatzeko.

EHBildu Billbo

Berriak

Troikako gaizkileak Bilbon

Ana Etxarte – Alternatiba

Alderdi Popularra, bere ohiko eskumako leloei jarraiki, herritarren segurtasun gabezian oinarrituta alarma soziala pizteko estrategia martxan jartzen saiatu da berriz ere, daukan garrantzia areagotuz, herritarren beldurrarekin jolastuz, eta poliziaren zein errepresioaren logikari bidea emanez. Ildo honetatik, mozio bat aurkeztu da balizko egoera honi aurre egiteko, Herritarren Segurtasunerako Plan Integral bat lehenbailehen Bilbon ezartzea proposatuz.

Esan beharra daukat, salbuespena izan arren, Alderdi Popularrarekin ados nagoela bere mozioan egiten dituen bi baieztapenekin: Lehenik, ziur nago Bilbon delituak egiten darabiltzaten banda antolatuak badaudela. Bestalde, egoera honi aurre egiteko guztiz aproposa deritzot giza segurtasun plan bat lantzeari.

Jakina, horraino soilik etortzen gara bat. Izan ere, PPren segurtasun kontzeptua eta bertan proposatutako giza segurtasun kontzeptua (Nazio Batuek onarturikoa) ezberdinak dira oso. Hala, giza segurtasunaren kontzeptuaren arabera, soilik norberaren bizimodua bermatzeko, oinarrizko beharrizanak asetzeko, norbere kasa moldatzeko eta komunitatean modu libre eta seguruan parte hartzeko gaitasuna bermatzen denean ematen da. 

Gauzak horrela ulertuta, gero eta ozenago aldarrikatzen da, baita Bilbon ere, herritarren segurtasun eza, antolatutako delinkuentzia boteretsuak gidatutako eta zilegitasunik gabeko sistema suizida batek sortutako giza segurtasun ezaren ondorioa dela. Hauek dira jazarri eta atxilotu beharko genituzkeen gaizkileak, hauengana zuzendu beharko genituzke gure arreta eta lehentasunak. Gorbata garestiak janzten dituzten lapurrak dira, atxilotuta egon beharrean, enpresa handiak zuzentzen dituztenak, gure eskubideekin espekulatzen eta gure bizitzak merkaturatzen ari direnak; publikoki gaitzetsiak edo baztertuak izan ordez, pertsona eredugarri moduan aurkezten dizkigutenak; instituzioetatik aurkaritza jaso ez ezik, hauen laguntza eta trikimainak eskuratzen dituztenak, jokabide morroi eta ipurgarbitzaile bati jarraiki.

Hauek dira segurtasun ezaren errudunak: politikari ustelak, kapitalista handiak eta euren morroiak. Azken finean, gehiengoen eskubideak alde batera utzita, euren etekinak biderkatzeko baliabide publikoak erabiltzen dituztenak. Eta hauei aurre egiteko Giza Segurtasunerako Plana abian jarri beharko litzake, egiten dutena, egiten uzten zaiena, guztion segurtasuna arriskuan jartzen duelako. 

Horregatik EHBildutik proposatu dugu Giza Segurtasunerako Plan horren lehen puntua Bilbon izango den Ekonomia Goi-bilera bertan behera uztea izan da. Izan ere, martxoaren 3an Udal Gobernuaren oniritziarekin egingo den ekitaldian, besteak beste Nazioarteko Diru Funtseko, Europako Batasuneko, Espainiako Ekonomia Ministerioko eta Telefonica, BBVA edota Iberdrola bezalako enpresa handietako ordezkariak bilduko dira. Jardunaldi hauen helburua krisialditik ateratzeko ikuspuntu berriak aztertzea dela badiote ere, ez utzi zuen buruari iruzurrik egiten, euren xede bakarra herritarrak ustiatzen jarraitzeko moduak aztertzea baita, gero eta estuago eta merkatuaz baliatuz, gure lepotik bizitzen jarrai dezaten.        

Dudarik gabe, horrelako ekitaldiek eta kasta honek, gure giza segurtasuna kolokan jartzen dute, eta horregatik ez ditugu Bilbon nahi. Argi daukat ere, antolatutako gaizkile asko bertan izango direla eta horregatik lehenbailehen erantzun behar dugu Udaletik. Gaizkileekin, batek daki… akaso hauek ez dituzte kalean diru-zorroak lapurtuko, baina adi ibili behar gara, zeren eta lapurtu, lapurtu egiten dute; baina handizka, lehen mailan egiten den bezala. 

Horregatik, gure bizitzengatik, gure segurtasunagatik, protesta egitera goaz eta ongi etorriak ez direla esatera goaz. Troika eta kapitalistak, alde hemendik!

http://alternatiba.net/old-files/Kartel pirata web.jpg

Berriak

Alternatibak Erribera 13ren hutsaraztea gaitzetsi du okupazioa kriminalizatzeko eta zapaltzeko saiakera berria dela salatuz

Alternatibaren Bilboko Asanbladatik Erribera 13ren hutsaraztearen aurrean gure erabateko gaitzespena adierazi nahi dugu, berriro ere,epaileek eta poliziek bat egin dutelako okupazioa kriminalizatzeko eta zapaltzeko; Okupazioa aukera guztiz legitimoa da, eta egun inoiz baino gehiago, beharrezkoa ere, etxebizitza baterako sarbidea bezalako oinarrizko eskubideen gabezia dagoenean.

Berriro ere, jabetza pribatuaren defentsa beste edozein ardura guztien gainetik jarri dela ikusten dugu; ez du inporta eraikina urtetan hutsik egon bada, edota ondasunen banaketa duinago batean sinesten duten pertsonen konpromisoari esker hondatuta zegoen eraikina txukundu eta atondu dutenean.

Gizarte honek jabetza pribatuarekiko eta indibidualismo neurrigabearekiko duen joeraren aurrean, eta espekulazio kapitalistari aurre egin ahal izateko, toki desberdinen erabilera kolektiboa tresna aproposena dela uste dugu, aipatutako espazio horiek erabilera sozial eta komunitarioetarako erabiliz.

Egoera honen aurrean, Alternatibatik gaur arratsaldean Erribera 13 eraikinaren defentsaren alde Unamuno plazatik 19:00etan abiatuko den mobilizazioarekin bat egitera deitzen dugu.

Berriak

Zabalgarbik bizkaitarren osasuna arriskuan ipini duela salatu du EH Bilduk eta erantzukizunak argitzeko exijituko duela iragarri du

Zabalgarbik Ingurumen araudia urratu izana “arduragabekeria larria” dela ziurtatu du EH Bilduk, erraustegiak bizkaitarren osasuna arriskuan ipini duela iritzita. Ekologistak Martxan taldeak joan den astean jakitera eman zituen datuen harira egin ditu adierazpenak EH Bilduk. Talde ekologistak Eusko Jaurlaritzaren datuak hartu ditu oinarri, Ingurumen Zaintzarako Programan jasotzen direnak eta joan den astean jakitera eman zuenez, 2012 urtean Zabalgarbik lau aldiz gainditu zuen hainbat gai kutsakorren gehienezko isuria. Halako egoera bat gertatzen denean, Zabalgarbiren jarduna etetera behartzen du araudiak, isuritako gai toxikoen mailak behera egin dezan baina Zabalgarbik ez zuen bere jarduna eten, gehienezko muga gainditu zuen lau aldietatik hirutan.

Irune Soto batzarkidearen hitzetan, “arduragabekeria itzela” da Zabalgarbik ingurumen araudia urratu izana. “Oso gertakari larriez ari gara hizketan. Bizkaitarron osasunaz ari gara. Datuek argi eta garbi adierazten dute Zabalgarbik ez dituela gutxieneko kontrol neurriak bete eta, beraz, arriskuan jarri du inguruko biztanleriaren osasuna”.

Asier Vega, Irune Soto eta Aitziber Ibaibarriaga

Datuak joan den astean publiko egin ziren arren, Bizkaiko Aldundiak “hitz erdirik ez esan izanak” are gehiago kezkatzen ditu koalizioko kideak. “Aldundiaren isiltasuna oso nabarmenegia gertatzen ari da” adierazi du Sotok.

EH Bilduk azalpenak eskatuko dizkie araudi urraketaren arduradunei eta zentzu horretan, Iosu Madariaga Aldundiko Ingurumen diputatuaren presazko batzorderatzea eskatuko du. Madariaga diputatu izateaz gain, Zabalgarbiko Administrazio Kontseiluko presidentea da baita ere. Dena den, koalizioak aurreratu duenez, “azalpenak ez dira nahikoa izango”. “Gertakari larriok, ondorio argiak izan behar dituzte arduragabekeria honen erantzuleentzako. Halakorik ezin da onartu eta ezinbestekoa da neurriak hartzea berriz gertatu ez dadin” adierazi du batzarkide taldeko bozeramaileak.

Bilboko udal taldetik ere Zabalgarbiren urraketak salatu dituzte EH Bilduko ordezkariek. Aitziber Ibaibarriagak adierazi duenez, Zorrotza, Deustu eta San Inazioko auzokideen osasuna da bereziki arriskuan jarri dena, “100.000 pertsonatik gora bizi dira auzo horietan” argitu du. Hala, EH Bilduk biztanleriaren osasuna kaltetua izan den argitzeko ikerketa eskatuko du Bilboko Udalean eta zinegotzi delegatuari beharrezko azalpenak eman ditzala eskatuko dio.

Ibaibarriagak azpimarratu du Eusko Jaurlaritzak araudi urraketaren berri zuela 2012. urtetik baina ez duela inolako neurririk hartu. “Guztiz onartezina da. Kanpaina elektoraletarako “pertsonak lehenengo” direla esaten dutenek, ez dituzte osasun berme oinarrizkoenak betearazten”.

Bestalde, Zabalgarbiren errendimendu energetiko baxuari erreparatu dio Ibaibarriagak. Eusko Jaurlaritzak jaso dituen datuen arabera, Zabalgarbik ozta-ozta betetzen du “balorizazio energetikorako azpiegitura” izendatzeko gutxieneko errendimendua. Aldiz, Ekologistak Martxanek errendimendua kalkulatzeko metodologia akatsak salatu ditu eta Zabalgarbiren jarduera “hondakinen ezabatzeari” dagokiola ziurtatu du, eta ez “balorizazio energetikoari”. Baieztapen hori frogatuko balitz, Bizkaiak ez luke hondakin kudeaketarako araudi europarra beteko eta Bizkaiko hondakin sistema legez kanpokoa litzateke.

Horrez gain, Zabalgarbiren bideragarritasuna ere oso zalantzazkoa utzi dute agerian datuek. Zabalgarbi ezohiko diru laguntza publikoei esker da bideragarri baina EH Bilduk ohartarazi duenez, litekeena da Espainiako Gobernuak laguntza horiek ezabatzea. “Hala gertatuko balitz, zein litzateke Zabalgarbiren etorkizuna? Aldundiak emango lizkioke laguntzak? Isurtzen dituen gai toxikoak arnasteaz gain, bizkaitarrok gure poltsikotik ordaindu beharko genuke azpiegitura defizitario hori?” galdetu du Ibaibarriagak.

EH Bildutik azpimarratu dute Zabalgarbi dela Bizkaiko Foru Aldundiaren hondakin kudeaketarako ardatza. Ibaibarriagaren hitzetan, “EAJk sortu duen munstroa nola-hala elikatu behar duela erabaki du Aldundiak. Berdin dio bizkaitarron osasuna arriskuan jartzen bada, berdin dio errendimendu baxuko azpiegitura bada eta Europako araudia urratzeko arriskuan bagaude, eta berdin dio bideragarria ez bada. Zabalgarbi gabe, Aldundiak ez du hondakin kudeaketarako politikarik”.

EHBildu Bizkaia

Berriak

EHBilduk La Navalen etorkizunarekiko konpromisoa berretsi du langileekin bilera egin ostean

EHBilduren legebiltzarkide Oskar Matute eta Arri Zulaikak bilera egin zuten atzo goizean, Bilbon, La Navaleko langileen lan batzordearekin. Matute eta Zulaikak langileei elkartasuna adierazi diete koalizioaren izenean, izan ere, Ezkerraldeko enpresaren etorkizuna kolokan dago martxotik aurrera. Hain zuzen, langileak kezkatuta daude, hurrengo hilean bukatu egingo zaielako orain esku artean duten eskaera, eta momentuz ez dutelako beste eskaririk jaso. Erakundeen inplikazioa eskatzeko manifestazioa deitu dute otsailaren 26rako eta EHBildu bertan izango dela esan dute bi legebiltzarkideek.

Zentzu horretan, koalizioak berretsi egin gura izan du La Navalen etorkizuna bermatzeko lan egiteko konpromisoarekin. Matute eta Zulaikak konponbidea bilatzeko ardura politikoa eskatu diote Jaurlaritzari eta gaur arte jarraitu duen bide okerra kritikatu dute. “Jaurlaritzak ez du euskal industriaren egoera eta etorkizuna begitantzeko  gaitasunik. Ez du euskal industriaren sektore estrategikoen definizioa eta diseinua egin, eta hori egitea ezinbestekoa da erakunde publikoaren industri politika ezartzeko. Hori egin beharrean, arazoa gainean duenean erreakzionatzen du, ikuspegi nazionalik gabe, jada berandu denean. Epe laburreko emaitzak bilatzen ditu, arazoak aurretiaz begiratu ordez”, salatu dute.

Ildo horretatik, EH Bilduk galdera egingo dio Arantza Tapia sailburuari, Jaurlaritzak ontziolen sektorea estrategikotzat duen jakiteko. Legebiltzarrean Tapiak egingo duen interbentzioan ere gogoraraziko zaio La Naval Ezkerraldearen motoreetako bat dela, eta eskualde hori dela Euskal Herrian langabetu gehien duen zonaldetako bat. “Ahoa bete zaie ustez lanpostuak sortuko dituen Enplegu Plana salduz. Eta oraindik buruan sartu ez bazaie ere, gizarteak badaki iruzur egiten ari direla. Izan ere, guztiok dakigu enplegu planik egokiena jada existitzen den enplegua mantentzen duena dela. Horregatik, Jaurlaritzak marketing kanpainak alboratu beharko lituzke eta bideragarriak diren sektoreak bizirik mantentzeko inplikatu beharko litzateke”, salatu dute.

ehbildu.net

Berriak

Matute: “Onartezina deritzogu Bilbao lapurren erakuslehio eta kolaboratziale bilakatzeari”

Mundua pobretzen dihardutenen agindu politikoak babesten eta betetzen jarraitzeko asmoa duela berretsi du gaur Lehendakariak Gasteizen, EH Bilduko Oskar Matutek egindako interpelazio baten harira. Hala, martxoaren 3ko Bilboko gailur ekonomikoan egongo dela esan du, Luis de Guindos, Olli Rehn (Europako Batzordea), Christine Lagarde (FMI), Joaquín Almunia edo Mariano Raxoiri ongi etorria emateko. Hain zuzen ere, koalizioaren iritziz horiek dira “krisi ekonomikoaren arduradun nagusiak eta gizartearen pobretzea bultzatzen dutenak”.

Matutek salatu du martxoaren 3ko gailurrean “irainaren argazkia” aterako dela, eta Urkullu eta Azkuna argazki horretan agertuko direla. Horren haritik, Jaurlaritzaren bozeramaile nagusiari exijitu dio “gure eskubideak urratzen dituztenei jartzen dien alfonbra gorria” erretiratzea. Lehendakariak, aldiz, bere hitzekin adieraztera eman du Raxoi eta besteen eredu ekonomiko bera duela.

Zentzu horretan, EH Bilduren bozeramaileak “iraintzat” ere hartu du gailurrean parte hartzeko erabakia. “Euskal gizartea dagoen egoeran ez da zilegi argazki horretan parte hartzea”, kritikatu du. Horrez gain, Legebiltzarrean hartutako erabakiei ere trufa egiten diela gaineratu du. “Ez da logikoa EAJk lan erreformaren aurka bozkatzea Gasteizen, eta biharamunean, Raxoirekin elkartzea eta bere eredu ekonomikoarekin bat egitea”.

Koalizioak adierazi du gailur ekonomikoari Jaurlaritzak eskaintzen dion babesa erretiratzea eskatzeko mozioa aurkeztuko duela hurrengo egunetan. Horrez gain, bat egin du ekimenaren harira egingo diren mobilizazioekin.

EHBildu

Berriak

Prozesu parte-hartzailea abiatu dugu, horren premiazkoa den aldaketa sustatzeko helburuz

Aldaketa sustatzea xede izango duen prozesu parte hartzailea abiarazi dugu. Bilbon horren premiazkoa den aldaketarako oinariak definitu nahi ditugu. Horretarako, orain hasi eta 2015eko udaberrira arte luzatuko den prozesuari ekin diogu. Lehenbizi, arloz arloko eta auzoz auzoko diagnostiko eguneratu bat egingo dugu.
200 lagun inguru elkartu gara horretarako; jatorri, adin, trebakuntza, lanbide, militantzia esparru eta ikuspegi desberdineko 200 lagun. Ondoren, diagnostiko horren gaineko proposamenak landuko ditugu, hala nahi duten herritar eta eragile guztien parte hartzearekin. Denon artean denontzako ibilbide orri bat zehazteko helburuz. Herritarrengandik herritarrenganako eskaintza osatuz. Helmuga: Beste Bilbo bat. Herritarron Bilbo.

‘Aldaketa abian. ¡Estamos en marcha!’ goiburu hartuta, Bilbon aldaketa sustatzeko xedez abiarazitako prozesu parte hartzailea aurkeztu dugu gaur Zabalguneko Azokan. Bilbon horren premiazkoa den aldaketarako oinarriak definitu nahi ditugu, aldaketa sozioekomikorako eta aldaketa soziokulturalerako zimenduak ezarri. Joan zen abenduan hasi genuen dinamika, eta 2015eko udaberrira arte iraungo du.

Baina zertan datza abian jarri dugun prozesua? Zein helburu du? Zein ekinbide?

P1070211

Bilboko egoeraren diagnostiko bat egingo dugu aurrena, diagnostiko berritu bat, egungo egoerari erantzuteko. Arlokakoa orain, eta auzokakoa, irailetik aurrera. 200 lagun inguru elkartu gara horretarako. Jatorri, adin, trebakuntza, lanbide, militantzia esparru eta ikuspegi desberdineko 200 lagun.

Lau ardatzen inguruan antolaturiko 18 lan taldeetan ari gara lanean. Honakoetan, hain justu: Pertsonak lehenetsiko dituen hiria (Ogasuna eta fiskalitatea, Enplegua eta Merkataritza, Elikadura Burujabetza eta Eskubide Sozialak), Hiri eredu iraunkorra (Hirigintza, Mugikortasuna, Ingurumena, Etxebizitza, Turismoa), Bertoko kulturan oinarrituriko hiria (Kultura sormena, Jai eredua, Euskara, Kirola, Aisialdia, Hezkuntza) eta Askatasuna ardatz izango duen hiria (Politika Feminista, Gazteria, Hirugarren adina-Pentsionistak, Aniztasuna eta Migrazioa).

Horien artean daude, besteak beste, Xabier Landabidea (Deustuko Unibertsitateko irakaslea), Joseba Martin (Lankidetza Garapenerako teknikaria), Karlos Renedo (Arkitektoa eta Otxarkoagako herri mugimenduko kidea), Aitor Apraiz (Udal Etxebizitzetako langilea), Ula Iruretagoiena (Arkitektoa eta EHUko irakaslea), Ibai Gandiaga (Arkitektoen Elkargoko kidea), Aitor Torre (Bizkaiko Batzarkidea), Andrea Heuschmid (Alemanian sortutako bilbotarra, Gertuko turismoan aditua), Karmelo Landa (EHUko irakaslea eta Europako Parlamentario ohia), Jon Aritz Bengoetxea (Irakaslea eta zinegotzi ohia), Mirian Alonso (Stilo futbol areto taldeko jokalaria eta zinemagilea), Edriga Aranburu (Bizkaiko Arraun Federazioko idazkaria), Maite Arraizar (Athletismo Santutxuko korrikalaria), Ana Etxarte (Zinegotzia), Urtzi Martinez (Arangoitiko gazte mugimenduko kidea), Mikel Arginarena (Irakasle erretiratua eta Pentsionistak Martxaneko kidea), Xabat Moran (Santutxuko Jai Batzordeko kidea), Raquel Goñi (7. Barrutiko kontseilaria), Jose Felix Aguilera (4. Barrutiko kontseilaria), Igone Iriarte (8. Barrutiko kontseilaria).

Bilbon aldaketa gauzatzen hasteko estrategiko eta klabe diren arloetan ari gara lanean, bakoitzaren argazkia zein den ikusteko, lehenik eta behin; eta argazki horren gainean lan egiteko, gero. Errealitatea kontuan hartu eta helburuak ezarri ondoren, horiek lortzeko proposamenak egiteko, hain justu. Denon artean, denontzako ibilbide orri bat zehazteko. Helmuga: Beste Bilbo bat. Herritarron Bilbo.

Hala, diagnostikoa osatu ondoren, parte hartzeari ateak irekiko dizkiogu bete-betean, lan taldeetan osatutako azterlan horien gainean ekarpenak egin ditzaten hala nahi duten herritar eta eragile guztiek. Horretarako, hainbat ekinbide antolatuko ditugu, hala nola jardunaldiak eta parte hartzea ardatz izango duten bestelako dinamikak ere. Hirigunean zein auzoetan. Bilbo mailan zein auzoen perspektiban.

Eta horren ondotik, prozesuaren bigarren atal batean, proposamenak lantzeari eta jasotzeari ekingo diogu, herritarron Bilbo sortzeko bidean urrats eta ekinbideak zein izango diren denen artean erabakitzeko.

Izan ere, postaleko hiria saldu nahi diguten arren, oso bestelakoa da Bilboren egiazko argazkia.

Langabeziak muga historiko guztiak hautsi ditu; %18ko langabezia tasa du Bilbok, hau da, 30.987 langabe daude egun. Hiria osatzen duten 38 auzoetatik soilik 4 daude hiriaren bataz besteko errentaren gainetik. Eta iaz, bost etxegabe hil ziren kalean. Arazo latza baitu Bilbok; 236 pertsonak lo egiten dute, egunero, kale gorrian.

Hala eta guztiz ere, larrialdietarako laguntzak emateko leihatila irailean itxi egin zuen udalak, “dirurik ez zegoelako”.

Horrez gain, Behatokiak urtero egiten duen txostenaren aurreneko postuetan dago Bilboko Udala, hau da, hizkuntz eskubideak urratzen dituzten erakundeen zerrendaren lehenetariko postuen artean da. Eta oraindik orain, badira auzo handiak inongo haurreskola zerbitzurik ez dutenak, hala nola, Alde Zaharra, Indautxu, Errekalde, Txurdinaga…

EHBildu Bilbo

Berriak

Alternatiba | Ezkerra eraldatzearen erronka

X