Etiketa: Bizkaia

Bilduk berebizikoa ikusten du ostalarien interesak auzokideen deskantsurako eskubidearekin tartekatzea

Ana Etxarte eta Aitziber Ibaibarriaga zinegotziek, Bildu Udal taldeak Ostalaritza Ordenantza moldatzeko egindako ekarpenak aurkeztu dituzte gaur goizean. Bilduk, aurretiaz ostalaritzaren egoeraren inguruko diagnostiko bat egin ez izana deitoratu du, era honetan, ostalaritza, espazio publikoa eta terrazak, ingurugiroa edota zaraten arloak bere baitan kontutan hartu ahal dituen proposamen globala egin ahal izateko, soilik honela tartekatu baitaitezke ostalaritzaren interesak eta auzokideen deskantsurako eskubidea. Etxartek adierazi du hurrengo Udalbatzan Aisialdiaren Zarata Mapa egiteko proposamena aurkeztuko dutela, modu honetan, aipatutako jarduerak eragindako zarata maila neurtu ahal izateko.

Etxartek eta Ibaibarriagak, Udal gobernu batzordeak egindako Ostalaritzaren gaineko Ordenantzaren aldaketa “zuloa estaltzeko” egin dutela adierazi dute. Ibaibarriagak salatu du, Udalak, Ordenantza aurretiazko diagnostiko bat egin gabe abiatu duela etaauzo elkarteen parte hartzea kontutan hartu gabe “Udalak proposatutakoarekin bat egiten ez duena”.

Bilduko zinegotziek ezinbesteko jotzen dute hiriarentzat horren garrantzitsua den ostalaritza bezalako sektore ekonomikoaren, bizilagunen deskantsurako eskubidearen, ingurugiroaren zaintzaren eta espazio publikoaren arteko oreka bilatzea.

“Oreka hau bermatu ahal izateko ezinbestekoa da egoeraren diagnosi bat edukitzea, azken urteotan aisialdi ereduan ematen ari diren aldaketak kontutan hartuko dituena: Tabako lege berriak sortu dituen jende multzoen kontzentrazioak, kalean kokaturiko terrazen gorakada, eguneko tabernen ugaritzea zonalde batzuetan, eta abar luze bat”, azpimarratu du Ibaibarriagak.

Bilduk uste du Gobernu batzordeak egindako Ordenantza proposamenak “ez duela arazoaren muina konponduko”. Ibaibarriagak Udalari osoko ekinbidea martxan jartzea eskatu dio. “Deskantsurako eskubidea bermatzeaz gain, kalitatezko ostalaritza bultzatu beharra dago, eguneroko errealitatean oinarrituta egongo dena, eta ez soilik turismoaren baitan ezartzen diren espektatibetan. Ostalaritzaren sostengu nagusia eguneroko bezeroak dira eta horiei begirako neurriak planteatuko beharko lirateke”.

Antzemandako gabeziak gainditzeari begira, Udal talde soberanistak lau zuzenketa aurkeztu ditu eta, honekin batera, mozio-proposamen bat eramango du apirileko Udalbatzarrerako. “Bertan Aisialdiaren Zarata Mapa osatzea proposatuko dugu, modu honetan jakin dezagun behingoz zein den mota honetako jarduerek sortzen duten kaltea”, azaldu du Ibaibarriagak. Mapa hau osatu eta gero Ekintza Plan bat osatzea litzateke hurrengo pausua, Babes Bereziko guneak ezarriz, maparen bitartez bizilagunen osasunerako kaltegarriak izan daitezkeen zarata mailak gainditzen diren eremuetan.

Aurkeztu ditugun zuzenketak

  • Bertan behera geratzea II taldeari dagokionean lizentzia berrien tramitazio guztiak, Aisialdiaren Zarata Mapa osatu bitartean, Babes Akustikoko Eremu Berezietan. Babes Akustikoko Eremu Berezi hauek behin behineko izaera izango dute, Aisialdiaren Zarata Mapa osatu bitartean, dekretu baten bitartez eta kalearen edo plazaren morfologia, dimentsioak eta kalean dagoeneko ezarriak dauden ostalaritza jardueren portzentajea kontutan hartuta. 
  • Lizentzia motari dagokionean ezingo da I taldetik II taldera inongo aldaketarik eman,  Aisialdiko Zarata Maparen bitartez Babes Akustikoko Eremu Bereziak zeintzuk diren zehaztu arte. 
  • Hiriko zonalde zehatzetan ostalaritza jarduera berriak ezartzea debekatuko da eremu horiek Babes Akustikoko Eremu Bereziak izendatzen direnean, Aisialdiko Zarata Maparen bitartez. Babes Akustikoko Eremu Berezietan ez da aplikatuko 7. artikuluak distantzia minimoei buruz zehazten duena, baizik eta Ekintza Planak zehazten duena. 
  • Gaiaren inguruan bizilagunek ahalik eta informazio handiena izan dezaten, ostalaritza jarduera guztietako fatxadan edo atean kaletik errez ikusi daitekeen bereizgarri bat ezarriko da bertan jardueraren lizentzia mota eta bete beharreko ordutegia zein den izango dituena.
Berriak

Alternatibak Jose Luis Bilbaoren gobernuari leporatu dio gizartearen haserreaz jabetzea eta bere publizitatean barregarri uztea

Alternatibako Bizkaiko bozeramaile Asier Vegak salatu du aste honetan Bizkaiko Foru Aldundiak aurkeztutako kanpaina publizitarioa iruzur fiskalari aurre egiteko, bere “eraginkortasuna eztabaidagarria” izan daitekeen arren. Kanpaina honen iragarkietan sexu eta adin desberdineko pertsonak pankarta baten atzean manifestatzen agertzen dira “Guri iruzurrik ez” lemapean. Pankartan STOP seinale bereizgarria -iruzurraren kontrakoa kasu honetan- ere ikusten da, “kaleetan geroz eta maizago egiten diren kaleratzeen, iruzur politikoaren, langileriaren eskubideen eta lanpostuen suntsiketa dakartzaten lan erreformen aplikazioen kontrako protesten leloen eta sinboloen jabe egiteko ahalegin batean”.

Vegaren hitzetan: “deitoragarria da instituzio publiko batek Bizkaiko herri klaseei bizkarra ematea dirudunen faborean gobernatzeko, herriaren suminduraren sinbologia usurpatzen den bitartean, barregarri uzteraino. Iraingarria da benetan Bilbao-Iruarrizaga bikoteak ezartzen dutenen tankerako politiken kontra kalean egunero erabiltzen diren lelo eta pankartak imitatzea”. Modu berean, iruzur fiskalaren kontrako publizitatea gaitzetsi du, Foru Ogasunak iaz antzemandako zenbatekoa %19an jaitsi zen bitartean.

Hau guztiarekin batera, alderdi ezkertiarreko bozeramaileak ondorengoa azpimarratu du: “PNVren eskuetan dagoen Aldundiaren politika fiskala oraindik ere larriagoa da iruzur legalizatua ahalbidetzen duelako, eta horren ondorioz, zerbitzu sozialak bermatuko dituen eta gizartea transformatzeko balioko duen bilketa eragozten duelako”. Gauzak horrela, eta publizitate honen “faltsutasunaren” adibide bat jarri nahian, iragarkian agertzen den aniztasun funtzionaleko kolektiboaren erabilera salatu du, gurpil aulkian dagoen mutiko baten bidez irudikatuta dagoena. Faltsukeriaz josita dago, Bizkaian laguntza pertsonalerako laguntza ekonomikoak “oso urriak direlako, bost onuradun inguru bakarrik daudela, Gipuzkoan 1.100 baino gehiago diren bitartean”.

Zoritxarrez, jarraitu du esaten, adibide gehiago dago: “Iragarkiak gizon baino emakume gehiago hautatu ditu pankartaren atzean jartzeko, baina BFAaren aurrekontua sakonki aztertzen badugu, berdintasun sailaren aurrekontua gastu totalaren %0,09an dela ikus dezakegu”. Adineko pertsonak ere agertzen dira, “gizarte osasun zentroetan murrizketak sufritzen ari dituztenak”.

Egoera hau dela eta, Alternatibatik Aldundiari eta Foru Ogasunari erantzukizuna exijitu diote, eta aldi berean, “gizartearen gehiengo bat iraintzen duen kanpaina hau erretiratzeko” eskatu dute; “kolektibo hauek dira Bilbao jaunak politika sozialetan aplikatutako murrizketak gehien sufritzen dituztenak, eta hauekiko elkartasunean kalera ateratzen direnen kontra ere egiten duelako”.

Berriak

Bilduk Bilbo Zaharra, San Frantzisko eta Zabalako Plan Komunitarioak inpakturik izan ez duela salatu du

Bildu Udal Taldeak orain dela urte bat martxan jarri zen Bilbo Zaharra, San Frantzisko eta Zabalako auzoetarako Plan Komunitarioa inpakturik izan ez duela salatu du gaur goizean.

Ana Etxarte zinegotziak aipatu duenez, 3 planekin kontatu arren eta lehenengoa landu zenetik 13 urte pasa direlarik, “udalak oraindik ez du esku-hartze serio, koherentea eta integrala egin auzo hauetan. Alderantziz, gizarte laguntzetan, esku-hartze soziala lantzen duten eragileen baliabidetan eta enplegua bermatzeko formakuntzan murrizketak egiten jarraitu du”.

Zinegotziak bere desadostasuna erakutsi du planari emandako enfokeagatik, helburu nagusi bezala bizikidetzako arazoak konpontzea proposatzen duelako eta ez auzo hauek dituzten arazo nagusiak, pobrezia, bazterketa soziala eta langabezia gainditzea.

Etxartek auzo hauek jasaten duten langabezia tasa aipatu du. 2011an Bilbo Zaharra, San Frantzisko eta Zabalan langabezi tasa %35,5a zen bitartean, Bilbon %11,4koa zen. Gainera, gazteek eta epe luzerako langabetuek kaltetu nagusiak dira, 16-24 urte bitarteko gazteen artean %56,8 portzentaia baitu eta langabezian dauden pertsonen %40a baino gehiagok bi urte baino gehiago daramatzate lana bilatzen.
Bilduk auzoetako mugimendu asoziatiboarekin adostutako plangintza bat egitea presazkoa dela uste du, auzoetako errealitate eta aukeretan oinarritutako proposamenei esker, auzoetan bizi diren norbanako eta kolektiboen ongizatea bermatzeko esku-hartze sozial, ekonomikoak eta urbanistikoak jasoz.

Zentzu honetan, Bilduk proposatu du pertsona guztien oinarrizko beharrak asetzen dituzten laguntza sozialak eta zerbitzuak bermatzea, enplegu duina sortzen dituzten jarduera ekonomikoak babestea, etxebizitza eskubide gisa kontutan hartzea eta pertsona guztiei bizitzeko leku duin bat bermatzea, kalitateko heziketa-eskaintza publikoa, eskola integrazioko eta kultur-aniztun espazioa bihurtuz, bortizkeria matxistaren aurkako borroka era integralean biziagotzea, Komunitate-ekipamenduak eta topaketa guneak sortzea Kultur-aniztasuna, berdintasuna eta bizikidetasuna bultzatzen dituzten kultur eta aisialdiko jarduerak bultzatzeko.

Berriak

Munduko alkaterik onenaren hirian

Joana Regueiro, Ana Etxarte, Asier Gomez eta Unai Delgado – EHBildu Bilbo

Martxoaren 6an Bilbon gertaturiko Jose Antonio Dieguezen hilketak agerian jarri du gaur-gaurkoz instituzioek gaitasunik ez dutela bermatzeko pertsona orok etxebizitza duin eta egokia izateko duen eskubidea. Nahiz Euskal Herrian indarrean dagoen legeriak lehen mailako eskubide gisa seinalatu, etxebizitza luxuzko ondare bihurtu da, eta gero eta gehiago dira muturreko egoerak bizi dituzten pertsonak. 2012an, 454 etxe kaleratze izan ziren Bilbon. 454 familia miseria gorrira kondenatuak. Non eta 15.567 etxebizitza huts dauden hirian, Bilboko Udalak berak emandako datuen arabera.

Jose Antonio Dieguezen hilketak ez du soilik agerian utzi herritarrengandik gertuen dauden instituzioek beren eskubiderik oinarrizkoenak ziurtatzeko duten gaitasunik eza. Ibarrekolandako herritar horren heriotzak begi bistan utzi du Bilboko Udalak inolako borondaterik ez duela gobernatzen duen hiriko biztanleen eskubideen bermatzaile nagusia izateko.

Etxe kaleratzeak gizarte arazo dira, eta azken garaian kezka handia sortu dute bilbotarren artean. Horren isla izan dira iragan azaroko eta urtarrileko udalbatzarretan izandako eztabaida biziak. PPren funtsik gabeko proposamen baten harira, etxe kaleratxeen arazoari errotiko konponbidea emateko konpromisoa galdegin zion ezkertiar eta abertzaleon koaliziak udalari. Aurkezturiko zuzenketa ezin argiagoa zen, eta etxe kaleratzeen arazoaren aurrean Udalak zenbait konpromiso har zitzan proposatu zuen. Besteak beste, erakunde finantziarioei eskatzeko etxe kaleratze prozedura oro bertan behera uzteko eta Espainiako Gobernuari Hipoteken Legea aldatzeko. Izan ere, Europako Batasuneko Justizia Auzitegiak lege horrek EBko legeria urratzen duela, eta herritarrak babesgabe uzten dituela ebatzi aurretik, hainbat instantzia juridikok ere esana zuten gehiegikeriaz jokatzen duela.

Hori hala, gure koalizioak aurkezturiko zuzenketak etxegabetzeen auzian gehiegikeriaz jokatzen duten entitate finantziarioekiko harremana berrikusteko eskatzen zion udalari. Halaber, etxe kaleratzeen arazoari gaina hartzeko lanean ari diren gizarte eragileekin elkarlanerako prestasuna adierazteko eskatu zion, eta bide horretan sakonduz, arazoa bertatik bertara landu ahal izateko batzorde bat eratzea proposatu zuen gure koalizioak. Batzorde horretan, udal taldeek nahiz gizarte eragileek hartuko lukete parte, eta etxetik kaleratuak izateko arriskuan izan daitezkeen kasu guztien azterlan zehatza egingo lukete, ondoren halako egoerak ekiditeko beharrezkoak diren bitarteko eta protokoloak indarrean jartzeko. Muturreko egoerarik berriro ez emateko. Horiek errotik ekiditeko.  Eta, bidenabar, etxe kaleratzeen arazoari erabateko konponbidea emateko. Ordea, gure koalizioaren zuzenketari bidea itxi zion EAJk, kontra bozkatuz. Era berean bota zuen atzera PSE-EEk urtarrilean aurkezturiko zuzenketa. Kasu batean zein bestean, Iñaki Azkunak gidatzen zuen gobernu taldeak argiro erakutsi zuen etxe kaleratzeen auzia konponbidean jartzeko inongo borondaterik ez duela. Ustez munduko alkaterik onena denak finantza erakundeen eta herritarren artean den amildegia desagerrarazteko udal taldeek abiaturiko ekinaldiak geldiarazi ditu. Ez behin, birritan baizik.

Testuinguru horretan erabaki zuen Bilboko Auzo Elkarteen Federazioak ekimena hartzea, eta doako aholkularitza juridiko zerbitzua abiaraztea. Beste behin ere, herri mugimenduak hartu behar izan zuen bere gain, hasiera batean behintzat, administrazioari dagokion zeregin bat. Zerbitzua eskaintzen hasi zenetik, etxetik kaleratua izateko arriskuan den hainbat jenderi eman dio babesa. Asterik aste, jende andana bildu da laguntza premia larrian; kaltetuetako asko Udal Etxebizitzen zerbitzuak berak haien aurka hasitako kaleratzeko prozedura batean murgilduta daude. Eta adierazgarriena dena: muturreko egoera horietan diren pertsonetako asko Gizarte Ekintza saileko gizarte langileek eurek bideratu dituzte federazioaren zerbitzura. Horrek agerian utzi du zeinen handia eta larria den udalak arlo horretan duen gabezia. Orobat, nabarnen geratu da udalak ez dituela gizarte politikak egokitu, egungo krisi egoerari behar bezala heltzeko, eta laguntzarik handiena behar duten herritarrei irtenbide zentzudun, bidezko eta duinak emateko.

Ibarrekolandako gertaerak, eta berau salatzeko arratsalde horretan bertan buruturiko manifestazio jendetsuak erakutsi zuten etxe kaleratzeek ondorio tragikoak dituztela, eta herritarren artean gero eta kezka handiagoa eragiten dutela. Hala, EH Bilduk azpimarratu nahi du gizarte arazo honi amaiera emateko borondate politikoa baino ez dela behar. Alferrik da adierazpen instituzional bat egitea, harekin batera kaleratzeak ekidingo dituzten neurri zehatzak hartzen ez badira. Pertsona orok du eskubidea etxebizitza duin eta egoki bat edukitzeko, eta administrazioak ezin du tamaina horretako erantzukizuna gizarte mugimenduen zoriaren mende utzi. Horrenbestez, beste behin exijitzen dugu udaleko talde politikoez gain, gizarte eragileak ere bilduko dituen batzorde bat sortzeko, kaltetuen sufrimendua apalduko duten neurriak definitzeko eta gizarte gaitz bihurturiko arazo honi aterabide bat emateko, behingoz.

Berriak

Lan erreformaren ondorioak salatzeko kalera atera da gara Bilboko Modas Marialuzeko langileekin batera

Modas Marialuz saltokiaren aurrean kontzentrazioa egin dute gaur eguerdian EHBilduko 30 bat lagunek, tartean Alternatibako Oskar Matute, Ana Etxarte eta Asier Vegak. Langileekin batera eta elurpean salatu dute langileak lan erreforma baliatuta kaleratu nahi dituztela, kaleratzi ordainik ordaindu gabe ere. Matutek berak eta Sortuko Maribi Ugarteburuk hitz egin dute EHBilduren izenean, eta Maribi Luquek langileen ordezkari gisa.

Krisia gogor ari da kolpatzen Euskal Herria. Krisiaren aitzakiapean, patronalak eta hainbat enpresarik kaleratzeak biderkatu eta lanpostuak suntsitzen ari dira.  Espainiar gobernuak onartutako erreformak eta neurri gogorrak baliatzen dituzte horretarako eta horrek ondorio latzak ditu gizartean eta gure ekonomian.

Rajoyren lan erreformarekin, enplegua sortu ordez, langabezia tasak biderkatu egin dira Euskal Herrian, eta sektore guztiak eta kontratazio modalitate ezberdinak kaltetu ditu. Horrela, hamarkadetan lortutako lan eskubideak eta hobekuntzak ezabatzen ari dira eta prekarietateari ateak ireki zaizkio parez-pare.

Enpresa handietako kaleratze masiboei buruz hitz egiten duten titular handiez harago, Bizkaian badira oharkabean pasatzen diren kaleratze asko.

Kaleratze hauek ez dira ohiko hedabideetako albisteetan agertzen, baina pertsona asko ari dira geratzen langabezian kaleratze horien ondorioz, eta mota honetako lanpostu gehiegi deuseztatu dira dagoeneko, lan erreformak eskaintzen dituen erraztasunen erruz. Hau da: langileak inolako kosturik gabe kaleratzeko aukera ari dira baliatzen gaur hemen dugun gisako hainbat tailer eta enpresa ertainetan.

EH Bilduk elkartasuna adierazi nahi die gaur Modas Marialuzeko langileei, haien lanpostuen defentsan modu eredugarrian jokatzen ari direlako.

Azpimarratu nahi dugu, baita ere, Lan Erreforma honen ondorio latzak apaltzeko hainbat neurri hartzea posible dela. Erakunde publikoen kontratazioetan klausula sozialak bermatzea posible da eta posible da baita ere Herrialdeetako Lan Hitzarmenen defentsa egitea. Batzuk, ordea, nahiago dute Madriletik datozen politika antisozialei bide ematea eta lege injustu horiek aplikatzera mugatzen dira.

EH Bilduk, ordea, gobernatzen duen erakundeetan ari da dagoeneko neurriok bultzatzen. Era berean, enpleguaren eta lanaren banaketaren alde jarraituko dugu lanean, eta langileekin batera egongo gara lanpostuak defendatzen.

EH Bildutik oso argi daukagu egoera honen irtenbidea eredu sozial eta ekonomikoaren aldaketan dagoela eta herri honen subiranotasunerantz urratsak ematea dela gakoa, lan harremanetarako marko propioa izan dezagun.

Horregatik, aukera hau baliatu nahi dugu euskal herritar guztiei dei egiteko datorren larunbatean, martxoak 16, Bilbon egingo den manifestazioan parte hartzera. Eredu sozial eta ekonomiko berri baten alde, enpleguaren defentsan, EH Bildu kalean izango da. 17:30etan, Bihotz Sakratuaren plazan ikusiko dugu elkar.

https://fbcdn-sphotos-g-a.akamaihd.net/hphotos-ak-ash3/892698_619283818088938_1472824220_o.jpg

https://fbcdn-sphotos-g-a.akamaihd.net/hphotos-ak-frc3/894846_619283608088959_1932649652_o.jpg

https://fbcdn-sphotos-b-a.akamaihd.net/hphotos-ak-prn1/892296_619283474755639_396928830_o.jpg

https://fbcdn-sphotos-c-a.akamaihd.net/hphotos-ak-frc1/887503_619283488088971_235733170_o.jpg

https://fbcdn-sphotos-e-a.akamaihd.net/hphotos-ak-ash3/885693_619283588088961_59856238_o.jpg

https://fbcdn-sphotos-h-a.akamaihd.net/hphotos-ak-prn1/135179_619283698088950_1124515319_o.jpg

Berriak

Alternatibak Lanestosa zoriondu du Bizkaian lehenengo etxebizitza tasatuen promozioa jaso duelako alokairu eskuragarriekin eta erosteko eskubidearekin

Alternatibak Lanestosako Bilduren gobernua zoriondu du, Bizkaiko Foru Aldundiak 2011n hiribilduan eraiki zituen etxebizitza tasatuen salneurrian 59.000 eurotako beherapena lortzeko negoziaketan betetako paperarengatik. Ildo horretan, promozioak 130.000 euroko salneurriko etxebizitzak izango ditu, eta lehenengo aldiz Bizkaian, hauetako batzuk 400 eurotako alokairuan banatuko dira, eta erosteko eskubidearekin.

Alternatibatik behin eta berriro salatu dute foru etxebizitza politika, etxebizitza sozialen alokairua jasotzen ez zuelako, eta adreilua eta porlana Bizkaiko geografia osotik banatu dituelako enpresa eraikitzaileei men eginez eta eskualde bakoitzaren etxebizitza behar errealei kasu egin gabe. Gauzak horrela, alderdi ezkertiarrak negoziaketan egungo udalak izandako papera azpimarratu du promozioa entregatzeko salneurriak eta baldintzak ezartzerako orduan, hasierako baldintzak aurreko udalbatzarekin hitzartu zirelako Lanestosako benetako beharretara egokitzen ez zirenak.

Bukatzeko, Alternatibatik bermatu dute etxebizitza hauetarako sarbide baldintza definitibo hauek erakunde publikoek tradizionalki ahaztuta eta azken urteetan despopulatze prozesu larria pairatu duen landa herri honen indartzea erraztuko duela. Bide horretan, alderdi ezkertiarrak eragile guztien parte-hartzea eskatu du Enkarterriko eskualdea, lanpostuen suntsiketa eta nekazaritza ustiapenaren desagerpena gogor sufritu dituena, lokazti horretatik ateratzeko eta modu duinean bizi eta lan egiteko leku batean eraldatzeko.

Berriak

Alternatibak terrorismo finantzarioaren heriotza berria salatu du eta kaleak hartzera deitu du etxegabetzeen amaiera exijitzeko

Alternatiba Bizkaiko bozeramaile Asier Vegak salatu du “terrorismo finantzariak eragindako heriotza berria”, Bilboko gizon batek bere buruaz beste egitea erabaki duenean etxegabetu behar zutenean alokairuari aurre egiterik ezin zuelako: “Zeren zain gaude desjabetze guztiak geldiarazteko? Zer gertatu behar da larrialdietarako laguntza sozialek bere funtzioa bete dezatela eta pertsona batek ikusten duen irtenbide bakarra heriotza izateari uzteko?”

Ildo beretik, alderdi ezkertiarreko bozeramaileak salatu du “ez PNVren esku dauden Bilboko Udalak, Bizkaiko Foru Aldundiak eta Eusko Jaurlaritzak, ezta PPren Espainiako Gobernuak ez dutela etxegabetzeen afera konpontzeko benetako asmorik. Kritikatu ditu, halaber, “bankuek eta gobernuek erabiltzen dituzten eufemismoak hondamendi gizatiarrak aipatzean, sistema kapitalistak eraildako biktimez ari garenean, eta berau babesten duen estatua eskuak odoleztatuak ditu”.

Azkenik, Vegak mobilizazioekin jarraitzeko beharra azpimarratu du, bankuei zein gobernuei desjabetzeen amaiera kalean exijitzeko, horregatik, bere taldearen atxikimendua adierazi dio terrorismo finantzarioa salatzeko egiten diren elkarretaratze guztiei.

Berriak

Tratamendu Mekaniko Biologikorako instalazioak hartuko dituen hondakinen %80 erraustu egingo da

Joan den astean, joan den astelehenean, Jose Luis Bilbao ahaldun nagusiak eta Iñaki Azkuna Bilboko alkateak publikoki aurkeztu zuten hondakinen tratamendurako Instalazio Mekaniko Biologikoa.

Egun horretan EAJko ordezkarien hainbat adierazpen egin zituzten. Besteak beste, Bizkaian, beste lurralde batzuetan ez bezala, zabor sistemak ez diela bizilagunei arazorik eragiten. Edo, Bizkaiak Europako araudia betetzen duela hiru urteko aurrerapenarekin.

Bilboko alkateak eta ahaldun nagusiak garrantzizko kontu bat aipatzea ahaztu zuten, ordea. Ez zuten argitu hondakinek tratamendu mekaniko biologikoa jaso ondoren non bukatuko duten.

Hondakinen %80 birziklagarri eta hondakinen %80 erraustu

Argi utzi behar da tratamendu instalaziora iritsiko den materiala %80an birziklagarria dela. Aldiz, Planta Mekaniko Biologikoak jasoko duen materialaren %80 erraustu egingo da. Garbi dago, beraz, birziklagarria del material asko erraustuko dela.

Tratamendu Mekaniko Biologikorako Instalazioak 180.000 tona hondakin jasoko ditu urteko.

180.000 tona horietatik soilik 13.000 tona birziklatuko dira. Hau da, %7,1a. Gehiago izango da erabiltzeko aukerarik gabe geratuko diren hondakinak: %8,5. Artigas zabortegira joango dira, beraz, 15.000 tona hondakin. 58.000 tona, berriz, %32, hondakin inorganikoa izango da eta erraustu egingo da zementu fabriketan edo antzeko azpiegituretan. Gainontzeko 94.000 tonak hondakin organikoak izango dira eta 43.000 tonara murriztuko dira tratamendua jaso ondoren.

Murrizketa hori materia lurrundu egiten delako ematen da. Hondakin horiek, kopuru osoaren %52 denak, Zabalgarbin bukatuko du bertan erraustua izan dadin.

EAJren ereduak errausketa oinarri, Europako helburuen kontra garamatza

Beraz, EAJren eredu honek, errausketa oinarri duena, Zabalgarbi oinarri duena, birziklatze maila altuak bilatzen ez dituena eta hondakinen murrizketa bultzatzen ez duen sistemak, biztanleriaren osasun baldintzak larriki kaltetzen dituenak, ez garamatza inora.

Zorionez, Azkunak eta Bilbaok egin zituzten adierazpenen gisakoak aberrazio politiko gisa ulertzen dira Europako hainbat tokitan. Soilik ezjakintasunaren edo arduragabekeriaren ondorio izan daitezke. Eta agerian gelditzen dira, adibidez, Europako Ingurumen komisarioak, JANEZ POTOCKNIK-ek egin dituen adierazpenen ondoan. Komisarioak Batasuneko herrialdeei ohartarazi die birziklapenaren gizarterantz garatu behar dutela. Europatik, hain zuzen, edozein hondakin birziklagarri zabortegira edo errauskailura botatzeko debekua ezartzea ari dira aztertzen.

Beraz, EAJk Bizkaian garatu duen ereduak Europak ezartzen dituen helburuen kontra doa aurrez-aurre. Garbi esan behar dugu porrotera kondenatuta dagoen eredua dela, denboran jasangaitza baita.

Bizkaiko Foru Aldundiak bere ardura alboratu nahi du

Horregatik, EH Bildutik, bestelako eredu bat aldarrikatu nahi dugu Bizkaiarentzat. Birziklapen maila altua eta hondakinen sorrera murriztea helburu izango dituen sistema. Beharrezkoa da Bizkaiarentzako hondakin sistema jasangarria ahalbidetuko duten politikak martxan jartzea. Birziklapenaren gizartera eramango gaituen eredua behar dugu eta ez dago halakorik, justu kontrakoa baizik.

Horixe da EAJk Bizkaiko biztanleriarekiko duen betebeharra, helburu horiek beteko dituen hondakin sistema garatzea. Eta horixe da EAJk bere gain hartu nahi ez duen ardura eta adierazpen sinplistekin ezkutatzen saiatzen dena.

EH Bildutik Bizkaiko Aldundiari dei egiten diogu lehen bai lehen norabide horretan lanean hastera, beste lurralde batzuetan dagoeneko egiten ari diren moduan. Zentzu horretan, Ingurumen diputatuaren agerraldia eskatuko dugu Europak ezartzen dituen helburuak lortzeko zein pausu jarraituko dituen azaldu dezan. Udaletan, berriz, hondakinen bilketa eta kudeaketarako sistema eraginkorren aldeko apustua egiten jarraituko dugu hondakinen murrizketa, birziklatzea eta berrerabilpena helburu hartuta.

Berriak

Tas-Tas eta Hala Bedi irrati libreei buruzko bideo-erreportajea egin du Alternatibak

Alternatibaren Bilboko Asanbladako militanteek Irrati Libre eta Komunitarioen inguruko bideo-erreportajea egin dute, Bilboko Tas-Tas Irratiko eta Gasteizko Hala Bedi Irratiko ordezkariak elkarrizketatuz, beren eragin eremuetan gehien errotuetako hedabide alternatiboetako bi, alegia; hamarkadak baitaramatzate ahotsik ez dutenen ahotsa izaten, tokiko errealitateari begira FM bidez emitituta zein beren uhinak mundu osora zabalduta Interneteko emisioen bitartez.

Biak ala biak dira, gainera, Euskal Herriko hogeitik gora irrati libre biltzen dituen Arrosa Sareko kide, haien arteko elkarlana sustatzeko martxan jarritako proiektua, euskarazko irratsaioak elkar trukatuz edota beren kideen trebakuntza hobetzeko tailerrak prestatzen.

Elkarrizketen bidez, komunikazio proiektu herritar hauen sorrera eta garapena, Eusko Jaurlaritzak egin eta bertan behera utzitako azken lizentzia lehiaketa edota irrati libreek inguruko eragile sozialekin dituzten harreman zein elkarlanaren berri ematen da bideoan. Erreportajea Alternatibaren YouTubeko katean zein webgunean ikus daiteke dagoeneko. Euskaraz grabatu izan da eta 11 minutu inguruko iraupena dauka.

Berriak

Alternatiba | Ezkerra eraldatzearen erronka

X